BANGZIAKA
By ~ Mwan Gwite
Nitak khat nidang banglou tak in ka lumbaih zezen hi. Huchia ihmu pahlou
in thu tuamtuam ka ngaihtuah lai in ka ihmu kha chu ahi ngei ding…
Pa Pa tuiduh ci a kap ging in hon phawng
hi. Lupna gei a bottle a tui om ihmu kawmsa in ka pia a, huai hun
zinglam dak 2 vel hita di’n ngaihsun ing.
Pa Pa vot ka salua chi in ka tapa kum 6
vel ding mi ling keuhkeuh zezen in kap pulhpulh hi… A lu ka khoih a
Karei… salua kisa in ka phuzot zezen hi. A Chii salua in a danghul gawp
zaw hi ngei ding….
Ka thoukhia ka Lawmnu (jiji) phawng in
damdawi bawm ka va et leh Digene & Avil chih louh damdawi om ta
lou…! Ka tapa lah lupna tung a a chii lah sa lah votsa thuum hithit in
liing keuhkeuh mai hi… Numei zaw mittui dai chih mahtak in beidong kisa
in A nu chu kuun ngeungau in a mittui guk nul zel hi. Ka theisiamlua, a
tapa leh kei muh di lau a amittui guknul ahi zaw hi…
Kipasal sak in, Damdawi koi hiam ah
muhtheihna om khakleh ci in, kuate va phawng di ahi de aw or Damdawi inn
manoh ngal mai di? Chihte ngaihtuah kawm in ka pawtkhia
hi.
hi.
Innkong ka kaan nung sawtlou in . . .
Innsung thawm ging hong lamdang mahmah hi, Bawi, Bawi bangchi? Ka
ngaingam kei, Bawi ! hon paisan ken aw!.. Bawi… Bawi… chih kah thawmging
in ka lungtang hon vut chenchen hi. Innsung ka dianglut ngal a ka tapa
chu mihing a tang zou nawnkei. Tunglam programe nialvual ahita kei.. A
poi ngei maw… ! Tapa nei chi kipak mahmah zaw hive ung.. Toupa na lemgel
dan zaw a lamdang tel mai maw!
Zingkhua hong vak a, nidang a a Papa
khuavak ta thouta ni chi a hon phawngsek ka tapa in lah hon phawng nawn
talou, a khangma hi’n teh chi in..Ke’n leng Bawi, khuavakta thouta diam?
Ka chih hang in a phatuam nawn kei… Khovot, Chisa leh Natna kici
omlouhna gam ah khuavakma in hon na paisan maimah hi..
Pa Pa na zin chiang in Ballboot leh
Football hon puak in aw…chi a phur mahmah hiven! Bawi kon puak di aw,
tu’n le ka va lei ngal di aw, ‘BANGZIAKA?’ Chi mailou ka hi de aw… Ka
ihmut suak Papa hon paw ve na chih lai a.. Ka kawng nalua va lummai in
‘BANG ZIAK A’ hon chi ka hi de aw.. Bawi, tu’n zaw hon puapua in ka
kawng kitan hial leh le ka ut tel mai! Nektheih hon leisak ve PaPa na
chih lai a Sum ka nei kei ‘BANG ZIAK A’ chi sese ka hi de aw… Bawi!
Excercise bu khat leh pencil khat tawi in PaPa motor lem, Vasa lem,Tiger
lem, Lion lem..hon gelhsak ve na chih lai a ‘BANG ZIAK A’ ka gelhsiam
kei ana chi sese ka hi de aw…! Nang nalhsak mahmah di khop a zaw
gelhthei sam di hi ing a maw Bawi… PaPa nang chu khovel a hatpen maw le
chi a hon muang mahmah hive chi’n… Sihna apan hon hunkhe zou ding khop a
hatna neilou ka hihman in hon ngaidam in aw Bawi! Meh duhlou in na kap
a, na nuak a.. Meh duhlouh neihlouh di na duh kei leh ne koh ‘BANG ZIAK
A’ hon chih khum maimah ka hi de aw? BANG ZIAK A na meh duhte thei zenpi
a hon leisak mailou ka hi de aw… Bawi, Bawi na duh genthak himhim dih kon huansak utlua, na deih
genthak himhim dih ka neih in daihkei leh le ba zen in konleisak
utlua……!
Awle, ka theisiam ta, Pathian vaihawm ah
lungkimlou thei vual ka hikei..! Ka theisiam ta, Ka theisiam ta! Hilele
‘BANG ZIAK A’ chih thumal ka lungsim ah ging den ding hi.
[ Mite' gen zaw ana dik mah e... Sihna kici a thuakkhate kia in theisiam a chih uh.]
©Siamsinna leh Vakiangbu
Comments
Post a Comment