GINLOUH HUIHKHI

By ~ Vz Vualnam

Mikhat a nnasepna mun a bang huih in va muutkha a laizang hiam ah hichi’n a hon chi hi:

Khohlou a mazam zaitha ka neemlai in
Ginlouh malgam pan zouhuihkhi hong lang ve’n
Tang ka sakduang hon sem hiau e
Ka selung hon lawng e tukawl tawi laan bang nga’ng
Nunnuam ka sinlai nau bang hong nui e
Ka lakmai kammei bang peh e nau bang nui ing

 

=>Ka nasepna mun a thabei a ka omlai in gintaak louhpi in mallam apan zouhuihkhi a hong nung a, a hon mut hi. Ka lungtang hon muutkha a, ka nasep ka khawl zezen hi. Ka lungsim kipahna in a dim a, huai in ka muuk a hon pehtou a, ka nui hi).

A seppihte bang in amelpuak hong lamdang na e achih ding uh kizephawk in:

Khohlou a ma bang zaampih vual lungtuak aw
Tangpa ka lakmai suah dang na chi hiam aw
Ginlouh zouuhihkhi’n hon seem ve’n
Selung lawp ing e nau bang nuih gawl bang khaam maw’ng
Laukha nun anop ni’n suangzaang ing e
Sunni tum kuan mazap zaitha tawl ngilh law’ng e

 

=>Ka naseppihte aw, ka melpuak hong lamdang na chi uh hia? Gintaaklouh huih in a hon muut a, kipaak a nuinui kha ka hi. Ka kipahni’n ka zaang mahmah a, nitum a nasem a om gim chih leng ka theikei hi).

Kipaak lawtel ahihman in midang leng ahuchi saam ding ua aw chih bang ngaihsun hi:

A mi aw, singta aw, vangkho tuangvual aw
Nang na sakduang ginlouh huihkhi’n hon seem hiam
Sunkim ngiahsial sawl bang vullai
Lungginlou huihkhi’n tanglou bang hong phawng hiam aw
Tanglou bang phawng in zaitha na nuam hiam
Nun bang nuam in khuakiim lung in na ngilhzou hiam

 

=>Mite aw, nou leng gintaaklouh huih in hon muutkha ngei hia? Sun khawng a lungzuang a omlai gintaaklouh huih hon phawng ngei hia? Hon phawng in kithalawptak in na om ngei uh hia? Kipaak kisa in kiim-le-kiang le phawklou zen in na om uh hia?)

Mihingte zaw i kipah tawpkhawk lai in leng i lungsim in banglou teng suut a adahna ding maikhe teitei tel a:

Tu a hon seem mu bang ngaih zouhuihkhi aw
Nuachiang ziingdai bang theu ding hiam chi’ng e
Ziingdai bang theu in mazap ah
Tang liang nang ngai in tumtai bang ka vul diam chi’ng
Sunkim nang ngaih in zang gu bang zen ding aw
Ginlouh huihkhi aw phamdong kei di’n hong lang aw

=>Tu a hon muut ka deih huih nung denkhawng chiang in ahong theu maimah de aw? Hong theu in nnasepna mun ah thazoi in ka vul maimah de aw? Sunkhotawn a nang ngai a om in gu bang hial a nasak ding a, lam-etlouh huih aw ka sih dong in kei a di’n nung gige in).

©Siamsinna leh Vakiangbu