KA LAWMPA' LAITHON NANUNGPEN
By ~ Leon Guite
"Lian, thouta ve, na lawmpa'n hon paisanta eive..."
Chi'n ka nu'n ka lupna kiang ah kah aw sim in a hong gen hi. Lamdang satak in ka nu kiang ah, "Bangchi dan e? Zan nitak le ka room ah sawtpi kithuah ung a, damlouhna lah neilou hi a..! " ka chih leh ka nu'n, "a kikhailum ahi, a chi uh. A pa' a ding in laigelh nutsiat khat a nei achi ua, thou inla vahoh phei in." ahon chi hi. Kintak a thou khia in ka lawmpate' innlam zuan in ka diang khia hi.
Ka neupek ua pan kithuah leh kingaina tak ka hi ua, kikhen theilou khop hial a singlam-tuilam ah kithuah den ka hi uhi. Tua ahon beisan phut mawk pen lamdang ka sa mahmah mai a, ka hi miaimuai hi. A inn uh ka tun in mi tamsimtak ana om ua, parachute te kaipailh in tutnate ana lem khawm uhi. Kisuanglah zoulou leh kideek zoulou in menh phemphom kawm in innsung ah ka lut hi. Lupna tung ah ka lawmpa' luang damsa tanglou hial a lum zinzen in ana om a, a kiang ah apa leh a it mahmah Thangi in kap kawm in ana sam ek-ek uhi. Kei leng a kiang uah tusuk in ka lawmpa sam in ka kap ek a, himahleh, hon dawng ding in akam khatvei mah le akaa kei, hong pawt maw lawm chi a hon houpih ding leh hon en ding in amit khat vei mah leng ahak nawn kei. Naa ka sa mahmah mai a, bangziak a hiaibang teng na tung ah tung ahia? Chi'n ka lawmpa itlua in ka samsam a, himahleh, apa leh Thangi kah ging lou ngal zak ding bangmah dang a omkei hi.
A lai nutsiat thei ut in apa' kiang ah ka ngen a, aman leng a sakhau apan hon lakhia in ahon pia hi. Ken leng phel a ka simleh hiai bang in a kigelh hi :
" Pa aw, kei nata chinglou tak hon ngaidam in aw, na mai mungam ding ka hi nawnkei. Hehpihtak in hon ngaidam in aw.... Thangi kon ngailua, i tongchiam ka tangtunsak zohlouh ziak in hon ngaidam in aw..."
Lamdang ka sa mahmah mai a, bang hihkhial a, bang lunggimpih ahi dia aw? Chi'n ka ngaihtuah vungvung hi. Ka lawmpa lah mi sia hilou a, omdan hoihtak leh amaban ah Pathian nasemtu muanhuai hiding a kisakhol lah ahi ngal a...!
Lungsim nuamlou tak leh ittak kawm in ka lawmpa ka vuiliamta uhi. A pa kiang ah a ziak thei nuam in awl in ka dong khialkhial hi. Himahleh, a pa ngei in leng aziak ding a theizou kei hi. Thangi in lah a kal uah buaina bangmah omlou leh tunung sawtlou a kiteen sawm uh ahihdan ahon gen beh zawmah hi. Ken bel aziak om ding in ka gingta tinten a, aziak omlou a hiaibang thil haihuai hihlou ding ahihdan ka thei mahmah hi. Bangziak a ka lawmpa'n ahunlou a ahinna lamawk ahia ? Chih zon khiak ding tup in ka nei tinten hi.
Innlam zuan in ka pai a, ka room ah lut in ka lupna tung ah athal zawng in ka lum hi. Ka ngaihtuahna apaisau mahmah mai a, nidang pek apan a ka kithuahpih leh thu-le-la imguuk omlou hial a kihilh tuah gige hi ung a, bangziak a tua a sihpih ding khop a lungkhamna atuah pen hon hilh lou sese ahia ?
Ka neu ua pan in ka lawm Thangpu toh kithuah tou den ka hi ua, ka kingaina petmah uhi. Ka paina lamlam uah kizui in, kimawlna khwng bang ah pankhawm khak teitei ka sawm uhi. Skul khat ah kai khawm in, ka pawl uh leng a kibang a, skul kaitawp chiang in vasa beng khawng in ka kuan khawm zel uhi. Huchi'n kikhen zoulou ding khop in ka kal uah lawmta' itna chi kituh in, khat skul akai louh ni in akhat pen leng nileng in lungsim nuamlou tak leh thawmhau tak in ki om thei zel hi. Asih ma nitak in leng ka inn uah ahong hoh a, ka room ah sawtpi a hongtu hi. Kei lah sun a ka nasepna gimsim in ka lupna ah ka ki zampah a, Thangpu kiang ah, na ut leh games kimawl inla na ut tantan kimawl in aw, ka gimsim a, kong ihmu tawldam zual ding. Chi'n ka ihmut san hi. Imu suak kha ka hi ding a, a pailam ka theikei. Ka nu'n hon phawng in khua ka phawk pan a, himahleh houpih theih ding in ka lawmpa ana om nawn ta kei hi.
Huchia ka hunluite uh ngaihtuah a ka omlai in ka nu'n Thangi hong pawt ahih dan ahong hilh a, kei leng thou khia in common room ah Thangi hon ngakna mun ka zuan hi. Gen ding a vang petmah mai. Thangi ka en a, ka hehpih deuhdeuh mai hi. Amah lah a kahkah na a mit teng bawk thithiai a, gim meltak in a hon en liakliak zel hi. A tawp in aman ka kiang ah, "Ulian, ka u Thang in a sihma a thu gen khawng hon nei khalou hia?" chi'n aw lingsim in a hon dong hi. A aw suak apan in gen ding haksa asa mahmah chih ka thei a, ahon thudot pen lamdang ka sa mahmah hi. Ken leng bang mah gen hon neilou ahih dan ka hilh a, bangziak a huai hon dong sese na hi hiam? Chi'n ka leh dot hi. Aman leng bang dang gentuan lou in ahon paisan dan lungkim louhna nei abang ka sa a ahi chi'n ahon dawng hi.
Gen ding leh kikup ding dang omtuan lou ahihman in pai ding in a kisa a, ken leng ka hehnep theihtawp a hehnem in huchi'n ka hong kikhenta uhi. Thangi painung in a hon thudot ka ngaihtuah nilouh a, bangziak a huai hon dong khelkhel ahi dia aw ? A kisukbuaina uh om ahi diam ? Chi'n ka ngaihtuah den hi. Awl a hunlem ah dot thak ding chi'n kihahsiang ding in ka hong kisa a, nidang a kipaktak a ka kimawl khawm lainite uh lungsim ah hong thak zel in kisil kawmkawm in Lawm Thang aw, hai hina chia maw... Na lungkhamna hon hilh lou a na hon paisan himhim ki-awi hina chia maw... Ka chi hithit lel hi. A khen chiang in zan nitak a ahong pawt dante khawng ka ngaihtuah thak a, gen nop tenten nei a hong hoh hi ding hi a, kei ka ihmut suah luat ziak a gen ut lou hi zaw ding hitah e... Chi'n a laigelh lamtak ka phawk khia a, kintak in bathroom apan pawt in ka lawmpa lai gelh zong ding in ka room lam zuan in ka taiphei thoh zozen hi.
Ka room sung mai theihna teng ka mai a, himahleh ka mu zou kei hi. Gelh nei ahih dan lah chiangtak in ka thei ngal a, ahihkei leh hon hilh utlouh thak ziak a a gelhsa teng paimang ahi dia aw? Koi ah koih ahi mahmah dia? Chi'n ka zong thak nawn hi. Ka gintakna teng ka zon nung in ka mu tuan kei a, a tawp in nutsiat hon neilou ahi ding chi'n ka puante ka silh hi.
Ka ki-ak zohtak in ka lukham nuai ah ka sumbawm koih la ding in ka lukham ka dom kang a, huchih laitak in ka lukham kawm apan in lai hoihtak a kikhep khat a hong kia hi. Ken leng hiai hi ding eive chi'n ka la pah a, hong pah buatbuat in huchi'n ka hon sim panta hi.
Lawm aw,
Tuni in na kiang ah gen ut tampi nei in ka hong pawt a, himahleh na nasepna na gimluat man in ka hon subuai ut kei hi. Tua hang in hiai lai ka hon nutsiat zaw mai hi. Na ngaihdan lou ka genkhak a om leh na ngaihdamna ka hon ngen masa hi. Hiai laithon na sim hunchiang in kei na lawm lungsim gentheitak thuak nawnlou ding in ka na pai khinta ding. Hehpihtak in na kiang a ka gen ut pen na theihna ding in hon na sim suak sak hamham ding in ka hon ngen hi.
Lian, nang kan a khovel ah hon nemtu leh hon khotuahtu kuamah a omkei chih nathei hi. Ka nu'n hon beisan ni a leng nang mah hon khamuantu na hi, nang ziak a mihing ngeina mah pu theinawn ka hihdan ka mangngilh kei hi. Lawm aw, himahleh, tua ka thiltuah pen zaw ka lungtang in a paw zou nawn kei. Hing na pi a sikhin bang a ka om ding ka utlouh ziak a ka hinna la ding a thupukna bawl mai ka hi. Haksa salou ka hikei, hon khelah lou ka hikei chih na theih ding ka deih petmah hi. A ziak hon genpah leng sim suak theilou a hehna leh thangpaihna a dim ding a ka hon gintak man in ka hon genpah ngam kei. Hehpihtak in ana simsuak hamham in aw. Kei na lawm Thangpu lungkhamna nang chauh in na theih ka deih hi. Na sim khit chiang in kuamah kiang ah ana gen thang ken la, nang chauh in thudik ana lenkip tinten mai in aw.
I neulai hunte, sungkuankim a leenlai nite ngai mahmah kawm in leh nang hon khelah mahmah kawm in hiai lai ka hon nutsiat hi. Na simzoh chiang in kuamah dang ensak lou in ana haltum pah mai in aw.
Tuni sun a football pek ding a i kuankhiak lai na theih ka gingta hi. Amun i tun nung a ka om noplouh ziak a kimawl lou a ka hon paisan dan zong na thei hi. Lawm Lian aw, huai in innlam zuan in ka pai a, damdawite ne a lum tawldam ut in kinoh tak in ka pai hi. Inn ka tun in ka inn kongkhak uh ana kikhak a, tala ana kikhai hi. Ken leng ka pa ofis kai a kuanta a hi ding chi'n awl in ka pak koihna nuai ua chabi ka koih zel pen uh la in ka kong uh ka hongta hi. Innsung a dai khipkhep a, kei leng thawm neilou hial in lupna room lam manoh in ka pai hi. Huchih laitak in lupna room apan in minih kihou ging ka za guih a, lamdang ka sa mahmah mai hi. Ka bil kha ding sa in hoih tak in ka ngaikhe thak nawn hi. Innkong lah kikam a, kua hipeuhmah ding ahi ua? Ka inn uh luh sawm ahi uhiam? Chi'n pilvangtak in ka ngaikhe gikgeek hi. A kihouna uh ka za zel a, a pasal pen aw a pan in ka pa ahi chih ka thei hi. A khat pen a aw apan in numei ahihdan a kithei a, lamdang ka sakna a hong lian diak hi. Bangziak a ka pa'n inn kisungkalh zen a numei khat ompih thei mawk ahia? Ka nu'n lah hon omlouh sanna a sawt mahmah ta ngal a ? Amau ka lupna room lam ah bang hih ahi ua le? Tua teng thei ut in pindan vang apan etguk sawm in bangvang ka zong hi. Huchihlai in numei nuamsa thawm leh pasal nak huhu ging ka za a, bangvang apan ka en guta hi. Lawm aw, hiai pen ahi tua ka hinna ka lak na san diktak. Aw football pekna mun apan inn ana zuan pah lou hileng zaw hiai teng mu a, lunggimna thuak lou ding hi ing a, bangmah theilou a lungnuam tak a om ding hi ing a... Aw khovel alamdang tel mai. Ka thil muh chizauhuai tak mai huchi thei ding a ka gintak louh leh ka phallouh tuh ka mit ngei in ka muta hi.
Ka lupna tung ngei ah, zi ka neih hun chiang a ka zi toh hun nuam ka zat khawmna ding room ngei ah ka pa leh ka it mahmah zi ding a ka khaam Thangi tuh savuak in hunnuam ana zangta mai uhi. Naa ka sa mahmah mai a, valut a vasat zialzial ka ut petmah hi. Himahleh ka hinna in a ngam kei. Ka pianna pa ngei in ka zi ding a ka khaam ka it mahmah, a khut natawm ka khoih ngamlouh phial a ka it a ut dan teng a a gamtat pih mai zaw, ka thuak zou nawnkei. Kin tak in ka pawtkhia a, khitui-naptui toh manohna ding tumta neilou in ka vial paipai hi. Zahlak huai ka sa mahmah mai a, ka lungtang a tamkham hi. Khuga dam luitui ah tuahlup mai ding lunggel in Mata Dam lam ka zuan a, himahleh ka tanchin tawpna pen leh a tawpna ziak bek nang ka lawm hoihpen in hon theihpih sam le chin chih ka ut man in ka lungsim khengthak in na kiang ka hon zuan hi. Himahleh na gen bang in na nasepna na gimluat man in ka hon subuai ngamkei a, hiai laithon ah ka lunggimna teng ka hon gelhkhe zaw hi. Lawm aw, hehpihtak in kei na lawm thulimlou, ngalhat zoulou pa' kha ading in honna thumsak lailai in aw.
Mangpha damtak in. Ka lungkhamna ka paw zou nawn kei. Ana pai masa mai ning maw....
Hiai thu ka sim khit tak in ka lungtang teipi hon sut mah bang in a na mahmah tenten hi. Hehna leh thangpaihna toh khasiatna in ka dim a, phuba laak utna in ka dim hi. Hiaibang a mi tenhuai leh kih huai Khristian khovel ah om din ka gingta kei. Aw nang Thangpu' pa aw, na thulimlouh ziak leh hun tomchik nopsakna na zon ziak a maw na tapa Pathian' nna semsak theilou a a hinna na laksak mai. Ki-awi hina chia. Aw nang Thangi, na sianthouna na pasal a' ding kia a na piak ding pen na huuk ziak lel a maw na piak louh ding pi na piak. Nang ziak in mohneilou leh mihoihtak mai na itpen a nagen tua a khial pen bang a a hinna a bei mai. Naa hina e maw Toupa chi'n ka kikou khe tuaituai kha zawzen hi.
Kintak in ka lawmpa kivuina lam zuan in ka pai a, a haan tung ah mittui luang zungzung kawm in ka na ngaihsaklouh ziak a hiaibang teng tung ahihman in ngaihdam ngen in ka kap huphup hi. Hun paisa sapkik theih leh aw ka lawm itpen Thangpu kiang ah ka bat din nuam nang e....
~Beita~
©Siamsinna leh Vakiangbu
"Lian, thouta ve, na lawmpa'n hon paisanta eive..."
Chi'n ka nu'n ka lupna kiang ah kah aw sim in a hong gen hi. Lamdang satak in ka nu kiang ah, "Bangchi dan e? Zan nitak le ka room ah sawtpi kithuah ung a, damlouhna lah neilou hi a..! " ka chih leh ka nu'n, "a kikhailum ahi, a chi uh. A pa' a ding in laigelh nutsiat khat a nei achi ua, thou inla vahoh phei in." ahon chi hi. Kintak a thou khia in ka lawmpate' innlam zuan in ka diang khia hi.
Ka neupek ua pan kithuah leh kingaina tak ka hi ua, kikhen theilou khop hial a singlam-tuilam ah kithuah den ka hi uhi. Tua ahon beisan phut mawk pen lamdang ka sa mahmah mai a, ka hi miaimuai hi. A inn uh ka tun in mi tamsimtak ana om ua, parachute te kaipailh in tutnate ana lem khawm uhi. Kisuanglah zoulou leh kideek zoulou in menh phemphom kawm in innsung ah ka lut hi. Lupna tung ah ka lawmpa' luang damsa tanglou hial a lum zinzen in ana om a, a kiang ah apa leh a it mahmah Thangi in kap kawm in ana sam ek-ek uhi. Kei leng a kiang uah tusuk in ka lawmpa sam in ka kap ek a, himahleh, hon dawng ding in akam khatvei mah le akaa kei, hong pawt maw lawm chi a hon houpih ding leh hon en ding in amit khat vei mah leng ahak nawn kei. Naa ka sa mahmah mai a, bangziak a hiaibang teng na tung ah tung ahia? Chi'n ka lawmpa itlua in ka samsam a, himahleh, apa leh Thangi kah ging lou ngal zak ding bangmah dang a omkei hi.
A lai nutsiat thei ut in apa' kiang ah ka ngen a, aman leng a sakhau apan hon lakhia in ahon pia hi. Ken leng phel a ka simleh hiai bang in a kigelh hi :
" Pa aw, kei nata chinglou tak hon ngaidam in aw, na mai mungam ding ka hi nawnkei. Hehpihtak in hon ngaidam in aw.... Thangi kon ngailua, i tongchiam ka tangtunsak zohlouh ziak in hon ngaidam in aw..."
Lamdang ka sa mahmah mai a, bang hihkhial a, bang lunggimpih ahi dia aw? Chi'n ka ngaihtuah vungvung hi. Ka lawmpa lah mi sia hilou a, omdan hoihtak leh amaban ah Pathian nasemtu muanhuai hiding a kisakhol lah ahi ngal a...!
Lungsim nuamlou tak leh ittak kawm in ka lawmpa ka vuiliamta uhi. A pa kiang ah a ziak thei nuam in awl in ka dong khialkhial hi. Himahleh, a pa ngei in leng aziak ding a theizou kei hi. Thangi in lah a kal uah buaina bangmah omlou leh tunung sawtlou a kiteen sawm uh ahihdan ahon gen beh zawmah hi. Ken bel aziak om ding in ka gingta tinten a, aziak omlou a hiaibang thil haihuai hihlou ding ahihdan ka thei mahmah hi. Bangziak a ka lawmpa'n ahunlou a ahinna lamawk ahia ? Chih zon khiak ding tup in ka nei tinten hi.
Innlam zuan in ka pai a, ka room ah lut in ka lupna tung ah athal zawng in ka lum hi. Ka ngaihtuahna apaisau mahmah mai a, nidang pek apan a ka kithuahpih leh thu-le-la imguuk omlou hial a kihilh tuah gige hi ung a, bangziak a tua a sihpih ding khop a lungkhamna atuah pen hon hilh lou sese ahia ?
Ka neu ua pan in ka lawm Thangpu toh kithuah tou den ka hi ua, ka kingaina petmah uhi. Ka paina lamlam uah kizui in, kimawlna khwng bang ah pankhawm khak teitei ka sawm uhi. Skul khat ah kai khawm in, ka pawl uh leng a kibang a, skul kaitawp chiang in vasa beng khawng in ka kuan khawm zel uhi. Huchi'n kikhen zoulou ding khop in ka kal uah lawmta' itna chi kituh in, khat skul akai louh ni in akhat pen leng nileng in lungsim nuamlou tak leh thawmhau tak in ki om thei zel hi. Asih ma nitak in leng ka inn uah ahong hoh a, ka room ah sawtpi a hongtu hi. Kei lah sun a ka nasepna gimsim in ka lupna ah ka ki zampah a, Thangpu kiang ah, na ut leh games kimawl inla na ut tantan kimawl in aw, ka gimsim a, kong ihmu tawldam zual ding. Chi'n ka ihmut san hi. Imu suak kha ka hi ding a, a pailam ka theikei. Ka nu'n hon phawng in khua ka phawk pan a, himahleh houpih theih ding in ka lawmpa ana om nawn ta kei hi.
Huchia ka hunluite uh ngaihtuah a ka omlai in ka nu'n Thangi hong pawt ahih dan ahong hilh a, kei leng thou khia in common room ah Thangi hon ngakna mun ka zuan hi. Gen ding a vang petmah mai. Thangi ka en a, ka hehpih deuhdeuh mai hi. Amah lah a kahkah na a mit teng bawk thithiai a, gim meltak in a hon en liakliak zel hi. A tawp in aman ka kiang ah, "Ulian, ka u Thang in a sihma a thu gen khawng hon nei khalou hia?" chi'n aw lingsim in a hon dong hi. A aw suak apan in gen ding haksa asa mahmah chih ka thei a, ahon thudot pen lamdang ka sa mahmah hi. Ken leng bang mah gen hon neilou ahih dan ka hilh a, bangziak a huai hon dong sese na hi hiam? Chi'n ka leh dot hi. Aman leng bang dang gentuan lou in ahon paisan dan lungkim louhna nei abang ka sa a ahi chi'n ahon dawng hi.
Gen ding leh kikup ding dang omtuan lou ahihman in pai ding in a kisa a, ken leng ka hehnep theihtawp a hehnem in huchi'n ka hong kikhenta uhi. Thangi painung in a hon thudot ka ngaihtuah nilouh a, bangziak a huai hon dong khelkhel ahi dia aw ? A kisukbuaina uh om ahi diam ? Chi'n ka ngaihtuah den hi. Awl a hunlem ah dot thak ding chi'n kihahsiang ding in ka hong kisa a, nidang a kipaktak a ka kimawl khawm lainite uh lungsim ah hong thak zel in kisil kawmkawm in Lawm Thang aw, hai hina chia maw... Na lungkhamna hon hilh lou a na hon paisan himhim ki-awi hina chia maw... Ka chi hithit lel hi. A khen chiang in zan nitak a ahong pawt dante khawng ka ngaihtuah thak a, gen nop tenten nei a hong hoh hi ding hi a, kei ka ihmut suah luat ziak a gen ut lou hi zaw ding hitah e... Chi'n a laigelh lamtak ka phawk khia a, kintak in bathroom apan pawt in ka lawmpa lai gelh zong ding in ka room lam zuan in ka taiphei thoh zozen hi.
Ka room sung mai theihna teng ka mai a, himahleh ka mu zou kei hi. Gelh nei ahih dan lah chiangtak in ka thei ngal a, ahihkei leh hon hilh utlouh thak ziak a a gelhsa teng paimang ahi dia aw? Koi ah koih ahi mahmah dia? Chi'n ka zong thak nawn hi. Ka gintakna teng ka zon nung in ka mu tuan kei a, a tawp in nutsiat hon neilou ahi ding chi'n ka puante ka silh hi.
Ka ki-ak zohtak in ka lukham nuai ah ka sumbawm koih la ding in ka lukham ka dom kang a, huchih laitak in ka lukham kawm apan in lai hoihtak a kikhep khat a hong kia hi. Ken leng hiai hi ding eive chi'n ka la pah a, hong pah buatbuat in huchi'n ka hon sim panta hi.
Lawm aw,
Tuni in na kiang ah gen ut tampi nei in ka hong pawt a, himahleh na nasepna na gimluat man in ka hon subuai ut kei hi. Tua hang in hiai lai ka hon nutsiat zaw mai hi. Na ngaihdan lou ka genkhak a om leh na ngaihdamna ka hon ngen masa hi. Hiai laithon na sim hunchiang in kei na lawm lungsim gentheitak thuak nawnlou ding in ka na pai khinta ding. Hehpihtak in na kiang a ka gen ut pen na theihna ding in hon na sim suak sak hamham ding in ka hon ngen hi.
Lian, nang kan a khovel ah hon nemtu leh hon khotuahtu kuamah a omkei chih nathei hi. Ka nu'n hon beisan ni a leng nang mah hon khamuantu na hi, nang ziak a mihing ngeina mah pu theinawn ka hihdan ka mangngilh kei hi. Lawm aw, himahleh, tua ka thiltuah pen zaw ka lungtang in a paw zou nawn kei. Hing na pi a sikhin bang a ka om ding ka utlouh ziak a ka hinna la ding a thupukna bawl mai ka hi. Haksa salou ka hikei, hon khelah lou ka hikei chih na theih ding ka deih petmah hi. A ziak hon genpah leng sim suak theilou a hehna leh thangpaihna a dim ding a ka hon gintak man in ka hon genpah ngam kei. Hehpihtak in ana simsuak hamham in aw. Kei na lawm Thangpu lungkhamna nang chauh in na theih ka deih hi. Na sim khit chiang in kuamah kiang ah ana gen thang ken la, nang chauh in thudik ana lenkip tinten mai in aw.
I neulai hunte, sungkuankim a leenlai nite ngai mahmah kawm in leh nang hon khelah mahmah kawm in hiai lai ka hon nutsiat hi. Na simzoh chiang in kuamah dang ensak lou in ana haltum pah mai in aw.
Tuni sun a football pek ding a i kuankhiak lai na theih ka gingta hi. Amun i tun nung a ka om noplouh ziak a kimawl lou a ka hon paisan dan zong na thei hi. Lawm Lian aw, huai in innlam zuan in ka pai a, damdawite ne a lum tawldam ut in kinoh tak in ka pai hi. Inn ka tun in ka inn kongkhak uh ana kikhak a, tala ana kikhai hi. Ken leng ka pa ofis kai a kuanta a hi ding chi'n awl in ka pak koihna nuai ua chabi ka koih zel pen uh la in ka kong uh ka hongta hi. Innsung a dai khipkhep a, kei leng thawm neilou hial in lupna room lam manoh in ka pai hi. Huchih laitak in lupna room apan in minih kihou ging ka za guih a, lamdang ka sa mahmah mai hi. Ka bil kha ding sa in hoih tak in ka ngaikhe thak nawn hi. Innkong lah kikam a, kua hipeuhmah ding ahi ua? Ka inn uh luh sawm ahi uhiam? Chi'n pilvangtak in ka ngaikhe gikgeek hi. A kihouna uh ka za zel a, a pasal pen aw a pan in ka pa ahi chih ka thei hi. A khat pen a aw apan in numei ahihdan a kithei a, lamdang ka sakna a hong lian diak hi. Bangziak a ka pa'n inn kisungkalh zen a numei khat ompih thei mawk ahia? Ka nu'n lah hon omlouh sanna a sawt mahmah ta ngal a ? Amau ka lupna room lam ah bang hih ahi ua le? Tua teng thei ut in pindan vang apan etguk sawm in bangvang ka zong hi. Huchihlai in numei nuamsa thawm leh pasal nak huhu ging ka za a, bangvang apan ka en guta hi. Lawm aw, hiai pen ahi tua ka hinna ka lak na san diktak. Aw football pekna mun apan inn ana zuan pah lou hileng zaw hiai teng mu a, lunggimna thuak lou ding hi ing a, bangmah theilou a lungnuam tak a om ding hi ing a... Aw khovel alamdang tel mai. Ka thil muh chizauhuai tak mai huchi thei ding a ka gintak louh leh ka phallouh tuh ka mit ngei in ka muta hi.
Ka lupna tung ngei ah, zi ka neih hun chiang a ka zi toh hun nuam ka zat khawmna ding room ngei ah ka pa leh ka it mahmah zi ding a ka khaam Thangi tuh savuak in hunnuam ana zangta mai uhi. Naa ka sa mahmah mai a, valut a vasat zialzial ka ut petmah hi. Himahleh ka hinna in a ngam kei. Ka pianna pa ngei in ka zi ding a ka khaam ka it mahmah, a khut natawm ka khoih ngamlouh phial a ka it a ut dan teng a a gamtat pih mai zaw, ka thuak zou nawnkei. Kin tak in ka pawtkhia a, khitui-naptui toh manohna ding tumta neilou in ka vial paipai hi. Zahlak huai ka sa mahmah mai a, ka lungtang a tamkham hi. Khuga dam luitui ah tuahlup mai ding lunggel in Mata Dam lam ka zuan a, himahleh ka tanchin tawpna pen leh a tawpna ziak bek nang ka lawm hoihpen in hon theihpih sam le chin chih ka ut man in ka lungsim khengthak in na kiang ka hon zuan hi. Himahleh na gen bang in na nasepna na gimluat man in ka hon subuai ngamkei a, hiai laithon ah ka lunggimna teng ka hon gelhkhe zaw hi. Lawm aw, hehpihtak in kei na lawm thulimlou, ngalhat zoulou pa' kha ading in honna thumsak lailai in aw.
Mangpha damtak in. Ka lungkhamna ka paw zou nawn kei. Ana pai masa mai ning maw....
Hiai thu ka sim khit tak in ka lungtang teipi hon sut mah bang in a na mahmah tenten hi. Hehna leh thangpaihna toh khasiatna in ka dim a, phuba laak utna in ka dim hi. Hiaibang a mi tenhuai leh kih huai Khristian khovel ah om din ka gingta kei. Aw nang Thangpu' pa aw, na thulimlouh ziak leh hun tomchik nopsakna na zon ziak a maw na tapa Pathian' nna semsak theilou a a hinna na laksak mai. Ki-awi hina chia. Aw nang Thangi, na sianthouna na pasal a' ding kia a na piak ding pen na huuk ziak lel a maw na piak louh ding pi na piak. Nang ziak in mohneilou leh mihoihtak mai na itpen a nagen tua a khial pen bang a a hinna a bei mai. Naa hina e maw Toupa chi'n ka kikou khe tuaituai kha zawzen hi.
Kintak in ka lawmpa kivuina lam zuan in ka pai a, a haan tung ah mittui luang zungzung kawm in ka na ngaihsaklouh ziak a hiaibang teng tung ahihman in ngaihdam ngen in ka kap huphup hi. Hun paisa sapkik theih leh aw ka lawm itpen Thangpu kiang ah ka bat din nuam nang e....
~Beita~
©Siamsinna leh Vakiangbu
Comments
Post a Comment