DAWH-AI HEKSIAM
By ~ Sang Quptong
Zing ninou kilawmtak hong suak in, Lianpu te innka tau hon khohkha
sitset ta hi. Lianpu pa leng a innka tautung ua Suangtaat lianpi khat a
koih vetvut tung uah tempawng taat heuhheuh in tu a, liing sim keuhkeuh
zozen hi.
Phalbi zingkal ahi a, January khabul
lakvel khawng hi di’n a gintakhuai hi. A omdan tak bel, Lianpu te
Innkuan Zoudawn a teng ahi ua, khosak haksatak, tanau-laina le
neizoulou phial ahi uhi. January kha vot mahmah himahleh, Lianpu’n apa
lou nasepna zuiden hi.
Hiai kum a, alou vatna uh ahihleh dailing
bulom lak, kuamah deihlouhna ahia, vat leng vat hak se hi. Lianpu pa
ahihleh atha le hat nawnlou ahihziak in loulai le doklou in, mi vat
nuamlouhna khawng uh vaat in ,ana khawsa tou zel dan uh ahi hi.
Lainpu te unau mi 2 apha ua, amah upapen
ahi a, anuai ah Numei khat Kimboi kichi om hi. Anu lah Damtheilou,
Sungna nei ahihziak in, atha atawl zek chiang in Bahse pahpah a, Lou
nasem zoulou in inn-ngak in pangden hi. A nu kizenlouh ziak leng ahi
dia, Lianpu naunu Kimboi a fel mahmah a, naupang chik himahleh, Khawkiim
khawng ah sing keu, ahiangneu chikchik te ana tomkhawm zel in, ann
huanna di khop zaw sing ana ngahngah sam hi.
Lianpu te tenna khua ahihleh, khaw lian
lou ahi a, Guite Road in a totkhakna ahi hi. Akhua ua Cl-VIII tan om
ahihman in, Cl-VIII hon zoh tak in anu leh pa kipahna himahleh A guuktak
a lungkhamna leng ahi hi. A naunu ahihleh, Cl-V simlel ahi a, lai
siamthei kei mahleh, asimlam hahbawl in, a pawl bel ana kisuansuan sam
hi.
Hunte hong paizel in, Lou vatkhawng hon
zouta ua, A nu toh Lianpu, Lamka lam ah maban Laizilna lam ngaihtuah
kawm di leh ki-ensak di kawm in hong zin uhi. Kisuanlahna lianpi toh, a
Pute (A pa-Nu’ Naupa) te inn ah hong kinga ua, Lianpu mi zahkai ahihman
in,’Ui Mikhual’ mah bang den hi. A Lung buaihuai mahmah khat ahihleh,
Lianpu Admisson bawlna di leh Anu ki-etsakna di sum koi a laak di chih
ahi leuleu hi.
A nu’n Lianpu kiang ah,” Bawi, Kei zaw a
teek kuan le ka hi ta a, ka natna lah tamlua ahihciang in, sawt le hon
dampih tuanlou di ka hi a, huai ziak in, ki-ensak leng le phatuam
nawnlou di ahi. I sumneih sunsun te na Laizilna a di’n i koih dia,
Officer liantak nong hih ciang in kon dampih laileh Doctor ka ki-ensak
na di aw.” chi in, mittui a mit a vung kilkel kawm in anu’n Lianpu kiah
gen hi.
Hunte hong pai zel in, February kha bang
hong hita hi. Lianpu nu leng Innlam a pai ding in hong kisa a, a Pute
kiang ah, Lianpu hoihtak a ana etkolsak a, apoimoh na lamlam a zang a,
sawl zel ding in gen hi. A ziak ahihleh, Innluah a omsak di lah Muanhuai
nailou, muanhuai hita tawk leh leng Innluah man di koi a lak di chih
ahihziak in, aloutheilou a apute kiang a, a om a ngaita hi.
Anu paikhiak ni zing zaw, Lianpu alung
aleng khopmai. Station ah a nu a va kha a, Innlam a anau leh apa angaih
toh, anu’n paisan zomah di ahih toh kingaihtuah dedu gige hi. Aaknou, a
pi’n a sihsan mahbang in, Apute inn ah hong omtou a, Skul kailouh sung
chu nasep theihtheih sem in a tu maimai man kei hi.
Nitaklam khat zaw, nitum di kuan in,
mualtung a ni tum khedek a en a, a mittui khamvual louh in a taakkhe
keuhkeuh mai hi. Mite anu leh pa toh nuamtak a omkhawm ua, anuam a haksa
thuakkhawm hi ua chih khawng ngaihtuah in, huai nitaklam chu hon zang
beita a, huai nitak in lai le simpeihlou top in alum pah mai hi.
Hunte hong paitou zel in, Kumkim exam
bang hong hun dekta hi. A vengte uh, a Classmate te uh leng hi, Numei
melhoihtak khat a om a, huai numeinu ahihleh apate hauhsakna zalzou in
nuamsatak in a om hi. Lianpu bang simmoh bawl toh ngaihbawl athuah zomah
lai a, a khenchiang in Lianpu Note khawng kheel in sawtpipi akem sek
hi. Lianpu in lah ngen ngamlou in, a thuthu mang biambiam maimah hi.
Lianpu in, ‘a zawngte zawng den lou dia,
ahaute hau denlou di’ chih thei ahingei dia, a lawmte kiang ah,’Innkuan
zawng leh khosak haksatak ah ka na piangkha a, huai pen keimoh hilou
ahi. Himahleh, ka sih chiang a, zawng leh genthei tak a ka sih leh
keimoh hipan di ahi” chi in Kuhkaltak in lai hon sim charchar hi.
A laisimna subuaithei di atam khopmai,
adiak in a Classmate nu’n ngaihbawl in, a kimuh chiang un Zawlmit et in
enpah sek hi. Skul kai kuan di bang, Lianpu manoh thei zel hi. Nikhat, a
lawmnu’n Lianpu kiang ah a Itdan leh a ngaihdan thute hon genkhe petmah
ta hi. Lianpu’n bel a dawn di dan le a theikei, a manglam abang mai ta
hi. Lianpu’n ahihleh bangmah dang in a dawng kei a, ‘ka Laibu te ka
itzaw’ chi teng in dawng hi. Huai a chihna bel, Laisim mah pibawl a, anu
leh pa nuamtak a koih a ut dan a genna ahi hi.
Kumkim exam a zoh ni di uh ahi a, Lianpu
leng exam zoh cia innlam pai di chi in phur tak in om a, huai ni bang ni
sa hoih diak bang sese hi. Exam te zou in, School konglam a apawt leh
Pasal mi 4 in a nasam ua, amah leng thumang tak in va pai pah hi.
Huai pasal mi-4 te lak a alianpen in,
Lianpu kiang ah, ‘Bangziak a ka Nungaknu hon tuhsawm e?’ chih toh suk
athuah pah hi. Huai ni, kithalawp tak a kuan himahleh, dah mel tak leh
kingaihtuah vungvung kawm in, a omna, apute innlam a zuanpah vengveng
hi. A ngaihtuah thak chiang in, A Classmate nu Tangvalpa ahi chih athei
a, itna thu a gente le Lianpu a suksiat nuamman ana hi hi.
©Siamsinna leh Vakiangbu
Comments
Post a Comment