SOLNOU

By ~ Vz Vualnam

Thil na deih mahmah uh, lah tangzou hiam neikha ding hiam a na kigintaak hetlouh uh na mu un na tuakkha ngei uh hia????

Zan kikimkhen solkha kai nuai
Khunlan a maimit singmoh a
Khang chiaului neen a ka leen leh
Damtui tung ah solnou nga bang na bual ve’n
Tang liang in laam bang veel chim lah ngawn ing
Solnou thangvan vangkho nuam a hei aw
Simlei mu bang angai saam hiam chi’ng
Hong tualkum a ka siang damtui a hong bual
Tangliang in tem bang deih ing e
Ka baanzaal in huai nuam ing e
Tem bang deih hal haam bang huai nuam hal in
Sawnbaan khaak ngam la’ng huai ngam la’ng
Ka siang a hong bual solnou ka chih
A vaang hi e tak in lah thangvan ah hei e
Ka siang a hong hei a vaang sawnbaan khaak le’ng
Damtui a bual solkha vaang etlawm
Zingdai bang athen lunglau ing e
A neen a zansawt laam bang veel phata zaw maw
Sawnbaan khaak zingdai bang then phata zaw maw
Tang liang in sa bang tat na’ng hawm maw’ng
A neen ah laam bang veelveel ta leng lah
Lenkil kia al bang mang peet ding aw
Al bang mang ding solnou i siang ahei lai’n
Sawnbaan khaak lunglau dahta ni e
Nau bang hon saan leh sau ah tumpih ni e
Al bang aman leh lung in ngilhta ni e.
—————————————–

Zansawt nung a khavaak nuai a ihmu theilou a innkhang a lui kiang a ka va vaak leh tui tung ah khapi ana kilaam deldel a, ahoih in a deihhuai mahmah a ka enchim theikei hi. Van mun nuamtak a om khapi leng khovel utsaam ahi de aw? Hong kumsuk a ka kiang a om tuh ka deih mahmah a, ka khut a sawk in ka la ut hi. Himahleh deih mahmah le’ng le ka sawk ngam kei. Ka kiang a hong om khapi ka chih a vaang/lim leltak ahi a, a taktak bel van ah a om veve hi. A lim ahi a, la ding a ka sawk chiang in a lim kilawmtak tuh amang mai ding ka lau hi. A kiang a tu a et-et mai hoih zaw hia, aman-leh-man chia khut a la ding a sawk hoih zaw hia ? ka gamtat dingdan ka thei bun kei. A kiang a om in en-en leng le lah hon tumsan a hon mansan thouthou ding ahihchiang in i kiang a a omlai a la ding a khut a sawk ding lau dah mai ni. I laakkhaak leh lah inn ah i paipih dia, aman lelah i mangngilhsuk dia himai.

 

©Siamsinna leh Vakiangbu