NU...KAMDAM AWNEEM A NONHILH LAI NITE,SAPKIK THEIH HILE MAW

By~Gou Lian Lun Tonsing

Hiai pansan in tangthu i gelh di uh i vekpi ua pangkhawm in. 

Nu,na hon itdante ana theisiam hileng zaw ! Hiai hun in kei le ka lawmte mai ah ka mel amual kei ding a.Nang ngeileng na kipak in na lawm leh vualte, innsak, innkhang mai ah,maizum a om ding in kon gingta kei. 

Ka neulai a zaw na kipahna pipen hi ing a. Na hon duat a, ka senneu pih (na lawmte tate) lak a melsia, hatlou, ann duhlou leh damtheilou chihte ka tan di na hon phal kei himhim a. Melhoih, thahat, naupang fel leh thumang hikei mahlengle nang adi'n zaw, a felpen, a melhoihpen, thumangpen leh thahatpen ka na hi gige mai. 

Kumte hong bei liam zungzung in,na thakhek thei zouhial ding in ka taksa hong piching a,na kinepna (tanu,tapa) tuh ka hong hipeuh mahta.

Lai zilna lam ah class-12 ka hon zilpanta a,lawm ngaih laitak leh siat kipat hun laitak ahi a. Ka siat khak ding ka lungvei khak ding na lauhman in ka pawng pawt ding bang na hon phalkei sek hi. Hilele kei na tapa/tanu na iitna theisiamlou a di'n zaw nukhel,nu gilou leh mipawt di phallou chih min na tangsek. Himahleh na hon itluat man in leh lawmte ngai a,ka om vongvong di na hon phalkei zel a, Huaipen hun lemtaang a la in ka va uang lozel sek hi. 

Laisim dia aw neem tak a na hon sawl chiang in, honsawl kei le chin le ka sim na di,mi a kipatdek takleh chih toh nang sang a thei zaw, pilzaw leh thupi zaw bang in ka hon dawng laklak zel a. Annek hun chiang in "MEH" ziak in ka hon hankhum a, hilele na hon itziak in na hon hehsan kei a. A zingchiang in a liimzaw na hon bawl sak zel. Himahleh neih leh lam in chinlou ahih chiang in sawt a daih kei zel a. Kipilsak huntawk ka kisak leh (neih leh lam in chinlou ahihlam) ka theisiam kei zel a, ka hon haankhum zel hi. 

Nasem ding in na hon phalkei. Himahleh nabuai luat ziak in, ka meh huan, ka tuisuang ana enzual in na hon chikhia a. Huai hun in nidang a laisim ngeilou pa/nu'n laisim di tamlua ka enman kei di, ka veng man kei di chih kampau kon zat khumzel.Hun ka hau thei mahmah a, himahleh laisim na ding in ka hunte a tawm mahmah zel. Sintawpni nitak a hong tung a, pawt din ka hong kisa a, bawi pawtdah ve enle i hon ngai vele. Inn khong ah om mai ve na hon chikhe kiaukiau a (kisuanlah mel tak in). Khatvei kipawt dek sunsun a chi'n kon dawngtan zel (pawt gige lengle khatvei ahi thouthou).

Genthei tak leh haksa tak in na hinkhua kon na koih a, himahleh na itna kei a din a lamdang tuan kei. Nang sang mah in pilzaw, theizaw bang ka hi sek a, nang ngaihdan neuchik le genna hunman di na neikei. Na itna ka na theih siamlouh ziak in lawmte thu bang ka mang zaw a, a thu mah u leh a thugente uh ka gingta suk zel a, zuih bang ka thuah suk zel hi. Huchi pipi in hinkhua ka hon zangtou a,exam nang a nai deuhdeuh a, mite'n laisim a awlmoh lai un,ken zaw pawt bang, phone mek khong ka na awlmoh khanak sek hi. Buaina di a tam deuhdeuh sek a; busy doing nothing chih ahi pen mai. 

Bawi na lai hoih takin hon sim in, denchia na result uh hong suak dia kisik di na hi. Exam lai in hichisuk heh, khachisuk heh na chi na dia na lawmte'n hon pass le uh kisik law ding na hi.Hoihtak in hon sim in bawi , chi'n deihsakna toh na hon thuhilh lai in ka na mang kei a. 

Hunte a beiliam zel in exam ka hon panta ua, teklei bangphu mah ka hong bangta mai tuh aw, na awneem tak mai toh deihsakna toh na thugente ka bilkha'n a hong kilang duaiduai a, a hong ging chiaichiai a lah sapkik theih ahi nawn kei. Exam tuh ka hon zoukhe petmah ta ua, hihfuh luat a om kei threp mai. Huchi'n suty sawtkuam tak ka hon zatnung un result a hong suak kheta. Himahleh kuapeuh in i zak nuamlouh uleh i deih hetlouh uh laimai "FAIL" chih tuh kei result ahi mai. 

Lawmte kipaktak leh lungnuam tak in hiai hun a zang ua. Himahleh ken bel hiai hun kisiikna leh khitui nulna in ka zang tamai ve... Zingkhua a hong vak a, nang a di-na ngon a nuam hetlou leh genkhiak di na tawm a haksa thumal tuh na gen khiak a ngaita. Na tapa/tanu in a pass hia ? chi a innsak, innkhang lawm leh vual, tanau-laina te'n a hon dot chiang in nang na thumal gen zaw a tuam lua maw nu aw. 

"Nu..kamdam awneem a non thuhilh lai nite, sapkik theih hile maw" chi'n kisikna toh na awneem tak mai ka bil sung ah a hong suak khe nawn a. Ka kisik petmah a, ka mittuite'n ka lungkhamna, ka dahna a hon nem zou kei uh.Exam lai a ka na buaipih luat phone a diak a (facebook) bang, nungak/tangval te'n a hon hehnem ding in ka siang a hon zuanta kei uhi. Ka hun paisate samkik nuam leng le kei a di'n sulkik simthu alel kei uh. Second khatbek chileng le nang ding in ka hun uh a beita chi hi le uh kilawm tak in ahon ngaihsak kei ua. Damtui bang in a luangliam zungzung ta mai uhi. Ka tha neihtawp suah in, delh in, sam mah leng kei a din a zaktheihna uh a bingta.  (Hichi bang lungkhamna ka tuah chiang in le nu aw nang mah na hi hon hehnemtu leh ka hon belh masak pen. Na itna ka na theisiam kei naak ua hi ) 

 Writer's Note : Gelhkhelh omleh ngaihdam. Kei leng tel in tulai khangnoute omdan tangpi ahi. A huntak i na theisiam kei khanak ua lah i theih chiang un bangkim a kikhelta.

  

Beita

©Siamsinna leh Vakiangbu