MITE'N "KIZUAKNU" HON CHI UH

By Rex Peapy Tangpua Racer

Ka min Chingboi ahi, khovel vak mudia ka hong piankhiak in naungek deihthoh huai takmai leh ka nu-le-pa kipahna pen ka hi hi. Unau pianpih neilou ka hihman in ka nu-le-pate'n hon hawmthoh un hon duat mahmah uhi. Naungek damtheitak in ka hong khanglian hiaihiai a, khovel pilnate sintou in skul liim ka hon beltou hi. Ka hong lian hiaihiai a, ka innsung dinmun uh leng a hong se hiaihiai mawk a, ka pa zungolvei ahi a, khosakna ngaihtuahlou in azing-azan in zumun ah a hun a zangbei gige hi. Huchih kawmkal ah ka nu'n ka pa itzou nawnlou ahi ngei dia, zawldang sai in kei tuh hon enkoltu ding mumal tak omlou in ka tangkhat mahmah hi.

Nikhat skul kaitawp ka paileh inn ah kuamah ana omkei a, ken leng an khawng huan in tui khawng ka tawi a, inn nna sep di om bangbang ka sem hi. Annek huntan inleng ka nu hi'n ka pa hitaleh kuamah inn hong zuan muhding a omkei. Ka pa bel a ngeina ahih ziakin ka theisiam a, ka nu koi a hoh hiding hiam chi in ka lungbuai mahmah hi. Awwww... ! Huaini pen ka nu toh ka kikhen ni uh ahi maimah ! A tangvalpa toh kitaipih ahi uh chih ka hon zata.

Ka nu hon paisan nung in ka pa lah kibawlhoih naksang in a uang deuhdeuh a, ihmut kham ni leh gilvah a annek chihte ka neithei nawnkei. Ka lungtang natluat ziakin ka skul kaina ah leng ka bahlawh gawpta hi. Kapa lah hichimai ahihtoh ka skul kaina ding nangawn leng omzou nawnlou in skul kai ka khawlsan hong ngaita hi

Summuhna ding in sepdi zongleng lah ka septheih a tawm mahmah a, ka septheih sunte lah kivakna tham a chingkei hi. Himahleh ka septheih om bangbang linlou in ka semtou zel hi. Lawm-le-vual lakah leng maizum tun2 in ka om a, lawm leng ka ut bang in ka pawl ngamkei hi.

Hun hongpai zel in ka pa'n leng a zunek thuaklou in hon beisan nawn a.... Tuchet in chu ka buaina taktak hong kipanta. Belh ding kuamah ka nei nawnta kei, lungdong kisa in anngawl a puksih zen sang in chi in ka taksa sumzonna di'n ka hon zangta hi. Kei-le-kei leng ka kihaw tuntun a, lah ka hinna dia lamet dang omlou a ka theih man in kizuaknu hinkhua ka hon panta hi.

I it, i ngaih leng hilou, sum poimoh ziak lel a luppih zaw a haksa in a gentheih huai ngeimai. Khamsa in ki-luppih leh poisak a tawm deuh khak leh chi'n zudawn ka hon pan a, hun hong pai zel in zu kia in hon nemzou nawnta kei, damdawi nekthoh leh kikapthoh ah kong kaitou a, ani-ani in huaite ka taksa in a poimoh hiaihiai a, ka lawm neihsun zu leh damdawi ahita mai hi.

Tu in, ka hinkhua bawlhoih kik theih nawnlouh di khop a sia hong hita ! Mite mitsipna, mite muhdah leh kih ka hong hih behlap lai a, mite'n hon mullit in ka bul a om ding nangawn a ut nawnkei uhi. Ka hinkhua paisa a ka lunggimna teng leng ka deihkhop naklai in tu'n mite apan a huituam ka hi a, lunggimna apat lunggim nawnsawnna ah ka bualtou hi.

Ken leng mite bang a khosak a, nalh taktak a kichei a, alim-a al nek lunggulh lou ka hikei a, ka omdan leh khosakdan a kininglou ka hikei. Mite bang a hindan pangai a hinkik ut mahleng ka koltanna apan hong kaikhetu ding, ka haksatna hon theihsiam pih ding mi a omkei. Pathian ngailou leh lunggulh lou ka hikei, A khebul a hontun a ka sisan a belh gawp ka thilchiinte hong hepkhiaksak di mi ka mu kei, keimah inlah ka taalkhe zou nawn ngalkei a.

Ka hinkhua paisa leh pailel hon theihsiampih hilechin zaw maw 'KIZUAKNU' chia hon entuam lou maithei hichin a ! Ahi a, kei noute bang a innkuan kithutuak leh khotang hoih a khangkhe khalou ka hihman in ka tan bangbang ah vuithei ka hikei a, ka hinkhua zirlouh ziak a hiaitan tungkha ka hihman in 'KIZUAKNU' chih bel ka min diktak ahita !

Kei hinkhua bang hinkhua zanglou ding in innkuan ah a bul hon pan un aw! 

@Siamsinna leh Vakiangbu