SULKIK LELLOU
By ~Lian Khuptong
Machiang khualvang in ka zinna gam a
utsim thu hilou itna leh lainatnate ziak in sulkik ding lung ka lawp
zong in sawlbang kibang kha hilel zaw ing…
Heina kikhat nunnuam kholhkhawm chimanlou in i machiang khankhual
vang in, sawlbang heina kidang kha mah hi. Nuam mahleh nihgel omkhom den
leng machiang khimzing ding hi e. Utnapi’n mailam hun ding gelna’n Tang
Rohit Tangmual khua khelah napi’n khopi lam nawt in sumkolvei di’n a
khiaklah duangzen sakmelhoih Pamnu khelah tak in nuseta hi. Ki-it
kingainapi’n Tangmual khua a nutsiat ding kuan in nung etkik vangvang
maisam hi. Rohit in khaubang a chiahni zan zaw kua hiam khat lungleng
mah in teh gentam ngaikei. Luankhi gialbang in ke zungzung mailou di
hia? Rohit tuh khualzin petmahta lampi a hong paina lam ah, migilou
pawlkhat toh hong kituak guih! Khatvei khualzinna din le huaise sam hi.
Tua migiloute’n hong suam petmah uhi. A vanpuak a neih sun sum leh pai
laksak vek in nuse maimah uhi. Ek nutsiat tamai ua, panpih tu ding bei,
lungdong leh mangbang mahmah ahi mai ve. Khualgam a meltheih lah neilou
Rohit kikmai ding lah gamla khop tungta. Maban lungliappi’n hong kalsuan
non mai hi. Lampi ah hong paipai na lam in ni lah tum ding kuan hita
nek ding lah neilou, gil lah kial, beidong panpihtu ding lah kuamah muh
hilou. A innkuante, a sungte, a nungaknu peuh bang ngai mahmah in hong
kingaihtuah dedu sam hi. Hucia a omlai tak in lamet louh pi in khualzin
mikhat hong tuakkha laizang a, banghiam lamet neikawm in Rohit in mipa
va delh in a thiltuah dan teng hilh hi. Mipa’n leng amah zong a pai nang
gamla lua, a nekkhop ding bek mah pua ahihdan hilh hi. Ken tanghou hon
peta leng, kei zong kidaihlou ding na chihsan lai dep zohmah hi. Rohit
in kamsiamtak in ngen mahleh nawlkhin lai veve hi. Mipa’n Tanghou
peikhat natawm nuselou in paisan hiai a, hibangteng hang in, khase
mahmah mahleh lungke samlou in azing- azan in tawlnga man sam lou in kal
hon suan tou ngatngat mai hi.
Rohit kingaise petmahta a, hiai ah kuamah theihlouh a gilkial a simai
ding ngaingam samlou lah bahsegop leh chau kisa in ling pian hi.
Singlim nuaikhat a hong tawlnga khong a, gimsim mah ahihtoh a gilkial
ziak mah leng hinteh hong imu kha hi.
Mang (dream) bang hon nei in a manglam bang in khovel a a iit mahmah a
ngaihno Pamnu hong pai in Tanghou pei khat vapia hi. Rohit in leng
kipaktak in, na sang a, hong nek sawm leh suang na hi maimah! A
thangpaih tha suak in, tua suang pen leilak a den na ek toh kituak in,
thakhat in hong khanglou guih hi ! Akiim-apaam hon etleh tungsunni
lenmual hong tang singseng ta hi. Rohit leng hong dingtou in pai dia a
kisak leh apaam deuh ah, tuikai hong mu in va delhphei in napahteh
lazawk in, tua tui takkhe keuhkeuh dawn in hong dawn kitkit bang zaw a
gilkialna teng a beizou hial hi. Sakhi tuiduh abang a gilvah sa in pai
dia hong kisak leh nungak melhoihtak tui bel khat toh hong paisuk amu
hi. Rohit in leng na houpih in hiaimun bang khua hiam? na ci hi. Minu’n
leng a tuidawh kawm in U aw Zoumun nuam khua hi. Koi mun zotsawm na
hiam?
Rohit zoukhopi a sumkolvei a zin ding lampi a migilou pawlkhat in
hong na suam uhi. Tu’n nek ding bei khutvuak petmah hing. Na inn ua
zankhat bek hong giaksak theilou ding mo? Hong kuun ing ka lam paina
ding lah a saulai a, gilkial a si mai ding ka hi. Minu eh! Huhci na hi
mo? Awle na hong tung thei ding.
Nihgel kituaktak inn minu te innlam zuan in, hong paita uhi. Ahihtak a
gen ding in minu pen meithai hun sawtpek apan in a pasal in damlouhna
hang in ana nuse ta hi. Rohit leng tawldam kisa in azu-aha ne in nuamtak
in, minu’n vaidawn hi.
Nihgel kithukhat in hong kineel pian ta uhi. Theihlouh kal in Rohit
pen nithum lam bang hong om chiang in a sungte leh Pamnu bang a ngaih
tha suak hi. A pai mah hoihsa in maban sawn ding in hong kisak sawm non
hi. Huai laitak in minu’n leng lawm aw, Kei vuak nong nutsiat ding
ngaingam keng tangkhat lua ing, ka meithaina kumkhua sawtlawta. Khattang
sawlbang heizou kei ning chi in khou tantan hi. Rohit in minu’ kamneem
tak a khouhnate nawlkhin ding haksa sa hamtang in, kidek zou samlou in
thulhkik maita hi. Hiaibang simthute ziak in kua hiam khat a ding in,
thuak vuallouh in vanpi ging mai bang in a naa ding hi. Minu awneemtak
mai tuh pasal khat a din leng nial vual hilou zel ahi. Rohit in leng
minu a hehpih ziak mah leng hinteh paikik ding lel ngamlou in sawlbang
kibangtuah maizel uhi.
Pamnu in a U Rohit lampi a sawlbang a kibang maitel thei leh aw!
Bangzahta’n a lungsim anazen tam! Lam entak a zaw ana ngak mah di hiven
mo? Rohit in a zinkhiak ma in zaw Pamnu kia a simthu lelte koi a
vaibangtham saktel a diam? Pamnu lah bangmah theiloupi’n a U Rohit hong
tung chiang Zungbuh khibah, tau chihte khong kineem mahmah hiven mo?
Pamnu kinepna zaw huih nungdelh hitel maimah. Tumlam a nisuak a mo?
Chihtheih dikhop in Zoumunnuam apat in lehkha them hong lengsuk del-del
in, A tukna di bang utmel loutak in Tangmual khua a va tu khong ta ve . .
Heiha ! Huiha. . .! bang i genta dia leh Pamnu te innkongtual ah va
kiphah deeldal hi.
Pamnu leng huai ni zingkal a bangthu thei a diam mo? Thoubaih kha in
kongtual phiat dia hong kisak leh laidal themkhat mu in hong lapah in
simngal hi. Kua dang hilou in Rohit mah na hi a, Pamnu in leng tha- iit
tak in hong simpan ngal hi.
Itluat Pamnu aw!
Itlouh ziak hilou’n hehpihna hang in, damsung a din singdang siang angliim ah sulkiklou din minu na belta ing,
cih Tomkimtak Rohit in a gelh Pamnu’n
hong sim chiang in nan vuallouh in Pamnu mitkhitui luang piap-piap te
kuata’n nulhulsak tel ding hiam! Sukik lel dia simthu chiamte’n sulkik
heilou di’n tong hong chiamzel kuata’n theisiam lou e…
BEITA
©Siamsinna leh Vakiangbu
Comments
Post a Comment