LENGKUL HINKHUA!!

By~Nasri Jona Tawmbing TxNâ

"Zi leh ta neih hun lah nahita a, zi leh ta nei in awm lechin, bangchi khosak di na hia?? Na awmdan na ki bolhoih keileh zaw khosa zo mah mah lo di na hi" chi in nu leh pa'n hawn thuhilh ua, "Khosak zawh kei leh ka khosa dah mai di" chi in ka dawng zel hi.

"Tunni chu na Nu panpih di'n Huan lam ah nava kuan tei di aw" chi in ka Pa'n thu hawn pai hi, Ka pa ahih leh Sikul Pu, ahia, a taima in, a nna ah leng gin-om mah mah hi. Sikul kholni khong in leng a dam nak leh awm mai mai chih neingeilo a hia, ka Nu etkol di'n huan a bolsak ah nileng leng in nna sem in buai thei mah mah hi. Kei a Tapa neihsun uh leng duat chih petmah in honduat ua, bangmah leng sem peihlo, a lim lim ne, dawn in ka awm mai mai sek hi.

Khatvei sun sun nnasem dia honsawl uh ahih chiang in chi'n kei le thumang tak in leh peihlo kawm kawm in inn a pat ka Nu huanlam mahnawh in ka diang khe tei nep nep hi. Nnasep lam le lungsim a lang khollo, "tuni chu inn ah ki-om leh Nungak maiza kianga kitu mai mai di hi a" chi in, suanlam bola innlam paidan ngen ka ngaihtuah hi, vangphat huai takin vuah zudingin hong kisa ngoi ngoi a, "Nu vuah le zudi hiveh aw, i kholphot diam"? Ka chih leh ka Nu'n "nang ana khol ve, a zuk tak tak leh keile k'ong khol di" hon chihsan a, keileng huan buklam manawh in ka paikhe pah ngal hi.

Sawtlo nungin vuah leng hong zu petmah a, ka Nu leng Huan Buklam manawh in kin deuhtak in hong tai hi. "Nu vuah le theu zawk mah mah ken teh, nna le isem thei nawn tuan kei di, kanna pai mai di" ka chih leh hawnphal vanglak hi.

Kawt lauh ziak a nna sem lo le, innlam paidi chih le chu, vuahzu daikai, huihpi gialpi leng khawk salo in, Bal teh leh nahtang teh khu in innlam zuan in ka pai hi. Hi le le lung chu kim tak ahi veng veng mai.

Lampi ka pai na ah kei leh kei ka lungsim a kipawl in, "Ka Nu lah Pa'n zi neih hunta, chia ahon hilh khong uh ka ngaihtuah mai mai hi. Himah leh kei khatvei le ngaizawng ka nei nai kei a. Ka muh lah ziak le hilo, ken ka ngaihsak loh him him ziak ahi :-D Tangval khat, Pathian in khut leh khe, mit leh bil, muk leh kam bangkim, a chikim a hawnbol a, Nu leh Pa chawmsa a awm awm chu hitheilo a hi, kei ka kitoudelh ngai ahi, hiaitan lai bang ana zil sak ua, kei thulim loh man a bangmah le sep neilo, khut nasep lah peih mah mah lo inga" (khutnasep ka musit na'n ana ngai kei unla); chih khawng ka kingaihtuah hi.

"Kum thak chu sepdi zawng in Vaigampur lam ah ka diangkhe tei him him ta di" chi in ngaihdan kawn bawl ta hi. Hun hawn beizela, mangpian hun lungdam huai, Christmas leh Kumthak zangzo in, mahnia kitoudelh sawm in mahni inn lum kawn taisan ta hi.

Vangphat huai tak in sepding Company lianlo chik khat nuai ah ka mu pah a, ka tup leh ngim chu "kum 3/4 innlam pailo a, innlam pai hun hun sum tam huntawk tawh paia, Nupi neih tak di" chih ahi. Gintak banglo tak in innlam ngaih ana in, khasiat tha lam lam bang suak zawzen hi. Kum chu gen loh Ni khat lel leng sawt kisa mai, huchih lai a, Kum 3/4 awm di chih chu haksat chi kasa mah mah mai.

Hun leh nite hong liam zel in, lamzang tak a semtou zel in Kum 4 chu zoudi hita, inlam paikik chianga om dandi tuam tuam khawng ge'l in Kumli chu k'on zang bei nawnta. Innlam zuan in ka pai ta hi.

Kum 4 maa a le Zi neih hun chia, mite gen gen, kum li nunga singtang a kiknawn chu(h) tangval chih le ki lawh nawnlo. LENGKUL chih ki hi ta, Lengkul hi'nkhua kizang chu hita mai.

Mel leh puam et in naupan mel sim mah leng hon theichiang lo tamtak in "kum bangzah na hita"? Chia a hawn dot chiang bang un, "zuau ka gen theikei" chi'n ka kum diktak mah ka gen zel a, "Na upa ta e" chih paukam zaktam pen hi ta. Upa hon sa in hon sa mai mai uh heh, ka kumdik tak ka gen ziaka upa hawn saa, hon deihlo tu'n chu hawn chan himai, thudik ngaina a thei gige Pathian om chi'n ka kinem mai mai zel hi.

Mundanga awm khiak maa a, nu leh pan "pawt pawt tel kawh, inna awm tam hoih ahi" chia a thu hilh hilh pa uh, tua lah "Kholak khawng pawt in la, nungak khawng na hel dia, koppih di khong melh bol ta ve" chih thuhilh na hizaw ta.

Zi neih hun taka zi nei hileng, tua ka nungak hel hel te khong ka ta te vual lek lek, Paukam zak nuam lo tak tak, "amah bang nungak hel le hikei, hong pot mai mai hi, chih khawng, a khen in lah ka sungte tawh kipawl ua, kana lum mai di," chih khawng i nungak hel te laka paukam kiza ahih chia, kua zan teng sung teng in nungak buaipih in a diang diang ut mah dia e????

Sepdi neilo, sepdi neih te le sempeihlo chu, inn a mahni kia a awm le ning huai chi in kholak khawng i va pawt khia a lah, i sang (nau) te vual lek lek khawng a ta te uh ban kaih a hong pai let let uh, zumhuai sa in kimuhloh khembol leng le a gal a pat a ngaih deuhtaka 'U' chia hawn sam awng awng mai uh, zum huai, kholak lah nuamlo, nungak hel lah nuamlo, inna awm lah nuamlo, Lengkul hinkhua tak hi chu aw........... 

Tuailai pawl ah le kum Over nai hial sama chi'n tuailai pawl kikhop leh lazil na khong ah iva tel a, lah kuamah ngaihsak le ki lawh lawm lawm nawnlo, "a Siniar pen a aw THUM lo pen" chih khawn, ka aw a Thumlouh a gen ut uh hih le el ka Seniar thu bek gentel lo hi le uh pha ven.

Experiance nei chi'n khawdang mundang khawmpi leh thil dang bang hiam hih nang ah, hon ngaina tak tak kei mah le uh, kamsaim a hawn zawn di bang ana om zel sam, phur tak in iva hawh a, "tu tung chu nungaklam buaipih ta le maw" chi pawl tawh "nungak buaipih a hoh ka hikei" chi'n kidawng mah leh, a guk taka chu, kuan khiak ma him him apat le tup leh ngim chu hi.

Tangval kihia, mikhual nungak star deuh khong i mu a, beiseih bol in, va banghiam leng lah "beven lua", mikhual kipahpih lua", chih hi nawn. A khen pauthei tuam deuh te'n lah i tanchin teng ana hilh man pawl awm zel, hope awm sim i sak lai a, i tan chi, nupi nei ngamlo, chih khawng ana zak chiang ua, ut nawnlo uh. Tangval siniar le nungak khat in kamsiam tak a khem khe thei zel. Paukam siam hileng zaw kigen fel thei law tel di hi'nga. Paukam siamloh poi hi zel. Hi le le huaiziak mah a Lengkul hinkhua ana kizang kha eivoi.........!

Inn i tun kik ma a i tanchin Inkuan ten ana theiman zel uh. "Nungak khat lel le khempuk zolo, a siniar pen zeilo pen" chih khong i paukam zak hi zel lawm lawm mai.

Tangval siniar ka hih ziak in hon musit kei ua, tangval tamtak te siamloh akbawm le ka tangval sung in ka gan siam aka. Zi leh ta nei hi leng le, ka tangval sawt ziaka ka siam akbawm gat in ka chawm thei ta. Zi ana neih pah hileng ka siam hetkei di. Akbawm gata, zuaka, chawm utlo chu hon chan himai, ka lungke kei. A tapa tang neihsun itlou a hon pia Pathian in; tangval siniar khat in akbawm gata a chawm di Tribal nungak khat mai mai chu a it ka nging kei.

©Siamsinna leh Vakiangbu