ITNA THU

By ~Vz Vualnam

Tangval khat in nungak khat deihta mahmah zaw ahi ding a, hichi’n achi hi:

Sunchin na pheiphung tang bang khap
Zanchin na ang a sam bang zaal
Lungchim omlou na tongdam saan
Zuan meel theilou na siang a hei
Tang kei aw sunchin ka sialnou hi
Zanchin ka zalmang hi e

(Sunkhua a na phei kham a om, nitak teng a na ang a lup, chimtaak himhim omlou a nang toh kihou, lungzuan himhim omlou a nang toh om, sunkhua a ka ngaihsutna ahi a, nitak teng a ka mumang ahi).

Melhoih sa lawtel zaw hi ding hive’n, hichi’n zomsuk hi:

Sianmang’ banzaal zatam lai ah
Ni bang na luun tuam hi e
Silpak nang hon siing ding omlou
Singta’n lam bang hon veel lai in
Tang liang ke’n zong hon veel ing e

(Pathian’ thilbawlte lak ah na hoihtuam lawtel a, paakte’n leng na hoihna khingzou kei uhi. Mite’n ahon et huthut lai un, ke’n leng ka honna gal-et hi).

Tua nungaknu’n amah bang ngaihsut khaak in anei zel de aw chih bang ngaihsut in nei zel hi:

Melmak tangpa na sinlai ah
Kotsial bang k’ong suak sam hiam aw
Singdang sial in na vul zaw hiam
Singdang sial a na vul leh aw
Vullouh sunni hong suak hen aw

(Thei ngeilouh/muh ngeilouh tangvalpa na lungsim ah ka hong suakkha zel hiam? Ahihkaleh midang ngaihsun/ngai in na thaneem hiam? Midang ngaihsun/ngai a vul na hihleh kipahna ni hong suak hen. ‘Theihngeilouh tangvalpa’ achih in facebook tungtawn khawng a kithei uh hipeuhmah ding in ginhuai hi).
I it i ngaihte a kipah ding mah uh i deihpen hive’n, aman zong hichi’n chi leuleu hi:

Al bang dah mel theilou ding in
Sian in haam bang hon huai hen aw
Lung na deih chih tui bang tung hen
Mu bang na ngaih li bang ching hen
Nunnopna nang a tuam hi hen

(Dahna himhim theilou ding in Pathian in hon vualzawl hen. Na deih leh ngaih peuhmah nang a hong hizel henla, kipahna nang atuam mah bang zezen hen).

Huai teng agen zoh in hichi’n khin hi:

Hizong hiai mim bang ka thumna hi
Nun na nopna ka hih ding
Nang na nunnopna na hih bang in
Mu bang hon ngai lua’ng e

(Himahleh hiai ka thuumna ahi- na kipahna ka hih ding, ka kipahna nang na hih bang in. Maizen ka hon ngailua….).

©Siamsinna leh Vakiangbu