KHAMTHEIH LEH NGAIHNO

By ~ Dizz Guite

Sunday zingkal khat Tangval nou, tha hoih leh duangching nungakte mitla huntawk khat  Bike in hong kikhoh heuhheuh in nungak zing tuitawite'n a na en ua,  hoih sa in en liam vungvung mai uhi. Tangval pa leng hat deuh in bazar lam zuan in kikhoh vengveng hi.  Bazar a hong tun in a gari lamnawl ah koih in amah tuh  inn kil khat kong neu chik khat a lut geih in, minutes 10 vel ding in hong pawtkhe pah  a, sungkuante an nek lap din hong taikik non vengveng hi. Sungkuante toh an ne khawm in a nu kiang ah  "Nu tuni biakinn kai theilou d ka hi , ka lawmte toh plan nei ka hi" chi'n a nu kiang hon gen a, a nu'n leng "bang plan nei e? Biakinn kai masa ve  . " chi in aw nemtak in hon dawng a. Tangvalpa'n  "nitak ka kikhawm na d " chi in hon dawng non hi. A nu deihna sang in ama deihna lam hon zuita a... Lawmte tawh sun hun in khawnol lam ah zu leh laikap/laiden (card/poker) kimawlna in hon zuan in hong husa in nuam hon sa ua..zu leh za /laizial te leh sahou khong ne in nuamsatak in sun hun hon zang beita uh hi.

Nitak lam an nek lap lou in, inn hong tung kik diaidiai a ; a nu'n , " bang chi na hia tu tantan , kihahsiang inla'n na an ne pah in. Kikhawm kuan hun dek a hi, " chi'n a nu aw nem za di lai a nu aw gum tak hon za ta hi. An ne zou kikhawm din hong kisa in a lawmte'ng innkong ah a na ngak khinta uh hi. A nu'n kiton ni uh,  na nau leh na pa kuan khin kei kia d ka hi a,  chi in kong kalh in kikhawm din a hong kuan khawm ta uh hi.  Huchih lai in amah tleirol/valnou ahihman in lawm ngai mahmah a ; A nu toh leng biakinn sung a tut sang bang in lawmte kiang a tut a.  inn pua lam deuh a om bang a tel sek hi. Lawmte toh thugen ngailou in nungak thoh in ana buai thei mah uh hi .

Huchi bang a hinkhua hon zang toutou in nu leh pa thu zohlouh,  hilh theih non mel louh in a hong om ta hi. A pa ahihleh mi kamtawm leh mi om hithiat a hi a, sepna lam ah leng a lawh tam in , mite mai-et mah ahi hi.. Saptuam bang ah leng committee member a lut a hi a, mi'n a theih mahmah khat a hong suak hi.

Tangvalpa ahihleh college kailai ahi a, melhoih in tha hat mahmah lai hi. Nitak pawt hat in ut hunhun in innlam a hon zuanta hi. Kholai ah bang vahih ahia chih a nu'n lung gim pih mahmah in, nitak a paihak in leng a na ihmut san ngam kei sek hi.

Hichi bang a, a nu'n lunggim sintawl a a tapa ana ngak ngitnget lai in , a Tapa zukham sa in inn hong tung diai vang lak hi. A nu kipak leh kha sia tak in ka Ta bang dia hong hi chi paihak tel na hia? Bang vatuak a mi toh vakisual a inn hong tung zoulou d kon sak lai in nong tung diaidiai a kipah huai hi na e maw  ! chi'n mittui dai tak in leh aw vuang helhhelh in hon pauta hi.. Himahleh Tangvalpa bel ding le ding zou nonlou in a zu kham lua ahihman in lupna tung kidenna pah in a nak puak pah dirdir hi.

Hichi bang a hinkhua a zat det ding pen a nu lungsim lam hilou lua ahihman in, a nu'n zankhovak zenzen in Pathian kiang ah ana thumsak zel hi.. Himahleh amah tleirol leh thathak mahmah lai ahihman in lawmvual lak ah leng cham mahmah leh akua thugen  zui a ngai d te ahihlouh lai tak leh sial a bil leh a ki  kikim laitak toh a kibang mahni kimuang mahmah ahi a ; Zu ne in lawmte toh pawt,  nungak helna khong ah mi vengte toh kisual veng hausate mat leh hen khong in a hong omta hi. A nu itna theisiam thei nailou ahi  a innsung khosakna lungsim ah ngaihtuah pha a hih louh ziak ahih chia  nuam tal  a leng ahi mai thei.....!

Nitak lam khat khua muikuan in a lawmpa khat in pawt din a zon a, amah le Gari lakhia in hong taikhia uh hi. Sau lou a tun un a lawmpa'n, "  lawma laizial ka tep ngei khat na duh ding sin himhim d le " chi in a lawmpa'n hon panta hi.. A hon tep ua a lawmpa kham in nui chichiai a Tangvalpa bel kham thei nailou ahi ding a bangmah in a vei sekei hi. Tangval pa'n lawm pai ni chi'n a lawmpa zawn in a lawmpa khamlua hi dia gari a  leng tu tang zou nonlou in tangvalpa hon pom kawm in hong  paita uh hi. Tangvalpa inn a hong tun tak in  a  sungkuante' an nek laitak ahihman in amah le khut sil in an hon ne pah hi. Nidang a an le ne khawm ngeilou innkuante kipak in an bang hon hai tuan mahmah uh hi. Tangvalpa pen den a, a laizial tep in a an nek laitak in nna hon semta a, a an-kam lim in thuk thum bang hon gai mawk hi. Anu'n nidang a an huaizah ne ngeilou ka Tapa hong thau dek ahita d chi'n ana lung nuam in , a Tapa bang hon zut thiamthiam zawzen hi.Himahleh Tangvalpa  bel a sunglam a an duhna damdoi vane kha ahih chia an hai a hong hi lel hi.

Huchia huai a laizial tep a om chiang in a pawtpawt pen adan om deuh in a nu a lungkim sak tuam mahmah hi. Aduh adeih om leh a pa kiang a gengen ngai nonlou a Nu in a lei sak pahpah ta hi.Huchia a nu'n a etkawl lai in , a naunu toh puan khong sawp khawm,  inn khong hah in hong om uh hi. A lawmte lam le hon awlmawh khol kei a , himahleh a lawmpa khat in bel a duh thei ahihman in a vakipawl thei veve uh hi.
Huchi'n, a naunu toh innkhong ah leng  hong kikhol theita ua, kholai vak leh leng a naunu mah toh pawt in biakinn kai lele huchi bang in hong kithuah theita uh hi. Huchia a om sung sawtlou in a lawmpa'n vaveh nonlou in hong omta hi. Himahleh amah a lunggulh leh a duh mahmah huai a laizial tep a khu pawt litlit din lawmte toh nuamsa tak a om ding chih pen a lunggulh mahmah lai hi.

Hun sawt kuam tak a lawmte toh kithuahlou a hong om nung in, nikhat a lawm it mahmah khat toh dukan ah hong kimu kha ua,  nidang a  alawmta ua a om dante uh gen khawm in nuam sa mahmah uh a, n tak chia nungak hel din hong kithukimta uh hi. Nitak an nek lai in Tangvalpa'n a nu kiang a sum cheng 100 hon ngenta hi . A nu'n bang di a ? chi a a dot leh ka lawmte toh zingchia an nek khomna nei d ung   a huai a d chi in gen i. A nu'n leng a nik sakhau apat sawk khia in pepah hi. Amah leng a lawmpate inn manoh in hong pai phei a a lawmte hun khop ana omkhin daihta uh hi. A lawmte bang in hiai pa kha goodboy luata kimukha nonlou a na chi sauhsauh ua ; himahleh amah dangnal mi ahihziak in chiamnuih hat in gualnuam mahmah uh hi .

Nungak hel din hong pawtkhiata ua. Mun thum mun li ah hong kikhen uhi. Amah leh a lawmpa inle  nungak melhoih leh lengla hau mahmah khat a vahelta uh hi. A nungak helna uah tangval tam in pau masa d bang kituh in a nungak helnu uh bang tuisuak d bang in sawl thithei in  Nuam sa mahmah uh hi. Nungak nu Melhoih in sexy mahmah  a, Tangvalpa' lungsim ala mahmah hi. A ki-et dante uh hong tuam in,  signal lam hong suak feih mai ta hi. Lawmte chiamnuih gen a a buai mahmah lai un,  kuva lei din amau gel vapawt in a nungaknu naunu toh lenglate a na tu uh hi.

 Kuva lei dia pawt himahle uh lamkal ah Tangvalpa'n gen ut a neih ziak in khawlpih a ; nungaknu kiang ah hichi'n gen hi " khatvei kong pawtna himahleh na om dan leh na lengla kholh dan nuam ka sa a.. na lungsim a piching hi'n ka thei. Tuilum non suah chia zaw ka itluat ka Ngaihnou  d mah na bang " chi'n hon gen a ; Nungaknu'n leng nui heuhau in a himhim in na min bang a le ?  Kei min Chingte ahi a hon chi a , Tangval pa'n " aw , ka min maw... LIANZAKHUAL@Khualpu..U khual chi in hon sam le teh  " chi in min te kidong in innlam hon zuan ua. kuva te Chingte in hai theipah din bawl in lengla teng hon hawm hi. Khualpu in huai a thil hawm dan en in lung nuam mahmah in a guk in a na nui heuhau sek hi...

Nitak dak 9 a  hong gin in  Khualpu leng innlam zuan din a lawmpa toh hong pai in lawmte vatawn ni amau toh ton ni chi'n a Lawm dangte  vazawn dia a pai ua leh , A lawmpa pen thakhat thu in lampi a kisial pai in mithum vel di'n a um kual uh hi. Huchia a lawmpa amuh chiang in Khualpu leng amat khak penpen man in a kipingpei maita hi.

Huai hun laitak in Khualpu lawmte kua mah a naih man d om lou leh amau pawtna gamla deuh ahinman in Khualpu leh a lawmpa soisak in a hong omta uh hi. A lawmte'n gamlum leh thawm ging a hon zak phet un hon delh zui pah ua himahleh Khualpu leh a lawmpa bel sisan naisan in ana dimta uh hi.

A kalnawn Friday nitak in Khualpu in Chingte kiang ah nitak vaheldi uh ahihdan gen in Lawmte mi 4 toh kuan uhi. A lawm dangte bel  innkiim gamla lou ah nusia  in nungak helna ah houlim mahmah uh hi. Khualpu in Chingte kiang naih phei in "Ching, Nang kon ngaihna a haksa leh mi hon langpangte doudal ngap a hong hoh ka hi. Ngaih dang na neih leh hon gen in ? "chi'n Chingte bil ah hon hou siausiau hi. Chingte in leng dawngpah in , "Ukhual ngaih dang ka nei kei. Na itna kon sang in haksa na tuahte leng ka thei siam "  chi'n hong kihou siausiau uhi . A  langpang lenglate Vialpu in a hon muh in Vialpu innkong a pawt in a lawmte hon sam khawm hi.

Hiai bang a lawmte sam khawm ahihlam Khualpu lawmpa zuntha a pawt in a vathei a Khualpu kiang ah hon gen leh Khualpu leng lung nuam nonlou in Chingte kiang ah ka na pai d uh himahleh kelkong (gate) ka kheng phet un na kongkhak uh kilh pah in la'n na room ah lut ngal in ,  chi'n hon vaikhak ngeungeu hi. Chingte in le Lamdang sa tak in UKhual mangpha in aw..chi in mangpha hon khak a,  innsung a lut san hi.

Chingte innsung a lut zoh sawtlou in thawmging ngaih leh mi kikou husa tak a hawk loiloi hon zak chiang in lupna apat thou tou in a na ngai dide hi . "Khen lum ngeingei d " chia Vialpu hong kikou aw Chingte in a zak tak in a lupna apan paikhia in innkong khavak tang nuai ah dak phei in mi kisual hon gal muhta hi. Amah leng a chih na d thei tuanlou ahihman in gal et in a mite theih sawm mah leh a theih chiah melpu om lou in Vialpu bel a aw in a thei hi...Sawtlou nung in veng tangval te'n delhzak in kisualte hong tai zak uh hi.

A zingkal in Khualpu a mit tung kek in kikhui a, Chingte kiang pha zoulou in lumchip in a lawmte'n a inn uah ompih in amah bel tang zoulou hi. A lawmte VDO game kimawl khong en in lungsim a veiluat nei bang tak in ngui mahmah hi.

Huchia omlai in Chingte in veh dia gingta leh lam en tak a ngak a  a om lai in Chingte lah hong hoh lou a lawmte khat bek lah hong dak lou a hihman in lamdang a sa mahmah hi. Hiai bang a nungak helna ziak a nat tuak ahihziak in lungkim mawh mahmah hi...

A kal 2 na in hong halh mahmah ta a, aman leng a kin thei a Chingte muh d hon sawm pah hi. Nitak lam an nek hun vel in a bike lakhia in kin deuh in a lawmpa toh hong tai vingveng in Chingte te inn kong gate bul ah gari koih in Chingte a tuikul ua tuidim dek lai vahoupih in .thu omdan a gen hi . Chingte in ken bang mah ka thei kei . Vialpu toh leng ni dang in ka kingai kha kei uh a chi. Himahleh Vialpu te hausa in Vialpu Pa Politician a hih zawk mah lam Khualpu in a hon khonung theih thak hi. Himahleh Khualpu pa leng contractor a na hi sawnsawn hi. Chingte in bel Khualpu ngai mah ahi chi'n a gen a ...himahleh Khual pu in a kal ua dou daltu om pen amah sang a hat zaw ahihna hon theih in a lung nuam non het kei hi...

Khualpu leng pau tam non lou in a lawmpa toh inn lam hong kik vingveng hi. An hon ne in, an hon nek zoh phet in a lawmte tawn in pawt pah hi. A chuangkai na uah kituah kim chiang un. Khonawl lam alut ngeina uh inn  neu leh gual nopna lam hon zuan vengveng pah uh hi.

Gualnuam tak in a lawmta un hun hon zat lai un, Khualpu bel a kil khat ah zuthol tawi kawm in a na kun ngiungeu hi. Bang teng lung gel a bang teng ngaih tuah a ta mai dia le !  Chingte ngailua ahi diam? Ahih kei leh Vialpu khut lum a thuak pen pawna lua a diam ? Huchia vul ningniang a om lai in,  Bike khat hong tai phei in Nungak khat leh tangval khat kipua Khualpu'n hon muta hi...a et hoih leh Chingte a na hi a, a pasal kua a dia aw chi'n a en liam vengveng hi.

Nitaklam an nek hun ding kuan in Khualpu a inn lam zuan din hong kisa a gari hon start in lawmte kiang ah nitak pawt ding I hi uh,  chi'n vaikhak a, gari spin lat in vui kai zen in innlam hon zuanta hi.

Nitak an nek zoh chuang kaina a kim hun ding in Khualpu chuang kaina mun tung nailou ahihman in a lawmte'n a inn uah a vazawn uh hi. Khualpu om hia ? chi a a nu kiang a a vakan ua leh. Nou toh pawt d chi in a pawtkhia hilou maw ? chi in a na dawng hi. Huai laitak in bel Khualpu pen a zialtep deih khop lou a No.4 kikap dia Bazar a kuan a na hi mai mah hi.

A lawmte'n leng Chingte kiang lou koi mah dang a hoh ken teh chi'n Chingte te inn a hoh dia hong kisak lai tak un Khualpu mit lengthithiai in hong tung diaidiai hi. Lawmte pawt ni uh eh chin a lawmte toh hong kizui pawtta uh hi. Lam dung ah zawl la sa in, deih tawktawk in kikou ong ong mai ua nuam zaw hon sa mahmah uhi.  A zial tep uh ( Ganza) khat in lian deuh mai in hon zial zel a abanbanin  hong ki round niahniah mai uhi. Chingte te inn hong tun chiang un chu a pau masa ding bang kituh in tui dawn masa d bang kituh bawl zawzen in a sunglam ua semtu in a hon noh mahmah mai hi. Hichi bang a hong pau ut leh mit leng thithiai nungakte a dia bang hehpih  huai  lehlam zawzen khop a hong om chiang un Chingte in U Khual tuni tak nong chet dan uh a tuam ve ! a hon chih leh Khualpu'n mehchi khat kia le a ning huai  sek a eive chi'n chiamnuih thutak in hon dawng pah hi.
 

Chingte in leng a lungsim ah chu tuni ka pawt pihpa toh hon mu kha a dia aw ? chih ngaih tuah kawm in... huai le chu himah e maw... hi lele thuk kimawk khengkheng lou eive,  chi'n a dawng non hi.

Huchia hong om liliai lai un Vialpu leh a lawmte leng hong lut in Vialpu in Chingte kiang lam hon zuan pah in Chingte bul tektek mah ah a vatupah hi. Khualpu'n nuam salou sim zaw ahi dia,  hong kinungkin telhtelh in,  Nah masa pulh masa chih bang in kou ka na pai phot d uh hon chi a, Vialpu in leng, " aw Na pai hun uh le himah e,  na Veng uah nungak hon ngai d omlou ahi d e, nong pawt gamla sek ua? Zan sawt ma in pai mengmeng ua  " ki uang sak tak in hon chi lai hi. A lawmte bang nui laihlaih in vualtung tuanna in a la maimah uh hi.  Hichi bang a Vialpu houn te Khualpu lawmpa Muamuan in za thei hetlou ahihman in "Khual, ka lung a kim kei khatvei I sual himhim ding uh, hon simmawh ahi" hon chi a.  Khualpu pen a na nak hehlua khin ahihman in a Lawmpa Muamuan kiang ah Muan inn ka vapha zual dia hiah hon na ngak in aw ? Chi'n innlam manoh in tai vingveng a, a lukham nuai a, a koih sum 250 hon la in Muamuan kiang lam hon zuan vingveng hi.

Muamuan kiang ah tunphet in Muan nang vala aw hiai zah ka nei a, chi'n a sum pia in Muamuan in a zialtep Khualpu pia in Muamuan Zu lei din a vakuan pah hi. Zu zuakna a na kikhak khinta mah leh amau lawmta in a ut hunhun ua la thei ahihman un Muamuan in thol khat leh a lang hon tawi in Khualpu om na Zanglou/tuilou lai khavak nuai ah zan khuavak in zialtep in zu toh lungsim thuaklah in hong om ta mai uh hi.

Huchi kawm kal ah Vialpu in Chingte a nak neh zawhlua ahihman in Khualpu lungsim bel a kitam kham mahmah hi. Muamuan in bel ngaih chihte a na nei nailou himahleh Lawm ngaina mi leh lawmte thuakthuak thuakngam mi a na hih ziak in Khualpu adin a nuam tuam mahmah hi. Zan khuavak in a hunte uh, zangloulai peuh ah,Bazar kawm peuh ah,zu buk leh thanghuainate sepna mun a hong kidiahta uh hi.

Hichi bang hinkhua zang in Chingte lah naih ngam nonlou in hong om a, Kholai khong a Chingte gal et ut man in a hong pawt khia zel hi. Chingte a muh khak sunsun chiang in a U Vialpu toh Bike a kipua in Bar thupi taktak khong ah hong lut amuh chiang in Khualpu mittui a hong dai mahmah mai hi. Himahleh Khuapu in bel a pa sepna leh Vialpu pa a et kak chiang in chinglou zaw ahihlam a kithei mahmah hi. Hichia khosaknate a ngaihtuah chiang in a lunggim deuhdeuh in Zu leh sa khamtheih zialtepte leh No.4 tan hon zang kha ta hi.

Chingte in bel a U Khual sang in a U Vialpu bul bawl zaw in, a U Vialpu te inn bang ah a vahoh sek hi. Vialpu nu bang Nu chi'n sam in a nu maipha bang vazong in Khualpu hon kimangngilh bawl hi. Huchi bang a Vialpu veh leh zut bawl a hihlam Khualpu nau nu Momoi in a hon thei chiang mahmah hi. A U Khual kiang ah U hi chi'n thu a om a himahleh tawldam sawm ve maw a hon chi a, a  sanggam nu aw a pan hon zak chiang in Khualpu lungsim thal a kap bang in a lungsim guk ah, a thuakte ziak in khitui naptui toh dim in innkong tual khavak taanna nuai ah kap huphup in hong kidik hithit mai hi.

Anau Momoi in bel U, nunu te'n hon thei d ua zum huai ahi pai inn ah I lum d hon chih hial chiang in Khualpu in anau nu a khual ziak in innsung ah lut in a room zuan in a lupna ah khupboh in hong kidik huthut hi.

Hichi bang a haksatak kawmkal in Khualpu pa accident in hon mualliam san sawn lai hi. Khualpu in mangbang tak a, a om lai in tuahsia leh kilamet hetlouh sihna in vai hon hawm chiang in thauk theilou in a innkuan uh vaihawm ding lam thei na pi ama hih thei omlou ahihziak in kahna leh lungliap tak in hinkhua hon zangta hi.

Huchi bang a hinkhua a zat zawh Kum 2 vel ding in Chingte muh ut lua ahih diam a lawmpa MUAMUAN kiang ah hon gen leh Muamuan in a mah siamsinna masawn a Khualgam ah a zinta a contact Number ka thei kei a hon chi a, Khualpu mangbang tak in a mit te niamkiat in Muamuan mai a en ngam non kei hi. Himahleh Muamuan bel Khualpu toh high skul leh koleg  a kithuah lua leh khosung a le nasatak a leng khawm ahihman un MuaMuan lunglau hetlou in Khual na lungsim a neu a himahleh itna ziak ahi chih ka thei a,  na it luat Chingte muh theihna d lampi hong om ding ahi. Kei leng a ma omna Shillong vangkhua ah siamsinna sunzom ding ka hi,  hon panpih na ding ka hi,  chi'n hon gen hi. Khualpu kipaklua mah leh Chingte a it luat ziak in Kap kha zawzen hi.  Muan kei adia ka lawm hoih kum hiai zah kon kithuahpih hita chin a , non panpihna in ka vualzou ngei d. Nong lohchin ka lam en. Chingte kiang ah ka itna tullou ahi . Haksatna tampite kal ah ka itna khang veve a hi " chi'n na gen in aw.. Chi'n hong kivaikhak ta uh hi.

Muamuan Khual gamla pi a zin ding ahihman in alwmte tawh an nek khopna nei ding in a Nu te'n vaihawn uh a, Khualpu leh a lawmte kituah khawm in classmate leh Kholai a lawmte tamtak toh hong kituah khawm uh hi. Lawmta te'n nuamsa in music play in innkong tual ah hong lam ziahziah in sound te hon khah in ngaih taktak in hong lum dipdip ta uh hi . Himahleh Khualpu bel a it Chingte omlou a nunnop zil thei lah hilou ahihman in , a kilkhat ah a Ganza zial in tep khu liailiah mai hi. Huai a tep kawm in a lawmte en in mittui luang puap-puap in Sian laitan louh vang ngai ka hiam? Zin leng dawh-ai vang hiam? Tun leh zua lungtup mawngsing bang a sang vang hiam? Chi'n la te sut diatdiat in a kilkhat ah mittui luang poppop in la hon sa hi.. A lasak ama theih louh kal in a aw ngaihlua a diam Lawmte'n lamdang sa in, " Khual hon sa lai in nasiam lua " chi'n Lawm leh vualte nuam sa in dur mahmah uh hi.

Huai hun in bel Khualpu kam tamlou bang in kingai in, Lungleng tak leh a it Chingte sih ngaih a hih dante gen siamlou pipi in a Lawmpa Muamuan kiang ah gen hi. Lawmte, Music play in lam ziahziah lai in Khualpu bel Muamuam in a zinsan ding leh a it Chingte mu khalou ding ahihdan thei in a kapkap mai hi. (Kua ma theihpih louh kal in)

Zan hong sawt ta ahihman in lawmte hong kikhen dalh in innlam chiat hon zuanta uh hi. Khualpu bel khuaphok zou didan ahih louh ziak in, innkong bul ah lum chip in nak puak dildil hi.  Muamuan a lung nuamlou in innsung ah kai lut in a lupna ah lum sak in zing kal in Khualpu thohma in a khual zinna d zuan in hon zinsanta hi.
 
A lawmpa Muamuan khual hong zin taktak ta a hih lam Khualpu'n a zing kal pengnawng lai mah in hon thei a lungzuang khongai tak in amah kia hehnem d om lou. Saulim liap nuai ah khakhamvei bang in lungliap tak in sun ni a hong tum ta hi. A it luat Chingte kiang ah itna simthu tong lel in doudaltu te thuakzawh sawm in gen ding chi mah leh Chingte om na mual zatam hal Tuipi gaal kaita ahihman in tong kuppih ding omlou l kai khun tung ah Huiva bang maumau ta e.

Khaulpu nu leh pate'n Khualpu omdan lamdang sa in Khual a bang chi dan a, "Laisimnate sunzom lou a hi chia khol mawk na hia " chi'n dongdong mah le uh Khualpu bel thanem lua ahihman in Laisim na lam himhim a ngaih tuah kha non kei hi... Nitak lam a hih nak leh amah a dia lung gim te ngaih tuah lou a ih mut theih na om sun a zialtep leh Zu a dawn y kia ki nepna a nei in... Hun sawt kuam tak hu chi bang in hong om tou2 ta hi...

Chingte thu leh la a zak louh kha 7 (sagih) val bang hong hih tak in,  Khualpu kingaisia in zu leh sa, damdoi tang te amuh theih nana ah zong khawm in huaite hon zangta hi. Nidang in a Lawmte tawh No. 4 kikap khawm mah leh amah kia hong hih chiang in huaite zat theih gige louh leh haksa ahihman in damdoi tang nasia tak in hon zangta hi...

Damdoi tang te ne in, Ganza tep kawm in amah leh amah bang kua houpih louh in a hong mawk paupau sek hi. Huchi bang hinkhuate hon zatlai in , a Nu leh Pa in amau nasepna buaipih in Khualpu omdan a hoih et man non kei uh hi.. Himahleh a Nu bel inn a om zaw deuh ahihman in Khualpu om zia leh a thuakte a theih na chiang hong om ta hi.

Nikhat Khualpu nu'n Khualpu pen nitangtum a sawtlou a kei toh kithuah ka hi ua, mihoih leh a nau nu toh bang Puante sawp khawm a nuamsa leh kituak tak leh ka thumang mahmah ahi a, Khualpu bel hong hi chih mawk puaknat nei ding ahi chi'n ngaih sut na hon nei ta hi.

Himahleh Khualpu pen khamtheih zang leh kholai a kisualhat ahihlam a nu'n a na thei het kei hi. A Nu'n muang mahmah in duat in deih thoh mahmah ahihtoh hichi bang a hong om lai in leng a lungkimna ding chi'n bazar bang kaipih a, a  van a deihdeih  bang lei sak ding chi in a tonpih sek hi. Himahleh, hiai hunlai in Khualpu a din bel vanhoihte sang in a ngaih Chingte a poimoh pen a hong suak ta hi. Nitak ihmu theilou a hong om chiang bang in Zu hon dawn in a zu hong kham chiang theilouh kal in a hong nap puak dirdir zel hi. Amah a din chu KHAMTHEIH a lawmhoih leh a ihmut lim saktu leh  an-kam limsaktu a hong suak ta hi.

Nitaklam khat a phone uh hong ging lengleng a va pick-up leh a lawmpa Muamuan a na hi in lamdang sa lua, "Muan nang koi a om e, hong pai dek nailou d maw? " Chi'n thu vantang teng a Ngaihluat Chingte thu khong dong in sawt khoptak hong kihou uhi. Khualpu lungzuan laitak in a lawmpa Muamuan in a call khak zenzen pen Khualpu a din lungnop huai tuan mahmah hi . Khual an nek hun dek le hita hiai zah chi phot dia kithuzak zel ni aw, chi'n Muamuan in a phone hon koihta hi.

Khualpu bel Lawm-le-vual ngaina mi ahihmah bang in lawm thuahlou a om thei a hong hikei hi. A nau nu lawmte peuh toh kithuah zel a, a pu neute peuh vathuah zel mah leh a pu Neute lak a amah bangbang ( duh kibatpih) a na om sawnsawn in huai apat hong kithutuak mahmah in asun azan in amau putu hong kizui in, zu leh sa siatna lam ah hong khang nuam mahmah uh hi. Khualpu nu pen tanaute deihsak na leh khualna in Khualpu pa sanggam pah toh gawm a hi ua, Khualpu pathak pen in a duat mahmah in a ta taktak bang in en hi. Himahleh Khualpu in naupang hi nonlou ahihman in Pa a chih d haksa sa mahmah hi. Amau inn sang bang in a pute innlam nuam hon sa zaw ta hi. Pute innlam ah hun sawt kuam a puneu toh hong omkhawm ua , nasem utlou kholai pawt kia leh khamtheih hih in ni te hong zang ta uh hi.

Hichi banga nu leh pa, tanaute deihsakna theisiamlou in khamtheih toh hong om lam Chingte in a na za kha ta hi. Himahleh hiai hun in bel Chingte nu'n Vialpu toh a gawm theihna ding lampi zong in ana buai ten  lai tak mah  a hong hi sawnsawn  hi.

Chingte in hichi bang a Khualpu in khamtheih zang in khodung khovai ah mi gensuk/gentouh in om chih a hon zak chiang in a itna bei nailou ahi ngei ding a Muamuan kiang ah thil omdan kan din Muamuan a phone pah hi. Muamuan in leng hiai zaw dik kha mah in teh,  himahleh hichia phone apat gen leng hun sawt in sum tam a bei lel dia, na man hun in kimu zaw ni . Huai a hoih zaw,  chi'n Muamuan in a vai khak hi...

Huai zoh kalmasa pen Sunday sun in, Chingte in Muamuan kiang ah kikhop tawp chiang a kimu din hon gen hi.. Muamuan in le aw pah in.. Kikhop tawp phet in hong kimu ua,  Muanmuan in Dawr ah singpi  Bek dawn kawm ni chi'n singpi dawn kawm in Khualpu omdante hon gen khawm ua Chingte in ngailua ahihlam Muamuan kiang a gen khiata mai hi. Himahleh,  a nu ziak a hiai lam tantan a om leh pai kik leh leng dal lai veve ding ahi chi'n Muamuan kiah a gen kawm in U Khual in hiai bang thilte ana hih non het kei heh , kei hon khualna in chi'n Muamuan vaikhak hi. Nitaklam anhuan hun ahihman in hong kikhenta uh hi. (Muamuan leh Chingte Khualgam a siamsin a om a hi uh)..

Chingte inn a hong tun phet in anhuan pah in kihahsiang pah a, tawldam sak in innkaa varanda ah tu in huih siang kimut sak hiauhiau hi . ( Chingte mitkha ah, Khualpu pau tam khollou a Chingte kiang a tu a kuva khong a hai niauniau  lai Chingte a din hun ngaihhuai  tak a hong suak ta hi.

Chingte lah a siamsinna zou nailou ahihman in innlam mawk a pai thei ahih nai louh ziak in, Kum 3 sung bang kimu khalou in a hong om ua, hiai hun sung in Khualpu a na sia (kham theih addicted) mahmah man hi.
Kum 3 zawh in, Chingte innlam hong pai chih thu Khualpu in hon za kha ta hi. Vahohpah a bang hong chi a siamsinna lohching tak a hong tung a hi na hiam? Pasal neisa a hong kik a diam ? Chihte theinuam in Khualpu'n Chingte vaveh a ut mahmah hi. Himahleh a hinkhua a ki etkik chiang in zum huai sa in a innkong khong uah nitak khuaKhaal vak vansiang tak nuai ah zawl la sa in a va kiveivei sek hi

Hichi bang a Chingte muh ut zenpi zumna leh mahni kisuanlahna , kizephawkna, chinglou kisakna toh hong pumdim chiang in mahni kingaisia in a sep ngei KHAMTHEIH mah ah hon zang kik zel hi. Hinkhua haksa sa in lungsim neu tak leh Chingte ngailua mahleh a veh ngam louhna in hun tampi hon bei sakta hi..

Zingkal khat Chingte baihtak in nu leh pa thohma in hong thou in tui dim din hong kuan hi. A gate bul uh a tun phet in U Chingte chia kisam aw ging hon za a, aman leng lamdang sa tak a  a et phei leh Muamuan (Khualpu lawmp)nau nu a na hi. Aman le houpih in Khualpu kiang a hong hoh din a vaikhak ta hi...

Nitak lam nitum kuan in Khualpu'n hiai bangthu a zak tak in kihahsiang in Nitak a lawmte tamlou toh a vahoh uh hi. Chingte maitang en ngam nonlou sim mahleh pasal ahihna suah in a kisel hamham hi. Hoih thei pen in om sawm mahleh nitak hong sawt kuan chiang a  akick bei in duhna in hon phata hi. Innkong ah vapawt zual d chia a pawt leh Chingte in zetheih in a vazuipah hi .

Chingte: U khual hon na ngak dih ka gen ut om.

Khualpu: Bang a Ching ?

Chingte: Nang bang hih dia pawt mawk e, hon ngai nonlou maw ? Nidang na bang kei e ,U Khual..!

Khualpu: Ching hon ngailou ka hi kei, Phulou vang ka ngaih kei din zehzum sial banglian in na siang vabang leng ngamlou hi zo'ng e...

Chingte: U Khual a na ngai in, a valeng in tuan nang sing hiang a zon lai in a doh siamte'n a ngah ding ei ve..

Khualpu: Na tuun lungtup sialbang lian a, Paal lun zatam te'n na na vang zubang tan nuam in Vaimang sesum hauhna toh hai bang hong ngak e..

Chingte: U khual, tulleel dawn a heisa paal zong chi taktak a lungsim tak tawh a loh sawm te'n lou zou sam hi ven maw...

Khualpu:... Ka nun na tualniam e, tual ka niam vang Setan henkol ah ka nunna thanngbang awkta.. Ngaihna vang ngailou hi keng tual ka niam luat vang hi zaw...

Chingte: U khual, (thakhat in pom phei in) na thilhihte topsanta ve maw....(Khualpu maitang en in a mittui a hong tak keuhkeuh hi.

 Khualpu'n awl in hong nak hiaihiai in Chingte mittui hon nul in, Ching tawpsan sawmlou ka hi kei. Na gen ma in leng ka na kisak kholh sa a hi... Himahleh tu leh tu in bel haksa ka sa a, hon ngaklai in aw, thakhat in ngawl guih leng ka taksa in poimawh dia khua phoklou bang a leng tuk phut mai ding ka hih ziak in na theihsiam a hun non piak lai kon ngen a hon chi hiathiat hi.

Chingte bel lungzing mahmah leh koi bang teng tuak ka hia U Khual sese ka it luat zanzen, chi'n lungsim hamhaih mahmah in hong omta hi...Vialpu chi lenglah numei a dudak lou leh zulhzau tak a numeite pawl maimai ahihziak in haksa leh ko lam tel d chih a buai mahmah ta hi.

Hichi bang a hamhaih tak a hong omlai in a U Khual a ding khualna leh a kibawlhoih zohlai khak leh chi'n U Khual, zing chiang sun koi ah na hoh d ? Bang nasem dia? Na man leh hong hoh in aw... Ka na pai d chi'n hong kikhen uh hi. Khualpu leng Chingte ngailua zaw ahi dia huai zan ihmu lou in lupna tung a kingaih tuahtuah in a hong khovak ta...

Zingkal khua a hong vak tak in Chingte kiang a hoh d a chih ziak in siangthou tak a hoh sawm in ahih ngeite a hon hih kei a , Kichei in limlang bang a ki en zihzeh mai hi. Chingte te inn a hong tun tak in Chingte in hong hoihna chia na vak siang sitset a kipah huai na e, Nunute'n bang hih uh a ? Chin hon dong pah a, Khualpu in bel ka theihpih kei bang hih a di uam ah dawr ngak mah hi un teh,  zingkar tung in a pawtkhia khin ua , chin hon dawng in, thu vantaang hon ban gen lai in Khualpu a thilzat (khamtheih) duh in hon pha in a hong buaita hi. Himahleh huai hun in Chingte in piak d a na neilou leh a ma zatte koi a kimu hiam chih a na thei vetlou ahihman in Khualpu damdoi inn(hospital) ah hon admit uh hi.

Hospital a hong tun phet in nurse te'n Chingte kiang ah bangna a ? Bang ziak a ? Chi'n hon dong pah ua Chingte in a thuteng hon gen phet in a ma poimawh piak in a hong om a, Khualpu hong hal hiaihiai hi.

Chingte lungmang leh Khualpu nu leh pa theihpih louh a damdoi inn a om mawk pen hi thei lou chi'n Khualpu nute a hon hilh leh Khualpu nu leh pa hong tung pah in.. Khualpu omdan innlam a paipih theih d hia,  hospital a giah ngai d ? chi'n Doctor te a hon dot ua leh,  om le a  Ngaikei ding nitak sawt ma in pai thei na ni uh teh a hon chi ua, nitak dak 6 lak vek in innlam hon zuan kik uh hi. Himah eh Khualpu bel lupna ngak a hong hi ta hi.

Hichia Khualpu lupna ngak in hong om a, a nini in hong zawngkhal hiai-hiai hi. A van zatte lah amuhna haksa in sum leh pai neihsa lamsa toh kum khua a ki etkol ding pen neihsa in chi'n lou ahihman in nikhat in 2vei khong kan hon zang sak zou kei uhi. Lupna apan sau pai zoulou, zun tha, daileng ding nasan dop ngai a hong hih chiang in, Chingte in a man hun kalkal in va veh in a va khamuan zel hi.. Chingte nu'n huai bang a Khualpu a va vehveh lam ahon theih chiang in pawt phallou in Innngak ding in hon koih chip hi. Hiai bang kawmkal ah Vialpu in Chingte va vilvil lai ahihman in a Lungsim awl in hong kihei hiaihiai in Vialpu lam pi hong ki hong mahmah hi.

Damlou a om Khualpu a veh ding lah om nonlou Chingte lah hong kilang nonlou a hun sawt tak hong om chiang in,  Khualpu ngaihsut hong tam sem-sem in a hong ni kiam hiaihiai hi. Chingte ngai a lupna tung a mahni kiakia in mittui luang in, Lunggim sintawl tak in a damlai zaitha hatlou tak mai hon zangta hi...

Nu leh pa in bel a lungnopna ding chi'n thu tuamtuam bang genpih in, a chang in a Tuailai pihte bang in veh in thumsak na leh hasuanna(hanthon) bang va nei ua, Pastor phatuam ngai taktak te bang in CHIALPI na vanei sek ua . Himahleh a pianthak tak dingdan a thei himhim kei hi. Huchih nung kalkhat vel ding in a Lawmpa Muamuan in vaveh a, Lawm na kha a ding ngaihtuah in leitung siatnate toh buai non ken . Jesu nei in muang le chi'n na kha tawldam ding ahi, chi'n a vagenpih leh hong khamuang tuan mahmah a.  ngaplou kawmkawm in Laisiangthou bang hon sim in Pathian lam hon naih ta hi.

Zingkal khat Pastor nidang a, a mi muhlouh,  a engbawl, BiakInn a thugen lai bang a gal lampi a pat zawlla deih theih a sak khum a,  kikou khum ekh-ekh pa uh thugen za ut in Inn a hon samta uh hi. Pastor pa'n leng  KHAmuanna thu tampi leh Pianthakna (hotdamna) thu hon gen chiang in a hong kilan thei a, huai ni apan KHAMTHEIH  hih tawpsan din Pastor pa mai leh Jesu Kris mai ah hong kichiamta hi.

Chingte in hiai thu a zak in kipak lua in vaveh din a Nu kiang ah Ukhual piangthak ka vakipahpih ding chi'n a gen leh a nu'n koilak ah  hiai mihing piangthak ken teh zuau pipi hi chi'n hon phal kei lai hi. Chingte thangpai lua in nu mihing hinkhua kikhek lamdang theilou om hi leh nang leng Nu kon chih kha kei ding. Nungak a na om lai-nupi nong suah bang lel hilou maw ? chi'n a nu kiang mittui luang keuhkeuh in hon gen hi.  A nu,n leng vahoh Inla na suahsuah suak aw .. chi'n aw gum tak leh gak tak in. Phalna hon pia hi...

Chingte leng lungkimlou sim pi mah in a vaveh a, Khualpu te innkong a nilum awi kawm a Laisim a hon galmuh in kipak lua in nuihmai kawm tak in mittui kai zawzen hi. Khualpu hon ngawng koi in Ukhual ka kipak lua, hiai bang thu zak ding ka ngak lah penpen ahi chi in...Khualpu ang ah hon belh thinthen hi.

Hichi bang a nuamsa leh ki-aam tak a, hunte uh hon zang in tangbang dam a paal lai ni te zang khawm a, Sian minphat in Lenchil ngaihnou tawh tuibang gawm a vondeih nih/thum tawk kum sawt loubang kitulpih ding in tong hong lelta uhi. Himahleh Khualpu bel kiam lam manoh ahih lam kithei ahihman in a mittuite'n tum in hong san pimpem mai hi. Ahi in lah Chingte toh kiteng man phial hilele sawt damlou ding chih kithei ahi ta a, Ni hong tum tak ziak in Chingte'n a innlam hon zuan kikta hi...

Nitak khua hong mial in lengla pawt hun hong hih tak in Khualpu om theilou in pawt ut in phia zen mah leh damsiang hilou tha nei nailou ahihman in pawt zoulou in a room sung a lungzuan tak in hong tu kun ngitnget hi. Tukvelh( window) ah dak khia zel in zan huihkhi siang nung hiauhiau leh zanpaak gimte hon nam hiauhiau a dik khak chiang in a thahat lai ni te ngai in Chingte toh a hunluite gel in bang dawh-ai vang a gual hen lou, Vaimang henkol a taang lah hilou, Zinmang henkol tuanglam zui kha ka hiam? Lia nu duang zen ka ngaih vang in kei leh kei kisia tawm sak in ka paallaini te mual ah liam ding hita maw ? Pasal lung gel din zaw ka om dan haihuai hi na maizen e, itluat vang in khapham ding hi tang e chi'n kahtam hon lou deldel hi.

Huai zan in kim leh kiang ah ui ham vengvung in, vengte lung himawh mahmah uh hi. Zingkal lam a akmasa khuan in Chingte manglam ah Khualpu in Ching ka paita ding ka innthak ka zuanta ding nang leng non pai ding innthak ah kon ngak d a vakichi a, Chingte ihmu thei nonlou in zing khovak di lupna tung ah hon ngakta hi.  Zingkhua vak phet in thoupah in tui khai dia a kisak leh SI daak ging chiaichiai hon za a, aw ka U Khual bang chi a dia aw.. Chin tuikhai dia a kuan leh Muamuan in Ching honghilh dia hong pai ka hi a hon chi a, Chingte pau man nonlou in Muamuan hon pom phei in aw gingkhe theilou in a hong ki dik dipdip hi.

Muamuan in hichi ding a hi kei I vahoh dia a luangbul ah I vatu ding chi'n Chingte tonpih in Khualpu te inn a hong zuan uhi. Khualpu te inn a hong tun un mipi tamtak na om khin a, Chingte kap theilou himahleh kidik dipdip in Khualpu luang buh ah tu in a U Khual mai en in hamhaih tak in ...
Lungtup tui bang tung lou a
Sam gibang in khen ding Sian lemgel hi maita e,
U Khual ka tun leh zua dougal lel a kha na pham hi chia.
Kei din nopna ni suak nonlou ding aw ,
Tung thangvan ah haibang na ngak aw,
Na lia nem in na banzal hon len kik ning e...
chi'n a guk tak in (aw sianglou) kahtam hon lou ngeungeu hi.

A Ukhual mai te en in a si taktak din koih theilou ahi diam hamhaih luat ziak a diam, a nui bang peuh in mu in khat veivei amah bang le nui lah bang kap lah bang in hong om sek hi. Khualpu mai a dial neu toh zut in uKhual na melhoih in et lawm na e, Khatvei bek hong nui lai in. Na nuihmai kei din kipahna bukim pen hi , chi in kap kawmkawm in hon gen zel a, himahleh Khualpu in dawng thei nonlou ahihman in nak pipi in awheu pipi in akap suk zel hi. Nitak lam sivui hunta ahihman in siluang hon pokhia din hong kisa ua ; Chingte in bel phallou lua ahihman in a siluang tung ah pum boh in a koi tontawn mai hi. Khualpu nu'n Ching na UKhual a pai hunta hi. Mangpha khak in la'n I pai sakta ding amah tawldam ahi ta,  chi'n hon ngen a,  Chingte in leng UKhual pai taktak ta ding na hih leh Mangpha na man in aw ...Ken zaw hon phal kei mah leng nitum ding ahih  tak ziak in na pai hunta Mangpha chi in kap kawmkawm in hon khakheta hi. Huchi'n hankhuk lam zuan in Veng makaite'n hon pokhia in han ah Khualpu luang vuiliam a hong hi ta...

BEI TA

Writer,s Note :
# Bang teng hiai tangthu ah na mu suah ?
# Bang a poimawh na sak pen ki it te kal a din ? 
# Bang a Khualpu hih dia poimawh na sak pen ?
# Chingte in bang hunlai in Khualpu a bawl hoih thei dia ?

Hiai te a nang leh nang a na kidong inlan hoih dia na ginte a na zui pah le chi'n hichi bang buaina kal a om kha na hih leh....

KIPAH ING E..

©Siamsinna leh Vakiangbu