SALAM PIANNI & KHALAM PIANNI
By ~ LB Muan
Pianni (Birthday) bangzah na nei a chih
dotna hong kidong bang hita leh bang chi in na dawng dia? A theilou kua
om dia, hiai khawng kidot, dotna hai huai ahi na chi maimah diam? Bang
chi in na dawng di?
Akhente’n pianni KHATvei chouh nei uh a,
khenkhat te’n pianni NIHvei nei uhi. Tuate bel Salam Pianni leh Khalam
pianni ahi…Nang Pianni (birthday) bang zah vei na nei a?
SALAM PIANNI (Physical Birthday):
Pi leh Pu, Nu leh Pate hun lai in a pianni uh ana chiamteh kha kholkei
mah le uh, tu hun in bel pianni hoihtak in kichiamteh chiat ta hi. Tu
khang a pianni theilou bel ki-om nawn lou…Nu leh Pate’n tate Pianni,
Piankum, Pianhun leh Pianna mun chihte hoih tak in kichiamteh ta hi.
Huchi in mi tamtak te’n kum teng a pianni hong tun chiang in lawm leh
vual, innkiim innkiangte samkhawm in pianni lawpna nei zel uhi. Akhen
te’n alawpna pen poimawh ngaih kholkei mah le uh pianni hong tun chiang
in a lungsim uh thak a kipahna in kidim uhi.
KHALAM PIANNI (SPIRITUAL BIRTHDAY):
Salam Pianni bel miteng in kinei chiat a, himahleh Khalam pianni bel
miteng neih hilou hi. Khalam pianna bel nute apan a pawt hi nawn lou in
Kros a Jesu sisan apan a piangkhia hizaw ta ahi. Hiai Khalam pianni bel
Salam a pianni banglou tak in a piangtu chouh in a pianni, pian hun,
pianna mun leh piandan gen thei hi.
A koi pen ah i tel a? Salam chouh a
piangte lak ah maw…ahih kei leh Khalam a le piangte lak ah? Salam chouh a
piangkha pan i hih leh bel gen ding kineilou ding hi.
Khalam pianni le nei i kichih leh hiaite i
theih a ngai…Pianni, Pian Kum, Pianhun leh Pianna mun. Hiaite i gen
theih kei leh bel aminpu a piang a, piangkhe nailou kihikha maithei ahi.
Nasepte 22:6-9 i et leh Sawltak Paul in a Khalam pianni, pianna mun,
piandan chiangtak in gen thei hi. Khalam a le piang kichi a, pianni,
pianna mun, pianhun i chihte theilou i hih khak leh kingaihtuah hun ahi.
A piang taktak hilou a lungsim chouh a piang hihkhak ding lauh huai
mahmah ahi.
Unaute kingaihtuah hun ahi! Piangthakna
diktak neilou a Pathian mawk muan mai te i hi kha hia? Khatvei chouh
piang a nihvei piang kha nailoute i hi kha hia? Jesu Kros a mikhial nang
leh kei a dia asih dan thei mahmah na zen a hotdamna nei nailoute i hi
kha hia? Kikhawm gige a saptuam adia sithu nam zen a kipei a hotdamna
nei nai loute i hi hia? Gawtmun a lauh huai dan thei a tuamun lam zuan a
pai teitei lai te i hi kha hia? Jesu toh kizopna taktak nei i hi hia
chih theih chet hun ahi… Jesu in kon thei ngei kei a chihte lak a i
telkhak di thil lauh huai penpen ahi…!
I Salam Pianni (Physical Birthday) pen ei
adia huchi tel a poimoh a i koih a i loplop lai a, i Khalam Pianni
(Spiritual Birthday) pen phawkkha hetlou i hihkhak leh a kikhel ma in
Khalam ah le pian sawm ni!
I sih di hun lah i thei kei a, den chiang
a siphut di bang hita le i kha koi mun a tung dia? Khovel a mite nek
bang ne zoulou, mite hin bang a le hing zoulou, mite hausak bang a le
hausa lou a, haksa tak a hing liailiai hang a…i sih nung chiang a i kha
tangtawn gawtmun a genthei tak a omlai tel di chih…na ngaingam hia Unau?
HOTDAMNA NEI NAILOU I HIH LEH TU IN JESU HONDAM PA IN SANG MAI LE HI LOU MAW…BANG A I NGAK LAI?
©Siamsinna leh Vakiangbu
Comments
Post a Comment