OPERATION BLACK PANTHER - I

By ~ Leon Guite

BUNG -1

ZIA RECRUITMENT:

Zogam College of Martial Arts and Literature ah ka graduate ding kum in nikhat kei a ding lehkha a hong tung hi. Bang lai hi ding hiam ? Chi'n ka enpah hi. Tua laithon ah ZIA(Zogam Intelligence Agency ) Director Mr. BOB in amah toh kimu ding a a hon sapna thu a kigelh hi. Kei chauh lou le ka lawm Khualpu  toh kou college apan ka hi ua, kou hongpi ding car in ka college gate uah honna ngak ahihdan zong tua lai in a gen ngal hi. Phur tak lah lungsim hi hiaihuai sim kawm in ZIA office, Lengtonghoih street, Lamka manoh in BMW car in ka kitholh phei henhen ua, lungsim a vaksau ngeimai. Bang hihkhelh nei ka hi dia aw? Bang ding a hon sam ahi dia le? A ziak lah a gen het kei a? Chi'n ka lawmpa Khualpu toh ka kihoulim tiptip uhi.

ZIA te office ahihleh innsawng, sawng 5 a sang ahi a, a nuaipen Mall in kizang hi. Thupi mahmah in siangthou mahmah mai a, kei leltak a din lut ngam huai in ka koih kei. Himahleh, huaimun ah hoh ding a sap in ka om ngal a...! Amun ka tun un staff nungak melhoih taktak te'n honna vaidawn ua, Officer liantak bang kisak khak in om veh aw... Tangtak in Director room lam ka naih pah ua, kou hon pitute'n ka tun thu uh ana hilh ahi ding ua, Director Bob in kongkhak ah honna dawn hi.

A room ah lut in singpi khawng dawnkawm in houlim ka pan pah uhi. Bob in a hon sap nasan a hon genpah a, amau lak a tel ding a a hon deih ziak a a hon sap ahihdan a hon hilh pah hi. Ken leng bangziak a amau lak a pang dia kei hon deih zenzen hihiam? Chih ka dong a, tua tak in aman ka kiang ah, "Tu laitak in ZIA in sep ding gol mahmah khat a kinei in, tua sep ding pen mi naran khat in a zoh vuallouh ding ahihman in ka naupangte aguk in ka sawl khia a, tamkuam tak ettel ahihnung in nang leh na lawm Khualpu mah muanhuaipen, felpen leh siamna lam ah chinpen a ahon muh uh ahi. Zogam in na siamna uh leh na pilnate uh a hon poimoh petmah, tua ding a hon sam ka hi. Na dawng ding uh hiam ?" chi'n a hon gen hi. Kei leng thuduh chihmahtak, bang sep ding om ahia ? Chi'n ka dong a, aman bel, " ka lak ua sep ding na ut uleh training hoihtak mai piak in na om ding ua, tua training phattham a na zoh uh leh na nna ding uh hilh pat na hi ding uh. Tun bel ZIA nuai a sep na lunggulh un na ut na uhia? Chih ahiphot." chi'n a hon dawng hi.

Tangvalnou kisaphuh litlet, bangmah poisak neihlouh hun laitak ahi a, lawmpa toh ki-entuah in, bangchi ding? Chi'n ka kidong gu siausiau uhi. Ka lasinna uh lah lakloh, hiai bang a sepna ding eizon ngaiselou a, ang ah tah a om zomah pen nawlkhin lah ut huailou zel. Hiaibang ngaihtuah kawm a ka om laitak un, Director in ka lungsim uh thei hileh kilawmtak in hichi'n a hon gen hi. "Na laisimna uh a lakloh chih ka thei. Himahleh huailampang zaw a buaihuai kei, training nazoh uh toh kiton in graduate certificate piak in na om ding ua, loh lampang ahih leh First class officer te a sang a aleh nih atam zaw piak in na om ding uh." Hiaibang a kizolna khumtakmai ka zaktak un. Bangmah dang ngaihtuahsau chih omlou in tua ka ang ua nna kipia pen zom ding in thupukna ka bawlpah uhi. Huchi'n a poimoh bangkim gelhlut dingte gelh lut in a zingchiang zing dak 10 a office ah ki report ding chi'n innlam zuan in ka hong paikheta uhi.

Ka nasep ding uh bang hi hiam chih theikei mahle ung. Ka sumloh ding uh tamtham tak ahihman in kipahna in ka dim ua, i etna lampeuh in hon kipahpih a, hon nuihsan bang in ka mu uhi.

Inn ka tung a, ka sungte kiang ah gen ut mah leng kuamah kiang ah genlouh ding chih ahihman in bangmah genlou in ka nuilut veivai kha zawzen hi. Ka nu-le-pate'n lamdang bang a hon sa zawzen uhi. Nitak a hong hi a, ka vangphat dan khawng leh bangziak a kei pentak hon deih uh ahi dia aw? Chih khawng ngaihtuah in ka imu theikei zawzen hi.

Kei ka hihleh, ka nu-le-pa' tapa neihsun ka hi a, ka nuai ah numei khat a om hi. Kamin ahihleh Lianpu ahi a, ka neu apan a mi damtheitak leh halh tak ka na hi hi. Ka ommoh mahmah mai a, ka pa'n ka omdan a hon et vengveng chiang in ka tempaina ding a agintak kungfu Master Khaipu kiang ah zil ding in a kiang ah a hon omsak hi. Ka lunglutna lampangtak hikha ahihman in haksa hetlou in ka hon ziltou zel a, kidemna tuamtuam khawng ah gold medal tampi ka huikhesam hi. Kum 14 ka chin kum in nikhat ka school kaikal in ka Master pa muanmoh huaitak in a inn toh haltum khawm in ana om hi. Ka heh in ka it mahmah mai a, phuba lak teitei ut in maban kungfu sangzaw zilbeh ut in tua ka kaina college ah ka ki admit hi.

 TRAINING DINGA KISAKKHOLH NA:

Zingkhua vak in buh-al te hong khuang chiaichiai uhi. Kintak in lupna tung apan thoukhia in nidang a ka hih ngeina bang in kisawizawi kawm in ka vak halh hi. Inn ka tunkik nawntak in ann nek ding a mansa diam a om ahihtak man in ka ne pah hi. Ann nekzoh kisa pah in ka lawmpa Khualpu tawnphei in huchi'n ZIA office lam zuan in ka kuanta uhi. Amun ka tun un room khat ah ahon tonpih ua, kougel lou midang nga numei 2 leh pasal thum ana om uhi. Kimeltheih tuahna te khawng bawl in kipaktakin ka houlim khawm zaizai ua, nuam ka sa mahmah uhi.

Huchih laitak in director Bob leh midang khat a hong lut ua, ka tutna chiat uah tu ding a hilh a ka om khit nung un director pa'n thugen a hon pan ngal hi. Amasapen in mellahna a hon nei a, a hon tonpihpa pen Special Operation Advisor Mr. Lun ahih dan a hon hilh hi. Tuazoh in maban ka pai ding dan uh tomkimtak in hilhchetna ahon nei hi. Kou mi sagih teng Special Operation Squad ding a training bawl ding ka hih dan u leh, US Army Delta Force te nuai ah kum 2 sung training a kuankhe ding ka hihdan uh ahon hilh vek hi. Zogam a ding a muangtaka telkhiak mi sagih chauh himahle ung, sepaih hattak anuai a simte sang a muanhuai zaw leh hon muang zaw ahihdan gen in Zogam a ding a ka theihna teng uh suah a pang ding in a hon hasuan hi.

Briefing zoh nung in director Bob in a room ah kei a hon samtuam a, US ah ka pai ding dan bangkim uh leh, kou hon makaih ding mite a hon ensak hi. Kei bel tua kou squad te heutu ding a hon tel ahihdan leh amaute enkai ding a guan ka hihdan hon hilh hi.

Huchi'n ka vek un room khat ah ahon paipih ua, nungak melhoihtak leh duangchingtak mai nih in ka ticket ding uh, ka passport ding uh ban ah poimoh tuamtuamte  hon na pia uhi. Doctor in check-up hong bawl a, thilteng ah "HOIH E" chi a seal ahon tah khum nung in, ZIA nuai a sem ding a laklut taktak hita ka hihdan uh Mr. BOB in ahon puangkheta hi. Ka khaloh ding uh leng advance in kum khat a ahon pe ngal ua, sum huaizah zouzai mukha nailou a kihihman in ki om hiaihuai kha zozen hi.

Innlam zuan a ka pailai un, loh kilasam hiven chi'n bank ah sum tamlou va draw khepah in bazaar ka vakai sam hi. Ka pa a ding coat suit hoihtak mai khat ka leisak a, ka nu a ding in puan-ak leh puanteen tuamtuam leisak in ka naunu a ding in diamond khi khat ka leisak hi. Inn ka tun in ka van leite ka sungkuante kiang ah ka pia a, lamdang salua in ka pa'n a vante en in kei bang ahon en tuantuan kha zozen hi. Chikmah a van leisak kha ngeilou bak ah, sum lohna neilou ka hihna ah lamdang a hon sa diak hi. Ken leng ki im-im phattuamna omlou chi'n ka dinmun chiangtak in ka hilhsukpah hi. Huchi'n nitak ann te ne in ka sungkuante toh hun ka hon zangtou ua, nitak in innkuan maitam nei in ka mabang ding thumsakna ka lutung ah akhut uh koih vek in ahon neihsak ua, huchi'n lungkimtak leh lungsim zangkhaitak in ka hong imuta uhi.

Zogam in independence 2123 AD a amuh apan in kilchih ah amah haza gam tuamtuam in um kimvel pah hi. Zogam pen India, Bangladesh leh Myanmar a Zomite' tenna teng gawmkhawm a bawl ahi a, tua hang in ka gam uh hong laksak uh ahi chi'n tua gam thum teng in Zogam philden uhi. Himahleh, UNO theihpihna toh Zogam in independence mu ahihman in a langtang in bel hong khoih ngamtuan samkei uhi. Ahih hang in helpawl leh suamhat pawl tuamtuamte zang in Zogam pen hong hihbuai den ua, Independence muh hun a kipan in Zogam in gal maituah pah tou ngal hi. Abik in India gam a state neukhat Manipur gamleitang pen lianpi tak kilaksak kha ahihman in tua State a teng Meiteite lawi chiltang mek khak bang uhi. Tua hang in amau helpawl tuamtuamte' tup pipen Zomite' tung ah phuba lak ding chih hi a, India government in amaute tawsawn in hong hat mahmah uhi. A leh lam ah Bangladesh apan Muslim helpawl tuamtuam te leh Myanmar sepaihte'n Zogam government nuamtak in ihmu sak theilou uhi.

Amaute'n a langtang in hong dou kei mah le uh hong philden ahihman un Zogam government in innpi ah Special Operation Squad phutsuah ding in thupukna la ua, ZIA te sepsuahna nna sem ding in thuneihna pekhia uhi. Tua dungzui in kou mi sagihte first batch ding a telkhiak in ka om kha uhi. Kou nasep ding bel gamsung a enkhetu hong omte betdaih ding leh gamdang Intelligence Agency tuamtuamte nasem theilou ding a zeng natna a thagui ua kaplut ding chih ahi hi.

Huchi'n nisim 12th April, 2125AD , 07:00hrs zst (Zogam Standard Time)   geih in US zuan in Gen. Tunkhopum International Airport apan in Zogam Airlines a tuang in ka lengkhe vengvengta uhi. Tua training a kuante aminte uh hiai bang ahi hi:
Lianpu,
Khualpu,
Thangpu,
Mangboi,
Sonpu,
Lily  leh
Nancy.

THE KANGLEIPAK INDEPENDENCE FORCE :

Zogam in independence mu a, Manipur gam leitang liantak mai Zogam a ding a eukhiak a ahong omtak in Manipur a teng a gam mite chiltang mek khak mah bang uhi. A gam uh Zomite a ding a dikloutak a piak a om ahi chi'n Zogam-Zomite dou ding mawngmawng in Kangleipak Independence Force dinkhia uhi. Pishak Ningthoujam makaihna nuai ah hong hat mahmah ua, Zogam leh India gamgi Line-305 Kangvai post a 2nd Bn. Zogam Army omte subuai den uhi. Amaute'n galvan hoih taktak zang in Zogam sepaihte subuaiden ua, galvan thupitak toh Zomite tenna gam laksak sawm in panla uhi. Thuguk saipawlte muhsuah dan in amaute'n biological weapon bawlnang in Zogam gamgi mun khenkhat ah laboratory zong hong uh hi.

RAW in hiai helpawlte tawsawn in galvan le sum in panpihna pia uhi. Training hoihtak pia ua, amaute Zogam douna ding in indirect tak in India in zang hi. Huaitak in Zogam in leng CIA te toh kikhutzop in daltheihna lampi teng ah dal hi.

Bangziak a India in Zogam hichitel a enlah hi hiam i chih leh nidang a thautui leh leinuai hauhsakna tuamtuam tamtak muhsuah a a omna Thanlon leh Tipaimukh bial ban ah Gullu mualte thuneihkhum a ut ziak ana hileltak hi. Ahihhang in a langtang in Zogam dou theilou hi. UN Security Council ah permanent member status ngen a pan alak laitak hi a, gam naupangchik Zogam hon dou mawk taleh a dinmun leh a zah huaina tengteng bangmahlou suak ding. Gamdang teng mohsak a om ding ahihman in a langtang a dou ngamlou in Manipur a helpawlte khut zat a zang in Zogam pen awl-awl a eukhiak hon sawm hizaw hi.

Zogam tungtang ah India a hong kichinlah luat tak in Pakistan ngei leng ana om muang ut tuansam lou in ISI te'n leng panmun a hong khohsam ua, galvan leh sum-le-pai in Zogam a hon na panpih tei uhi. A diktak in hiai Zogam buaina pen India leh Pakistan a ding in cold war zang a a kidouna mun uh ahimai. Bangladesh leh Myanmar lam pan leng hon subuaitu ding om zeuhzeuh mahleh, huchitel in thupilou hi. Tua ziak in Government in India toh kal pen ngaihkhawk pen in anei hi.

Kou pawl in leng ka training uh bangmah buaina omlou hial in ka masawntou zel uhi. Sin theih teng leh sin ding a poimoh teng sintou ka hihman un haksa ka sa thei mahmah uhi. A khenchiang bang in lungkiak ngoihngoih na in hon buak a, innlam ngaihna lianthei mahmah hi.

Ka training na ua haksa ka sakpen uh ahihleh gammang sahtak mai nuai ah mikhat khat in mun tuam chiat ah ahon koih ua, ka khut ua map leh temta khat chauh hon pia in ahon nusia uhi. Ka omna ua pan a ka camp uh map en kawm a ka zot ding uh chih dan ahi hi. Nek ding ka kizon tawm ding uh ahi a, tua ding a temta ahon piak uh ana himaimah hi. Kithuzakna lah omlou map chauh ah muanna nga in huai pansan a ka camp uh k ahon zot mai zaw haksa petmah chihlouh ngal gen ding ka theikei. Gil a hong kial a, theigah muhteng lah nek ngam hilou, thei gah min limchi taktak gah phingpheng tampi om mahleh gu ahihkhak lau in kine ngamlou hi. Nahtang kung muhkhak leh tuh hampha petmah a kihimai. Atui dawn in a ngek ka sialnek mai hi. Mei toh nang lighter hong kipelou ahihman in suang nih saituah in meikuang kibawl zel a, vasa leh gamsa neu matkhakte ki-em zel sam hi. N ibangzah hiam nung in bel thilnekte sung in zoulou in sung hon khoh a, tha hong chau mahmah hi. Himahleh, ka tup ka tangtunma khawl thei hilou ka hihman in ka pai teitei hi.

Hiai endurance test ah vuallel hihkhak ding ka utkei. Taksa bah mahleh Zogam tangval nungkik lou ding chi'n mailam nawt in ka lungtang toh ka pang a, ni sawmnih leh zan sawmnih gamlak ah ka painung in atawp in ka camp uh ka galmuh khong hi. Gimlua leh bah gawp ka hihman in ka mitte hong vai a, sawlsam gawp in khophawklou in ka puksuk hi. Ka khanlohtak in damdawi inn ah om ka na himaimah hi. Ka instructor pa uh hong hoh in ka lungtang taak ahon sa mahmah mai a, kum tampi hiai bang endurance test ah mi tampi ka sawlkheta... Himahleh, nangchauh na hi camp tan hong tung zou pasal diktak na hi chi'n a hon phat mahmah hi. Ka lawmte bel bah gawp in ni sawm leh ni thum gamlak ah a om nung un paizou nawnlou in sepaihte'n lenna in vapikhia uhi. Training tuamtuam ka sin ding teng uh kum nih sung hoihtak a ka sin nung un damtak in Pianna Zogam lam manoh in ka hong paikik nawnta uhi.

HOTEL LAKE VIEW

Thuguk saite apan in KIA te'n Zomi Journalists 2 man ua kemlel uh ahihdan thu ahong tung hi. Amaute Moirang khokiang munkhat ah koih uh ahihdan report kimubok hi. Amaute tatkhiakna ding in Zogam Government kiang ah 5crore ngen ua, ni 2 sung a piak ding,  ahuchih kei leh mimatte thah ding chi'n vauna suahkhia uhi. Amaute hotkhiakna nasep sem ding leh KIA te hihchimit ding in thupiak in ka om uhi. Huchi'n kou leng khualzinmi dan a kibawl in Moirang a Hotel Lake View ah ka kinga uhi. Mun tuamtuam ah vakkual in lempeuh ka kila zel ua, himahleh ka tup pen uh bel munpoimoh leh muanmohna deuhte lemlak a huaite pansan a mimangte suikhiak sawm ka hi uhi.

Amau mite mah sum zang in aguk in thu ka dong zel ua, a kibuknate uh leh a a gamtatna munte uh awl-awl in ka hon theitou zel ua, maban panlak ding dan a nuamtuam mahmah hi. Nikhat Lily toh Sendra lam ah ka pai ua, auto in ka tuang uhi. Munkhat ah helpawlte'n honna kham in thu a hon dong uhi. Kou bel Malaysian passport zang ka hihman un English ngen ka zang ua, amau kihounate thei mahle ung a theilou bang in ka om uhi. Zomite ahi uh chi a hon mat sawm ahi ua, himahleh ka passport uh leh ka city guide map uh chihlouh thildang muh neilou ahihman un bangmah ahon loh samkei uhi. A set ua a kihouna ua pan in journalist a matte uh Hotel Lake View ah koih uh ahihdan ka thei khia ua, eheh ! Gintak sang a nasep ding hon thadawn mahmah ding na hi ve ua le ka chi lungsim a, ka nui heuhau zozen hi. Ahihhang in ka kipahna in sawt a daihkei, a hunchiam uh beidekta ahihman in mimatte tunitak ngei a muntuam ah pikhiak ngai ding ahihman in leh muntuam ah kisuan sawm ahihman un kintak a camp uh naih ding in kisamta mai uhi. Ka lungphu akin petmah mai. Ka kuansan uh zoulou a kik ding ka utkei. Huaiziak in kintak a kik in Journalist te a koihna uh zonkhiak ding leh, panlak dingdan ka kikum uhi.

Thangpu in gari ahon ngaihtuah ding a, hotel gate polam ah mansa in ana ompih ding. Sonpu in kintak in galvante selgukna apan in a vala dia, amaute hong ma ngeingei a panmun chiat ah mansa diam a ana om ding. Tu nitak pen KIA hitman Manglemjao heu a hong kuan ding ahihman un Sonpu leh numeite gel in polam a galte omte ana bei ding a panmun ana lak ding uh, kei leh Khualpu in Manglemjao leh anungzui ahon tonpihte ana bei ding chih ahi hi. Huchi'n thumkhawmna nei in ka nasep ding bang chiat uh sem ding in ka hong kisa kheta uhi.

Khua ahong mialtak in ngeina bang in Bar ah mite a hong kithehpalh panta ua, zute dawn in leh laithaite kap in maban ah bangthil hong tung ding ahia chih theilou in nuam asa mahmah uhi. Nitak dak 9 vel ahih in Manglemjao leh a nungzuite a hong tungta uhi. Gari nga tak in a hong kuan ua, a naupangte'n kongtual ah panmun khoh in aheutupa uh guard in a om ua, ama personal bodyguard mi 5 toh hotel a Bar sung ahong lut uhi. A lawmte mi nih kidnap Journalists te nih vapi ding in thu apia a, kou bel kigingtak in ahun geih a nasep pan ngal thei ding in mansa in ka om uhi. Journalist te nih a hon pilut tak un Manglemjao hong dingkhia in mi omkhawmte lak ah, "en un i melma uh, i gam uh hon suh tute hiai ah a om uh. Amaute ziak in i gam uh eukhiak in a om a, tun en amaute i eukheta ding uh." chi'n nui lualua kawm in hong kikou khia a, a mimatte gel uh dip ah naktak in suksak ek in anih un tukpah vitvit uhi.

Journalist te tung ah akhut ahon khak hialtak in ka om maimai thei nawnkei. Hehna in ka kidim hi. Ka tutna apan dingkhia in Manglemjao ka chouta hi. "Manglemjao, ka mi ka sate na ut dan tak a na bawl ding ahikei. Na gam uh ka hon laksak kei ua, kou gam mah ah teng a, kou gam teng mah gawm khawm ka hi uhi. Hiai mun ah na gam ah kuamah hon nang ngam ding a omlouh man in na kihangsan sak a, lauh neilou mah bang in na om maw? En in Zogam tangval na ang ah, na gam ah, na mun ngei ah, na hinna la ding in ka hong kuan hi. Dingtang inla pang in. Tuni ngei in na gam ah na hinna ka la ding. Zomite nang simmoh vual ding ka hikei uh." ka chisuk zialzialta mai hi.

Ka thugen az aktak in lamdang asa mahmah mai a, amah area ah amah choungam mi omlouhna mun ah ken amah ka choupen hangsan honsa in aheh mahmah mai hi. Ka thugen toh kiton in Khualpu leh Mangboi ka gei ah kigingtak in ahon dinpih ua, ka ang uah mite lauh leh minthang Manglemjao aleh apawlte ading uhi. Thautang leh suk khelh khak ding lau in midangte ana kihem ua, himahleh, a mimuanpen uh leh Zogam tangvalte kibeih ding en ut in tukvelh ah ahong dak neinai uhi. Ken leng "Manglemjao, hih ding na neih leh tun pan in, hing a hiaimun apan pawt khe nawnlou ding na hi." ka chih khum ek hi. Amah leng hehlua in, "Nang phiangsan in maw na hon chou ngam. Kei kua ka hia chih tuni in ka hon lak ding. Na sisan leh lei ka hel ding." chi'n ahong kikou khe loiloi hi. Ken leng "Ahihleh Manglemjao aw, na hon welcome na chibai tu in panta leng lah ?" ka chih khum a, huchi'n kichibaina mulkimhuai pan ding in panmun ka hon khoh tuak ta uhi.

Kigingtak in position hoihtak la kawm in ka hong kingim vengveng ua, atang masa ding kiveng in lawmte toh khat-le-khat kiveng tuah in ka om uhi. Huchih laitak in Manglemjao ngaihtak a hong kikou in a lawmte kiang ah,"Hiai Zomi uital kiphasakte that vek un." ahon chikhe loiloi a, alawmte'n kou hon naih in kisualna thupi chu pat ahong hita hi. A gintak louh lamdaih un ka che ziahziah ua, ahon khoih khak ma un a guh-le-tang teng uh sukloi in a omvek uhi. Huchi'n ka thum un Manglemjao ka bei ua, zohngeu in sazu a thah ding a akimawlpih bang mai in ka kimawlpih ua, agam mite'n lamdangsa mahmah uhi. Amimuanpen uh, ahitman uh zahlaktak a bawl a om amuh un, amau tung a atungtei khak ding lau in a taizakta uhi.

Mipite a taizakphet un, konglam apan in thautang vuahzu bang in ahong lenglut zungzungta mai hi. Lawmte innkonglam a tangpang te'n leng kapthuk ua, himahleh tamlua uh ahihman in nang zoulou in innsunglam ah ahong tailut uhi. Innkonglam ah tu dinmun a taikhiak ngaihna omlou ahihman in hotel nunglam ah khau a kikhai khiat mai ka sawm uhi. Innkong lam a pan paungaihna in ki surrender kei leh hotel bomb sevek ding chi'n ahon vau uhi. Kou leng ut tak na hih uleh chi'n Thangpu a gari toh hotel nunglam zuan a hong taiphei ding in ka hilh ua, hotel ah bomb hattakmai kam in tohlet ah khau zang in ka kikhai kheta uhi. Thangpu leng ka nget bang ngei un a nunglam apan hong lut a, huchi'n buaina dang omlou in Hotel Lake View ka hon nuse theita uhi. Galte'n ka taikhiak lam uh theilou uh ahihman un thau akap ging lailai uhi. Huchi'n taizel in Kangvai khua ka tuntak un bomb puakging ngaihtak mai ka za ua, Hotel thupitak tuh vaivut suak ding in a chimsuk zoizoi tamai hi. Huchi'n damtak in Lamka ka hong tung ua ka hutkhiak uh Journalist nihte check-up bawlsak in ka tawldamta uhi.

DEK A TUKTUM ZONG GAL SUAK

A zing in Director Bob in ama room ah a hon sam lut a, thuguk poimoh tak khat ahon hilh hi. KIF te'n a mimuan mahmah uh Manglemjao sihna tung ah phuba laksawm in a uisasiamte uh hon sawl lut uh ahihdan leh, abiktak a, Parliament buluh sawm a kisingsa mahmah uh ahihdan ahon hilh hi. Amaute kintak a zonkhiak a matkhiak vek ding in thu a hon pia hi. Huchi'n nasep ka hon pan ngal ua, amaute kibukna ding a gingtakna mun teng ka hon dapkual pah uhi. Director Bob in officer teng meeting neihpih in thu omdan hilhchian a, panlak dingdan kikum khawm uhi. Tua KIF uisasiamte matkhiak a, a nna uh abuchin ma ngei ua a thiltup uh lohsap sak ding leh huai semkhe ding a kou Special Operation Squad te'n bangkim ah panla ding ka hihdan uh thukim uhi. Huai a athupuknate uh top secret ahi a, koimah ah genkhiak louh bilbel ding chih ahi hi.

Kou leng nasep ding a kipiate panpah in mun muanmoh huai namunte ka dapkual pah ua, warehouse le kibukna ding a mun poimoh tuamtuam omte ka ban buluh pah ziahziah uhi. Himahleh, asulnung ding uh bangmah a kimukei hi. Nikhat thu pesawntute apan in, Pearson khosak a, ICAR te building ah kibu uh ahihdan hilh in ka om ua, Office lam apan thupiak mu in kintak in amun ka delh uhi. Amun ka tun un kuamah ana omkei, himahleh, vanzat bangzah hiam leh file bangzah hiam kinusia ka mu ua, ban ah kintak leh manmoh tak a nutsiat a om bang in amun ana thang mahmah hi. Amaute ka kuan ding uh ana hilh gu om hi ding ahi a, athu azak phet ua kinohtak a ana taikhia ana hi uhi. File te leh vanzat a nutsiatte uh office lam ah tawi in Bob toh ka enkhawm uhi. Tua file ah Zogam President Pu Zolunmang thah a sawm dan uh leh a thah  ni ding tanpha uh a tuang hi.

Huchi'n President pa thu omdan teng Director pu'n ahilh pah a, venbitna khauhsak in ompah hi.

Ka gamtat dan teng uh ana theihtheih mawk uh thil lamdang mahmah khat ahi hi. A ziakbel, hiai office sung tawngnung, a room natawm sound proof a kibawl ngat sung a thu kipekhia pen amau ana theihtheih mawk uh ahi hi. Tuaziak in, department sung ah a langpang om ngei ding in Director pu'n muangmoh pah hi. Himahleh, kua hiding ahia le? Meeting na a telte lak ah khat hi ngeingei ding ahi. A ziakbel, amau teng lou kuamah thupukna thei omlou ahihman in. Huchi'n Dy.Director, Pu Dalmang tel in meeting na atel teng in kal khat paisa apan mi a contact te uh leh a kimupih, a kihoupih teng uh record omte ka envek ua, himahleh muanmoh theih ding kuamah kimulou hi. Huchih lai in melmate'n lah a thiltup uh lohchinna ding in pan naktak in la ua, a omna mun uh thei a luhkhe ding a kuan khiak chiang in a na kihemkhe man zel ua, a guktak in ZIA sung buai mahmah ta hi.

Nikhat ka forensic scientist uh Dr.Zamang in hon sam a thu poimoh tak khat ahon hilh hi. Huai bel Deputy Director Pu Dalmang in a nuai ate mi bangzah hiam thuzoh a Director Bob a dinmun apan paihkhiak sawm a kipei ahihdan ahon hilh hi. Lamdang ka sa mahmah mai a, ka gingta theikei zozen hi. Pu Zamang bang ka dong thakthak zozen hi. Aman lah dik ahihdan leh, a gamtat dan teng thei ahihdan ahon hilh vek hi. Huchi ahihleh KIF uisasiamte leng aman thu omdan teng ana hilh zel a kituak kha thei ngeilou hi ding eive... Chikawm in kintak in ka thuzakte hilh ding in Bob' room lam ka manoh hi. Thu omdan teng ka hilh vek a, Deputy matkhiak pahmai a hoih diam? Chi'n ka dong hi. Himahleh, Bob in ngohna ding kichian, a evidence ding hoihtak om nailou ahihman in amah pen 24 hours etkhiak phot hoih asak dan ahon hilh hi. Huchi'n thangkam in Bob in Deputy pa sam in melmate kibukna chiangtak a theih ahihtak dan leh tuni ngei a melmate mat siang hiding uh ahihdan a hilh hi. Huchi kawm kal ah Deputy pa thilhih teng engu ding in Nancy hilh in om a, huchi'n kou adang teng kuankhe ding dan in ka kisata uhi.

Bangtan hiam nung in ka msg. tone a hong ging a ka et leh Nancy in ahon msg ana hi a, ka et leh Deputy Dalmang in KIF te kiang ah tuni a a kibukna uh luhkhiak sawm ahihdan hilh in ana kihem khia a, mi muh louhna ding a ama inn ngei ah ana kibu ding in amaute ahilh chih ahi. Huchi'n kintak in Deputy pa kiang ah pai in Danbang ngei in ka vamanta uhi. Atung in bel heh kisa in pang thengthang mahleh a tawp in a khelhna teng kipuang khe khong hi. Aman agen na ah Director nna let a utman in Director Bob nasep ding teng ahitheitan a dal a lohchin sak louh ding chih a tup dan ahi. Huchi hileh a dinmun len zoulou chi a a post apan kaihkhiak ding. Amah pen Director tutphah ah tu ding chih ahi hi. Ama kipuanna tungtawn in a secretary pa leh a nungzui mi 10 te mat in om ua. Court ah dinsak a om in a vek un Jail ah khum in om uhi.

Kou leng kisapah in Dy.Director pa' innlam ka zuan ngal uhi. Snipper-man 5 ka tonpih ua, amau te'n inn umkual in pan ala ua, police te'n leilam pansan in inn a umkual uhi. Kei, Khualpu, Sonpu leh Thangpu. Kou teng a sung ah apoimoh leh lut ding a mansa in ka om uhi. Paungaihna zang in kipekhe mai ding in ka ngen uhi. Himahleh, dawnna bangmah omlou in a dai zikzik hi.

Huchi'n ka lawmteng toh building lam zuan in ka tai phei ua, khau akiluaitou in tohlet ah tear gas ka lawn lut ua, innsung ah ka lut ngal uhi. Ka room lutna uah kuamah a omkei a, room dang zong ding a ka kisak laitak un ka tung ua room khat apan in thau a hong ging dotdot a, kou leng kintak in tua thauginna lam ka delhtoupah uhi. Police te'n leng kapthuk uh ahihman un thautang in innsung lam ahon deng zotzot a, kou leng masawn ngamlou in bangtan hiam ka om uhi.

Thau gin ahong khawltak in kou leng room lam manoh in kong khak tot hong toh lut ka thuah ua, ka muh masak uh ka kap tuk pah teptep uhi. Huchi'n pangzou lou in a hong ki surrendar ua, avek un aliam teng toh man khawm vek in ka pawt khiakpih uhi. Avek un mi sawm apha ua, tua teng lak ah mi 7 ka kap liam uhi. A liam teng damdawi innlam ah pua in adang mithum teng police station ah thudot ding in ka paipihta uhi.

 INNSUNG A GUL LUT THAH AHI.

Police station apan in ka mimatte uh thudotna nei ding in ka vapikhia uhi. Amaute kipuanna apan in KIF in a special commando te uh bangzah hiam Zogam ah hon sawllut a sawm uhi. Atupdan tak un bel President pa athah khit chiang ua, Zogam pen buai chihtak  a buai ding in huaihun suam a milian milal teng khat khit khat a thah ding chih ahi hi. Tun amaute lak ah batch masapente ahong lutpanta ua, a nihnate leng lut ding a kisa lellel ahihdan uh ahon hilh uhi.

Huchi'n venbitna nasatak a khauhsak in om a, gamgi teng ah Army te patrolling 24 hrs. paikual den uhi. Himahleh manpower lam ah kitaksapna aletluat ziak in deih bang leh lungtunna bang in venbitna lam kisem taktak zoulou hi. Huchihlai in nitak khat bomb ngaihtak hong puak a, New bazar a Chinese store kichihna mun ahi hi. Amun kintak in police te'n delh pah ua, himahleh, sial lut nung a sial dai kaih pen zekai lua ahihman in mi 10 in sihna tuak in mitamtak liam uhi. Huchi'n Zogam ah muanna hong keniam mahmah ta a, kilteng ah thawmhauna toh mipite kikhosa tou panta hi.

Bomb supuaktu te'n laidal khat a puahsakna mun uah nusia ua, tua laidal ah hiaibang in thu kigelh hi.....
"Ka it uh Manglemjao sihna phuba la ka hi uh. Maban ah Zomite tung ah tuasang a nasa zosem thil ka tungsak ding uh. Zogam a bei matan khawllou in kapang ding uh. Ka lampi uh dal peuhmah a sisan uh leh leivui polh khawm ahi ding. ~KIF" 

Hiaibang a helpawlte a hong maingal mawkpen uh Zogam a ding a zahlakna thupitak ahihman in Zogam parliament a chiltang mek khak a hong bangta hi. ZIA te thupiak khauhtak a honpia ua, gamsung a buaina bawlte kintak a betdaih ding, kuamah hing-le-dam a gamsung nutsiat sak louh himhim ding chih ahi. Huchi'n ZIA in leng nasep panpah in misualte kibukna mun zonkhiakna nasep panpah ngal hi.

Nitak khat Khualpu leh Thangpu toh kisuhalh ding in Leennuam Bar ka vazuan tei uhi. A sung ka valut tak un mi ana tam mahmah ta ua, zolianu lasiam mahmah khat in "Ngaklah maiveng." chihla siamtak in ana awi ngiahngiah hi. Kou leng table no. 3 ah katu ua, champaigne  order in thuvantang houlim in ka dur mahmah uhi. Huchih laitak in kong lam apan mi 5, pasal li leh numei khat a hong lut ua, table no. 8 ah a hong tu uhi. Amel uh ka et chiang un ei Zomi mel a pukei uhi. A houlimna ua pat in Zomi ahikei uh chih a kithei hi. Ei Zomite pau zang himahle uh chiangtak in a pausiang theikei uhi. Numei pen ka et leh Kataresei...!!

Amel ka muh tak in mundang ka etsan ngam nawn kei rengreng hi. Hichi lawmlawm tel a melhoih bang ana om theitel ahi maw? Ka chi vungvung hi. Huchi'n hun neih teng in tua bar ka tung gige tamai hi. Amau leng hong hoh zelzel uh ahihman un ka hong kimeltheih samta uhi. A hon etdan apan in ngaihnatna riau khat hon nei hin ka thei hi. Ka Psycology sin ka hamphat pih mahmah ve. Ken leng huaitak in hangsan suah in ka itna thu ka hilh suk pah hi. A tung in hon na YES pah utkei, amel apan in haksatna khat nei hin ka mu hi. Ken leng konglam ah pawtpìh in ka dong thak nawn hi. Huaitak in aman ka kiang ah, "hehpihtak in kuamah kiang ah na hon genkei ding leh ka tanchin ka hon hilh ding. Na kichiam ngam leh." ahon chi hi. Kei leng a mai ah kichiam ka kichiam a, "ka hin laiteng na tung ah kuamah in hon sunaa ding in akhut alik kei ding."Ka chi hi. Tuatak in aman "Ka hon it louh ziak ahikei, himahleh ka nasepte ziak leh ka dinmun ziak a hon dawn ding haksa sa ka hi." ahon chi hi. Ken leng a nasep bang hi a, a dinmun bang hi hiam? Chih ka dong hi. Huaitak in aman ka kiang ah, "na number hon pia in inn ka tun chiang in bangkim ka hon hilh ding." ahon chi hi. Ka number ka pepah a, huchi'n bar sunglam ka lut nawnta uhi. Ka lut tak un a lawmte'n kipahmel hetlou leh lemlou tak in honna en luakluak ua, kintak in apaikhiakpih pah uhi. Kou leng ka pai ngal ua, lamtawn in ahon thuzak ding ngak in ka phone bang ka enkha nilouh hi.

Inn ka tun in ka kisil siang a, kisil zou lupna ah tawldam ding in ka lum hi. Huchihlai tak in ka phone a hong ging a, ka etleh number theih ngeilouh khat in a hon message hi. Ka et leh ka it mahmah apan ana hi a, thu om danteng leh a dinmun, a nasep tanpha hon hilh hi. Amah pen amin Thoibi  hi a, KIA nuai ah sem ahih dan hon hilh hi. kei a ding a ngaihtaak hilou ahihdan leh ka lung gimna ding phet ahih khak ding lau a hon dawng ngamlou ahih dan a hon hilh hi. Ken leng thukpah in, huai lampang ka lungkhamlou ahihdan leh poi ka sak louhdan ka hilh sukpah hi. Huchi in ka ki text tou zel ua, tuni a innkong lam ah ka pawt uh alawmte heh ua, amah muangmoh uh ahihdan leh, a hinna leh kei hinna tan ah lauhuai thei dinmun ah om ka hih dan uh ahon hilh hi. Ken leng ahon it taktak nak leh huaite pen lauhuai lou leh vengbit zou mahmah ding ka hihdan gen in ka lungmuan hi. Tuatak in aman leng, a nasep pen ning leh chimtak ngongoih ahihdan gen in a nasep taisan a, mi pangai hinkhua zang ut ahihdan hon hilh hi. A tawp in kidekzou nawnlou in a hon itdan a hon gen a, ken leng muang taktak kei mah leng, hon it taktak lou a, thangkam ut ahih tak leh leng ka nasep uh lohchinna ding a kalbi poimoh mahmah khat hong suak ding ahihman in ka plan ka hilh hi. Ka plan bel, kiginni chiang a alawmte bar ah ahon hohpih ding. A dang teng ken sep ding bangbang omte semsuah mai ding chih ahi hi. Huchi'n mangpha kikhak in ka hong ihmu phot ta uhi.

Azing in thil omdan teng Director Bob ka hilh a, ka plan teng leng ka hilh ngal hi. Huchi'n ama lemsak pihna toh kiginni chiang a reception programme ka neih ding uh kisakkholhna nasatak in ka nei ua, bar bang leng gamtat zangkhai zaw leh nop zaw ding in ka heikual thak uhi. Melmate hong lut chiang ua, amaute'n galvan a puaklut louhna ding un kongkhak ah police te'n ana check ding uh. Amaute hong lut chiang ua, police te khat waiter dan a pangpen in kou a ding galvan poimoh teng kuang a puankhuh kawm a ahong piak ding chih ahi. Thilteng a mansiang vek tak in kiginni hong tung ding ngak in ka tawldam uhi. Kei leh ka lawmte bel gamtat khelh khak ding lau in gamtat ding dan ka kizil thakthak uhi.

Hunte khawllou in paizel a, Thoibi toh ka kithuzak tou zel uhi. Tua a sepna ah a sepkhak kisik mahmah ahihdan gen in hinkhua thovengtak a zat a utdan ahon hilh gige hi. Ken leng tua bang thu ka zaktak in a kiang ah. Amau sung thu im omlou hial a apuankhiak ut aleh Zogam government in amah bitna pe ding ahihdan ka hilh hi. Huchi'n kiginni programme zohchiang a thil teng saifel vek ding in ka kithukimta uhi.

Hunte hong paizel in kiginni hong suahpih ding in suahlam pan tungsunni thadah meltak in a hong suaktou biambiam hi. Nitak a ka mission ding uh huphulh huaitakmai ngak in office ah ka tu ngiungiau uhi. Amaute'n ka thiltup uh theita mawk le uh a hong hoh ngam ding uam ? Ahihkei leh, kigingsa in a hong kuan ding uam ? Ka numeite uh bang lauthawng lua ahi ding ua, a omdan peuhmah uh a ning uh kitel den hi.

Nitaklam ahong hihtak in bangteng mansa diam ahihdan theihsak in ka om ua, huchi'n ka vek un khut kilen in kuamah taisia leh kitaisan omlou ding. Gam ading a hinna pengam khop a kipiakna pen letkip ding chi a kichiam thakthak in thumkhawmna ka nei uhi. Huchi'n ka hong kisa panta ua, bullet proof vest silh in casual dress in ka kivan uhi. Kaman siangtak un Director Bob in, "tuni in Zogam ading a ka suan mahmah, Zogam in a ta deihthohtakte aw, na pianna tunnu uh hihse ding in melma in abu ahong siam hi. Amaute khut ah na tuun it uh Zogam zaw hon pekhe hetkei un. Hattak leh hang tak in om un la, lungkelou in hong pang un aw." chi in. Huchi'n ka hong kuankheta uhi. Amun ka tun un ka table ding ua ka khaam pen uah ka tu ua soft drink dawn in muangchangtak in galte hong pai ding ka ngak uhi. Dak 10 a gintan inle kuamah muh ding a omkei, ka thiltup uh thei ua, hong pailou dek uh ahi di uam aw ? Chi'n ka lungsim a om awl theinawnkei. Ahihkei leh,  Thoibi in kei hon thah theihna ding ua hon khem a, konglam munlem khat ah honna taang gu uh ahi zaw diam? Ka lung a buai petmah hi. Ka lam-ette uh a hong kilat louhtak un paimai ka sawm uhi. Himahleh, huchih laitak in Thoibi makaih in a honglut khongkhongta uhi. Mi atamsim mahmah ua, avek un mi 15 vel ahi ding uh. Huchi'n bangmah theilou mah bang in ka thildawnte uh ka dawntou zel ua, amau leng zu order in nuamsa tak in achiak zuazua uhi. Eh! Ka gam uah hong maingal na mawk u chia...! Tunitak nou a ding a khovel na muhtawpni uh hiding ahihlam theile u chin zaw "o ima, o ibema." chi a taise duaiduai ding hi uchin ua. Kachi lungsim hi. Thoibi bel kil khat ah nguimel tak in atu ngiungiau a, alawmte bel party zang mah bang in adur petmah uhi.

Laam hun a hong hihnawntak in kei leng ka tutna apan dingkhia in laam ding in Thoibi ka vazawn nawn hi. Thoibi in akhut hon zantou a, len ding a ka khut ka zan khiak laitak in alak ua khat in ka khut hon matsak a, " Eh! Lawm maingalna maizen chia. Kua ka hi ua chih na hong thei hia ? Na hinna na it leh kintak in paikhia in." ahon chih khum laa-la hi. Huailaitak in waiter in ka lawmte plan ngeina bang in a vanzat ding teng uh ana pia hi. Thoibi ka et leh lauhthawng meltak in a ling zungzung petmah hi. Huaitak in ken leng hon len tupa kiang ah, "lawm kuana hia? Na lawmte kuate ahi ua? Chih kon theihpih kei. Himahleh, bangteng toh hong kuan mahlechin leng, nou ang ah zaw inch khat lelleng ka nungtolh kei ding." ka chisuk pah hi. Ka thugen a zaktak in hehlua in a hong dingtou a, ka mai tup sawm in akhut a hong kuanphei hi. Kei leng a gintak louhna lam ah awn geih in a zadang ah ka tuansuk a puk ding a kisalai ka tong in a awm ah ka talh suk geih hi. Nasa in a awm humkawm in atuk velvel lel hi.

Alawmpa uh apuktak in, alawm dangte atut mun uah a hong ding suau ua, ka lawmte leng ka kiang ah ahong ding teita uhi. Huchi'n bar sung ah kibeihna huaisetak mai dakkal khat sungzet ka nei ziahziah uhi. A tawp in amaute gawtmun lam ah transfer order ka suah khum vekta uhi. Huchi'n Thoibi lam nga in a kiang ah a kibukna mun uah hon tonpih ding in ka ngen a, huchi'n a kibukna munlam uh zuan in ka taikheta uhi.

Amun ka tun kuan un gari munkhat ah ka nusia uhi. Gari ah Thoibi hand cuff bulh in ka nusia uhi. Awl in ka naih phei ua, a kibukna mun uh ahihleh cotton factory lui ahi a, lian mahmah demdom hi. Duty om leh omlouh ka enkhe masa ua, sentri ding mi 2 chihlouh adang kuamah ka mu kei uhi. Thau te silencer vuah ngen ahihman in thawm ging omlou hial in duty tegel ka kap tuk pah phek uhi.

Awl in innsau lam zuan in ka pai phei ua, khua adai mahmah mai hi. Pilvangtak in innsunglam ka enzel ua, hawm in ahawm heuhou hi. Ka paiphei zel ua, innsau pen ka khen pheizek uleh inn dang khat kilam a om a, room nih ahi a, khatpen asung ah mei vak kiukiau lai hi. Sana ka en a dak 12 ginnang minute 15 geih in asam hi. Huchi'n awl in ka naihphei ua, mundang teng ka dap khitsa uh ahihman in hiai inn pen chauh tup in ka hon neita uhi.

Ka hon umkimvel ua. Thawm hoihtak a ka hon ngaihkhiak uleh, room khat pen ah nak puak duldul ging a kiza thei hi. Meivak omna pen ah bel nasem om ahi ding a, thawm ging a hong om zeuhzeuh hi. Ka mansiang vek tak un kei leh numeite gel in meivak omna room pen ka naih ua, adang teng in akhatpen a zuan uhi. Kituaktak in kongkhak ka tuan hong ua, lut toh thuah in thau ka kap khum ziahziah uhi. Second 30 vel ka kap nung un k akhawl thei pan uhi. Room sung a vanteng atam zaw ka kap sekha ua, kil khat ah pasal khat sisa in ana lum ial-ual hi. A kiang ah laptop khat ki ON sa in ana om a, huaipen la in room teng ka ensuak vek ua, laipoimoh bangzah hiam chihlouh adang teng ase vek hi. Ka thillak teng u toh ka pawt khia ua, lawmte'n leng ana uh zou uh ahihman in galvan alak teng uhtoh ahong pawt khesamta uhi. Tuanitak in galte bar sung a ka thah teng uhtoh sim in 35 ka that uhi.

Police te kiang ah thu omdan ka hilh ua, huchi'n ka gari omna uh zuan in, Lamka ka hon manohta uhi. A zing in Thoibi thudotna ka nei ua, amah kipuanna pan in leh laptop a thuguk kikoihte pansan in KIF te headquarter omna mun ka thei khe theita uhi. Ka thuchiam mah bang in Thoibi pen venbitna khauhtak nuai ah venbit in om hi.

Nikhat a omna inn ah ka vaveh a, kong ka kiuh leh innsung lam apat in hong lut in chih aw nemtak ka za hi. Ka lut leh Thoibi kisil zouphet sam nulhul in ana om a, a sam kilawmtak mai kaisuk zilzial te lak ah tuimal siangtak mai atak khe kelhkelh hi. A taksa siangtak leh mamtak tung ah a kitholh suk henhen ua, tuate'n a kilawmna nakpitak in a behlap hi. A hon muhtak in nuihmai kawm hiuhiau in, ana tu in ka vakithuam ding aw chi in room lam ah ahon lutsan hi. A hong pawt tak in ka na en a, T-Shirt ngou silh in jeans ateng a, asam khahsuk ngihngiah in a kilawm mahmah hi. Mundang en lou in amah kia ana en den charchar ka hi ding a, ahon houpihnate natawm zalou in ka na en heuhou kha den hi. Ka dawn louh tak in ka ma ah hong kun in "Ulian bangchi e?" chi'n lamdang sak chitak in ahon dong hi. Thakhat a halh khe guih in gen ding mel theilou in zaktalua in ka nui kha ringot hi. Ka omdan lamdang salua in ahon dong thakthak zawzen hi. Tua tak in ken leng, "Thoibi aw bangchi tel a hoih na hi hiam? Ka hon muh tam deuhdeuh leh lah ka hon enchimthei kei deuhdeuh mai a, ka lungsim teng gukhe zou ding a hichitel a na hoih mawk ka heh ve." chi'n chiamnuih kawm in ka dawng hi. Aman leng hon dawn dingdan tuan theilou in "peuhset eive." ahon chi a, ken leng "ka taktak eive." chikawm in ka kawi phei guih hi. Aphuzok a, himahleh aman leng ahon kawi thuk tei hi. Ken leng, "Kon ngailua, Thoibi." ka chihleh, aman leng, "Ulian, ken leng kon ngailua." chi'n ahon dawng a, ahon dawnna ka zak tak in kipaklua in amuk ah deihthohtak mai in ka tawp vengveng hi.

Huchi'n thu tuamtuam gen in ka houlim ua, nitaklam ninem a hong hih in Lengtonghoih Park ah ka vavakpih hi. Park sung ka tun un munkhat ah ka tu ua, ka ki itna thute uh kikum a nuamsatak a ka omlai un, "Ulian endih huai ate theihngei bangna uh e." ahon chi a, akhut in a kawkna lam ka et phei leh kare...! Gintaklouhpi in lawmte Khualpu leh Lily ana kipom chenchen mawk ve uh aw.

MANGPHA AW KA IT THOIBI

Hunte pailiam zel in nite hong thak a, phavang kuan ahihtak manin lungleng theite a ding in lungleen huaithei petmah hi. Tung sunni tum ding kuan lenmui kai zilzial te'n lungzuan thelbang thousak in, hiai hun chiang in it leh ngaih khensate'n nunlui ngai in luankhi nulnul thei uhi.

Nitaklam khat Thoibi toh vak halh kawm ding chi'n office kaizou innlam zuan se tuanlou in Lengtonghoih park lam zuan in ka taiphei uhi. Nuamtak leh kipaktak in kithoh in ka kimawl ua, nuam ka sa mahmah uhi. Bangtan hiam nung in ka ang ah hong kingai in "Ulian na hon it taktak hia?" hon chi phut hi. Ken leng kintak in, "bangziak a huai na hon dot la? Ka hon it na thei vele, Thoibi aw ka hon itlua." chi'n ka kawi hi. Adai vengveng a, ka et leh amit ah khitui ana pawt mawk hi. Lamdang salua in "bangchi e Thoibi, kap lah na bang a? Na lungsim noplouhna om hia?" chi'n ka dong hi. Bangmah dang a hon dawnglou in, "Kon ngailua Ulian." chi'n hon kawi kip tinten kawm in akidik huthut hi. Pasal himah leng ka ang ah ka it ahong kah hial leh zaw ka nehnou zou top hi. A mittuite nul siangsak in a kahna ziak ka dong hi. Tuatak in aman, "tulai ka mang se theilua ahi. Na kiang ah om ka sawm chiang in kei hon thah sawm a hon delh gige om ahihman in na kiang ah ka hong paithei kei. U aw ka lau lua." chi'n ka ang ah a hong kap ek-ek tamai hi. A hehnep dingdan ahaksa ngeimai, ka itpen a lungkham ding ka deih louh, a khasiat ding ka phallouh ka ang ah hong kap mai zaw kahpih ngoihngoih bang a ut huai mai hi.Himahleh, kipasalsak in akiang ah, "Thoibi aw, tawp in mang zaw mang ahi. Tunung chiang a kipaktak a i omkhawm ngei ding ziak a tua namang pen mankha zel na hi zaw ding. Lauken hon taisan lou ding ka hi." chi'n siamlou pi in ka nem bualbual sam hi.

Ka thugen a zaktak in akah ahong tawp a, kidik hithit kawm in "Ulian omkhawmta mai ni. Ka hon tankhak louh ding ka lau lua." ahon chi hi. Tua tak in ken leng, "Inu-le-pate ka hon dong ding a, amau lem achih hunhun un i omkhawm pah ding aw." chi'n ka dawng hi. Huchi'n ni leng tum ding a kisa ahihtak toh innlam zuan in ka hong paita uhi. Inn ka tun un thil omdan teng ka nu-le-pate ka hilh a, lem ahon sakpih uhleh Thoibi toh kitenpah mai ka ut dan zong ka gen hi. Amau leng nang na deihnak leh bang i hon kham ngam dia eita? Chi'n ani ding ka genfel pah uhi. Ka tup dan un Oct ni 15 a kitenna neih ding chih ahi hi. Thu omdan Thoibi ka hilh pah a, amah leng kipak mahmah in a ngaklah thu bang ahon gengen zawzen hi. Ka seppihte un ka kiten ding thu uh a theihtak un ahon kipahpih mahmah ua, kitenna a senna om teng ka dept. un hon siksak ding in ahon chiam uhi. Ka bestman ding in Khualpu ka gen a,Thoibi in bel athian ding in Lily ateel a, Nancy leh ka lawm dangte un kitenna la khat asak ding uh chi'n ka nui zuazua uhi. Huaikia hilou in Director pu Bob in Thoibi' pa dinmun luah ding leh, amah mah in khak khiakna nei ding in a kichiam hi. Kuapeuh kipak vek ka hi ding ua, ahun ding ngaklah tak in ka ngak uhi.

Bangkim mansa diam in a omta hi. October 15 zing nisuak kilawmtak mai in Lamka khopi ahon sal eng singseng a, kilawptak mai in mounei ding pa tuh vei nuih heuhuau in ka thou khia a, ka om dingdan theilou phial in huaini zingkal ka tatna lampeuh ka hih khial mawk hi. Ha nawt ding a ka hanawtna a halou ka taat leh ka sukekha a, ka hanawtna a hong tan leulou mawk hi. Lamdang ka sa mahmah mai hi. Ann na tawm hoihtak a ne theilou in ka thalh den hi. Ka kipahluat ziak ahi ding e... Chi'n hoih theipen a kichei in mansa in ka om hi. Khualpu leng manta ahihman in Thoibi vapi ding in akuan kheta hi. Dak chiam tung ding hita chi'n Biakinn lam manoh ding a ka kisak laitak un ka phone ahong ging a, ka et leh Khualpu ana hi hi. Bangthu hiding hiam chi a ka pick up leh, naknoh hehu kawm in Khualpu in, "Kintak in Thoibi inn luahna ah hong pai in." ahon chita mai hi. Ken leng aziak ka dot leh "THOIBI IN TANGTAWN GAM AH A HON PAISANTA." kap kawm in ahon chi a, na ka sa mahmah mai. Ka mit ah dan vuallouh in mittui ahong luang khe ziahziah hi. Ka nu-le-pate'n lamdang satak in ahon en ua, ka nu'n ka kiang ah, "bangchi e Lianpu?" chi'n ahon dong hi. Ken leng,"Nu aw Thoibi in tangtawn gam hon zotsanta." chi'n haksatak in ka dawng hi. Ka nu toh kikawi in ka kap ek-ek ua, ka pa'n kintak a car vala in ka thum un Thoibi tenna mun zuan in ka taikhe ta uhi.

Amun ka tun un Khualpu in kong ah honna ngak a, kintak in Thoibi lupna room lam zuan in ka taitou pah hi. Va kawi a kah khiak ngoihngoih ut mahleng, police te'n aluang ana vel uh ahihman un agal ah ka et thoh mai hi. Ka itpen panpihtu bei a lum dildel ka muh chiang in naa ka sa mahmah mai a, ka hatang thak in phuba lak utna in ka dim hi.

Bangtan hiam nung in SI pa ka kiang ah ahong pai a, nang Lianpu na hi hiam? Chi'n a hong dong hi. Ka hihdan ka gen tak in Dairy book khat leh laithem khat ahon pia a, "poi ka sa petmah" chi'n ahon paikhiaksan pah hi. Laithem tawipen ka enpah a, tua laithem ah, "CATCH ME IF YOU CAN" chih kigelh in anuai ah gul lulem a kigelh hi. Thoibi ka va en a, et haksa ka sapetmah, alu ah thautang lut in a khuak teng a dalh gai hi. Thautang khat a awm ah lut in a nunglam apawtna teng a dalh vek nawn hi. Ka zi ding a ka khaam, kiteng ding a ka chiam, ka kiteen Ni ding uh chitchiat ua ahon paisan mai poi ka sa petmah hi. Ka lawmteng leng Bob heu in ahong tung ua, gen ding dang om tuanlou in kingawng kawi in ka kap huphup uhi.

Huchi'n postmortem bawl ding in police te'n pawkhia ua, zoh ahihtak in hanmual ah it leh khelah tak in ka vuita uhi. Atawpna pen ding in ahantung ah, "MANGPHA AW KA IT THOIBI, NA SIHNA PHUBA LA NGEINGEI DING KA HI. LUNGKHAMKEN." Chi'n ka mangpha khak tawpna pen gen in innlam zuan in ka paikik nawnta uhi. Inn ka tung a, ka ning akitel petmah mai hi. Thoibi toh nuamtak a hunzatlai nite mitkha ah hong lang in ngailua in ka mittui in hon tuum den hi.

Thoibi dairy hoihtak in ka sim a, a dairy gelh tawpna pen ah KIF apan kitawp a, A lawmte Zomite lak ah azuak man a sihna tan gawtna piak ding a KIF te'n wanted a koih uh ahihdan leh, amah that tu ding in niteng hunteng a hunlem zong a zui gu om gige ahihdan gelh hi.

MIT SIK IN MIT

Khawl khuaknei zang in laithem a thu kigelh pen kua khut gelh hi hiam chih ka zong ua, himahleh, luipiau a piaunel tampi omkhawm lak ah mimtang khat vazon mah bang in ahaksa mahmah hi. Bangtan hiam nung in ka mu khe khongkhong ua, James @Tiger KIF te hired killer khat ahi chih ka hon theikheta uhi. A omna leh a chetna mun deuhte CID te zang in ka zong nawn ua, Lamka pawtsan nailou ahihdan leh tulel a New bazar ah Luxury hotel ah om ahihdan ka hon theikhia uhi. Huchi'n kintak in Hotel lam zuan in Khualpu leh Thangpu toh ka tai phei ngal ua, hotel ka tuntak un recieptionist kiang ah James lemlak lak in a omna room ka dong uhi. Aman leng hon check pah in mintuam khat zang a hotel room number 53 ah om ahihdan ahon hilh hi. Huchi'n hotel security guard te kiang ah kuamah lut leh pawt phalsak lou phot ding in ka ngen ua, huchi'n elevator zang in room 53 ka zuanta uhi. Ka tun tak un kongkhak ka kiu ua, dawnna bangmah ka mu kei uhi. Huaitak in kongkhak ka sawn uh leh ana kikalh kei a, awl a lut in room sung ka envel uhi. Main room ah kuamah a omkei. Himahleh, bed room lam apan a thum hithit ging ka zak tak un ka thau uh kamsa kawm in huailam ka zuan phei uhi. Thawm ging a ngaih deuhdeuh a, numei leh pasal nuamsa thawm ging ana hipetmah a, ehe...! Tuak kha fuh mahmah hang e , chi'n kongkhak thakhat a tuan hong in lut toh ka thuah uhi. Lupna tung ah James in vuaktang pingpeng in Zolia khat ana luppih hi. Ka thawm uh azak tak un koulam ahon en ua, kou ahon muhtak un numei pen lau in ahong kikou khia hi. James in kintak in athau lak sawm in a ban phei a, himahleh amah sang a kinzaw tham in akhut ka kap sak hi. Naa sa petmah in kamsia chiteng in akikou lualua hi. Ken leng, "Mr. James, na hun abeita, vualzou kisa in nun nuambawl in gamtang mahle chin. Poikhoihlou nathah Thoibi kha in phuba la ding in ahon sawl hi. Mit sik in mit, ha sik in ha. Huaiziakin tuni in gawtmun lam zuan in nalawmte ana zuita in aw." chi'n ka hehna khamzoulou in ka thau in ka kap ziahziah hi. Ana chih natawm gen man lou in akisat sungsung hi. Huchih laitak in numeinu ahong kikou ek a, ka et leh sisan kai zezu in James tung ah a boksuk hi. Khualpu in numei dukdak lou chi a iplah lua a ana kap ek ana hi hi. Huchi'n kintak in hotel nusia in office lam zuan in ka tai khe ngal uhi.

Nitaklam in Thoibi han ah ka sungkuante teng leh ka lawmte teng ban ah Bob toh ka vahoh ua, pak koih in thumna ka vanei uhi. Hon zathei nawn ding hikei mahleh ka houpih a, phuba lazouta ka hih dan leh lungmuantak a tawldamta ding in ka hilh hi. Ngailua ka hihman in ka mittui takkhe ding in akisa a, sawt om leng hoihlou ding hi chi in kintak in amun ka nuseta uhi.

A zing in Bob makaih in KIF te headquarter guunlui pang ah om luhkhiak dingdan ka kikum ua, galvan zat dingte enkhia in, ka operation pai ding dan uh  ka kikum khawm uhi. Huchi'n ka hinkhua a galdouna nasatak mai amasapen a ka tuah ding ngak in ka lawmteng toh kisa khol in ka hun omlai teng uh kizilna in ka zang uhi. Kal khat vel nasatak a ka kisak kholh nung un heutute apan thupiak dungzui in KIF te Headquarter buluh ding leh KIF chief Pishak Ningthoujam mankhe ding in Lenna zang in ka kuankheta uhi.

-----------------------------------------------------------------

BUNG 2

TEDDIM KHOPI AH LEH MUNZANG KHUA AH

Lenna in Teddim khopi nawl a 5th Bn. Zogam Army Headquarter ka boh ua, huai ah tawldam in ka panlak dingdan uh leh ka gam tot khak dingte khawng en in ka kikum khawm uhi. Army Major Pu Sianthang in kou mi tawmchik petmah ahon muh tak in hon huphulh pih petmah hi. Amau record na dan in in KIF te Headquarter ah sepaih 5000 vel om ding a, huailou teng camp tuamtuam sagih leh outpost tuamtuam ah kithehdalh uhi. Avek un atangpi in sepaih 10000 val ding ua hisap hi ua, kou mi 7 chauh in vadou ding pen saipi leh miksi kisual mah bang mai ka hi ding uhi. Himahleh, munkhat a om khawm vek lou ahihman un awl-awl a kheuhkhiak thoh in haksa hetlou in zoh theih ding chi'n ka kimuang veve uhi.

Himahleh, kou tawmlua ka hihman un apoimoh bang bang panpihna honpe ding in Army headquarter ka ngen ua, huihkhua panpihna apoimoh bangbang a honpe ding in ahon chiam uhi. Huchi'n ka hong kisa khe nawn ua, Kabaw valley lam zuan in ka hong kipankhe nawnta uhi.

Sun-le-zan chih omlou in ka paipai mai ua, numeite gel bang leng gintaksang in bahlou in kalsuan zomthei zel ua, bahsia omlou in ka manoh gam uh zuan in gammang sahtak nuai leh kenselak khawng tawn in ka hong pai zel uhi. Nibang zah hiam kahong pai nung un gal gamla sim khat ah khua khat kamu ua, tua khua ah khawltawl dam ding chi'n ka naih uhi.

Khomual ka tun un Thangpu leh Mangboi khosung omdan enkhe ding in ka sawl uhi. Amau leng kuanpah in kou adang teng in khawltawldam kawm in kana ngak uhi. Bangtan hiam nung in Thangpu in kihouna in ahon houpih a, helpawlte'n khosung mipite lentual ah kaikhawm in khut zak kawm in kikousak uh chi uhi. Tuatak in kou leng kisa in khosung pilvangtak in ka lut suk uhi. Inn ka tuah masak pen uh hoihtak in ka enkhia ua, kuamah muh ding a omkei, aban ah ka paiphei nawn uhi. Huchih laitak in inn khat apan numei kap ging ka za ua, kintak a thau a ngim kawm in huai inn pen ka zuan phei a, Nancy in hon zui in lawm dangte'n innkong ah panmun ana la uhi.

Bi a kibawl inn ahi a, kongkhak leng mauten a kibawl ahi hi. Awl in kongkhak ka hong ua, innsung ah helpawl nih in pasal khat tem in anasat gawp uhi. A kiang uah nupi khat in zahngaihna ngen in ana kap a, himahleh mi 2ten ngeingaih lou in vuakbeh zomah uhi. A nasep uah alunglut luatziak un kou ahon ngaihsak mankei uh. Ken leng gimphei khiankhian in khat man in a gawl ka at phei a, akhatpen Nancy in akap puk tep hi. Pasalpa ka en a, tem a satna ma in ataksa apumdim a, asi tamtak tuanglai ah a luang khe zuahzuah hi. Lametna bangmah a om nawnkei, si ding in akisat euh-euh a, etngam huai ding ahikei. A kiang ah azi khasetak in akap ngeungeu a, anep dingdan om tuanlou ahihman in leh hun mahmah leng omlou ahihman in kapaikhiaksan uhi. Innteng ah banlut in helpawl kamuh masak uh ka that tawmtawm ua, huchi'n lentual lam zuan in ka pai suk ta uhi. Thangpu leh Mangboite' toh ka hong kimu ua, huchi'n lentual kilteng ah kihawm lual in ka manoh sukta uhi.

Kho mipite lentual laizang ah khut vanlam ah liktou kawm in "LONG LIVE KIF" chi'n akikou sak uhi. Kou leng kasin-kalung un thuak nawnlou in kituaktak in ka panmun ua pan in galmuang leh galzou kisatakmai a om helpawlte ka ban kapsuk ua, minute 5 vel ka kap nung un avek un ka that beivek uhi. Sunlaitak himahleh khua niim a vuah a chiin ziak in amial sim ngeingui hi. Khomipite ka tung uah kipak mahmah in ahausapa un kipahthu genna in vok ahon goh a, khosung tangvalte'n misiluangte kemhoih in khosung mi asat lup pen uh ahan ding tou in suunna hun ka zang ua, ka vui zoh un annkuang ka sawk-khawm uhi. Huchi'n khua ah ka giak suak ua, khomipite bit tuam kisa mahmah uhi. Hausapa toh ka kihou ua, helpawlte'n hun asak teng un khua ah sum dong in gan aut peuh uh thahsak zel ua uhi. Mipite munkhat ah samkhawm in gawt ek zel ua, numeite sual in gentheitak in khosung mite ganta bang in simmohtak in bawl uhi. Hiai khua ahihleh Munzang khua hi a, Sihzang mite teng uhi. Kou leng kal khat ka taam ua, tuahun sung in kho mipite apan in helpawlte gamtat dan leh gamtatna munte uh tampi ka theih beh uhi.

BULUH IN KA OM UH

Munzang khua ah bangtan hiam ka om nung un maban sawn ding in ka hong kisakhe nawnta uhi. Khomipite toh mangpha kikhak in maban ka hon sawn nawnta uhi. Gammang sahtak mai nuai ah ka paizom zel ua, thoukang tam toh, vuah lah chiin den ahihman in haksa chih chauh in ahaksatdan a gen zou kei. Vangvot in lah hon boh den ahihman in ningkitel huai mahmah hi. Numeite gel in lah Vangvot lau uh ahihman in deihbang in ma ka sawn theikei uhi.

Ka pai zel ua, khomial kuan in thakhat in ka ma uh saulou ah galvenbuk khat ka mu ua, kou leng kintak in lampi apan ka pial khepah uhi. Hoihtak in ka enkhia ua, helpawlte outpost masapen ahi chih ka theikhia uhi. Lampi ngeina tawnlou a gamlak ngen a pai ka hihman un akual apaikha in Mualzang apan gamla lou khah mel 15 vel ding a gamla chauh ana hi hi. Tua outpost pen lampi kiang ah om ahi a, tua lampi paipen Munzang kholai ah pai in Tonzang tan kikhung suak hi. Kou leng kisa in tua outpost luhkhiak a huaimun ah ki camp mai ding in ka thupuk uhi.

Mitam om ding a gingtalou ka hihman un ka ngapthoh mahmah mai ua, ka numeite un nungak om duhdahte bang a kibawl a, duty te a vasukbuai ding uh. Huaikal a pasal teng camp sung ah lut ding chih ahi. Huchi'n ka nungakte gel uh hong kisa mengmeng ua, a nna ding ua piakpen semsuah ding in a kuankhe pahta uhi. Kou leng ka panmun ding uh manoh in ka kipankhia ua, Thangpu pen Sniper thau khat toh nusia in hon na cover zel ding in ka nusia uhi. Numeite gel leng a nna ding ua ka piak uh hoihtak in hon sem buching ua, duty tegel apam a sawlbuk lak ah hon kaiphei theipah uhi. Kou tua sawlbuk gei ah ana kibu ka hihman un ahong tunphet un ka na gawl at pah uhi. Huchi'n a outpost sung uah lut in ka muh peuh uh ka ban kap pah ua, a kiginma un ka luh zoupah uhi. Vualzou a kingai a, muangtak a ka omlai un gal deuh apan thau ahong ging guih a, ka bil gei mahmah ah hong leng ging vut in ka nung ah naa sa a thum huthut ging ka za hi. Kihei kawm a ka et leh kei hon kap ding a kisa khat Thangpu'n a snipera akap ana hi a, ka thaw huai zawzen hi. Huchi'n outpost ah ka vanteng uh koih in nek ding omte ka ne ua, khawltawldam in ka om uhi.

KIF headquarter tunna ding in hilh lawk a ka om bang un outpost 4 ka maituah ding uh a omlai hi. Kou leng khawltawldam kawm in Mangboi leh Thangpu duty sak in a dangteng ka hong lumta uhi. Ihmu dekpan chih ding in Thangpu in hon sam a, kintak in a kiang ka vazuan hi. Gal gamla sim apan in gari 5 hiam a hong kizui phei damdam ua, ka outpost luh uh hon thei ua, koute kap ding a hong kuan uh hingei ding a gingta in panmun ka bawlpah uhi. Outpost sung ah kuamah omlou in a kiim teng ah panmun ka bawl ua, galte kou buluh ding a outpost sung a hong lut chiang ua aktuam a khumsa bang a anawl teng pan a kikap huan ding chih ahi.

Gari ate leng hong nai hiaihiai in a tawp in ka omna mun uh a hong tungta uhi. Ka gintak mah bang un gari apan a hong kumkhia ua, post sunglam thau a kap in a hong lut zungzung uhi. Ka omna ding ua a gintakna munte uh thau a kap in pausia chiteng zang in a hang loiloi geuh uhi. Huchi'n a lut kimvekta uh maw chihtak in thakhat in a pawlam apan kilchih ah ka kikap huanta uhi. A kiginlouh dan tak ua kap a om uh ahihman un lamdang sa toh, a kiguih pawltoh buai petmah in a buai ua, kou hon kap thuk manlou ding in ka kap zialzial uhi. Minit 3 khawng ka kap nung un khe a dingzou ding kuamah omlou in ka kap puk vek uhi. Ka lut phei ua, naa sa a thum huthut toh tui ka duh chi a kikou toh amau vengvung uhi. Hehpihna tellou hial in a damlai teng ka kap lum thak vek uhi. Huchi'n a luang uh munkhat a kuak tou in alom in ka vui khawm vek uhi. Kou lam aliam kuamah ka omlouh man un Pathian kiang ah kipahthu genna thumna nei in lauthawng lou hial in tawldam in tua nitak ka hong ihmu vengveng ta uhi.

KIF HEADQUARTER LUHKHIAKNA

A zing in ka kisakhe nawn ua, uniform a kithuam in a gari un ka taisukta uhi. Sausimtak ka tai nung un outpost khat ka tuak nawn ua, himahleh buaina bangmah omlou hial in ka taisuak thei uhi. Huchimah bang in aban a te ah leng ka taisuak thei uhi. A tawp in ka gal ua, tangtung ah inn thupi mahmah tampi omna mun ka galmuh theita uhi. Huaimun bel bangdang hilou in KIF te headquarter ahi. Tangtung ah om ahi a, anuai ah Guunlui a luang hi. Hiai mun bel tunglam panpihna lou a luhkhiak vual ding ahikei hi. A thupi mahmah mai a, sepaih 5000 val in a veng gige uhi.

Headquarter lamte houpih in ka tunna mun uh leh ka dinmun uh ka hilh ua, Armyte' lenna te panpihna poimoh ding ka hihdan uh zong ka hilh uhi. Huchi'n nitak ngak in puanbuk bawl in annte khawng ne in ka om uhi. Ka lawmte ka en a, abah mahmah ta uh chih ka thei hi. A biktak in numeite gel bang houh lauh huaina mun ah leng taise lou hial a gam a ding a ahinna natawm uh itlou a apanna uh thupi ka sa mahmah mai a, ka suang mahmah hi. Ka lawmte kiang ah, "Khaile i kuansan diktak uh tunitak in semsuah ding in i kisata uhi. I Zogam ah itu-ita, i khangsawnte'n muanna aneih ua, lungmuangtak a akhosak theihna ding ua kal suankhe ding a kisa i hi. I tawl in i bah mahmah ta hi. Hizong Zogam in natha, na lungsim leh na sisan hon poimoh lai hi. Tunung Zogam ah muanna a omtheihna ding in tuni in eite khut ah a kinga hi. Lunglel lou in i pang ding uh. Pathian in hon panpih ding a, kuapeuhmah hing-le-dam in ka hon pikik nawn teitei ding hi. Kuamah hon nuse lou ding ka hi. I zou ding ka ging hi. Kumpipa thahatna'n dou ni hang." chi'n ka lawmte ka hasuan a, thumkhawmna nei in, Pathian kiang ah ka kitahlut uhi.

Nitak khua a hong mialtak in Headquarter lam apan in lenna nih hong kuan ding a, dak 8:15 geih a bomb hong khe ding ahihdan ahon hilh uhi. Huchi'n kou leng huai hun a gamtang pah thei ding a mansa a om in a munlam zuan in ka paitouta uhi. Khua adai mahmah mai a, vante siang in kha a vak hoih mahmah hi. Huphulh simvek ka hi ding ua, a paupeih lah omlou in ka maisuahte uh bang mual dilhdelh zozen hi. Ka tup uh, ka maban uh lungzinhuai takmai in lah bangmah phawk phalou in a honna ngak gige a, a kitung biambuam geuh uhi. Eimah hinna natawm a ding a lauhuai hiai bang operation pen kou a ding a a khatveina ahihman in ka chii-te uh kiliing in ka nervous sim mawk uhi. Ka tupdan tak uh bel lenna te'n bomb ahong khiak zoh phet chiang ua, camp sung ah tailut a camp sungteng valok ding chih ahi hi. Gen a om bang geih in lenna ging a kizata hi. Dak 8:14 a gintoh kiton in target mun ding ah vak ka kap khetou a, camp lam pan in tua vak ka kap amuh tak un thau ahong ging pah borhborh hi. Himahleh minute 15 a gin toh kiton in camp sung ah bomb ngaih taktak in a hong puak khe zuazua ta hi. Naa sa a kap toh, thau kap ging toh, a vialtai toh buai chitak in a hong buaita uhi. Lenna in bomb a nih veina a hon khiat zoh toh kiton in gari in camp sung ka lut tou ua, ka muh peuh uh ka kap thal ziahziah uhi. A si leh liam toh puk in apuk zelzul maimah uhi. Kou leng gari apan kumkhia in a hing sun ka muh teng uh ka kap lum ziahziah uhi. A tung a lau thawng kawm giugiau a om teng ka sisan uh a hong lum tak in nuam ka sak thoh lehlam zozen uhi. Huchi'n in teng ah ban lut in mi om ka muh teng uh ka ban thah uhi.

Huchia maban ka sawn touh zel lai un group nih in ka hong kikhen kha ua, Kei, Khualpu leh Lily toh Nancy paikhawm kha in adang teng atuam ah ahong paikha uhi. Innsung khat ah room tuamtuam ah mi om a om hiam chi a ka check laitak un thakhat in thau ahong ging a, Nancy ahong kikou kheguih hi. Thau ginna lam ka kap phei ek a, pasal liansim tak khat a hong tuk ual-ual hi. Nancy naa sa in ahong thum hithit a, ka et uh leh a pang ah thautang ana lut hi. Himahleh, aguh bangmah sukha lou in a satak ah a lut paisuak kha a, a hampha mahmah hi. Ka damdawi puak uh nesak in bandage in aliamna ka tuam sak ua, a nat thuak nopna ding in morphine in ka kap uhi. Huchi'n Nancy munbit tak mun ah tawldam sak in maban ka hon sawn nawnta uhi.

Room tuamtuam a lut in ka muhte uh ka kap lum tawmtawm zel ua, masawn zel in mun kilkhat ka tun un thau tang hong leng vutvut a kintak in baang kilkhat bel in ka kisel uhi. Thau kap pen a hong daih chiang in kou ka kap zel ua, bangtan hiam huchi bang a ka kikap tuah nung un aw khat in, "Pasalpha na hih leh hong pawt in pasal kibeih in kibei ni." ahon chi hi. Tua aw ka zak tak in awl in ka kiselna apan in ka pawt khia hi. Mun awng liansim tak khat ahi a, ka ang lam ah mi thum ana ding ua, alai apen in ahon muhtak in eipau siang ngat in, "Nang maw Master Khaipu student Lianpu ? Na master pa sinlai hoihtak ka pe khinta a, tun nang mah ngei leng sinlai hoihtak ka hon pe ding. Kisa awle, tangval kua ka hia chih na hon theipah mai ding." ahon chikhe gumgum hi. Ka master pa min ahon genkhak tak in ka hehna a hong kuang zakta hi. "Eh ! Nang maw ka master that, Zomite melma pa? Kon zonna sawtpi ahita. Tun ka hon muta a, dam in hiaimun na pawt khe nawnkei ding. Bangziak a ka pu that na hia?" chi'n hehlua in ka khut sim tinten kawm in ka dong hi.

Amah ahihleh amin Thangnok hi a, ka Master pa kiang ah nidang a kungfu ana zilngei ahi hi. Himahleh, discipline hoihlou tak, mitoh kibuai gige ahihman in Master pu in hilh ut nawnlou in nohkhia hi. Amah leng hehlua in Master pa thah sawm in hunlem ngak den hi. Nikhat kei ka omlouh kal in khua lumlua ahihman in ka pu lupna tung ah lum in ihmu hi. Thangnok in leng huai hunlem a la in awl a thawm neilou hial in ka pu kiang zuan a, alawmte minih (adinpihte gel) toh Master Khaipu lupna toh hen khawm ua, a hinglaipi in a inn toh halkhawm uhi. Tua zoh in police te' mat ding lau in athum un KIF te vabel ua, a siamnate uh hang in KIF chief Pishak in ama personal body guard in pangsak hi.

Thu omdan ka theihtak in ka sin-ka lung in thuak zou nawnlou in a kiang lam zuan in ka taiphei a, kitawm kawm a kilep in a ngeibiang ah ka pek puk phei tep hi. Khualpu in khatpen ana boh tei a, akhat pen Lily leh Khualpu in ana bei tei uhi. Thangnok apukna pan hong thoutou in thakhat in back horse kick in ka awm ah hon tuan phei a, ka nunglam ah ka puk suk duai hi. Huchi'n naktak in ka hong kibei ua, hat mahmah ahihman in zoh khiat haksa mahmah hi.

A tha khauh mahmah mai a, hon suk khakna munte naa thei mahmah hi. Hon dom in hon pai ek zel a, huaihun chiang in simmohtak in hon halit khum veva hi. Sawt sim ka hong kibeihtak un panlak ahunta chi'n taikawm in ka kitawm a, ka khe taklam a pek didan a om lai kintak a ton thak in ka khe veilam in a ngawng ah ka vai phei a, naa sa in a tuk ial-ual hi. Ama gamtat hun ding ka pe nawn kei. A hong thoutou pan kiangkiang pen deihtawk in amai ah ka peksak ek a, si neng khawng hong kitheh khe zengzung hi. Tuanglai ah puksuk in naa sa in a kipek suangsuang hi. Ka lawmte ka en a, amau leng a kibeihpihte uh ana zou thoh sam ua, Lily bang bah gawp sim in munkhat ah ana tu ningniang hi. Lawmte lam zuan a ka pai phei laitak in Lily in ka min lou in a hong kikou phei a, tua toh kiton in thau hong ging in ka ban veilam ahong kisat nolh hi. Ken leng kiheiphei in thau ginna zawntak ka pistol puak kintak a dokkhia in ka kap phei a, mikhat a awm hum kawm in naa sak chitak in a puk suk giaigiai hi. Va naihphei a ka et leh Pishak Ningthoujam, Chief of Kangleipak Independence Force ana himaimah hi. Damzohna ding in tha hatna anei nawnkei a, anak leplep lel hi. Ken leng awl a bil bul ah kunsuk in, "Mr. Pishak aw, Zogam Zomite simmoh vual ka hihlouh dan uh a zekai nung in na thei a, poi ka sa mahmah hi. Hun lem neilai lechin zaw nami-nasate' kiang a pai a tuban zaw kamkei ihmu i phawng nawn hetkei ding uh aw... Vachi ding in kon deih petmah. Himahleh nang din tua bang hun a om nawnkei. Himahleh, ka khut uah na sihna in thu tampi gen ngei ding in ka um hi. Mangpha damtak in." chi'n a haizek ah ka pistol in ka kap suk a, mithupi leh thilhihthei, Zomite subuaitupa tuh gawtmun lam ah pai ding in transfer order ka peta hi.

Ka lawmte leng a hong kimvekta ua, huchi'n Nancy omna munlam zuan in ka paita uhi. Ka khut veilam baan ahon na mahmah mai a, ka et leh si ana luang suk mawk hi. Den a thau tang in honna kha ahi ding a, ka ban ah alutna ma avang heuhou zozen hi. Vangphathuaitak in ka guh kha lou in ka satak lakah a taang hi. Lily in a damdawi lam zil siamna zang in thautang tuh ahon lakkhiak sak a, ka tuamhoih uhi. Huchi'n galmun nusia in helicopter zang in Tonzang Army headquarter lam manoh in ka lengkhia ua, tuamun ah nikhat ka nituang uhi. Kei leh Nancy damdawi hoihtak in ahon enkol ua, ka serious louhman un a zing in it-le-ngaih tampite tuallenna, Lamka vangkhua tunkal ngaklah a galdot kawm in huìhkhua ah ka leng diaidiai ta uhi.

~BEITA~

©Siamsinna leh Vakiangbu