KHUALGAM VANGNGAI : Lungsiat thimthu
By ~T Minlun Suantak
Nikhat chu Thangboi kiti tangval nou cha hun-awl mang di'n khualgam
khat in ava zinta, zialai chun Thangboi chu kum 21 ding vel bep mi ahi
pan hi. Ahinlah, ama chu a kitangval sak huntawk laitak ala hi ama kikoi
dan in. Zia ava zinna chu ahileh aloipa Muana te khua ahi'n, ama le
nitak ninem lam ah kihuitha ding ti'n a changa a hang vakdaw leh nungak
melhoi leh duang ting tak khat tui khai ding hileh kilawm Bêl khat choi
in toty lam zuan ah hung chu a vakmu phatin ama le a ngawl gualin a umna
mun in ading den kha ziangta.. Nungaknu chunlah a limsak beklo hileh
kilawm in a Bêl ah tui chu athal zaw in a innlam zuandi'n a Bêl chu
akipat a, a Innlam uh a zuan tum veng-veng ta ahi.. Chun, Thangboi le
Muana te innlam in a kinungle kit ta ahi. Nitak luphun ahung hita
Thangboi lah nungaknu chu alungthim in adai thei tapua, lup ding le
aging mama ziangin, hinlah ahung lum tei san a ! Ging pum-pum ah ahung
lup uleh ahetlo kal ah ala ipmu vang hidi hia jingkhua vak lamle helou
in akhatlaw leh khua ala vak mantai.
Bangtik ah amukhak leh manglam natianga amat khak le hilou avak mu-mu
chu alungthim ah chamden paijiang chu Thangboi inle mak asa mama jiang
hi. A chang ah vahel ding tilah mikhua malzin hi nalai, amin na tiangle
ahet nailo ahi naklai phat leh achang ah nungaknu vahel ding athisan in
angam tapua. Ahinlah, vangphat umtakin Muana chun akiangin hiti'n ahung
genta, Thangboi nungak khat helding ka hei nang toh kituak ding tin agen
ta.. Thangboi le a uth selam kizawngthei dulo sak thaw in a uthlo
dandan in avak dawnhu phot jojen a! Nitak dak 6:00pm vel ahung hita,
Thangboi toh Muana chu nungaknu kiang a laitual ngabang leng ding ti'n
aki singsa tauin, ava cia nalnal tau hi. A inn uh vak lut jiang dingchu
Thangboi in angam kit tapua,Thangboi chu Muana te innlam in aki lekit ta
Muana ngen ava lut ta ahi. Chawmkhat zo in Muana le ahung ki-lawi ta,
Muana chun Thangboi bang tidan ah ala ki nungle kit jiang la hia mw? Tia
adot leh Thangboi in bang ma'n a dawnhu pua, alum kit tau hi.
A lungthim inlah amang thei tapua, amit asîn phat le nungaknu mêl bep
chu amit thân aki lang dundun sek in a zanmang natiang in amukha
thepthup nalai hi. Zingkhua hungvak ta Thangboi le a changah morning
walk ah acia leh nungaknu chule morning walk ah cia chutoh thakhat pi'n
ahung kituak phut jiang tau in, avak houpi ding lah amin natiangle ala
hetnailo ahoulo ding lah chance um sunsun hijel alung buai mama kal in
nungaknu chutoh akipêl kha mantau hi. In atung phat ah aloipa kiangin a
chanchin agen ta,Thangboi chulah a innlam ciakit niding lah naita,
kamkhat jiang cha le kihou manlo ah akikhen jiang di'u chu a NGAIZAWNGNU
a hilou vangin anuam thei tapua, nitak ninem lam deu ah loichante chu
ahung vakdaw ua leh kinep phaklo pi'n nungaknu chutoh lampi'n ahung
kituak kha kit laijang ua, Thangboi adi'n chu kipakna leh lauthawngna
asuak kit tai...nungaknu toh aki tuak madeu un Muana chu Thangboi
kiangin ahel piak guatnu ahi ahil in, Muana chu nungaknu amin (Kimii)
khoilam cia gua mo ? ti'n ko ta.. Kimii'n le mawk ah ka chim talua na'u
toh kituak khakkhak leh tia hung vakdok mai2 ka'i tin adawnhu a ! (nui
hiau kawmin) amau teni chawmkhat ahung ki houlim zaw un kimii'n uMuan
zia la loipa hi kua mw ka hekha ngai maw na e tia adot leh mua'n le ka
loipha mama Thangboi kei kianga hung khualzin ahi tin adawnhu ta,
Thangboi le zakcha kisa hidi hiven leitual lam ngan thip bekin akitung
kuiku nguk jiangta Muan'n le Thangboi enn in zia hi Kimii ahi'n nungak
feltak ahi tin ahil tai..
Thangboi a chutna pat hung dingdok in agen masak dingle helou in amin
ahetsa hi lele avak veldot kha phut jiang in, nungaknu chunle he U ka
min ahileh Kimii ahi ti'n zainem tak in adawnhu hi. Houlim kawmkawm in
Kimii te inlam zuanin a cia tau in, Thangboi adi'n chu kipakna sang diak
di'n ginchat aum hi.. Kimii'n le Thangboi kiangin he u keimin lah ka
genpiak ta'n nang chu he U ti'n hungko ziang lengle hungko khiallo di ka
hia ahinlah, la min ka henuam in lungsiatin leihil theidiam? tia adot
phat in Thangboi inle la hetnawp nak in chu genpiak thei talaw e.. ti'n
amin ahiltai.. Tia chu thildang bangma gelphalo hiala houlim kawmkawm ah
acia zing laiun thakhatin Kimii te Gate bul atung phut jiang tau in vak
zuilut theng jiang di chulah kisuangla geuguau ahi phatleh a gate
bulchan uh ava thak tau hi. Akikhen ding kuan un bil tai nading kam mal
thucha tamlou toh kimii'n athadok ta. U Thangboi, Muana nitak leh hung
leng tei2 un o ala ngakzing di ka'i. Loichan tele a innlam un akile kit
tau hi. Thangboi lah acia kit niding na tul2 jiangta, chulah nungaknu
chu toh vak ki melhet pan2 kit nalai, a ngaitua leh nungaknu chulah ana
lungual tak ala hikha kit nalai' nitak hung hita khua hung thim pan-pan
loichante chu gawnel kai chipchip thuak kawm in Kimii te innlam zuan
di'n aki pandawk tau hi.
Loichante chu Kimii kiang atung ta ngei ua; Kimii'n le maitai tak in
ala lamtua hi. A nu-le-pa te le mi nunsia talua hi tuaklo hileu a kampau
leh a mi bol dan ua hetdaw thei natiang a um hi. Thangboi lungthim
nungaknu chun 99 per cent alua suak jiang ta ahi. Langkhat ah ada um
khat chu Thangboi lunggel leh suangtuana chu Kimii'n ala manpha na diam
aw.. ti ahi. A hung holim tou-tou uleh zân bang ahung sot thim viai-viai
ta, loichan te chu a innlam uh zuan din ahung ki khen tau hi. Kimii hi
Muana ding ah a chenna khua aloi hoi mama ala hi. Bangkim chu Muana
mawpuak ahung suakta, in atung phatun Muana chun thangboi, aleh bangti
danah nitak khatni kha hung lut nuamlo ah ala kinung le kit jiang lahem
ti'n adong ta, Thangboi adi'n a dawnhu dingchu ki thatlawp um bek set
di'n ginchat a umpuai, ahinlah, a loipha mama leh asiat-aphat he pa ahi
ziakin a dotna chu hiti'n a dawnhu ta, "Muana kei hi ka chanchin,
innsung khosakt lei hetsa ahin, Kimii toh te thei dinggual ei puau in
danleh ka kizumsua khak ding ka noplo ziaka hung lut ngamlo ka hizawi''
ti'n a dawnhu ta.
Thangboi lah zingkhua hung vak leh a chia kit ngaiding ahitak ziakin
loichante chu alum tau in, zingkhua hung vakta, Thangboi lah anop-aning
ah a loi le gual te gual ah um theilo, chapa changkhat, banah, innsung
khosakna lam ah gen thei tak ah inncheng ahi ziakin innlam zuan di'n
ahung kipan dawkta, a loipa toh parking lam zuanin achia tau in, hinlah,
Thangboi lungthim chu a bii thei pua, a NGAIZAWNGNU ahilo vangin a
khela tun-tun ziang hi. Muana kiti hi mi ginum, loi leh pai ading ah
anuam le haksa taise ngailo mi ahi thangboi in a hetchian tinten ziakin
bangkim chu a loipa mawpuak in akoita, Thangboi le a chiana ding Gari
ahung kidaw a zia chun alut in a chuangtai... Chun, Muana le Thangboi
nungin a innlam zuan ah achia zing lai in Kimii toh lampi'n aki tuak tau
in, Thangboi in ama avei guala chu Kimii'n le ala vei ve sam hidi hiven
Muana kiangin 'u Thangboi la' ? ti'n adong pai ziang in, mua'n le a
chia tai tu mama in ti agen phatin Kimii le a NGAIZAWNGPA ahilo vangin
amai amual tha suk ziang ta ahi. "kam khat ziang cha le kiho manlo a",
ti'n adang bangma genlo in thipbek in Muana chu a taisan pai tai. Muana
le Kimii hetphak tei ding ti'n, 'Thangboi inle hung ho nuamlo ah la gel
hem'??.
Thangboi le lunghel pum-pum ah Gari a chuan zing laiin abualna
vangkhua chu atung ta ngei; ahinlah, a lungthim chu kimii te khuan a
chamden nalai hi. A châng leh a lunggel bang a selam ah achia chang a um
thamtham a, 'ka chanchin , dinmun leh khosakna ei hechian leh ei sith
ta lo kha dia aw' ti'n Thangboi chu ahun tamzaw lunggel nan amang
liamzing hi.
Thangboi in muang tak ah a ngansia dungzui in Muana le theitawp sua
in a loipa adin ala pang zing hi. Thangboi chia nung nikhat chu Muana
Kimii te inn ah ava chia ta, thangboi in Kimii a lungsiat dan leh ama
lam aki eth phat leh ki sitna dim ahi dan aloipa sikin ava genta.
Thangboi chanchin sauthim tak ahil chian nungin Kimii chun le Thangboi
toh kiho manlo ah akikhen ziang u chu khoksa mama kawmin 'kenle ka mu
masak ni ka lungsiatna ka piak zaw atai' ti'n Muana kiangin agenpiak
tai.
Lunggel kibang lah kiman tualo ahi ziakun Thangboi chu a bualna
vangkhua'n Kimii bep gelnan ahun tamzaw a mangliam zing ahi mai hi. Tia
chu lunggel zing pum ah hinkhua amat zing laiin muana chu Thangboi
kiangin ahung in, Kimii chanchin kipak um tak chu ahung puak ta,
Thangboi adi'n chu kinep phaklo pi zia gual thu ahet ziang chu a manglam
bang asa man hial ziangin, hinlah, tak thimthu ala hizaw ahi. Zia gual
thu a loipa'n ahung puak phatin Thangboi chu kimii melmu ding bep a
buaipi kit panta, Muana te khuan a loichan un a zin tau hi.
Nitak hung hita, loichante chu Kimii kiangin achia tauin, Kimii le
ala um ngei a; tia chu chanchin leh thu chuamchuam haw agenkhawm ah
ahung holim tou-tou ua leh zansot lambang helou khopin loichan te chu
sotthim tak bang a kitung kha jojen tau hi. Khovak zen ah chut ding chu
hithei deulo ahitak leh loichan te chu innlam zuan din ahung kipan dawk
nal-nal tau hi. Thangboi adi'n kimii kiang ngen ah umum jiang chu
lungthim hiselna ahipen mai hi. Hun cheng ah umkhawm theilo ahi tak ua
leh ahun nei sun-sun uh a hawmtho thei ma mau hi. Thangboi lah innsung
khosak ah neilo ahi tak leh Kimii te toh te ah, tunung khosakna ding te a
ngaitua phat leh Kimii lungthuai khak ding bang alau jel in, lah kimii
kiangin a lunggel haw agen piak ngam diak puai.. Thangboi in Kimii
kianga bangma a genlo vangin Thangboi dinmun leh lunggel Kimii'n ala
hesuak ta ahi.
Thangboi chanchin/dinmun a hetsa a lungsiatna ala pawmpiak ahi
ziakin Thangboi ngaih na sangin kimii ngaih na alian zawn ahi. Kimii
lah nungak fel tak ahi ziakin Thangboi sangah ching leh neinung zaw
valdang ala tam mama kawm kal ah lungsiatna gil-tak neilo adi'n
Thangboi pêntak vak changtêl ding chu mai them din gin chat a um puai.
Thangboi lah hun-awl nei tam lou, anu le pan nei kham-kham ah khovel
thiamna a zilsak uh ahi tak leh a chiakit ahung ngai ta, ki thala maleu
kikhenlo thei ding gual ahi ziak un a kikhen phot tau hi. Thangboi lah
gam-pâm ah lekha zil ding ti'n ahung kisingsa ta, a NGAIZAWNGNU lah a
khela tun-tun in lah, a tunung khosak na ding agêl leh chialo thei ging
gual ah agêl lou ziakin akipandawk ta ahi.
Haksatna tamtak toh kilungsiat hinkhua amat tou zing lai un, a chang
chang leh lungkiakna theiding thulam lêng tamtak kimii kiang in
khuaipi vaitung gualin alang-alang alut jing in, hinlah Kimii'n
Thangboi a lungsiatna a lian deu-deu hi. Kithu het tua na hoilou toh,
khual-gam la tak ahi naklai phat leh kigingmaw na/ki muang zawlo na a
chung un atung gel ta. Langkhat ah Kimii lah akhua ua Khualpu kiti
tangval khat in ala kheu kheu ta'n, upa te'n 'numei lung leh vokkuang
dong' ala ti gual un, Thangboi lungsiatna hemil in Khualpu zawk chu a
la sang zaw ta ahi. Kum leh tha, hun leh ni te chia zelin, Thangboi
ngei le innlam ahung tung kit ta, mi te'n la khualzin kal ah la dawngma
nu'n lêngdang hung la pawmsan ta hilou mo ti'n akiang in amu masa amu
nanung in ala gen sau-sau tau hi. Thangboi in le taksang lo in thu lam
Lêng vel mai-mai di'n koi in a thupi ngai bekpuan, aziak chu kimii toh
aki lungsiat dan u angaitua leh Kimii'n ala zuau san hial di'n akoi
theilo ahi. Hinlah, Kimii'n ala zuau san ahi thu a loipa kam ngei ah
ahet phatin ataksang thei bep hi. Kimii toh damsung chawmcha anuam le
haksa thuak khawm ding tia alung gel cheng chu athawn mai asuak ta'n.
Hinlah Thangboi le lungneu lou in chapang cha hiziang lele chungkhua
lem tilou hin akoi in, alung aneu sak diaklo ahi..
Kimii ngei le Khualpu toh kicheng leng bang kim ah buting leh sum le
pai ah tasam lou ah um thei ding tia a lunggel chu aguitung ngei
hi..hinlah, 'akchan ne ta luang ka ati leh aki law khu' ati sek gual un
doithaw tak leh ki nepna lian pi toh muangtak ah ala zawt Khualpu chu
vangsiat um tak in khovel nawpsakna ngaina mi ahi ziakin khamna thei te
ah kibual in athil chiin te hung puangin atawp in (Hiv +ve) pâi ahi
lam Kimii'n ahung hedok ta'n, Kimii lunggel chu van a et leh asang in
lei a et leh amu dong in lungkham leh beidong na'n a bawm pan ta ahi.
Thangboi in zia gual thu chu ahet phatin a pawna mama in lah bang ma
bolpiak thei anei lo ziakin Kimii haksatna chu athawk pi theilo ti ding
ahi mai hi. Damdoi lou le aai ah suk damthei ding gual ahilo ziak in
maban kinepna um sun chu lung awi dan thiam tak ah hinkhua mat ding ahi
mai hi. Dawi têl na lam ah têl khial kha lah bang ma law thei ahi tak
lo ziakin khawk mama mai hi. A dawi takin lah angdang pawn santa
Thangboi le akum in zil mama ta ahi man in hung kisiak ma ma ta
vangphat um tak leh siamtu lem guat le hi ngei in tin Thangboi inle
kawppi kochuam te hetpina toh anei ta ahi. Innsung haksat ziakin
Pathian ma ala bel tinten in ahinkhua a lamjang tou pek in nupa'n
hinkhua kituak tak ah mang khawmin anuam a haksa lung awidan thiam tak
in damsung hun chawmcha lung kituak dial dial in amang tum ta tou pek
uh ahi.
Mihing te'n damlai khovel imat sung un a poimaw pen chu Pathian
ma bêl ah ama kikol sak hi taksa leh thagau ah damna lal lukhuk ahi. !!
Author's Note : Zia ka thuzik hi fiction hi ziang le le dawithaw tak luat ziak ah aval talua aum khak chun kingaidam hitiu...LUNGDAM..LUNGDAM)
Admin Note: Hiai " KHUALGAM VANGNGAIH : Lungsiat thimthu" " kichi Siamsinna leh Vakiangbu 1st Anniversary 2013 , Laigelh / Thugelh Kidemna a Fiction Category a Nihna ahi. *gelh siam mahmah in a sim leng nuam mahmah.
@Siamsinna leh Vakiangbu
Comments
Post a Comment