NIDANG BANG HILEH

By ~ Ck Ngaihte

Thumasa: Hiai tangthu a min kizang te a min neitu phalna a kila ahi. :)

Ban ah, hiai tangthu a character te kua hiam genna hilou in phuah tawm ahi a, hucia ki batpih khak aneih leh, Ummmm!!!!..... Kibang kha himai eivoi! Thupi lou! :p

Hiai tangthu na sim ma in ki ngaihtuah himhim mah dih..

Vasa khat na deih na iit mahmah hang in amah mantang in, amah nop sak louh genlou in, amah ut leh deihtelna laksak in, sunkhua zankhua a nuamsalou a pek, an le tui duhlou a aom poisa lou in, a sih a hin poisa lou in, khum in na kem teitei diam?

Ahih kei leh, amah deih telna pia in, a ut bang bang a om thei ding, a deih tel thei ding, anop a tup bang a gamta thei ding, lungnuam tak leh zalen tak in na omsak zo diam?

Delhi khopi ah:

Zingkal dak 8 a hita a, Phone hong ging in Kyekym tuh nasem dia kuan dia a kisak laitak ahi a, lungsim kinoh tak a om, a khedap buh ding pen thei zok lou, a uniform nawt (ironed) louh a om, a kitchen sink a kuang sil louh dim, a bathroom a puan sop di te le a om ngei a om, a sam hiat man nailou, a manmoh selua, "bang pen hih masak di ahia?" cih khawng ngaihtuah a ding dedu thepthup, huai bangmah hih lou a om ahi cih aki theih khiat ciang a kinoh cih tak a kinoh zel, a toothbrush akam a om lam phone a pick up dek in a theipan phet hi.

Kum khat paisa in......

Zogam vangkhua ah:
Phalbi bei ding kuan ahita a, Sing-le-guate nahthak la dia kisa, louhing leh paakte vuah masa ngak a om in, gam tuh a keu mahmah mai a. Vasate leng zing nisuah tung chih louh ngal in thawm anei hetkei ua, huih lah nung lou in gam tuh a si bang in a dai dide mai hi. Luite lah atamzo kangta, a tui omna sunte leng a kan lam manoh ahita uhi. A sing-a gua, a zu-a va, a gam-a lei, a mi-a sa hita leh, banghiam ki taaksap luat khat nei hileh kilawm in a om uhi.
 

Nitum dingkuan lungzuan khikhe nuam in Kyekym tuh a verandah ua tu in, a mobile in laa hon ngai hi?..

Don't speak I can't believe,
This is here happening
Our situation isn't right
Get real, who you playing with
I never thought you'd be like this
You were supposed to be there by my side
When you say that you want me
I just don't believe it
You're always ready to give up
And never turn around
 

#But what if I need you baby
Would you even try to save me
Or would you find some lame excuse to never be true
What if I said I loved you
Would you be the one to run to
Or would you watch me walk away
Without a fight.......

Kyekym lungsim ah
ka u Muan hong pawt dia aw?.????
Message in ka dong mai dia aw?.??? Chih a hon ngaihtuah leh nidang bang hileh hiai bang a kingaihtuah chih om hetlou a, message akhak kei lele call khin tham di hi ing a chih hon thei khe thak a, a ngaihtuahna hong thuk lut in, a la ngaih leng za non manglou in ahong mitsi a.
Bang pentak diklou a?
Bang pentak kisam a?
Bang chi dinmun a om ka hia??
Hiai bang dotnate tamveipi mahmah a lungsim a aki khutdot chiang in leng a dawnna ding a theikhe zoukei hi. A chang in haihuai bang asa a, kei hah ngaihtuah luat ziak maimai hi a chi sek a, a lungsim akisual sak nilouh louh hi. Himahleh nidang bang nonlou lua ahih chiang in, banghiam adiklou, keilam ahihkei leh ka umuan lam ah om ahi chih hon muangmoh hi.
Kyekym aki ngaihtuah sek a??
Ka uMuan in zawldang sai hia?
Hon chimtaak hia?
Lungkiatna nei hia?
Hon iit taktak lou hia leh??
 

Nidang bang hileh hiaibang dotnate haihuai asa tham ding a, himahleh tu in bel bangmah a chian ngam nonkei hi. A lawmte hiam khong in hiaibang dotna hon bawl le uh bang kaci dawng dia aw chih khong angaihtuah hi.
A nidanglai hunte angaih tuah chiang in hiaibang a beidong leh tangkhat kisak hun ana neih ngeilouh dan a thei a, lungmuang leh kipak gige leh taaksap himhim neilou hileh kilawm a ana om ahih lam hon thei hi.
 

Tu in bel paak tui piak louh mah bang in a vul ning-niang hi.
 

Thupil in "tui manphat dan tui omlouhna ah akithei pan" a cih cu dik hina e a ci lungsim hi.
 

A hun in hon mualliam pih na inte aci sek a, himahleh ani-akha kivei tham ta ahihman in Kyekym tuh a lung a nuamthei nonkei hi. Himahleh a ngaihtuahna su buai mahmah tuh a umuan pen midang toh kingai hilou chih a chian mahmah zel hi. A mundang a pawt chih lah hilou, a facebook a lah nungak toh ki chat gige chih le hilou, mi theih ale kei toh kingai facebook profile ale - in a relationship, ci a ki om jejen ta ngal a.?
Kei phut jiak a hona accept maimai hia leh?
Huai tan hial zo aman le hon nial ngam lotel di hi a.....
A chihleh..
Bang hon iim a?......
Ka kianga gen ngamlouh nei hia?...
Hon ngai nonlou hia?...
Dotna dang dang aki dot sek hang in a dotna pipen mah hong tung kik zel hi.
Bangziaka nidang bang thei nonlou ahia?..................?
 

Kyekym leh Muamuan bel sawt kuam tak aki lawm thuah nung ua kingai ahi uhi. Khosak leh innkuan ki thei sa, lawm le vual le kikop thei khop a kinai ahi uhi. Kyekym pen a nautum ahi a, mi neizou lua hikei mah le uh Muamuan te sang in ana khosa thei zo dawm deuh uhi. Innkuan buchingtak ahih ban uah, a nu leh pate haatlai mahmah ahih ban uah sorkar nasem leng ahi uhi. Muamuan te pen ahih leh nektawm zong ahih ban uah inkuan liangvai taka pan ahi hi. Nidanglai dan a tagah te genthei leh simmoh chihte bel hi samkei lele, khosak haksa ahi den uhi.
 

Tulai dan bang mah in Kyekym leh Muamuan zong ki-iit ki-ngai himahle uh zawlthu chiiktak tak hiam, la pau chiiktak tak hiam toh ki houte ahikei uhi. Kichiam hiam, ai ki san hiam leng a neikei uhi.

Naupang kingai mah bang in akhen chiang in ki suheh, ki nuak chih khong in a om uhi. A omkhawm chiang diak diak bang un kingai leng abangkei uhi. Zankhat thu inleng tamvei pi mahmah heh toh nuih toh athuah den uhi. A theilou khenkhat in mu leh bel naupang tengta-kineih asak theih ding bang khop a kipawl thei ahi uhi. Nungak tangval, nuching-paching zet omdan ding in tuh haihuai abat hun bang atam thei mahmah hi?
 

"Kyekym!..... Kyekym ei..!!?" Chi a anu sap ging in a phawng zot a,
"Light paita ei.. Na puansop di"
Khua ana mial ta a, a mit hah chiang theihlouh ziaka amit hon nuai leh a khitui ana luang ahih lam hon thei khia a, kuahiam muh khak ding lau in hong ki nul a, hong ding khia hi. A puansop dingte ngaihtuah hetlou in hon kaikhom nialnial a, sana hon et leh dak sagih (7) bang ana peel khin tham ta hi.

Ki khasiatsak a, kah khiak mai a ut a, himahleh asungte theih khak ding a lauh manin Kyekym in leng anu kiangah "Nu, puansop nang ana en mai ve, ka ihmut suak, ka lum mai di" ci in ama room lam zuan in step ah akal tou ngal hi.
 

A lungsim in, ka umuan hong pawt di hileh hong tung dekta di eive.. achi a, kipahna khat aneih kawm kawm in a lungsim guk khat ah lauhthawnna hong om hi. Nidang bang hileh hiai thu kia leng zankhua a aki chiamnuihna ding uh hidi hia. chi in a hunlui uh ngaihtuahna ah hong lut non hi.
A mobile a laa ki play~
#if i needed u, would u come to me?
Would u come to me for ease my pain?
If u needed me, i.~
hon off a,

A inbox a message masapen leh nunungpen ki hal khiat dan hon en a, a uMuan leh amah kaal ah banghiam adiklou, a diknonlou, akim nonlou om ahi chih ahon muangmoh semsem hi.
 

Nidang a zo aniteng a message tamluat ziaka delete ngai gige zezen hi a, tua lah kha khat phial sunga le a inbox a message zakhat (100) leng omzou nailou.
 

Kha masa lam zek apan a kaal uh hong danglam pan ahi chih hon thei khe guih hi. Huai akipan ahi a, message lah kivang hiai hiai, call lah kivang hiai hiai. Aki hou, aki chat sun ciang ua le gen di thei zo sam omlou mah bang. Nidang a zan khovak a kihou thei a, a sun nitum a le ki message thei lai a, a nitak ciang a ki phone non zel. Hucituk a gen di kinei tuah den in tua gen di theilou cih pen lamdang asa mahmah hi.
 

Tun call leng bang ka gen di?. Huai hunlai te gen pih leng bang hon ci kup di? Cih khawng ngaihtuah kawm in Kyekym tuh a lupna tung aki dena ngal a, a hun paisa, a umuan toh nuamtaka a omkhawm lai te uh, kuamah englou a aomlai hun ngaihna in a khitui kham lou in hon luang sak ta hi.

Nidang bang hileh, a khitui leng hinai lou, a mai mial deuh hun hiam, a mood fuh louh ni deuh hiam chiang a, a umuan in phone tungtawn lel apan le a heh nep zoh dante angaihtuah a, a omkhawm hun chiang ua a kawi hiam, a pomkip chinchen hiam, a khut alet hiam lel a leng a lungmuan theih zel dante angaihtuah a, angai mahmah hi. Huchilou hun a, haihuai simpi khawng a aki khasiatsak hiam, aki bawl hiam, aki nuaksak hiam chiang a, a umuan in chiamnuih suah a, zumsak a, engbawl zezen a, a lungkham na, aki bawlna ziak nasan manghilh sak zoukhop a, ahehsak dek zezen lai khawng a ngaihtuah kik chiang in, akhitui a luang hang in a nuih lamlam bang a zaa zezen hi.
 

Kyekym in ka umuan in bang hon chih himhim chih a theihnop man khawng a aki bawl, aki ngeksak, aki phin himhim chiang a, a umuan in a uangzo sem hiam, a chiamnuih a piching lem kineih hiam khawng a abeih sek a, a nui utlpou pipi bang a nuihsak teitei theih dante khawng a ngaihtuah in, nuih toh kah peuh thuah in a lupna tung ah a om hi.
 

Hiaibang ngaihtuahna aneih a khat veina ahi hetkei hi. Hun in a mualliam pih a, angeina bang a aom non theih uh a lametna ziak in lungkiatna ding inle ala kei hi. A lawmnu Nenem kiang bang a agen khak ciang in, a lawmnu'n, "Huci om thei mah hi, hong hoih non pah na ding na hi uh" ci khawng a khamuan dia akinep lai in, a lawmnu"n frank deuh tak mai in, "hon ngai nonkei a eive" peuh a cih san zel hi. A lawmnu Nenem in bel a deihsak louh hi hetkei lele, Muamuan in kyekym a nawl khin ahi cih a muangmoh tinten ziak in, Kyekym in a dot khak ciang in iimlou hial in ana gen zel hi.

Himahleh, kyekym in bel gingta thei hetlou ahihman in, a lawmnu peuh a hehsan sek hi. Kyekym in bel lungkiatna ding in a koih hetkei a, hun in hon mualliam pih na inte cih aki nem chinten hi.
 

Himahleh, akinep louh dan tak in a umuan pen nidang bang hetlou in, ke hiai hiai, vul hiai hiai, thazoi, nung tolh di sa mah bang in ahong om deuh deuh hi.

Nidang bang hileh a lengla dangte ana lim bawlte bang, a umuan in "kua ahia?", "koi vengte?", "bang naci ki theih uh?" cih teng a theih chet ma cu dong thithe, kan khiak sawm teitei, cih bang in a om sek hi. Kyekym in a umuan pen possesive louh a sawm teitei hang in a lung nuam thei taktak lou ahi cih a theician mahmah hi. A khenciang bang in a gawt bawl a, bang cituk in hon ngai hiam cih a theih nop man in a lenglate khenkhat hiam, alawmte khenkhat hiam a hilh chet pah kei sek hi. Thil teng hong kikhek lamdang ta a, tulai in bel, lengla dang hong pawt leh aman nuam ana sa hileh kilawm in a om a, a mai bang vak deuh hileh kilawm phetlou in houlim bang le a ut deuh hi. Amah vuak bang a pawt khak ciang in, a hoh khak bang kisik hileh kilawm in a om a, gen di tasam ngeilou, mi pau tuh zou, mi sel zou den asak leh, tulai bel, mi dotna teng a dawng hamham hi. Kyekym in amah hitaleh a umuan hitaleh kipaktak a, bangmah dang ngaihtuah lou a anuih khak lam leng athei nonkei phial hi. Hicibang dinmun hong tung theihna ziak di uh a ngaihtuah sek a,....
"ki lawm polh lua kahi uhia?"
"ka zin ding ziak hia?"
"ka sungte ziak hia?"
"saptuam kibatlouh ziak hia?"
"dan a kiten sese ka ut ziak hia?"
"kei ziak hia?"
"hon enkhia hia?"
"bang ziak a?......"
hiai bang dotnate a umuan kiang a adot sa ahi a, a dawnna ngei "khemkhem, bangmah hikei, na ki hah ngaihtuah lua a hi" cih ahi den tangpi hi.

Hucilou inleng hiaibang dotnate dawnna amah mah inle athei hi.
Muamuan pen kyekym sungten a deihsak tham ua, a nautum tanu uh hucitel a kipaksak thei amah lou om ding inle akoih kei uh acih theih hi.
 

Kumkhat khawng aki ngaih tung un Kyekym in a umuan angaih luat ziakin leh, gamdang a laisim a zin a ut nonlouh ziak leh, a umuan kiang a om det a ut ziak in ana zuih som ngei tham hi. Himahleh, a umuan in maban khualna a poimoh ngaihpih banah biakinn a dan siangthou a kiteng a tup pi pen a koih dia ana hasuan mah ahi zel hi. A umuan in Saptuam kibang lou in bangmah gen nei in akoih kei a, dan a kiteng di hileng a nalh zawkna di ahi, ci khawng in ana kup pih zel hi. Laisim dia gamdang bang azin a, a kimuh kik non ciang un nuam asa semsem zel hi.

Kyekym aki ngaihtuah zel a, "Hucia hiaibang ka dotnate, ka ngaihtuah te ziak hilou ahih leh bang ziak hithei di ahia?....".
 

Dotna khat khit khat aki dong zel a, anidang hinkhua ngaihtuahna mah ah hong lut zel hi.
 

A khenchiang bang a, apawtna lam ua akhe abilh khak hiam, a khedap in a khe a het pol ziak hiam khawng a lampi pai haksa asak hun chiang a, a uMuan in zumhuai hetlou dia leh a uthuai pen di bang a angaihtuah sak zoh chiang a anung a apuak zel lai khawng a ngaihtuah a. a uMuan nung a kipua a, laa khawng asak theihlai khawng angaihtuah in lamdang asa zezen hi. a lungsim khat a bel piching zet huchi bang khawng a naupang om pen thil haihuai asak banah thil hithei nonlou dingmah ahi chih atheih hang in, hithei lai hileh chin a ut mahmah hi.
 

A hunlui ngaihtuahna apat hong halh khe guih a, Christmas ma deuh apan thil hong ki lamdang pan ahi chih hon theikhe guih a, lamdang bang asa zezen hi.
 

Kyekym toh Muamuan te'n Chrismas le kumthak nuamtak in hon zang khawm thei ua, Kyekym in leng program a bawl teng teng ban ah, a umuan in hoihtak a aki thuah pih ziak in nuam asa mahmah hi. Ama nopsak kia hilou in, a umuan kipak tak a om a muh non ziakin leng akipak diak hi. A buaina teng, a ngaihtuah teng bangmah lou mah ahi cih a gingta non hi. Himahleh kumthak hong hih toh kiton ton in a lungmuanna teng teng hong bei non hi. A umuan omdan nidang bang thei non tuanlou ahih man in Kyekym tuh a ngaihtuah sa teng mah ngaih tuah in hon nei non hi.
?Bangziaka?.....
?Bang ziaka hong hichi guih ahia?....

A zindek laia aki hounate uh bang a lungsim in hong lang dun dun hial hi.
Muamuan pen nektawm zong ahih ziak kia hilou in a fel mahmah ziak in miteng sawl to loi in apang hi. Akhen chiang in singtang lam a gari hek bang, van lei ding bang, sepaih kilak te hohpih ding bang, khopi lam ah mi damdoi inn hohpih bang, mi office vai a va hoh pih bang, mi sik le taang bang in alang alang ah akuan zel hi.

Kyekym in a umuan zin nunung pen hi a atheih kha masa zek ahi a, nidang bang lou tak a huai azin dek na pen agen ut hetlouh a lungsim ah hong dawk hi. Huai zan a aki hehsak dante a ngaih tuah a, ki hehsak a, dot khiat tei tei asom leh a Umuan in thudang daih genpih a, a hohna di lam mawng mawng angaih tuah phak louh dan tun athei pan hi. A umuan mi khem dan, mi pi kawi dan khat ahi a, Kyekym a heh sim ni, a dah ni, a khasiat dek ni khua a Muamuan in hicia a bawl dan mah ahih ziak in huai a zinna ziak pen ngaih tuah kha nonlou mah ana hi hi.

Huci a ki ngai se tak a aom lai in,
"Beep Beep" chi in a phone ah message hong lut a.
A u muan apat hi ngei ding cih a theih ziak in, kintak in a en pah a,
"Kyekym, ka hong pawt thei nonkei di....."
cih teng aki gelh hi.
Huai teng kia ki gelh himahleh gen tampi nei ahi cih athei hi. Aman leng kintak a reply mek in a message thuk di hon gelh dek leh agen nop pen di athei kei hi.
Bang ziak eita?
Bang ci e?
Bang a na gen?
Bang na cih na eita?".

A umuan in hiai bang agen theih pen aziak athei ut mahmah hang in, a lungsim khat in thei khin zel a, message a gelh teng delete thak hi. Phone thoh a som a, a ring apai ma in akoih kik zel a, a lungsim a buai mahmah hi.
Hicibang a bei mai ding cih angaih tuah ciang in apomsiam thei mahmah kei a, a kong khat a bel, a hong tung ding a thei thou hi. A umuan in thu hon iimlou in hon gen khia henla, kisel in, ki na in, ki hehsak zezen in om hizo leh cih a ut mahmah hi. Aziak bel hucibang a aki sel, aki nak ciang un, a tawpna ah ngaihdam ki ngen in, khitui luangzen in aki pomkik zel ua. A buaina teng uh a maisak kia lou in aki ngai sem sem zel uhi. Himahleh, tutung a umuan in bangmah mi thuk lou in a om a, Kyekym in asuk heh som a, agen-agen, aphil-aphil ciang in le neuchik le a dawng kik kei hi.

Huai ziak mah ahi Kyekym in hiaibang hun hong tun ding ana muanmoh kholh mawkna. Tun hong tangtung a, a gen ding theilou, a omding dan theilou, ihmut la suak hetlou in a lupna tung ah a lum a. Lamdang takin a gintak sang in a thuak nuam asa zo a, hong tangtun taktak ma akipan ana thuak ziak hidi'n a koih hi.

Nitak khua amial mahmah mai a, huih a hat sim ziakin Kyekym in le a tohlet te hon khak a, kawl phia in aki guihsak zezen a, van ging thupi tak zui in, a mi-a sa, asing-agua, agam-alei, azu-ava, keutak, vul tak halhsak, thaksak ding in vuah hong zu ta hi. Huci in kyekym leng a ngaihtuahna tampi toh, dip hawmtak a om in, a khuisat hut hut toh, khitui luang zut zut a om lai, a theihlouh kal in hong ihmu suk ta hi.

Ani-akha hong ki hal tou a, achang in lunglen thuak haksat luat ni om mah leh, Kyekym leng a lunggimna, a khasiatna leh a thuak teng teng, hun in awl in hon hih dam tou ngei a. Nung lam en kik lou in hong om thei pan pan hi.
Kyekym sawt kuamtak a lungsim hih buai mahmah khat bel, a umuan in
'ka hong pawt thei nawn kei di..' cih agen a, amah lam apat bang hiam kinem hia?
Aman phut teitei ana sawm louh ziak hia?
Neu kha bek pang bek lou, thuk kik lou a ana ki pekhe mai (surrender) kha hia?
Ken kei lam kia en a, amah lam ka ngaihsak zohlouh ziak hia?
Kei adia ka umuan kianga honna genpih zel di amah toh kinai lawm ka neihlouh ziak hia?

Kei deihtelna hon etkhiakna hia?
Kei thutanna hona ngak kha hia?
Ken ka theih chetlouh ziaka huai teng hon gen pen keimah lungsim suangtuahna keimah in gingta kha a, ana paisuak kha kahi hia?
A lungsim suangtuahna kia hilou ahi cih lah a chiang mahmah zel a.
Ka umuan in hon gen pen a ciamnuih dan in ana la in, ana thuk kik hileng bang ka ci dia aw?
Nuamtak in ka om khawm ta di uam?
Haksa sa kawm pi pi leh utlou sa sa in kikhek hon sawm ta hi. Bang citeng in sawm leng le mangngilh cih zo omkei na dia, bang teng hileh-a hi di di hong himai di ("que sera sera-whatever will be will be") ci in aki hatsak thak zel hi.

Huci in ni le kha hong beitou zel in, Kyekym leng a lai sinna maban sunzom in khopi lam ngen ah hong om ta hi. Innlam apai ut na ding tuan om nonlou ci in innlam leng a pai sawm teitei nonkei hi.
 

Tamvei pi mahmah Kyekym in a umuan a phone sawm sek a, a ring apai ma in akoih kik zel hi. A limlaak te uh phetlou in nidang a aki houlim na te uh, message aki khak te uh bang, akihouna te uh record ana bawlte bang angai kik ngam leng hilou, a delete ding lah hi sa deuh lou zel in a laptop ah folder khat ah akoih nilouh hi.
 

A houpih ngam ciah ngeilouh hang in kha bangzah sung hiam zo a phone a call log ah amasa ahi den sim hi. A houpih ut hang in a utlouh ziak leng a om thou hi. Hiaitan ki ngai a, kam a hoihtaka a ziak, asan, ki gen leng hilou, awl awl a ki khin khiak thoh.... Ci dan a angaihtuah ciang in, a umuan leng ho taktak zou di bang in a heh sek hi. Himahleh, a hun tam zo ah bel, kisiikna, lunglenna, a umuan thu theih utna in a dim zel hi.
Lungzuan man in laa khawng a ngai zel a, laa teng in amah sukha hileh kilawm in athei hi. Akhen in a su kipak a, a halh thak sak a, himahleh atam zo in a su thazoi zo sek hi.
 

Huci'n hun hong paitou a, ani, akha leh akum bang hong ki hei hial ta hi.

I've found peace of mind
i'm feeling good again
i'm on the other side
back among the living
Ain't no clouds in the sky
all my tears have been dried
and i can finally say
baby baby stay
stay right where u are
i like it this way
its good for my heart
i haven't felt like this
in God knows how long
i know everything's gonna be okay
if u just stay gone........
Delhi khopi ah:
A lungsim a nitak a paihak, a lawmte birthday party ava hoh poi sa khonung mahmah kawm in Phone a hon la a,..... a gintak hetlouh in innlam apat a lawmte khat ana hi a. Sawt pi tak houpih khalou ahih lam aki ze phawk a, zingkal hilou a nitak khawng hileh, mood fuh deuh hun hileh, hoih deuh a houpih ut gu sim mahmah kawm in a phone hon dawng a.
"Bang ci sim e nem? Non phone zen zen a,..... Ash! Nitak ciah ken kon phone zo diam? Ka kin lota...."
a cih leh a lawmnu'n
"Kyekym, Na umuan tu zingkal in asi, cancer sawt sim apan athuak hita, na theih himhim di'n hoih kasa a, kon gen him him eikha, ka man leh kava gal sawm cu hi a, nitak cia non houpih ut leh kikhop ka tawp hun di uh hisap lete mo.... Om nuam ole..." cih teng gen in a koih san ngal hi.
Kyekym le limlang mai ah tu in a umuan message nunung pen hon ngaih tuah khe guih a,
"Kyekym, ka hong pawt thei nonkei di..". 

Huai teng ahi mai....
 

A sam thazoi mel deuh mai a hiat in a tu a, zanitak sawt ahak luat ziakin a mai ah tangsiat om hia le ci in a hong ki en hoih thak a, bangmah amuh louh tak in, nidang bang mah in nasem ding in hong kuan khe ta hi.

©Siamsinna leh Vakiangbu