KHAWTAW LUI AH

By ~ Gl Samte

September kha a hi ta a, ka khotaw ua luiluang nisa in a kap vak singsengte’n hin a tawldamsak mahmah mai, huai mun ah week end zang in hun leh ni ka siimsek uhi. Amun a nop mahmah ziak in kou khua lou, khodang apat le hong pai a tam thei mahmah ua, mahni lunglutna chiat ah khovel ka nuamtal uh ahipen mai.

Naupang ten hon ngaihnat ziak un lawm piching toh le ka kithuah ngei khawl kei ua, mahleh naupang apat sinlai tampi ka sinsuah. A lungsim siangthou tak uah gensiatna leh enghounate’n mun a luahthuk kei a, pichingte banglou tak in a ngaihdan uleh deihdan uh hangsantak in a genziau ua, phatna awnem toh i hasot leh mahni kimuang ngamtak in mailam a nawtmai zel uhi. Hiai hinkhua a poimoh, damsung kum zat dandi muhkholhna ahi.

Ka naupang tawnpihte tuileuh/liau nuamsa a chiak vengvungte ka etlai in ka nunglam apat Numei khat in nui chiuchiau kawm”na gei ah kong tu thei diam ?” hon chi a, ken le ka phal chih gen na di’n ka lu ka na sungau hi. Maitai mel tak in a nui seisai gige a, bangbang gen ahia chih le thei khawllou in ” imm” ka na chi zelsam hi.

Gim leh tawl a karkhat sung nasep zoh chia thawveng tak a hunzat khelah lou mihing kitawm ahi di, kou khua leh khawkimte kartawp teng in ka khotaw lui uah ka chiau vingveng sek uhi. Kar paisa a ka om na suang tung ah kei kia in ka tu a, suang tung a ziah pen neilou a thil ka gelhgelh lai in Numeinu hong pai nawn a, kamneem (polite) tak in ka bul a tut hon nget nawn ziak phal tak in ka na “aw” hi. Paulou in ka dai vungvung ua, sawtlou in “G.l tukar na zang nuam hia?” hon chi a, ken le “imm, nang ka min bang chi dan a thei eita”chi in ka dong kik a, sawtsim paulou a ka om nung un “kei min Jenny ei ve” a chi a, thudang gen nawn tuanlou in suang neu chikchik toh lui luang diaidiai a deng keuhkeuh a. Sawtlou in “G.l fel mahmah chia, na bul ah nawn tu sak a, ka va pai phot di ka u te’n hon ngaklah kha di ua” nui siusiau kawm a chi a, ken le” na chih leh a ke” ka na chisam a, en nawn kei mah leng apai ging ka zaaknawn louh ziak in paikhe mah ahi chih ka thei.Thawmhau tak a i om chiang in lungsim gim thuak ahak a, tangkhat kisak vawngvawng in ngaihtuah louh di hon ngaihtuah sak sek ziak in kartawp teng beek in Khotaw lui ah ka hoh gige hi. Jenny le hong hoh gige a, kihoulim tam law kei mahle ung a malam sang in ka pau tam zaw deuhta uhi.

Kiginni a hia, ka ngeina dan in khotaw lam zuan in ka paisuk hi. Ka om sekna suantung ah kei kia in ka tu a, hunlui mah ka ngaihtuah de du sek hi. Ngaihtuahna pawl a ka omlai in Jenny le hong pai nawn a, tangnel tak in “tuni chu na bul ah nileng in ki-om leh ut huai e” hon chi a, Ken le “na ut le na om mai kei dia, haksa loupi” ka na chi a, pau di zaw pen omlou in ka dai dedu nawn uhi.

A tutna kibawl rem kawm “Gl, pau utkei na chia” hon chi a, ken le “bang ka gen dia” ka chih leh,”Pau le teh gen di nei voi”`I gen teng thu ching hi loupi`”Thuching lou teng gen oh kon ci sam a”`I gente le pawtkik zel thou a`.”Pawtkik lou di’n a na ngaikhe ta leng“ Ngaikhete’n a za ua, a thei den kei sek uh“Thei ut kia hi lou a, keem ut le om thei eive”`A keem teng inle vengbit zou lou sek ua`”Vengbit di’n vanzat muanhuai a na nei ta leng la”`Vanzat le zat khel theih lai a`” A zatna di dik le a hun dik in zang le a khial law dia hia?”`Hun zang dik teng inle manpha dia zang tuanlou sek uh eive`” Manpha i chih zaw a lungsim neitu a hi maw ! Manphatna le miteng a kibanglou eive”"Lungsim mumal nei theilou di zen in lungtang naa leh Manpha kichi thumal in na hindan ah phattuamna a nei lai diam?`”Thil bang i pom dan leh laak dan a zir hi mailou maw?”`Pom dan siam a la siam di’n i thiltuah in zir kei leh haksa law lou di`.”Haksa i chih zaw baihlam dia i gintak louh ziak lel hi”`Ginna le thawn thei a.`”Ginna mah eive i dampih”"Ginna tengteng a thawn kei na chihna ei ve maw?`”Thawnlou di’n Ginna nasep in zui phot leh”`Gin ka nei kei a, kuamah gin di le ka thei kei, peellou di’n Ginomna i kiciam ua, kitaisan in sitna toh mihingte i kikhem sek uh`”Khemtu na tuah leh bangteng huam a nang zawltu, nang hong pan (zuan) tu nai chik a om mai thei eive”" Van a Nisat dan mangngilh di zen in gamsa hi kei veng aw`”Nisa le meipi’n liah thei a, zan cia nisa ngeilou eive, Gl ken maw..” a chih laitak in a u hong pai a, pai ut a hihdan hon gen a, hon paisanta hi.

Kum nih bang a kiveita. Ki ittak leh kikhelah tak a ka omlai un, ka lametlouh luat in ka Lawmnu`n pasal dang hon neihsan a, Itna ka hua a, natna tuntu mai hi`n ka thei. Ka lungtang a naa a, ka khuak a tawmawl a, kipahna leh maitaina in muhphak nawnlouh di hi leh kilawm in mual hon liamsan tuaituai un ka thei. Bangteng in lung hon len a, lunglen nem di’n bangkim in chitna a nei ngal kei ua. Nunlui geel in hunlui hon phawngsak a, hunlui in mittui a sam pawt zoihzoih sek hi.

Kingaihsiatna in hon matkhak nawn ziak in bangmah utna ka nei thei kei. Inn ah kei kia in ka kikhumchip a, khotaw lui lam zuan di’n hatna le ka nei sam kei. Inn a om-om sah chi in ka Pute kholam ah sawtsim tak ka zin hi.

Kha thum (3) bang hong kivei nawn ta, Jenny muh le ka ut sim ziak in khotaw lui ah ka diang suk a, Jenny mel himhim muh di a om kei. Kartawp teng in ka hoh a, Jenny leh huih muh di a om kei.

Khotaw lui ka hoh teng a ka bul a hong tu pah sek hia ! Tua Jenny melmuh di om nawnta lou chih ka theih in ka na ngaina mahmah chih ka thei khonung phing hi. A khua uah ka va hoh a, a inn uh mi ka dot leh a inn-khang mahmah ua a na om dan ka na hi hi. Lametna lianpi toh a inn uah ka va lut a, bang dang gen se lou in `Jenny om hia?` ka chi a, a nu a hi di Nupi khat in hon na en dedu a, dawnna ka muh louh ziak a, ama sang a ngaih zaw in ` Jenny om hia` ka chi nawn a, kap hawmhawm kawm in Jenny om nawnlou. Hon mualliam santa a chi huhut a, lamdangsa in ka dak heihuai maimah hi. Kap nelnul kawm in `G.l na hi di maw,. Ka tanu in ka vangphat leh tangval khat hong hoh dia ka itna thu nawng na gen sak di hon chi eive, nang ziak in karteng in kipaktak in hun a zang sek a” a chi pipilh hi.

Jenny a dia ka hih theih nanung/tawp pen chi in kartawp teng in Khotaw lui ah ka hoh gige a, heh hilou a hinkho paidan gen a ka kinial sekna uh Suang tung ah ka lum nilouh sek hi. Pangpalek hong leng delhdelh te khawng Jenny hi di’n ka na ging a, Jenny nawn itna thu gen ngamlouh na di zen a kei zahtak huailou kei ve ” LAUKHA BEK IN AW ka na chisek hi.Mikhat na muh chiah muh zihzeh na ut am? A mel na muh mai in le kipahna hon pe sek hia? A ömdan peuh nalh/ hoih na sa am? A kiang a om na ut gu giugiau sek hia? Mi tengteng sang a fel zaw in na thei sek maw le? Hoih na salaw vele maw? Na deih a ki im koh !!!

Na ngaina panta, Hoihsa Ngaina Deih It. Na theisiam mai am? Na It a eivoi, iim ken la, zakta koh, gen inla Na itna thu hilh aw, a kikhelma in. Ginomlou khat na tuah ziak kidawm kun ken la, lametna toh kalsuan zaw in. Nang hon ittu diktak na chan/tan zaw kha di.

©Siamsinna leh Vakiangbu