I KAL AH' DAMTUI

By ~ MC Zono

Zomi Airlines office ah’ ka ngaihno Lia Zozam tawh kam tam ki ho hetlo in Dimtui-Delhi flight ticket la ding vengpi lam zuan in ka pai uh. Zomi Airlines counter ka tungtak un Manager-pu  Zo Khan Khual  meeltheihna om in a nuam tuam mah mah hi. “Zono koilam zin-sawm na hia”, hong ci in kei zong “Delhi lam nasem a kuan dek ka hi” ci’n ka dawng hi. Delhi a tanaute deihsakna tawh Restaurant khat ah kuang-sawp (utility) hong na musak zezen uh hi. Tua khit in Ticket ka lak tak in 50% discount aman amah mimal in a hong piaksak hi. “Nang zin ding buang na hih leh kong huh theihna om sun” a hong ci hi. Lungdam lua gen ding bang thei pah zezenlo a ka omlaitak’. Ka ngaihno in “U, ei a ding Topa hoihna e maw’ a hong ci hi. “Topa minphat hang maw’ ci’n ka kik uh hi.

Maitaitak in innlam ka hong ciah uh a, ka ngaihno a innlam uh ah ka va kha hi. A gate uh ka tung ma uh in a Pa’n hong na galmuh in, singkuah tawh a hong na delh kik leu leu hi. Galte lah hisamlo aih ciang ci’n kei zong  innlam zuan in ka leh tai-pah vingveng hi. Inn bang ka hong  tungbaih bilbel vanglak hi.

“Bawi, Ticket na va la thei maw, na sum a cing zo maw” ci’n ka Nu’n a hong na dong pah hi. Kei zong” cing mah ei Nu, Pu Zo Khan Khual na om lian in 50% aman hong siksak sawn sawn hi” ka ci in sum val teng ka Nu ka pia kik hi. Pa neilo, meigong tagahte a kem a, a hu-pa ahih lam ka Nu’n a hong hilh thakthak hi. Tua khit in Topa tung lungdam kohna ka nei uh hi.

Nitak ann ka Nu’n a huan kal in, kei zingciang Delhi lam pai ding ka hih mah bang in ka van dingte bawl ka ki pan-pah hi.  Lungsim suah ah’ ka ngaihno Zozam meel ka mu kik tam maw ka pai khiat ma in ci’n ka lungngai ngai hi. Khat vei ciang Zozam in hong it mah mah hang a lungsim a manphalo a hi hiam, ka cih hun bang a om hi. Ei tagah, meigong tapa lel tak khat hih zah a hong it lamdang kasa mah mah hi. Khuapih tangval teng mitsuan khat hi a, khua sung ah’ zong a nei zo pen pawl innkuan hi lai uh a hih man in ka lunglah a dam a lah’ a dah sim sim zel hi.

Ann nek khit in, ka ngaihno meel mu non kei kha leng ci’n laikhak amah ding hih bang in kong gelh hi;

“Sencil tongsan Zozam aw,

Na tongsuah zu bang khumte, cik leh ka sang kik tam maw? Na sakmeel cik ciang kong mu kik tam maw? Nang bang tehpih hong ding liapaal om lo e. Nong itna in ka nisim thahatna leh lampi khuavak hi. Heh hong nem ding nang bek mah hi cia, Ngaihno aw.

Paal-zaw sengual in itna tong hong lel zong, sangmun muangsa hing na ci aw. Tongciamte lenmual I khup dong, itna ki in khosak ni.

I kal ah’ damtui hong halte, ni’n leh siang’. Deih ci bang teel hi kei e, ngaih. Itna in tua damtui gal a hong tung ding a, ngaih aw.

Nunnuam in nih geel vangkhua lai ah zingni thak hong suah ciang leng khawm ni maw…

Zotang bang dam in meel mu kik ni maw….

Hong it Zono”

Ka gelh zoh ciang in lungnuam tuanlo, ka ngaihno leenmual lam hong pai kha diam cih ngaihsut na tawh ka ki dim kik hi. A tawpna ah hong paikha in teh ci’n kei zong ka laigelh ka ip ah’ pua in ka pai hi.

Leenmual ka tung a sawtlo in na ngaihno zong a paitakpi mah hi. “ U, tuni ka Pa hong delh kik na na gim hia?” a hong ci pah malam hi. Kei zong “ ki ngeina seh lel ing, na Pa a gimtuak hia hong delhna?’ ci’n ka leh dot  zawsawp hi. Ka nih un “Hahaha” cin nuih cihtak in ka nui uh hi.

Tua zawh gen in om nonlo hi leh ki lawm bang in daitak in tom khat kong tu phot zezen uh hi. “U aw, zingciang zingkhia ding na hih man in, tunitak I ki gu diam? Kei Nu tawh inn ah na om lel ding hi ung nu tawh” a hong ci hi. Dawng dingzia ka theipah zezen kei hi, a ngaihsut hoih kasa mah mah hi. Ahi zong in kei omlo amah leh ka Nu bek om leh a Pate’n thusia tampi tak na bawl theih a hih man in. “ Zozam aw, hoih lua mah, ahi zong in tu di’n mun in na Nu le Pate’n gal leh sa bang a a hong mu lai uh hi. Tawlkhat ngak phot lai ni maw” ka ci hi. “U Zono, nang a hong muh leh bawl bang un kei zong hong bawl leh a siat nang omlo a…” ci’n a hong dawng hi.

“I paunak ah Nu leh Pa thuman  nahlawh-pek na ki ci a, ni khat ni ciang I ki itna na Nu leh Pate’n zong hong mukhia ding uh a, hong muang ding uh hi’ ka ci hi. Ka ngaihno in zong “ U aw, tua bel hi mah maw, Pasian in seh kholhsa I tuak ding pen pel thei kei hang. Topa deihna bang ‘ ci ni maw ci’n ka ki heh nem uh hi.

Zan hong sawt pian a hih man in ka laigelh kei pia hi, a ki thei khol s amah mah inka ngaihno in zong a laigelh a hong pia hi. Lungdamtak in ka ki sangtuak pah uh hi. Nui hiuhiau kawm in leenmual pan in lam ka zuan uh hi. Zansawt pian a hih man in a khatveina ding in ka ngaihno Zozamte varanda tan amasa pen ding in ka va sik ta a nuam ka sa tuam lua mah mah hi. Tua pan in kei zong innlam ka ciah hi.

Ka zan-mang nuam sim hi kha ding hi ven, ka Nu’n “ Zono tuni pen pen tho haksi cia, thotho vanleng lap kei kha ni teh”’ci’n a hong phawng hi. Kei zong tho in kisil, ann ne khin in Zoheisa International Airport lam zuan ding in ka Nu tawh inn pua lam ka om uh hi. Ka ngaihno Zozam beel khat tawh hong tung mawk’ a, ka lungsim sungah “tuitawi ding kuan khia hi ding hi ven maw” ci’n ka nuih bang a za sim hi. Tua zawh in Pu Zo Khan Khual in “Ken airport tan car tawh hong kha ning ‘cin lungdamna a hong lian sawn sawn hi. 

Ko zong ka vek un, vangte guang in car tawh Zoheisa International Airport lam ka zuan pah uh hi. Car sung ah kua mah pau meel lo in ka om ki leu leu uh hi, ahi zong in ka ngaihno tawh bel ka khut I ki len kip mah mah hi. Kua ta’n a hong sutkhia zo diam ding zah dong ahi. A sawtlo in airport ka tung uh a, ka Nu thungetna hong nei in kong ki khen uh hi.

Kei zong vanleng sungah lut pah in, ka tutna ding muh ka tut nung a sawtlo in ka lengkhia pah uh hi. Vanleng suah ah lungleng hong ki pah ai diam, ka ci thak hi leh ki lawm ki ka ki zutzut leh ka ip ah’ zantak a ka ngaihno hong laikhak piak ka mai khia kha hi. Lungdam tak in kei zong a laikhak hong pah in ka sim hi;

“ Sancim-loh U Zono aw, 

©Siamsinna leh Vakiangbu