A POI NGEI MAI
By~EEm Woo Ti
"U...na maima ah lakkik theih leh bawlhoìh theih nawnlouh ding
damsung poihlawnna ka na tuakta,nang a din niinneng bang ka hita" ci a
kap ngoihngawih in ka itpen toh ka itna khaugui uh atat ta. !
Huai ma kum 7 paisa in....~ Tungsunni taang singseng a, vante siang
singseng hi. Ka tutna mun uh singliim bel, ka school kiang ua Mawng kung
lianpi bul a hi a,a mun vot hiauhiau in zou huihkhi siangte nung
hiauhiau hi. Huailai in bel silh leh te'n kiningcing leng kinei zoulou
a, sliper nangawn leizou ding te kihilou hi. Hucibang hun khawng a om
himahleng school bel ka na kai zou hamham hi. Hucikawmkal ah mi hausa
leh neizou hunkhop leng ana om tham a, neih leh lam thu ah kigei etna
uang mahmah lai hi. Kou bel ka neihzohlouh ziak un mite kamsia ka na
tuak mun mahmah ua,gendi lah kitheilou in,mite'n adik mah gen hive un
maw,zawng mah kihi hiven hehna di omkei ci peuh in ka kihehnem zel uhi.
Ka School kai na uh bel lianlua a hikei a,pawlsawm tan simtheihna a hi
hi. Kei bel huaihun lai in pawl 10 ka hita a,notebuk leh laibu mite bang
in neizou keimah leng a hithei dandan in ka na sutuah zou hamham hi.
Class a asiam lua hikei mahleng,ka na pass toutou vanglak hi.
Kilianthouta ahi dia,ngaihzawng bang kinei theita hi. Kei bel Biakhoih
kici ka class te uh khat toh kingai ka hi ua,nei leng a neizou uhi. Amau
lawmta bel ka khosung ua a mi neizou deuhte pawl a hi ua,huai kia
gentak louh kuamah englou a nungta te hi uhi.
Zawnna zaw pumpelh theih leh uthuai hina maizen e maw ! Eimah deihtel
na zaw hi hiallou ding hi a maw..! Lawm leh vualte apan enghouna kituak
a,hazatna leh simmohna kampau niteng phial in ana kituak gige hi. Mite
omna mun aleng om ngamlou a,mun kilkhat a om khawng alampi omsun a hi
mai hi. Hucibang a gentheihna ka tuah ziakin hehna in ka la tuan kei hi.
Ka teacher pa un, a zawngte zawngden tuanlou a hi. Lai hoihtak in non
sim di ua, officer nong hiding uh ci a hon thuhilhna ka thei gige hi.
Kim leh kiang a thusiate ahitheitan in ka na ngaihsak sawm kei a,ka
lehkha kuhkal takin ka simzaw hi. Himahleh laisim hun a lawmte apan a
thusiate ngaihtuah khak hun atam mahmah a, khat veivei khitui luang a
kingaisia a kah hun leng a tam mahmah hi.
Huaiteng gentak louh in,ka ngaihzawng nu lawmnu'n hon simmoh petmah
a," Nang mizawng,silh leh teen neilou, sliper nangawn neizoulou,ka
lawmnu a din puansia bang phet na hi, Zaktalou pa", hon cih lai bang ka
ngaihtuah thakthak ciang in,mit apan khitui nul senglouh hong luang khia
a, ka nuai a ka laibute tak kawt keuhkeuh hi. Kuamah mohsak ding ka
thei kei,maizen..!" Toupa, thuaksiamna hon pia in,hiai leitung a
hicibang a omden mai ding ka hi hiam ? naa ka sa lua", ci in ka kahthum
zel hi. Tagah ka na hih zawkmah ziakin mite simmoh na ka na tuak mun
mahmah hi. Ka ngaihzawngnu toh bel kam selua in ka kihou kei ua,
himahleh alawmnu thuzoh na nuai a om ahihman in khat veivei lungkiakna
nei zel a, mihausate bang ana kawkmuh zel hi. Hucibang a alawmnu
panlaknate ka haih hetkei a ka lungkim louh thu leng ka kum tuankei hi.
Aziakbel,ei tagah gentheite adin hihtheih bang mah a omtuan kei hi.
Pawl 10 ka hon zoh un,a sangzaw lam zil ut tenten ka hihman in
ZoKhopi a ka Paneute bel in huai ah ka va om hi. Himahleh ka
ngaihzawngnu bel,school kai peihnawnlou in laa lam ah kihei a, Studiote
ah tallang thei mahmah hi. Munkhat a ki omkhawm nawnlou ahihman in
kithuzak mengmeng theih nawnlouh hi. Ken phone ka neihlouh ziakin , PCO
khawng ka vazang zel hi. Hucia siamna sangzaw zil a kum bangzah hiam ka
om nung in lam et phak hetlouh in Govt.nuai ah Sepna ka hon mu hi.
Huaibel Police Officer a hi a, Imphal based in ka Posting Order hong
suak hi. Kei leng inlam phak ut huai ci in phak ka hon sawm tei a,
eh..ka itpen kiphone masa phot leh ci in nitaklam dak 3 in PCO ah ka va
phone hi. A ring zaw pai hi a,thumvei mawng mawng ka try nung inleng a
Pick up takei hi (Mihausa Khampu toh dating a apai laitak). Ka lungsim
ah thawmhauna ka nei a,midang houh ana neihsan maimah ata de aw ka cizel
hi. Kipahna teng dahna in hon khup zou hileh kilawm a bang hi.
Katheih thakthak leh Biakhoihte a pa Posting na Imphal a a na kisuan
uh a hi hi. Huai a alawmnu toh thilsai nei a va omkhawm ahi zawmah ua,
al awm nu'n tangval hausa mahmah khat Khampu kici, a khua ua mi hausa
leh thunei mahmah ana kawkmuh hi.Nikhat kimukhawm ding in mun thoveng
khawng ah ana pai pih a,ahauhsak luat ziakin Biakhoih inleng nial vual
in a koihkei hi. Khampu bel Private a Thau/Selai ut ut tawitheihna
power nei a hi a. A pa IAS retired a hi hi. Car khawng in ka itpen ana
vak pihzel hi Khatvei a inn ua hohding in a cial hi. Biakhoih in leng
na cih hial leh ci in a vazui tei a, a in uh thupi asa mahmah hi.
Kizahtak tuah lawlai uh ahihman un common room ah a pau zawsam omlou in
tu uhi. Biakhoih in leng thawmhauna nei panta a, bang hiam thil a tung a
a tun khak ding laupanta hi. U kham..na inn uh anuam lua,awl in kong
hoh thakdi aw,inlam a nasep di ka nei a ka na pai phot ding ci a pai
asawm leh..khawl oh.. Singpi bek dawn phot in a ci a, anak khouh luat
ziak in singpi dawn phot hon sawmta hi.
Khampu leng singpi bawl ding in Kitchen røom lam manoh in a paipheita
hi. Biakhoih bel a insung uh nalh sa in ana khodakdak a,ngaklah lua
hileh kilawm zawzen in a phiaphia hi. Oh..maizen !..Khampu a mizia a mi
huham,nungak hau mahmah ahi a,lungsim nintakpu ahìhlam theilou hi ding
hi a maw.!.. Singpi a bawl zawh in Biakhoih a ding pen ah Damdoi a
helsak hi. Hucia singpi hon dawntak un Biakhoih in bangmah aphawk nawn
ta kei. Mangbatna zankhua zaw a U khampu toh laikhuntung ah a zat mai
ngaita hi. Lak kiktheìhlouh leh bawlhoih theih nawnlouh hinkhua Biakhoih
tung ah a tungta hi.. Zingkal dak 6 ahi ta. Khampu bel apam ah ana tu
a, Biakhoih awl in hong thou hi. Maizen! Kham ,bang hon loh namaizen a,
maw.. maw.. ci in hong kap kheta hi.. Khampu in leng hehnep theih dandan
in hehnem a, Hospital a Check up bawlsak ding tanpha in ciam hi. Huai
lai in Ka nu damlou RIMS a ki etkol lai ahi a, Biakhoihte leng huai mun
mah ah Khampu toh hong pai uhi. Biakhoih bel adah mel mahmah mai hi.
Gate ah hong lut ua, Khampu in Biakhoih khut alet sak hi.
Ash ! naa ka sa petmah a, ka dinkhawl maimah hi, tuma a a phone a
pick up louh ziak hiaikhawng ziak mah adiam ka ci a ka kahtha bang a
suakpetmah mai hi. Ut leh utlouh a ka kituah uh a ngaita. Mit apan
khitui hong pawt a, amah leng nguaitak in khitui toh hon enkoi phei
a,hucin ka ki enliam vungvung uhi.Kei adin pahna ni suakngeilou ding
hita emaw ci in ka kingaìhtuah zel a,i itpen midang khut a bangmahlou a
poìhlawnna ana tuah mawk haksa tak leh puaknat huaipi a hi hi. Lungtang
kitamkham phial a gentheitak a om a hunlui liamsate ka ngaih tuahtuah
lai in alimte ka enzel a,huaizan zaw khitui luanna leh lungngaihna hun
in ka zang suak hi.
Headquater apat a sapna ka muh dungzui in July 5,2007 in ka Posting
na ding mun ka zuanta hi. Kou inkuan kei toh ka nu kia ka hihman un,ka
nih un ka ton uhi.Huaimun bel anuam mahmah a, kho omdan leh a mileh sate
leng siangthou a,lum leh vot leng hun phet ahihman in ka nu bang a nui
seisai gige zou hial hi. Hucia hun bangtan hiam ka sepzoh nung in.
Nikhat gam fang din ka guard te toh ka kizui khia ua,ka nu'n leng hon
zui hi. Phai apan suahlam a Tangmual vum kici,mun daidamtak mun ah
khodak din ka kum uhi. Kei hon guard te a kin gamtatnalam un akiang a
nungak khat kiguih zot tuh suang siktal in akipuk a,a lu atatkha hi.
Kamuhphet in ka vadelh a,tui pe din guard te ka sawl hi. Ka nu'n
kamsiamtak in a houpih a,amin,a omna leh bang hih dia hiaimun a hoh
ahia,inkuan sungthu khawng a dong hi. Huai nungak bel melhoihtak a hi
a,ka muh phet in ka lungsimteng ala mawk hi. Zahtakna toh ka dim a..ken
leng bang sem e ci a ka dot leh..zum leh dang awk pipi in... Sir, hiai a
gam a pakte limla ka hi ci in hon dawng hi. Na sungte phone in ka ci
a,sir..balance ka neikei a ci hi.Nasungte no.hon pia in kon sapsak di ka
ci a,a number hon genleh ka nungaknu Biakhoih toh ka kihou lai ua no.
toh a kibang mawk hi.
A omdan bel,huai minu pen ka ngaihzawng Biakhoih Nau ana hi dan
ahi.Ash ! ut leh ut louh in ka phone ka pia a ka kihou sak hi. Ka
ngaihtuahna apaisau petmah a,hunlui liamsate ka gelthakthak a,ka itna
hong thak deuhdeuh a bang hial hi. Gari a lutpih in a inlam uh ka zuan
uhi. Kong taizel ua,ka mitkha ah a U nu hong kilang zel a, Khampu toh a
kal thu uh ka ngaihtuah ciang in ka hehtha bang hong suak thepthup zel
hi. Bangtan hiam ka tai zohnung un a inn uh Keisampat Station kiang ka
tung khong uhi. A inkong uah a U in ana ngak a,a nau Judy leng akum a,ka
nu'n a vakha hi. Kipahthu gen a a kihou houlai un,ka car window glass
ka hong a, ka dakphei hi. Oh ! ana ngei mai, itpen melmuh zaw. anui
hiuhiau a,a nuihmaite'n hunluite hon phawksak zel a,ka en zel a,itluat
ziak hia ka thei kei,amel a ciangkei deuhdeuh hi. Ka mitte tui in ana
dim a kidek zou nawnlou in ka khak khumta a, huci'n khelah takin ka
tailiamta uhi.
A nau in bel, a U toh ka kal thu uh bangmah athei kei,gen leng ka
sawm kei hi. Hunte hong pai zel in,a vangkim in Judy toh kong kithuzak
zel ua,khatvei ka phone leh kisil ana hi a,a U in ana la hi. Thu kon
kikumkum ua,hun paisa athu omdan teng hon gen a,khitui kai kawm in ka
koih hi..Nikhat Judy toh kimu ding in ka hong kithukim uhi. Sanggah
luankhi daibang a thenna din ci in tuma a ka kituah khakna mun lam ua,
Farmkhat ah kimu din ka kuan uhi. Amah a na tungkhinta a,a sakmel ka
muhmai in leng ka lungsim dahna teng mang zou hial in ka thei hi.
Sir..hong tung maw ci in hon cibai a, nuikawm in..hi..ana felna cia ka
ci hi. Hun bangtan hiam thu tuamtuam kihoulim kawm a nektheih ka neknek
lai un,nitaklam dak 4 bang ana gingman hi. Ni leng a tum dektoh, damleh
hun dang ah kimu zel ni maw ci in pailam kon sawmta uhi.Judy, kei ka
napai masa di aw, nuikawm in ka ci a. Card khat ka nutsiat hi. Hucin ka
paisanta. Lamdang satak in a card a en a,a hong leh a sung ah..."Judy.. I Love You:I Need You"
cìh kigelh amu hi.Gingta thei mahmah lou a hi a, alam et phaklouh luat
ahihziak in.dingtou in hon delh chenchen a... Sir, sir... Na taktak maw?
ci in lamdang sakmel takin hon dong hi. Ken leng nui kawm in,ka lu ka
su ngaungau a, ka khutvan in ka pailiamta hi.
Nitak solkha tang nuai ah hunluite gel in varandah ah ka tu a,kha
vaak singseng leh van a Aksi phelelep te'n nunlui ngaìhna liansak semsem
hileh kilawm zawzen hi. Ka itpen,Biakhoih in tuahsiatna ana tuaklou
himaizen leh zaw ci in ka ngaihtuah zel a, khatveivei vangsia ka kisa
petmah hi. A chang in Khampu bang ka hehsan kha thepthup a,numei tung a
gamtat kilawmlou tak a a gamtat vial,phuba lak utna lungsim ka neih hun
bang a om zel hi. Himahleh Pathian in ei adia hoihzaw ding lampi hon
gelsak a hikha zaw de aw ka ci zel a,sulkik simthu lel kiksawm kei
mahleng, ka lungsim ah zaw a nuihmaite a mang taktak thei kei hi.
Bangteng hileh a liamsa chu a liamsa hi a, ama thakheng dia cibang ka
tel Judy ah lungsim kihei leh ci in ka kisuangtuah thethup hi. Judy
zaw..amel ahoih a,a nunnem a,mi citak leh polhnuam mahmah a hi a, ka
hihna hon theisiam thei ding mi leh ka lungsim put bangtak hi a ka theih
ziakin ka lung a tung mahmah hi.
Hun hong pai zel in Judy toh ka kal uah itna khaugui hong zam panta
a,itna thute kikum in,singdang eng nawnlou a, ngaih lungmuang a omta din
ka kihanciam uhi. Damsung a dia cibang ka tel Judy toh Vabang lengkhawm
ding simthu sut a kha bangzah hiam kingai a ka om nung un, ka nu
kithuah pihding leh kei hon panpih thei dia cibang ka tel, Damsung adia
hinpih ding ci in Ka itpen Judy toh Pumkhat ka hita uhi.
After two Years : Kou Judy toh tapa khat leh Tanu 1 ka nei
ua,ka tanu uh mel mumanlou in ka nu'n hon mualliam san hi. Biakhoih bel
Pasal neilou in amah khomkhom in a khosata,hucibang in alawmnu leng ahi.
Nidang a ka tung a a kamsiat na te uh amau tung ah atung a,ka mai ah
gendi bei in a omta uhi...
Hucibang a hinkhua gentheitak apat a khangkhia a,lawm leh vualte toh
tan kikim lou a,mite simmoh leh engbawlnate toh hinkhua ka zat hunlaite
ka ngaihtuah kik ciang in,Toupa hoihna leh citn te thupi in manpha ka sa
semsem hi. Vabang pil lou zong, selungmawlte leivui pan a hong laamtou
a,a haksa anuam palkai thei dia hatna hon pia Pa Pathian toh ton peuh
leng, khovel ah bangmah ahitheilou omlou ding hi. It leh ngaih thu
tungtang ah,hauh ziak hiam,zawn ziak hiam a it ding ana hikei a,tua mi
hausa pa leng nikhat ni ciang a Khutdoh a vak ding himaithei a,tua mi
zawngpa leng,nikhat niciang a Mi hausapi ding leng himaithei ahihman
in,itna thu theihtel petmah ngai hi. Neih leh lam thute zaw,amangpah lel
ding thilte hi ua, himahleh itna bel,a tultheilou thil ahihman in
lamdang hi. Huai ziakin itna lamdang,lemthei ci in khangthakte'n zaideih
awi ni.Damsung a poihlawnna ding zen a hinkhua zatkhak theih ahihna
ah,hucibangte apan a pilvandan siam a,ahun lai a pil kaan a manpha omlou
hi.
Mihing hinkhua ah,haksatnate insung apat bang,it leh ngaih te apat
bang leh lawm leh vualte apat bang in hong om ding a,i itpen in leng hon
lungkham sak thei hi. Himahleh huaite Pathian apat ahi, ci a i khanna
kalbi dia i laktheih leh mi hampha kihi ding hi. Pathian in i hoih
zawkna ding thei a haksatnate i tuah hon phal ana hi. Sianlemgel dan
zaw,amak a, theihsiam ahaksa. Himahleh ,ei adia hoih zaw aman thei ahi.
Nungak tangval kal ah leng,lungkhamna leh lungsim natna i tuak kha
maithei, himahleh, huaite a lungke mailou a,kei adia ittu diktak hon
musak tu hizaw ci a la thei din Simtu tengteng Toupa'n hon vualzawl
hen..!¤-
Author's note : 1. A tangthu kimkhat ahi pan,a kimkhat bang a omlai hi. Huaite hundang ah alemchan dan zil a gelh beh a hi ding*
2.Hiai tangthu Phuahtawm ahi a, a sung a Min
kigen-Biakhoih ,Judy leh mun leh mual,khomin kigente phuahtawm a hi.
Kuahiam hinkhua paulam a gelh a hikei a,kuahiam min toh akibat khak leh
ana theisiam ding in kon ngen hi) Lungdam!
©Siamsinna leh Vakiangbu
Comments
Post a Comment