GIBANG KHENNA
Gelhtu: Chinkhanmuan Samte
The Author's note: Hiai anuai a thugelh teisawn hiam laksawn hiam chinnlouh diing ahi. SIAMSINNA LEH VAKIANGBU in asai kidemna a diinga gelh ahi a, asim ut peuhmah sim diing le ahi hi. FICTION ahi, himahleh "Fiction is the truth inside the lie" mangkangte'n chi uh. himahleh a sung a THU le MIN omte phuahtawm vek ahi hi.
Khua-ang zilzel nuai ah singtehte huihin a muut ling deldel a, phalbi zing nisuak ding kuan, Kawlmong khawng i et leh nizung in a salh vak silhselh hi. A nuai uh tuimei ngou setsot te'n a tuamdim ua, sun ni hong sat chiang in zohuih khisiang nung hiauhiau te'n a mut theng zel uhi. Mihingte a ding in kho-ul tui a muttheng a tawldamna a hon pia hi.
Huchi'n ah kum-le-khate tuiluang bang mai in a pailiam vengveng ua, khatvei vei nopna ah khatvei vei dahna ah, hiai tuh mihing nunzia ahi hi. Akalin gilkial-dangtak kisakna leh giautauna ahi a, bah-le-ngui in ki omzel hi. Kipahna diing tamlua- himahleh kipah dan siamlou, a na kihizaw hi. Phetlouin, I hinkhua a thiltungte bang; tunglou himaileh chi teitei ut mihingte ihi ua, banah,lungkimna sang in dahna tam kitheizaw sek hi. Himahleh, Pathian in HINNA bang hi a; bang chibang a zatdiing hiam chih hon sinsak nuam hizaw diing hi. Huiaziakin mihingte adiing in ki-it-kingaihna athupi pen ahi hi.
Hunteng a kithuah thei gige hikeimah le ung; hun hong pailiam dungzui in, awl in kingaihnatna ka nei ua, ka kimuh tung uh sang in tuchiang in ka kineel zawta uhi. Ka kituahna khat peuhpeuh uah ka kihoupih thei liamliamta uhi. Himahleh huchihial a kimu a kihouna di hun nei kuamah ka om kei uhi. A nuam mahmah ahihleh - kua hiam khatin vanthak ka neihchiang un ahi. Ka ki phattuah se uhi.
Ahon phatsiam a, apenpen ahon hisaksek hi. Nek diing-dawn ding limlua, khumlua, thupilua leh tamlua hikeimah leh ; kei a diing in amah toh nekkhop, dawpkhop tuh thilnuam mahmah khat ahi. Inn a ann nekhawm le'ng ka hi kei ua, banah Hotel khawng a ne-le-dawn a vatukhawm ka hikei lai uhi. Lampaam khawng a nektheih khawng mai nekhawm ka hi uhi. A khenchiang in Zogam gah Suaklu peuh ahi hi. Van' ah thupi luatna di omkei mahleh, ahon polhsiamna ziakin thupitak ka suah zel uhi.
Huaileng Sunday skul tawp khawng ahi keleu a, alemlouh hun bang a om zelsam hi. Sunday skul kailai-naupang mahmah lai, aki hi a dahna sang in nopna atamzaw hi. Huaibel, maban diing bangmah a kingaihtuah phak nailouh lai ana hilim a, sapkik theih hileh tuh abanban in ka sam ding a, hiai khovel gentheihnate ka phok keiding hi.Khiatlah vungvung atam a, lah; Sapkik theih bangmah a om nawnta kei hi.
Nikhat ka Pi'n Puanak thak leh khekol/tawka thak ahon puak hi. Akiang a ding ding in a hon sam a: hon silhsak hi. Kilawm lua bang a kingaihsutna hong ompah in, lungdamna kipahna - asang telmai. Huaibanin, amau le'ng ahon phatlai ua, kilawm tak khat tuh ahon suah uhi. Huaiteng kia abei lou lai, kong a vatai dok...kei naupang mawl' lungkimna tuh asang kei ngeimai e aw!!!. "Chiingtu hoih tuh naupang mawltual ahi a, kipahna bukimsaktu ahi, Nisapi nuai a LIIMLIAP khawlna nuam ahi mai ve ". Pathianni nawn hongtun a, Sunday skul a silh dikal bang tuh ka ngaklah ngeimai. Zanchiang bang in le'ng ka van omna mun a ka lungsim om ahih chiang in; mial nuai hile zong ka vakhoih a, huchin ka ihmu nawn zel hi.
Pathianni a hong tung a, ka lawmte'n ahon muh ding ka ut tenten hi. Kithalawpna liantak tuh ahon pia hi. Numei hoih ka sak, banah ka lawm, ka kipolhpih zel' hon muh a, hon muak di kal ka taanbawl den hi. Huchi'n ka hong kimuta uhi. Nidang-hundang bang in hon naih hetkei. Hon paikhiak sansan hi'n ka thei hi. Ka lungsim anuam het kei a, nidang bang a ahon houpih louhziakin; nguihuai ka sa hial a; ka kik ut tha bang asuak hial hi; lah class atel khaklouh ding hi ka sathei kei a, phetlouin, telkei leng, a ziing Thohtanni a' heutute apan gawtna tuak diing ka hih laiziakin ka vatel hi. Kailouh man a gawtna tuahsang in tuh anuam zaw tham hi. Dak hong ging a, lawi-le-paaite'n, Lengtong Pauno in asak " Sunday skul ah nong zui diam ?"chi'n la ana sa ziahziahta uhi. Huchi'n kei le'ng hi giauguau kawm in kalut teita. Ngeina bang in sinlai laak kipat di chiangin, naupangte khatin patna Thumna nei, heutu in Sinlai la. Tawpna Thumna - naupangte khut mah ah a om hi. Atangpi'n hichi bang a hun zawh ahisek hi."Hiai bang a heutu kaihuai siam leh maban ding mute piina a kisiik huai kei".
Tawpta, Lawmte, omna lamzuan in ka paitou a, Akiang nai uh ka tun in ka lawmnu'n a hon naihphei a, ahon sam hi. "Umang" chi kawm in Laithem khat ahon pia a, -hon en gii ngamlou in ataai khe vengveng nawn hi.
Ka simpah ngamkei zezen a, Inn asim din ka kuah thinthen hi.Inn ka tun in, ka lupna lamah ka paisuak vengveng a, dai zikzek in tuh ka hon phelta; khatvei lek a kikhep a, hichi'n a kigelh hi.
"Umang, na vanthak toh na kilawm lua,
na nalh lua, kon ngai".
Inn kim a Theikung khawng a The chi tuamtuam hamte nuai ah ka kingaihtuah dide a, Kipahna genkhiak ahaksa, teh diing hileh tehna chiang in daih diing in ka gingta kei. Alangkhat ah bel ahon houpih utlouh ziak hon gelh diing in ka lam-en a; lah alehlam daih ahi ve. Ka lungngai vengveng a, A dawnna di gelh utna in ahon phu tettet hi, dip kisai bang a ngeina sang a kinawh zaw bang hialin ka thei hi. Pen' leh Laidal ka la a, hiaibang in athukna/dawnna di ka hon gelh hi. Lungtang tawng apan hongsuak bang bang in-
"Ching, na khutgelh kilawm takmai ah na mel etlawm ka mu hi.
Ken leng nang ka hon ngai"
chi'n ka gelha love sign in ka kual pilpel hi.
Hiai sang a thupi zaw a gelh didan theituan lou ka hihman in, ka theihtawpa ka gelh tuh ahisam hi. Pathianni ahong tun nawnchiang a piak ding in ka kembit hi. Kaal sung a skul kaini hong beia, huchi'n, kikhawp daak hong ging vengveng ta. akin theilam a kisawi dok ka himai hi. Hiai ni tuh kuamah ngak ka sawmlouh bang in ka ngakkei hi.
Sinlai la zouta, mawltual lam zuanin ka pai mengmeng a, Ching ka zonbawl giaugiau hi. Lawm khenkhat toh ana om ua, himahleh ka samkhe mai. Zum pipi'n lah zumlou bang in, ka laithem ka pe theita hi. Huchin tam gen louin ka paikhiaksan hi. Nna khat zou akihihman in atawldam huai telmai. Hiai hun in ka mai muthei hileng san pempuam din ka ngaihsun hi.
Teilawl dek panpan akihihlai toh gen dia kilawm hina zenpi, tampi ka gen ngamlouh a om tham hi. Aman leng tua bang mahin gen ngamlouh nei veve hi'n ka thei bok hi. Himahleh kingaihna gui in hon kankhawm ahichiang in, koipeuh ah om leng zong ka lungsim ngaihtuahna ah a hong langzel hi. Ataangpi'n zan ihmutma khawng in lungsim mitkha ah, amel kilawmtak ahong lang diaidiai sek hi. Huchi'n, Ching hoihna thuguuk tuamtuam ka musuah zel hi. Ataimakna leh chihtakna leh pilvang siamnate banah, midangte ading khual siamnate bang ahi uhi. Huailouin Chingte tuh meelhoihtak, nuihmai siusiau, buang thiuhtheuh, thakang gingen ahi hi. Kamtei in, mihoupih asiam a, akiang a om tuh nuih ahisek mai a, lungkimtak a innlam kitung kikzel dan ahi. Kizepdan lah asiam ngei mai. Hou chikchik in kizem mahleh etlawm in mittun huai veve hi. Ahihkei-le-lah kei mit kia a hoih ahi diama !
A duangching,
asam saau,
amit hah nem leh
kizepna mawltakte'n mittaina honpia uhi.
Huchi'n ah Laisimna lampang le'ng Khawlhun' ahong tung nawn leu leuta hi. Hun a kha a sim ding bang a hong bei a, simhuih vot takte hong nung hiau hiau sek a, nitum kuan bang le'ng a ang phingphengta ua, Mi lungzuang theite adingin lungleen la awih vengveng hun le'ng ahi hi. Zingkalin lah phalbi huihvot, mallam apan ahong nung deldel ua, zingdaitui votlua kisa a, tee iam-iamte amut thengzel uhi. Luikuam khawng a tuimei ngou phiphiate'n abawm lingleng uhi.
Hichibang hun in, khuakeu law naikei mahleh Khilpi/Tawsaw tehte bang leng agawgam singsengta hi. A pallun Christmas gim-leh-thawm akiza nawnta a, zandai nuai ah- koimun hiam, Biakinn hiam ah "Zankhua dai; zankhua siang" miuzik ging a kiluan deldel bang a kiza theta hi. hon lung lengsak a, khensate ngaihna ahong thak zel. Huchi'n theihlouh kalin ahong bei nawnzel hi. Huai mah bang in phalbi Nineem, huihvot nuai ah Kumthak le'ng mang khit ahi nawn ta. Mahni maban chiat zom ding a kisak, buai tren tran hun ahi nawnta. Abangabang hileh hiai hun in kuamah vai vakithei pha zou nawn lou hi. Hunthak ahihtoh kipatthak hun, abah leh a nguite adiing a thalak thakna hun ahi hi. Salam-khalam a kikhutsuih ding in phalbi nivak singseng nuai ah mahni maban chiat zom diing in hihtheih tan in mailam kinawt chiat hi.
Ching toh kimuh theihna ding hun khat ka hon nei hi. Huaini bel gam pumpi khawlni ahi a, nidang a ka na gen kholh bang in Park ahoh diing in ka vazawn hi. Zing ann nekhin- "Hill Park" lamzuan in ka hong kithoidok theita uhi. Tua Hill Park ahihleh mun thawvengna mun a om ahi a, tangsang lua hilou, saulaw lou sim-le-mal dawh a Tangdung kikhoh ahi hi. Huihzang kisep hiauhiau namun ban ah, I khawdak leh gal gamlapi a om khomuikai in abawp ; munzaang diidiai khawng leh tang le mual hing dipdip te a kimuhtheihna le'ng ahi. Atangbul khawng ah paak chi tuamtuam, zem tuamtuam, a khente pak lah hizen din' sang a sangzaw bang in apalh khe silsel geuh uhi. Himahleh achi atuam dungzui un, lei toh kihet a paak silhselh le a om thou hi. Lei a zam Khuangbai-Tangmaite nangawn apak toh agah toh azam dim mitmet uhi. Huailouin paak gimlim chi tuamtuam nam vengvengte le'ng a kivual diudeu geuh uhi. Lungsim bang akidang theisim hi. Asak khawng I ettouh leh, singbawk biuhbeuh bang, anah tom zawdeuh khawng leh asang le aniam zawdeuh bang a om uhi. Singkungte nuai a ngil in athelh hiuhiau geuh ua, anuai ua sawtlou sungbeek tutkhawl a uthuai thei mahmah hi. Limliap khawlmun atam a, khawl ut le'ng zong ahun in hon daih veklou ahihman in, khawl na di mundai pen leh nilim tawldamna ding ka zong uhi.
Genseeng louh- athupina uh, a paalutna uh etchim mawh tuh ahi mai ve ua ! Theigah chi tuamtuam zong a laklak ah muhtheih ua, vasa chichihte ading in ann ahinawn hi. Vasa ham tiaitiai zakding atam a, gal a Tuklou ham ziaiziai te a kiza thei ua, a gamla zaw deuh a luiphai nawl a gammang lak a Zo-ui hamte a kiza chiai chiai uhi. Gam thupina tuh genseng vual ding ahikei.
Huchin sawlbawk ka khiak ua, Ching toh tawlkhat tawldam khawm diing in katu uhi. Kiphaltak mai in a Pheineem ahon khamsak hi. Lungkim lua kisa in ka gennop teng bang huihmut mangh abang hial hi. Ka dai dide a, amel kilawmtak tuh, Singlim nuam; tang Nisa'n hon haiphak louhna mun ah, asakmel etlawm nou ngiingei ka en a, ka zut hiau hiau hi. Zomi lia nu'te lak ah akisak thehpih huai ngeimai aw !!!
Umang, chin a hon sam a, hichin ahon sunzom kekeuh hi. "kei nang ading in, ka kip gige ding a, nang le tua bang in aw". "Awle.." chi'n ka dawng hi. ka sutzop dek leh,- "Umang, haksatna huihpi hong nun' hun a om ding a, tuahun in le'ng itna ziakin pang teitei ni aw" chin a hon pautuh hi. "hitham di..vuahsia-huihsia lakah i pilvang di aw, min i ki itna-ngaihna gui' hon thei ding ua, gen utpen a, hon neih hun un zong, ka chitzoh louhna, mi ka batzawh louhnate' mang in ahon eu' ding ua, ginomtak in i pang diing aw" chin ka genzom hi. Ka sunzawm nawn a; "Ching ka kingaihtuah zel a, nang a ding a chingzou lou kisakna lian a, ka sinnem a hon kal' sek hi. Chihbel, imlouh in, nou mihausa mahmah na hi uh chih ka haih kei a, na-nu-le pa'n le'ng taak honsa ding un ka lam-en kei......" ahon pautuh a, "...thilteng mawk ngaihtuahin mawk paupau dah in, itna in lau anei kei a, zawnna- hauhna ah le'ng mitdel bang ahi...Umang ngaidih itna tuh khaugui bang a hon kankhawm, hile zong akimu thei lou ahi..a kimuh theihna di bel Tuibang kigawmna-kitenna ahi"... ka nui ua, amit ka en a aman leng tua bang in tang takin hon en kilkel hi. Ka gen zawm a, "itna in dai kan' lah a nei kei, itna taktak akhen thei a om kei..." " Ahi, nang bang kon neihkhak- na itna tang taklou himahleng, ka lung akim petmah a, ka kinepna na buchingsak ziakin ka kipak . I neuchik lai apan natheih sa bang in....." ka na pautuh a "Hile....kei hon en mahdih, innten khosakna ah mi vaakvai ka hi ua...nang a ding a natna lel ka hihkhak ding ka lau hi. Banah, a naa hon petu lel, mittui hon guantu ka hihkhak ding, ka lau ahi, "ka awksim hi, hon pautuh a, "Umang bangchi e, thilteng khatvei thu a mawk ngaihtuah diing ahihet kei" chin kamnem takin ahon hehnem hi. Anehnou mahmah a, amittui ahong dai'sim hi. Sang simtakin,- "hon muang zounawn lou maw--Umang! Na hon itt sungteng nang aa ka hi den ding, hiai ah i om a, na kiang ah kipahna bukim a om chih le'ng ka haih hetkei...hiaimun ah giah diing nachih leh le ka ut, i giak ding a, nang a ka hi tawntung ta mai kei dia hia ! hihbuaitu omlouna anglum nuam ka sa chih hehpih takin thei in aw, Umang" chin a ang ah ahon kawi belh tenten hi. Ken le awl in akhut ka la a, akhutzungte khelah takin katawp hi. Himahleh adawnna ding ahaksa ngeimai, van en leng lah a sang a, ka gal aphaizang kiphalh lah khatveithu a muhsuak vual ahi kei- atam dimdem lel hi. Itna zaw chiautuipi bang a thuk, hangsan, leh tehna bei ana hi petmah ve !!!
Ammtak a ka kihou ua, ka kikup khawm nung un, Ni ana kaiman a, vailam Tang-awm leh Thete aham vingveng ua, paikhiak di ahaksa ngeimai. Tungsuuni'n lah hon ngaklou ahih chiang in Inn lamzot hun ahi ta. Uthuai lai lua himahleh, utteng gengen athil hithei vek hilou ahihmanin, awl awl in ka kizawt suk uhi. Ching tuh nunglam ngaihna ( nostalgia ichih) in zoulua ahi ngei ding e, a kingaihtuah vungvung hial hi. Bang teng hileh ka khut ka lensak a, kiptakin ahon sim a, ken le'ng tuabang in ka simgak phitphet hi. Huchin sawtlou nung in inn ka tungta uhi. Nitum kuan eng phiphia - phulun khawng aleng cilcial ua, naupangte kimawl un nuamsa in alang lang ah akikou zelzul uhi.
Hun-le-kum, ni-le-khate ahong kivei zela, Ki it-kingai leng le kimuh gige pen thil hithei ahi kei hi. Himahleh a chang in bel laithon tungtawn in ka kithuzak zezeuh lel ua, Pathian pina zal in ka hoihtou zel uh chih diing ahi.
Hun nuamtak Ching toh zat khawmtheih ding ka hon neinawn zenzen hi. Hiai tuh lametna peel a kipan ahia, Sian lemgeel mah ahi ding. Pathian ni khawng in kipawttuah ka thangsak ua. Lawm khenkhat toh ka vaho hzel uhi. Keisang mahin amah hong hoh munzaw tham hi. Akhen chiangin alawmte ahon tonpih sek a, huchi'n, nektheih chi tuamtuam ka nekhawm ua, ka nuikhawm zaizai sek uh ahipen mai. Khat veivei lah amah kia in a hong hoh zel a, nekding-limchi taktak, kitun kiihkeih khawng ahon puak hi. Khat veivei bang keilam ah kisuanlah huai ka sa hi. Nihvei thumvei kia le'ng ahikei ding a, hun apailiam dunzui in ahia, ka genkim zoukei. Kei mimawl in ka suutzawh louh itna thu asaau telmai!!!. Itna zaw kilawm hina maizen e chih louh dang agen dan siam ahaksa.
GIBANG KHENNA HUIHKHI:
Himahleh, koilam huih hongnung hita hiam, koia hong kipan hiam chih theibut louh daaltu ahong omta, hiai bel chikmah a ka kal ua tung thei dia ka lamet leh lungsim a om ngeilou ahi hi.
Nikhat Ching in, gen ding poimawh nei ahihdan hon hilh a; vandum kiikiai nuai ah, huihkhi kisem hiauhiau lai-ah, kal' ka suan khawm titit uhi, Lei(bridge) ling thei diaidiai bang le kileen zen in ka kan ua, huchi'n mailam ka nawt zel uhi.
Ching liang a ka khut kangak dekleh "Umang hiaipen hithei nawnlou; thil i genkhawp photngai ahi" ahon chita. "aw, hi e, ka gennop tam mah e Ching" chin nuamsa khollou in ka dawng hi.
Munsang lawlou huihin hon mut theih hiauhiau na-ah katu ua, ka gallam ka-et chiang in Gua azam ziiziai ua, singkungte' khomui in abawm thithiai khawng kamu hi. Anai zawdeuh abel khuk tantan di khawng: et a mittai huaitak pak, a pakkhawm zingzeng uhi.
Ahon en a "Umang, Hehpihtakin hon theisiam in aw, kei nang a ding a hithei nawn lou ka hi", achi a, a sunzom non kei hi. Gen di abei thut a, lungtang tei a dawt abang hial hi. Thuak dan siam ahak ngei mai. sawtlou ka daih nung un hichi'n asunzom nawn a "zanzek in Laithon khat ka mu a; huai ana dawng ka hi, hehpih tak a na hon theihsiam ka lam-en", hon chi ta mai hi !!!
"Ching endih huai a pakte, huihin amuut chiang un a awn khawm diamdiam ua, tuabang a ei thukhat a luangkhawm nawnlou ding-- thil hithei na sa a hiam...?
Bang teng hileh athu gen apan lam-et a om nawnkei chih ka theichian hi, Gen a pha ding ahi kei a, Itna in a zoplouh zaw. Khaubang tat a kihita mai a, giibang khenna lummei khimzing in hon tuam ahita.
"Sian aw tanbang na hawmsiam-Hizong kei tan na lua sa'ng" - chih ka laa a tangta mai hi.
Laithon:
Ching
Kumkhen huivate leh Luiva zuangte hong ham ding ua; ka lungsung ah bang hong om diam chih ka ngaihsun ngam kei. Tung solkha vanlazawl a eng singseng namuh chiang,khatvei bek ka saKmin theibang lou ve maw. I nunlui liamsate kei din lungzuan sialna tangta maw. Nunlui khiaklah leh luankhi toh sambang zal ding, lung in geelngam lang. Gam hing diidiai huihkhin a sepna peuh a, i lenlai nite, zalmang himai leh, lungzuan sialna omlou ding. Singchih paalna gam a vachih paalte' hong ham chiang in, na sakmin ka bilkha'n za ding a, senvual lai ah, tanbang kim nawn lou diing. Bang hang itna guikhau bang zamsawt theilou..? Nge duhgawl te'n, khimkhua ziingsak hiam ?
Himahleh Ching aw, ka tan vuallouh itna tui in na hon luan ziakin ka kipaak lua hi. Na lam-et guikhaubang ching zoulou ka hi diinga; na lungdeih ang ah khamuang in hong zaalta inla, kei vang in lunglel samken. Zata'n simthu hong lelzong khuambang kip in, detdouta in. Sian huai in Mualchin-Gamsang ah ikituah ni'n sawlbang hon pai ken aw. Tungchiang Thangvan dong a i khawl khawm theilou zong. Heina peuha Sianmang sumbang be ni maw.
Gen gen leng zong zopkik simthu na hon lelsam kei ding a, ka huns ak di ng.
Heina peuh ah- Om nuam
Achingzou lou:
Mang.
Hichi'n ka khak vengveng hi
(The winner takes it all-ABBA)
ooooooooooooooooooooooooooo
Admin Note: Hiai " Gibang Khenna " kichi Siamsinna leh Vakiangbu 1st Anniversary 2013 , Laigelh / Thugelh Kidemna a Fiction Category a thumna ahi. *Thugelh siam pungtou zel i hihna ah kipahhuai i sa mahmah.
©Siamsinna leh Vakiangbu
The Author's note: Hiai anuai a thugelh teisawn hiam laksawn hiam chinnlouh diing ahi. SIAMSINNA LEH VAKIANGBU in asai kidemna a diinga gelh ahi a, asim ut peuhmah sim diing le ahi hi. FICTION ahi, himahleh "Fiction is the truth inside the lie" mangkangte'n chi uh. himahleh a sung a THU le MIN omte phuahtawm vek ahi hi.
Khua-ang zilzel nuai ah singtehte huihin a muut ling deldel a, phalbi zing nisuak ding kuan, Kawlmong khawng i et leh nizung in a salh vak silhselh hi. A nuai uh tuimei ngou setsot te'n a tuamdim ua, sun ni hong sat chiang in zohuih khisiang nung hiauhiau te'n a mut theng zel uhi. Mihingte a ding in kho-ul tui a muttheng a tawldamna a hon pia hi.
Huchi'n ah kum-le-khate tuiluang bang mai in a pailiam vengveng ua, khatvei vei nopna ah khatvei vei dahna ah, hiai tuh mihing nunzia ahi hi. Akalin gilkial-dangtak kisakna leh giautauna ahi a, bah-le-ngui in ki omzel hi. Kipahna diing tamlua- himahleh kipah dan siamlou, a na kihizaw hi. Phetlouin, I hinkhua a thiltungte bang; tunglou himaileh chi teitei ut mihingte ihi ua, banah,lungkimna sang in dahna tam kitheizaw sek hi. Himahleh, Pathian in HINNA bang hi a; bang chibang a zatdiing hiam chih hon sinsak nuam hizaw diing hi. Huiaziakin mihingte adiing in ki-it-kingaihna athupi pen ahi hi.
Hunteng a kithuah thei gige hikeimah le ung; hun hong pailiam dungzui in, awl in kingaihnatna ka nei ua, ka kimuh tung uh sang in tuchiang in ka kineel zawta uhi. Ka kituahna khat peuhpeuh uah ka kihoupih thei liamliamta uhi. Himahleh huchihial a kimu a kihouna di hun nei kuamah ka om kei uhi. A nuam mahmah ahihleh - kua hiam khatin vanthak ka neihchiang un ahi. Ka ki phattuah se uhi.
Ahon phatsiam a, apenpen ahon hisaksek hi. Nek diing-dawn ding limlua, khumlua, thupilua leh tamlua hikeimah leh ; kei a diing in amah toh nekkhop, dawpkhop tuh thilnuam mahmah khat ahi. Inn a ann nekhawm le'ng ka hi kei ua, banah Hotel khawng a ne-le-dawn a vatukhawm ka hikei lai uhi. Lampaam khawng a nektheih khawng mai nekhawm ka hi uhi. A khenchiang in Zogam gah Suaklu peuh ahi hi. Van' ah thupi luatna di omkei mahleh, ahon polhsiamna ziakin thupitak ka suah zel uhi.
Huaileng Sunday skul tawp khawng ahi keleu a, alemlouh hun bang a om zelsam hi. Sunday skul kailai-naupang mahmah lai, aki hi a dahna sang in nopna atamzaw hi. Huaibel, maban diing bangmah a kingaihtuah phak nailouh lai ana hilim a, sapkik theih hileh tuh abanban in ka sam ding a, hiai khovel gentheihnate ka phok keiding hi.Khiatlah vungvung atam a, lah; Sapkik theih bangmah a om nawnta kei hi.
Nikhat ka Pi'n Puanak thak leh khekol/tawka thak ahon puak hi. Akiang a ding ding in a hon sam a: hon silhsak hi. Kilawm lua bang a kingaihsutna hong ompah in, lungdamna kipahna - asang telmai. Huaibanin, amau le'ng ahon phatlai ua, kilawm tak khat tuh ahon suah uhi. Huaiteng kia abei lou lai, kong a vatai dok...kei naupang mawl' lungkimna tuh asang kei ngeimai e aw!!!. "Chiingtu hoih tuh naupang mawltual ahi a, kipahna bukimsaktu ahi, Nisapi nuai a LIIMLIAP khawlna nuam ahi mai ve ". Pathianni nawn hongtun a, Sunday skul a silh dikal bang tuh ka ngaklah ngeimai. Zanchiang bang in le'ng ka van omna mun a ka lungsim om ahih chiang in; mial nuai hile zong ka vakhoih a, huchin ka ihmu nawn zel hi.
Pathianni a hong tung a, ka lawmte'n ahon muh ding ka ut tenten hi. Kithalawpna liantak tuh ahon pia hi. Numei hoih ka sak, banah ka lawm, ka kipolhpih zel' hon muh a, hon muak di kal ka taanbawl den hi. Huchi'n ka hong kimuta uhi. Nidang-hundang bang in hon naih hetkei. Hon paikhiak sansan hi'n ka thei hi. Ka lungsim anuam het kei a, nidang bang a ahon houpih louhziakin; nguihuai ka sa hial a; ka kik ut tha bang asuak hial hi; lah class atel khaklouh ding hi ka sathei kei a, phetlouin, telkei leng, a ziing Thohtanni a' heutute apan gawtna tuak diing ka hih laiziakin ka vatel hi. Kailouh man a gawtna tuahsang in tuh anuam zaw tham hi. Dak hong ging a, lawi-le-paaite'n, Lengtong Pauno in asak " Sunday skul ah nong zui diam ?"chi'n la ana sa ziahziahta uhi. Huchi'n kei le'ng hi giauguau kawm in kalut teita. Ngeina bang in sinlai laak kipat di chiangin, naupangte khatin patna Thumna nei, heutu in Sinlai la. Tawpna Thumna - naupangte khut mah ah a om hi. Atangpi'n hichi bang a hun zawh ahisek hi."Hiai bang a heutu kaihuai siam leh maban ding mute piina a kisiik huai kei".
Tawpta, Lawmte, omna lamzuan in ka paitou a, Akiang nai uh ka tun in ka lawmnu'n a hon naihphei a, ahon sam hi. "Umang" chi kawm in Laithem khat ahon pia a, -hon en gii ngamlou in ataai khe vengveng nawn hi.
Ka simpah ngamkei zezen a, Inn asim din ka kuah thinthen hi.Inn ka tun in, ka lupna lamah ka paisuak vengveng a, dai zikzek in tuh ka hon phelta; khatvei lek a kikhep a, hichi'n a kigelh hi.
"Umang, na vanthak toh na kilawm lua,
na nalh lua, kon ngai".
Inn kim a Theikung khawng a The chi tuamtuam hamte nuai ah ka kingaihtuah dide a, Kipahna genkhiak ahaksa, teh diing hileh tehna chiang in daih diing in ka gingta kei. Alangkhat ah bel ahon houpih utlouh ziak hon gelh diing in ka lam-en a; lah alehlam daih ahi ve. Ka lungngai vengveng a, A dawnna di gelh utna in ahon phu tettet hi, dip kisai bang a ngeina sang a kinawh zaw bang hialin ka thei hi. Pen' leh Laidal ka la a, hiaibang in athukna/dawnna di ka hon gelh hi. Lungtang tawng apan hongsuak bang bang in-
"Ching, na khutgelh kilawm takmai ah na mel etlawm ka mu hi.
Ken leng nang ka hon ngai"
chi'n ka gelha love sign in ka kual pilpel hi.
Hiai sang a thupi zaw a gelh didan theituan lou ka hihman in, ka theihtawpa ka gelh tuh ahisam hi. Pathianni ahong tun nawnchiang a piak ding in ka kembit hi. Kaal sung a skul kaini hong beia, huchi'n, kikhawp daak hong ging vengveng ta. akin theilam a kisawi dok ka himai hi. Hiai ni tuh kuamah ngak ka sawmlouh bang in ka ngakkei hi.
Sinlai la zouta, mawltual lam zuanin ka pai mengmeng a, Ching ka zonbawl giaugiau hi. Lawm khenkhat toh ana om ua, himahleh ka samkhe mai. Zum pipi'n lah zumlou bang in, ka laithem ka pe theita hi. Huchin tam gen louin ka paikhiaksan hi. Nna khat zou akihihman in atawldam huai telmai. Hiai hun in ka mai muthei hileng san pempuam din ka ngaihsun hi.
Teilawl dek panpan akihihlai toh gen dia kilawm hina zenpi, tampi ka gen ngamlouh a om tham hi. Aman leng tua bang mahin gen ngamlouh nei veve hi'n ka thei bok hi. Himahleh kingaihna gui in hon kankhawm ahichiang in, koipeuh ah om leng zong ka lungsim ngaihtuahna ah a hong langzel hi. Ataangpi'n zan ihmutma khawng in lungsim mitkha ah, amel kilawmtak ahong lang diaidiai sek hi. Huchi'n, Ching hoihna thuguuk tuamtuam ka musuah zel hi. Ataimakna leh chihtakna leh pilvang siamnate banah, midangte ading khual siamnate bang ahi uhi. Huailouin Chingte tuh meelhoihtak, nuihmai siusiau, buang thiuhtheuh, thakang gingen ahi hi. Kamtei in, mihoupih asiam a, akiang a om tuh nuih ahisek mai a, lungkimtak a innlam kitung kikzel dan ahi. Kizepdan lah asiam ngei mai. Hou chikchik in kizem mahleh etlawm in mittun huai veve hi. Ahihkei-le-lah kei mit kia a hoih ahi diama !
A duangching,
asam saau,
amit hah nem leh
kizepna mawltakte'n mittaina honpia uhi.
Huchi'n ah Laisimna lampang le'ng Khawlhun' ahong tung nawn leu leuta hi. Hun a kha a sim ding bang a hong bei a, simhuih vot takte hong nung hiau hiau sek a, nitum kuan bang le'ng a ang phingphengta ua, Mi lungzuang theite adingin lungleen la awih vengveng hun le'ng ahi hi. Zingkalin lah phalbi huihvot, mallam apan ahong nung deldel ua, zingdaitui votlua kisa a, tee iam-iamte amut thengzel uhi. Luikuam khawng a tuimei ngou phiphiate'n abawm lingleng uhi.
Hichibang hun in, khuakeu law naikei mahleh Khilpi/Tawsaw tehte bang leng agawgam singsengta hi. A pallun Christmas gim-leh-thawm akiza nawnta a, zandai nuai ah- koimun hiam, Biakinn hiam ah "Zankhua dai; zankhua siang" miuzik ging a kiluan deldel bang a kiza theta hi. hon lung lengsak a, khensate ngaihna ahong thak zel. Huchi'n theihlouh kalin ahong bei nawnzel hi. Huai mah bang in phalbi Nineem, huihvot nuai ah Kumthak le'ng mang khit ahi nawn ta. Mahni maban chiat zom ding a kisak, buai tren tran hun ahi nawnta. Abangabang hileh hiai hun in kuamah vai vakithei pha zou nawn lou hi. Hunthak ahihtoh kipatthak hun, abah leh a nguite adiing a thalak thakna hun ahi hi. Salam-khalam a kikhutsuih ding in phalbi nivak singseng nuai ah mahni maban chiat zom diing in hihtheih tan in mailam kinawt chiat hi.
Ching toh kimuh theihna ding hun khat ka hon nei hi. Huaini bel gam pumpi khawlni ahi a, nidang a ka na gen kholh bang in Park ahoh diing in ka vazawn hi. Zing ann nekhin- "Hill Park" lamzuan in ka hong kithoidok theita uhi. Tua Hill Park ahihleh mun thawvengna mun a om ahi a, tangsang lua hilou, saulaw lou sim-le-mal dawh a Tangdung kikhoh ahi hi. Huihzang kisep hiauhiau namun ban ah, I khawdak leh gal gamlapi a om khomuikai in abawp ; munzaang diidiai khawng leh tang le mual hing dipdip te a kimuhtheihna le'ng ahi. Atangbul khawng ah paak chi tuamtuam, zem tuamtuam, a khente pak lah hizen din' sang a sangzaw bang in apalh khe silsel geuh uhi. Himahleh achi atuam dungzui un, lei toh kihet a paak silhselh le a om thou hi. Lei a zam Khuangbai-Tangmaite nangawn apak toh agah toh azam dim mitmet uhi. Huailouin paak gimlim chi tuamtuam nam vengvengte le'ng a kivual diudeu geuh uhi. Lungsim bang akidang theisim hi. Asak khawng I ettouh leh, singbawk biuhbeuh bang, anah tom zawdeuh khawng leh asang le aniam zawdeuh bang a om uhi. Singkungte nuai a ngil in athelh hiuhiau geuh ua, anuai ua sawtlou sungbeek tutkhawl a uthuai thei mahmah hi. Limliap khawlmun atam a, khawl ut le'ng zong ahun in hon daih veklou ahihman in, khawl na di mundai pen leh nilim tawldamna ding ka zong uhi.
Genseeng louh- athupina uh, a paalutna uh etchim mawh tuh ahi mai ve ua ! Theigah chi tuamtuam zong a laklak ah muhtheih ua, vasa chichihte ading in ann ahinawn hi. Vasa ham tiaitiai zakding atam a, gal a Tuklou ham ziaiziai te a kiza thei ua, a gamla zaw deuh a luiphai nawl a gammang lak a Zo-ui hamte a kiza chiai chiai uhi. Gam thupina tuh genseng vual ding ahikei.
Huchin sawlbawk ka khiak ua, Ching toh tawlkhat tawldam khawm diing in katu uhi. Kiphaltak mai in a Pheineem ahon khamsak hi. Lungkim lua kisa in ka gennop teng bang huihmut mangh abang hial hi. Ka dai dide a, amel kilawmtak tuh, Singlim nuam; tang Nisa'n hon haiphak louhna mun ah, asakmel etlawm nou ngiingei ka en a, ka zut hiau hiau hi. Zomi lia nu'te lak ah akisak thehpih huai ngeimai aw !!!
Umang, chin a hon sam a, hichin ahon sunzom kekeuh hi. "kei nang ading in, ka kip gige ding a, nang le tua bang in aw". "Awle.." chi'n ka dawng hi. ka sutzop dek leh,- "Umang, haksatna huihpi hong nun' hun a om ding a, tuahun in le'ng itna ziakin pang teitei ni aw" chin a hon pautuh hi. "hitham di..vuahsia-huihsia lakah i pilvang di aw, min i ki itna-ngaihna gui' hon thei ding ua, gen utpen a, hon neih hun un zong, ka chitzoh louhna, mi ka batzawh louhnate' mang in ahon eu' ding ua, ginomtak in i pang diing aw" chin ka genzom hi. Ka sunzawm nawn a; "Ching ka kingaihtuah zel a, nang a ding a chingzou lou kisakna lian a, ka sinnem a hon kal' sek hi. Chihbel, imlouh in, nou mihausa mahmah na hi uh chih ka haih kei a, na-nu-le pa'n le'ng taak honsa ding un ka lam-en kei......" ahon pautuh a, "...thilteng mawk ngaihtuahin mawk paupau dah in, itna in lau anei kei a, zawnna- hauhna ah le'ng mitdel bang ahi...Umang ngaidih itna tuh khaugui bang a hon kankhawm, hile zong akimu thei lou ahi..a kimuh theihna di bel Tuibang kigawmna-kitenna ahi"... ka nui ua, amit ka en a aman leng tua bang in tang takin hon en kilkel hi. Ka gen zawm a, "itna in dai kan' lah a nei kei, itna taktak akhen thei a om kei..." " Ahi, nang bang kon neihkhak- na itna tang taklou himahleng, ka lung akim petmah a, ka kinepna na buchingsak ziakin ka kipak . I neuchik lai apan natheih sa bang in....." ka na pautuh a "Hile....kei hon en mahdih, innten khosakna ah mi vaakvai ka hi ua...nang a ding a natna lel ka hihkhak ding ka lau hi. Banah, a naa hon petu lel, mittui hon guantu ka hihkhak ding, ka lau ahi, "ka awksim hi, hon pautuh a, "Umang bangchi e, thilteng khatvei thu a mawk ngaihtuah diing ahihet kei" chin kamnem takin ahon hehnem hi. Anehnou mahmah a, amittui ahong dai'sim hi. Sang simtakin,- "hon muang zounawn lou maw--Umang! Na hon itt sungteng nang aa ka hi den ding, hiai ah i om a, na kiang ah kipahna bukim a om chih le'ng ka haih hetkei...hiaimun ah giah diing nachih leh le ka ut, i giak ding a, nang a ka hi tawntung ta mai kei dia hia ! hihbuaitu omlouna anglum nuam ka sa chih hehpih takin thei in aw, Umang" chin a ang ah ahon kawi belh tenten hi. Ken le awl in akhut ka la a, akhutzungte khelah takin katawp hi. Himahleh adawnna ding ahaksa ngeimai, van en leng lah a sang a, ka gal aphaizang kiphalh lah khatveithu a muhsuak vual ahi kei- atam dimdem lel hi. Itna zaw chiautuipi bang a thuk, hangsan, leh tehna bei ana hi petmah ve !!!
Ammtak a ka kihou ua, ka kikup khawm nung un, Ni ana kaiman a, vailam Tang-awm leh Thete aham vingveng ua, paikhiak di ahaksa ngeimai. Tungsuuni'n lah hon ngaklou ahih chiang in Inn lamzot hun ahi ta. Uthuai lai lua himahleh, utteng gengen athil hithei vek hilou ahihmanin, awl awl in ka kizawt suk uhi. Ching tuh nunglam ngaihna ( nostalgia ichih) in zoulua ahi ngei ding e, a kingaihtuah vungvung hial hi. Bang teng hileh ka khut ka lensak a, kiptakin ahon sim a, ken le'ng tuabang in ka simgak phitphet hi. Huchin sawtlou nung in inn ka tungta uhi. Nitum kuan eng phiphia - phulun khawng aleng cilcial ua, naupangte kimawl un nuamsa in alang lang ah akikou zelzul uhi.
Hun-le-kum, ni-le-khate ahong kivei zela, Ki it-kingai leng le kimuh gige pen thil hithei ahi kei hi. Himahleh a chang in bel laithon tungtawn in ka kithuzak zezeuh lel ua, Pathian pina zal in ka hoihtou zel uh chih diing ahi.
Hun nuamtak Ching toh zat khawmtheih ding ka hon neinawn zenzen hi. Hiai tuh lametna peel a kipan ahia, Sian lemgeel mah ahi ding. Pathian ni khawng in kipawttuah ka thangsak ua. Lawm khenkhat toh ka vaho hzel uhi. Keisang mahin amah hong hoh munzaw tham hi. Akhen chiangin alawmte ahon tonpih sek a, huchi'n, nektheih chi tuamtuam ka nekhawm ua, ka nuikhawm zaizai sek uh ahipen mai. Khat veivei lah amah kia in a hong hoh zel a, nekding-limchi taktak, kitun kiihkeih khawng ahon puak hi. Khat veivei bang keilam ah kisuanlah huai ka sa hi. Nihvei thumvei kia le'ng ahikei ding a, hun apailiam dunzui in ahia, ka genkim zoukei. Kei mimawl in ka suutzawh louh itna thu asaau telmai!!!. Itna zaw kilawm hina maizen e chih louh dang agen dan siam ahaksa.
GIBANG KHENNA HUIHKHI:
Himahleh, koilam huih hongnung hita hiam, koia hong kipan hiam chih theibut louh daaltu ahong omta, hiai bel chikmah a ka kal ua tung thei dia ka lamet leh lungsim a om ngeilou ahi hi.
Nikhat Ching in, gen ding poimawh nei ahihdan hon hilh a; vandum kiikiai nuai ah, huihkhi kisem hiauhiau lai-ah, kal' ka suan khawm titit uhi, Lei(bridge) ling thei diaidiai bang le kileen zen in ka kan ua, huchi'n mailam ka nawt zel uhi.
Ching liang a ka khut kangak dekleh "Umang hiaipen hithei nawnlou; thil i genkhawp photngai ahi" ahon chita. "aw, hi e, ka gennop tam mah e Ching" chin nuamsa khollou in ka dawng hi.
Munsang lawlou huihin hon mut theih hiauhiau na-ah katu ua, ka gallam ka-et chiang in Gua azam ziiziai ua, singkungte' khomui in abawm thithiai khawng kamu hi. Anai zawdeuh abel khuk tantan di khawng: et a mittai huaitak pak, a pakkhawm zingzeng uhi.
Ahon en a "Umang, Hehpihtakin hon theisiam in aw, kei nang a ding a hithei nawn lou ka hi", achi a, a sunzom non kei hi. Gen di abei thut a, lungtang tei a dawt abang hial hi. Thuak dan siam ahak ngei mai. sawtlou ka daih nung un hichi'n asunzom nawn a "zanzek in Laithon khat ka mu a; huai ana dawng ka hi, hehpih tak a na hon theihsiam ka lam-en", hon chi ta mai hi !!!
"Ching endih huai a pakte, huihin amuut chiang un a awn khawm diamdiam ua, tuabang a ei thukhat a luangkhawm nawnlou ding-- thil hithei na sa a hiam...?
Bang teng hileh athu gen apan lam-et a om nawnkei chih ka theichian hi, Gen a pha ding ahi kei a, Itna in a zoplouh zaw. Khaubang tat a kihita mai a, giibang khenna lummei khimzing in hon tuam ahita.
"Sian aw tanbang na hawmsiam-Hizong kei tan na lua sa'ng" - chih ka laa a tangta mai hi.
Laithon:
Ching
Kumkhen huivate leh Luiva zuangte hong ham ding ua; ka lungsung ah bang hong om diam chih ka ngaihsun ngam kei. Tung solkha vanlazawl a eng singseng namuh chiang,khatvei bek ka saKmin theibang lou ve maw. I nunlui liamsate kei din lungzuan sialna tangta maw. Nunlui khiaklah leh luankhi toh sambang zal ding, lung in geelngam lang. Gam hing diidiai huihkhin a sepna peuh a, i lenlai nite, zalmang himai leh, lungzuan sialna omlou ding. Singchih paalna gam a vachih paalte' hong ham chiang in, na sakmin ka bilkha'n za ding a, senvual lai ah, tanbang kim nawn lou diing. Bang hang itna guikhau bang zamsawt theilou..? Nge duhgawl te'n, khimkhua ziingsak hiam ?
Himahleh Ching aw, ka tan vuallouh itna tui in na hon luan ziakin ka kipaak lua hi. Na lam-et guikhaubang ching zoulou ka hi diinga; na lungdeih ang ah khamuang in hong zaalta inla, kei vang in lunglel samken. Zata'n simthu hong lelzong khuambang kip in, detdouta in. Sian huai in Mualchin-Gamsang ah ikituah ni'n sawlbang hon pai ken aw. Tungchiang Thangvan dong a i khawl khawm theilou zong. Heina peuha Sianmang sumbang be ni maw.
Gen gen leng zong zopkik simthu na hon lelsam kei ding a, ka huns ak di ng.
Heina peuh ah- Om nuam
Achingzou lou:
Mang.
Hichi'n ka khak vengveng hi
(The winner takes it all-ABBA)
ooooooooooooooooooooooooooo
Admin Note: Hiai " Gibang Khenna " kichi Siamsinna leh Vakiangbu 1st Anniversary 2013 , Laigelh / Thugelh Kidemna a Fiction Category a thumna ahi. *Thugelh siam pungtou zel i hihna ah kipahhuai i sa mahmah.
©Siamsinna leh Vakiangbu
Comments
Post a Comment