SIX ROUNDS
By ~ Khupding Ngaihte
Big B leh Dharamji-te'n Sholay film a a jean jacket uh silhkawm a
Amjat Khan leh a heute douna dia ana zat uh revolver-te genna hilou.
Boxing leh kimawlna dang khenkhat a a round gukna pen genna le
hituanlou. Khovel kipeipei a gukvei a kipei nachiang genna le hituan
samlou. I gennop pen ahihleh sana (clock) a a dakkal chiamtehna pen
gukvei a kipeikualh hunsung chiah ahi. Hiai hun bel Delhi leh innlam
kikal a train a khualzinte'n lamkal a a hunzat sung uh le ana hideuh
tangpi hi. Ken le tutung train a tuang a innlam kong paina a ka thiltuah
khenkhat hon kumnuam kana hi gige ve. 'Eimi' hihkhak a hamphat huailuat
na khat ana om hiveh aw.
Bangteng hileh a fellou deuh chihmahtak chu confirmed ticket le
neituan selou in train station lam manoh in kong kipankhe sukmai uh.
Hiai ni bel 19 May, 2013 Pathianni ahi. Saket metro station a kisutuah in
kou mithum railway station lam manoh in kong diangkhia ua, mi tam hun
laitak ahihziakin metro ah kong kinehtou petmah mai uh. A naak noplaw
khol hetkei! Chandni Chowk station ah vaite gimnam apat suahtaksak in ka
omthei vanglak ua, huchi'n kumkhia in railway station lam ah ka paiphei
pah uh. Lawmpa khatpen ticket ding kava latawm phingphing zomah lai ve
ua. Train ah lut dia kisa a, a bogey awng penpen khat ah lutgeih d chi a
ka zonzon nalam un Nagate ticket confirmed louh mah khat toh ka kimaikha
zawbawn lai uhi. Seat neilou ngen mi 4 tuangkhop sawm chu ka hi peuhmah
ta ve ua.
Nidang in bel khatvei keikia tuadan mah in kana paikha ngei
a,himahleh huai bel phalbi lai ahih banah sepaihte toh kava tuankhop
khak ziak in haksa lawmlawm lou hi. Tutung a pen chu mi 4 tak
hizomah,kei a zahkai pen a paimun pen dankhat a om nalai, ka lungsim ah
'tutung chu nuamsim ven' kachi lel hi. Train sung ah kong lutta petmah
ua,mun-awng omsun dailenbukte kal ah kong kihen pah tiikteek uhi. Amun a
uihlou khol hetkei a, a huchih kia le hilou in midang khawng le a omziak
un a awnglua ahikei lai. Seat tanglou chu hichih mai ngai mah ahi mai
hi. Vante a lem di dandan a kakoih liailuai khit un train bel hong taita
petmah a, kouteng le ki-entuah in, hahnuih le ung hu-uih tam diklut
luatkhak di lau hileh kilawmtak in ka nui viaivuai laitei uhi.
Train sawtlou hong tai nung in,kou toilet lam ate' innveng naipen a
compartment apat nupi khat leh tangval khat ka toilet uh zang di'n hong
pai uhi. North-east mel a pu ua, a pasal pen ka et leh train station a
kana muh Nepalite hi'nteh kana chih pa ahi. Himahleh hon paukhiat tak un
eipau, Lungthul kaihdeuh khat in kihou mawk uhi. Eimite ana hi uh
eivele! Lawmpa khat toh a kihou zek ua,huchi'n toilet a zatzoh un
lutnawn hiau uhi.
Ka lawmthak uh Nagate kachih pen ka luttung uapat phone a pau a ana
buai mahmah kachih leh a phone hon pephei mawk a,''Nou mite ahi,kihou
mah di uh'' hon chi hi. Kenle ka lasuk pah a, ka houpih leh eipau in hong
pau ngut a, amin khawng ka kan a eimi min mah zaw ana hi aka. Huchi'n a
tangvalpa hoihtak ana kem di'n hon ngen a, kenle lunghimoh loudia hilh in
huchi'n ka hunsak photmai uhi. Hichibang a namdang toh kingaih
chihkhawng a hithei lawtham eivele chihkhawng ka ngaihtuah a, Zomi nungak
khat toh a kingaihkhak ziakin ka lawmpa hampha kasa mahmah. Khawpi
khawng ah om a namdang tampi toh tengkhawm ihihna ah hichibangte omkei
hial lele i nam a ding mahmah inle zumhuai lehlam leh kilawm zawzen.
Mi'n deihhuai honsalou chihna himawk thei leh kilawm maw? Himahleh ei
ki-omlai buangsam a chih uthuai sim hi(xD). Huchia banglouteng ngaihtuah
a ka om laitak in den a eimite ka muhte un amau kiang a om di'n honsam
uhi.
Mi 4 tak kahih ziak un vapai di bang kisuanglah kahi di uam
ah,aihkeileh a fellou mawng kahi zaw di uam ah.. ka vante uh hon nawnlut
sak thutthut uleh kava panpihthei sam uhi. Amau bel mi 3 tuangkhawm ana
hi ua,a khawnung a ka theihthak dan in Nuhoih leh Pahaute nupa toh Ulian
kachih uh tangval khat ahi. Amau seat 4 a reserved uh ahi a, khatpen van
koihna di'n zang uhi. Adang 3 teng a khatchiat a nuamtak a ihmut theih
ding hisap a ana lak uh bel ahihtuak peuhmah.
Nuhoihte siamna ziak in piilut in ka omta ua,toilet kikal a ihmu
theilou zen a om liailuai di lai compartment sung ah kong lutta uhi. Ka
gei ua vaite khawng in hon eng tuak petmah phetsam uhi. Amau a mipihte
un khawtuah ut le uh le khawtuah senglou ding chih khawng ka ngaihtuah
a, i tawm liikliak le hamphathuai hi na e kachi lel hi. Himahleh kou mi 4
hilhial hon laklut ut himhim uh bel lam-et phaklouh ahi mai hi. Hiai
chiah ahi eimi hihkhak hamphathuai sese ka chih natak. Den a haksa
lawdia kana gintak teng tun chu hon manghiauta hi. Mi 3 seat ding mi 7
in kon luah tamai ve ua. Kou adia mun lemzaw hon bawlsak bel ahi peuhmah
ua,himahleh a siamluat ziak un amau tuandan lemlou pi khat suahloh hi.
Kisuanlah huai, lah kipahhuai law petmah himai! Nuhoih toh Pahau in seat
khat luah ua,kou adangteng a lem dandan a seat 2 ki-share in kong
ihmutou pah uhi.
Mualdawn apat chihdia lah hilou deuh in, UP zanggam kawm koihiam apat
zing ni hon suakkhia ahi ding a, khua hon lumnawn petmah ziak in khawlum
in hon phawng a ka thoukhe pah hi. Train hon taitai a, nitaklam hong
hinawnta hi. Nitak luphun hong hihtak lawmte a lem dandan in hon kilem
nawn siausiau ua, gimsim ahi ngei di ua hon ihmu sukpah uhi. Kei bel
ihmutlouh le khawksa lawmlawm lou ka hihziak in mi ihmut laitak hunlem
la in ka phone chalzing di'n kava paikhia hi. Ka kiknawn lam in nuhoihte
ihmutheilou ahi ding ua, ana thoukhia uhi. Kava tulut nawn a nuhoih toh
kon houlim uleh a gennop bang hon tam vanglak a, hiai hun a hon gente
khenkhat lungsim honkhoih mahmah a om ziak in i taklang nawn ding uh.
Nuhoih gendan in amau bel gamdang ah kum 33 hilhial bang ana khawsata
ua, apa uh sepna ziak in khawpi tuamtuam ah ana tengkual kha uhi. Innlam
aphak chiang ua leilam ngen tawn a ana pai uh ahihdan hon gen a, tua bel
Gujarat lam pekpek apat hong kipan a Delhi a train hon khek ahi uh.
Tuma a khatvei innlam zuan a hong paidan a genna ah, kou bangbang eimite
khat mah ana panpih khangei uh ahihdan hon gen leh Nuhoihte bel mi
maimai lou, hehpihna hautak leh a mipihte uh ngaina mahmah ahihdan uh
kithei mai hi. Kamsiam lua zaw ahikei na ua, a gamtatdan ua pat deihsakna
taktak nei a hon laklut uh ahihdan chiang mahmah hi. Ka mawk phatna le
ahi samkei. Ka lawmpa uh station a ticket latawm kachih pen in TT-te
hong pai ua sum 500 senlouh theihna mun a hon sen leh Nuhoih hong hehdek
zawzen hi. Chihbel a ticket lak general category a maimai ana hi
a, Nuhoih hehna ziak bel amau ticket khat aval a alak uh ana om gige
ahihziak ahi. Gen masa hileh sum sen ngai hetlou a kou naute ahi hon
chilel thei ding uh chihdan ahi. Muhtawm khat in hichituk a hon deihsak
theih tulai khovel, kineksiat guigui nalak a ding a thil lamdang mahmah
khat ahi mai hi. Mi theih a ngaihsang huailou pi a ana khawsa le ahithei
ua, himahleh kou adi'n bel amau kan a hon khawngaih omtuanlou kha ding
hi.
Aban a genzelna ah, huai mi khat ana panpih khakngei pen uh a
khawngaih huaidan gen hi. Amah pa bel tangval ahi a, Nuhoihte'n a
tuahkhak ni un bel lam-et bei leh mangbang kisa innlam paisawm ahihtuak
hi. Nuhoih in hon gensawn dan in amah pa bel innlam apat mi khat in
Delhi ah sepna zonsakthei ding chi a ana pii ahi a, himahleh a piitu pa'n
sawtlou a omkhawm nung ua mundang ah ana kisuansan ahi hi. Amah pa bel
Nuhoih gendan in mawltuak mahmah a, huai ni a le ticket bangmah nei selou
a train ah ana tuang mawk hihtuak hi. A mawlziak in kuamah bel i
simmawh tuankei a, Nuhoihte'n leng ana khawngaih mahmah zaw uhi. Singtang
taktak ah teng in, siamsinna lam a hamphatna i ngahtheih dite nasan
nekmangsak in om gige leng tua pa sang in kimawlzaw khamawh lou ding hi.
Hiai tungtang a lamdang kasak mahmah leh ka lung hon khoih mahmah nawn
bel eimite lak ah hichibang a sepna om chi kikhem a khawpi lam a kipii
mawkmawk chihkhawng ana om pentak ahi. Mi khat hinkhua suksiat dimdem a
sum tamlou muh nangawn khawk sazou nawnlou i hita mai di uam? Eimite
nasan hichi omta ihi umaw? Hehhuai mai veh EIMITEEE..!!
Huai nitak bel haksuak kahi mai ua, huchi'n zingkhua hong vaknawn in
sana leng hong kipeipei leh ngavei bang hon kipeisuak tak in Dimapur
kong tungthei ta uhi. Kong tunghak sim ziak un gari khatchauh ana om
a, zingni-thaini a hong omnawn pah ding, Manipur-te'n pumpelh haksa isak
mahmah BANDH kichi ka tunni ua ana omziak in bahara ana khang guih taget
hi. Kou leng zingkhua hong vak chiang hon kimatzawk deuh khakleh chi in
Dimapur ah kon giak ua, zingkal dak 6 le kim in Winger a tuang in kong
kipankheta uhi. Senapati kong tunlak un vuah hon tam petmah a, huih bang
hon hatsim leh Cyclone kilaptou a maimah maw chi'n ka pataudek phial mai
aka. Himahleh gari tung a ka vante un vuah a thuak uh chihlouh buaina
dang omlou innlum nuamtak ka hong tungthei uhi. Innlam ah chu..meltheih
tam petmah!!
(Beita)
©Siamsinna leh Vakiangbu
Comments
Post a Comment