LUANKHI

By ~ Bhyak Hawxel

Luankhi aw luankhi! Kei ah bang kinepna nei a, hichi bang hinkhua hon zang sak tel na hia oi? Chi in luankhi kai zungzung kawm in  Kimte in,"Hiai sim in Ching" chi in a khut ah lehkha bu tuh ahon pia a, ken le sang leh phen pah ka thuah ngal a, ka hon sim pah ngal hi.

"Na geelngei sam hiam? Kum mualliam sa a, ki-itna hinkhua I zat khomte, kei lunglai ah ngilh ni tuang tung ngeilou ding eive. Nang tuk a ka hinkhua subuching leh sunuam, om non din ka ging kei, hiaite ziak mahmah a leng singdang ang-ah loubang tul ding in ka hon phal thei mahmah kei, ka ngaihtuah mai lele ka dip a hawm a luankhi'n a hon tum zou den mai. I hun luite ka geel lel inle mittuite a daai sak petmah mai hi. Ahi alah ka thuak gentheihna, lunggimnate kikup pih ding ka nei kei. Kei kia a ka thuak touh zel ding mah hinteh,  chi in haksa sa pipi in ka thuak zel dia, ka thuak zohlouh chiah hiai khovel ka nuse dia...a beita ka himai di. Kithat mai a sih ding bang ka ut a, Pathian kiah le ka hinna la ta mai ding bang in ka ngen sek a,hilele a khonung chiah na kipahna mel mu lou a,mualliam ding ahon phallouh ziak a diam? Hiai kon Iitna thute gelh theilai ding a ka om. Huaiziak takin nang bek in hinkho nuamtak non zat ding kon deihsak lotel hi. Alehlam ah bel huai midang hon kipak saktute ka thiik lotel ding hi. Kon Itluatna ziak a hiaibang lungsimpu leh ka lungsim siatman in midang na neih ding ka ngai thei mahmah kei zel hi. Tunitan in leh ka damsung in midang adin hon phal ngei ding in ka ki-um kei a, ka lungtang naa theilua eive bawihte, gibang i khen mai zaw kei din anaa lua.

I omkhom theihlouh mai zaw a poi ngei mai, kon ngailua tutan dong inle kon ngai lolai a,kon ngaihna ngei leng khang semsem hizomah lai eive. "Iitna" kichi hichi ana himai mah maw? Thuaksiam in theihsiam a haksa ngei mai..Bangchi bang Iitna a kei tankhak? Ka ngaihtuah lel inla ka pona ban lai tel, naa ka sa lokha.

Ka ang a kon pom belh lai a, "U, hon paisan ken aw" chi a gen tuantuan lai in, nang maban nopsak nang khuallou hileng zaw pai lou ding mah keive, huailai hun khong ngaih huai hina maizen e maw? Deihthoh tak a, nang toh a masak na pen ding in I hon kitawp (kiss) hial zaw, kei hinkhua adia a manpha penpen hilai eive. Ka ngaihtuah kik a huaizan a,ka damsung adia honpi mai hileng zaw!! kal ah melma haaltu ding hong omlou ding hia maw? Bawi, kei maban d sang a nang maban a vual na eng khak ding ka lauh luat ziak ahi o? Hon ngaidam in aw. Ka geelkik zel a, a haksa ngei mai, ka damsung nang ngai a hei a,nang lah singdang siang zuan ding hita chihtel puaksiam a hak tel mai maw? I hei khom na munte gal in ka don zel a,luankhi'n hon tuum e. Ka gelgel zel a, hunlui phawk suahna lel a suak zel hi. Nang adin ka chingzou non kei, hon iit in hon ngai lotel mah leng le, nang adin zaw siit huai mah ka hi ding hi. Nang le na chih mah bang in na maban subingtu maimai ka hi, cih ka kithei chiang lawta. Himahleh "U, honpi inla omkhomta ni. Nang hon muang lua ka hi" na chih, ngilhni ka nei non kei d. Ka Iitluat na hi a, na hi gige ding. Bangmah kon hihsak zoukei. Bangmah ka hikei hilele ka lungtang neihsun nang a ding kia a om ahi den ding. Ka hinkhua ah munlian tak luah na hihlam thei den in aw. Nang adia ka zekai man ding lauhna in ka heina pan kon chiahkik ni a, ka tantawk zaw na sakmel muh khak lel ahi ta. Hiaiteng tung hial dia zaw lamen mahmah lou keive. Kei nang toh tulkhawm ding a hong chiah hisam keive. Ngaih aw bang lungsim gelta na hiam? Tun zaw bang kim kidang in, a kikhaita ngei mai maw? Bang doh-ai hi ding hiam? Ngai in malbang kon koukou zong tong hon dong din na heina sang lawta hiam? Hichi mai a nihgel kal a tat zaw puaksiam ahak lua. Na kipahna ding khatbek leng kon hisak zohma a,hiai bang lunggel a khenna kawlni non suahpih tel zaw, lungmawl in ka thuaksiam kei. Na sakmel muh ni in maitai tak a ka kilatsak hang; ka lungtang thuak a nalua. Nang kon iitna bang a iitna bukim ka muhna a om non kei d. Nang le non iitna leh non khualnate ngilhni tuang tung non kei di. Ka ang ah kon pombelh tinten a deihthoh tak a, i kitawp(kiss) laite mitkha ah hong lang a, na thilgente leng ka bilkha ah a tham den. A nalua !! ka gelkik nak sem leh anaa deuhdeuh zawmah lai, damsung hinkhua hichi ding hita mahleh, nang ngaih ka bang non kei ding.

Na theihlai ngei ka lamen, ka hong hoh di chiang a non pi zelna leh ka paichiang a non khak zelna munte na theilai na maw?... Khut kilen a singdang englou a nuihchiam lel kawm a i kiton latlat sekte a ngaihhuai ngei mai. Ka lunggel mitkha ah a hong laang a, nang kon ngaihtuah hun in ka kipak thei lua. Ahi alah I kar simthu ka ngaihtuah chiang in luankhi'n ahon tum zel. Aw! Ngaih huai hina mai e... ka itluat aw, hon gelsam lai dih ve maw ? Bang teng a hong tungzong GIBANG KHENLOU DING chi a I chiamsa hi a maw? Hiai hon theihpihtu PATHIAN, SOLKHA leh SI-AL te'n le hon theihpih lai ding uh eive. Nau...ka ngaihtuahna a vai lotel, bang a ka maban ah ka tuah touh d ka theizou kei. Keikia a hunzat ding leng ngaingam mahmah lou ka hi. Ka kah in omzia nei hileh chi na mahmah ing e! Ka maunate'n hon samkik thei a, ka luankhi in hon pikik thei hileh, Nau tu in ka bul ah na om ding a, lungzuan heh hon neem ding hi chin a maw? Nanglou a hinkho zat zaw bangmah kanna lou eive maw? Hun teng leh ka lungtang tawng in hon phok mahleng, nang adin ka chin nonkei a hinteh chi in luankhi ka nul zel mai ding. Kon ngaihdan, itdan te lah hon gen gige ing a, thei le theisiam lotel ding hi chin a, bangziak a hiaiteng non thuak sak tak mai le bawi!! Ahihkei leh kei tan ding a SIAN lemgel hita hiam? Ka lungtang nat dante ka kikup pih ding lah omlou, nang kiang ah leng gen ngam ding a hi nonkei. Himahleh nanglou it ding dang ka nei kei a, nang ngilhna din hatna leng nei hetlou ka hi. Kam neemtak a non chiamte koi ah om hita hiam? Koi ah vazong leng ka mukik non dia le? Khongaih takin, ka thuakte hon geelpih sam lai in aw, kon ngai lo lai !!

Hunte mualliam in bangteng ahong tungzong KHUAMBANG KIP den ding chi a I tongchiamna sa ahi a, nang na peel zong in ken peel ka sawm kei a, huaiziak a tua hichia ka thuakte le haksa mahleh ka damsung a thuak denta ding kei voi. A nuam-ahaksa thuak khawm a,hinkhua zang khom a tul khom det ka ut lai in, kei deih bang in thil bangmah apai lou a hita mai ve maw? Kei din lah ka tantawk a lungkim di zaw haksa petmah eive. Ka theisiam theikei,ka mang a ka mat ding aleng hithei ka sak hetlouh, a tak gam ahong tung tel zaw alamdang in theihsiam haksa salua kei ve. Na nuihmai kilawmtak leh aw neem tak mai a nawn dawnnate kei adia manpha lua eive. Khovel ei adia sehlouh hi ding bang tuk a, ka ngaihtuah chiang in, ka pona a, ka mangbang lua. Nang bek nuamsa tak a, na om d zaw deih lotel hi'ng a, lah singdang siang ah na zaal ding ka gelchiang in, ka diip teipi a sut bang mai in, ahong naa chenchen mai ei ve. Iitluat aw, na sakmel ka lunggel mitkha'n hon laang a, na sakmin lou in malbang kon kou zel a, lah hon dawng ding om nonta lou a maw? Hiaite kei thuak ding a sehsa hilele ka thuak zou mahmah kei, hon geelsam lai ve na hehpihna toh kon sapna hon dawng hamham ve maw? Ka ang ah hon pawm in, nang toh tulkhom den a hun zatkhawm ut a, hon ngak den lai kei ve. Kei dia manpha lua nei ve Nau. Na bul ah ka omlai khong a bang chituk a nuamsa ka hia? Chih lelleng non theihpih louh ziak a, tu a gamla tak a hon omsan na hita d mo? I kichiamna sa te puanbang hong thak chiang a zaw, dalzoh vuallouh a luankhi hong phul khe zungzung te'n omzia nei non mahmah lou ana hita. Kon itluat na ziak a luankhi luangte hon nulsak bek laisam ve itluat aw....hon gelsam lai ve maw? chi a luankhi ka nul lai in nang lah nuam in nana hei khinta mai zaw, anaa lua.

Itluat aw, na geelngam diam? I nunluite. Lung kituak a I chiamsate pel din a lawm lou zong in, non paisan na khaguk pai liam ding bang hi nonta mahleh, ka lungtang a mun liantak nana luahsa, hon khengkhe ding omlou eive. Non text nate bang ka muhlouh chiah, ka fon zatman le omlou sa thei petmah keive. Huchia va off hial chiang alah ka ngaihtuahna ten"honna text khaleh" chi in bangtan mah ka 'switch off' ngam kei zel hi. Bawi, kumkhat mualliamsa bek sapkik thei hileh, chih ut na maizen ing e, na tongsuahte ngilhni a om ngeikei dia. Na kam neemtakte leng zak chim ni neilou ding h'ng a, hichi pi'n chikciah nang ngilh a nang ngaih lunglen baang in, ka hei thei diam maw?

Ken kon ngaih nate lah a thon lel suak hita chih tel. Khongaihtak in 'U' non cih zel bangin, hichin khatvei lel couh hon ci kik thei lechin, bangcik tuk a kipak leh ka hinkhua bangchi tuk a kei adia manpha a cih ka genseng kei dia, gelh leng ka gelhzou ngeikei lai ding. Dam a iki muhkik non ciang a, tongciamsate tangtung sak ding I chih hilou maw? bawi, kon tungkik ni a bang chi dan ana hita mai ale? Ken ka hinna nang kon iitluat na ziak ale taan ngam di khop a, ana pang tinten sam keive nau.

Hunte ahon mualliam zel a, hizong na vang ka ngaihna a liam pih zoukeia puanbang hon thak zel zo eive. Nunluite lah mitkha'n hon laang a, lung kituak a I heina daidam lota, ka muhpeuh leh ka maituah peuh lah hunluite hon phawk suah sak tu ngen hizomah uh a, keidin leitung paisan mai bang ut tonton sek keive. Kumkhat val bang, haksatna tuamtuam I thuak sate hichibang lel suak din na phal taktak amaw? keidin zo thuaksiam ahak in ana lua, bawi aw. Hichiding mah ahizong in, zankhat bek lungnuam a zaalkhun tungah maimit ka siing theih nangin, hon panpih in heh hon neem ve maw? Zankhat leel couh lungmuang a imut ut lota keive.

Nihgel houlung tuak a I heikhom nasa ka veel kik ni'n mittui a dai nuam ngei mai, hichi pi inzo hiai leitung ah bangtan mah omzou din ka ki lamen nonkei. Lungin theisiam hilechin zo, hiaibang tel ding zo ki hilou hi'a maw? Mualzatam in hon haal a, houlung khum theilou a I omlai nang ngaih luat vanga ka luankhi nul te leng huul nai lou a, non paisan mai zaw kei din ana in ana lua. Hiaite ziakin mi ka gingta thei nonkei a, ngaih ding in kuamah ka enthei non takei, keidin ka SUANGMANPHA na hi a, na hi den lai ding. Na iitna lou toh kei bang ka ci maimah diam maw?

Huihnung hiauhiau a kisem ging ngeelngeel tenle keidin gen neitak bang mai asuak sak ta. Tuklai Vuahzu te bang ka thuak khak hunin, nidang a vuahnuai pi a kimu dia kong pai nepnep lai a, nang leng kawt dimdem sa a, ana om na pi in na khut te hon zak a non na angkawi laite ka phok suah zel a, huaihun ciahzo ka lungtang naa lotel eive, a kawt tuaktuak kikoi hul sawm bang mai a kiptaka kikawi lai te ngaihhuai sa in ka geelgeel a, lah sapkik theih hita lou ua maw...

Ka nidanglai hun bang ka ngaihtuah kik a hichitel a ka hinkhua ah dinmun liantak nei ding a gingtak na leng neilou inga, tua I hihcih mai zaw ka ZAALMANG himai leh ci na'ng e, himahleh ka ngaihtuah beh ciangin ka hinkhua non siik khak kei adin IITNA ah ka gingtak na teng ka mansuah nunga, hon muchian thak sak tu nana hizaw. Ka PHULOUH IITNA tuak kha ka hita mai ve. Chingzou bek ana hileng zaw, na iitna tangzou sam ding hinga cih ka ngaihtuah ciang in, ka mit ah luankhi hon luanga, kei di'n naa hina maizen e. Ken kua kiangah ka haksatnate genin, ka gentheihnate genta ding ka hiale? Keidin zaw nanglou omlou eive, nang tuk a ka hinkhua hon theisiam leh thil bangkim ka hilhna omdin ka gingta kei, ka diary ah bel ka mangbat nate gelh zel mahleng huai ka thugelh te zaw, a them neng lel ahi.

Genvuallouh, gelhzoh vual ngeilouh ding iitna non piaksa, hichia na non nawtsiat tak mai zaw... IITNA VANGTAH a chih uh tun ka tungah a tunga, ka theisiam ta a, thuak leng ka thuak khak ahon suak ta. Bangchituk a ka hinkhua in hon poimoh ahia? cih hon theisiam sak thei hilengzaw IITNA VANGTAH mai hon tangsak hial din kon gingta kei, kei ciit zohlouhman leh kon iitluat vanga ka THIIK thu siat luatman leng hinteh maw? Hiaiziak mah inleng singdang siangah na zaal ding kon phallouh kei hon suna pen leh haksa ka sak pen ahi gige.

Na iitpen hi nonta kei mahleng, kei adin bel ka iitpen na hi den veve di nau. Ka IITLUAT ka NGAIHLUAT ka nau aw, ci in ka hon sam zel lai a, dawnkik na bel ka za ngei nonta kei. I tongchiamte ka peellouh bang ngei a, nangle peellou ding kon sak ziaka, tua hichitel a pona ka hi di maw? Bang in hong lungliap sak ahia? Hichimai a non na taisan tel, hehpihtakin hon hilh chian ve maw? Athuak ahak lehle ka thuak teitei sawm na keidia, hichimai a hon liamsan din ka hon phal thei mahmah kei.

Na vangngai a loubang ka tul det hang, nanglah sulhei simthu hon leel lou ding cin a maw? IIT aw...hilele ken hon ngai lo lai keivoi, "Midang nei dingin hon sawl non ken aw" nang singdang siangah saan mun na muang zongin, kei kua siangah loubang tul in saanmun ka muang thei diam? A paalzaw siangah na heizong, lung na muang na hiam? Cihkhong theinuam lai keive. Na nung leh ma hon viil theilai bek leng hon delhzui den ding keive. Kal ah melma toh nuihciam lelkawm a loubang hon tulpih ding un ka iitlai ka hon phalkei, ka hon phalthei mahmah louh pi, nang ka iitluat aw.

I chiamsa tangtung hileh hampha kisa mahmah ding hinga aw. Kimuh nawn hun ding leng ngaklah taka I genkhawm lai azo kikhen sa a kimu dia kigenkha lou eive maw? Thilzaw second khatlel aleng bangkim kikheng lamdang thei ana hi maimah citel, amak tel mai. I hun paisa te banga I omkhawm non cianga nuamtaka nuihciam lelkhawm ding I cihcih te khong, ngaihhuai e khai maw? Hun pat thak theih ding hileh zaw, kei maban leng sunzom lou a nang hon viil a hon ompih den zaw ding mah keive. Nang adia hihtheih le ka neih mahmah louh ziak a, ka hihtheihsun ginom na toh ana pang den keive.

Sawttak gentheitak a hiaizah haksatna I pal zohnung a, I damsung adia mangpha i kikhak dan zo theihsiam leh thuaksiam ahak tel mai. Bangdang in hon khen lou a, na lungsim in na hon gamlat a hilel di e maw? Hunlui ka geelkik nak peuh leh luankhi'n hon tum semsem zomah eive. Kei kinepna omsun lah, kei hinkho bei hun ding a hita mai a, hiai khovel ka notsiat ma ngei in, ka kha hon veh bek lai ve maw? Nanglou azaw mangbang leh khattang lua keive.

Ka heina pan na iitna toh honna dawn ding kinemtak a kon ciahkik ni'n kei kinepna zaw huih in hon mut mangsak a bangta mai a, bangkim a thawn lel suak zou hita mai eive maw? Na heidan adang in na hon nawlkhin mah abang ta, ka luankhi nulna'ng lel a hon ciahkik ka hita, hilele na sakmel leh nuihmai kilawmtak muh lel le keidin zaw amanpha tak leh ka kinepna omsun ana hita. Himahleh hiaitan kana ngak nung a, ka tantawk zaw na kasa lokha zel, hiaite zaw kei haiman le hi ta'n teh maw? nau... keisang a chingzo tham ngen a om lai un, keilel tak taisan louh in ka om mawk dia maw? Na hinkhua hon su nongkai tu, tantawk hiai di mah hi maw? Hilele chih aomlai, ka gen awmzia tak cu maw? midang ngaithei nonlou dia non koih bang ngei in, keisang a hon iitzaw omdin ka gingkei.

Ka ngaihtuah na mai inle ka dip teipi a suut bang mai in anaa sak a, bangchin ahia ka omtak di? ka theizou kei. Iitna hon theichian sak tun, nang ka hon iitna lungtang na taisan ta, keidi'n nang ngaihluat vanga luankhi nulna hinkhua zang ka hita. Na geelngam na diam, I nunluite hichi mai din? Geel lai sam dih ve iit aw, phal taktak nahi na hiam?

Non taisan hial tak lele kamneem bek zang lai ve maw? Hiai khovel kei adia mun neuchik om hita eive. Nunnuam taka na hinkho zatte hon muh khong ut mahleng, nuihciam lel kawm a singdang siang na belh ding ka ngai ngam kei lua. Himahleh nunnuam sawlbang non heisan ta a. Hilele singdang adin ka hon phal thei nai tuan mahmah kei, kon hici phallouh dan thu kon gente, thu houchik bangmah le uh, omzia nei tak a kon gen ahihlam thei in aw.

Ka chingzou kei, a chingzoulou mah hi'ng, singdang 'U' chia malbang kouh ding na hita, malbang na kouh ni'n nidang a keile kamneemtak leh nou ngiingei a hon samkha ngei na hihlam manghilh sam ken aw. Singdang englou a I heikhom lai a," Bangteng tung lele kon taisan ngeikei ding U " ci a ka khut kiptaka non letlai te bang ka phawk suah a, I hunluite a hong laang dundun mai uh zaw, luankhi a hon phul khe zoihzoih dal zoh a haksa tel mai uh. Tongciam sate manghilh ding zaw a haksa lotel a, ngilh mai leng ka sawm kei. Ngilh ding chi lenglah kei lungtang na sak tu ding ahon hi semsem zel ua, nunlui ngaih ana tel mai... bangchi'n a ka geel tak mai ding? Iitluat aw.

Hiai lehkha mawltak a ka gelh te na simkhak ni'n, na kiang nai ah omtheih na din hatna nei non din ka ki gingkei, himahleh ka kha'n hon gaal dawn den ding ahi aw? Thil bangkim a kikhel ta zawngin, nang bek luankhi nul in hun hon zang ken aw. Hiai a thute hon nehnou sak tu dinga ka gelh a hi kei a, kon Iitdan a them neng lel ka gelh theihdan dan a ka gelh ahihlam thei in maw? Hiaibang tel a nang kon iit bang a iitding simlei tungah nei nonlou ka hihziak a, hiaikhong mittui kai zungzung kawm a ka gelh ahi a, nana sim ni'n "KA LUANKHI NUL NATE, NANG DIN KIPAHNA LUANKHI HON SUAK, TEITEI HEH AW NAU" kon chihte geelkik lai in aw.

Keizaw hiaibang hun in nang toh I hinkhom nawn(nextlife) hun adia honna ngakta dingin kana paisa ta mai ve, kon NGAILUA kon IITLUA bawi aw. Damtakin na hinkhua paisa sanga nuamzo dingin hon zangta in, MANGPHA! MANGPHA ka IITLUAT O!!!

Hiaibang thu ka simzoh in ka khitui in ka biang ana kawt sak nilhnelh te nul kawm in, Kimte kia'h lehkha bu tuh ka pia a. "Kim hiaibang iitna zaw a lamdang tel mai maw? ULal hon iitna zaw a thupi lua" ci kawm in, ka lawmnu hehnep dingdan tuan theilou ka hihman in, a luankhi te ka nulsak a, huchi'n ka lawm iittak adia a hinna hial ana lan khe ngam Lalbawi haan lam manoh in, tungsuunni bang tum ding kuan hita mahleh ka lawmta un nehnou kawmtakin haan lam ka zuanta uhi.

BEITA ! BEITA_BEITA EI...

Writer's Note : Phuautawm maimai himahleh nonna simsak zoh hamham ziak un Ka kipak mahmah ei!!! ;))

©Siamsinna leh Vakiangbu