ZAWNG THUAKTANG NGAU IN THUAK

By~ Khen Thang Hangxing

(Atunga thulu zang in tangthu saulou gelh vai).

Khualpu kichi tangval hausa, sumdawngmi khat tapa ahi a, amah ngeileng apa sulnung jui in sumdawng na hon pantou charchar hi. Hausa ta, thamlou tapa neihsun, panpihtu ding ji neilehleng akhosa uh haksa lou ding, chih lung gelna toh a itpen Chingboi toh kikhut suih in sumdawn na hon pibawl uhi. Nidang lai asumdawng ichih tulai dan hilou in sakol kangtalai jang in akha asim inntung lou a va sumdawng jel uh dan ahi."ching, jingciah hiai a juak ding suangmantam te toh van poimoh tuamtuam pua in kava kithoi khe himhim dia,inu leh pa ana enkol inla, kei jaw khanawn tubang hun in kong tung nawn sawm di aw, 'chi in aji chingboi kiang ah vaikhak hi.

'Hithamtham e Ukhual, lung himawh nang bangmah omlou ahi, na kuanma in siampupa kiang ah vaki entel (khutlam ensak) masa ve mw?", Khualpu inleng aji thugen jui in, Siampu kiang va pha kawm uhi. Mineijou deuh chu Siampu pa Ngulthawng in ana vaidawn pah saisai hi. "Khual, bang ci sim na hia? hong lut inla zu hon luup ning ei" chi in a innsung uah tonlut pih hi. 'Pa Thawng, zu jaw hidah mai heh aw, heh na inle ngai dah inla, ki entelsak dia hong pai hiveng aw, jinkhe dek nawn ing a". "aw..aw.. huci na chih inchu, hong pai mah dihle". Khualpu in a khut a ensak a, bangmah lauhthawng huailou a chi in vualzawl laidep hi. Khamuangtak in sakol kangtalai ah vanpoimoh te guang in hong kipan khe ta hi.

Chingboi in amualkhup matan uh khut vai leplep in en liam vungvung hi. "Lian (a sikha pa), hatdeuh in aw, munnuam khua khawmial ma a i tun teitei ngai ahi, huai ah George white (englishte suangmantam lei sawnte) in ana ngak di incin, pekhe pah keileng nitak a vengbit joh thil haksa hong hi di ahi''. Lianpu inleng, "awle pu" ci in sakol anohna toh sat jatjat hi. Gam nuam tak tawn a pai ahi ua, agam jaw bit in amuanhuai a, suamhat kici om mahleh sunlaì in thawm anei kei himhim uhi. Nitak ciang in alauh huai ua hiven! Munnuam tun na di mile 8 khawng ahita a, Khualpu te leng tui dawn in sun ann tamlou ne in atawldam jek ua, sakol te tuipia in aki ngakhe phot uhi.

Hucin hong kithawi khe nawn ua, dakkal 4 khawng atai nung un atung khawngkhawng ta uhi. Kihouna masa bang in george in khonawl ah ana ngak hi. Mi thacingtak, leh mel et mai a nunnem mahmah ahi a, Khualpu te amuh in chibai ding in kipahmel tak in ava delhphei hi. Alawmte gintak banglou tak in outlaw atam mahmah ua, mi 5 khawng in amah avengjel uhi. Alak ua khat Johny a cih pa uh bangchu poisaknei lou leh ut dandan a gamtang mi ahi hi. 'Hi! lawm Khual, nong dam maw?..bang non puak a'.cih toh cibai buk in ana muak hi. Khualpu'n', dam sam, nang a dimah hilou di hia, suangmantam nang adi liauliau, 'ci in ciam nuih hi. Huci'n aki piaktuah joh un avan puak dang te uh toh giah in (guest house) ajuan pah vengveng uhi. Hici bang jel in bussines lohchingtak in a bawltou jel hi.

Huchihlai in Nikhat ngeileng zingbeltak a thou in zinkhe din hong kisa nawn hi. Khualpu nu ngeileng hon thoukhia a, 'Khual, tuni zaw kisa dah aw Khual ka mang hoih keilua, bang hiam tuak di hiniteh.. ka mang in kon muh lailai in pasal 2 in hon paw mang mawk ua, ka lungnuam kei lua.'Chi in a awilouh thu hon gen saisai hi. Khualpu ngeileng a chihlouh thusalou banah sumdawnna paihoih lailai a khawl guih mawk pen hiisa theilou in, 'nu, na phalbi mangsia ahi, damtakin hong tung pah ding ka hi, 'Chi'n akisa thouthou hi. Lianpu tonpih sawmlou a amahkia hohsawm ahihdan gen in asungte khouhna ngaihsak lou in hon kisa a, siampu (ngulthawng) kiang ah amahkia va pai vengveng hi. Aziakbel azi leh anu te toh va pai leh ahohna di adal khak ding uh lau ahi leltak hi. Siampu pa ana omchet keì a angak zek hi. Sawtlou a ngakzoh in hong pai a, 'ki ensak pah mai aw Khual, ka buaisimtoh'. chi'n akhut etsak pah hi..'hmmmmm... Khual, na va hohlouh hoih kasa hilezong na pilvang ngapleh nava hoh ding zaw nangthu ahi'chi in anialngam tuankei.. Huchi'n hong kipan khe nawn a amahkìa ahihman in awlchikchik a pai in anu mang a ngaihtuah neuhneuh kawm hi. Huchi'n munnuam a mialtun a huai a akingakna sek hotel zuan ah ava kinga ta hi. Nitakin  Khualpu leng a tunna hotel ah zu dawn ding in alupna room akipat hon pawt khia hi.

Zudawn in kuamah subuai louh sawm in aningkhat ah amahkia in table khat kizat hi. Hucia tu panpan chih ding in amah bangbang sumdawng hausa pasal khat hong lut a, Khualpu kia amuh in akithuah pih din ava naihpah hi. 'Hi! lawmpa, kon tutpih thei diam, ka min Charles ahi'. Chi'n kamsiamtak in hong houpih hi. Khualpu'n leng poi asak louhdan leh kipah huai asakdan gen in, asumdawn na ua athil tuahte hong kikum ua, houlim hong lim panpan ta uhi. Khualpu'n lawm thuah lam ah pilvang mahmah hinapi'n Charles pentak zaw amel leh amizia et in mi hoihtak leh mi muanhuai, asumdawn na a kithuah na ding tan uh genkhawm pih thei mawk hi. Nitak asawt taak toh kikhen phot ni, hun nawn ah kimu nawn ni maw? a kichi ua mangpha kikhak in aroom chiat uah alut ta uhi. Charles giahna room pen Khualpu room kiangchin ahihziak in athawm uh leh husa omzek akizatuah thei pahpah uhi. Huchi'n Khualpu leng alup in a emu pah a, emudlim lua ahingei dia khanglou hetlou in a emu chercher hi.

Zinglam dak 6 in akhanglou a, apaina ding a gamlat ziak in hotel ngak tupa kiang ah sum va pia in khualzin ding in a sakol kangtalai hon hawl nawn pah hi. Gam thoveng lua akigen ahihlouh ziak in thawmging ngaihlua neih udlou in awl khakha in hon kalsuan zel ua, mualtung khat atun in tawldam ding in singliim nuai ah hong kinga hi. Khualpu leng agal a mual leh guamte en a a dakdak leh anunglam ah sakol 3 hattak a hong tai amu hi. Bangthu om ade aw chi in atutna akipat ana ding a ana en nilouh hi. Amun hong tun un kuadang ahikei ua, khopiveng sepaihte ana hi uhi. "Khualpu kichi zan nitak a Munnuam hotel a room no.5 a giakpa mah hilou na hiam?"Chi in khat in dong hi. 'aw ka hi, bangthu oi? 'lawmte.."zan nitak in na room kiang a sumdawng hausa khat giak ompen sisa in akimu a, na vante ka etchian uh ngaiding hi, '..Khualpu'n zong, 'en ve ua, poilou' Chi in avante a ban etsak hi. Khualpu bag sung a temta, tualthat tupa koih om ahihlam Khualpu in theipha dek lou hi.

Hucia a bag sung a et uhleh temta sisan bang niuniau khat hon pholhsuah uhi. Kualpu in lamdang salua in a om heihoi zawzen hi. 'bangjiak a huaimipa na thah a?. asum laksak ud jiak hinteh maw?' chihtoh mat athuah ngal uhi. Khualpu'n, kei thah hilou ahi, ka kichiam ngam zawjen di, ka that hetkei chih Pathian inleng athei, chi in adikna hon gen khe tei hi. Sepaih lak a khat in, aw, nang thah hiloupi bangziak a na bag a temta omthei eita?.. bangziak a zingkal beltak a na guk pai e?.. Chih toh chiangpum a khet athuahsuk hi. Khualpu leng khophawk lou in atuuk pah hi. Huchi'n Khualpu chu amanta ua, asum muh tengteng leh agou manpha puaktengteng laksak in, misual tawpkhawk te khumna mun ah akoihta uhi. Khualpu a hong khophawk in suangkulh mialtak leh namse tak sung ah mitamlou toh khumkhawm in ana om maimah hi. Akingaihtuah tuah a, atung a thiltung atheisiam hetkei hi. Pathian kiang ah athuum zel a, a khasiat tha suak in mittui te bang hong luang thei hial hi. Suangkul annte lah anamsiat mahmah ziak in aduh kei a, agawng deuhdeuh ta hi. Atawptawp in zawsihlouhna din ane zel a, huchi'n nekmohna hong om nawnkei a a omna mun ngeileng akingeinaseh pianta hi. Huai khua a vaihawmtupa kiang ah asiamtan na thu laikhak khawng in a khak zel a himahleh lametna tantung lou ahihman in atawpsan vengveng hi.

Akum te hong tam hiaihiai a, Khualpu bel a samsau toh upa suak mahmah hi. Suangkul ah alawmte toh omkhawm nuam asa deuhdeuh a, huaimun pawtsan leng asawm nawn kei hi. Suangkul vengpa'n Khualpu pen alak ua mihoih leh chitak a atheih ziak in suangkul tangtengteng heutu leh ahaksatnate uleh apoimohte uh amah kiang a tut zel ding chih thupuan hon bawl hi. Khualpu pen alawmten, heutupa chi in samchiat uhi. Nikhat suangkul taangthak khat Khualpu te taan-in ah hon sawl lut nawn uhi. Khualpu inbel ana meltheih pah hi. George white guard te lak a mikhel mahmah aki gen Johny ana hi hi. Khual pu inleng ava houpih pah hi. Tual thah jiak a suangkul a khum a om ahihdan hong kipuang hi. Nitak teng inK hualpu makaihna in kikhopna aneizel ua, nuam asa chiat mahmah uhi. Johny bel hong lut pan banah suangkul a om haksa asak luat ziak in apawtkhiak na din baang (concrete wall) sik kilh zang in asun azan chih omlou in khuakkhuak mai hi. Nitak khat Khualpu imu theilou suangkul sung a avak leh Johny naseplai vatuak hi. Johny leng hong pawtkhia a hong houlim panpan uhi. 'Khual, ngaihdam nget di khat kon nei non ngaidam thei diam?' Chi'n Khualpu mai ah hong kuun hi. Khualpu'n leng bangthu himawk a bangziak a chih adotleh asuangkul tanna ziak Johny gamtatna ana hi leltak hi! "Khual, huainitak in na kiang a giak sumdawng hausa pa kathah zoh in, nang thah kon sawm lai hi, himahleh thawmging omziak in ka temta na bag ah guang in window ah ka tawmpawt hi.

keiziak a hiai tantan na thuak zaw ka hihkhial lua.. non ngaihdam zohkei leh hon that mai in poikasa kei" chi in Johny kap huphup hi. Khualpu alungsim apaikin mahmah hi. Ka damsung teng amahziak a hiaimun haksapi a zang ing a tua hiai bang hun ka muh chu.. chi a Johny meklup mai bang a ut hial hi. Himahleh apau kei! "Khual, thukhenpa kiang ah thudik kava gendia, nang hon khah mai ding uh ahi, "Khualpu bangmah genlou in apai khia hi. A kingaihtuah a, a ihmu thei hetkei hi. Kalkhat nung in Johny thil guk hih theihkhiat in a om a, khailup dia thutan khum in a om hi. Johny kipuanna akipat in in Khualpu pen amah mohna hilou pi ZAWNG THUAKTANG NGAU IN THUAK chih bangdan a suangkulh tang ahihlam thukhenpa'n ahon theita hi. Sepaihte sawl in Khualpu khahkhiak na di order suah mahleh Khualpu a taan-in sung a sisa a muhkhiak in om hi!

BEITAZ.

   

©Siamsinna leh Vakiangbu