TOUPA, KA TATE THUMANGLOU NASAKLEH NANG HONGZEP MAI IN...

By ~ Gin Muanlal

Denchin a Pu V L Mangzou laigelh "Singngat Special. Ka Gelh Utlouhte Ngen! kasim leh thumapi dan a midang thugen nalhdeuh ki qoute zel ahihdan kasimkha a amanle huchia hih hiven chia hitei ringot hituanlou in simtute curiousity a suklet a asim utkhak uleh chih hisim napi a genkhiak hialding utloupi himahleng amah leh midangte a copy honsa a omkhak ding lau in kahon kigenkhe mai hi. Agelh kisiamlou ahihchia a Title bek ahihdeuh rehrah a a thubul in mi a hiipkeileh simtuding omlou khading ahihman in copy nachih uh lehleeng poi kasakei.. Keisang a siamlou zaw copy hilou a ina idol guuk mahmah laigelh nehsohlua copy hihchuh maban sawnna hiven maw...

Pathian thu hatleh Bible thu tamthei kahi hetkei a himahleh midangte Pathian bang bia hilou Pathian hing bia hihna ah Pathian ah ngaihtuahna tamkhop kiseng zelsam hi. Ahihziak in Bible thu thei lumlet a pilna thupitak nei a ka kikoih sang in thukpi theilou a kaginna a Pathian ka muan kei a ding in hoih kasa zaw hi. A hatkhumtu Pathian in a hatkhummsa Bible a thute ahilh chetna koimah a bawllou ahihziak in khovel pilna a hilhchetna adik vekdiam chihbang lauh huai kanasak ton atam hi. Huailam thu ah kaginna neulua leng ahikha ding himahleh mahni ngaihtuahna chimtak a ngaihtuah khiatzoh louhding Pathian in Bible pansan a thu honpiak ding gintak huailou bang zel hi. Huchia mipil misiam tungtuante lou in a hilhchet theihlouh leh a gen atheihlouh hialding a thu kiselgu Pathian in honpia hilezaw mimawl leh bangmah theiloute a ding a gelh hilou ding hi a....huchi hiding inlah Pathian in pilna siamna neite leh khovel pilna a niamchik hite hon khentuamlou zel a... Khentuam neilou Pathian in a pil leh a mawl akhentuam kei a itna kibang in ahon it a hehpihna kibang in a honhehpih hi. Hiaikhawng igenziak in Bible hilhchiante hilhchetna i gingta kei chihna hilou in amaute hilhchetna ngailou a itheihsiam a i ginna ikihihkip nading leh ihinkhua Amah a ihihkhauhna ding Bible ah a om ichihna hizaw hi. Atheihsiam haksate ahbel mipil kiphamoh mah hi..ahihziak in mipil ahihziak ua Pathian in agentuppen izonsang a amaute hilhchetna a ikingak in Pathian apan a iginna heikhekha ihihkhak ding kivengni.

Pathian in Amah ibiak ziak a eihon it tungtuan ding a kikoih abaihlam mahmah hi. I kim i kiang a Pathianthu awilou ichihte toh i kiteh kaakchiang in ei amah bete hon itzawk louh theihlouh abang hi. En zing leh nitak a amahbia a athum hang a, Amah phatna lasa a bia hang a, Agam Nnasep nading a ihihtheih zahzah pia hang a, khovel noptaalna tuamtuam a utlou hilou napi Amah thuzuihziak a kidek teitei a noptal ngamlou hang a... chihte i ngaihtuah chiang in hon it zawklouh theihlouh mahbang hi. Ahihziak in amah batpih a Ei ahon siamtuam hilou a mitengteng amah batpih a siam a Amah taisan a khalam hinkhua a sikhin vek ihihnung a Atapa a hontat khiakte ihihvek ziak in A ITNA, ei amah beten tam itantuan ding uh ken kagingta kei hi. Amah ibiakziak a mihoihtuan leeng ihikei zawmah uhi. Mihoih man a a Itna tangzou ding hilehang Amah bete tata a Itna tangzoulou dingte ihikha mohkei ding hi. Himahleh a hehpihna a kiningchin ziak in imihoih louhnate kitheih mohbawl a hoih a ahon muhziak a bezom touthei zel ihi un kagingta hi. Sahkhua dang zuite thupi isa hetkei uhi. Kenleeng thupi in ka koihkei a nouleng nakoih keihial ding uhi. Thupi lou himhim leng ahi uhi. Kei leh nang thupi isaklouh koihkhia zual in midangkhat thupilouh sakdan enzual leng. Kumtamlou paita in Saptuam tuamtuam 4 a Makaite relief Aid toh kisai in munkhat a hohding in Rev 1, Pastor 1 leh Father 1 toh kakuan khawmkha uhi. Lampi gei ah Vaite Shiv Mandir lianlouchik khat a na om a huaikiang nai ah zuntha ding in kakhawlkha ua Pastorpa'n huai Shiv Mandir kawk kawm in "Hiai Mandir te kamuh chia zunthak khum utmai kahi" ahon chi a lawmten anuihsan ua keituh gending theilou in ka om hi. Kangaih tuahna ah gen uanglua kasa mahmah hi. Gindan kibang keimahleh ei Pathian hing bete melma leeng itding a thupiakte'n i melma hilou ginna tuamneite ihuat mawkpen hihdik hiding idiam? Ei hon ittu in hawlou a it mahmah a enbang dia hawmawk ding...? Atheihlouh ziak ua hiaikhawng bia a tangtawn gawtna a paiding chih ingaihtuahna ah koihleng hehpih huai mahmah uhi. Ka Biak inn uah zudawnmi khat zi adawn chiang anungvual a tu zel khat in zu a dawnlouh chiang a khuangpu khawng apan ut mahmah khat a om hi. Huchia a hong om chiang in iplah huai sakton a tam a ahihziak in mihing mit leh ngaihtuahna a enlou a khalam a ingaihtuah chiang in akhelhna ziak itpa'n kei khiallua a kikoihlou sang a Pathian in itzaw ahihdan mikhialte zong a hondam nuam Pathian ahihna ah ka mu hi. Ken zu kadawn kei a saptuam ah dinmun kanei a omdan ale khelhna kichi hih utlou kahihziak in ka kingaihtuahna bang a hoih kahih intuh keisang in zudawnpa, khamtheih hihpa,milip bete Pathian in it zaw ding ana himai mah hi. Himahleh kei kimuhdan leh mite hon muhdan Pathian muhdan hilou a i hoihna te leng belpuansia banglel ahihna ah Ahon itdan kibang hong hizel a Pathian itna thupi dan kilang zel hi.

Nidang in Lamka ah Vaite Mandir kilam ding dalna leh kiphinna tuamtuam ah a kiphinte lak ah skul naupangte kitel kha zel hi. Vaite Mandir hong omding a i khristian hihna zahlakna thupi tak hong hiding leh Pathian mah inleeng Amah bete ngen tenna mun a Pathian dang Biakbuuk hong omding zadah lawding a hon gawtding bang a ngaihtuah in kipawna thei mahmah hi. Haitung vum ah huailam thu genkha peuh in "Vai biak inn hong omding a i tu itaten christian biakna taisan a huai Vai biakna hongzui ding ahi" chih khawng kiza mun mahmah hi. Huat leng huathuai tak chuh ahina a Vaite Mandir khat hong omziak a khelhna hongpung ding anahihlouh dan ka khonung ngaihtuah thak hi. Vai mandir khat hong omziak a i tu itate christian hihna apan apial khiakding ilauh uhtuh i christian hinkhua kibulh phuhdan a na detdou hetlou hikha ding hi. Huai ban ah khamang thang man a Vaigam a ikuan a Biakbuk ineihtheih bang a amauleng biakbuuk a neih uh ipuak siam na poimoh hi. A mau melma te itding a thupiak hiloute'n a sabiak uh vakhensak hang a amaulak a i biakbuuk i lamtheih leh ei amaute ittu dia thupiak te lak a lamsaklouh chihpen i zuihpa thupiak toh kituak hikei leh kilawm kasa hi. Ilak a Pathian dang honglut in ikoih ua tanglai Isrealte kiang a namdang pathian koihkhiat a alak ua lutsaklouh ding thupiak toh bel a kituak a, himahleh Isrealte bang a kihuituam a gamkhat a kivaihawm ihihlouhna ah ei a ding in "na lak ua pathian dang" chihpen "nalung sim ua pathian dang" chihna hithei lel hiphot lou hia maw. Vai mandir Lamka a a om zahlaakna ahi masa kei a ei christian ngen omna leh teenkhawmna a gindan tuam nei mi honglutte Christian hinkhua zangding a ina pizohlouh zahlaakna himasa hi.

Kangaihtuah khak chiang in Pathian ikoihdan theihsiam hak kasa hi. Midang genlou in keimah hinkhua ah Pathian bang chi koih a bangtan dia koih kade aw chih ka kingaihtuah khezou kei hi. Akhenchiang a Van (comodities) banglel a kadeih na munmun leh kadeih hunhun a zattheih bang a kakoih khak hun atam hi. Pathian lauhsang in a thilsiamte kilau zaw khanak hi. Zanzek a Cyclone Mahasen ilau chiat ua khenkhat te chiamnuih bawl khawng mulkimhuaisa in abawltu Pathian thangpaihsak khak ding lau i omtham hi. Khenkhat te'n i omdan uh hoihlouh ziak a Pathian gawtna bang in ingai ua Pathian i suneu ua mihing hinkhua toh kibang a Pathian om sa ihidiam kana chisim hi. Bible thu katheihtam louhziak ahimai ding...himahleh thangpaihna ziak a Pathian in hon gawtding hileh hingdam in i omnawn keiding uhi. Tun athawm hongdai deuh a khenkhat te'n Pathian in ithumna uh hon dawnziak bang in igen nawn ua ahikei chipumlum kei mahlehang i biak Pathian, thangpai a gawtdia hong kisak nung a tawp mawkmawk Pathian ahikei hi. Pathian thuzoh pahpah theih a ikoih ziak a khelhna ngainep houh ihi hia leh..? Naupang lungsim pu a itatkhelh chia thangpai a hongawt dia kisapah a ibiak chia lungdam pah dan a Pathian koih ihihkhak ding kivel mahmah poimoh lua hi. Thumna ziak a Cyclone in honphalou ahikei chihna bel ahikei a hihleeng ahikha ding himahleh Pathian chihnop taksa a taalkaih sawm nilouh ihihkhak ding lauhziak a gentehna igen ahi.

Khelhding lau a kivenna dia Pathian in hon gawtding chia igengen khawng un ilungsim a Pathian hihna suneu ahimai diam chih ngaihtuah thamching hi. Pathian in hon gawt theimah chuh ahi a himahleh khelhna teng a gawtdia lungsim neu Pathian ahikei a, hihkhelh ziak a ngaihdam nget a kipak a hon ngaidam pahpah dia chihnop Pathian leeng ahisam kei hi. A thangpaihna ithuakta a a ngaihdamna leeng itabg khin hi. Hon gawtkei ding chihna hilou in gawtding lauhziak lel a Athu izuih lehzaw ikhalam hinkhua chiangkuang nailou ahikha ding... A gawtna sang in a hon itna ziak a i it thuk ahi Pathian lauhna. I Itluat lungtuahding kuapeuh ki ut a alungsimlou hihkhak ding kilau in i itluat maipha kizong hi. Pathian i itluat ahihmazaw lauhna in van gam ahontun keiding hi. Lohchinna deih a Pathian kiang ah panpihna ingen huaibel ei hihtheih baan ahihna ah hon panpih a hon lohchingsak hi. Lohchinna ingah tak in ithumna hon dawnziak in Pathian kiang ah kipahthu igen a Pathian kipak lawta dia koih in Pathian toh kal a innasep ding zouta in i kikoih hi. Ei kipah thugen in Pathian kipaksak zou taktak ding in adiam..? Amahzaw kam a kipahthu gen a lungkim Pathian hilou ding eive... A hon it luatziak in ikam a ipahtawi a kipahthu igen amah kinepna ahikei a, i omdan a ipahtawi a kinem a i lohchinna gahsuah in Amah apahtawi kineemlai Pathian ahi i Pathian uh...

Koulamte khat thumna hidan a kigen "Toupa, katate thumanglou nasak leh nang hongzep mai in" chihdan a volunteer/ushers dan a Pathian zat khak theih ana hi mawk ei.....guaite

©Siamsinna leh Vakiangbu