SIHNA’ ZUAK LENG A KIKHAWNG DIAM??
By ~ Sang Quptong
Khatvei ka nu toh inn ah ka om ua, aman
ka kiang ah Dumzial/Laizial/Nahzial azuak ding a zial hi (Huchi khawng
zial mehman d khawng a ka zatzel uh ahi. Lou lampi khawng a le kou atate
hon khual ziak in van gik paw kuihkuih kawm in a zialzial mai). Ka nu
tha-it tak a Nasem a omlai ka sam a, ‘Nu, Sihna zuak leng a kikhawng zou
diam? Innsung khawng a sihna hon tun di kideih hetlou a nan theihtawp a
kinang a i damlouh chiang bang a dam ut a Doctor kinaih pahpah hi a,’
ka cih leh. Ka nu’n le kindeuh in ‘Sihna zuak leng akikhawng mawk d’ hon
chi hi. Ken le nuikawm in, ‘Nu na Laizial
zial pen le Sihtheihna chikhat, mi awl-awl a that ahi, huaite zuak chin a
khawg zel na hih le chu Sihna zuakzou himai lou d maw?’ ka cih leh agen
di atheinawn hetkei hi. A khonung in ka kingaihtuah thak a, ka
kisuanglah thak sim, aziak ahihleh, huai a amuh sunsun te Kou atate adia
phatuam di a angaihtuah ziak, kou hon khualziak a Laizial zialzial ahih
ziak in.
Ei mimawl ngaihtuah dan in kuaman Sihna
lei nuam di un a gintak huai kei. Sihna zuak cih le om thei ding in a
gintak huai kei. Sihna in i bangkua sung hon sawk dek chiang bang in sum
neihlouh tantan seng in dal chihtak in i dal a, zintunlouh theihlouh
hun hong om ton a om hi. Huchi ahihman in sihna tuh zuak thil ding a i
ngaihtuah leh khot ngap huailou pente lak a khat ahi.
Himahleh, mite’n sihna a sumdawng in,
sihngam a pang trantran pawl zong beilou hi. Sumsinna dia a lawk pawl
tak hiven. Bang i gennopna ahia? Sihna tun thei thil zang a sumsinna
tuh, sihna zuak toh kibang ahi. Tuailai melhoih taktak tampi Khamtheih
ziak in hanmual ah i vuiliamta uhi. Khamtheih omkei leh a sinai kei ding
uh i chi ngam ahi. Huaiziak in tuailaite’ sihna ding damdawi zuakte tuh
sihna zuak toh kibang uh ahi chi nuam dan i hi.
Niteng phial in News ah, khemtheih kiman
cih hong kitaklang gige phial hi. Ei Zomite kia in i buaipih uh ahi kei
a, Manipur, India leh khovel pumpi in a buaipih uh ahi. A doudal di a om
Police te tanpha khamtheih Zuakna a kigolh khawng a hong kimatkhiat
hial chaing in chu Khamtheih Inntek law mahmah ta ahi cih aciang. Hiai
damdawite tuh, awl-awl a mithahna vanzat ahi. Indirect tak in Tualhat
ahi uh chileng a uang law kholkei ding. Chizauna neuchik leng neilou a
sihna zuak uh ahih ziak in.
Galvan zuak a kipeina bang leng, sihna
zuakna a sumsinna chikhat ahi nawn. Hiai a galvan zuakte’n Gamsa lauhuai
thahna ding a azuak uh ahi kei a, aleite’n leng Pathian in amau batpih a
abawl, amihinpihte thahna dia alei ana hi maimah hi. Chizau huai !!!
Leitung a i thupi ngaih mahmah Gam~America bang leng sihna zuak hahpan
lawi mahmah khat ahi. Tu’n Syria Gam buai pen amau ‘Golden Chance’ a la
in Helpawlte’ kiang ah sihna tampi a zuak uhi. Helpawlte’n leng sihna
lei uh ahi top mai. Mi bangzah in ahinna uh a taanloh ua cih suibut ahi
kei.
Tuabang thilte leitung kivaihawmna dan
hong kikheng mateng, i thuak nilouh lai ding. Himahleh hiai gitlouhna
tengteng omsakpa SETAN mat ahih khit ciang in, kivaihawmna dan thak in
leitung hon luah ding a, huai tuh Kumpite’ Kumpi Jesu vaihawmna, Kum
1000 lalgam ah ahi pan phet ding hi. Unau, Sihna na zuak kha hia? Sihna
bangzah na leikhata a? Kisik in Toupa kianglam zuanthei leng, Aman a
ngaihdam zohlouh hiai leitung ah omlou ahi.
—Kakipak—
©Siamsinna leh Vakiangbu
Comments
Post a Comment