NGOI-OKH
By ~ Nasri Jona Tawmbing Douthuk
Sikha/dawi thu na gengen ua, ken le tamlou
in kon share tei maimai di. Sikha/Dawi i chih hi nam tuamtuam khovel
mun tuamtuam a tengte'n i nei chiat ua, himahleh a kila'k dan hi a
kibang lou kholkei hi. Tua kon gen di penle, a common lou lawmlawm kei. A
ziakbel sikha hia dawi ahih chih le amu tu'n le athei chiang tuan kei
hi. Kei ngaihdan in Sikha i chih sek pen hi om taktak chih ka chiang
ngam kei, dawi ahihleh i Bible ngei a imuh ziak in a om ngei ahi chih
chu ka gingta. Himahleh 'sikha' i vachih sekpen om taktak hia om taktak
lou,,,,,,,? Setan in mihingte akhem nanga alemchi'n khong mai mai
hia,,,,,,,,,,,? Bangteng hileh huailam i gen tup pen hilo ahih ziak in,
hundang a gen di'n koih hoih phot le'ng.
Amah (amu tu) ahihleh khokhat laisiam masa ahi a, kei leng amah
tanchin tomkim dong ding in, a inn uah ka vadianglut tei naknak hi. Ken
bel hiai a thilmuh (Ngawi-ok) lam sang mah in, a laizilna lam a a
paitouh zeldante leh private school a hong lai a apanlak dante dong ut
a, a tanchin tomkim gelh sawm ka hi a, himahleh amah tek upa lam ahih
tak ziak in, ka thildotte pen hon dawng kha chetchet theilou in, a
tangval lai hun leh a thil tuahte ahon gamgen suksuk leh tua kon thil
gelh di pen ahon genkhe kha a, a kiang a azi pipi in leng lamdang a sa
mahmah hi. A ziak bel a tangval lai a a thiltuah chih Pipi in thei mah
leh khatvei mah le Pipi kiang ah chiangtak in leng ana gen ut ngeilou
hi. Kei kiang a imm nei hetlou a hon-gen pen Pipi in lamdangsa mahmah
hi. Amah ahihleh tu'n EBC saptuam ah Upa ordination pension in, azi atu
atate toh Mizoram singtang khua khat ah khosa lel lel uhi.
Unquote : Gamteng kon gen a, nana ningman khak uh lauhuai ka sa ta, a thupi ah lutta ni mate:
( Note : A simtute a dia a nopzawk nang in, first person kon zang mai di )
Kum 1950 in pawl 6 ka pass a, a kumnawn 1951 a ka laizilna sutzop
theih nang lametna ziak a Thanlon Manipur lam ah ka vahoh na ah ka
damsung a ka mangngilh ngeilouh di khat ka vatuak kha hi. Khatvei mah ka
na hohkhak nailouhna ahihziak in Bukpi ka tun in mahnawh nang lam
theilou in, Bukpi Pastor pa kiang ah Thanlon lampi ka dong a, Bukpi
Pastor pa’n leng lampi tam dan khong leh, lam haksatdan teng hon hilh
kawm in, Thanlon lampi a hon kokmuh hi. Bukpi apat kipankhia in Thanlon
lam zuan in kong paikhia nawn hi. Bukpi leh Thanlon kar a ka pailai in,
kuamah mihing zin kivialleh muh di le a omkei ua, Theham betkhiak bang
mai in a daih in adai dedu hi. Kei leng a guk a thomhau kisa kawm pipi
in, Thanlon tung hak khak lau in ka pai zel a, ka lungsim ah banghiam
lauhna ka nei mok hi. Ahihziak in banghiam ka lauh chih ka thei tuankei.
Huchia gamnuai a, kuamah thawm zak di le omlou, thawmhau tak a ka pai
lai in, ka gal lam ah mihing hileh kilawm, kei lam manawh a hong pai ka
mu a, kei leng thawmhau ka kisakziak in, a guk in ka kipak mahmah a,
amah tuahkal ngaklah in ka kalbang a pan/suan sau hial hi. Chianglua
hikei mahleh "mihing ahi" chih ka thei chiangta, himahleh amel leh puam
ka mu chiang naikei lai hi. Ama a nisa vengvong huih leng nung mahmah
lou hinapi, ka mimuh pa ka naih hiaihiai leh huih khong hong hat
hiaihiai a, thil gimnamse mahmah kaz a hi. Ken bel ganhing/gamsa si om
hidi'n ka gingta a, ka mailam ah ka pai zel hi.
Ka kal uah paching laam 30 di khong om chih in lamsak lam nilim nuai
ah a na ding a, kei leng ngaih phatlohna bangmah neilou in ka pai zel
hi. Ka naih hiaihiai a, a kiang naichik ka tung a, ka et thak leh ka
mimuh mihing pa-ngai hilou chih ka thei suah hi. Amel ahih eh mihing mel
ahia, a pumlam ka et chiang in a omdan mihing om didan ahi thei kei. A
Ngoi tengteng a ngawng ah kivial in, a gil tanpha in a kaaikhia a, a
Ngoi kia le hilou, alung, a sin, a gilpi, a gilsung a thil om tengteng
ana awk hi. Amah en a ka khawl leh, aman leng kei lam hon en in hon
nuihsan zawmah a, lauhna'n ka dim hi.
Himahleh lau a taisiat in kei a dia omzia neilou ahi chih ka thei a,
pilvang tak a kingaihtuah in, "kua na hia awi? Bang dia hiaibang a om
maimah e ? Mihing om didan le ahi mawngmawng sam a,,,,,,, . Hehpihtak in
hiai apat paikhia in. " chi'n ka houpih thei hamham. Himahleh ka
houpihna kamkhat in le hon dawng kei a, ka mit mahmah a hon en hileh
kilawm in, a etna ngei en den hi. Atawp in kei leng beidong, hih didan
tuan theilou ka hihman in Pathian kiang ah hiai bang in thumna ka nei
hi. "Toupa tuni a ka thilmuh, chikmah a ka muh khak ngeilouh ahihziak
in, nuam ka sa kei mahmah mai a, kei thu lah hon manglou in, vuaitam
veitak paikhe di’n ka sawl a, himahleh a paikhiak louh ziak in, nang na
thil hihtheihna’n hon hawlkhiak sak in" chi'n ka thum hi.
Ka thumzou, ka et leh ana om nawn kei a, kei leng nitum ma in
Thanlon ka tung hi. Thanlon ah leng damlou in buaipih ngai hial in ka om
a, inn ka tun kik nung tanpha in, ka sam tengteng pulh gai vek in, kum
khat phial mahmah sam neilou in ka om hi.
Writer's Note : Member te lak ah ana theikha le i om maithei, kuamah kidong zui kei leng chih kon ngen ahi.
~~~Beita~~~
©Siamsinna leh Vakiangbu
Comments
Post a Comment