PIANGSUAL

By ~ Khen Thang Hangxing

Thumapi:-I hinkhua a chouna ituahte tung a zohna in hinkho manpha hon pe ding hi.

Leitung khovak muthei ding a itna taktak toh hon enkoltu ka nu leh pa itna theisiamlou in ka hinkhua ka na zang kha a. Khovel a bukimtak a ka piankhiak mihampha khat ka hi veve hi. Ka hausa kei na ua,ka tasam tuansam kei uhi.Ka pa'n government ah grade 4th naa khat sem in ka innkuan uh ana enkol tou hi.Innkuan hoih leh mi' ettontaak asak uh sungkuan akipan khangkhia ka hihman in mi hoihlou,zu leh sa toh kibualte ka koihniam petmah a,kidik sakna leh kideih khopna ka hon nei mawk hi!.

Kou innsung a tung dia ka gintak louhman ahi hi.Huchi'n hunte hong pailiam zel in,tangvalnou kong hita hi.Nungak bang thohthei simta, phetlou a aneih leng nei zawmah ! Party bawl ka thangsak mahmah ua,nungakte toh party zang ìn ka lawmta teng un ka hinkhua uh khong a selam ngen in ka zangta uhi.Khatvei party neihlai in ka nungaknu Chingboi in,'upau,beer dawn ni uh, grape juice maimai zaw hatlou lua..aw upau?'.Hon ci a, ken ahihleh ka nial pah sam hi.

Himahleh itpen in huai hon gen ngam a,asum di bang hon pawsuah zawzen banah ka lawmteng in dawn ahihman in a tawp in ka dawnta uhi. Hicibang in siatna lampi ah kal kon suan panta hi.Beer akipat zu taktak,ahiip thoh,ateepthoh,anekthoh,akapthoh chihte ah kalbi kon suan toutou ta hi.Khamtheih man di neih gige thil haksapi ahihdan kon theisuah deuhdeuh a,huchi kawmkawm in ka innsung uh kon lok panta hi.Niteng phial in zuak di ka pawkhia a,sawt adaih tuankei.

Innsung van lah bei phialta,zuak di zong mah leng zuaktak di a om nawn mahmah kei,a om sunsun ahihleh ka pa office kaina gari(car) leh innmun ahimai ! Hicitel a hinkhua zat chihtel chi in ka khamlouh chiang in ka kingaihtuah zel sam hi. Himahleh ka duh hun in hon phakchiang in poisakna ka nei tuankei.Nikhat ka pa kiang ah temta toh ka vapai a,'pa,gari chabi toh alai poimoh teng hon pekhia aw..non piak kei leh..'Chi in ka vavau gemgam hi. Ka pan,'bawi,nang amah ahi,na utut loh in,hong pilvang in aw na ki SU NA kha di!

'Ka pa kampau ka zak in kisuanlah na in ka dim a,himahleh ka kipasal sak teitei hi. SAI HAPAAK SA TUMKIK NGEILOU chi in gari toh ka pawt khia hi.Huchi'n ka vazuak a sum tamkhop chu ka mutei hi. Sum om sung teng dawnzel,kapzel,..in ka kilungmuansak mahmah hi. Ka taksa hatlouh ziak in midangte banglou in ka lel mahmah hi. Ka gawng hulhul a,dengdel petmah in ka thilchiin zongsatte ka hihtou thouthou hi.

Goutan khat neih sunsun alam-etna uh omsun,ataksa ngeileng etsuakzou nawnlou a puksia maithei dia ka om ka nu leh pa'n athuaksiam hetkei uhi.Hiaiteng theisa in leng ka tawpzou tuan kei ! Nikhat overdose in ka puksia a,lamdang ka sa petmah, ka damsuah mawk hi. Ka theih chian thakthak leh ka nu leh pa leh tanau hon awlmoh a thuumna toh hon delhzuite ziak leh hon siamtupa'n deihna hon neih lai ziak ana hi hi.

Damlou lupna ngak in ka lum a,ka duhna bei kei mahleh huaite delh a taizou nawnlou ka hi phot mai hi.Ka nu leh pa'n ka lupna kiang ah thuumna nei in khalam hinna thak ka neihna din hon thuumpih pih mai uhi.Nikhat ngeina dan in ka pa a vazingpawt a, a hong pai in nek ding limchi taktak banah Pastor Zampu (pa zam) hon tonpih hi."Pau,na neulai a naupang melhoihtak maban limchi mahmah nei hi chin a,tua hicia na om mawk pen na kingaihtuah teitei ngai ahi," chi in ka pa'n hinna kongkhak a ka lut ding a deihman a achial ahihdan hon hilh hi.

"Pa Zam,kingaihtuah mah leng kei adia kikhelta,hici maimah a thukhenna tuak ding ka hita"Chi in ka tatsiatna ka pawna petmah hi."Pau, kikhel lou e,nang chitna,hoihnate suang ding híleteh kikhel khamah inteh hilezong na suang ding pen, I HONDAMPA JESU nang leh kei bat tengteng pia a hong si pa ahi, Pau" "Kei bang leltak hon ngaidam zou dia maw paZam? Ka khelhna lianlua hilou maw? Ka tantawk meidil ah paih ding hita maining maw, kisik nang e." Chi in ka mittui hong luang zungzung hi. "Pau,khelhna lianlua,neulua chih omlou ahi,na khelhnate Jesu'n kros ah sihpih zouta hi, Amah ginna in sang leteh,gingta inla Lal leh Hondampa in pom leteh hotdam in na om ding chih Bible in hon hilh eive,vazuan inla pom maive Pau. "Aww..hiai maw hotdamna ka kipakngei,ka neulai in piangthak kici in lawmte ziak in tamveipi ka na kikhem kha a..tunzaw ka lungsim kipahna a dim in pahna mittui aluangta hi ! Hotdamna theichian a hotdam ka hihdan leh thuumsakna ka poimoh dan ka gen in paZam in ka lutung a khutnga in hon thumsak hi.

Ka nu leh pa kipahna simseng vual ahikei. Ka kikawi ua ka kikahkhum mai uhi."Nu,pa,leitung khovak mu din ittak leh lainattak in non kemtou ua,ka tatsiatni inleng kamdamtak in non thuhilh zaw uhi. Himahleh ka haiziak in na zaidamna uh ka na simmoh kha a,na ngaihdamna niampen tangtaak hikei mah leng hon ngaidam un aw,hehpihtakin....na thumna un thilhihthei ahi chih ka thei,ka kipak petmah,ka hinkhua paisa sapkik theih leh ka hondampa ading leh nou adin manphatak in zang ut nang e maw. Nu, pa na tapa uh piandan diktak a piang ana kichi mahleh PIANGSUAL ka na himai mah maw..'kisik in ngaihdam ka ngenta hi.

Ka neih leh lamte uh bei in ka zuak gaih tak ziak in a buaihuai hun om zekzek mahleh nidang sang in ka kituakzaw ua,ka kipak zaw uhi. Leitung zaw neihleh lam a lungmuanna om ana hilou a hondampa kiang kia a om ahihlam ka thei khe thakthak hi. Kei leng Pathian muanna toh ka thuum zel a,hatna leh damna ka ngen hi.Ka thuumna dawn in a om a,nidang sang in ka taksa chidam in ahatzaw in ka thei hi. Saptuam ah kong kihel a,khenkhat in zaw hon kipahpih ua, himahleh khenkhat in a kilimbawl,saptuam puansilh dia zang chi peuh in hon kou mawk uhi.

Ka ngaihtuah vungvung a,tulai khangthak tamtakte khotang leh saptuam a akidaangkoih ziak uh hiai khawng ziak hinteh maw ka chi vungvung hi.Thugenna ka tankhak zenzen chiang in khotang siatdan leh saptuamte'n tuailaite lak a akalsuan dante uh bawlphat tuak ka sakte ka gen zel hi. Himahleh hiai khawng ziak mah in khenkhatte gensiatna ka thuak toutou hi. Ka taksa hatlouh nung a hotdamna ka ngah pen a khenchiang in ka kisit mahmah hi.Huchi'n ka hihtheih tawpsuah in ka pang a himahleh kei mah bang a salam leh khalam a piangsualte veina ka neihte pansan in Pathian gamna septheih khomkhom in kon semtou hi.Taksa bah leh chau a ka lupna tung ah ka lup lai in khangnoute leh gam adia thuum utna lungsim ka nei a,ka lupna pang ah kumsuk in ka thuum ta hi.

Pa aw,amasa in na hotdamna manbei ziakin kipahthu kon gen hi. Chitna neiloute adia chitna, hoihna neiloute adia ka hoihna uh na hi. Pa aw,hehpihtakin na saptuamte lungsim ah thugen inla, nangmah lungtang sukha din hatsemna leh khotang thilsia omte maituah dia hangsanna guan in. Pa aw,ka tuailaipih te'n nang hon muh ua nang toh kituak dia mansa a a om theihna ding un nangman alungsim uah thu hon gensak in aw Pa. Pa aw,ka gam uh ka en ua,nangman na tel vaihawmtute'n nang mahsang a khovel itzaw lou din leh,genthei leh tagah,meithaite gawlmek sak tute himai lou din, amihinpihte itna guan ding in kon ngen. Pa aw, pau zohlouh ziak a thudik hentang a a om mailouhna din thudik in vai hon hawm in aw... Anbang ka it ka Zogam uh, ka makaite un sungnek in neizong, Pa aw nangman vai na hawm chia'n ka hihna bangbang a tanbang kim thei ding in michih ka hihna bangbang un hon vualzawl in aw..hondampg min in Amen !

Unau: mihoihloute mupeihlou,mudah in na om hia ? Hihkhial ding hiteh. Na tung ah tung ding na deih leh mitung ah leng hihtei in.

Makai aw : na minam leh mipi na neksiatsiat leh na sihkuan chia'n kisiamtan louhna in hon siasia ngeingei ding chih thei in.

Saptuamte aw : pulpit sermon kia in tuailaite na banpha kei ding huaiziak in Extra mile for Christ chi inla kal hon suan mai in.

Nu leh pate aw : natate uh ahuntak a etkolna na piak keileh ahunlou takin na tate'n nou hon vaihawm khum ding hi.

Nam makai, saptuam, nu-le-papa leh u-le-nau aw, nang ziak in Pathian,gam leh minam PIANGSUAL in a om nilouh khathei hi.

Tu ahun lai in panla thak ni maw??

Toupa Thupa...

©Siamsinna leh Vakiangbu