GULPI’N GUU A NEIH LOUHDAN/ZIAK

By ~ Gin Lian Lun Tonsing

Writer’s note: Unau a neupen ka hihlai in ka nu-leh-pa’n tangthu (hon awi-ihmutna diing un) hon na hilhsek ua. Zaknop ka sa thei petmah a,tukhonung a ka ngaihtuah thak chiang in a hon tangthu (story) hilhte uh awm ka sakpipi omte lak a khat kon gelhkhe mok di.(Ka theih dandan in leh a kigelhsa ahihleh kuamah peuh tung ah ngaihdam sousang tak in kon ngen ma sa hi)

A taktak hia ahih kei leh a kiphuaktawm maimai chih zaw ka theikei, hilele “Meimalou ah thou a tu kei” chih paunak om hiven maw.

Nidanglai pekpek in ganhingte kikaal ah kitheisiam louhna om ziak in tualgaal/gangaal nasatak mai ana om in.Tungleng leh Nuaileng chi’n ana kikhen in, ana kidou ek-ek sam uhi.

Nuailengte heutupa “GULPI”(python) in guu (poison) haattak mai ana nei in. A bokvaakte lak-ah thunei leh hat mahmah ahihziak in.Nikhat hichi bang lungsim hon nei hi.Ka guu ahat taktak hiam, a etkhiakna ding in mihingte kitu leh bangchituk in nna a sem hiam chih theinopna lungsim hon nei in.(Huai hunlai in gul dang tengteng leh tanai etc te’n guu nei nailou uhi)

Hichi bang lungsim neikawm a hong vakvak leh khonawl a lawmta singsat hon mu kha in.Aman le lawmtate naih vengveng in khatpen thakhat in hon tu ta hi. A guu hatlua ahihman in hun tawmchik sung in a tukpen hong si pah hi.Guulpi le hong kik vengveng in guldangte kiang ah ka guu hatdan na theih nawp ua leh pam ah (khonawl) mihing khat ka tuklup om di ahi, a chihzoh in Mualtan ( Gul chikhat) a en din sawl a,huailai in mualtan(cobra) in guu nei nailou.

Gulpi’n ami tuklupna mun a va tuntak in khomipite’n misiluang ana pua ua, a na zawng uhi. Hichia mitampi phe vengvung leh pasal (a sipen) a puak uh(a zawn uh) hon muh chiang in lamdangsa tak in gulte/gulpi kiang hon zuak kiktahi. Gulpu kiang hong tunkik chiang in hichi bang in a va thilmuh hon genta hi. “Heutupa na guu hat nawnlou leh nasem nawnlou hi di ahi. Na mihing tukpen a si kei a, huai naaksang in kipak in leh vualzou kisa in mitampi’n a zawn uh mu ka hi,” chi’n a thilmuh hon genchiang in gulpi lungkham in hong kingaihtuah a, ka guu lah hatlou, nasemlou leh kuamah le that zoulou ahih chiang in ka lawkhe mai di. Kei a diing in a zat nang leh phattuam nang omkei chi kawm a hong vak khia in a paina nung, a vakna nung ah a guu tengteng sekhia/lokhe vek in tuni tan guubei in omdenta hi. Huai ni apan gulp in guu nei nawnlou in mi/ganhingte valhthoh zelta)

Gulpi’n a guu a siatkhiakte mualtan (cobra) in vatuak kha in tampi petmah va ne in, amah leng hong vakkhe nawnta hi.

Gulpi guu amu kha peuh (gul dangte leh tanaite) te’n le va ne in, huaini apan guu hon neita uhi. Hichi bang a gulpi guu siatkhiakte gul tuamtuam in a nek baang uh, aneng neuchik petmah kuikhate pawl a pangkha tanaite khong inle guu nei ua, himahleh a neilou (gulpi guu kheuh khalou tanai guneilou le om veve). Gulpi’n vaakkawm a aguu a siatkhiak ahihziak in. Nah pateh khenkhat ah bangkha in tunitan huai nahpateh te i sukkhak leh guu nei ua, i sukkhak nate dam pahpah louh leh sawtpipi naa uhi.Huai nah pateh ahih leh “Thakpi” kichi hi. Gamlak na vaak a na sukkhak leh na chi tengteng a thak dia, huai kawmkawm in na chi hon sukkhahkna tengteng nna leng na sa mahmah diing.

Hiai bang ahi gulpi’n guu a neihlouh ziak/daan.

©Siamsinna leh Vakiangbu