TONGCHIAM

By ~ Lal Khuptong Lalk 
(Suggested by some one special)

Ricky, Ricky chia ka ui ka sap leh hon ngeingaih hetkei a athil nak ek-ek pen khawllou in "bowbow" chiden hi. Kenle ka torch-light la in bang hipeuh mah hiam chia Ricky in anak na mun ending leh vakaikhe ding in ka hong kuan hi. A kiang ka vanaih dedeuh a Ricky in hon sam hi awmtak in hon enphei zel a huai athil bow pen en in ham nawn zel hi. Athil nak na pen mun kalkhat mai suan a muhtheih di hitamahleh ka kalsuan haksa sa mahmah a, atawp in zaw keile ki pasal sak in ka vapaiphei leh gul ana hiphet maimah a, kintak a ka gei a suang lazok in ka deng leh ka deng khakei a tum mang vengveng maimah hi. Zingkhua hong vaak in muisuum kai zil-zial in zing daitui te'n lampi teng su-nom (kawtsak) tiptep hi. December kha ahihman in innlam ngaihna apuang a innlam kia lunggel in ka nei den hi. Suti lah hon pe utlou uh, ngamkhat thu a buai thut theih ahihman in kuamah le paisak hon phal kei uhi. Christmas ma ni, Dec. 24 in ka lumbaih mahmah a himahleh ihmu theilou in ka kihei kual den hi. 

Hunlui mualliamsate ka lungsung ah puanbang hon thak kik a, nidang nunnop laitual ka leenlai bang ka hon phawk suah thak thepthup hi. Huchia lunggelte ka neihlai tak in, "Hello darling nice to see you its been a long time......" chi'n ka phone hong ging deldel a ka etleh Deih chibang a ka teel ka iittak Lunching ana hi a ken zong ka phone ka pick-up a,  Yes , Mr Dingboi speaking chi'n ka chiamnuih leh aman le "Uding nang hong pailou di maw ?  Hon chi a kenl e hi, hong pailou phot di ka hi Nau, nunu te a damzel na uh maw? Hi, dammah uh e, asha !!! Uding hon paive melmuhlouh tongsaan ah houlung kupte atak a sepsuah ut huai lawta. Nang tellou a sawlbang hei zaw ahaksa lua , Uding hon paiphot maive... Nau kei le ka ut lawtel , nang toh simthu lel khawm a zatamte englou a nunnuam sawlbang ka hei ut ta ei. Innlam ah bang thuthang khawng a om a nau ? Bang thuthang chihle om ngelkei, zaanlam a ka lawmnu huai migensiat hatpen naupai a, apasal dipen a zong chiang ua lah muzoulou uh, a gintak leh muanmoh teng in kei hilou chivek zawmah uh. Kou bang le ka lawmnu dan a om di bang a Nunu'n lunggel hon nei in chin hon thuhilh ek hi ei. Huai i khua ua mihai nu le min rape lum uh mak petmah, a zoh nikum lam a kam muthak mihoih mahmah chia a gen minthang petmah uh gamdang training a va omna ah vache petmah hi di numei 3 (thum) tak vagai eu-ou. A zoh huai Muana pa saptuam upa kha min ahihna theikhia ua, saptuam upa apan nohkhia uh, khovel kikheng gop ahi Uding na omlouh kal a, laa in ana saksak " Kithah kimat kisuamna selung phawngthei tampite chik leh dai bang theng ding hiam ?  " chih zaila tape ah khah zuazua din a hoih lua maw Uding....Eh! Nau makna e maw,  Muana pa bang ziak a nohkhiak uh e nau ?  Kum bangzah ahita dia, Ka hong pailouh ?  Kon miss lawta ka thau(gun) bang hileteh zaw hon zuut mam pekpak gige di hi'ing a ka ning gop. Gam khuva bang a lengthei hileng ka nuam ngei e, tunglam ah ka kha zak in na siang ah ka leng dia, eigel kikal ah guam thuktak khung dia pan ana late tup phak lou in lengmang a ut huai lua nau, Heina peuh ah tongchiam pel kei ni aw,  Nau  chi'n sawt kihou manlou in network hong bei geih a poi ka sa mahmah hi. Network hoih chikchik amuh din message ka thon hi.

Dak 11 bang hong ging velvol a innlam ah om hileng zaw Lunching toh tu-tak in a inn uah sang kikang ding hia chi'n ka lungleen zaitha a  neemsak deuhdeuh hi. Huchia thil ngaihtuah/hisaap a ka omlai in ka na ihmu daih a, zing ka khanloh in lamdang bang ka sa hial hi. Khovot zing bang thoh ngap huai hetlou napi'n sazai muh ki utlou ahihman in ut lou sasa in ka hong thoukhia a, kihah siang, daileeng leh apoimawh teng hih na din minute 10 lel hun piak a ka om man un kingeinaseh theih mahmah lou ka hih chiang in haa nawtlou in suu nitum a ka om chang in le a tam mahmah sek hi. Huai hun chiang in ka bag ah om centre-fresh ka hai zel a, nop nunulh thou hi in ka thei hi. 

Christmas nipi ni bang ei a dia khawlni himahleh kou sepaih sung a te adin bel duty a khauh ngai ahihman in ka kisa vitvit ua, ka thau uh ka tawi chiat ua, kholai ah ka duty nepnap uhi. Kou omna Christian tamlou ahihziak in kikhawm muh di a vaang mahmah a, i muh sunsun te i et chiang in innlam leh ka iittak Lunching ka ngaihna hong puang thak hi. Llunching ahihleh mi nunnem mahmah leh mi polhnuam ahihziak in ka deih mahmah a, himahleh Ka Leitung Pathian te'n hon deihsak hetkei uhi. Kei adia a seh/hawi tuam hon neisak ua, huai ahihleh Momawi ahi innsung hausa apan leh deihdeih neizou leh duhduh nezou huai banah amah nurse ahihzawk mah toh hon deihsak petmah ua, Lunching bang amudah hial uhi. Ken le huai thei ka hihman innlam pai utna kha bang thaam (si) den a himahleh Lunching ka ngaihluat man in ka paikha sek hi. Lunching bel pa chia minloh di nei nonlou ahihman in ka hehpih petmah a huai hehpih na kha kigawm khomte'n ka iitna hon pungsak semsem in khen thei di vual ka hi non takei hi. Ka nu leh pate'n ka kngaih lam uh thei ahihman un ka khentheih na di lampi zong in vial vakvak ua, himahleh ka kikhen na du lampi ki-ka ompen kou ginom na ziak in kuaman hon koppih thei tuankei uhi. Ka ngaituah chiang in Lunching bang a gawttu apang ka hi maimah dia aw, kei ziak a kamsia leh kei ziak a, a luankhi tui nul di pung beh adia aw ? chi'n ka lungsim ah a kilaam den hi. Lunching in thuthang diklou taktak te azak chiang in tagah ahihzawk mah toh akha sediak sek a ka hehpih thei mahmah hi.

Nidang a ka duty sung uh sawtsa thei mahmah hinapi'n tuni'n tom ka sa diak a, duty zou in ka camp lam uh ka hon manoh tou ua, ken le top-up lei in nitak chiah Lunching ka phone na di chi'n ka siit chenchen hi. Nitak ann kon nezou ua, lawmte tengteng toh mei awi in ka houlim sosouh ua, ka taksa ka camp sung uah om mahleh ka lungsim bel Lunching lam kia lunggel in nei den hi. Keile ka dingkhia a pam deuh a lawmte zakphak louh di ka chihna mun ah Lunching muhlouh tongsaan ah houpih ka tumta hi. Ring nihvei a paisuak a, a pick-up kei, sawtlou nung in ka try non a pick up khongkhong hi. A kisuanglah petmah a amanlouh dan khong hon hilh a ken le ka theisiam pah a ka ngaihdan khong ka gengen leh amah a hon pau non kei bilbel hi. Nidang a zaw Nanau kon ngailua i chih chiang banga kipak thei petmah in a thukna bang ka ngah kin petmah a, tun bel a huchi kei, ken le lamdang sakna kawmpi toh "Nau bangchi e ? hon ngai nonlou na hi hia??? Uding,  i kikhen mai diam?  hon chih guih leh keile kiguih zot in puaksiam haksa ka sa mahmah mai hi. Ken le bangziak e ?  chia tamlou dong ut hinapi in ka aw suak dile a om kei, ka kah uttoh ka heh toh ka pau theikei bilbel hi. Sawtlou paulou a ka omkhit un ken, Bangziak e nanau, midang hon neihsan na hi hia? I Tongchiam sate ngilhta maw ? Hon iittu di midang muta nahi hia? Na itna tangzou nonlou ka hi maimah maw nau poina e !!  I,  Uding huchidan hilou ken le kon ngailua, himahleh hon chih in hon dai vengveng a,  ken le nau,  hon gen hoihve hichimai a i itna khau-gui pen tatsak mai di zaw theihsiam haksa ka salua, kon khenkei di bangteng tuak zong leng nang adin khuambang ka kip den di,  ka chih leh hon koihsan a, maksa petmah in ka phone thak leh swicth off hon kichih khum a mak ka sa deuhdeuh mai hi.

Ka phone hong ging a number theih louh ahihman in ka la utkei a nihvei hon ging non a ken le den a a battery bei a, midang a ah hon call hin teh chi'n ka pick up leh numei aw nalhpi khat in Uding i kitenni di fixed khit ahita hong kichi a,  ka lungbuai laitak a huai a hon call nu chu kua dang hilou in Momawi ana hi maimah a , gen di dang tuan ka theikei paulou in ka om nilouh a a koihlam lam le theilou zawzen in ka phone ka bil ah ka vuah den hi. Khua ka hon phawk in eh ! Lunching ch'in ka phawk suah guih a hiai thu a zak ziak a khen ding simthu hon lel khum ei lim vele maw, poina e maw, ginom na khau atatsak baihna e, ka it Lunching aw vaibang na thaam na mun lunggil apan sul hong heikik dih ve maw, na tangpa selung liap e, luankhi nul in taikhua in hon valsan ding zaw ngaingam kei veng chi a hehnemtu ding bei a ka omlai tak in ka nu'n hon phone guih a, Dingbawi innlamte ka na kihou felta ua, nang suti na neih chikchik koppih neidi na hi maive,  a hon chi a ken le Nu kei hon dong masa selou a thil nana hih pen uh hih khial ka hon sa petmah mai, himahleh ka leitung Pathian na hih ziak un nial theih vual na hikei ua, suti lak ka hon tum dia himahleh kiteenna pen sai pahlou din hon na gensak ve ka pa kiah... Hi e , bawi a kinthei lam in hong paitum in aw le bawi,  chi'n ka phone uh ka koih tuak uhi.

Ka lung a am petmah mai, ka Christmas zat kei din manpha keina e maw, Aw leitung a ka hinsung bek ah kei deihtelna khat bek ah paithei leng ka ut ngei e aw, a mual leh guam in honhal lai in haksa ka na sa a himahleh tun leh zua in hon hal zaw maban di lunggel theih ahih nawn kei haksa kia inle a gim a nam zoukei, nidang a ka pa thu-awi a amah hon genna lampi ah pai hileng zaw kei deihtelna a zi bang le hon neihsak ka gingta, himahleh kikhel ahita kei thadah man a pawl 10 ana pass hamham, sintou lai dia ka pa'n hon deihsak himahleh athu lalou a sepaih ka na panziak in ka maban hinkhua zaw tuiluang bang a ka pate mai ah ka kiniamkhiak a ngai maimah hi. Amau thuthu ka awi mai ngai ahihman in ka itlouh leh ka nellouh leh chikmah a ka houpih ngeilouh Momawi toh hinkhua patna di a ka hiang khiaktan ahita, ka it leh ka ngaih mahmah ka hinkhua adia chibang a ka teel Lunching toh ka itna lui uh khaktan a om ahita mai hi. Hunlui liamsate gelkik in luankhi loungal in hon buak kawt kei hi. Ka sepaih lutma a Lunching te inn ah anu te toh ka kichiamnuih ua Lunching kuamah ana pekei un ka hawisa ahi chia ka vachiamnuih laikhawng ka lungsim ah puanbang hong thak kik a, ka pai a ka nu leh pa te'n hon khak ua agal a flying kiss hon bawl khumlai bang ka mitkha ah mangmoh hial hi. Khitui tamseng lua ka hi diam ah ka lu ana bengbung a, ka ngaihtuahna le pai hoih thei lou in ka theihlouh kal in ihmu ka na hi maimah zel hi.

Taikhua hong vak in tungleng vasa/sava te'n a Siamtu phat in aw ging kilawm taktak asuah khiak uh ngai kawmin leh PT hih kawm in kou mau aw neih teng ka suah khe khawm sauhsauh uhi. PT ka zoh phet un kei le sappa room ah lut paisuak in kingetna lai dal ka vapia a, hon pompih din ka um kei himhim chihna ziak bel lawi dangte suti ngen tamlua leh kou tua ka company uah om ka tawm luat ziak un kuamah paikhiak a phal kei himhim,   sihna, manna tuah ahihzen kei leh kuamah kingetna phalsak in a om kei himhim hi. Suun duty in Lunching ka phone den a himahleh a pick up hetkei a tawp in kou le duty zou, ka camp uh zuan in ka pai ua a gal ah ka Ricky in honna vaidawn in kipak tak in ham chonchon hi. Camp tungta kikheng dia ka lut dek leh ka lawmpan sappa'n a room ah hon sam hon chi a,  kei le kikhek khe manlou in, mai zol kilhkelh toh ka valut a, a gen di pen thei hi awmtak in nguai deuh melpu in ka va ding zetzat a, ka sappa un le Dingbawi zingchiah non kinget dan bang in na vapai dia zi hoihtak na vanei dia suti mi kipawng piaklou ahihman in manpha theitawp in na vazang ding a; Honey-moon na zatzoh chikchik uh na hong paipah di hiai lam le gal buai theithut ahihman in hon chi bang chu ka sappa uh numei hileh bang a biang zu ziak a san dup chiuhcheuh bang ka tawpsak ut mahmah hi. Kipak lua in salam ka buk a ka pawtsan hi. 

Ka lawmpa Suhas kiah ka gen leh hon thik petmah a bangmah le hon genpih kei hi. Kei le kikhek khia in ka vante packing bawl in ka buailaitak in Royston ka lawmte mah hong lut a ka pai di lam thei ahihman in ka vante hon pack pih a ka packing kawmkawm un ken le Royston kiah Ricky hoihtak in ana enkol un aw ann limlim nana piak ngei hon gingta ka hi ka chih leh "mawk mawk eive na pai chikchik ana goudi ka hi uh ch'in hon chiamnuih a kei le ka nuih hetkei leh kisuanglah thak a diam ah i hon chiamnuih eivele a gikdan vateh oh non tung chiah huaisah gikzaw di ahi chi'n hon khamuan a, ann nek hun ahihman in dinning hall lam ah ka kisawitou ua, nidang a sakol hawai lim salou hinapi'n tuni chu sa meh meh bangtuk in ka kingai a ka bak zuauzuau leh lawmte'n hon en kheukhou ua ka leikhat khum ek leh hon nuihsan zuazua zaw mah uhi. Innlam paidi himawk i chih chiah kipahhuai bang mahleh nidang a hon na vaidawn gige ka ngaih Lunching om nawnlou dia, ka ngaihtuah sau deuhdeuh chiang bang in ka phurna teng hong bei hileh kilawm bang in a om zel hi.

Zingkhua hon vak in "Dah lah nuam nang e" chia lungsim gikpi toh ka lawmte PT lak nainai laite te melh phei kawm in ka pawtsan a Auto sam in huchi in station lam ka zuan pheita hi. Motor mei sau henhon sung ah ka hon tuangtei saam a ka lungsim bang partiton koih hi awmtak in Dahna leh nopna in akikhen tiptep abang hial hi. Utlua hizenpi hon kam den khat om ahihman in Rail sung ah ka kiang ah nungak leh tangval kiteng zouphet mah bang a tu khawm letlat ka muh in Lunching ka muh masak nipen a ka om dan teng ka hon phawksuah leuleu hi. Nikhat ka suti pailai a bus ah ka kum khiat chet a talab nekna chil hi awmtak san zezu ka sepaih boot zol kikelh tung ah a tu a kilang baih mahmah ahihman in kei le hehsim kawm in a phihtu ka zon leh nungak etlawm tak vom maam hinhen amel ah kisuanlah mel belh hi awmtak in a romol (handkerchief) in ka khedap hon siaksak dek a kei le ki-awi zawzen lou in Aw khauh deuh in Het !!! Ka chih khumzot leh alauh mel mahmah a kisuanglah lawthak ka hihman in poilou lua ahi,  hihkhelh theih mah ahi ka chi a ka paisanta hi. Ka pai kawmkawm in minu mel etlawm tak mai ka mitkha a thaamden ahihman in ka lampi pai bang donlou/ngaihsak khalou ka hihman in lampi kiang ah pani-puri zuak vaite khat ka phu puk kha zot a lungtom leh sepaih chihmah tak kei hih khelh hina zen pi vaipa bang ka leh tai zozen a hon nuihsan hemhom maimah hi. 

Auto a omlam himhim kithei lou ahihman in ka inn uh khe in ka pai tung a ka keelkong uh ka lutdek chet leh huai talab nenu hong paiphei guih a ken le ka mitkha di ka sak sim leh ana hilou ahihman in hon etphei toh kituak chet in ka nui khawm tuak kha zawzen uhi. Inn ka hong lut leh sungte muh di khat le a omkei ua, kongpi bang tala ana kikhai lelak phet hi. Gimsim ka hihman in ka hulliap (varendah) uah tutna sau kidohte ah ka lumsuk bembam a ka sungte hong tuntak un hon phawng ua huchi in innsung ah ka lut uhi. Bangchi bang zong teng in sum lawhkhe mah leng ka pa lung awina ah lutlou ka hihman in inn lumtak maile kei om chiang in zaw kipahna tatak omlou mah a bang hial hi. Amin pu a atapa uh mah ka bang a duat inle ka omkei himhim, sepaih ka kilak dek a ka pa'n hon awi louh phetlouh hon lut nawnken achih ahihman in ka innsung nasan ale ka maingal law non kholkei hi, ka nu'n bel hon hehpih thei mahmah mai a ka pa kiah thupha hon nget saksek hi. Tua bang a hun hong pai zel in ka sepaih kilakna bang ah vaching thepthup ka hihman in kei kipak tawk leng le Head of the House in hon kipahpih lou ahihman in kipahthu kamkhat mah inle hon pawl kei a, hon gen sunsun ahihleh "Dingpu kisik a inn non kik nini chuh na room di nang leh nang na kilam di na teenna mun di inn huansung bel kon luah sak dia himahleh innsung ah na nek na tak di khat le na mu kei di hon chihsan a ken bel kam khat le ka thukkei a huai kha damdawi hoihpen ahihman in phunlou paulou in innsung mah ah ka lut hi. 

Boss te thu awi louh di ka lau petmah a amau thuthu a om sawm hizen napi'n mitmei venglua ka hih man in thil ahoih di lam a selam in hong pai zaw a, station a talab tui hon phih khum nu toh ka hong kingai kha ta uhi. Tua ka it ka ngaih leh kum tawn adia chi bang a ka teel ka zouzam pak nou hiuhiau ka tun leh zua in hon hal chihtak in hon hal ua, bangdang ziak hilou in aneih zohlouh man uleh a misiat luat man uh ana hidaih hi. Huai ka theih in zaw anaa ngei mai khovel a i deih pen tuh sum ahihlam ka phawk suah panpan a ka nu leh pate'n kei maban di khual loupi a sesum deihziak in ka maban di teng hon suk bingsak ua ka it ka ngaihte lah hon halsak, huai kia le hilou sepaih nna ka muh in innsung apan hawlpawt in ka omlai a, ka nu ziak leh kei mah kisiamtan louh na  ziak in innsung ah om thei hamham ka hi a, mihing a piang sapsap di'n ka tan sia ka sa mahmah hi. Tun leh zua hal ziak a itna tuiluang pen ka kang sak tum kei himhim Lunching bel ki-awi loulua ahihman hon ngai leh hon it petmah tawk hilele kikhen di kia lunggel in neiden a bangdang ziak hilou in ka boss te a lauh ziak ana hi lel tak hi.

Nikhat a inn uah ka va pawt a light pai nitak himahleh electric department te'n light on dilam mangngilh get ahi di ua khapi lah vak lou khua niim deldul ahihman in kei le a keelkong uh ka tun a kong kihong vek sa a lut ziau ka tup lai in a nuai pen kikam ahihlam mu lou in ka palkha a innsakte ui ek ka boh kha bangchu nip thiah in vot duak zawzen a Lunching nu'n tua thawm azak phet in meisel tawi in hong pawt a kei bel ana dingtou khin ka hihman in hon muchiang mahmah hinteh a tuibuk muam lai hon tulh lah hilou hon huat ziak le hituanlou in anuih nalam ah ka mai leh ka chi pumpi ah hon phih khum a, ui ek gim toh tuibuk gim toh abang teng kitun khawm vek in ka lut a Lunching ana nui selsal ka muh in ka kipak petmah mai a a gimse teng bang mangngilh hial ka bang top hi. Ki hah khezou in Lunching kianglam ka vanaih pheipah a anu le pindan tuam ah hon lutsan pah a, kou gel chauh in candle nuai ah ka tu pippep uhi. Uding i kikhen mai diam hon chi a, ken le Nau i ka utkei non it lam ka thei. Nunu papa te'n bang chituk in hon hal mah le uh le nang adia khuam bang kip di ka hi.. Ken zaw kon khen ngeikei di ka chih leh Lunching hong nehnou a abiang mam hinhen ah a mittui hon luangkhia hi. Uding non it non ngaihman in ka kipak lua himahleh kou lam ka ki-et chiang un chitna himhim ka nei kei ua, mi a  dia le simtak ka hi kei uh nunu papa te lungkhamna tuntu a ka pang di ka lau... Uding aw ken le ka hon ngailua himahleh chih a om gige a thilteng ah Uding kei adia ginom a kei adia na kip zoh di nak leh kei le nang adin ka theih tawpsuah in ka pang dia ginom tak in ka om gige dia bang chituk in haksatna in hon bawm mahleh i kal ah itna khaugui kizan pen ka tatsak ngeikei di. Uding pasal ngaihzawng ka neikei a adang le ka theikei himahleh tua kon genteng ka lungsim tawmg apan pawtkhia ahi a hehpitak in hon zuau san ken aw.... Nanau ka kipak lua khamuanna bukim ka muta chileng le ka chi khial kei di. Bangteng tuak le hang le ginomna khaugui tatsak kei ni aw chi'n amuk san chiuhcheuh ka tawp sak a aman le hon tawp thuk sam a pindan khatlam ah anu om in a gawl hon khuah tak in ka kikhah theipan uhi. Lunching nu'n bel hon deihsak petmah a ka nu leh ka pa ta  tak himah leng ta laksawn dan a hon bawl dan teng khong thei ahihman in hon hehpih mahmah hi. Huai banah atanu ittu ding nei chia kipak lua ahiman in hon deihsak petmah a ka vahoh teng bang in a ak tui uh hon na pezel hi...

Phuuuuuut!!!!phuuuut!!! Chiin train horn hon ging a.. 

Kei le khanglou zot in tutung ka pai zaw ka sepna apan terminate mah ka bang hial hi. Ka phurna teng bang abei hial a hiai rail  sung  tuang nupa hi awmtak a omte ka muh chiang bang in ka enna leh ka hazatna kia in pumdim hi. A tawp in zaw Guwahati Rail station ka tung ua, ka lamet phaklouh leh ka kinep hetlouh in Momawi leh a sungkuan te'n Guwahati rail station ah hon na ngak ua lamdang sakna kawmpi toh ken le Pa Sang bangchi dan ahia, hiai ah nana om mawk ua? Koi ah hoh dek na mai ua ? Momawi in le nang hon pi ka hi uh ei Uding koi na bag hon la in ken kon khaisak di ch'in nui selsal kawm in hon chi a ken bel ka pakta lokhol kei hi. Ka bag te kei puakse ngailou in ka (future) puzon te'n hon puaksak ua kizen kasa lehlam hi. Amau private motor a hong pai ahihman un hampha kakisa sawnsawn a, Lunching bang ka lungsim apat paih khiak mah abang a ka ngaihtuahna ah le ana tazou kei liuleu mawk hi. Ka hong tai zel ua Momawii in Uding na gim chimel ngei na pau ngei ka, gim kholkhang chih chauh in ka dawng tetauh a, mi houpih taima ahihlam tun ka theipa'n a lam tawn in ka kihou suksuk ua, polhnop leh mi ngaihnat huai ahihlam kon theichian semsem hi. 

A lehlam ah Lunching ka ngaihtuah khak chiang in in numei sapsap dia le mi toh a kibang kei, a theihna a atawm a, a mawl (hai) toh himahleh a nun a sekei a, a zahkainate ziak in hiaibang teng neikha, huai banah apa omlouh san ziak mah in hichi ahi di ch'n ka koih thei hi. Ka lungsim ase deuhdeuh mai, Momawi lah mipolh nop leh innsung hausa apan khanglian ka chih chiang in lam etna liantak ka nei mawk hi. Ka hinkhua ah nungak ka itpen leh ka ngaihpen ka lungtang ah a min ka na gelh khit hiai Momawi ziak a ka kichiamna teng vuaksuak sak leh zulhzau tak a om ding zaw ka ngaingam kei a, misia ahih ziak un a lungsim ana kholdiak din ka upman in ka hehpih mahmah hi. Imphal kong tung uh zaw ka thateng a chau a huaikia hilou in ka lungsim bang le a gim mahmah mai hi. Zinglam dak 1 vel a tung ka hih man un taisuak ka tum ua himahleh Momawi nu dawilok manin hotel ah ka giak khadaih uhi.

Ka hotel giahna uh pindan tuamtuam ah giak himahle ung room khat ah omkhawm mah ka bang uhi. Miteng ihmu khin vekta chih di in kua hiam ka pindan kong lam hong naih ommah abang a kei le lau gusim hinapi'n kipasal sak in ka kiang ah chair ompen len sa in ka na om hi... Awl chikchik in ka kong khak hon kihong thianthian a, ka chi hum mul teng a thou sungsung a ka dip bang a kisai nak petmah mai; innkong lam ah Zero ball vak kiukiau a, a liim(shadow) kimuthei pah a vom ngiitnget ka muh in zaw bangdang le ka ngaituah kei ka pasal na in zoulou ahi ngei dia ka puan kawm ah ka tum daih a, ka kilukhuh a ka chi khong hik mulmul leh liing lulut maita ka kianglam hong naih deuhdeuh a thakhat in ka puan silh hon kibeng a hon nui kauh in Momawi ahi chih a chiang huntawk mahmah hi. Ka kiang ah hong tu a Uding ka ihmu theikei vot ka salua hon chi a ken le, Mawi ei ka bag ah blanket ka puakte kon la khe dia na room tan kon kha di aw chi'n ka bag lam manoh a ka pai dek leh Momawi in ka khut hon len a, Uding nang Lunching toh kingai lai uh maw hon chi a ken le 'He' ! Chih chauh in ka dawng a hon letna khut ka khahsak a ka bag omna lam naih in ka bag ah blanket leh rezai ka lakkhia a, a room tan ka vakha a huchi'n sawtlou ka ihmut nung in khua hon vak pah in ihmu thei nonlou in ka thou khe pah a Lunching phone sawm in ka kipingpa vei nilouh a himahleh ka phone bun tuan kei hi.

Momawi nu leh pa le hong thoupah vanglak ua, eh ! Pa Sang thoubaih na uh chia zingpai di maw ka chih leh Nu Thian in zingpai zaw ut huai lomah veh aw hilele meipi asah lua a gari tai a nuam kei di, ni suak i ngak di ua huaichiah i pai khepah du aw chi'n a room uah hon lutsan uhi. Kei le ka room ah lut in ka phone ah games kimawl kawm a ka omlai in ka phone hong ging guih a ken le 'Hello Pa bang chisim uh e?? Ding na ihmu thei na uh maw, kou hon pi di ka chih ua leh hon chih leh pa ken kon phone di roaming a pai in cin kei ale ki cut thou a chi in ka koih a, ka leh phone a gen pen hon zom nawn in sawtlou ka kihou zoh un ka koih tuak uhi.

Pa te thuthu i mang leh zaw kamdam kiza veh aw ka chi lungsim a kei le ihmut khamlou ka hihman in tomchik mitsi zual din ka lupna tung ah ka kiphah suk a sawtlou nung in ka kiang ah Momawi ana tuden ahihlam ka phawk suah pah hi. Kisuhalh in ka blanket hon tawite ka bag ah ka guang a, innlam pai di Lunching mu di chia kilamen ka hihman in  ka paima a perfume 1000 hiam a ka lei ka hon kikaap a chik mah a zang ngeilou ka hihman in a gim bang ka leh kham dek maimah hi. Ka sam bang le a style theipen a hiat in limlang ah dakkal kim val bang kong ki etzoh in Momawi a nuih ana zalua a  ana nui khe lualua phet hi. Pai hun phial ahihman in ka vante gari sung ah ka guanglut ziahziah ua, singpi dawn din cafe lam ka manoh uhi. Singpi dawnzoh in zaw nibang hon na sang petmahta ahihman in kong kipankhe nawn ua, Momawi in ngaih et a hon en ahihman in nuam ngel khollou hi. Moirang ka tun un ken le singzu peuh ka valei mawkmawk a (muraga ngouba) kei chihdan huai puri achih uh apek neute sangman bangbang te le ka leitreuh a, buzia saute kawi ngeungau le tamkhop mahmah ka lei rengot mawk hi. Sungte hon duhpih di lah omlou zing hai ka hi hiam chih le kitheilou in ka hong tai nawn ua, a tawp in zaw mimbang pianna vangkhua nuam Lamka vangkhua ka hong tungthei khongkhong uhi.

Nidang sang in ana changkang zaw tham a lampi bang le ana hoih sot mahmah mai hi. Kou innlam ah hon taisuakpih pah ngal ua Lunching in bang hon na muh khak di ka lau petmah mai, a ziak bel Momawi te toh ka hihman un a ngaihtuahna leh a lungsim naa lotel di ahihman in hon muh di ka deihsak kei himhim hi. Inn ka hong tung uh chu nidang toh a kibang kei khop mai ka pa bang ana nui seisai a amel et anuam khopmai, ka nu le kipak mah leh amel omdan in zaw lungkhamna banghiam khat nei hi din ka um hi. Ka vante uh kisang in inn ka hong lut ua, ann nek di ana bawl ahihman un tomchik khol tawldam in ann kuang kon umkhom nainai uhi. Innkuan khat ka bang pah mai ua nuam asa thei mahmah uhi. Kei lah Lunching kia ka lungsim ah omden ahihman in Momawi te pai kal bang ngak in ka ngak lah mahmah a i ngaklah toh apai hak uh kituak chet mah abang a atawp in zaw pai di vai hon sawm ua kei le nui ut hetlou hinapi'n ka nui lem a (fake smile) a kipak thei khopmai ua, ka ngaihtuah zel a hichituk a ka pa maitai lam ka muh nihveina hidi'n ka um hi. A khatveina bel ka u sepna apan a lawhching ni ahi hi. Ka pa kei ziak a maitai petmah a om chih pen bang lamdang ka sa thepthup a alehlam ah bang ka khase petmah hi.

Kei le kisuhalh din kongpua kon kaankhia a Lunching te innlam naih in kong paiphei a, a innmun uh ka tuntak in... Ka hu bang ka lathak zozen a innsung ka valut in ann nek uh vatuak kha ka hihman ka pawtsan non a amau le "Tu in" chih kammal khat le hon phih khum lou uh ahihman in lungsim nuam loupi in kholai ah ka vak kawikawi leh ka lawmpa toh kong kituak kha ua. Bangchik a hon tung e, Ding ? Bangmah thu lah non zasak kei a, a thian a kua zang di e ? Hon chi chu ka phuguih hial a,  eh ! Pau bangchi dan e ? Kiteng di thu khong nana thei a, tuni mah a hong tung ka hi ei. Lunching teh ka vahoh leh ann ana ne geih ua, hon nekpih in le hon chih louh ziak ua hong vak kawikawi ka hi. Ding maimah kuamah a theilou om nonlou nang chouh hinteh a theilou,  chi'n hon nui  nulh a. Ken le maksa sim in lawmpa kia'h suanlam tuamtuam gen in kong   kikhen thei khong uhi. 

Inn ka tun in ka Boss te'n ka hohna bang hon dong pah thithe ua Lunching teh chi lenglah Lunching a dia thil buaihuai piangthei di ahihman in Pau te kiah ka chi vat a ka gimlua kon tawldam di chi'n ka room ah ka luttsan a bangmah gen leh sak hon nei kei vanglak ua ka kipak petmah hi. Tangval zi bang neithei hial tamah leng ka pawt teng in ka pawtna dot veu in hon neisek ua mibang a pawtsawt hikei mahleng ka pai teng in napai hak theilua chih kammal ka bil ah hon bat sak gige uhi. Ahi a tuni bangziak a bangmah hon genlou uh adi ua aw ! Aihkeh tungpan vasalh lala pah di nuam asak louh ziak ahih keileh Momawi toh kiteng di ziak a ka lung awilouh khak lau ua bangmah genlou uh ahi dua aw ? chi'n ngaihtuahna bang a kisual tuahtuah maimah hi. Lungching te'h ka vapawt a houpih tak le hon sak louh mawk uh bang hihkhelh nei a hon pampaih mawk uh ahia ? Ahihkeh Momawi toh kiteng di chih atheih ziak ua hon houpih ngam nonlou uh hinteh chih khong peuh ngaihtuah in kei mah lungsim suangtuah in ka zalna laikhungtung ah sousang tak in ka na ngaihtuah ngutngut nilouh kal in ka na ihmu daih hi.

Zingkhua hong vakma in ka thohpah tingteng leh inn ah om ka hih lam phawksuah thak in thousilen zepkik thak in kong nak hithit nawn a ka nu'n hon phawng a, bawi thouta ou ann nek hunta chih bilbuk ah chikmah a zak ngeilouh hon ging bangchu kap kawm a Nu-le-Pa migitna damdawi-inn ah ki enkol kha uh maw ? ahihkeh a damdawi ana nekha uh maw? ka tung na hi chi hoih mawk uh, chih a ut huai mahmah. Himahleh huaichi thei di dinmun ah omlou ka hihman in awle Nu chi'n ka vakisil khia a, ka underpant spare tawi khalou ka hihlam phawk in ka nu kiah alui ka zatsate en ding a ka sawl leh ka pa a TARA a lastic kol simkhat a vamu hamham hi. Ka hon teng bangchu ka taw sa hoih kei deuh leh a kibaat na di vang ka sa sim hi. Ann kon ne ua ka pa'n Dingbawi tuni Momawi teh na vahoh ngap diam hon chi a ken le athu uh nial pah utlou ka hihman in awle Pa ka vahoh di ka chih leh Hmmmm !  ahoih e,  ka gari neu na zang dia kei Auto in ka kuan di hon chi a ann bang chu ka hai zan mama in a lut poppop mai. Tutung inn ka pai ka mang abang zozen a, nuam bang ka sa kei thepthup hi. Ann nezou kei le ka kisa a Momawi teh ka scooter un ka kikhoh suk fufut a sawtlou chik in ka tungsuk pah hi. Momawi hilh kholloupi a vahoh leh bazar ah pawt dia vazawn mawk ka hihman in hih di tampi nei mah leh huaiteng taisan hial in bazar ah underpant zong di'n ka vakikhoh suk ua underpant leizou kong kik lam un Momawi in Uding nang toh vakkhawm anuam lua chi'n ka khut hon letsak tum a utlou ka hihman in hon len ngam non kei a huch'in a innlam uah kon'g kik non uhi.

Inn ah kuamah ana omlou ahihman in chabi innkhang teh vala in inn sung ah hon lutpih a, singpi khong hon awm in banglou teng hon gen a himahleh agen teng ka bilbuk ah lut zou mahmah kei hi. Ka kiang ah ah hong tu chat a hon kingai a dedalh a nuam zaw nuam mah e himahleh kei a didan a ka ettheih louh man in Mawi a lum lua mahmah chia ka nial leh eh ! Uding bangchi e tu khovot lailai a lum hichisak mawk damlou maw chi'n lamdang sakna kawm pitawh ka mit hon en kilkel a, nurse ahihman in apatau diak mahmah hi. I Mawi huchidan ahikei chizau le haulua ka hihziak hi ka chih leh hon zel tum in akhut hon zak khia a kei le ka kihepkhiak nalam in ka muk uh ka kisutuah kha ua Momawi in hon kawi a hon tawpden a kei le uttak na hih leh chi'n amuk ka mutpuak sak leh hon khawlthei vanglak hi. Mawi hehpih tak in ka na paiphot di aw ? ka chih leh,  i Uding ngailou hiah omden suk oh ! Ko'n ngailua Uding hon chi a ken le Mawi bang deih, bang ziak tak a hon ngai na hi hiam?? Uding nang mihoih chin  a, Lunching toh na kingaihlai pek ua kon theih ahi a,  ka pa te kiang ah le gengen mah leng hon ngeingaih kei ua, atawp in kei leh kei kithah ka tum a huai apan in ka deihpen leh ka lunggulhte hon sukpichin sak lunggulh utna in a kipei ua, inn dongta te bang na inn uah hon sawl thithe ua, napa'n chu aw mah leh na nu'n amah kiah i dong masa di'uh denchiah ngaih neilai khong bang ahihkhak leh chi'n agen a himahleh na nu thu pailou ahihman in inn dongta te a valawhching ua tua kiteng thei di dinmun ah ki omta hon chi hi. Ken bel Lunching ngailai ka hihlam khong leh tua kiteen pah utlou ka hih dan khong ka gen a heh di ka sak sim leh hehna neng chik le abaang kei nou man hunhun di eivoi kiteen di chu nou thuthu ahi Uding hon chi a ken le Mawi ngaih neilai ka hihman in kei apan utna a omkei leh chikmah chiah i kiteng thei kei himhim di, ken zaw kon ngaikei ngaih et inle kon enkei.... Momawi in poisak chimel hetlou in hong nui selsal kawm in Uding non ngaih hun om law mahmah di ahi , ka patau kei hon chihsan hi. Kei le paiphot di chi'n kong dingkhia a Momawi inle kong pua tan hon khakhia a innlam ah kon'g kikhoh tou fitfit nawn hi.

Nitaklam ann nekham in Lunching teh ka vahoh a tuni chuh ann neklai tuak lengle pai nonlou di chih thupukna la in ka valut a ann ana nekhin geih ua kizen ka sa vanglak hi. Nidang a Lunching nu Lunching sang a le hon houpih tam zaw leh houpih masa zaw gige hinapi'n ka vahoh leh mitsik inle hon na enkei a, gen di a vang khop mai. Ka tutu a Lunching hong mantak in ka gei ah tutna ah hong tusam a.. Nau nang na nambat khek maw?? Ka chihleh 'He khek' hon chi lauh a ken le bangziak a non hilh louh na nambat ah tamveipi hong call ing a switch off kichi den a, ken na kiteng na du a subuai tu a pang utlou hon chi gaih zel a, ken le nau mehnal meh khalou uh maw full stop tamna e, nau kiteng ka utkei kiteng di ahihleh nang toh chauh kiteen ka ut.. Nau nang bangchi e , non ngaih chi nawn kei ngei  ka chih leh ka nanau in bangmah gen di dang hon nei kei a paulou a ka om nung sawtlou in hon kidiik huthut a , Uding hehpih tak in hon mangngilh maive maw hehpitak in chi'n akhut bang kon gawm tuah zozen a mak ka sa hial hi. Nau kon mangngilh ngeikei di nang adia muanhuai ka hi, tun leh zua in bang chituk in hon hal mahleh taise thei ka hi kei nau, hong gen mun peuhmah ua leh huai in kon itna liansak sem ahi nau bangteng muak ding in kimansa in ka om sihngam a pang di hial lengle ka pangngap hehpih tak in huai na kam ah thu pawt dia kilawm loute pawtsak non ken, nang kam apan ka zak utpen hon gen zaw mai in.

Uding nang bangmah na theikei hon mangngilh in la Umawi toh kiteng zaw in nang adi'n leh kei adi'n le ahoih di hehpih takin tuni a kipan hon hoh non ken , kon mupeih non kei hon chi a , room ah anu om bang le a kidiik lam ka za a mak ka sa mahmah mai. Loh didan tuan ka theikei a Lunching kia'h kamdam in nau bangziak a non huchi deihlou ? Bang hih khelh nei ka hia , nau ?  Hon zui in tunitak mah in i kiteng di chi'n aban ka letsak leh a ut dekkei hial a, Uding paiphot mai in mittui ka seng tam gop uh. Na nu napate'n hon thei kha un teh mangpha mai ni aw Uding. Hinkhua nuam penpen hon zang un aw,  chi'n hon vaikhak a room ah hon lutsan maimah hi. Lawh ngaihna theilou in, " Nau hon it a hon ngai gige ka hi gin-om tak in hon na ngak in,  mangpha man ni  ka hih khelh sak khelh gen khelh a om leh hon ngaidam in aw, Honna ngak gige in aw nikhat tei ei adia kawlni hong suak di ahi lungliap ken tun leh zua hal vang in ka itna dang tuanlou ahi  " chi'n ka paisan a, innkong ka kan zoh phet in Lunching hong taipawt a Uding chi'n hon tawp (kiss) a i kitawp nanung pen ahita hon ngailou hilou ka hi nang mah nopsak na di ka khual vang a ka it ka ngaih chan ngam ka hi,  itlouh vang hilou in leh tun leh zua hal vang hilou in itluat vang in tua bang simthu hong lel ka hi zaw chi'n lunggel hon neihsak teitei in aw Uding, hon chi a, ken le nau Zatam lai ah chi bang a ka tel ka ngaih leh ka khau khihsa Ching aw hehpih takin non itna khum hiuhiau hon thai mangsan ken aw, nang a dia sihtanpha a ginom di ka hi aw nau, hon na ngak teitei in aw mangpha chi'n ka paisanta hi. Inn ka tun in sungte'n ka mit san reiruai amuh un lamdang hon sa sim uhi.

Ka nu'n bawi bang chi e ? hon chih leh ka pawt nalam ah ka lawmluite ka vamukha a ka va peg cheuh ua leh tam hih lokha ing a huaiziak hi, Ka chih leh ka pa'n sepaih na hi ua kon theisiam himahleh huchi bang zaw hih nawn louh di'n ahoih a na kisuumzoh leh na kidek teitei di ahi. Zi bang nei pahta di nahih zawk mah toh chi a Pa tu lawlaw a nei ut pahlou ka hi , neuchik a hun di i sot gamla zek lai di uh ka man naikei hong  tungpan a kihih zawk mah toh ka chih leh, Hi thamtham e, bawi nang man hunhun a puankhiak di ahita . Hilele hun sawtpi lak na di a omkei, a date di fixed ahih chiang in zaw na Usiam le i sam zaw mai di'u,  tua vasap pah le suty haulou ahihman in hon chi a, awle, ka na lumdi mangpha uau chi'n ka pindan sung ah ka lutsan hi. Mak leh lamdang bang hon sa sim ua lah 'aw' sang deuh hon zat khum kei uhi. Kei le pil gopta ka hihman in amau thu awi petmah dan in ka om a a langkhat lam ah Lunching teh ka vaguk hoh gige thou hi.

Nitak khat ka Pa'n hon pawt phal kei mawk a bang ngaihtuah adia aw? Bang gennop nei adia aw? Lunching teh ka vahoh gige lam hon thei adia aw ?  chih peuh ka lungsim ah a na kidou tuah nilouh den hi. Ka pa'n bawi na kiteen ni ding uh fixed ahita a, khanawn kal masa pen tarik 5 in a dia kilemgel ahita.  bang ngaihdan na nei a ? hon chiphut a;  kei le mak leh lamdang bang ka sa zozen a ka kiging khollouhpi in aw hoihlua pa bang ka chi thethup kha maimah hi. Ka lungsim abuai khop mai Lunching kiah ka bang chi gen dia? Bang chi panlak a hiai ka itlouh toh ka kiteen ni di pumpelh thei di ka diam? Chi'n ka kingaituah den maimah hi. Zankhau in ka kingaihtuah den a bangteng hileh Lunching huai ni ma in ka gu teitei di chi'n thupukna la in kon ihmuta hi. 

Zingkhua hong vak in Momawi toh anu hong hoh zenzen ua, ta duat dan a om ka hihman in ka na thou naikei a Momawi ka room ah hon lut in ka puan silh hong hawk zot leh underpant vuak toh om ka hih lam hon muzot in a ki kou khekha zozen hi. Huchi in ka nute hong lut ua Momawi bang zumlua kisa in amai teng bang hong san cheichoi maimah a, ken le bang chi kei nu hon phawng dek leh sazu tai amuh leh a kiguih lua ahi chi'n zuau ka gensuk muat a Momawi in hon kipahpih mahmah hi. Thoukhe pan chih di in pai  asawm pah ua,  ken le poisa ngellou in ann neklim ua chi'n ka vaikhak khemkhem hi. Ann nekham in Lunching te innlam ah hoh di'n ka hong kisa vitvit a ka nu'n Momawi teh vahoh in hon chiguih a manlou chih dia lah thil hithei hilou kiteen-ni di naita Lunching kiang ah gen nop haulua hizen napi'n nute thu awilouh di lah nuamlou in leh denchiah thil hilou hong tungkhak di ka lauh manin Momawi te innlam ka va kithrit suk nawn maimah hi. A nu leh apa ana om ua nuam ka sa zaw daih a, amah kia om di bang ka nak lauh guk ahihman in ka lung anuam tuam mahmah hi.

Thu vantang khong hon genpih nilouh ua paipah di chi hinapi'n hon khouhkhouh nalam un ann bang ka vanekha thepthup maimah hi. Ahi a amau lunggel bel teng suak vanglak a pai nonlouh a makpa sungkhum didan ahi deuh a, himahleh naupang sia kihi nawnlou ahihman in khemzoh in zaw ka om sam kei hi. A hau ua deihdeih lei leh deihdeih neizou dite ahi ua a tanu neihsun uh duhthusam chu amau duhthusam ahi pen mai, sum ah lungkim di chile amau mah a lungkim di ua, Sum ah damtheihna neih theih hileh damtheihna bang le a kitasam teuh kei du. Sum hauh man leh neih leh lam hauh man a leitung bukim di hileh zaw leitung akhut uah akoih di ua vai ahawm khum di un ka gingta hi. Ka pate'n hon deihsak toh Momawi hon ngaih/it akituah man lel a tua dinmun ah om ka hi lel hi. Huchi kei leh Momawi kichi khovel ah piangkhia ahihlam himhim ka theikei dia, ngaihsak leh ngaihtuah pen in leh buaina khukpi ah lut di'n ka kigingta kei hi.

Ann nekham vapai pah dile nuamsa ngellou ka hihman in Lunching kiah thil omdan teng ka daileen sung in muhlouh tongsan apat ka thon a hon theisiam ahihdan hon hilh pah hi. Sau lou kiteenna di thu hong kikuppih ua ka lunglut lolou ahihman in agen teng uh ka aw vek hi. Huchia ka hong kihou nung un dak 8 bang hong gingtou venvon a innlam zaw pasal kihi lele dak 8 bang ale kibit non lokhollou ahihman in paivai ka hon sawmta a, giak din hon khou rengot mawk ua haihuai bang ka sa sim lehlam hi. A tanu uh maipha hah zon hinatel uh e lawmlawm mai ka chi lungsim hi. Ka veng uh ka tunma deuh in Papau leh a lawmpa ka tuakkha a, nuam tuam ka sa mahmah hi. Ka hong hou limlim u leh tua Momawi thu kong tungkha mawk thepthup ua, kong thei chiang semsem a mak leh lamdang bang ka sa sim mahmah in tua dan ana hiphet maw , ka guk chih hi. Lunchingte inn ah ka luttou ua saulou ka tut nung un mangpha kikhak siausiau in mahni inn lumchiat ka naih tiptip uhi.

Inn ah ka lutphet in ka pa'n sum tamlou kiteenna apoimawh khak leh chi in hon hawm a himahleh ken ka sangnuam kei hi. Kiteenna di kal nih kia in samta ahihman in mak hon sa sim a bawi bang chi na hia ? Nang neihsa te zaw kem lai in la'n napa damsung zaw kei neihsa in na kiteng di'u hon chi a. Ken le ka pa ka entou a Pa nidang na bang kei lua Momawi hia non deihsak uh ahihkeh a sum hia na deih uh chih bel ka theikei himahleh ken ka it thei mahmah kei hiai kiteenna ahihtheih leh hon pel sak mai un ka chi a... Ka Pa mittang hong liankul a mit bang lawt khedek mah bang hial in Kaizading tuisik apan na let dong hon vaak ing a na neihsa seki khatle tellou a nuamtak a ka innsung ah om chin a kisuanlahna himhim neilou a ka thu na awilouh na lawh suahsa in anntang bag bang zah ka negaita di ua hon gen oh!!! Gen oh!! Bang dia na nu leh na pa thukalh a gamtang gige nang mihing hon chi zuauzuau a, dak na di bang ka thei kei, Pa aw hon ngaidam in na tapa na tung ah a hihkhial lua, hehpihtak in hon ngaidam in, himahleh Momawi bangthu ziak a non deihsak uh ahi hiam? 

A pasal Delhi ah om in ngak nilouh a,  bang ziak a kei tung ah hichibang puak gikna hon piak sawm na hi ua? Ka chih leh hong heh deuhdeuh maimah a, tempawng tawi in hon sat sawm a,  ka nu om keileh bel huaini mah in nungak tangvalte zaan hah a ngai ding in ka um tinten hi. Ka nu ziak in ka sih di lai hutkhiak in ka om a hampha ka kisa a lah kingaihsiatna in ka pumdim mahmah hi. Ka pa'n ka pau kam khat le kha (bitter) sa ahi a ngaihdam ka ngetna ah kiteng di ka hih thu uh ka gen in amel ah bel heh mah leh kipak ahihlam ka thei chiang mahmah hi. Lunching kiang ah bang genta di ka diam ? ka theizou kei. Ka Tongchiam ka pelhsan mai ding zaw ngai ngamlou leh a paap pozoulou di ka hihman in poi ka sa mahmah a,  sih mai bang ka ut hial hi. Zingkhua hong vak a nitak a thawm ging zate innveng innpam ah omte'n hong naih vengveng ua thu khong hon dong uhi. Gina tak in le ka houpih kei, ka lungsim ah bangmah omlou ahihman in ann nek hun di bang le sap ka ngai hial maimah hi. 

Ann kuang ah Ka pa'n zannitak ah a omdan ngaihdam hon ngen a ken le ngaihdam ka ngen a huchi in ka hong hoihtou nawn uhi.. Lunching kiang ah bel bangmah ka hilh kei, a puaknat luat di ka lauh man in ka hilh ngamkei hi. Lunching bel mi ngaihhuai tak ahi amah kiah ka om chiah ka kha amuang mahmah a, ka lungsim a kipak petmah hi. Thusia himhim gen utlou ka hihman in akhen chiah bang ka kisuheh zel ua, zannitak a thiltung bang hilh mawk leng a lungsim na lotel di leh kingaise diak pah di ahihman in hilh le ka sawm kei a bangmah chilou dan in ka om nilouh hi. Vengsung ah papi hih di neiloute hong lut ua, zannitak a thu khong hon dong nilouh mawk ua, ka hehtha bang asuak tuntun hial hi. A tawp in zaw ka hilh khongkhong a,  Lunching in le lamdang hon sapet mah a, innleng aneihte apai zawh un a thuzakte adik mah hia ? chi'n hon kan a, ken le dik ahih dan ka gen a, Lunching adah mahmah a, amah adia kinepna om nonlou hiam chih khong hon kan a ken bel ka hanthawn daih a, Nau huchidan chikei leng ka pa hehlua a tempawng a hon sat tum ahihchia huai ka gen ngai mah him ahi. Himahleh ka lungsim tak ah bel huai thu himhim genkhalou in ka kingai a, lungkhamna di khatle omkei ahun hong tung chiang in na thei mai di ka hon itdan leh nang adia hing ka hih dan ka hon chih in bel Lunching a kipak mahmah a, Uding hiai leitung ah lungtuak ngabang lengkhawm kei le zong tung thangvan ah nunnuam laitual sial khawm ding i hi. Kon ngai lotel Uding . Nang adia mansa ka hi, bangteng tuak zong leng sulkik lel lou ding ka hi Uding . Nang adia kip ka hi, nidang ka bang nawn kei, na kamsuak apan na itna a khum a, a neem a Uding kei adin a manpha mahmah tua non itna kamsuakte atak ahihleh ka kipak loding hi. Tongchiam khaugui bohtansa ka pehkik nawn a nang adia ka hihtheih tawp suah a pang a ginomna len chinten di ka hi, hon chi a ,  ken le Lunglau ken Nanau nalam ah pang gige ka hi, tun leh zua hal vang a ka hon itna lian semsem ahi. Tua na kam apawt thu kikai khawmte ka zak mai in leng ka lailung dam ahi nanau, kei adia na ginom nak leh kei le nang adia ginom di ka hi. Nau ka vapaiphot di aw denchiah sawt om loleng le adik kei dia theihsiamna kha in hon ompih gige heh aw nanau neklim uau, chi in ka paisan phot hi. 

Inn ka tun in ka pa office kai hong tung nai kei a, ka nu ka samphei a, Lunching ka ngaihdan leh ka itdante ka fuih a, amah tellou a khovel ah hing di zaw ka peihlouh dan leh ka hehpih dan khong ka gen a, huai banah Momawi pasal neisa pasal dukdak louh ziak leh amah a omkhelh ziak a pasal toh kikhen ahi uh chih khong ka genpih leh ka nu'n le hon hehpih mahmah a, ka pa alauh ziak a ka pa lam ah pang gige ahihdan khong hon hilh a, huai banah sum adeih luat ziak a kei toh Momawi hon gawmsawm ana hilel hi. Ka nu'n zaw hon itlou ahikei ka pa remote control ahi mai, ka pa chih bangbang a om ngai ahihman in sel vuallouh a ka pa thuthu amang kan a hoih dang omlou hon chi a, ken le nu kon theisiam lua a himhim in non deihsak hia Momawi toh ka chih leh ka nu'n le Bawi mihing i hi ua kuamah peuhmah kon deihsak himahleh kei leh napa hon itsiam a hon deihsak siam penpen ahi kon deihsak huchilam dan in zaw Lunching toh kon deihsak zaw a, Momawi ahihleh innsung neizou tak apan ahi ua huai banah nidang apa leh nu mi nasa ahihman in kon deihsak lawkei, na pa nial but louh a deihlouh dan kamkhat in genzek le hehpah di ahihman in na pa thuthu zui ka hi bawi. 

Na Army pan bang le ken thupi hon sa lotel ka hi alang in ka hon gen kei a hiven, Na pa thu na mang dia Momawi toh non kiteng di ua hoihtak in non khosak touh uh ka lamen. Na u bang le napa thu amang a nupa hoih hinkhua ah ding ahita hon chi a, ken le nu Momawi toh zaw chikmah chiang in le nupa ka hi theikei di'u, ka u maw maizen zite thuzoh sa a zi underpant nasan le sawpsak a, huchi dan hinkhua zaw ka deih teuhkei. Sesum in ka itna alei zou teuh kei di nu, ka pa thuthu a om ka hi a huaiziak a hiaitan tung ka hi phot hi. Himahleh tua kiteen di pen bel ka ut mahmah kei himahleh ka pa thu ka awi ngai ahihman in kiteen zaw kul peuhmah in teh. Lunching bang achita maizen diam maw ? Ka ngailua nu ka chih ngutngut leh bawi na ngaihluat leh gu inla taimangpih mai in a nu toh itna athupi a, alian a, alauh huai a, hih theihlouh anei kei ngal a, hon chi a ken le nu ka theizou kei khatvei ka pa kiah ka genlai himhim dia, hon phalkei leh amah deihdan ka zuih a ngaidi ka chi ka pa le hon tung geih hi. Ka pa meh puakte ka vasang khiakpih a a kipak mahmah hi. Ka pa'n le kiteenna di lah kal 2 kia in samta ahihchia'n chi a kisakhol panpan i ka bawngnawi zingchiah ka hon paw di hon chi a. A zi neidi pa sang in le naphur zaw a pa nang nei maive ka chi lungsim hi.

Ann kuang ah ka pa kiah gen ngamlou sasa in hichin kon genta hi. "Pa non it ua non deihsak ua kei adia ka phulouh leh ka tan dia kilawm lou numei hoihtak bang non zonsak ziak un ka kipak ka chih patpat leh a ann sawk louh nalam pang khut ah ka nung hon beng thauhthau kawm in "Bawi huai khong na tang di mah ahi, nang adia kiseh leh kihawi mawng ahi," hon chi a ken le pa kon gennop leh kon nget nop a om a hehpih tak in na lunglou lam ahihleh le hon hehsan ken la kamdam in hon thuhilh in aw ka chi teita hi. Ka pa'n le bawi na utut gen in poilou ahi, hon chih in tuh ken le phaze sa in ka pa kiah hichiin ka hon gen nawnta hi, Pa ahihtheih leh hiai kiteenna pen hon khaksak maive maw, Momawi ka itpen ahikei a, ka ngaihpen le ahi kei, kiteng le ung le kipahna hon tun tuan din ka gingta kei, huai banah ka it in ka ngai theituan kei di... Kon chita chu ka pa ka enphei a aheh di ka saklai in hong nui a, bawi hong kiteng hial le uchin zaw na gintak abang kei hial di, na kingai law di ua , apai nana ah na zui utphial di, lungkham ken huai zaw kingai lotel di na hi uh. Kiteenna i kham zenzen kei hial di. Na kiteen teitei uh a hoih di hon chi gaih a ken le awle chih chauh in ka dawng a ka nu ka etphei leh hon hehpih hi awmtak in ana nguai mahmah a, ka kham chi'n ka diang khepah hi. 

Hun hong pai zel in kiteenna di ni 4 chauh in samta kei lah Lunching kiang ngen ah hoh hoh ka hihman in mipi'n lamdang hon sa ua, Lunching bang koihna khat in ana koih top uhi. Kou bel poisalou in ka om ua, lungkham tak a om Lunching kiang ah ka vatu a anu'n le Dingbawi nang zi nei di hilou na maw ? Nungak zi nei di himah ing e ka zi ding tuh na tanu Lunching loungal ka neikei ding. Non phal nak leh ka pi mai ding ka chi a, anu'n le phaltham e, Lunching nitak teng in nang ngai in kapkap maiveh aw,  Ding. A lawh ngaihna le ka thei kei, ka khem chiang in zong khemzou mahmah kei veng aw, bang loh apha dile adiam maw?? Hon chi a nu-ngak ken ka Lunching mah deih pen ka hi. Himahleh ka pa thu zuihlouh di zaw nuam sa mahmah lou ka hi, ka chi a,  anu le pautam selou in room ah hon lutsan a, Lunching ka angkawi a, Nau papa thu ka zuih ngai di bangsim maimah veh aw, bang chi di ka hia ka theikei, Uding zui ou. Nu leh pa thuman nahlawh pek ahi Uding nang a dia khuambang kip gige ding ka hi ka sih tan dong nang hon ngak di ka hi.. Nau maban di zaw ka genthei kei, himahleh nang le na pil a pasal hoihpi na neih ka lam-en hi. Huai ziak in i tongchiamte suut khethak mai ni kon ngaihlouh na hi kei, kon ngailua kon itlua, huai banah kei leh kei bang ka kisiamtan theikei, kon sugenthei lua a , nau ka kisuanglah lua. Kei ziak a hou siatna na tuah ni leh kei ziak a na lawmte'n hon nawlkhin ni tam mah in teh. Kei ziak a na gentheih ni tam mah in teh huaite tengteng ka ngaihtuah chiang in hai ka kisa a, hon sugenthei di maimai a hon ngai ka hih lam ka kitheikhia a poi ka sa mahmah. Ngaihdam hon ngen di chi leng ka kam ah aw suak inle a hon daih kei dia, hun leh ni te'n le a hon daih kei dia a awlsam pen in "NGAIHDAM" chih thumal in ka hon ngen... Uding huchilou e, ngaihdam non ngetna di thu om himhim ka sa kei, om din le ka ging kei. Kon kipahpih lua Uding . Nang hial in zi hon neihsan na hi a, hon mangngilh ken aw. Nang adia ginom gige ka hi hon chih in ka phone hong ging a, en sese lou in ka off gaih a hong ging nawn a, ka etleh ka pa ana hi a, ka dawng a hong paita in,  hon chi ana hilim a ken le Lunching kiang'ah ka pai ngaiphot ahi nau,  kon ngailua mangpha hoihtak aw chi'n khitui kai niuniau kawm in ka khak a.. Lunching bel kap le a kap sekei, amah ngaihtuahna ah bel kei hong kik di him in ana ngaihtuah den a lamet-na liantak nei hi in ka thei hi. 

Kei le ka hi a kiteeng di hial himah le ung Lunching toh kiteng teitei di bang in ka ngaihsun thei a,  huai in lametna lianpi hon pia hi'n ka thei hi. Inn ka tun in ka pa'n ka hohna hon dong a , ken le im selou a gen di ka chih hinapi'n denchiah Lunching te adin a diklou piang khak mawk di ka lauh man in Papau teh hoh ka hi ka chi a ka pa'n le na vatuitum chituak ngei hon chi a, a thian a zang ut di ka hih ziak hi,  ka chih leh a thian din midang zat a ngaikei napa Lian te Mangbawi i zang di hon chi a, Pa a naupang lodeuh voi Papau bang a chi tuam bik a e, Momawi toh lah kithei hoih ngal ua, siatni phatni a apa lai dia zattak pen ka chih ziak a ka hon gen ahi . Pa ka chih leh Mangbawi inle Momawi a thei hoih lua, tulai kuaman lawmte zang le om nawn kei uh. A kinai ngen ahi azat tak uh , hon chi a. Ken le nou lemsak dandan chi'n room ah ka lutsan hi.

Bawi bang achia kapkap e chi'n Lunching nu'n Lunching kia'h adot leh Nu ka Uding ka ngailua, ka ngai lotel nu aman zi hon neihsan dek mawk a ka theisiam theikei nu, achih leh anu'n eh !!! Bang damdawi teng ana netel e, lawmlawm chia lupna nuai ah damdawi hawng kipai lemlum te amu a, bawi bang doh ai tangkha i hiam hichitel a khovel a mihing in hon pampaih. Napa omlai leh zaw ka thuak le nuamtuam deuh di hia maw bawi, na pa'n genthei lel dia hon nusia a, amah lah tung thangvan ah Pa kiang ah nuamtak a om di hia maw bawi. A lamdang lua, na itpen bek hong gah suah hen la kei le napa kiang zuan leng chih ut lotel keive, na Uding toh na kitenna di ua kon thumpih nate athawn suak eivele maw ! Mi gentheite zaw genthei tawntung di eive maw hon chi ngaungau a, huai teng le zaman nonlou in Lunching bel a mitsi diaidiai a, Lunching nu'n le kin leh buang in inndong tate asap leh, akhen te'n tuzan nungnung chipawl toh ka mankei chi pawl toh suanlam ngen a gen khum lai dep uhi. Chimawh gop in Papau a phone leh inn pai nailou Lunching te innsak lak ah pawt ahihlam ahilh a Lunching nu'n le thu omdan teng hilh in kin leh buang in damdawi inn lam zotpih uhi.. Lunching nu lah om kip theilou in a omna mun ah vialpai den hi. Dakkal khat nung in doctor pa hong pawtkhia a, bangmah lauhdi omlou ahihdan hilh in innlam paisan hi. Papau in Dingbawi tai dia a kisak leh Lunching nu'n bangmah gen ngailou suk buai ngailou chih san hi. Papau tlawmngaihna ziak a Lunching bangmah chi manlou phetlouh lokhe (vomitting) thei ahihman in Lunching nu kipak petmah hi. Lunching le zingkal lam in hong halh khethei a, anu kiah bang ngaihdam ngen thithe a, anu'n le theisiam lua leh 'aw' sang zatkhum ngei hetlou hi. Dingbawi te kiteng nidi ni 4 vuak chauh in samta a, Dingbawi le Lunching teh vahoh nawnlou ahihman in Lunching thawmhau kisa petmah hi. A hinsan om kisa nonlou a damdawi utut ana nek bang hih dik kisa mahleh anu sugenthei leh amah leh amah kigawt a kithei ahihman in leh si dia kilamen  ahihman in a sih zohlou poisa petmah hi. Bang teng hileh a Uding adin ginom tak in a om touh det sawm nilouh hi.

Ka kiteng ni du ni 4 chauh in samta ahihman in ka tha teng a zoi gaivek a, mihai mah ka bang hial hi. Tunitak Lunching teh ka vapawt teitei di ka chi lungsim alah mipi ngaihdan a sia ahihtak man in in ka pawt kei a, a nitak in lawm leh vual tamlou leh innveng innpamte hong pawt ua, ka houlim zaizai ua nuam ka sa mahmah uhi. Huchih laitak in ka phone hong ging a, theih khollouhpi in ka sappa uh ana hi zenzen a, bang chi sim ale, hon wish dek hiale chi in, " Hello Sir Good evening Sir ka chi a, ka Sirpa un le Mr Ding na hong pai teitei a ngai di mi kitasam lua ahi, COY(company) dangte leng buai vek chiat uh ahihman in kin leh buang in zingchiang flight in na hong pai teitei di hon chi a, ken le Yes Sir chi in phone ka koih a, kipak di ka hi hia, dah di ka hi hia ?  chih ka theikei, ka pa ka guk sap a, thu teng ka hilh zawh in, heh mahmah napi'n bang mah dang gen di neilou ahihman in alusu ngau in poisak chitak in, a scooter ah a zan a zan in va taikhia hi. Kei leng ka vante guang zokzok in mansa diam a om ding chi'n ka nu ka sam a.. Lenglate le pawl man non lou in buai in ka buai uhi. Ka pa hong kik lam uh chu ka thei uh, mi ban phone ahihlam le ka gal zak hiauhiau uhi. Van tampi tak ahihman leh bawhthut policy ahihman in ka vante koilam lam ah om hiam chih ka thei zouzai kei ua zong in ka zong kual nilouh den uhi. Jesu bang hon pai himawk leh kihi chi nemnum maimah di hia maw chih peuh ka lungsim ah hon suakkhe mawkmawk hi. A sam omlai teng zingkal a zong di'n ka koih ua, ka lum khongkhong uhi.

Zingthou pah di chih hinapi'n luphak ziak in thohbaih malak salak ah ka thoh in dak 8 bang ana pel man hi. Kei le kihah in Momawi te hong pawt ua, ann nekawm in ka houlim ua, hon na ngak di uh  ahihdan leh ka tung masiah kuamah dang ana neilou didan khong hon gen ua ka pa bang kipak kikou khelou chauh ahi hi. Kin leh buang in ka van nitak a ka guang gaihlouhte guang in ka kisalah sim mahmah hi. Kong pawtkhia a Momawi te gari awng hileh bel huai ah hon kha thei di uh ahihdan hon gen ua, a gari uh servicing apai sak ziak ua hon kha theilou didan hon hilh uhi. Ka pan bus station tan hong kha a, huchi'n airport lam manoh in ka hong taita uhi. Bus sung ah ka tuang kawm in Lunching ka hilh a, kipak petmah leh kei adia ginom den di ahihdan hon hilh a, atawpna in kithuzak mengmeng thei nonlou di ka hih dan khong ka hilh a hon theisiam mahmah hi. Sawtlou chik sung in leenna phualpi kong tung a ka id kalak a, huchi in ticket la in ka lutpah hi. Ticket lazou in ka flight dipen hun a tun nailouh man in ken le phaze sa in Lunching ka houpih pah samsam hi.

Lunching aw suakte adik louhna chiang om hi'n ka thei a, himahleh a kipahluat ziak a kap hi din ka um bilbel mawk hi. A tak a zaw kei hon itluat man a kithah sawm ana hi a, ken bel bangmah ka theihpih kei. Nuamtak in ka kihou ua, Kiteng theilou di chihpen mahmah in kou gel hon su lungkim tuan mahmah ka sa hi. Nidang sang mah in le ka kihou na uh apai a, leenna ngak bang sawtpi di ka sak lai in hun tawi chik sung mah abang hi. Sawtpi houpih utlua hinapi'n hun chiam hon ging a kou le mangpha ginom tak in aw chi'n phone ka hon koih tuak uhi. Kei bel ka kipak mahmah himahleh alang khatlam ah dahluat na di om hiin theih na chiang ka nei mawk hi. 

Leenna ah kong tuang chu nuam himai kital zenzen mai. Huchi zodeuh leh chihdi khatle omlou hi'n ka thei. Ka tuangpihte Punjabi te khat in hon houpih nilouh a huai in ka mood teng asu flop gai mawk hi. Bangdang ziak hilou in tua kou omna Jammu and Kashmir lak a border line/Loc lak ah duty ka hihman un, huai mun ah buaina sousang mahmah hon chi ahihman in ka thanuam na teng abei petmah in ka dip bang akisai litlit maimah hi. Ka mai teng amual gai vek a gen di dang tuanle ka theikei. Punjabi pa'n hong  hah phat petmah a, kou felna ziak a bit ahihdan bang leh ka kithunun zoh ziak ua bit ahih dan hon gen hi. Tun ah mi 5 vel asita ua, 23 vel hospital ah a om uh, aliam naklua omkei mahleh ICU ah mi 7 vel a om uh hon chih beh bang chu ka ngaihtuahna ah Lunching ka muh nawn louh khak ka lau petmah hi. Lunching message a hilh di ka chih chiang in a lung himoh khak di ka lau zel a, lah hilh kei leng denchiah sihna manna khong tuak leng huai sangmah a lungtang naa zaw di ka chizel a, kei khomkhom in ka buai mahmah hi. Ka phone ka lakkhiak zat leh, duang nalh mahmah etmai ale chiltui bang pawtzou hial leh kilawm khat in mit nem tak in hon en kilkel a, huai kia thamlouh hon nui phei silsel a, a etlawm na teng hon kiphah khia ahi pen mai, ka kiang ah "Excuse me sir, would you Kindly switch off your mobile" hon chi kauh a, maizen a khum tel tonton mai, a thu zuih ahaksa hetkei, ken le yes madam ka chikha ek mawk a hon nuihsan cheichai hi. 

Adang khat hon pai nawn a hoih ka sa thei henhuan hi.. A guk in hing man om hina maizen e aw khai ka chi a, numei dang bang chituk in hoih in, siam in hon zou mah le uh. Kei adin zaw bangmah ahi kei. Etmai mai di chauh in ka deih. Khat hon pai nawn get a awl chikchik in hon pai zaihzaih a, hong pai awl lua leh ana hah etlua ka hih man in a hoihna di teng a bei gop man. Kin deuh a etzual hileh bel ahoih na chauh ana muman di hiveng vangse na e,  chi'n ka na guk nuih kulkul hi. Hiai te sang in ka ngaihnou tung Thianmang in asiam bangbang a om chu ka ngaisang petmah a, midang bang a figure hoih zenzon hikei mahleh Pathian batpih a siam ahihman in poi ka sa mahmah kei hi. Ka lungsim ka suangtuah sung in leenna tuh hon bawh ta hi.

Ka lawmte Suhas in airprot ah hon dawn a, Roystone la ka chihleh hon dawng hetkei a alu a su ngau a anuai lam a en den maimah hi. Bangchi e dedu teh 'Roystone la' ka chih nawn tak in Suhas in Ding zan in a mualliam ta, galte kapkhakna thuak zoulou in hon beisan ahih hi. Kei le kidek zou nawnlou in ka mittui kham vuallouh in hong luang a, nidang a ka lutpih ka it mahmah ka lawm hoih mahmah, ka paisuk paitouhna ah hon kithuahpih ahihman in ka it diak a, poi ka sa petmah hi. Bow bow hon kichi a.. Eh !! Ricky damlai nana hi maw ka chihleh Suhas in Ding na ui khe khat lam en di le chia ka etphei leh ki tuam liplep ka mu a bangchi a ka chih leh hiai ziak ahi ding. Na ui khe galte thaang kamna ah awk kha a, huai Roystone in ahut khiak dek nalam ah amah ana kap ua kou le kidelh huan in minute 18 vel ka kihawt tuah nung un Roystone ka hun khethei vanglak uh. Himahleh damzoulou in hon paisan a, na paidek a amah khut ah na ui na kemsak a, aman le a kichiam na bang a hon kepsak leh duattak a hon etkol sak ahi. Kipahthu gen ut le chin le genna di hun man na nei non kei, ka liang hon beng thrathrauh a pai' pai ni. Boss pa'n hon na ngaklah man di hon chi in ka pai uhi. 

Ka camp uh ka tung ua, Major pa'n Ding nong tung fuh geih ve, Driver kitasam a, GD hileteh le driver na let ngai phot di ahi, midang a kisap beh a himahleh buaina khukpi a i din ziak un amau le mi a kitasam petmah. Huai  ziak a na nna loupi leh midang himhim le a nna loupi piak a omthou ahihman in lungkim tak a na sep kul ahi hon chi a. Ken le Yes sir chi in ka room uah ka lut a, a lunglen huai mahmah chihlouh ngal gendi dang le omkei. Ka lupna ah mihai bang in ka tu meumau a, ka dak phei a, luplouh na awngphah kizialte ka en a mi tamkhop lupna a kizialte bang ka muh in ka puak ana petmah hi. Kil khat ah kaih-ging(guiter) ka mu a Roystone a damlai a, "yeh dosti, ham nahin toreng ge" chih la hon sak khum hauhau lai bang ka pawk a, ka mittui hong luang mawk hi.

"Hello darling nice to see you" chi in hon ging a ken le hello, nau damtak in ka tungta chi in aw ling sim daldal a ka chih leh, eh! Uding bang chi e, bangthu om a ? Nau ka lawm hoih mahmah in hon na mualliam san a, ka itlua a ana nehnou mawk ka hi. Nau kon ngailua, kei adin ginom in aw Nanau. Uding dam in na tung a ka kipak lua. Uu ken le kon ngai lotel, na heh louh dia maw Uding kei ka kipah dan huai lam ah pai kei leteh bang chituk in na ka sa dia aw , chih ka theizou kei. Uding hon kidawm inla, damtak in hong om in aw hon ngailua ka hi. Nang adia ginom gige ka hi Uding. Ka koih phot di sum ka hau kei a, Uu hoihtak in hong om in aw. Mangpha in aw Uu chi in phone a koih a, ka lungsim abuai toh ka lawmpa honna omlouh san toh ka pum gik a, hih di pentak bang theilou zozen a ka omlai in Momawi in hon call a, Uding damtak in na tung na maw hon chi a, ken le He, ka tung, chih chauh in ka dawng a, thil hon gen teng He ngen in ka dawng a,  ning lua ahi diam ah hon koihsan maimah hi.

Hiai gal buai kei adia vualzawlna lampi hidi'n ka ngaihtuah a, Lunching toh lampi khat ah ka kalsuanna di uh kisial mah abang hial hi. Ka ngaihtuahna ka suangtuah sung in ann nek dak hong ging a, ka vek un ann ne di'n ka pai bambam uhi. Minute 5 vel ann nepan chih di in duty te apa'n patauh thawm ging leh thau ging zak in hong om a, kou le kin leh buang a kisa in tua thau ginna lam naih in ka thau mat khakkhak u toh ka taiphei ngal uhi. Amun ka tuntak un ka thau ka load dekleh asia khat toikha ka hihman in poi ka sa mahmah a, loh didan tuan lah omlou kibuk det a, a veng/theng chiah pai di chih ahi mai.. Sawt kuam tak kikap tuah a ka omlai un, ka kiang apa hon kap kha ua, ken le amah thau laksak in ka lawmpa Roystone that te kap sawm in pan mun kon la tei sam hi. Bokvak kawm a vak hinapi'n thautang in ka gei a singteh pulhte khawng a theuh zezeuh mai a, himahleh kidouna phualpi ah om ka hih banah ka lawmpa phuba la dia kuan kawm ka hihman in lauhna himhim ka lungsim ah a om kei hi. Singbuk kawm ah pang ka hihman in leh khua bang mialta ahihman in gal lam te'n hon mu thei kei ua bit chu ka hiphot hi. Ka thau ka hawt laitak hon mu om ahi duam ah ka bukna kung lak hon hawt in hon hawt maimah ua ka kihep khiat nalam in galte thau sialphei ka lu ah hon tat uh ka thei milmial hi. Huai ban zaw ka thei nawn kei. 

Khua ka phawk in bel ka khut leh ka khe teng khau hual in a kihen vek chih ka thei, ka kiang nai lak ka et chiang in ki gawtna room hi awmtak sik chiang pum henhon lian pipi 3 a om a, sik khau (chain) kikhai a monglam ah si (blood) kai neunuau a om a, ka gei chin ka etleh ka lawmte mi 5 di vel kei bangbang a hen-gak in ana om tei ua himahleh amau bel khua a phawk kei uh. Kong khak hong ging chuat a, kei le dak khe ngam nonlou in khophawklou bang in ka na omtei a, amau pau in hong kihou bualbual ua, bang gen uh a chih bel ka thei kei. Hon matte lak ua ka nawl penpen pa hon khai thou ua, sikkhau ah a bat ua, sik pum te ah satdia akisak lai un wistle hong kimuut ging churchur a, hon gawt dia hong lut leh thu dong dia hong lutte khempeuh kin tak in kongkhak lam a kidelh huan ua, ken le kin leh buai in huai a gawt dekpa uh ka sam a, amah le ngap lou sasa in hon khihna te uh hon phel a, ka lawmte teng uh ka phel zoh un ngap dandan in kongkhak bul ah a kiliangkawi pawl toh si (blood) thaang gim nam chelchul in kimat chitchet in ka hong pawt guk sawm uhi. Vangphat huaitak in pindan 3 na tan bangmah ah buaina omlou in ka hong paithei ua, himahleh pindan 4 na ah bel sik gate ana om a lawmte bah leh tawl a om uh ahihman in baang(wall) ah ka ngaisak a, ka khekol ah ip te ka sawk sawk laitak in lawmpa'n sikkhau saulo khat hon pe chat a keile kipak mahmah in huai Sik gate ka hong sawm nilouh a himahleh ka hong thei mahmah kei hi. 

Kinepna teng bei bang a ka ngaihsun lai-in ka kiang a ka liang puak pa un hon zom nawn leuleu a, sawtlou chik in hon hong thei pah hi. Pindan 4 na ah bel mi ana omzek ua himahleh kiging khollou ahihman un, kou ahat liai teng in ngamkhat in ka kiboh huan ua. Huchi in k'ong pawtkhe thei vanglak uhi.. Saulou gammang lak ka tung un ka pawtna kulhpi ua pan emergency alarm hi awmtak hong ging vurvur a. Kou le kintat dedeuh in bukna di ka zong pah uhi. Kokhuk thuk lolou fit 3 divel a thuk uih thilthel mun ah ka hong tawm lut ua, ka tuksuk un bel misi ki sehkhawm na ana himaimah hi. Huai kawm ah utleh utlouh thu hi nawnlou in ka hong kibu ta uhi. 

Galte ka tung uah hong pai ginglam khong ka za mialmial ua, hong gingtat louh natak uah omkha ka hihman un hampha bang ka kisa petmah uhi. Thawm gingte hong daihtak in khat leh khat ka ki-entuah ua, kipanpih tuah in huai kokhuk tuh ka hong paisan uhi. Om muang chihte om theilou ahihman in gim in tawl le ung le ka khepi muk un hon pi nalam ah ka pai mai uh ngai ahihman in mun bitzaw dile kithei lou ahihman in lampi sial tawm in kong paipai uhi. A tawp in khota lianlou chik khat ka hong tung khongkhong ua huai mun mite'n a hon muh un lamdang hon sa ua, hon leh lauh daih uhi. Kou le mun khat ah khawl tawldam in, naupang khat in hon naih belbel a nektheih a nek baang hon hawm in hon taisan vengveng hi. Ka vek ua adia kidaihlou ahihman in ka kemkhia a, midang nih hong pai nawn leuleu in nektheih hon pe non ua, lau in hon taisan zel uhi. Nektheih te kakihawm ua, gil bel vah tuanlou hi. Hong pai masa naupang nu api toh hong pai ua, amau inn ah om din hon zawn uh hileh kilawm tak in hon sam ua, kou le amau ka zui khe latlat uhi. A inn uh neu chik himahleh kou pawl omkhop na din zaw a daih zouthou hi. Nek di ahau kei ua, sing chih di nasan anei kei uhi. Kou ahat liai teng in nek di leh sing chih di zong din ka kuan khia ua, kong tun un a kipak petmah uhi. Pau kithei tuahlou ka hihman un haksa bang ka sa ua, himahleh sign language in ka kihou theithei vanglak uhi. 

Phone lah omlou, koi gam ah om ka hi ua chih lah theih but hilou ka hih man un langkhat a ka buai petmah uhi. Kei ngial houh innlam te'n si a hon koih di'un gintak na chiang ka nei hi. Lunching mahmah ka ngaihtuahna in ala pen hi. Nikhat lel ka ki phone louh uh leh thuak haksa ka kisak nak lai ua, nibang zah chingta diam chih theih but louh kihoulou ka hihman un ka Lunching in pona diak din ka um hi. Hing leh dam a om ka hihlam ka hilh ut mahmah hi. Ka hihtheih omsun Pathian kiang ah nget ahipen mai hi. Innlamte ka awlmoh vek chiat ua, kithuzak theihna di himhim a omlouh ziak in poi ka sa petmah uhi. Ann nek hun ahi ngei dia ka tunna nu un khut ling pepelh in ann hon thuk kiaikiai a, kou le gilkial vek ka hihman un ka naih supsup ua, ka ann nek uh hon en kilkel naupang nu'n mak hon sa hi awmtak in din khawl dedu maimah hi. A pi'n ann ne dia sawl hi awmtak in a ann kuang kawk in pau daldal hi. Ann nezou chihdi in thawm ging husa zak in hong om a, dip kuat huai petmah ahitamai. Galte'n ka bukna uh thei hitah unteh ka kichi luakluak ua, pau masa pen di omlou zen in ka ki-entuah leiluai uhi. Naupang nu le tukverh ah a vadakkhiat takin misi om ahi uniform silh kuamah a omkei uh hon chi a, kou le ka chidam huai uhi. 

Ka ngaihtuahna ah Kimbawi le bang achi peuhmah diam maw, amah deih leh amah duh ngen a pa te'n atangtung sak zou di'uam uh maw. Kei hon neih na dia Apa te tongchiam pen alen kipzou lai diam maw khong peuh ka chi a lah kuamah mizia kitheilou hiven chi in ka lungsim a kisuangtuah nilouh hi. Hun hong paizel in kou le damsiang panpan ta ka hihman un huai pitek nu kiang ah kipahthu gen in huai khua pawtsan ka sawm uhi. Sawtkuam tak omta ka hihman un haksa bang ka sa lehlam ua himahleh pailouh theilou ka hihman un ka hong kisa khia uhi. Phalbi zong beita ana himai mah, ka gintak sang un hun paihat ka sa ua, ka lampi paina peuh uah bang kuaman hing dia hon lamen nonlou du hia maw, vatung le sikha khong peuh hon na sa di'u eive ua maw kichi sauhsauh in kou khomkhom in ka hulum zou mahmah uhi.

Ni 2 vel gammang lak ah ka pai nung un gamgi khenna hi awmtak ka tuak ua, kuamah ana omkei uhi. Kou le ki-en tuah duamduam in ka lungsim uah ompen chu kibang vek din ka um chiat hi. Huai bel India lutta hidan a ngaihsutna ka koih uhi. Ka hong paitou zel ua, Jawan khat duty post ah ana om a, khawl din hon theisak a, kou le ka khawl ua, ki surrender hi awmtak in ka khut uh vanlam ah ka lik tou veuvau ua, koi ah kipan na hi ua, bang hih dek na hi ua, chi in vaipau nal a nal in hon dong ua, ka lawmte vaite ngen ahih ziak a vaipau zang hidin ka um hi. Ka lawmte khat in le hon dot teng dawng in hiai koi mun a chih behlap a, aman le hiai Pakistan gamgi ahi. Bang hih a Afganistan khua apan hong pawt na hi ua. Bang party na hi ua hon chih behlap a India mi ka hi uh chi leng amau ziak a hiai tan tung ka hi zel ua dotna hou chik himahleh dawnna ahaksa petmah hi. Bohsuk a sualsuk mai ka tuplai un, ka lawmte khat in hehpih tak in hon that ken zi leh ta nei ka hi uh. Ka hinna uh hon hawi sak lai mai in, kigal himahle hang leng hehpih takin ka hinna uh hon hawi sak hamham lai in chi in huai Jawan pa kiah thum kutkut a, Jawan pa le alungsim tawng dengkha ahi ngei dia, a thau hong ngim lai hon koihkhe suk a, lawmte aw hong pai un, bukna di ka hon hilh ding, denchiang ngei a ka duty hon khel di a om man in hon chi a. Kou le kipak leh lamdang sa kawm in ka zui namnam uhi. Inn hoihlou chik, kum 10 lam bang luah louh leh zuun louh inn khat ah hon busak a, kon paima nana paikhe kei un chih toh hon taisan hi. Lawmte khenkhat in paikhe ni uh, muan huai tatak di'n ka um kei. Denchiah hon kisam khawm di ua, hon ban kap du hon chi a, ken le ngak ni sih leh sih dam leh dam  ka chi hi. 

A hon chiam mah bang in a duty zoh a hong pai ngei a, lam hong hilh din ka lam en uhi, huai banah amel i etleh bang hiam gennop nei hi din ka um uhi. I Ngak himhim di ua, bang hiam tuahsia i tuah ua lele ki taisan lou in i sih nana uah i si khawm di uh ka chi a, lawmte'n le hon 'aw' vek uhi. Sawtlou dakkal 2 divel ka ngak nung un inn kong lam ah mi pai ging ka za ua, dip kaw sa in in ka om vek uhi. Thakhat in kong hong ki hong a, Jawan pa leh a lawmte khat ana hi ua, nek ding tamlou hon tawi ua, hichi in hon genta hi. Kei ka hih leh Suresh ka hi a hiai ka lawm Raju ahi , kou India mi ka hi uh. Himahleh hun sawt pek apan pemkhia ka hih man un, ka India hihna uh abei gaita, India chi tuh himahle ung le India chi tuh pa Ka Pa te uh om nonlou ahihman un, ka nu te uh toh Pakistan ah pem lut kha ka hi uhi. Ka nute uh Pakistan gam mi ahihman un, amau gam mah ngaina ahi ngei di ua, sel zoh vuallouh leh sel butlouh ahihman un ut leh ut lou pipi in hon pem lutpih uh ahi, hon chi a. Kou le kipak lua ka hihman un ka kikawi tuah ua, kipahna mittui bang a kang moh hial hi. Raju in pailam i manoh ding uh denchiang in hon theile uh kua mah hon hing hawi lou di ahi ua, pai ngap lou i om ua leh hon po di ua, akin theilam in i pai ding uh hon chi a. Kou le ka phur ua, ka kithalawp petmah ua. A khe bai pen bang le a khenat lam phawk lou hial in hong pai baubau maimah hi. Huchia aguuk a kong pailai tak un whistle kimuut ging charchar ka za ua, ka nunglam ka et uleh Pakistan sepaih te'n hon delh ua, kou le thakhat a tai ka hon thuah maimah uhi. Mel khat di vel ka tai nung un bahsia zaw ka hi peuhmah ua, atai hat zosam omlou in ka paithoh maimah ua, hon delhtu te'n hon phadek petmah uh ka chih chiang un thathak la in, ka taipan non uhi. Gamlak ka hong luttak un bel nuam ka sa ua, bukna di zong in a kawm laklak bang ka dap uhi. A  tawp in suanghawm kikal ah ka hong bu thei vanglak uhi.

Galte pailiam vekta uh chi in ka hong kipankhe non ua, sausim kuamtak ka pai zoh nung un border line ka galmuh thei uhi. Huai kiim leh kiang ah bel kuamah muh ding a omkei, kipak lua hizen napi'n langkhat ah lauh huai bang ka sa thepthup uhi. Border line ka tung un ngamkhat in ka bil tungzawn lak hong kikhen buk a, huai apan zaw bangmah le ka thei non kei. Ka lawmte si uhia hing uhia chihle ka theikei.Ka hong halh tak in ka hakdek alah ka hakzou kei, ka kiang nai ah thil om pepeuh ka mai nilouh alah glucose gui kan ka mai bat a omkei hi. Ka kikou khia a, nurse hi awmtak khat hong lut a, bang chi e bangthu ahia, chi in patauh meltak in hon dong a, ken le aw neem suah theihlou in ka aw ngaihphathei tawp in ka kikou non a, huai in zaw nurse nu le patau gop ahi dia ihmut na damdawi hon kaplut pah chat hi. Ka khanloh in khua a mial mahmah a, bangmah le ka mit in amu theikei hi. Ka kiang ah kihou ging supsup ka za a, hon naihlam tak uh ka thei hi. Mr. Dingboi bang na chi a, na heute hoihtak a non pi non ziak in kipahhuai lotel, hiai ah na phone leh lekhathon tamlou a om hon chi a, A aw suak apan chu ka major pa uh ahi chih ka chiang mahmah hi. Ken le Sir meimit sawt di hia ? Nitak a meimit zaw nuam hetlou eive maw ka chih leh, A pau nawn hetkei a, ken bel mei lam ngaihtuah dia potkhia hinteh chi in ka ngaihtuah a, lah thawm ging ka za den hi. Major pan le Mr. Dingboi kon gen hoihtak in ana ngai in aw, hon chi a, ken le awle sir ka chi a, Dingboi border line na kheng un, galte di hon sa ua, hon khenlum phial uh ahi. Eilam mah na hi chih hon theithak ua, kin leh buang a hospital hon pawlut uh ahi. Na lawmte adam uh. Nang huaini apan in kon buaipih pen uh na hi, na dam zaw ka gingta ua, himahleh na muhtheihna mitte khet siat in a omta. Nitak ahikei, suun ahi. Hon chih in bel ka ngaih apha theikei, ka gingta theikei, himahleh ka mitsuanna peuh mial vek ahihman in ka lungsim ana petmah hi. 

Hon genzom zel a, Galte'n hon matlai un na phone apan call tampi ka na ngah a, na sungkuan te apa'n bang, Lunching kichi apa'n, Momawi apa'n leh na lawmte apa'n call tamveipi tak ka na dong a, a gen di dan theilou ka hihman in ka leh khamuan a, kha 1 bang hong ching tak in bel, asi dan a ka hon koih uh ahi. Eh! ka gen mangngilh dek, Momawi pen in le pasal neita chih na sungte'n hon hilh uh ahi. Na message bel khatvei mahmah le ka na enkei, hon chi a, tua agen teng za ka hi hia, hilou chih le ka theikei, ka thoh khiat apa'n khua mu nonlou di chih ka ngaihtuah chiang in ka hinman le om ka sakei. Lunching in le pasal ana neikhin thamta dia, kei adin zaw ka hingsan om ka sa non kei. A na neilou hi zenzen leh leng kei akim nonlou mihing hon deih non din ka um kei, ka phone ah message tuamtuam te bek enthei hileng maw, ka tantawk ahaksa kasa mahmah hi. Huchia lungsim hawmtak a ka omlai in, lawmte hong pai ua, a vehna chi in khuttawi anei chiat uhi. Lawmte'n bel ka mit neih nonlouh lam ahon thei ua, huai in hon sunuam tuan mahmah hi. Hon khamuan nate uh thupi ka sa a, a thuak le nuam tuan in ka thei hi.

Hunte hong paizel in, damdawi inn pawtsan theidi dinmun in omta mah leng, kei apan ut tuntun na himhim a omkei, kipahna ding himhim leng a om tuan samkei hi. A tawp in zaw doctor pa'n le hon mu ning gop ahi dia, ka sappa uh sam in hon pikhe khong uhi. Koi lam zuan apai ding ka hia, ka sungte damlai uhia chihle ka theikei. Ka camp uh ka tung un, ka sappa'n ka phone hon pegaih a, ka lawmte'n room ah hon pi lut ua, ken le ka message te ka ban simsak a, ka lawmpan message sausim tak amuh in a simpeih mel chiah kei hi. Ka hah sawl ziak in ut leh ut lou pi in hon simkhiak sak tahi. 

UDing na tung ah thil ka hihkhelh a om leh hon ngaidam inla, ken le na hih khelh tengteng ka hon ngaidam, Uu khat vei bek ki muh a ut huai lua, nang zaw tangtawn gam nuam leh thupi non zotsan a, na eng huai chihlouh gen di dang ka theikei, nang adia sih tanpha a ginom di na chih pen su tangtung na hih man in na zuau kei a, kon zahtak petmah hi. UDing ka thawmhau lua, hong hehnem di ombek leh ka  chi lua, I nu lah damlou sih di ngak a lupna ah lum ahita mai a, nang bek om leteh deih teng li bang ching di hiven maw uDiam. Na ki oi lua uding kamkhat mah ale mangpha non khak louh tel kei bangchi di ka hiam uDiam, na laukha bek in hong veh thei hilechin zaw maw, kei adia nuam tuam law di hi a maw !  Khitui nap tui nul senglouh in ka niteng hun ka zat mai ding zaw ka ngam kei. Uding kon ngai lua...nang a dia ginom gige ding ka hi sihtanpha in, chi in message te a hon sim a khitui nul lou thei ka hi kei.

Ka lawmpa'n hon khem a lah ka khitui a dai veve hi. Miss call a lah Lunching nambat toh ka Pa nambat a ki helh tuah netnot a. A kal lak ah ka lawmpa nambat bang ana om a, Kimboi abel muh in le a om himhim kei.. Huai teng ka lawmpa'n hon genzoh in ka lawmpa'n a nambat a dial leh out of service a kichi a, ka bei a dong gop petmah hi, huchih laitak in ka sap pa a hong lut a, Mr Ding zingchiang in innlam paithei di na hi. Na tonpih di le manta ahi. Na lawmte tengteng in na van hon pack sak di ua, hiai lam ah na hon kik a ngai non kei di. Voluntary Pension in ka hon koihsak a innlam ah nuamtak in om in aw hon chi a, Dahlah nuam na'ng e chi in khitui mah toh ka kilawm polh nawn uhi. A zingchiang a hong hih tak in ka company ua sepaih om tengteng in hon kha ua, Ka sappa un le hon kah hial mai hi. Innlam ah sungte hilh loupi in ka hong kipan khia uhi. Tutung ka pai zaw nidang ka pai toh a kikhai petmah mai, ka paina teng lah amial a, hun leh ni kikheng mahleh kei adin hun leh nite kikheng ni tuang atung ngei himhim kei hi. Ka ngatna teng lah mial vek ahihman in kipahna himhim ka neikei hi. 

Nidang a flight a pai ngeilou hizen napi'n kei taksa bukkim louhna ziak in flight in innlam hon zotpihta uhi. Innlamte thuzak theilou ka hih man in kuaman le hong dawn kei ua, Lamka ka hong tung khongkhong uhi. Lawmte kiang ah hiaitan hong khata un chih utlua himahleng kei mibanglou adin ahaksata a, ka zotna di lampi nidang a ka haih ngeilouh, leh haihbut vuallouh di pi, keikia a kalsuan theilou ka hihtak man in kisuanlah nate ka selmang a, alampi ka hilh nana ah a hong paipih ta uhi. Inn tungta hon chi ua, kei le kipak lua ka hihman in, ka taiphei leh ka kelkong phukha buk in ka puksuk thuap a, innsung ah om te'n tua thawm ging azak tak un hong delhpah tetet ua, hon phot ua leh, atapa uh, si a ana koih uh, ahihlam hon mu suah ua, Lamdang sakawm pi in hong kap huphup ua, ken le tua aw gingte lam nga phei in ka khou a, ka lawmte ka sam lut a huchi in innsung ah ka hong lutta uhi. Ka lawmte thawm ging leh kah ging lou ngal bangmah zak dang ka nei kei. A tawp in hong dai thei khongkhong sam uhi.

Ahihhang in kipahna luankhi dai ni aneikei. Ka pa office a hong tung a, a scooter ging ka zak phet in kei apan ka lungphu hong hat mawk a, lau ka hi hia ahihkeh kipak lua ka hi hiam chih le ka theizou kei hial hi. Ka Pa hong lut lamtak ka gimtheih a. Himahleh aban zaw ka theikei. Pau lou in a om dedu ahimai. A tawp in hong naih phei hiaihiai a, ka kiang ah   tutna thawmging ka za a, Dingpu ka tapa aw bang dia na it Na pa na Nu leh na lawm leh vualte hong paisan na hiam chi in hong kap a, ken leng Pa aw hiai ah ka omta nata hi dia le chingzou nonlou. Na sakmel etlawm tak mai uh mu thei nonlou ka hi. Ka bukim louhna ziak in na tapa hitak le ka hi non kei. Pa aw hon ngaidam in. Chi in kou pata ki-angkawi in luankhi ka nul tuaktuak uhi. Ka sunglass hon lakkhiat sak a, ka mittui ka biang ah luangdia kisa lai hon nulsak a, bawi lam etna tawp khawk a i ding in le lametna hon pepa Pa Pathian kiang ah lam etna kiching om ahi. Bukim zou non kei mah leteh leng Ka ta Dingpu na hi lailai a na hi den dia, na hi tawntung ding hi. Na lawmte toh va k sil siang unla na zoh chiang un ann kuang kikhopna leh kipahthu genna nei in nuamtak in i nekhom di uh, hon chi a,  ken le lawmte sam in ka nu'n hong makaih a, huchinn ka kihahsiang uhi.

Ann ka nekzoh un ka lawmpa hong hoh a. Ka mit omlouh lam atheihlouh ziak in kisathei bang honsa hileh kilawm in hon eng pau duaiduai a ka nu'n le a bilbuk ah vahilhgu sausau in huaitak in theihsiamna laukha in pawl ahi ngeita dia hon houpih dan bang a tuam zot maimah hi. Ken le lawm piangsual kikhel lou ana chih uh zaw dik petmah eive maw ka chi namnam a, aman leh himah e, dam a na hong tun theih mahmah ka kipak zaw uh. Eh!! Ngut tak in Lunching ahon chih pat leh ka nu'n singpi ka hong awm di aw chi in inn neu lam hon zotsan vengveng hi. Ka lawmpa'n le Lunching te leng phai ah om uh eive, Apute inn pang bel a khosa liailiai uh ahi hon chi a. Ken le lawm a Number hon pemah dih, amah tellou a hinkhua zat bei mai ding zaw ka ki-awi kei. A bang a bang hitaleh mangpha bek ka khak ut ka chi a, ka lawmpa'n le aman tua na tung ah thusia azak nung phone tawi non hetlou a contact theih ding dan himhim theilou, hilehleng tu tuailai khawmpi chiang in hong tel di'n ka gingta, huai hunlem in na chang dia a hong tel kei hial leh lah ken ka theihtawp suah in ka hon zonkhiak sak di hon chih in ka lung bang a nuam a, mitduk himahleng ka itna na mit pen amial himhim kei hi. Pau ka kipak lotel lawmhoih neih man om e ka chi a, aman le nang chu lawm thuahsiam na hi Ding. Lawm na hau mahmah a, himahleh na lawmte na kinakpih lam himhim ka theikei hon chi a, ken le kihai phatphat dah le maw chi in ka chih khum a, Papau in Ding kon gen ut khat om hon chi a, bang ahia hon gen ve ka chih leh aman le hehna inle na na ngai zenzen kei dia, na na kingaihtuah ngetngut louh di ahi aw hon chi a, hichi in hong genta hi. Ding Lunching toh na kimuh nitak a tawp nipen a bang genkha na diam ah chih zaw ka theikei, Lunching nu'n a hong phone khonung a kei le amau innkiang lam ah nungak hel ka hihman in ka vapaiphei pah a, Lunching lungkham lua kisa in ana kithah sawm a, a damdawi neihteng uh ana bak beivek a, kou leng kin leh buang a Pa Khamte inn ka zotpih ua leh Pa Kham in damdawi inn ah hong puaktung pih a, Lunching khophawk lou a om hong lua(vomit) khethei vanglak in hamphat huaitak in hong harhsuah thei vanglak hi. 

Kon hilh di ka chi a kon phone dek leh Lunching nu'n sukbuai a ngaikei hon chih ziak in tutan a im ka hi. Nana theih maimai dia ka deih ahihman in bang le gen tuanlou in huchi in ana im mai in aw, hon chi a ken bel gen di dang le ka theituan kei. Momawi pen la kua a apasal ka chi a ?  Papau inle theih pih mahmah a khente'n nam sepaih ahi chipawl toh akhente'n lah bussinessman ahi chipawl toh apa te su lungkham maimai aka hia. Aw huchi dan ahi maw !  Momawi tongchiam anu leh pa'n suk pichin tum a pan nasatak alak uh hi a, tua a tongchiam bohsia eita ve maw ka chi nulnul sam hi. Poi mahmah kei maw Ding Lunching ka vazongkhe dia kon tonpih di aw hon chi a, ken le awle Pau nang kan a kon muan omlou ahi ka chih leh aman le eileh eigel kiteng suk maile eivele huchituk a hong muang na hih leh chi in nui kulhkulh a, ken le sehsuh teh hon hilh pah in aw na muh chikchik chi in ka phone nambat ka gelh khesak hi. Huchi in ahong paisan hi. Ka lawmte hong khate toh houlim in ka nui zaizai ua, Ka phone hong ging a kua e ka chih leh kahna aw suak hong pawt masapen hi. 

Ken le nang kua e? ka chih leh Ding na dam ka theih in ka lung a dam petmah hi. Kei na U ka hi hon chi a,  ken le Eh ! Ulal kap non ken tawp in Pathian panpihna zar a dam ka hi, noute non thumpih na ziak a hiai tan tungzou ka hi a ka kipak zaw. Ding ei kon panpih theihna lah omlou a maw, phone ah na thu kia zak ahimai a, himahleh galdou dia napai nung na aw le zak in a om non kei a haksa ka sa mahmah hi. Kou le suti ka neih remchang  chiang un ka hong paisuah di ua, ann nekkhawm na vengsung a inn chih a mi om teng toh i luikhom di uh aw hon chi a, ken le awle U hitham e ka chi a aman le gen di dang thei nonlou ahi dia mangpha kikhak in ka koih tuak uhi. Lup hun ahihtak toh lum din ka hong kisa ua ka hong lum vekta uhi. Zingkal thoh in ka lawmte pai din akisa kheukhou uh chih lam ka thei hi. Ken leng ahon kithuahpihna uh leh hiai tan dong hong khakna ziak un kipahthu gen in inn hon pawtsan uhi. 

Lawmte apai hial leh thomhau bang ka kisa a, ihmut louh ngal ka nasep theih omlou hi. Nitaklam khomui kuan in Papau hong diang lut thulthul a, Lunching a omna theikhia ahihdan hong hilh a, Imphal ah Mantripukhri achi uh hia huai lak ah teng uh ahi. Huai lak vel ah Lunching in dawr lianlou khat bawl in khosa uh chih thu ka za a, ken amun chiah theikei mah leng Mantripukhri bel ka theichiang lua a azon khiak dingdan a om di hon chi a. Kei le kipak lotel hizen napi'n ka hong nehnou a, lawm kei  Lunching in hon mu leh bang ngaihdan hon nei dia. Kei lah ka taksa kim nonlou, Lunching mel etlawm takmai le muthei nonlou di hing a, kei zaw ka ut non dah mai di ka chi leh, Papau in eh! Huchih louh ding, itna mitdel ahihlam thei nonlou na maw, ama sang in hon it zaw di ahi. Lungkham ken i vahoh himhim ding a i tuahtuah i tuak khom na ding chi in hon khamuan a, hitham e nang mah na pilpen ka chi a, hon paisan guih mawk zel hi. Va khouh ding lah hi ka sa kei deuh a, thomhau ka kisak man a mi hih ding neilai bang le hikha maithei ahihman in ka khou nuam sekei hi. 

Ni chiam hong tung petmah ta a, ken le sungte kiang ah Lunching vazong di ka hih dan ka gen leh hon phal kei ua, Papau toh di ka hi ka chih leh hon phal vanglak uhi. Himahleh ka pa dawnna ka zaklouh man in nuam bang ka sa kei zozen thepthup hi. Papau leng hong paita ahihman in ka pa'n hon sam a na bahara ding chi in teng 1000 hon vomsak tittet hi. Bus ah ka hong tuangtei ua, ka lawmpa kiang bang ah Hon muleh hon deihlai diam, pasal ana neikhin khong hileh bang i chi dia ?  chi in dot theih dot moh teng ka dong a. Aman na ap huai ka ihmu di hon  chihsan a, huai nung kei leng ka dai vengveng hi. Ka mit hong thak loguih in ka nuainuai leh a si hong pawt a, Papau in bandage in hon tuamsak a, hon hehsan sim in pau vavalh hi. Thak lolai mahleh kisuanlah na a pumdim ka hihman in haksa pipi in Imphal ka hong tung khongkhong uhi. Paina ding dang tuan theilou ka hih man un RIMS ka vanaih ua ka mit ensak ding in, Doctor a omlouh man in ka ngak bawlzek uhi. Doctor hong paitak in ka lutpah ngal ua, eimi ahihziak in nuamtuan mahmah hi in ka thei a, ka ki check up zoh in ka lawmpa kiang ah bangbang hiam gen nulnul in Papau le hong pawtkhia a, Lunching te omna lam Mantripukhri lam naih din ka hong kisa nawn leuleu uhi. Mantripukhri ka tun un bel nikai muh ding a om non kei, himahleh dawr bel a kikhak naituan samkei hi. Dakkal 2 vel ding kilen tettat a ka hong zongzong nung un dawr khat ah khawl ding in ka hong kisa ua, amai ah ka vatut uleh.

Nidang a vengluite ana himai mah a, kou le Lunching te tenna dongkhia in ka hong pai ua, ka mit nuai hetlou khoih le khoih kha hetlou hinapi'n hong nat in hong na a, hon chip zozot mah bang hial in porompat lam ka naih daih ua, huai ah ka va ki-ensak non leuleu uhi. Doctor pa ana senior mahmah ta ahihziak in atheisiam pah a, damdawi khat hong kaplut a huai nung khua bangmah ka phok non kei, khua kon phawk in bel ka mittung lamteng tuam in ana om vek hi. Kha kim khong ahihtak in ka mit tuamnate hon phelsak ua. Lamdang tak in ka mit langkhat lam muhtheih na ka na nei mawk hi. 

Lamdang bang sa zawzen in, ka gei ka etchiang in nurse te leh doctor te chih louh muh ding dang ka nei kei a, mit langkhat hakthei ka hihman in ka kipak petmah a, gen di dang tuan le theilou in ka phone ka zon leh nurse te khat in damdawi hon kap non ngal hi. Huchia ka hong halhtak in bel ka nu leh ka pa banah ka ute leh ka lawmpa ana om ua, ka mitmah a mu ka hihman in ka kipak mahmah mai hi. Ka nu leh ka pa bang kah toh zen in ka bul ah hon tusuk ua, bangchi uh na hichi kah hot-hot tel ua, thou un non sukhasia uh chi in ka kaithou tuak a, Papau in hospital sung fang kual ding in hon zon a, ken le nial lou in ka vafanpih a, operation theater ah hong tutpih nilouh a, ken le Pau bangchi paita le eivele Lunching i vazongkhe di ka chi a, Papau in le Ding hiai ah om ni hon chi a, ken le Paini hiai mi operation na kiang ah bangmah hih ding omkei ka chi a.

Dingpu aw hichi dan ahi. Hiai JN hospital ah na om in Lunching kei mah in ka va zong a ka vamu hi. Himahleh anu damlou a om ahihman in hong pawtkhe theikei a, Nang omdan na dinmun ka gentak in hong kapkhia a, anu bang le kipak lua in hong thou khia hi. Ka gen non a, na kimlouh dan khong ka gentak in a nehnou na hong uang sem in na omna bang hon dong thithe maimah hi. Ken le ka hilh a, ani non in hong hoh a, nanga dia ginom ahihdan hong hilh a Huai a ginom nate a suahkhiat na ding in a mit khatlam kiphal takin hon peta, tua na mit muhtheih na omsun pen Na it mahmah Lunching mit ziak ke leu ahi chih haih ken tun ah amah operation in a omlel a, huai i ngak ding hon chih in ka dip a kisai dokdok mai, bangmah le ka ngaihtuah non kei. Ka lawmpa ka en alah amah hih khelh ahikei a, kei ziak ngen a Ka itpen in thuakthuak ahi chih ka thei a, kei adia hong hihsakte thupi ka sa a, sum leh pai a din ding hileng ka dinzou ngeikei ding hi. Dakkal 2 bang ka ngak nung un kei adan in alu teng a kituam belbual a, huaitak in a room ah ka lut uhi. Sawtlou nung in Lunching nu ahong tung a, kisuanlah na ngen in ka pumdim hi.

A nu'n bel bangmah a gen kei hon en a, a tanu kiang lam anaih pheipah hi. Ka pate leng hong tung phei pah ua, nidang a kou zanzan sa leh innsung a kep dia adeih louhsa Lunching amuh un a hehpih mahmah uhi. Hihtheih dang om tuan samlou ahihman in Lunching lupna gei ah a khanloh ngak in ka ding kheukhou uhi. A nu'n hong samkhia a, kei le ka vapai a, canteen ah singpi dawn kawm in Lunching thu hon gen a. Kei a dia sihtanpha a pang ahihdan leh Ka TONGCHIAM uh suk tangtun sawm teitei a ana hing hamham ahihdan khong hon gen a. Hon itlua leh hon ngailua ahihman in tun zaw taisan non ken aw,  Ding hon chi hi. Ken le Nu Buang keile ka heina peuh ah Lunching loungal ka ngaihtuah kei a, tua leng Lunching mu dia Papau toh hong zin ka hi uh. Ka taksa kim nonlou ahihman in amah adi'n ching nonlou dan in ka ngaihsun a, himahleh tua kei adia siit neilou leh it neilou a aneihsa hon kikoppih nate apan hon itlai leh kei lou dang kuamah neilou ahihdan ka theih in thupi ka sa hi. Ahihtheih leh a hong damsiang chiang in i vek un i paikhawm di ua innkuan khat bang in i khosa khom di uh aw , ka chi hi. Lunching nu le kipak lopetmah ahihman in singpi bang sa sim lai nangon hon valh gopgop maimah hi.

Tuzan bel ka vek ua giakthei dia phalna ngah le ung zaw giak ut vek ka hi ua, mi nih kia in a giahpih theih ziak in ka nu leh Nu buang in a giahpih  uhi. Koubel hotel ah ka giak ua, ka pa'n gennop nei hi awmtak in hon en-en a himahleh bangmah hon genkei a ka ihmu uhi. Zingkhua hong vakte bang ka muhtheih non man in ka kipak petmah hi. Hospital lam ah ka kithrit suk non nainai ua, Lunching hong halh khiak kal ka ngak nilouh uhi. Nitaklam hong hih kuan in Lunching le hong halh khedeuh a, sungte'n chance hon pia uh hi awmtak in hon paikhiaksan dupdup uhi. Ken leng Lunching khut ka len a, Nau non itna thupi ka sa lua. Na thuak nate ka na thei a, na dohzoh nate ka na thei a lamdang bang kon sa zawzen hi. Hichibang a ittu ding khovel ah zong leng le mu non din ka kigingta kei. Kei adia hon siamsak Pathian bang ka phokloh hial hi. I maw nau.... Uding bang dang gen a ngai non kei, hon kawi in na ang lum ka ngai hon chi a ka hong kikawi uhi. Huchih hun laitak in ehem !! Hong kichi guih a, ken le ka etphei leh Doctor te Lunching mit phel dia hong kuan uh ana hi hi. Sungte leng hong lut ua, amit hon phelzoh un Lunching in ka pa amuh leh lausim hi awmtak in anu bang asam phei hi. Ka pa'n le Lunching nu sam in 'Nu Buang hon ngaidam in' chi in hong kap a, Ahihtheih lai ding leh Nata nu Kouta bang in ka enkol thei di' uam ? hon chi a. Nu Buang in leng hithei tham e chiklai peuh a nou adia phal ka hi. Hon chih in khitui nullou ka om kei uh. Nurse te bang in misi omsa in hong delh ua, koule ka na nui zak uhi.

2 years later

Sonlian na nau koi ah om ahia, vasam kin oh na Nu haan toh na Pa haan i vapha di uh aw........

~~~~~~~~Beita~~~~~~~~

Writer's Note : Hiai tangthu phuahtawm liklek ahih hi. Tangthu sung a min kizang kibatpih nei a om lehleng phuahtawm petmah ahi chi in ana thei mai un. Huai banah ah haha tangthu zop louh a omlai a hon hasuante zom dia hon phutphut te noute ziak a hiai kigelh kim thei hamham ahi chih bat non leuleu un aw. Kipahhuai mahmah zel ei hagagaga.. And the one who suggested this story oiha oiha....Kipak ing e lawm leh vual U leh nau te aw Lungdam.

©Siamsinna leh Vakiangbu