PU KHUP TEM KA PA’N HON PIA

By ~ Gl Samte

Mi bang a tuni zaw ka gim inn ah kong om maimai di chi theite ka hikei a, tawl ziak a semlou theite le ka hih louh ziak in nasem di’n ka kuankhe nawn hi. Ka nasepna uh ka tung a, a baih deuh lai ziak in Laizial tep kawm in ka tu pheuphau a, ka khanglam apat Puteek samkang thiuthiau hong paitou a, ka omna lam zuan a hong pai zel ziak in ka seppih di ahih ka ging sim a, a dik chih chetna di hileh kilawm in”kong kuan hak hia? An nehak law kha ung a.” Nuihmai tak in a chi hi.

Ka nasepna pa un sep di a gen zoh in nasep kon pan ua, teek mah leh zuanzangtak in a taang lelep peih a,” semkhawm di i hih leh min kihilh le. . Kei Pu Khup hon chi ua, bang chin kon sam dia?” hon chi a, ken le ka min ka na hilh pah hi.

Niteng in maitai tak in hong kuan gige a, mi paunuam tak leh kipezou tak ahih ziak in abul a sep le a nuam mahmah hi. Fel in thanuam law mahleh lamdang sakna ka neih khat chu bang dia Puteek nasem dia hong kuankuan ahi di? Thanuam law mahmah, semlou a om siamlou ahih lele mi thunuai a sem kutkut lou in a inn uah tawldam deuh sep di zong mai leh. Ka lungsim ah dotna tampi a om a, nuam sa kei sim mah leng ka theih ut luat ziak in ‘Pu Khup, kum bangzah na pha ta’ ka chi a, “tangval mah mah lai, kum 68 ka hi” nui hemham kawm in hon chi a; Ji le ta neih leh neih louh thu ka dot leh hi chin hon gen a.

Kum 20 ka phak in Indian Army ah ka lut a, hiai le ka tem a hi, ka omna lam peuh ah ka keng gige. Ka gou manpha pen ahi. Ji ahihleh kum 26 ka phak in ka nei a, ta pasal 2 ka nei uhi. Deih tuntun mahle ung damtheihlouh ziak in ka nei thei nawn kei ua, tun ka tate’n ji a nei tuak ta ua, amau toh khosak khawm ut mahle ung, kou kia’n ka om thei na du a chi tuak ua, inn hon tuansan ta uh. Na pi Niang toh ka om ua, haksatna tuak lawmlawm lou in tutan ka om thei lai uh. Pathian a hoih a, ka sep di hon pe zel a, ( a kuun suk a, a mit hah hong mial khimkhem sim mahleh sawtlou nung in) mi hampha ka hihdan maw, Toupan tapa hoih taktak, mahni kimuang ngam, pate etkol ngailou hon pia a, khamuang tak a om thei ka hi. Nuihmai tak kawm in hon chi hi. 

Lamdang ka sak mahmah nawn ahihleh PuKhup hehlam thei ngeilou ka hi. Thilkhat gen leh nui hiahhiah kawm a gen a, maitai tak in a om gige thei. Huai ahi a hauhsakna.

Nikhat ngaihzawng ka neih leh neih louh hon dong a, ken le ka neih louh thu kin a kin in ka na gen phuau a. Nui khiahkhiah kawm in “Ken la ka nei a” hon chi a. Ken le nui heuhau kawm in ‘ka Pi Niang toh kikhen u maw?’ ka chih leh “hon ngaihsaklou lua a, hon ngaihsak deuh khak leh chi in a dang ka zong a, zan nitak in ji thak ka nei, Pi thak nei nawn nei mai ve, na PiChing di ahi” a chi phuphulh a.

Kartawp nasem tawp lawh lak ni chi’n bajar ah meh lei di’n ka kizui nawn ua, kartawp teng a sa lei gige ahi. PiNiang toh a kitenlai un “na piNiang sa duhte lei ni aw a chi a, Aksa hon leipih gige hi. PiChing toh a kiten nung un le Aksa mah hon leipih gige a, a jite sa duh le kibat tuak mahmah.

Sep di omna lamlam ah ka semkhawm ua, lamdang nawn mahmah dang chu kar teng a Ji kheng. A dang nei le hituanlou pi Niang leh PiChing hi gige. Hiai numei gel mawngmawng, mi lepchiah pi khat hi un teh maw chih sim a om.

Pu Khup nang tangval kichi le te le iim se louh dia Upa hi ta. Bangchidan e, kar teng a Ji na kheng gige’ ka chih leh “na naupang lai a, na theisiam kei a eive, gim leh tawl a nasem ing a, inn ka pai chia nuihmai tak a hon na vaidawn thei ka deih ziak ahi. Khengkheng non chih le dik mah, hilele maw, lungsim damsak siamsiam in tha le damsak thei ua, khengkheng mah ka hi” a chi hi.

Karnih bang puKhup mel ka mu nawn kei, a Ji buaipih hi lel inteh ka chi phet hi.

Nitak dak 8 bang a hi ta, ka phone hong ging cheucheu a, ka lak leh numei khat in “pu Khup tapa na hi hia, damdawi inn apat ahi. A gim sim mahmah a, na min hon gengen a, a kinlam in nong pha thei diam?”, hon chi a, kei le damdawi inn lam zuan in ka paipah hi.

Damdawi inn ka tun in peihlou sasa in hon na en liailiai a, ” Nong kilang khongkhong maw?” haksa sa pi pi in hon chi a, kisiamlou tak in ” pu Khup na damlouh lam kitheilou a, nang na phone number hon pe ut ngeilou neih chia, na tanchin kan dan di le kitheilou eivoi’ ka chi hi. “hmm..Damzou nawnlou di ka hi ta ve kei zaw” a chi a, a nuihmai muhsak hon sawm mahleh haksa a sa ta. “puKhup, mawkmawk, dam zenzen e, dampah di nei voi’ ka ci sam a, himahleh, lametna ka nei tam kei.. “hmm..im…ka tapa na hi thei diam…hehpih in PA hon chi ve..” haksa sa pi pi in a chi a, khasia kidek teitei kawm in ‘ka ut lua, ken le PA chih di ka nei kei. Dampah di na hi aw PA..’ ka chi hi. Ka mittui pawt a muh ka phal kei, ka damsung a ka PA neihsun muh ka phal kei a, lehlam nga in ka kidik huhut hi.

“hmm..Bawi, ka tapa, kap ken la, hon ngai…khe dih.., ka gil a gah ka ta…te’n kei sang a, a Jite uh a it zaw ua…, leitung zaw….Bawi, na Pa hih ka chin kei ngei maw. . . . Hon sihsan di ka hi ta ve.. Ka luang…ka tapa inn apat vui in om hen la, ka inn zaw na deih dandan in..Ka tem a na kem in aw… Pau di a om nawn kei. Lungim na kar ah khamuangtak in a kha in leitung haksatna a pawtsan ta. ‘Pa non paisan baih ngei maw, Pa kon chih sung a sawt kei ngei maw,. Toupa ka Pathian, Pa nei di’n vangphatna ka pianpih kei a hia.. aw PA, PA EI, NON PAISAN BAIH NGEI MAW chi in ka kap huhut hi.

Ka Pa deihdan in a luang ka inn ah ka la a, ka inn apat ka vuikhia hi. Ka Pa inn ah ka va hoh a, kong ka hong leh lemlak lianpi nih ana kitak a “KA JI IT, NIANGCHING” cih ana kigelh a, paak kual ana kibat ngiungiau a, khat pen zaw etmai in le kitenna lemlak ahi chih ka thei a, KITENNA SIANGTHOU VUALZAWL IN OM HEN’ cih mi muhlouh di lau hi leh kilawm in ana kigelh hi.

Ka khitui dan vuallouh in hong luangkhe zoihzoih a, aw Pa mi hehpihhuai nana hi ngei maw. . . . ! Ka pa’n karteng a Ji nei ka sak leh midang nei hilou a, na piNiang, piChing a chih pen, a Ji it, ka pi, NIANGCHING ana hi zaw, gim leh tawl a nasem ka pai chia maitaitak a hon na vaidawn a chih chiang a a kitenna lemlak uh en hi dia, hon hehsan a chih chih le bangdang hilou a lemlak khatpen a et ziak hi zaw dan ana hi. Pa lungzuang, thawmhau in hun na zang munmah di maw. Mittui paak nilhnelh kawm in ka chi a, khanglam ka ensuk a, a suan mahmah TEM baang ah ana kisiat a, ka la a, Pa na tem ka na kem di aw Pa, hon ngaidam mahmah in aw, Pate enkol peihlou di zen in Tapate ka kiphasak ua, Hon suangtu sah numei thuthei ka it zaw naak uh. Tawldam tak in na omta dia, na it na Ji kiang khamuang tak in om in aw..ka chi a, PU KHUP TEM KA PA HON PIAK LA IN THAWMHAUNA INN KA PAWTSAN TA HI

©Siamsinna leh Vakiangbu