LIANPU tangthu

Shared by~Takahashi Mika

Ci Tonsing phalna in.

LIANPU, sawtlam in khua khat a nupa kituak mahmah leh kihou thei mahmah Thangnou leh Chingnoute nupa khosa uhi, huchilai in a gam uah kial hong kia hi. Nupate'n kial dou nopzok khak leh chi in khodang ah pai di chih hon kithukim uhi.Apaina lampi uah ni asa mahmah mai a, a zi agaisan laitak ahihtoh a hong bah a, adang hong takta mahmah mai hi. Huai mun, tui omlouhna mual gumgawtak mun ahih ziak in, azi mun khat a nusia in tui zong ding in apasal a kuan kheta hi. Atawp in Talpakte tuikhuk a vatung a,tui dim dia a kisak laitak in Takpakte hong pai geih ua Thangnou a naman uhi. Apasal hong tung theilou ­, himahleh anau neih hun in a phasan a, nau hon neita hi. Nau neikhin phet bah mahmah mahleh adangtakluat ziak in, mun khat a puan phahzok in nau ngek a sial a, amah leng tui zong di'n a kuankhia hi.

Vangphat huaitak in tuikhuk a tuakpah a,khamtak in tui a dawnta hi. Huchihkal in naungek tuh van nungakte'n ana mukha ua, melhoih sa in hiai naungek i siam ding, achi ua,naungek kiang ah, " Na min Lianpu hi henla, na nuih chiang in na muk ah dangka-eng tui luangkhia hen la; na kah chiang in na biang ah mittui in dangka-eng tui liang hen. Tui na leuh peuhmah chiang un lah na puanza mong uh tui ah na diah ding ua,malam dai hiaihiai aw, nunglam thuk hiaihiai aw, na chi ding uh," achita hi. Huai a gen khit un van nungakte aleng mang uhi.Anu tuitawi atun a naungek a pomleh naungek in van nungakte genteng anu ahilhta hi. Anu'n leng lamdang a sa a,"Bawi,hon gen nawn dih," achihleh naungek in a genthei nawnta kei a,naungek dang te mah a bang nawn hi. Huchi in nutate hong pai zel ua,khua khat hong tung uhi. Huai khua ah kuamah belh ding a thei kei ua,apai zel uhi . Lampi ah lui lianpi thuk mahmah khat atuak uhi. Anu abei dong mahmah a,a kingaihtuah l eh naungek thugen hon theikhia a.

Huchi in apuanmong tuilak ah hon diah a," malam dai hiaihiai aw,nunglam thuk hiaihiai aw,"chikawm a tui aleuh leh tui hong dai hiaihiai a,baihlamtak in tui hon liau galkaita uhi. Aban a khua khat hong tung nawn ua, zintunna ding zong in khodung khovai a tawnsuak ua,a tawp in meithai khat inn ah tungthei khong uhi. Meithainu'n, amah kia om ahihchiang in, apaipah uh aphal kei a, a inn ah nutate a omsakta hi. Azinglam in Lianpu nu lou a kuan a, meithainu nau don in inn ah a om hi. Lianpunu akuan khiak dek in," Nau na kap sak kenlan, nuihleng na nui sak ken chi in vai khak hi." meithainu leng huchi bang mah in ana hih hi. Azing nawn in huchi bang mah in a thukhak a, lou akuan san nawn hi. Ani thumni in Chingnou in huchi bang a athukhak gige pen, Meithainu'n lamdang sa in lung himoh ta hi. Alungsim in tuni in chu nuihleng ka nui sak dia,kap leng ka na kap sak himhim ding, a lungsim ah chita hi. Huchiin meitainu'n Lianpu hon kap sak a,huaitak in Lianpu biang ah dangka-eng tui vuak mittui in hong luang kheta hi. Aktui a hon khemleh akah hong tawp a, a hong nuikhia hi. Huaitak in akam akipan dangka-eng hong pawtkhe leuleu hi. Hichi bang meithai nu'n amuh tak in a kipak lua a," Nau deihhuai, nau manpha," achi a,naungek tuh a taimangpihta hi.

©Siamsinna leh Vakiangbu