HICHI DI ANA SALENG ZAW..!! -3 (Tunnu Awnem)
By ~ Leon Guite
Quote : "Ka neulai in khomui kuan in ka lawmte toh ka kimawl theizel a, huihnung in thete hong khua'n chiang inn pan ka tunnu'n hon sam chiaichiai e.
"Ka innsung hawmtak mai sung ah ka hunluite ngaihsun a ka omlai in, tanglak kholai vakte'n a mobile ua pan in hiai la ahon khah khiak uh ka za hi. Tua la ka zaktak in neulai hun a ka nu toh nuamtak a ka kikholh lai nite uh phawk in om dingdan theilou in konglam ah ka diang pawt hi. Kha a vak mahmah mai a, gamlapi apan naupang hon bukteh kimawlte thawm khawng kiza chiaichiai a, nungak-tangval khavak aam a kholak ah kipaktak a ton khawm helhelte ka muh in ka hunluite ahong lang kik a, khaselua leh kisikna a pumdim in ka mittui dan vuallouh in ahong phulkhe zungzung hi. Nuamsatak a ka hinkhua ka zat lainite ngai in ka nu'n ittak leh duat tak a ahon thuhilh lai nite ngai in ka kap huphup hi. Himahleh, kei adin a kikhelta, sapkik sawm in mual-le-tang teng tawnsuak mah leng ahong kik nawn kei ding. Minute 5 bek samkik thei ding hileng zaw ka nu kiang ah ngaihdam ngen ut hinang e... Ka tanchin haihuaitak leh thulimlou tak himahleh, midangte'n ana sim ua, kei hinkhua apan kibawlhoih nang neuchik bek aneih khak zenzen uh leh chi'n kisuanglah kawmpi in ka hon gentei ding aw. Ka khua uh zaw ka hon gentel dah mai ding.
NEU LAI THUTE:
Zoudawn lam a khua khat ah ka na piang hi. Ka nu-le-pate'n hon deihthoh mahmah ua, niteng hunteng in thuhoih-lahoih hon hilh in mikhat ka suah tei na ding in ahih theih tawp un pan a lasam uhi. Ka khosakna uh ahaksa mahmah mai a, ka nu-le-pate' niteng in loukhou in kuankhe zel mahle uh khamkhop akhoukhe zou ngeikei ua, kumteng in ka puktaw gige sek uhi. Himahleh, mite eng a ka khosak ding ngaingam lou in neilou sasa in skul ahon kaisak teitei uhi.
Skul fee genlouh laibu man ding natawm neizoulou ka hihman un laipuan vuak tawi in skul ka kai zel hi. Skul ah lawmte'n laibu thak toh bag thak khawng hon tawi in, uniform nalh tak toh ahong kuan chiang un ka eng thei mahmah mai hi. Kei lah uniform gentaak louh khekol natawm a tawthuap teng zou hamham lel ka hihman in ka lawmte lak ah maizum na tampi ka tuak a, laibu neihlouh ziak leh uniform neihlouh ziak in lawmte ang ah gawt in ka om mun mahmah hi. Tuate ziak a skul kai nuamlou a ka kiphin chiang in ka pa'n "bawi, nei hileng ken leng ahoih theipen ka hon deihsak hi. Himahleh, i khosakna un chinlou ahihman in tuate thuak hamham inla, lai hoihtak in hon sim lechin tunung chiang a mithupi khat hong suak ding na hi. Tua hun chiang in tua hon simmohte na nuai ah hong kun ding uh ahi." chi'n ahon nem zel hi. Huchi'n keileng lawmte hon simmohna kampau te uh kimangngilh sak in ka lai neih sunsunte hoihtak in ka sim a, kuamah ka phalah tuankei hi. ka nu'n ka laisim dek chiang in hon thumsak zel a, ka sim zoh chiang in kipahthu ahon genpih zel hi. Lup chiang in Laisiangthou sung a tangthute hon hilh in hon khim ihmu zel hi.
Nitak annek zoh chiang in lawmte toh lentual ah buk-teh te khawng, ki-hen ate khawng kimawl in nuam ka sa thei mahmah ua, khua mial ding a ahong kisak chiang in ka nu'n hon sam in inn ah lai ahon simpih zel hi. Ka lawmte ahihleh anu te'n samlou uh ahihman un sawtpi kimawl zel ua, athawm uh za zel ka hihman in amau lak ah tel ut in ka nu bang ahon sap ziak in ka hehsan khasek hi. Himahleh, huaihun chiang in ka nu'n it tak leh duat tak in hon thuhilh zel hi. Ken bel ahon itlouh ziak a hon gawtna dan a la in ka heh thei mahmah mai a, lawmte lak ah hon suzahlak na hi chi'n ka heh khum sek hi.
Hunte hong pai zel in ka exam nate uah ka lohching tou zel a, khatna ngen a pang tou ka hihman in skul fee ka awl tou ngitnget hi. Nu-le-pa thumang in ka hong khangtou zel a, mite bang in neizou kei mahle ung ka neih sunsun uh ki ittuahna te kihawm lual in nuam ka sa mahmah thou uhi. Kum 12 ka phak kum pawl VIII ka sim kum in ka pa ahong damthei kei a, ki-etkolna ding bangmah neilou ka hihman un damdawi inn naih zoulou in inn ah ka ki-enkol mai uhi. Tanau laina kuamah in hon ngaihsak lou ua, ka nu'n panpihna vangen zel mahleh panpih nak sang in thadahnu kizon lelve chih a tantawk ahimai. Nikhat ka nek ding uh ann omlou ahihman in ka nu'n ka pute kiang ah anntang vangen a, amau ana piak nak sang in kumteng a nou innkuan vak gige leng ka ning gawp sisuk un chi'n ka pi'n ana hankhum zomah hi. Ka nu khaselua in hong paikik sawm a, ka pi leng ki-awi lou deuh adiam ah, a ui uh nek val annkhing hon tawisak hi. Ka nu'n leng sang ut kei mahleh kei ahon ngaihtuah luat ziak in utlou pipi in a sang a, inn ahong tun in kei leh ka pa ahon pia a, ken leng nu aw nang nelou ding maw ? Chi a ka dot leh ka pute' inn ah nekhin ahihdan ahon gen a, kou ka pa toh ahon nesak hi.
Ann ginatak a nelou leh damdawi hoihtak a nelou chih mahtak ka pa anini in ahong gim hiaihiai a, atawp in keil eh ka nu hiai leitung gimthuakna pal lai ding in tangtawn gam ahon zot santa hi. A kivui ni in leng ka tanaute uh kuamah in ahong delh kei ua, handal ding zong kimu zoulou in ka nu khasia in kapkap mai hi.
Ka pa sihnung in ka nu kia toh ka hong khosata uhi. Kuamah hon hehpihtu ding omlou ahihman in kou nuta kia ka khosak theih dandan un ka khosa tiptip uhi. Khosung hi in ka lawm-ka vual lak ah leng simmoh in ka om ua, meithainu, tagahpa chi a kou in ka om tawntung uhi. Nidang a ka lawm-ka vualte kuamah hon thuah ut a om nawnkei ua, amau ka vathuah sunsun ni in leng tot leh vuak ka hi gige hi. Huchi'n kuamah thuahse lou in ka nu mah toh ka kithuah ua, inn ah om in lai hoihtak in ka sim hi. Ka nu'n niteng in hon thumsak gige a, khalam thute hon hilh in ka kha hotdam ahih theih nang in Pathian thu hon hilh in hon thumsak gige hi. Kikhop khawng Nipini skul khawng kai ut mah leng, mite'n hon simmoh lua uh ahihman in kai ngamna di vual ahikei. Skul natawm ah vuak in ka om gige a, tua hunchiang in ka dikna hon genpih ding kuamah omlou ahihman in akhel ziak ahi chih tang in sinsaktute'n kei ahon gawt behlap zomah uhi. Aw tagah hinkhua zaw haksa hina e... Naupanglai himah leng, a khen chiang bang in lungsim a paisual dekdek hun bang atam mahmah hi.
Kumtawp exam in ka pawl uah sangpen hihna ka ngah nawn a, ka nu loukuan ahong tun in ka na hilh pah hi. Ka nu'n hon kipahpih mahmah mai a, himahleh, sungkuan kim a ka omlai nite uh phawk in ka pa ngailua in, aw zuapa aw hiai hun kipahhuai mu din hon dampih lai lechin zaw maw... Chi'n ka nuta ua kingawng kawi in ka kap huthut uhi.Ka khua uah pawl giat tan chauh simtheih ahihman in ka maban abing mahmah hi. Laisim sunzom ut mahleng mite neih bang a neilou ka hihman um ka lungkham mahmah hi. Mundang ah laisim sutzop ding pen kei a ding in van a gah toh kibang hi. Laisim ut mahleng ka nu chauh in lou na asep ding ngai ngamlou in kailou a ka nu toh louna semkhawm mai ding in ka thupuk hi. Himahleh, ka nu ngaihdan hilou ahihman in Lamka lam ah ka sutzop theih nang ahon ngaihtuah pih hi. Hiai khua ah lah kuamah hon hehpihtu ding om tuanlou ahihman in ka nu'n Lamka lam ah peem mai ahon sawm pih a, kei maban hon ngaihtuah pih ziak in Khristmas natawm khua ah zang se lou in Lamka ka hon manohta uhi.
Huchi'n New Lamka ah ka hong tengsuk ua, innluah in kei Ebenezer School ah ka ki admit a, ka nu'n zingkal teng a mehzuak leh sunchiang a mihausate' inn ah sep theihtheih sem in kei ahon vak hi. Ken leng ka nu hon deihsaknate leh kei ading a akipiak zohnate thei kawm in lai hoihtak in ka simtou zel a, ka pawl uah asiam lawi in ka pang tou thei zel sam hi.
Zodawn hinkhua leh khopi hinkhua akikhai mahmah mai a, tunung a ka hinkhua ka ngaihsut kikchiang in... Aw haksa lehle Zodawn ah ana tengden himai leng zaw... Hichitel a lungngaihna leh kisik tuntunna neilou ding hiveng maw... Ka chi vungvung hi.
KHANGDAWNG HINKHUA LEH SIATNA KHUKPI:
"Kagol chiang ka nu thu manglou in vakthaap in ka ut bang ka om hang in, ka nu hon itna lianlua aitam maw... Hong chiah in ka ta chi'n hong sam lai."
Lamka khopi ah skul ka hong kai pat in ka theih ngeilouh tampi ka hon theikhe ta hi. Khangdawng hinkhua kilutta ahihman in lungsim paizia pen hong tuam pianta hi. Lawmte khawng nungak kingaihpih nei a, anungakte uh toh klas ah ahong kithoh chiang bang un ei apan in enna ahong om theita mawk hi. Amau bang a nungak neih utna lungtang ah hong piang thei mawk a, pawlte lah ah numei hoihsak pawl bang hong om pianta mawk hi.
Kou pawl ah hong kaithak mah nungak khat Luni kichi om hi. Amah melhoih mahmah khat hi a, a chite maam in aduang kilawm mahmah hi. Asamte nuhsan hiuhiau a, kilawm in ka mit ala mahmah mawk hi. Kou vengte mah ahihman in skul kai kuan leh pai ah ka kiton kha zel ua, tua hun chiang in keipen nervous thei mahmah in ka kisui khapah sese sek hi. Aman leng zahtakna khat hon nei ahisam ding a, ka kihou vang mahmah sek uhi.
Ka muh tung pan ka lungsim luah gai pah mawk ahihman in lamdang ka sa mahmah hi. Chikmah a nungak abuai ngeilou pa pen Luni ka muhni apat in gu nekha mah bang in Luni in ka lungsim leh taksa teng luah gai in hon zen hi. Amah ahih leh mihausa ta ahihman in kei tagah leltak amah ding a chin kisa loulua ka hihman in itna thu ka gen ngam kei hi.Ka kimuh chiang bang un keisang in amah zum zaw mah abang a, klas room sung a ka kimelh tuah khak chiang bang un amai san tuaituai sek hi. Tuate ka muh chiang in hon ngai hiding bang in ka suangtuah mawk mawk sek hi. Himahleh, mabang pan a, itna sinthu lel ding a ka kisak chiang in hon ngailou hikhaleh zum huai lotel ding hia chi'n ka pan ngamkei hi.
Hunte hong pai zel in Luni toh leng ka hong kineel deuhta ua, alawmte apan bang in Luni in hon star ahih dan khawng ka za zeuhzeuh zel hi. Tua ka thuzakte ziak in kihangsan sak in ka itna thute Luni kiang ah ka hon gen khe khong hi. Ka lam-et mah bang in aman leng sawtpek apan a hon na it ta ahihdan hon hilh a, huchi'n sihna lou ngal in hon khenkei hen chi'n simthu ka hon chiamta uhi. Tuani apan in skul kaite ka kitha lawp sem a, nuam ka sa thei mahmah uhi. Half Yearly exam hong hun in buaina bangmah omlou in ka zou thei ua, skul khawl sung in ka nu panpih in kiloh khawng in ka kuan zel hi. Nitak chiang in Luni vahel ut mahleng khosakna kikhailua leh naupang kisa simlai ka hihman in ka vapawt ngam ngeikei hi. Nitaklam khat innkong ah kisilsiang zou a ka na tut maimai leh gintaklouh pi in Luni a hong pawt a, thu tuamtuam gen in nuam ka sa mahmah uhi. Bangtan hiam nung in ka kiang ah, Ulian, bangziak a na hong pawt ngeilouh ? Chi'n ahon dong hi. Ken leng, Luni hong pawt a nang toh kithuah ka ut petmah, himahleh enve, ka khosakna un chinlou lua ahi. Denchiah na nu-le-pate' ngaihdan lou bang ana hikha leh bang chi'n amel uh leh nangmah ka hon mungam nawn dia ? Chi'n ka dawng hi. Aman bel, huaikhawng khemkhem, houlua. Tunitak chiang a na hong pawt teitei ding ahi aw. Ken hon ngailua ka hi. Ka na paiphot ding. Hon na ngakngak ding ka hi. Ann neklim aw. Chi'n ahon gen a, ken leng awle, ann nek lim chi'n ka hong kikhen phot ta uhi.
Annek zoh in ka nu kiang ah pawt ding ka hihdan ka hilh a, huchi'n zum kawm simpi in leh kisuanglah tak in Lunite' inn ah ka valengla tei ta hi. Innkong ah hon na ngak a, ahon muhtak in nuihmai kawmtak in hon na dawn a, innsung ah lut in a nu-le-pa kiang ah hiai ka lawmpa ka gengen sek Lianpu ahi chi'n mailahna ahon bawl a, hiai ka pa Mangpu leh ka nu Lhingboi ahi uh chi'n anu-le-pate' ahon mailah nawn hi. Ka zum mahmah mai a, om dingdan le ka theikei. Hichibang tel a inn thupi sung ah ka lut akhat veina ahipan hi. Ka kho-ul in hon buak a, gen ding pen leng theilou in ahon houpihnate chauh uh ka dawng thei phet hi. Ka innkuan sungthu te khawng uh hon dong ua, tagah ka hih dante khawng leh kilohtawm a khosa a nekzong ka hihdante khawng uh Luni in apate ana hilh vek ahihman in anu un ahon hehpih dan khawng ahon hilh saisai hi. Anu un hon hehpih sam ahi ding a, zingchiang apat in na nu ka inn uah hong henla, inn nna hong seppih leh ahoih ding a nitha hiam akha a piak zawk hiam ama ut penpen a piak din ahon chi a, ka kipak petmah mai a, ka vahoh louh khak ding bang ka lau thak mahmah hi. Huchi'n thu vantang tuamtuam houlim in zan sawt ding a kisata ahihman in pai ding in ka hong kithawi khia a, Luni in gate tan hong kha in ka muk ah hon tawp cheuh kawm in, uLian na hong pawt a ka kipaklua, kon ngailua hong pawt zelzel in aw ahon chi a, ken leng awle ka man liai nak leh hong pawt zel ka sawm ding. Na hon khotuah ua ka kipaklua. Ken le kon ngailua chi'n ka tawp thuk tei a, huchi'n Mangpha kikhak in lungsim zangkhai tak in innlam ka hon zuanta hi. Inn ka tun in ka nu'n hon na ngak a, ka pawtna thute hon dong hi. Ken leng thil omdan teng ka hilh tak in ka nu kipaklua in abiang vuai nipnep ah kipahna mittui hong luang suk hi. Toupa aw kou tagah leh meithaite hon khotuah hinatel chia maw. Lungdamlua ung chi'n Pathian kiang ah kipahthu gen in thumna ka nei ua, huchi'n ihmut nuamtak in tuazan ka hong ihmu hithit uhi.
Azing in ka nu leng Pamangte' inn ah vapai in huchi'n khateng a Rs. 5000 piak ding a kihoulem in a nna uh a vasepsakta hi. Huchi'n khosakna neuchik hong nuam deuh panta hi.
Hunte hong pai zel in Luni toh ka ki itna un pichin lam manoh deuhdeuh a, ka ki itna uh lian semsem hi. Himahleh kuamah theih ding deihlou in milak ah lawmta bang in ka kithuah zel ua, kuaman ahon muangmoh sekei uhi. Luni ahihleh gentaksa mahbang in melhoihtak leh kamsiamtak ahihman in amah ngaitu tamthei mahmah hi. Mihausa tamtak te'n a tapate' uh a ding in deih ua, tuaziak in ka kal un mial lam manoh deuhdeuh bang hi. Himahleh, aman hon khamuanzel in kei a ding kia a hing ding leh keilou dang kuamah pasala neilou ding ahihdan ahon genzel a, tua thute'n kei ah khamuanna hon pia in ani-ni in Luni ka muanna leh ka itna lian deuhdeuh hi.
Kei leng ka man hun in Lunite' inn ah ka valengla sek hi. Kisuanlah huai mahleh anu bang ana siam zel sam ahihman in noptuam ka sa mahmah hi. Hunte hong pai zel in skul ka hong lutpan nawnta ua, buaina bangmah omlou hial in kumtawp exam te ka hon zou thei nawnta uhi. Huchi'n ka hun-awl neihsun teng Luni toh kithuahna in ka zang a kuamah hinlam natawm phawklou in nuam ka sa mahmah uhi.
Laisiangthou in "Lang lou ding a selguk bangmah a omkei" achih bang in Luni toh ka kingaihna thu un ka veng teng uh huih nung bang mai in ahon zelsuakta hi. A khen in ahon kipahpih mahmah ua, himahleh akhen in bel ahon hazat man uh adiam ah Luni bang kei ahon ngaih ziak in hai asa thei mahmah uhi. Kou gel thu pen ka veng sung ua nupi-papi te hot topic ahi gige tamai hi.
Nikhat ka nu'n dawr ah van lei ding in ahon sawl hi. Ka van lei ding teng leizou in, kik ding a ka kisak laitak in tangval 5 in ka ma ahon na dal uhi. Buaina bawl utlou ka hihman in pelh ka sawm a, himahleh, khat in ka awm ah hon man in, "Luni ana mangngilh ta in, nang bang a mi tagah leh zawngte a ding vual ahikei. Ka ma dal ding a na kisak aleh na si toh leivui polh khawm ding ka hi. Na hinna na it leh kintak in Luni ana tawpsanta in" ahon chi hi. Tuabang thute ka zaktak in ka lungtang teipi asut bang mai in ana a, dawn kik ut mahleng ka dinmun thei ka hihman in dawnglou a pelh mai ka sawm zawta hi.
Amaute paisan ding a kal ka hon suan pat leh khat in hon na kal a, kiginglou ka hihman in leilak ah ka puk suk hi. Ka van leiteng a tunna apan in a bawkhe vek hi. Tagah himah leng hiaibang simmohna ka tung ah ahong tuntak in kideek zou nawnlou in kei leng ka pang a, huchi'n ka hong kisualta uhi. Amau mi 5 himahle uh, kei nitenga nasem gige thakhauh takmai ahon nang tuankei ua, ka kibeithei mahmah uhi. A tawp in pangzou nawnlou in, "Ana kiging in aw" chi'n ahon taisan uhi. Kei leng ahon sukkhakna uh ka mit tung keh a sisan pawt niainuai toh innlam ka zuan hi. Ka nu'n ahon muhtak in lauthawng mahmah mai a, thu omdan ahon dong hi. Ken leng thu omdan kimtak in ka hilh a, ka nu'n, "Aw genthei hinkhua zaw haksa hina e maw. Lianpu pa' aw hong tualkum in, amizalai ah nathai leh navon sanggah lua ung e." chi'n ahong kapkhe hithit hi. Ka hehnep theih bangbang a hehnem in akah ahong tawp a, ka liamna mate' ahon silsiang sak hi.
Ka liamna ma silsiang a ka om laitak un, kong khak ahong kikiu a, ka nu'n a vahon aleh denlam a ka kisualpihte' leh police bangzah hiam innkong ah ana ding ua, hong lut in Lianpu himahteh maw? Chi'n athu genna ding hun bangmah omlou in hon hentom ua, hon paikhiakpih uhi. Ka nu'n kap kawm in hon ngetsak mahleh bangmah a ngailou in gari ah ahon guang ua, ahon taikhiak pihta uhi. Ka nung et leh khase tak a ka nu kap kawm a kou hon delh ka mu a, pawna lua in khawphawk lou in ka pukta hi.
Tui a ka mai hong kitheh in ahon halhsak guih a, ka dak khiak leh room mialsim neknuk sung ah khut tegel zak kawm a hensa in ka na om hi. Ka kiang a police uniform silhte kiang ah kei moh ahihlouh dan leh amau athu omloupi a ahon khoihziak uh ahihdan gen mahleng, "Nang maimai in maw hiai mite na chou ? Kua ahi ua chih nathei hia? Lamka khopi sung a dia mi zahtak huai penpen, heutu makaite' tate ahihlam uh theilou na hi hiam? Nang bang kisa e?" chi'n sat theih sat moh, zep theih zep moh in ahon vaw zialzial uhi. Naa ka sa mahmah mai a, ahon vuaknate uh sang in ka dikna thu gen theilou a, ka mohna loupi a gawt a ka ompen ka pawna zaw a, naa ka sa zaw hi. Bangtan hiam ahon gawt nung un aksi belh khat ahong lut a, hunta e, paisakta un. Tuban pilta mahmah in teh. Chi'n nui nulhnulh kawm in ahong gen a, huchi'n ahon hennate uh phel in ahon kaikheta uhi. OC pa' room ah ahon pilut ua, huai ah ka nu'n kap kawm in hon na ngak hi. Ka nu ka muh tak in ka khasiat tha hong suak in ka hehtha ahong suak a, dai kilkal a mi himahleng dikloutak a ahon bawl uh phuba lak utna in ka dim hi.
OC pa'n laipek khat leh pen ahon pia a, tua ah ka min gelh ding in ahon sawl hi. Tualai ah keipen mohtansak a om ka hihdan leh tuban buaina bawl nawnlou dia chiamna nei ka hihdan a kigelh hi. OC kiang ah, Sir, keimoh hilou ahi chi'n ka dikna thu gensawm mahleng sum in a lungsim leh a kamsung teng leikhin ahihtak man in bangmah a phatuam kei. Utlou sasa in ka suai ka kaih a ngai maimah hi. Inn ka tun un ka liamna maate ka nu'n tuilum in ahon silsiangsak a, ka nih un gentheihna ei a ding mah hinteh maw chi'n khasetak in ka om uhi. Huchih laitak in mikhat hong in laidal khat a hong pia a, ka et uhleh V/A te' apan ana hi a, vengsung a omthei nawnlou ding a nohkhiakna lai ana hi maimah hi.
A haksa ngeimai. Tagah-meithaite' ading a gensaktu ding omlou ahi diam? Nohkhiak in ka om ua, himahleh ka theih siamlouh pen zaw kisuan khiakna ding a dang a om ma hon ngak lai ding uh ka sak leh, tu mahmah in chih ahihman in khasiatna in ka dim uhi. Khristian gam kichi a Pathian thei namte i kichih lai in tagah-methaite hehpih manlou leh khotuah manlou zen in Pathian thu i awi kha ua poi ka sa mahmah hi. Ahon nohkhiak uh zaw ka thuaksiam, hilele ka omna ding uh ka muhma bek uh hon ngak ding uh ka sak leh bui tawholh a kiholh mai zaw koi ah ka paita ding ua, tuni, tu dakkal in koi ah bukna ding inn ka mu man mahmah ding ua ?
Bangteng gen in phun mahleng ka thugen za a hon panpih ding kuamah a omkei. Kei lah ahon gawtna uh gimtak leh tang peihlou ka hizawk mah toh thangpaihna in ka kidim hi. Huchi'n ka nu'n awl in ka vante' uh ahon siam a, tamlou ahihman in ahon zoupah hi. Tamlou chimahle hangle mikhat puak ding in tam lodeuh ahihman in peihlou sasa in ken leng ka puakpih hi. Pawt khe ding a ka kisaklaitak un V/A Chairman leh Secretaryte mibangzah hiam tonpih in a hong pai ua, bangziak a ka thupiak uh zuilou a tutan pha omlai na hi ua ? Chi'n a hong sawn pawt thoh uhi. Ka nu hahsawn kha deuh uh ahi ding a, atha hat nawnlouh toh kongtual ah a vanpuak teng toh apuuksuk hi. Ka nu puuk suk ka muh tak in ka delh pheisawm a, himahleh, ka liamnate anat luatziak in ka tang hoih theikei. Huchih laitak in, ka nung apan in kinoh ve ua, hon chitoh ka taw ah khat in khetphei ahon thuah zomah hi. Aw Toupa bangziak a na nungzui kichite lak ah hon panpihtu ding hon sawllou tel na hiam? Chi'n zum-le-zah khuallou in ka kap khe zuazua tamai hi. Hon hehpihtu ding muh naksang in ahon mukha peuhmah in huatna leh simmohna mit in ahon en uhi.
Pai ding a ka hong kisak nawntak un mitampi in ahon umkual manta uhi. Kou nuta simmoh in ahong kou zialzial ua, ka veng uh khatvei mah leng hong siknawn kei un chi'n mangpha ahon khakta uhi. Huchih laitak in. Luni' leh anu a hong pai ua, ka en ngam mahmah kei. Ka itpen ang ah tua ka dinmun a ding ding in ka kingaihtuah kha ngeikei hi. Luni bel amit a khitui luang kawm in ka kiang lam ahon zuan a, Ulian aw, miteng in dikloutak in hon ngoh mahle uh, ken zaw na dikna ka thei. Ka hon hehpihlua. Nang ding a kipden ding ka hi. Khase hetken aw... Chi'n zum zou nawnlou in ka ngawng a hon kawi in ahong kah khum hi. Luni omdan anu'n amuhtak in kintak in hang kawm zuauzuau in Luni tuh ka ang apan ahong kai khia a, ka nu lam enkawm in, "ka hon na muanmuan maizen toh, hiai bang lel maw na hih uh. Ka inn uah hong kuan nawn ken la, na sepman ka hon piak tengle na hon ditkik ding ahi." chi'n ahong genta mai hi. Ka nu'n leng awl in, "nu Lhingboi aw, noute ziak a tutan ngawllou a ka om man un natung uah ka kipak mahmah hi. Hon din ut mahleng tu tadih in zaw ka hon dinzou kei ding. Ahihhang in dit kik ka hon sawm ding aw." chi'n ka paisanta uhi. Ka nung ah Luni khasia a kapging ka bilsung ah alut mahmah a, hihtheih dang lah neilou ka hihman in bangmah gense lou in ka paisan zaw maita hi.
Innlum nusia in koilam manoh ding hiam chih theilou in ka nuta un kuamah pau omlou in ka pai tiktik ua, ka lungsim tuak uh bel a vaksau mahmah mai hi. Koimun ah kinga a, koimun manoh ding chih theilou in ka khepi un a kawkna lamlam zuan in ka pai mai uhi. Khuamial ding a kisapah ahihman in ka lungkham mahmah mai a, van hong ging in kawlte' ahong phe zualzual hi. Khua bangzah hiam pelkhin in huaite ah lah khawl ngamlou ka hihman un ka pai zel ua, khua hong mialding a kisa in ka lauhthawng mah bang in vuahmal te'n ahon dengkha panta hi. Bukna ding mun a omkei, vuahmalte hong tam deuhdeuh in atawp in ahon buak khum thoh zoihzoih maimah ta hi. Maban sawn thei nawnlou ka hihman un leh khua toh lah kigamla mahmah ta ka hihman un singlim khat bel in koute vuah apan hon vengtu ding om tuanlou in ka kikawi mai uhi.
Tua nitak a haksa ka thuakte uh gen ngamhuai lou tamtak a om tunung a ka ngaihtuah thak chiang in ka chimul athou theilai hi. Vuah lah theuta ning chilou in a zu tam deuhdeuh mai a, pum kawt gai ka hihman un ka liamna ma te lah nat petmah in ahong naa a, votlua ahihman in ka bilngek khawng nat petmah in ahong nat beh nawn hi. Aw hichitel a hinkhua haksa thuak dinga bangziak a ka nuta ua damsak lai a om ka hi ua? Pa aw hiaibang thuak ding a zaw hon phal hetlou ding zaw hi vechin maw... Pa aw hong pai inla na thai leh navon na omna mun ah hong pi mai ve maw.
Ka sak lak uh ahong ging suatsuat a, avot toh a mial toh lau in ka ling zungzung uhi. Tua nitak ihmu lou hial in ka zanhak pikpek uhi. Khovak kuan in vuah ahong theu a, khua ahong vak siang tak in ka sak zek uah sakei khat ana ihmu huthut ka mu uhi. Laulua in tat leng tang ngamlou in ka nu toh kikawi in ka en mai uhi. Sakei leng awl a hong khanglou in ahong kize nguahnguah a, kou omlam theilou bangtak in awl in apaikheta hi. Ka nu'n Pathian in ei veng ding a hon sawl hiding eive chi'n kipahthu genna thumna hon nei a, huchin kawt nemnomsa leh nin biatbuat in ka hong kipan khe nawnta uhi. Khua ka tuah khakna te uah ann nekna ding ka zong ua, himahleh mite'n ahai honsa ahi ding ua, nek ding hon piak sawmlou in et in ahon et thoh maimah uhi. Kou leng nuamsalou in ka pai zel ua, aban a khua khat ah hausapa' inn kankhia in zum-le-zah khuallou in tentheihna ding phalna ka ngen uhi. Hausapa'n leng khawtaw lam a, munkhat lui lianpi (khuga dam tui kiching) kiang ahon kawkmuh a, tua ah aidakbuk lam in khosak ka hon panta uhi. Kei leng ka sinna maban zom ding chi'n skul ka vakai panta a, himahleh ka vakai masak ni in skul tungphet Principal in a room ah hon samlut in nohkhiaka om ka hihdan leh skul ka ithei nawnlou ding ka hihdan ahon genkhum a, tualeng class lase lou a pai ngal ding in ahon ngen hi. Ka lungphawng mahmah mai a, ahehpihna ngen in kapkawm in thu diklou ziak a hiai bang teng thuak ka hihdan gen in hehpihtaka hon kaisak hamham ding in khitui luang kawm in ka ngen hi. Himahleh, aman khauhtak in askul pen misual leh thulimloute kaina ding hilou chi'n ahon nohkheta hi. Khasetak mai in ka paikhia a, ka lawm-ka vual te'n honna en heuhou uhi. Gate apan pawt khia in ka skul ka gal-et a, kai ut lopetmah in munkhat ah tu in ka mittui ka guk nulnul hi. Huchih laitak in nidang a ka lawmte khat in hon na mu a, ka kiang ah hong pai in ka omdan ahong dong hi. Ken leng kimtak in ka dinmun ka hilh a, aman atheihtak in hou e, khovel ah kuamah kisimmoh sak ding hilou, zaleen ika hia. Hong in na lungkhamna sukbeina ding kon hilh ding chi'n ahon kai a, huchi'n munkhat ah inkal neuchik omte ah lut in atawp ka tung ua, tua ah inn khat ana oma, asung ah numei leh pasal bangzah hiam ana om uhi. Amaute nuamsa a kikhuat toh, laa sa a laam toh ana chiak vengvung uhi.
Ka lawmpa'n hiah honna ngak in chi'n room khat ah ahon lut san hi. Sawtlou kal in ahong pawtkhe nawna, akhut ah mikapna phim neuchik khat ahon tawi a, doh awle chi'n kap ahon sawm hi. Ken leng lamdangsa in bangziak a kap hon sawm na hi hiam? Chi'n ka dong hi. Aman bel hiai ahi lungkhamna damdawi, kikap lechin na lungkhamna tengteng bei ding a, nopsakna khovel ah leeng ding na hi chi'n ahon dawng hi. Ken leng bang ahia chih theikei mah leng lungkhamna damdawi ahihleh chi'n ka khut ka dohta hi. Ka sigui ah hon sun in ahon kaplut ta a, a damdawi ahong lut tak in ka hi miaimuai a, ka chiteng hong zaang in nopsakna tak khat ka hon neita hi. Ka etna lampeuh ka nuih aza a, ka nak bang hong thak sisi in nuam ka hon sa sim mahmah ta hi. Himahleh, ka theihlouh kal in ka na ihmu man a, ka khanloh tak in ni ana niam mahmah ta hi. Ka ngaihtuah thak leh mite gen minthang Heroin No. 4 kikap ka na himahmah hi. Kei leng kintak a thou in pai ka sawm a, ka lawmpa'n khawlphot in khatvei kap lai ni chimah leh ka nu kia ka lungsim ah om ahihman in kintak in innlam zuan in ka paitouta hi. Inn ka tun in khua mialta hi. Ka nu'n kongkhak ah ding in hon na en-en a, ahon muhtak in bawi bangchi maw na hong tunghak lua a lunghimoh lua ka hi ahon chi hi. Ka thilhih kizephawk mah leng genlou in lawmte toh kimuh louhna sawt lua a lawmte inn ah ka hong bang kha ahi nu. Chi'n zuau gen panta chu ka himaita ve. Nitak ka luptak in ka kingaihtuah sau mahmah mai a, ka thilhih hoihlou ahi chih thei mah leng, khatvei chiama agu ka sisan ah lutta ahihman in lunggulhna in ahon manpanta hi. A zing in hih nawnlou ding chimah leng hon kai om mah bang in ka vatung nawn a, anihvei na kap nawn ka himai mahta. Huchi'n awl in theihlouh kal in No. 4 addick ka hong suak maimah ta hi.
TUUN AW MANGPHA
"Gamlapi ah khualzin in genthei, haksatna namkim ka tuah chiang in belh ding neilou ka lungzuan chiang in, ka nu awnem ka bil kha'n za za ing e..."
Ka thilchin hoihlou ahi chih theimah leng ka lungkham hehnemtu ahihman in ka lut thuk deuhdeuh tamai hi. Nikhat lampi ah ka pai leh ka nunglam apan in "Ulian" chi a hon sam aw ka za a, kihei a ka et leh ka itpen Luni ana himai mah hi. Kipah lah dah kawm in ka en a, aman hon zuan in a inn uah ahon paipih hi. A inn uh ka tun un nek ding tamtak ka ma ah ahon luikhia a, ne ding in ahon sawl hi. Kisuanglah ka hihman in duhlou chi'n ka nial a, tuatak in Luni in khasetak in,"Ulian ken nang deihsaktak a hon pia ing a, nang hon nial mai ding maw? Ulian ken nang hon ngailua, niteng hunteng a nang mu ut a ana dakdak mai keive." chi'n amittui ahong taak khe mawk hi. Kei leng kisuanglah lua in, "Luni aw hon ngaidam in hiai bang kaphu louh deihsakna ka tan ka kisuanglah lokha a ahi aw, tampi ka hon ne ding aw." chi'n ne ding in ka hong kisa ta hi. Kamkhat baak pan chih ding in Luni nu' bazaar hoh ahong tung geih a, kei leh ka ma' a nek ding kilui omte amuhtak in heh kisa in amai ahong san tuaituai zozen hi. "Nang tagah in bangziak a ka inn uah nek ding zong a hong na hia ? Ka tanu toh nang kiteng ngeilou ding. Amah Muangpu(ka kisualpih pa) toh kiteng ding a kikhaamsa ahita uh. Khovel sagih vei kilumlet leh leng nang ka makpa ding in ka hon deih kei ding. Zumlou maw? Tu mahmah in paikhia in." chi'n pawt ding in ahon sawl hi. Ka zakta mahmah mai a, ka mit in bangmah amuthei nawnkei. Kintak a ding in ka taikhia hi. Ka mit khitui a pumdim in ka lungtang in naa asa mahmah mai hi. Ka lawmte kiang ah pai in tuani in dose sang deuh kha ahi ding a, ka OD tamai hi.
Lawmte'n keptheih kep mawh in ahon kem ua, amau hahpanna leh khotuahnate' ziak in ka hong halh khe nawn hi. Inn ka tun in zan dak 10 a gingta. Ka nu'n ka omdan teng thei ahihman in khasetakmai in ka kiang ah hongtu in ahon kah khum hi. Etna ding ka theikei. Ka nu'n hon tai naksang in nemtak in ahon thuhilh a, ka thilchi'n hoihloute nusia a, Pathian lam ah kik ding in ahon ngen ngutngut hi. Ken leng ka nu aw nemte' ka zak chiang in ka kisik mahmah mai a, kibawl hoih ding in thupukna ka bawlta hi. Hun bangtan hiam bel ka ngawl theisam hi. Haksa mahleh ka kideek teitei a, ka nu teektak leh hatlou takmai lungsim natna ding bangmah bawl ngamlou in ka thuak teitei hi. Aw ahaksa ngei mai, Damdawi duh hun in a honpha bangzaw om dingdan a kithei kei, kho-ul in hon pumtuam a, guh kipehtuahnate hong zau in a ki-om maimai theikei hi. A haksatdan genvual hilou, a thuak khaloute adin zaw genthoh a ahaksatdan theihsiamsak vual ahikei. Guh kawm hong zau bangzaw aw khuat theih lah hilou, a tawp in kideek zoulou in khamtheih mah ah ka puuk suk kha nawn hi.
Nikhat ka lawmpa toh guk ding zong a ka vak vialvial uleh biakinn khat ah kiteenna programme zang ana om a, mipi atam mahmah mai hi. Banner kitak ka et leh "Muangpu weds Luni" chih ana kitaak dengdong maimah hi. Ka lungtang tem a dawt mah bang in ahong naa a, ka khete'n ka pumpi pawzoulou in a zoigai vek hi. Ka lawmpa'n ahon muhtak in lamdang asa mahmah mai a, ken leng thil omdan gen in kintak in ka paikhepah uhi. Ka lungtang nalua ahihman in Pathian natawm ka gingta zou nawnkei. Pathian aw , om na hìhleh bangziak a kei tan hichitel a haksabiik ahia ? Chi'n ka kap huphup hi. Huchi'n Pathian om ding a gingta nawnlou in niteng hunteng in siat lam ka manoh hiaihiai ta hi.
Ka nu'n bawi pawtpawt ken la hon ompih ve aw, tuni beek chi'n hon ngen ngutngut sek mahleh ka duhna in hon kai tuntun sek ahihman in ka nu hehpih huaitak leh hatnawn lou natawm ompih manlou in ka thilchin man ding zong in ka vak duaiduai sek hi. Ka pat tung lai in bel deihsaktu ka ngah a, athawn in ka mu gige hi. Himahleh ahong sawt hiaihiai tak in kuamah in hon khilai gige zoulou uh ahihman in ka khamtheih man ding guk ding zong in asun-azan in inn ah om man nawnlou in ka diang diang tamai hi. Belh ding neilou in inn apan gamla tak ah khualzin gammang bang mai in mi dai kilkal peuh, hanmual peuh ah ka giah hun atam mahmah mai hi. Tua hun chiang in ka innlum leh ka nu ang ka ngai ngoihngoih mai a, himahleh ka thilchi'n hoihlou ten ka nu toh kaal ahon gamla sak semsem hi. Tua hun chiang in ka bilkha ah ka nu'n "Lianpu aw hon ngailua ing. Hong chiahta maive maw bawi." hon chi in ka thei sek a, himahleh, ka nu mel ka mu ngam nawnkei. Lungnopna ding a khamtheih hihpa'n lungnopna muh naksang in lungkhamna thuahnih ka muh behlap zawsop hi.
A zing in kintak in innlam ka zuan a, inn ka tun kuan in ka nu muh ding lit petmah in ka lin mawk hi. Hon tai in hon sal ding chihna hilou in ka omdan hoihlou ka etchiang in ka nu khasesak lua leh genthei saklua ka hihman in ka nu mel ka mu ngamkei hi. Himahleh ahon itna leh a awnem takte'n hon zoulua ahihman in ka paizel a, kong khak ka hon tan in leng kei hon dawntu ding ka nu mel ka mu kei. Ka lut a ka dakphei leh table ah kingai kawm a ka nu ihmu ka mu hi. Awl a akiang naih in nu aw hon ngaidam in chi'n aliang ah len in ka sawi hi. Himahleh dawnna bangmah ka za kei. Ka nu tanglou in a om ngei in a om hi. A khut ka khoih leh khauh gawp in avot dekduk a, ka nu'n tangtawn pialgal hon kaisanta ahi chih ka thei ngal mai. Na salua in ka kap ek-ek a, lah aphatuam ding bangmah a om nawnkei. Nu aw hong thou ve maw. Kei na tapa a sehtak hilou khatvei bek hon en inla, bawi chi'n hon samlai ve maw. Nu aw HICHI DI ANA SALENG ZAW... ka hinkhua nang toh zangkhawm zaw ding hi inga. Ka hon taisan kha a hon ngaidam in aw nu aw... Tuun aw mangpha. Chi'n ka kap khe zoihzoih tamai hi.
Ka thawm zapha chiang teng in hong delh khawm siausiau ua, huchi'n ka nu tuh han ah vui khiak in a omta hi. Kisikna in ka pumdim a, lah aphatuam nawnkei. Kibawl hoih naksang in Pathian ka ginlelhna alian deuhdeuh zawmah hi. Gentheihna thuak ding a ka nu-le-pa leh ka it Luni hon laksak chi'n Pathian tung ah ka vui zawsop hi. Huchi'n ama sang a sezaw in hinkhua ka hon zang a, ka lawm-le-vual te'n leng hon taisan gai uhi. Mite huat leh mullit ka hi a, ka paina lampeuh ah leh ka hih lampeuh ah mite muanmoh leh nelhsiah in ka om hi. Lawm ngai in vul mah leng kuamah ka lungkham hon thuakpih a hon panpih ding a omkei, saptuam leh khotang ading in melma ka suakta hi. Mi inn ah ka hoh khak sunsun in leng guk ding zong a hoh mah bang in hon veng den uhi. Ka leitung hinkhua nopsakna sang in lungkhamna ah alut thuk deuhdeuh a, nuamsak ut a nopsakna damdawi kikap pa pen lungkhamna damdawi leh mite kih leh mudahna damdawi kikap ka na hiphiangsan hi. Kibawl hoih ka ut a, lah hon panpihtu ding omlou in agal na tawm in leng kuamah in ahon en ut nawn kei uhi. Aw ka neulai in genthei mahleng innsung kim a lenlainite ngai hi nang e.. Sap kik theih hileh zaw maw ! Tuun aw na awnem khatvei bek hon zasak laive maw. HICHI DING ANA SALENG ZAW nathu manphate zui mah ding zaw hiveng maw.Nu aw hon ngai hi nang e.
MIALNA PAN VAAKNA AH :
"Zingsang in thu hong ngetsak a, nitak in zong hong ngetsak ka nu in. Tun van inn nuam ah om in kei a din thu hong ngetsak lai aw ka Tuunnu."
Hunte hong paizel in ka thil hihte mah hih in hunte ka hon zangtou zel a, inn ah ka om khak sunsun chiang in ka nu ngai in thawmhau lua in ka kapkap kha zel hi. Kuaman bang na chi a? Na hoih zel na hia? Hon chi ding a omkei. Huchi'n inn ah om ut nawnlou in kholak ah hunte ka zang a, guk theihte gu in khamtheih mah tuh ann a nei in ka hinkhua ka hon zang pan nawnta hi. Mat leh vuak ka thuak mun mahmah a, himahleh itna toh vuak-le-sat a omlou a, iplahna leh huatna ziak a vuak-le-sat a om ka hihman in ka lungtang akhauh deuh deuh zaw hi. Mite' pampaih leh ittu ding omlou a kikoih in niteng in khelhna lam ah ka lut thuk deuhdeuh hi.
Khovel ah hon ittu ding kuamah omlou ahihman in lungkhamna leh hehna toh hinkhua ka zang a, ka hinkhua ka ning mahmah hi. Koimah ah kitazou nawnlou leh vaal a kikoih ka hihman in tampi vei kithah ka sawm a, himahleh lamdangtak in ka lohching ngeikei hi.
Nipini sun khat Lamka kholai ah khamtheih duh gawp leh alei na ding muzoulou a lunggimtak a ka vak lai in biakinn khat apan "JESU AH LAWMHOIH INEIH DAN" chih la kisa ka za a, lamdangtak in tua la kisa in ka lungsim ahon khoih mahmah mai hi. Ka tup louh pi in tua biakinn lam manoh a ana paipai ka na hi a, ka theihtak in biakinn sung tungkhin ka na himaimah hi. Tua alasak un hon ittu omlou ka saklai a kei hon na ittu Jesu Khrist om ahihdan ka musuah a, mittui toh kidim in munkhat ah ka dingden hi. Mipi anunglam a tute'n honna en heuhou ua, himahleh zakta zou nawnlou in ka hinkhua a hong lut ding a Jesu Khrist sam in ka kikou kheta hi. Lasak zoh in munkhat ah ahon tusak ua, Pastor in thugen hon pan in khelhna thu leh Jesu'n i khelhnate ngaihdam na dia khros ah hong si ahihdan ahon gen hi. Amah muang a akiang zuante hotdam a om ding ahihdan ahon gen in ka khelhnate kisik lua in Jesu khebul ah ka kilui kheta hi...........
Huchi'n ka thilhoihlou hihte tawpsan a hinkhothak a hing ding in ka hong kilaan khe theita hi. Ka taisansa ka inn uh zuan in ka kiik nawn hi. Inn ka tun in a sung ka envel a, ka dak nalam peuh lungzuanna in adim hi. Ka nu damlai a amah toh kipaktak a ka omkhawmna uh, ka kithuah khawmna inn uh tun adai zikzik ta mai hi. Ka innsung teng ka enkual a, ka nu Laisiangthou kil khat ah ton nilnel in ana om hi. Lakhia a ka phen aleh alai ah lai gelh khat hoihtak a kikhepsa a om ka mu hi. Phel khia a ka sim leh hiai thute ana ki gelh hi.
Ka ta it bawi aw, koi ah hon paisan na hi a? Kei na nu hon it nawnlou na hi hiam? Bawi ken zaw hon itlua ka hi. Hong kik nawn mai ve maw bawi. Ka kinepna pen ka ta it aw. Na khelhna te kisika lamdik a na hong kik nawn na ding in ka na thum gige hi. Na hong kik nawn ngei ding. Himahleh, na mel mu ding in hiai leitung ah damlai ding in thahatna ka nei nawn kei. Bawi ahihhang in khase ken. Na tuunnu'n nang a ding a hon ngetsak gige ahi aw.
Ka mit apan khitui hong luang khia in ka nu hon itna ka phawk suah deuhdeuh a, ka taisan khak kisik lua in ka kap khe ek-ek hi. Himahleh thil teng a kikhel vekta. Sapkik theih ahi nawnkei. Kei a ding a akipumpiakna tengteng din ut mahleng hiai leitung ah zaw ka hihtheih bangmah a om nawnkei. Amah deihdan a ka hinkhua om laiteng ka zat touh louh ngal.
Nu aw na ta mihai leh gilou ka hi. Na hehpihna niampen in hon ngaidam in aw. Nu aw na thumna dawn in a omta, siamthak ka hita. Himahleh nu aw, nang tellou a hinkhua zat ahaksa ngei mai. Nu aw, kon taisan a, kei tellou a hinkhua haksatak a zang nahihdan tu'n ka theita. Nu aw hon ngaidam in aw. Tun van ah om mah lechin kei na tapa adin thu hon ngetsak lai in aw nu aw.HICHI DI ANA SALENG ZAW HON TAISAN LOU DING HI'NG A... NU AW HON NGAIDAM IN AW...
Hinkho thak toh khosak ka hon pan tou panta hi. Aw ahaksa ngei mai. Ka thilchin luite'n hon taisan mai ding ka sak leh tawpsan ka tup nak semsem leh ka duhna a lian deuhdeuh hi. Himahleh, Laisiangthou te sim in thumna toh ka melma ka doutou zel a, hon tantu'n zohna ahon pezel hi.
Hiai ka tangthu mawltak mai sim kha tengteng aw, hehpihtak in na Tuunnu' awnem ngaikhia inla, hehpihtak in khase sak ken aw. Kei tuahbang tuak ding in kuamah ka hon deihsak kei. Kei bang a thilchiin hoihlou a bual kha na hih leh kintak a tawpsan ding in ka hon ngen hi. Na Tuun awnem ngaikhia inla, ahon saplai in athu zui in. Hileh khovel nang a ding in paradise ahi ding hi. Na tuu'n awnem na ngaihkhiak kei leh nang din tangtawn kisiikna na maban ahi ding hi.
"Ka ta aw inn ah hong chiah ta in hon chi. Ngilh ngeikei ning e ka tuun awkhum. Ka bilsung ah ka tuu'n awnem in hong samsam lai, ka mangngilh zoh louh hong it ka tuunu'n."
~. Beita .~
©Siamsinna leh Vakiangbu
Quote : "Ka neulai in khomui kuan in ka lawmte toh ka kimawl theizel a, huihnung in thete hong khua'n chiang inn pan ka tunnu'n hon sam chiaichiai e.
"Ka innsung hawmtak mai sung ah ka hunluite ngaihsun a ka omlai in, tanglak kholai vakte'n a mobile ua pan in hiai la ahon khah khiak uh ka za hi. Tua la ka zaktak in neulai hun a ka nu toh nuamtak a ka kikholh lai nite uh phawk in om dingdan theilou in konglam ah ka diang pawt hi. Kha a vak mahmah mai a, gamlapi apan naupang hon bukteh kimawlte thawm khawng kiza chiaichiai a, nungak-tangval khavak aam a kholak ah kipaktak a ton khawm helhelte ka muh in ka hunluite ahong lang kik a, khaselua leh kisikna a pumdim in ka mittui dan vuallouh in ahong phulkhe zungzung hi. Nuamsatak a ka hinkhua ka zat lainite ngai in ka nu'n ittak leh duat tak a ahon thuhilh lai nite ngai in ka kap huphup hi. Himahleh, kei adin a kikhelta, sapkik sawm in mual-le-tang teng tawnsuak mah leng ahong kik nawn kei ding. Minute 5 bek samkik thei ding hileng zaw ka nu kiang ah ngaihdam ngen ut hinang e... Ka tanchin haihuaitak leh thulimlou tak himahleh, midangte'n ana sim ua, kei hinkhua apan kibawlhoih nang neuchik bek aneih khak zenzen uh leh chi'n kisuanglah kawmpi in ka hon gentei ding aw. Ka khua uh zaw ka hon gentel dah mai ding.
NEU LAI THUTE:
Zoudawn lam a khua khat ah ka na piang hi. Ka nu-le-pate'n hon deihthoh mahmah ua, niteng hunteng in thuhoih-lahoih hon hilh in mikhat ka suah tei na ding in ahih theih tawp un pan a lasam uhi. Ka khosakna uh ahaksa mahmah mai a, ka nu-le-pate' niteng in loukhou in kuankhe zel mahle uh khamkhop akhoukhe zou ngeikei ua, kumteng in ka puktaw gige sek uhi. Himahleh, mite eng a ka khosak ding ngaingam lou in neilou sasa in skul ahon kaisak teitei uhi.
Skul fee genlouh laibu man ding natawm neizoulou ka hihman un laipuan vuak tawi in skul ka kai zel hi. Skul ah lawmte'n laibu thak toh bag thak khawng hon tawi in, uniform nalh tak toh ahong kuan chiang un ka eng thei mahmah mai hi. Kei lah uniform gentaak louh khekol natawm a tawthuap teng zou hamham lel ka hihman in ka lawmte lak ah maizum na tampi ka tuak a, laibu neihlouh ziak leh uniform neihlouh ziak in lawmte ang ah gawt in ka om mun mahmah hi. Tuate ziak a skul kai nuamlou a ka kiphin chiang in ka pa'n "bawi, nei hileng ken leng ahoih theipen ka hon deihsak hi. Himahleh, i khosakna un chinlou ahihman in tuate thuak hamham inla, lai hoihtak in hon sim lechin tunung chiang a mithupi khat hong suak ding na hi. Tua hun chiang in tua hon simmohte na nuai ah hong kun ding uh ahi." chi'n ahon nem zel hi. Huchi'n keileng lawmte hon simmohna kampau te uh kimangngilh sak in ka lai neih sunsunte hoihtak in ka sim a, kuamah ka phalah tuankei hi. ka nu'n ka laisim dek chiang in hon thumsak zel a, ka sim zoh chiang in kipahthu ahon genpih zel hi. Lup chiang in Laisiangthou sung a tangthute hon hilh in hon khim ihmu zel hi.
Nitak annek zoh chiang in lawmte toh lentual ah buk-teh te khawng, ki-hen ate khawng kimawl in nuam ka sa thei mahmah ua, khua mial ding a ahong kisak chiang in ka nu'n hon sam in inn ah lai ahon simpih zel hi. Ka lawmte ahihleh anu te'n samlou uh ahihman un sawtpi kimawl zel ua, athawm uh za zel ka hihman in amau lak ah tel ut in ka nu bang ahon sap ziak in ka hehsan khasek hi. Himahleh, huaihun chiang in ka nu'n it tak leh duat tak in hon thuhilh zel hi. Ken bel ahon itlouh ziak a hon gawtna dan a la in ka heh thei mahmah mai a, lawmte lak ah hon suzahlak na hi chi'n ka heh khum sek hi.
Hunte hong pai zel in ka exam nate uah ka lohching tou zel a, khatna ngen a pang tou ka hihman in skul fee ka awl tou ngitnget hi. Nu-le-pa thumang in ka hong khangtou zel a, mite bang in neizou kei mahle ung ka neih sunsun uh ki ittuahna te kihawm lual in nuam ka sa mahmah thou uhi. Kum 12 ka phak kum pawl VIII ka sim kum in ka pa ahong damthei kei a, ki-etkolna ding bangmah neilou ka hihman un damdawi inn naih zoulou in inn ah ka ki-enkol mai uhi. Tanau laina kuamah in hon ngaihsak lou ua, ka nu'n panpihna vangen zel mahleh panpih nak sang in thadahnu kizon lelve chih a tantawk ahimai. Nikhat ka nek ding uh ann omlou ahihman in ka nu'n ka pute kiang ah anntang vangen a, amau ana piak nak sang in kumteng a nou innkuan vak gige leng ka ning gawp sisuk un chi'n ka pi'n ana hankhum zomah hi. Ka nu khaselua in hong paikik sawm a, ka pi leng ki-awi lou deuh adiam ah, a ui uh nek val annkhing hon tawisak hi. Ka nu'n leng sang ut kei mahleh kei ahon ngaihtuah luat ziak in utlou pipi in a sang a, inn ahong tun in kei leh ka pa ahon pia a, ken leng nu aw nang nelou ding maw ? Chi a ka dot leh ka pute' inn ah nekhin ahihdan ahon gen a, kou ka pa toh ahon nesak hi.
Ann ginatak a nelou leh damdawi hoihtak a nelou chih mahtak ka pa anini in ahong gim hiaihiai a, atawp in keil eh ka nu hiai leitung gimthuakna pal lai ding in tangtawn gam ahon zot santa hi. A kivui ni in leng ka tanaute uh kuamah in ahong delh kei ua, handal ding zong kimu zoulou in ka nu khasia in kapkap mai hi.
Ka pa sihnung in ka nu kia toh ka hong khosata uhi. Kuamah hon hehpihtu ding omlou ahihman in kou nuta kia ka khosak theih dandan un ka khosa tiptip uhi. Khosung hi in ka lawm-ka vual lak ah leng simmoh in ka om ua, meithainu, tagahpa chi a kou in ka om tawntung uhi. Nidang a ka lawm-ka vualte kuamah hon thuah ut a om nawnkei ua, amau ka vathuah sunsun ni in leng tot leh vuak ka hi gige hi. Huchi'n kuamah thuahse lou in ka nu mah toh ka kithuah ua, inn ah om in lai hoihtak in ka sim hi. Ka nu'n niteng in hon thumsak gige a, khalam thute hon hilh in ka kha hotdam ahih theih nang in Pathian thu hon hilh in hon thumsak gige hi. Kikhop khawng Nipini skul khawng kai ut mah leng, mite'n hon simmoh lua uh ahihman in kai ngamna di vual ahikei. Skul natawm ah vuak in ka om gige a, tua hunchiang in ka dikna hon genpih ding kuamah omlou ahihman in akhel ziak ahi chih tang in sinsaktute'n kei ahon gawt behlap zomah uhi. Aw tagah hinkhua zaw haksa hina e... Naupanglai himah leng, a khen chiang bang in lungsim a paisual dekdek hun bang atam mahmah hi.
Kumtawp exam in ka pawl uah sangpen hihna ka ngah nawn a, ka nu loukuan ahong tun in ka na hilh pah hi. Ka nu'n hon kipahpih mahmah mai a, himahleh, sungkuan kim a ka omlai nite uh phawk in ka pa ngailua in, aw zuapa aw hiai hun kipahhuai mu din hon dampih lai lechin zaw maw... Chi'n ka nuta ua kingawng kawi in ka kap huthut uhi.Ka khua uah pawl giat tan chauh simtheih ahihman in ka maban abing mahmah hi. Laisim sunzom ut mahleng mite neih bang a neilou ka hihman um ka lungkham mahmah hi. Mundang ah laisim sutzop ding pen kei a ding in van a gah toh kibang hi. Laisim ut mahleng ka nu chauh in lou na asep ding ngai ngamlou in kailou a ka nu toh louna semkhawm mai ding in ka thupuk hi. Himahleh, ka nu ngaihdan hilou ahihman in Lamka lam ah ka sutzop theih nang ahon ngaihtuah pih hi. Hiai khua ah lah kuamah hon hehpihtu ding om tuanlou ahihman in ka nu'n Lamka lam ah peem mai ahon sawm pih a, kei maban hon ngaihtuah pih ziak in Khristmas natawm khua ah zang se lou in Lamka ka hon manohta uhi.
Huchi'n New Lamka ah ka hong tengsuk ua, innluah in kei Ebenezer School ah ka ki admit a, ka nu'n zingkal teng a mehzuak leh sunchiang a mihausate' inn ah sep theihtheih sem in kei ahon vak hi. Ken leng ka nu hon deihsaknate leh kei ading a akipiak zohnate thei kawm in lai hoihtak in ka simtou zel a, ka pawl uah asiam lawi in ka pang tou thei zel sam hi.
Zodawn hinkhua leh khopi hinkhua akikhai mahmah mai a, tunung a ka hinkhua ka ngaihsut kikchiang in... Aw haksa lehle Zodawn ah ana tengden himai leng zaw... Hichitel a lungngaihna leh kisik tuntunna neilou ding hiveng maw... Ka chi vungvung hi.
KHANGDAWNG HINKHUA LEH SIATNA KHUKPI:
"Kagol chiang ka nu thu manglou in vakthaap in ka ut bang ka om hang in, ka nu hon itna lianlua aitam maw... Hong chiah in ka ta chi'n hong sam lai."
Lamka khopi ah skul ka hong kai pat in ka theih ngeilouh tampi ka hon theikhe ta hi. Khangdawng hinkhua kilutta ahihman in lungsim paizia pen hong tuam pianta hi. Lawmte khawng nungak kingaihpih nei a, anungakte uh toh klas ah ahong kithoh chiang bang un ei apan in enna ahong om theita mawk hi. Amau bang a nungak neih utna lungtang ah hong piang thei mawk a, pawlte lah ah numei hoihsak pawl bang hong om pianta mawk hi.
Kou pawl ah hong kaithak mah nungak khat Luni kichi om hi. Amah melhoih mahmah khat hi a, a chite maam in aduang kilawm mahmah hi. Asamte nuhsan hiuhiau a, kilawm in ka mit ala mahmah mawk hi. Kou vengte mah ahihman in skul kai kuan leh pai ah ka kiton kha zel ua, tua hun chiang in keipen nervous thei mahmah in ka kisui khapah sese sek hi. Aman leng zahtakna khat hon nei ahisam ding a, ka kihou vang mahmah sek uhi.
Ka muh tung pan ka lungsim luah gai pah mawk ahihman in lamdang ka sa mahmah hi. Chikmah a nungak abuai ngeilou pa pen Luni ka muhni apat in gu nekha mah bang in Luni in ka lungsim leh taksa teng luah gai in hon zen hi. Amah ahih leh mihausa ta ahihman in kei tagah leltak amah ding a chin kisa loulua ka hihman in itna thu ka gen ngam kei hi.Ka kimuh chiang bang un keisang in amah zum zaw mah abang a, klas room sung a ka kimelh tuah khak chiang bang un amai san tuaituai sek hi. Tuate ka muh chiang in hon ngai hiding bang in ka suangtuah mawk mawk sek hi. Himahleh, mabang pan a, itna sinthu lel ding a ka kisak chiang in hon ngailou hikhaleh zum huai lotel ding hia chi'n ka pan ngamkei hi.
Hunte hong pai zel in Luni toh leng ka hong kineel deuhta ua, alawmte apan bang in Luni in hon star ahih dan khawng ka za zeuhzeuh zel hi. Tua ka thuzakte ziak in kihangsan sak in ka itna thute Luni kiang ah ka hon gen khe khong hi. Ka lam-et mah bang in aman leng sawtpek apan a hon na it ta ahihdan hon hilh a, huchi'n sihna lou ngal in hon khenkei hen chi'n simthu ka hon chiamta uhi. Tuani apan in skul kaite ka kitha lawp sem a, nuam ka sa thei mahmah uhi. Half Yearly exam hong hun in buaina bangmah omlou in ka zou thei ua, skul khawl sung in ka nu panpih in kiloh khawng in ka kuan zel hi. Nitak chiang in Luni vahel ut mahleng khosakna kikhailua leh naupang kisa simlai ka hihman in ka vapawt ngam ngeikei hi. Nitaklam khat innkong ah kisilsiang zou a ka na tut maimai leh gintaklouh pi in Luni a hong pawt a, thu tuamtuam gen in nuam ka sa mahmah uhi. Bangtan hiam nung in ka kiang ah, Ulian, bangziak a na hong pawt ngeilouh ? Chi'n ahon dong hi. Ken leng, Luni hong pawt a nang toh kithuah ka ut petmah, himahleh enve, ka khosakna un chinlou lua ahi. Denchiah na nu-le-pate' ngaihdan lou bang ana hikha leh bang chi'n amel uh leh nangmah ka hon mungam nawn dia ? Chi'n ka dawng hi. Aman bel, huaikhawng khemkhem, houlua. Tunitak chiang a na hong pawt teitei ding ahi aw. Ken hon ngailua ka hi. Ka na paiphot ding. Hon na ngakngak ding ka hi. Ann neklim aw. Chi'n ahon gen a, ken leng awle, ann nek lim chi'n ka hong kikhen phot ta uhi.
Annek zoh in ka nu kiang ah pawt ding ka hihdan ka hilh a, huchi'n zum kawm simpi in leh kisuanglah tak in Lunite' inn ah ka valengla tei ta hi. Innkong ah hon na ngak a, ahon muhtak in nuihmai kawmtak in hon na dawn a, innsung ah lut in a nu-le-pa kiang ah hiai ka lawmpa ka gengen sek Lianpu ahi chi'n mailahna ahon bawl a, hiai ka pa Mangpu leh ka nu Lhingboi ahi uh chi'n anu-le-pate' ahon mailah nawn hi. Ka zum mahmah mai a, om dingdan le ka theikei. Hichibang tel a inn thupi sung ah ka lut akhat veina ahipan hi. Ka kho-ul in hon buak a, gen ding pen leng theilou in ahon houpihnate chauh uh ka dawng thei phet hi. Ka innkuan sungthu te khawng uh hon dong ua, tagah ka hih dante khawng leh kilohtawm a khosa a nekzong ka hihdante khawng uh Luni in apate ana hilh vek ahihman in anu un ahon hehpih dan khawng ahon hilh saisai hi. Anu un hon hehpih sam ahi ding a, zingchiang apat in na nu ka inn uah hong henla, inn nna hong seppih leh ahoih ding a nitha hiam akha a piak zawk hiam ama ut penpen a piak din ahon chi a, ka kipak petmah mai a, ka vahoh louh khak ding bang ka lau thak mahmah hi. Huchi'n thu vantang tuamtuam houlim in zan sawt ding a kisata ahihman in pai ding in ka hong kithawi khia a, Luni in gate tan hong kha in ka muk ah hon tawp cheuh kawm in, uLian na hong pawt a ka kipaklua, kon ngailua hong pawt zelzel in aw ahon chi a, ken leng awle ka man liai nak leh hong pawt zel ka sawm ding. Na hon khotuah ua ka kipaklua. Ken le kon ngailua chi'n ka tawp thuk tei a, huchi'n Mangpha kikhak in lungsim zangkhai tak in innlam ka hon zuanta hi. Inn ka tun in ka nu'n hon na ngak a, ka pawtna thute hon dong hi. Ken leng thil omdan teng ka hilh tak in ka nu kipaklua in abiang vuai nipnep ah kipahna mittui hong luang suk hi. Toupa aw kou tagah leh meithaite hon khotuah hinatel chia maw. Lungdamlua ung chi'n Pathian kiang ah kipahthu gen in thumna ka nei ua, huchi'n ihmut nuamtak in tuazan ka hong ihmu hithit uhi.
Azing in ka nu leng Pamangte' inn ah vapai in huchi'n khateng a Rs. 5000 piak ding a kihoulem in a nna uh a vasepsakta hi. Huchi'n khosakna neuchik hong nuam deuh panta hi.
Hunte hong pai zel in Luni toh ka ki itna un pichin lam manoh deuhdeuh a, ka ki itna uh lian semsem hi. Himahleh kuamah theih ding deihlou in milak ah lawmta bang in ka kithuah zel ua, kuaman ahon muangmoh sekei uhi. Luni ahihleh gentaksa mahbang in melhoihtak leh kamsiamtak ahihman in amah ngaitu tamthei mahmah hi. Mihausa tamtak te'n a tapate' uh a ding in deih ua, tuaziak in ka kal un mial lam manoh deuhdeuh bang hi. Himahleh, aman hon khamuanzel in kei a ding kia a hing ding leh keilou dang kuamah pasala neilou ding ahihdan ahon genzel a, tua thute'n kei ah khamuanna hon pia in ani-ni in Luni ka muanna leh ka itna lian deuhdeuh hi.
Kei leng ka man hun in Lunite' inn ah ka valengla sek hi. Kisuanlah huai mahleh anu bang ana siam zel sam ahihman in noptuam ka sa mahmah hi. Hunte hong pai zel in skul ka hong lutpan nawnta ua, buaina bangmah omlou hial in kumtawp exam te ka hon zou thei nawnta uhi. Huchi'n ka hun-awl neihsun teng Luni toh kithuahna in ka zang a kuamah hinlam natawm phawklou in nuam ka sa mahmah uhi.
Laisiangthou in "Lang lou ding a selguk bangmah a omkei" achih bang in Luni toh ka kingaihna thu un ka veng teng uh huih nung bang mai in ahon zelsuakta hi. A khen in ahon kipahpih mahmah ua, himahleh akhen in bel ahon hazat man uh adiam ah Luni bang kei ahon ngaih ziak in hai asa thei mahmah uhi. Kou gel thu pen ka veng sung ua nupi-papi te hot topic ahi gige tamai hi.
Nikhat ka nu'n dawr ah van lei ding in ahon sawl hi. Ka van lei ding teng leizou in, kik ding a ka kisak laitak in tangval 5 in ka ma ahon na dal uhi. Buaina bawl utlou ka hihman in pelh ka sawm a, himahleh, khat in ka awm ah hon man in, "Luni ana mangngilh ta in, nang bang a mi tagah leh zawngte a ding vual ahikei. Ka ma dal ding a na kisak aleh na si toh leivui polh khawm ding ka hi. Na hinna na it leh kintak in Luni ana tawpsanta in" ahon chi hi. Tuabang thute ka zaktak in ka lungtang teipi asut bang mai in ana a, dawn kik ut mahleng ka dinmun thei ka hihman in dawnglou a pelh mai ka sawm zawta hi.
Amaute paisan ding a kal ka hon suan pat leh khat in hon na kal a, kiginglou ka hihman in leilak ah ka puk suk hi. Ka van leiteng a tunna apan in a bawkhe vek hi. Tagah himah leng hiaibang simmohna ka tung ah ahong tuntak in kideek zou nawnlou in kei leng ka pang a, huchi'n ka hong kisualta uhi. Amau mi 5 himahle uh, kei nitenga nasem gige thakhauh takmai ahon nang tuankei ua, ka kibeithei mahmah uhi. A tawp in pangzou nawnlou in, "Ana kiging in aw" chi'n ahon taisan uhi. Kei leng ahon sukkhakna uh ka mit tung keh a sisan pawt niainuai toh innlam ka zuan hi. Ka nu'n ahon muhtak in lauthawng mahmah mai a, thu omdan ahon dong hi. Ken leng thu omdan kimtak in ka hilh a, ka nu'n, "Aw genthei hinkhua zaw haksa hina e maw. Lianpu pa' aw hong tualkum in, amizalai ah nathai leh navon sanggah lua ung e." chi'n ahong kapkhe hithit hi. Ka hehnep theih bangbang a hehnem in akah ahong tawp a, ka liamna mate' ahon silsiang sak hi.
Ka liamna ma silsiang a ka om laitak un, kong khak ahong kikiu a, ka nu'n a vahon aleh denlam a ka kisualpihte' leh police bangzah hiam innkong ah ana ding ua, hong lut in Lianpu himahteh maw? Chi'n athu genna ding hun bangmah omlou in hon hentom ua, hon paikhiakpih uhi. Ka nu'n kap kawm in hon ngetsak mahleh bangmah a ngailou in gari ah ahon guang ua, ahon taikhiak pihta uhi. Ka nung et leh khase tak a ka nu kap kawm a kou hon delh ka mu a, pawna lua in khawphawk lou in ka pukta hi.
Tui a ka mai hong kitheh in ahon halhsak guih a, ka dak khiak leh room mialsim neknuk sung ah khut tegel zak kawm a hensa in ka na om hi. Ka kiang a police uniform silhte kiang ah kei moh ahihlouh dan leh amau athu omloupi a ahon khoihziak uh ahihdan gen mahleng, "Nang maimai in maw hiai mite na chou ? Kua ahi ua chih nathei hia? Lamka khopi sung a dia mi zahtak huai penpen, heutu makaite' tate ahihlam uh theilou na hi hiam? Nang bang kisa e?" chi'n sat theih sat moh, zep theih zep moh in ahon vaw zialzial uhi. Naa ka sa mahmah mai a, ahon vuaknate uh sang in ka dikna thu gen theilou a, ka mohna loupi a gawt a ka ompen ka pawna zaw a, naa ka sa zaw hi. Bangtan hiam ahon gawt nung un aksi belh khat ahong lut a, hunta e, paisakta un. Tuban pilta mahmah in teh. Chi'n nui nulhnulh kawm in ahong gen a, huchi'n ahon hennate uh phel in ahon kaikheta uhi. OC pa' room ah ahon pilut ua, huai ah ka nu'n kap kawm in hon na ngak hi. Ka nu ka muh tak in ka khasiat tha hong suak in ka hehtha ahong suak a, dai kilkal a mi himahleng dikloutak a ahon bawl uh phuba lak utna in ka dim hi.
OC pa'n laipek khat leh pen ahon pia a, tua ah ka min gelh ding in ahon sawl hi. Tualai ah keipen mohtansak a om ka hihdan leh tuban buaina bawl nawnlou dia chiamna nei ka hihdan a kigelh hi. OC kiang ah, Sir, keimoh hilou ahi chi'n ka dikna thu gensawm mahleng sum in a lungsim leh a kamsung teng leikhin ahihtak man in bangmah a phatuam kei. Utlou sasa in ka suai ka kaih a ngai maimah hi. Inn ka tun un ka liamna maate ka nu'n tuilum in ahon silsiangsak a, ka nih un gentheihna ei a ding mah hinteh maw chi'n khasetak in ka om uhi. Huchih laitak in mikhat hong in laidal khat a hong pia a, ka et uhleh V/A te' apan ana hi a, vengsung a omthei nawnlou ding a nohkhiakna lai ana hi maimah hi.
A haksa ngeimai. Tagah-meithaite' ading a gensaktu ding omlou ahi diam? Nohkhiak in ka om ua, himahleh ka theih siamlouh pen zaw kisuan khiakna ding a dang a om ma hon ngak lai ding uh ka sak leh, tu mahmah in chih ahihman in khasiatna in ka dim uhi. Khristian gam kichi a Pathian thei namte i kichih lai in tagah-methaite hehpih manlou leh khotuah manlou zen in Pathian thu i awi kha ua poi ka sa mahmah hi. Ahon nohkhiak uh zaw ka thuaksiam, hilele ka omna ding uh ka muhma bek uh hon ngak ding uh ka sak leh bui tawholh a kiholh mai zaw koi ah ka paita ding ua, tuni, tu dakkal in koi ah bukna ding inn ka mu man mahmah ding ua ?
Bangteng gen in phun mahleng ka thugen za a hon panpih ding kuamah a omkei. Kei lah ahon gawtna uh gimtak leh tang peihlou ka hizawk mah toh thangpaihna in ka kidim hi. Huchi'n ka nu'n awl in ka vante' uh ahon siam a, tamlou ahihman in ahon zoupah hi. Tamlou chimahle hangle mikhat puak ding in tam lodeuh ahihman in peihlou sasa in ken leng ka puakpih hi. Pawt khe ding a ka kisaklaitak un V/A Chairman leh Secretaryte mibangzah hiam tonpih in a hong pai ua, bangziak a ka thupiak uh zuilou a tutan pha omlai na hi ua ? Chi'n a hong sawn pawt thoh uhi. Ka nu hahsawn kha deuh uh ahi ding a, atha hat nawnlouh toh kongtual ah a vanpuak teng toh apuuksuk hi. Ka nu puuk suk ka muh tak in ka delh pheisawm a, himahleh, ka liamnate anat luatziak in ka tang hoih theikei. Huchih laitak in, ka nung apan in kinoh ve ua, hon chitoh ka taw ah khat in khetphei ahon thuah zomah hi. Aw Toupa bangziak a na nungzui kichite lak ah hon panpihtu ding hon sawllou tel na hiam? Chi'n zum-le-zah khuallou in ka kap khe zuazua tamai hi. Hon hehpihtu ding muh naksang in ahon mukha peuhmah in huatna leh simmohna mit in ahon en uhi.
Pai ding a ka hong kisak nawntak un mitampi in ahon umkual manta uhi. Kou nuta simmoh in ahong kou zialzial ua, ka veng uh khatvei mah leng hong siknawn kei un chi'n mangpha ahon khakta uhi. Huchih laitak in. Luni' leh anu a hong pai ua, ka en ngam mahmah kei. Ka itpen ang ah tua ka dinmun a ding ding in ka kingaihtuah kha ngeikei hi. Luni bel amit a khitui luang kawm in ka kiang lam ahon zuan a, Ulian aw, miteng in dikloutak in hon ngoh mahle uh, ken zaw na dikna ka thei. Ka hon hehpihlua. Nang ding a kipden ding ka hi. Khase hetken aw... Chi'n zum zou nawnlou in ka ngawng a hon kawi in ahong kah khum hi. Luni omdan anu'n amuhtak in kintak in hang kawm zuauzuau in Luni tuh ka ang apan ahong kai khia a, ka nu lam enkawm in, "ka hon na muanmuan maizen toh, hiai bang lel maw na hih uh. Ka inn uah hong kuan nawn ken la, na sepman ka hon piak tengle na hon ditkik ding ahi." chi'n ahong genta mai hi. Ka nu'n leng awl in, "nu Lhingboi aw, noute ziak a tutan ngawllou a ka om man un natung uah ka kipak mahmah hi. Hon din ut mahleng tu tadih in zaw ka hon dinzou kei ding. Ahihhang in dit kik ka hon sawm ding aw." chi'n ka paisanta uhi. Ka nung ah Luni khasia a kapging ka bilsung ah alut mahmah a, hihtheih dang lah neilou ka hihman in bangmah gense lou in ka paisan zaw maita hi.
Innlum nusia in koilam manoh ding hiam chih theilou in ka nuta un kuamah pau omlou in ka pai tiktik ua, ka lungsim tuak uh bel a vaksau mahmah mai hi. Koimun ah kinga a, koimun manoh ding chih theilou in ka khepi un a kawkna lamlam zuan in ka pai mai uhi. Khuamial ding a kisapah ahihman in ka lungkham mahmah mai a, van hong ging in kawlte' ahong phe zualzual hi. Khua bangzah hiam pelkhin in huaite ah lah khawl ngamlou ka hihman un ka pai zel ua, khua hong mialding a kisa in ka lauhthawng mah bang in vuahmal te'n ahon dengkha panta hi. Bukna ding mun a omkei, vuahmalte hong tam deuhdeuh in atawp in ahon buak khum thoh zoihzoih maimah ta hi. Maban sawn thei nawnlou ka hihman un leh khua toh lah kigamla mahmah ta ka hihman un singlim khat bel in koute vuah apan hon vengtu ding om tuanlou in ka kikawi mai uhi.
Tua nitak a haksa ka thuakte uh gen ngamhuai lou tamtak a om tunung a ka ngaihtuah thak chiang in ka chimul athou theilai hi. Vuah lah theuta ning chilou in a zu tam deuhdeuh mai a, pum kawt gai ka hihman un ka liamna ma te lah nat petmah in ahong naa a, votlua ahihman in ka bilngek khawng nat petmah in ahong nat beh nawn hi. Aw hichitel a hinkhua haksa thuak dinga bangziak a ka nuta ua damsak lai a om ka hi ua? Pa aw hiaibang thuak ding a zaw hon phal hetlou ding zaw hi vechin maw... Pa aw hong pai inla na thai leh navon na omna mun ah hong pi mai ve maw.
Ka sak lak uh ahong ging suatsuat a, avot toh a mial toh lau in ka ling zungzung uhi. Tua nitak ihmu lou hial in ka zanhak pikpek uhi. Khovak kuan in vuah ahong theu a, khua ahong vak siang tak in ka sak zek uah sakei khat ana ihmu huthut ka mu uhi. Laulua in tat leng tang ngamlou in ka nu toh kikawi in ka en mai uhi. Sakei leng awl a hong khanglou in ahong kize nguahnguah a, kou omlam theilou bangtak in awl in apaikheta hi. Ka nu'n Pathian in ei veng ding a hon sawl hiding eive chi'n kipahthu genna thumna hon nei a, huchin kawt nemnomsa leh nin biatbuat in ka hong kipan khe nawnta uhi. Khua ka tuah khakna te uah ann nekna ding ka zong ua, himahleh mite'n ahai honsa ahi ding ua, nek ding hon piak sawmlou in et in ahon et thoh maimah uhi. Kou leng nuamsalou in ka pai zel ua, aban a khua khat ah hausapa' inn kankhia in zum-le-zah khuallou in tentheihna ding phalna ka ngen uhi. Hausapa'n leng khawtaw lam a, munkhat lui lianpi (khuga dam tui kiching) kiang ahon kawkmuh a, tua ah aidakbuk lam in khosak ka hon panta uhi. Kei leng ka sinna maban zom ding chi'n skul ka vakai panta a, himahleh ka vakai masak ni in skul tungphet Principal in a room ah hon samlut in nohkhiaka om ka hihdan leh skul ka ithei nawnlou ding ka hihdan ahon genkhum a, tualeng class lase lou a pai ngal ding in ahon ngen hi. Ka lungphawng mahmah mai a, ahehpihna ngen in kapkawm in thu diklou ziak a hiai bang teng thuak ka hihdan gen in hehpihtaka hon kaisak hamham ding in khitui luang kawm in ka ngen hi. Himahleh, aman khauhtak in askul pen misual leh thulimloute kaina ding hilou chi'n ahon nohkheta hi. Khasetak mai in ka paikhia a, ka lawm-ka vual te'n honna en heuhou uhi. Gate apan pawt khia in ka skul ka gal-et a, kai ut lopetmah in munkhat ah tu in ka mittui ka guk nulnul hi. Huchih laitak in nidang a ka lawmte khat in hon na mu a, ka kiang ah hong pai in ka omdan ahong dong hi. Ken leng kimtak in ka dinmun ka hilh a, aman atheihtak in hou e, khovel ah kuamah kisimmoh sak ding hilou, zaleen ika hia. Hong in na lungkhamna sukbeina ding kon hilh ding chi'n ahon kai a, huchi'n munkhat ah inkal neuchik omte ah lut in atawp ka tung ua, tua ah inn khat ana oma, asung ah numei leh pasal bangzah hiam ana om uhi. Amaute nuamsa a kikhuat toh, laa sa a laam toh ana chiak vengvung uhi.
Ka lawmpa'n hiah honna ngak in chi'n room khat ah ahon lut san hi. Sawtlou kal in ahong pawtkhe nawna, akhut ah mikapna phim neuchik khat ahon tawi a, doh awle chi'n kap ahon sawm hi. Ken leng lamdangsa in bangziak a kap hon sawm na hi hiam? Chi'n ka dong hi. Aman bel hiai ahi lungkhamna damdawi, kikap lechin na lungkhamna tengteng bei ding a, nopsakna khovel ah leeng ding na hi chi'n ahon dawng hi. Ken leng bang ahia chih theikei mah leng lungkhamna damdawi ahihleh chi'n ka khut ka dohta hi. Ka sigui ah hon sun in ahon kaplut ta a, a damdawi ahong lut tak in ka hi miaimuai a, ka chiteng hong zaang in nopsakna tak khat ka hon neita hi. Ka etna lampeuh ka nuih aza a, ka nak bang hong thak sisi in nuam ka hon sa sim mahmah ta hi. Himahleh, ka theihlouh kal in ka na ihmu man a, ka khanloh tak in ni ana niam mahmah ta hi. Ka ngaihtuah thak leh mite gen minthang Heroin No. 4 kikap ka na himahmah hi. Kei leng kintak a thou in pai ka sawm a, ka lawmpa'n khawlphot in khatvei kap lai ni chimah leh ka nu kia ka lungsim ah om ahihman in kintak in innlam zuan in ka paitouta hi. Inn ka tun in khua mialta hi. Ka nu'n kongkhak ah ding in hon na en-en a, ahon muhtak in bawi bangchi maw na hong tunghak lua a lunghimoh lua ka hi ahon chi hi. Ka thilhih kizephawk mah leng genlou in lawmte toh kimuh louhna sawt lua a lawmte inn ah ka hong bang kha ahi nu. Chi'n zuau gen panta chu ka himaita ve. Nitak ka luptak in ka kingaihtuah sau mahmah mai a, ka thilhih hoihlou ahi chih thei mah leng, khatvei chiama agu ka sisan ah lutta ahihman in lunggulhna in ahon manpanta hi. A zing in hih nawnlou ding chimah leng hon kai om mah bang in ka vatung nawn a, anihvei na kap nawn ka himai mahta. Huchi'n awl in theihlouh kal in No. 4 addick ka hong suak maimah ta hi.
TUUN AW MANGPHA
"Gamlapi ah khualzin in genthei, haksatna namkim ka tuah chiang in belh ding neilou ka lungzuan chiang in, ka nu awnem ka bil kha'n za za ing e..."
Ka thilchin hoihlou ahi chih theimah leng ka lungkham hehnemtu ahihman in ka lut thuk deuhdeuh tamai hi. Nikhat lampi ah ka pai leh ka nunglam apan in "Ulian" chi a hon sam aw ka za a, kihei a ka et leh ka itpen Luni ana himai mah hi. Kipah lah dah kawm in ka en a, aman hon zuan in a inn uah ahon paipih hi. A inn uh ka tun un nek ding tamtak ka ma ah ahon luikhia a, ne ding in ahon sawl hi. Kisuanglah ka hihman in duhlou chi'n ka nial a, tuatak in Luni in khasetak in,"Ulian ken nang deihsaktak a hon pia ing a, nang hon nial mai ding maw? Ulian ken nang hon ngailua, niteng hunteng a nang mu ut a ana dakdak mai keive." chi'n amittui ahong taak khe mawk hi. Kei leng kisuanglah lua in, "Luni aw hon ngaidam in hiai bang kaphu louh deihsakna ka tan ka kisuanglah lokha a ahi aw, tampi ka hon ne ding aw." chi'n ne ding in ka hong kisa ta hi. Kamkhat baak pan chih ding in Luni nu' bazaar hoh ahong tung geih a, kei leh ka ma' a nek ding kilui omte amuhtak in heh kisa in amai ahong san tuaituai zozen hi. "Nang tagah in bangziak a ka inn uah nek ding zong a hong na hia ? Ka tanu toh nang kiteng ngeilou ding. Amah Muangpu(ka kisualpih pa) toh kiteng ding a kikhaamsa ahita uh. Khovel sagih vei kilumlet leh leng nang ka makpa ding in ka hon deih kei ding. Zumlou maw? Tu mahmah in paikhia in." chi'n pawt ding in ahon sawl hi. Ka zakta mahmah mai a, ka mit in bangmah amuthei nawnkei. Kintak a ding in ka taikhia hi. Ka mit khitui a pumdim in ka lungtang in naa asa mahmah mai hi. Ka lawmte kiang ah pai in tuani in dose sang deuh kha ahi ding a, ka OD tamai hi.
Lawmte'n keptheih kep mawh in ahon kem ua, amau hahpanna leh khotuahnate' ziak in ka hong halh khe nawn hi. Inn ka tun in zan dak 10 a gingta. Ka nu'n ka omdan teng thei ahihman in khasetakmai in ka kiang ah hongtu in ahon kah khum hi. Etna ding ka theikei. Ka nu'n hon tai naksang in nemtak in ahon thuhilh a, ka thilchi'n hoihloute nusia a, Pathian lam ah kik ding in ahon ngen ngutngut hi. Ken leng ka nu aw nemte' ka zak chiang in ka kisik mahmah mai a, kibawl hoih ding in thupukna ka bawlta hi. Hun bangtan hiam bel ka ngawl theisam hi. Haksa mahleh ka kideek teitei a, ka nu teektak leh hatlou takmai lungsim natna ding bangmah bawl ngamlou in ka thuak teitei hi. Aw ahaksa ngei mai, Damdawi duh hun in a honpha bangzaw om dingdan a kithei kei, kho-ul in hon pumtuam a, guh kipehtuahnate hong zau in a ki-om maimai theikei hi. A haksatdan genvual hilou, a thuak khaloute adin zaw genthoh a ahaksatdan theihsiamsak vual ahikei. Guh kawm hong zau bangzaw aw khuat theih lah hilou, a tawp in kideek zoulou in khamtheih mah ah ka puuk suk kha nawn hi.
Nikhat ka lawmpa toh guk ding zong a ka vak vialvial uleh biakinn khat ah kiteenna programme zang ana om a, mipi atam mahmah mai hi. Banner kitak ka et leh "Muangpu weds Luni" chih ana kitaak dengdong maimah hi. Ka lungtang tem a dawt mah bang in ahong naa a, ka khete'n ka pumpi pawzoulou in a zoigai vek hi. Ka lawmpa'n ahon muhtak in lamdang asa mahmah mai a, ken leng thil omdan gen in kintak in ka paikhepah uhi. Ka lungtang nalua ahihman in Pathian natawm ka gingta zou nawnkei. Pathian aw , om na hìhleh bangziak a kei tan hichitel a haksabiik ahia ? Chi'n ka kap huphup hi. Huchi'n Pathian om ding a gingta nawnlou in niteng hunteng in siat lam ka manoh hiaihiai ta hi.
Ka nu'n bawi pawtpawt ken la hon ompih ve aw, tuni beek chi'n hon ngen ngutngut sek mahleh ka duhna in hon kai tuntun sek ahihman in ka nu hehpih huaitak leh hatnawn lou natawm ompih manlou in ka thilchin man ding zong in ka vak duaiduai sek hi. Ka pat tung lai in bel deihsaktu ka ngah a, athawn in ka mu gige hi. Himahleh ahong sawt hiaihiai tak in kuamah in hon khilai gige zoulou uh ahihman in ka khamtheih man ding guk ding zong in asun-azan in inn ah om man nawnlou in ka diang diang tamai hi. Belh ding neilou in inn apan gamla tak ah khualzin gammang bang mai in mi dai kilkal peuh, hanmual peuh ah ka giah hun atam mahmah mai hi. Tua hun chiang in ka innlum leh ka nu ang ka ngai ngoihngoih mai a, himahleh ka thilchi'n hoihlou ten ka nu toh kaal ahon gamla sak semsem hi. Tua hun chiang in ka bilkha ah ka nu'n "Lianpu aw hon ngailua ing. Hong chiahta maive maw bawi." hon chi in ka thei sek a, himahleh, ka nu mel ka mu ngam nawnkei. Lungnopna ding a khamtheih hihpa'n lungnopna muh naksang in lungkhamna thuahnih ka muh behlap zawsop hi.
A zing in kintak in innlam ka zuan a, inn ka tun kuan in ka nu muh ding lit petmah in ka lin mawk hi. Hon tai in hon sal ding chihna hilou in ka omdan hoihlou ka etchiang in ka nu khasesak lua leh genthei saklua ka hihman in ka nu mel ka mu ngamkei hi. Himahleh ahon itna leh a awnem takte'n hon zoulua ahihman in ka paizel a, kong khak ka hon tan in leng kei hon dawntu ding ka nu mel ka mu kei. Ka lut a ka dakphei leh table ah kingai kawm a ka nu ihmu ka mu hi. Awl a akiang naih in nu aw hon ngaidam in chi'n aliang ah len in ka sawi hi. Himahleh dawnna bangmah ka za kei. Ka nu tanglou in a om ngei in a om hi. A khut ka khoih leh khauh gawp in avot dekduk a, ka nu'n tangtawn pialgal hon kaisanta ahi chih ka thei ngal mai. Na salua in ka kap ek-ek a, lah aphatuam ding bangmah a om nawnkei. Nu aw hong thou ve maw. Kei na tapa a sehtak hilou khatvei bek hon en inla, bawi chi'n hon samlai ve maw. Nu aw HICHI DI ANA SALENG ZAW... ka hinkhua nang toh zangkhawm zaw ding hi inga. Ka hon taisan kha a hon ngaidam in aw nu aw... Tuun aw mangpha. Chi'n ka kap khe zoihzoih tamai hi.
Ka thawm zapha chiang teng in hong delh khawm siausiau ua, huchi'n ka nu tuh han ah vui khiak in a omta hi. Kisikna in ka pumdim a, lah aphatuam nawnkei. Kibawl hoih naksang in Pathian ka ginlelhna alian deuhdeuh zawmah hi. Gentheihna thuak ding a ka nu-le-pa leh ka it Luni hon laksak chi'n Pathian tung ah ka vui zawsop hi. Huchi'n ama sang a sezaw in hinkhua ka hon zang a, ka lawm-le-vual te'n leng hon taisan gai uhi. Mite huat leh mullit ka hi a, ka paina lampeuh ah leh ka hih lampeuh ah mite muanmoh leh nelhsiah in ka om hi. Lawm ngai in vul mah leng kuamah ka lungkham hon thuakpih a hon panpih ding a omkei, saptuam leh khotang ading in melma ka suakta hi. Mi inn ah ka hoh khak sunsun in leng guk ding zong a hoh mah bang in hon veng den uhi. Ka leitung hinkhua nopsakna sang in lungkhamna ah alut thuk deuhdeuh a, nuamsak ut a nopsakna damdawi kikap pa pen lungkhamna damdawi leh mite kih leh mudahna damdawi kikap ka na hiphiangsan hi. Kibawl hoih ka ut a, lah hon panpihtu ding omlou in agal na tawm in leng kuamah in ahon en ut nawn kei uhi. Aw ka neulai in genthei mahleng innsung kim a lenlainite ngai hi nang e.. Sap kik theih hileh zaw maw ! Tuun aw na awnem khatvei bek hon zasak laive maw. HICHI DING ANA SALENG ZAW nathu manphate zui mah ding zaw hiveng maw.Nu aw hon ngai hi nang e.
MIALNA PAN VAAKNA AH :
"Zingsang in thu hong ngetsak a, nitak in zong hong ngetsak ka nu in. Tun van inn nuam ah om in kei a din thu hong ngetsak lai aw ka Tuunnu."
Hunte hong paizel in ka thil hihte mah hih in hunte ka hon zangtou zel a, inn ah ka om khak sunsun chiang in ka nu ngai in thawmhau lua in ka kapkap kha zel hi. Kuaman bang na chi a? Na hoih zel na hia? Hon chi ding a omkei. Huchi'n inn ah om ut nawnlou in kholak ah hunte ka zang a, guk theihte gu in khamtheih mah tuh ann a nei in ka hinkhua ka hon zang pan nawnta hi. Mat leh vuak ka thuak mun mahmah a, himahleh itna toh vuak-le-sat a omlou a, iplahna leh huatna ziak a vuak-le-sat a om ka hihman in ka lungtang akhauh deuh deuh zaw hi. Mite' pampaih leh ittu ding omlou a kikoih in niteng in khelhna lam ah ka lut thuk deuhdeuh hi.
Khovel ah hon ittu ding kuamah omlou ahihman in lungkhamna leh hehna toh hinkhua ka zang a, ka hinkhua ka ning mahmah hi. Koimah ah kitazou nawnlou leh vaal a kikoih ka hihman in tampi vei kithah ka sawm a, himahleh lamdangtak in ka lohching ngeikei hi.
Nipini sun khat Lamka kholai ah khamtheih duh gawp leh alei na ding muzoulou a lunggimtak a ka vak lai in biakinn khat apan "JESU AH LAWMHOIH INEIH DAN" chih la kisa ka za a, lamdangtak in tua la kisa in ka lungsim ahon khoih mahmah mai hi. Ka tup louh pi in tua biakinn lam manoh a ana paipai ka na hi a, ka theihtak in biakinn sung tungkhin ka na himaimah hi. Tua alasak un hon ittu omlou ka saklai a kei hon na ittu Jesu Khrist om ahihdan ka musuah a, mittui toh kidim in munkhat ah ka dingden hi. Mipi anunglam a tute'n honna en heuhou ua, himahleh zakta zou nawnlou in ka hinkhua a hong lut ding a Jesu Khrist sam in ka kikou kheta hi. Lasak zoh in munkhat ah ahon tusak ua, Pastor in thugen hon pan in khelhna thu leh Jesu'n i khelhnate ngaihdam na dia khros ah hong si ahihdan ahon gen hi. Amah muang a akiang zuante hotdam a om ding ahihdan ahon gen in ka khelhnate kisik lua in Jesu khebul ah ka kilui kheta hi...........
Huchi'n ka thilhoihlou hihte tawpsan a hinkhothak a hing ding in ka hong kilaan khe theita hi. Ka taisansa ka inn uh zuan in ka kiik nawn hi. Inn ka tun in a sung ka envel a, ka dak nalam peuh lungzuanna in adim hi. Ka nu damlai a amah toh kipaktak a ka omkhawmna uh, ka kithuah khawmna inn uh tun adai zikzik ta mai hi. Ka innsung teng ka enkual a, ka nu Laisiangthou kil khat ah ton nilnel in ana om hi. Lakhia a ka phen aleh alai ah lai gelh khat hoihtak a kikhepsa a om ka mu hi. Phel khia a ka sim leh hiai thute ana ki gelh hi.
Ka ta it bawi aw, koi ah hon paisan na hi a? Kei na nu hon it nawnlou na hi hiam? Bawi ken zaw hon itlua ka hi. Hong kik nawn mai ve maw bawi. Ka kinepna pen ka ta it aw. Na khelhna te kisika lamdik a na hong kik nawn na ding in ka na thum gige hi. Na hong kik nawn ngei ding. Himahleh, na mel mu ding in hiai leitung ah damlai ding in thahatna ka nei nawn kei. Bawi ahihhang in khase ken. Na tuunnu'n nang a ding a hon ngetsak gige ahi aw.
Ka mit apan khitui hong luang khia in ka nu hon itna ka phawk suah deuhdeuh a, ka taisan khak kisik lua in ka kap khe ek-ek hi. Himahleh thil teng a kikhel vekta. Sapkik theih ahi nawnkei. Kei a ding a akipumpiakna tengteng din ut mahleng hiai leitung ah zaw ka hihtheih bangmah a om nawnkei. Amah deihdan a ka hinkhua om laiteng ka zat touh louh ngal.
Nu aw na ta mihai leh gilou ka hi. Na hehpihna niampen in hon ngaidam in aw. Nu aw na thumna dawn in a omta, siamthak ka hita. Himahleh nu aw, nang tellou a hinkhua zat ahaksa ngei mai. Nu aw, kon taisan a, kei tellou a hinkhua haksatak a zang nahihdan tu'n ka theita. Nu aw hon ngaidam in aw. Tun van ah om mah lechin kei na tapa adin thu hon ngetsak lai in aw nu aw.HICHI DI ANA SALENG ZAW HON TAISAN LOU DING HI'NG A... NU AW HON NGAIDAM IN AW...
Hinkho thak toh khosak ka hon pan tou panta hi. Aw ahaksa ngei mai. Ka thilchin luite'n hon taisan mai ding ka sak leh tawpsan ka tup nak semsem leh ka duhna a lian deuhdeuh hi. Himahleh, Laisiangthou te sim in thumna toh ka melma ka doutou zel a, hon tantu'n zohna ahon pezel hi.
Hiai ka tangthu mawltak mai sim kha tengteng aw, hehpihtak in na Tuunnu' awnem ngaikhia inla, hehpihtak in khase sak ken aw. Kei tuahbang tuak ding in kuamah ka hon deihsak kei. Kei bang a thilchiin hoihlou a bual kha na hih leh kintak a tawpsan ding in ka hon ngen hi. Na Tuun awnem ngaikhia inla, ahon saplai in athu zui in. Hileh khovel nang a ding in paradise ahi ding hi. Na tuu'n awnem na ngaihkhiak kei leh nang din tangtawn kisiikna na maban ahi ding hi.
"Ka ta aw inn ah hong chiah ta in hon chi. Ngilh ngeikei ning e ka tuun awkhum. Ka bilsung ah ka tuu'n awnem in hong samsam lai, ka mangngilh zoh louh hong it ka tuunu'n."
~. Beita .~
©Siamsinna leh Vakiangbu
Comments
Post a Comment