THE ADVENTURES OF PUARPENG

By ~ Rex Peapy Tangpua
A fon, aktui dop a a dop, huihmut di nangawn leng a phallouh, Nokia Torchlight series hong ging lengleng a, a neihna a sawt tak man a lui gawp, rubber band a neihlouh ziaka khauvom a a khih, suke kha le a balance Rs. 5 ki cut thei leh kilawm hial a mai poppop a, nungak in houpih dek ahihkhak leh chi in a aw flat hinapi Gkey toh kituak geih di vel in "Hello" chi'n a dawng hi.

Mel-et in zaw "Lawm a na hia?" chia a mai zuut saklouh di'n a pammaih hial a, Zawlnei Isai in, '....kilawmna leh hoihna himhim a neikei' a chihpen amah gen ut ahimai diam a chihtheih hi. Lampai kawm a lem leh lemlouh enlou a napniit zialzial a chiing mahmah zomah a, amah toh kiphuloupi tobou a neilian a, a vatawt-pai kaihkaih zel hi.

Inspector Suktuahthang in fon lehlam apat in, "Detective Puarpeng, Thepthup Veng ah nungak 1 a si a chi ua, tu mahmah in va pai inla a sihdan va suichiang in" chi in a gen phuphu hi. "Good, summuhna'ng om ei" chia kingaihtuah in kithalawp tak in Puarpeng hong kisa vitvit a, misi inn a singpi ana hawmkhak ualeh chi in a mehpih di Double roti a sakhau a kuah in a pawtkhia hi.

A mun a va zong mupah a, innkong ah YPA te ana phe souhsouh uh a muhchiang in a 'nungak-hah' simpah a, melhoih deuh bang a muhchiah a kom kuva haina a ha san sesu leh a zingthou lupna a a kiak a a tatkhiak a hatu kimlou dawk zen in a nuihsan pah zomah hi. A nasep di leh a kuan-san mangngilh kha zen in a numei muhphot lah paak huan a laampih dan in ana hisap manlang zomah hi.

Innsung a valut in nungaknou' nu-le-pa va huituam in a tanu uh a min, kum, a sihna ziak leh a sihma deuh a thiltungte nounel tak in a va kan a, a gen bangbang uh a gelhlouhbu, khintung peuh a a koihkoih ziak a san ngetngut ah a gelhkhe sipsip a, a singpi piak uleh a sang kuah meh in kisuanglah hetlou in a ne niauniau a, kilkhat a naupang lah a nu kianga, "Nu, huaipa maiphaw dandan ka deih, hon leisak oh" chi in ana kiphin nilouh zomah hi. A nu-le-pa khamuan in a thilsui lohching pah dia kilam-en kawm tak in a paisan hi.

Inn a tunphet in a thilsui khiak bangbang gelhkhia in Inspector Suktuahthang kianga va pe di'n hong kithawi a, nungak pen a min Thelhvung, kum 16 ahihdan leh santen a si ahihdan bang, a sihma kaal a theihai hah nek lokha ahi chih khawng teng report kal a ngaklah mahmah a, dunlop tung a kitawm bang mai in a lampai bang a zangkhai theuhtheuh hi.

"Inspector pa om hia?"
"Ii, omlou. Bang di a?"
"Koi a hoh a? Hongpai dekta diam?"
"Huai ah Thepthup veng ah nungak 1 mi rape lup a om a, huai va enkhe dia kuan hiveh, huai veng mah a a lawmpa tanu nungaknou le santen in a si a chi ua, hon gaal malam hinteh, hong lut ve"
"Aaa.... Kana pai phot mai di aw"
©Siamsinna leh Vakiangbu

Comments

Post a Comment

Popular posts from this blog

PATHAWI HIMAHLENG!!

~Kattie Mawite Ka ngaihnou ka ngaisang top. Ka dinmun uh kikheng hileh ama lungsim bang ka put zoh ka gingta kei. Iitna tak toh hon iit hi in kathei a, kenleng ka it petmah. Keilam apan ngiat a hon neikei a, apasal ka hihtheihna din CONDITION bangmah hon bawlsak kei. Tulai in hihna kibang(homosexual) kingai tampi om mahleh, kei ngaihnou bel NUMEI ahi. A hon itna thupi kasa. Ka phulouh iitna tang hi in ka kithei a, ka kipak petmah. Himahleh alangkhat ah ka kisuanglah zel. Ka kingaihsiat theihna di leh ka lungsim hon kam gegu di kampau chikmah in hon zatkhum ngeikei a, milak ah leng a hon zahpih kei. Kei ziaka nuam asaklouhni leng atam din ka gingta. Himahleh kei kianga a om chiangin maitai tak in hon houpih a, huai in a ngaihhuaina nakpi in a behlap hi. Ka ngaihnoute bel innkuan nuamsa ahi uh. Apa Evangelist teacher pension ahi a, a upa'n leng apa sulnung zui in Evangelist teacher mah a sem hi. Amah tuh college kailai ahi a, anau pasal nihte bel high school kailai ahi
Read more

PALLAI NITE

~Lian Khuptong Alamdang Pathian Itna' 'khovel nopsakna leh gentheihna tepanin Tuun sungkhatpan mimbang ka hong khangkhia hi. Deihthoh takmai leh iitakmai'n keple huihmut dingnah tomphallou in ka omhi. Kep leh etkolna nuaia kasenchiil panin kapiching dong in, duattak leh deihthoh takin kep kana hi. Sianhuaina toh hucihin ka hongkhang lianzela khovel tak palding in kongkisa ta hi. Mite kitaiteh nalak ah ka taisam hi. Hinkhua gintaksa anaa nuamchiam kei alai hawlpawl in lakloh takin ka omhi. Pallai amm'n nuamleen tuh ka hinkhua aka nopsak ahih hi. Maban etna'n kalsuan touzelin ahak-anuam phutkhak dandan in kahong phuh hi. Huaihang in hinkhua zatdan ka etchiang in lungkhamna leh mangbatna ten nisim'n hongtuam tawntung hi. Ahakdan pengen siamvual ahih keihial hi.  Huchitazong in taikhua tuh hongvak zelsam a lametna thak honguan zel hi. Naa khatpeuh zoh kuhkalna leh thuakhaatna lou toh pangtakpi mah ngai hi. Khovel zoh omvengvung kitaiteh nalah
Read more

NATNA LAUHUAI COVID APAN PIANTHAKNA

 By  ~ Paumuanlal Guite BaBs Chikmah a zak ngeilouh, lungsim tawng a leng gelphak ngeilouh COVID 19 in khovel pumpi hong sawiliing ta hi. It leh ngaihte toh tui leh nga bang bualkhawmna, a sakminthang Lamka khopi leng natna in hong hawi tuankei. Niteng in a vei a pung hulhul chih kuapeuh in thei, himahleh gamsung vaihawm solkalte’n hiai natna apan i suahtak theihna ding ua hon thupiak uh Policete mat utlouhna ziak lel in i zui hamham chiat uhi. Huai bangle Policete galmuh chiang khawng a zui hamhamte i hilai uhi. A tamzawte bang in a omna mun uh i pel chetchet zomah uh, lamka chihmah a ka tuamtuam tam i theitel ua. Siamsinna innte, nasepna buuk tuamtuamte kikhak zungzung a, i biakna munte tan leng kikhak hial in inn a kuapeuh kikhum chiat ding i chih lai un kholai a hih ding poimoh nei a pungdiak a bang maimah hi. I natna minthang ziak ua mual honna liamsan niteng in zak ahigige mai. It tak in a luangbul ah kap zoizoi ut mahlehang mangmat phak ahinawnkei, silhpuan piandang toh kithua
Read more