By ~ Leon Guite
(Nupi khat hon gensawn bang in)
Nitak khat ngeina bang in ka veng khung uah nungak hel ding in ka
lawmte toh ka pawt tou nawn uhi. Tua ka pawt na uh inn ah nupi kum 60
vel ding mi khat zong om hi. Amah paunuam tak khat hi a, anungak lai
thute khawng gen in ka hulum thei mahmah uhi. Huai athugente lak a,
nuihzathuai kasak mahmah khat amah phalna la thraps in kn gelh tei di
chu...
Nidang chile hang, ka nungak tunglai vel ding in zoudawn
lam a khua khat ah ka teeng uhi. Tua hunlai bel sing tam in gammang sah
petmah hi. Nikhat ka lawmnu Maman (minkhek) toh sing paw ding in ka
kizawn ua, ka khote uh tangval khat Lalpu (minkhek) in ahon zui tei hi.
Ka kuan kawm un ka chiamnui zaizai ua, eilawmta teng denchiah bang hiam
khawng tuak kha leng zaw hichi'n ka hon taisan ding chi'n Lalpu akawlzal
puak toh hong tai kawi nganngan a, ka nui ekh-ekh zel uhi.
Ka
puakna ding mun uh ka tun un sing ka lakhawm mengmeng ua, muntuam chiat
apang ka hihman un ka ki gal hou kaukau zel uhi. Lalpu in ahong khem zel
a, lau a ka kikou chiang un ahon nuihsan ekh-ekh zel a, ahon engbawl
nilouh hi.
Ka ngah tak un pai ding in ka hong kisa ta ua, ka
lampi uah lui khat om a, tua luipen pal galkai angai hi. Tua luitui vot
tak leh siang kilkel ka muh tak un ki silsiang malam ding aw chi'n ka
hong kisil ta uhi. Nuamsa lua ka hi ding ua, sawt simtak ka kibual kha
nilouh uhi. Atawp in hinawn mahmah kei zekai gawp ni hang e... Chi'n pai
ding ka hong kisa khe nawn uhi.
Bangtan hiam ka pai nung un ka
sak ua loupa kawm ahong ging suatsuat tamai hi. Kou leng bang a tua
ging suatsuat? Chi'n ka kidong tuah ua, lampai lai khawl zen in ka dak
heihoi uhi.
Huchih laitak in ka sak lam uah vompi kha ahong
suak kheta mai a, lau lua in ka sing puak natawm uh nga khe manlou zen
in ka leh tai ta uhi. Vompi'n lah ka nung uah hon delh kou lah ka van
puak uh toh tai lunglung mai. Ka lawmpa uh den a hon khem lau pa' pen
tun alau pen in apangta ve. Ka ang uah atai polpol maimah hi. Tua hunlai
puan nuai ki teng thou mahleh, atangpi in ki thupi ngaih khollou a,
khua lum chiang bang in i teen kei leh huih vot hong lut dan nuam zaw
chi'n ki teeng ngei kholkei hi.
Awle, ka singpuak un hon subuai
lua ahihman in lam gei ah ngakhe zok in deihtawk in ka hong tai taktak
mai uh zaw vompi'n le ahon delh pha tuan kei. Huchih laitak in ka lawmpa
uh ahong kisui puk kha a, kinohtak a athoh leh apuanten sing khat in
awk kha in a ki phel ta hi. Amah leng alauh toh apuanten laman nawn lou
in ka ang uah ataw sing lalaih kawm in atai pulpul a, amah ka muh uhleh,
kua vompi delh chih om nawn talou in nuih lah za, lau ngal a buai huai
petmah hi. Akhatpa lah a taw ki sing laihlaih zomah. Nuih za kawm leh
lauh thuah in ka tai zel ua, huchih lai in ka lawmnu Maman ngei leng
hong kisui puk in apuanten ahong tolh geet a, aman leng apuanten laman
tuanlou in "Ka zak atalua Niang, ka zak ata lua" chi'n ahon delh phei a,
ka kiang ahong tuntak in ka puanten hon suh sawm in ahon lai ekh hi.
Ken a kil khat a man in suh kik ka sawm a, aman akil khat a len in suh
ahon sawm a, tai kawm a ka ki kaih tuah vakvak uh leh zaw ahaksa viau
mai. Vompi'n lah abuai lua ua, a zumna uh natawm sel manlou zen a tai
ahi uh hon chih nachang theise lou in ahon delh zom zel hi. Lalpu lah ka
ang ua tuili om gei ah ana ding gehgah mai. Tuili ah tawm khiak di lah
lau, anunglam a vompi lah lau, kitawm khe dek lah ngam chiah lou chih
dan in ana awn ngehngah zomah. Koulah puanten om nawnlou a tai bulbul
mai. Nuih lah za, lah lau ngal. Abuaihuai petmah mai hi.
Ka
taizel ua, Lalpu kiang ka tun tak un aman kou gel honna en hekhawk
zomah. A chiteng ling zungzung mai. Kare etna ding a vang petmah mai hi.
Thakhat in ka puanten ki tuh pen uh kha hon lak suh in vompi hawlna din
a zang hi. Vompi'n lah ka vuaktanna uh hon zahtak sak ahi diam ah agal
apan hon en in ading mai mah vanglak hi. Atawp in gamlak lam ah ahon
tailut san thei vanglak a, vompi taikhiak zoh in apoimoh nawn hikei mah
leh kathum un ka taksa uh hum theihna teng ka hum chat ua, ki entuah in
KA TUIKE NUIH VIAIVUAI UHI.
(Phuah tawm maimai eikha hahaha)
~Beita~
©Siamsinna leh Vakiangbu
Comments
Post a Comment