A HUL NGEILOU ITNA LUANKHI
By~Alex Guite
Khollou hial a vuah a zukna karkhat a valta. Shillong weather a ding
in chu a ngeina leh thil lamdang lua ahi tuankei. Kei le votsa tak a,ka
puannuai a ka lup thinthen lai in message khat a hong lut a,Muani a ding
a ka gintak manin kintak a ka etleh,hon kimuhpih nuam thu hon gelh ka
mu a, kei le tomkha kingaihtuah in,tuni chu a thilteng a beina bawlmai
ding leh itluat ziak a amah hinkhua ka suksiat khak ding lau in, hiai
thute gel kawmkawm in amah ngak di'n Nongthymai taxi point ka zuanta hi.
Polo apat hiai tantan gam a kei mu dia a hong ka gelchiang in ka
lungsung a khoih kha mahmah a ka hehpih mahmah mai hi.
Vainiliap(umbrella) khu in a khelam teng akawt a,votsa a kising mai in
kei mu di'n ana om a, va kawilum a kipaktak a nui selsal a om ding ka
ngaihtuah chian ka lungsung ah thanopna himhim a om kei maimah. Waiting
shed sung ah ding in , ken le a kiang ka zuan ta a," khoksiat tak a
genthei tak a na hong pai maw "? Ka cih leh "uLian ka hon ngai e"chi
in awl tak in hon gen hi. "Eite gel kimutuah thei i hih nawn louhpi;
hong o na omna lam ah ka hong kha d" chi a aban a len a ka kaih phei
sawm leh a dah mel hong kilang in, ken zong a vainiliap la in ka
kaihpalh sak a "pai aw le"ka cihleh ka khut apat a vainiliap la in a
khup a, vuahlak ah a ding mai hi.. Ken le nuamsa lou in " Muan "chikawm
in a niliap ka laksuh a aliang a kawi kawm in "pai khe phothot ni "ka
cihleh hon zui pah vanglak a " uLian ..zingkar ann le ne nailou ka hi.
Ann hotel khat bek ah lut ni o" a hon chi a, kei lah ka lungsim a
gilkial, kipah ,l ungtai bangmah omlou ahihman in ka kining tha peuh
suak in "hilou e Muan....innlam zuan mai ni" ka cihleh aman le
"ahihleh,taxi point zuanta ni. Huai apat city bus ngak in,innlam zuan
mai ni"chi in kisuanglah chitak in hon chi hi. Bus ka na ngakngak uleh
mi atam thei mahmah mai a,kou tegel lah kihoulou in,lungsim sung a thil
puak liantak nei bang in ka ding ua, tomkhat zoh in a mit hah nemtak leh
kinepna banghiam nei kawmtak in ka mai hoihtak in hon en a, hun sawt
tak anuam ahaksa thuak a ana kithuah den ka hihman un bang lunggel Ka
theithei ngal hi.
Hiaitan gamgam a kei mu dia h0ng pai a, ken inn neukhat a zong pilut
lou a,inn lam a ka sawlkik mai chu ka gel leh a puaknat d dan ka thei
ngal hi.Vuah ahah zuk ziak in,a kawt mahmah a,votsa in, akhut akhe a
ling a, zumna leh kisuan lahnate nuaisiah a kawillum mai ding lunggel ka
neih hang in ka hihtheita kei hi. Ka inn uah pilut a giak mai in, vuah
ahah zuk tel mai, a inn a kilehkik nawnlou ding in" cih ding chauh ka
tha anuam Hi. Himahleh ,khonunga thil hong suak dingte ka gelciang in
thil hitheilou ahihman in.."hong o"!! Taxi point baan pen va en ni"ci in
Dhankheti taxi point lam ka hon zotpihta hi..
Alehlam ah, kum 2 paisa in, ken BA first year ka sim kum in, hostel
khat ah Muani te toh ka na omkhawm kha uhi. Numei pasal omkhawmna mun
ahihhang in,ka kingaina thei mahmah ua. Numei mi 12 lak ah mi 4 ei
singtangmi nungak ahi uhi.Hucia hostel khat a omkhwm asun azan a
omkhawm,kithuahkhawm den ka hihziak un Muani toh ka hong kingai kha ua,
ka na ki it, kingaihna uh ana sang mahmah cih lel ding hi. Amah kei sang
a naupang zaw ahihman in " ULIAN"ci in hn sam a. Ken le deihthohtak
in"MUAN..MUANI" chi'n ka sam a, kei ading in ka it masak pen chauh hilou
in, ka "ITPEN" le a hong hita hi.
College tuamchiat a kai himahle ung,niteng in kei mah kaina
St.EDMUND'S COLLEGE ah kei hon na ngak zel in, college cafe mun ah
coffee khawng dawnkhwm in kum 2 ka hong kingaih sung un kiduat tak leh
ki it tak in ka hinkhua uh ka na zangtou uhi.Hucia hun tuibang hong
luangtou in, ken 3rd year ka zir ding kum in, ka itpen MUANI pa Mizoram
apat Shillong a transfer in a hong pai hi.Huaitoh kiton in a innkuante
toh omkhawm ding ahihtak ziak in, kei le hostel a om thadah in innluah
in ka hong omta hi. Ahi a , muntuam a om himahle ung hun lem ka neihphot
un ka kimutuah zel ua" bangteng hong tung zong leh itna khaugui tatsak
maimai thei nawnlou ding in kimuanna ka neita ua. Kimuhtuah ahaksat hun
inle phone bek a kihou lou in ka om theita kei uhi.
Huci in taxi in Dhankheti point lam ka hon zuansuk ua. Nidang hun
dang a ka pawtkhop lai ..utoh a kibang kei mahmah mai.Muani ka nung a
seat ah atu a ka hong tai zel uh,a lunggel ding dante ka gel leh, amah
thuakna lehnih in ka thuak a naa zaw . Huci'n St.Edmund's college mai ka
hong tun un, ka hong kumkhia ua,college mai lam ka hon zuan ngal uhi.
Lunglen na in ka pumdim a, amah le kisuanglah leh hehpih huai mel tak in
"ULIAN ..Hehpihtak in cafe ah va lut ni o, huaizoh cia zaw bangmah kon
ngen nawnkei d. Innlam ah ka pai mawng2 ta d' hon ci a; ka lungsim a
sukha mahmah mai hi. Ahi alah ,ka lungkhamna mel kilangsak lou in , cafe
lamzuan in ka paiphei ua, cafe kiang a tutna dia kibawl ah ka hong tu
ta uhi. MUANI le coffee kizuakna lam zuan lou in,cafe kiang a singphung
liantak lam zuan in lungkham leh lungleeng tak in a va ding hi..
Nidang a lungkhamna leh kisuk hehna bangmah omlou a ka vak khop lai
ua huai sing phung a" I l0vE u Muani, i'll never let u go" chih ka pen a
ka gelh ava zongzong leh mulou ahi ding a hong kinung leh in " ULIAN
ka mu nawnkei" chi in mittui pawt dek hial a hon gen leh kei zong ka
nehnou tha hong suak dektak a. Himahleh ka kidek zou hamham hi. Ka nak
hong bing in ,nidang apat ka theihkhak lou natna thuaklelh khat in hon
bawm in ka thei a, kei le kipasal sak in"MUAN tu'n chu i pai theita d
maw leh ? " ka cihleh Muani le loupa lak ah hong tusuk in , pai ut
nawnlou in hong om hi..
Huchi a, a anglai pawm a,a mittui a biang a luangsukte nulsak ding ka
ut mahmah hang in keile ka lunggel khel kik tuanlou in ka dinna ah ka
ding den hi.
Hucia hun tomkhat paulou a ka om nung un,Muani inle a mittui nul
in,ka ki itna khaugui uh zopnawn na di hun om lai inteh cih kinem in "
ULIAN..ka luankhi luangkhe teng in le hun paisa a na hon itna sam zoulou
hita maw "? ? hichi mai a om ding in zaw ka ngaihtuah thei mahmah
kei.Bangthu hong tung hita maw , tua nawn nawlkhin sawm mai ? Hong
dawng o..chi a, hon naih phei in, ka maitak a a hong tu suk in a hong
kap mai hi...!! Hiai hun laitak a zaw ..athuak hak ngeimai.. Ka mit a
mittui a pawt louh hang in ka lungsim a kapkhe zoihzoih hi..!!!
"ULIAN a chang leh na lungtun louhna , na lungsim lou lam ka bawl
khak ni atam maithei. Himahleh huaite tengteng itna ziakin hon ngaidam
inla, i ki itna hinkhua thak zang kik thei nawnlou d maw..?? chi in ka
khekor a hon len in,ken lah it mahmah zong leng, ka mit a mittui banah
ka lungsung a om itna chu sel mang sawm teitei in, bangmah genlou in ka
lu pei in,ka nungngat ta. Huchia ka omdan amuh tak in, kinepna tengteng
mang hita inteh chi in ka it tak MUANI zong hong dingtou mai hi.
Adik dik a gen in kum 2 paisa in , ka omdan , ka taksa nuamlou leh
akhen ciang a lung-am thabei banah ka gilna in hon pha mun mahmah a. Kei
le ka lungsim nuamlou in doctor ka va ki-etsak leh investigation
tuamtuam hon bawl nung un "Blood cancer" natna vei ka hihlam hon hilh
ua, ki etkol a damthei mahmah ahi" chi in hon hehnem ua doctor te'n
damdoi chituam tuam nek d hon piakte uh hoihtak a kon nek in, damdeuh
bang in ka kithei a, kei le doctor kiang phalou in ka natnate mangngilh
sawm in hun bang tan hiam ka hong om hi. Huchia om in hunsawt painailou
in doctor check-up sak din ka vahoh nawn a,ka hong ki-etsak leh leitung a
ka lungkham,thawmhau nipen hong hi maimahhi. Ka natna cancer piching
kuan veipa chu ka na hita...!!!. Ka hinkhua a vualnop lai hun ding tak a
chihkhawng ngaihtuah in, ka itpen ka kinepna MUANI taisan a sih ding
chih ka ngaihtuah ciang naa ka sa mahmah . Ka lungtang temsau a sut sang
inle thuak hak ka sa zaw.. A chang leh kei le kei ka hinkhua kilak mai
ding peuh ka ut tuntun.. Ahihhang in kei sihni a Muani thuak ding natna
ka gelciang inlah ka ngai ngam kei ngal hi..!!
Kua mah kiang alah ka natna ka hilh ngam kei a. Khovel a ka itpen leh
ka hehpihpen MUANI in a theih khak ding ka dah mahmah mai hi. Lungsim
leh taksa naupang chik lah ahilai ngal si a,a khang dawng hinkhua
hoihtak kei ziak a a hon suksiat a bangmahlou hong suah khak ding ka lau
mahmah a, a guk a awltak a hepkhiak mai kon sawmta hi..!!.!
Hun sawt nei nawnlou ka hihlam ka thei a. Ka natna hong serious
deuhdeuh dia, natna hikte'n ka taksa hon thaneh deuhdeuh ding ua,ka
samte khawng hong pulh dia, MUANI in hon theih d khawng ka gelciang in
,tua amah toh ka kigamlat d ka tup pen hih hoih mah in ka kingaihtuah
zel hi..
Hucia ka omna mun uh nawsia in,taxi point ka tungta ua,a tuan na d
taxi ka sap hong tai phei ka mu ta a, kei zong mittui pawt dekdek in
"Bawi..damtak in aw...!! Damtak in hoihtak in na hinkhua hon zang inla
...!! Aban genzom thei nawnlou in ka gawl hong bing a, ka aw bang hong
liing pian sim maimah a.. aman le bangmah genlou in ,a lu su ngau
in,vuahlak ah a hong ding khia hi.Taxi a hong tuntun akong ka honsak
a,..ka itpen toh leitung hinkhua ading a hon khenta ding ah kong chu ka
khaksakta hi...!! Daitak in taxi le a tai kheta hi..!
Hun tomkhat ka hinkhua a ka it masak pen leh ka itpennu ka hinkhua
apat a apai mangchu ka en a.....hiai hun chiah a zaw kipasal sak zou
mahmah lou in ka biang a hong luangkhia ka mittui nul kawm in.. .ka
lungkimna, ka itpen nawlkhin teitei sawm nu..chuh kidekzou talou in,
taxi nung ka leh delh kha ta hi. Ka khut zaak in ka aw neihsun
in.."bawi..Muani hon itlua, hon ngailua kei ve...Bangdia nawn paisan e,
Muan"..chi in lampilai ah vuahzu lak ah ka tusuk a malbang ka kou kik .
Himahleh, taxi lah lamkawi laitak aphata a, ka mittui hong phul khia
in,vuahtui toh kihel in ka lungsung a dap khe mai hi..
MUANI in lah hon paisanta, sulkik lah hon lel nawn kei d.. Hiaini
apat phone zong hon bawl kha kei a, messege le ka mu nawnkei hi..Hiaini
ah zaw.. ka mittui luang teng a mukha kei , vuahtui in a ataimang chu
ahita.. aw ..ka itpen Muani ..ka deihpen nuamtak a hinkhua na man ding
ka hon deihsak petmah..Kei zaw lungtup mualsuah zoulou ka hita mai.
Kulsin ka tan zong nang beek in nuamtak in na hinkhua hon zang in aw
Muan..Mite gen pialgal ah dawnbang kituak nawn ni. Tua ah gibang khen na
om nawnlou ding maw.. baw...ka na paita e..
Hiaiteng a simzoh a MUANI in a ban d a zonzawn hang in a mu nawnta
kei hi..A itpen a ULIAN in a sihkuan a diary a gelh Muani in a simzoh in
kidekzoh vualloh LUANKHI in a mai a kawtsuak sakta mai a..
A itpen a uLian in a khut mahmah a ana gelh a diary a angpawm in hong
kapkhe zoihzoih mai hi.."k0n it lua uLian. Hucitel a gentheihna nana
thuak bangziak a hon hilhlou a nang chauh in na thuak tel e ?? uLlian ki
awi na mahmah chia maw !! Na ki awilua uLian..KA LUANKHI HUL NGEILOU
DING HI, A HUL NGEILOU DING ITNA LUANKHI maw ka tantawk ..na kiang ah
hon pisam ve kei le .. Nang tel lou a khovel bang ka chi zat nawn di
chi e uLian, chi in kaptawp thei mawh hial in MUANI tuh a omta hi..
Author's note : Hiai tangthu phuahtawm ahi. Min kibang hiam om khak leh tup mawng ahi kei
©Siamsinna leh Vakiangbu
Comments
Post a Comment