SIAN HAWMLOUH ITNA
By~Nasri Jona Tawmbing TxNâ
Author's note : Simtute hon ngetna ngai pawimoh in Hiah a
kim in kon post thak mai ] comment na lam a h0n sunzawm di ka chih leh,
a sausim ziak in post dang kon bawlmai.
**********************************************
200...? Kum a ni chiah ka thei nawnkei a, Christmas zang dia
innlam ka pai khah Febuary kha tan ka omkha niloh hi, kei hi ama innlam
a omlai khong in Sport lam ka lunglut ziak in, GSA (games & sport
association) khong ah ka na kizang in makaitu khong in le ka na pang
zelsam hi.
Huchia Febuary tan bang khawl ka neih lai ziak a inlam
khiaklah ziak le hi emem lou, sepdi poimawh tuamtuam ziak leh inkuan vai
ziak a om ka hi a. Khatawp lam chia, football tournament om di chih
khong kon theih thakthak chiang in, ka na kik nailoh pen phaze ka sa a,
kimol louhna le a sawtta bok a, tutung chu vatel tei himhim di chih kha
ka ngaihdan ahi.
Nitaklam teng a ki practice ahih chiah, huai ah leng ka vatel zel sam a,
player dangte le a phur thei ua, huai in keile a hon phursak sem hi.
Hunte hong liam zel in, a ni di chu a hong tungta. Heutu lamte ka inn
uah hong pawt ua, "tangval hon in lah hoh teitei sawm uh a hih mel a,
kou a heutu lamte lah nna tuamtuam sem, nna taisan thei ka omlouh ziak
un kuaman hong uap theilou di ka hi ua, nang a heutu tan tang inla, nang
ana heu mai lechin," chi'n hon gen ua, sum a ngaidi zah leng ka khut ah
hon lan ngal uh hi.
Motor hire in, mi 20 vel kong kuan kheta ua, heutu (chita mai di aw, a
upa pen ihih chiah haha) i hih na ah naupangte bang, khamtheih leh
mihuat zawng himhim hih louh di, chi'n ka theih bang khamkham in ka
thuhilh sam hi.
Ka lawm (kid chih zawk di hia?) hoih mahmah nih toh meltheih hetlouh inn
ah a hon tungsak ua, a upa pen kha zahkai pen in ka pang a, ka lawmte
ahihleh khatpen miphok, bangmah zum nang theiloute pawl ahia, khatpen le
huaimah bang thou cent% chiahlou telawi ahia, amau ziak in keile ka
tangnel theipah a, kiman vanglak mahmah.
A zan a nungak hel ngaldi chih leh, heutupen hih ziak a utna teng a
kihoh theilou, tie sheed a tel ngai, phurlou takin ka vatel ua, khua
tampi kihohkhawm ahih ziak in leh rule mumal bangmah ana neihloh ziak in
ngaihdan hong kibang thei nawnlo; zan Dak 11 lam in kon zouthei ham ua,
"nungak helnang hinon kei," chi'n ka tunna lam manoh in ka lawmte ka
paisan hi.
A zingkhua hong vak in playground lam manawh in kong kimukhawm nainai
nawn ua, a khen zu ana kham pawl tawh, akhen nganza kham pawl tawh,
lohngaihna le theilo in mundang ah ka paikhiak san hi. Ka paikhia a,
hihdi tuanlah omlo chi'n singpi dawr khat ah, field gei ah ka vakhawl
leh, huai ah ahih chu ka lungsim tengteng hon luahtu ka muh.
Singpi noukhat leh sang pek khat dawn/nek nang in dakkal khat val ka
zang bei hi. Bangdang ziak hilou in, ka singpi dawnna a, dawr ngaktu nu
hoih vasalua, va enen kha in tuplouh tanpha va omkha, chihleh ka naute
khat in honsam a, Board lam ah hon poimawh om uh chi'n, kei le, kintak
in ka vadiang ngal hi.
Nitaklam hong hi a, match tawpma in ka paisan ua, "zingchiang ei
kimawlni di ahi" chi'n, tawldam ding in ka naute ka thukhak a, kon
kikhen non siausiau uh hi. Ka zin tunnate inn ka tung in ka lawmte nih
le varenda ah tu in laizial ana tepkhu philphil uh a, ken le sunlam a ka
nungak muh fuh ka sakdan ka gen ngal hi. A phok zaw pen in a hih leh, "
tuzan vapawt ngal ni maw !" Chi kawm a a khat cent% chiahlo ka chih pen
a melh phei geugau leh, "ka utkei, na nih un va pawt ua," chihsan a,
kou le khem chih theih tawp a ka khem nung un amah le hong ut ta hi.
Nitak an nekham pawtkhe ngal di i sak leh, ka lawm pa, a phok zawpen in,
a meltheihte inn a pawt a ut thu hon gen a, ken le sawtlou pawt di, na
paupau louh di, chin, a nung ka zui ngal hi. Mi pau ut, omna peuh
nuamsa, chih mahtak in a paupau na lam ah zan dak 8 lam bang hong
gingta, ka mitmei bawlsim chia lah theisiamlou, a tawp a tawp in a khat
pen cent% chiahlo zaw pen kia ka gen leh, "i lawmpa a nungak hel nang
manmawh lawta ahi, na paukhin dekta hia?" Honchi kheguih mawk hi. Amah a
phok zaw pen le zum kei le zum, chi'n haksa sa kawmpi in kon pawt khe
thei non uh hi.
Ka nungak hawigukte inn ka tung un, ken ma konpi di chin, kongkhak ka
kiuh leh, nupi lamdeuh aw in, honglut uau.... Chi'n hon na welcome a,
kou le pawt maimai ka hih dante uh gen in, mins 5 di vel ka kihoulim
nung un, a nungak nu uh, koi a om a, chi'n ka dong top uhi. Aman bedroom
lam ah om, chih tawh sap thuah ngal hi. Ka vei mahmah ka zi dia le ka
sit hetloh, sun a, ka muh tung a le, zahtakna khat ka naneih guk, room
apat a luppih van toh hong thoukhia bang chu, mit kephial, leh chiltui
kai duahduah kawm in ka na en uh hi. Huchia ka et lai tak un, cent%
chiahlou pen in, eeeee !!! hiai mawh na gengen, na gen na sa bok a,
hoih tak ahi maw, chi a, mitmei ven nei hetlou a, "sexy ve !" ngaih tak a
hon genkhia bang chu,,,,,,, hehtha lah suak nuih lah za, aman le polite
tak in, "na fel lua uh, kou inn khong ah nong pawt ut ua," chi'n,
sitting room, kou tutna lam ah hong tu hi. Dak 8 nung a kilutpan ahih
chia, bangbang hiam gen a, sawt tunailou i kisak kal a, dak 10 lam ging
di hita, paiphot ni, ka chih leh, cent%lou pen in," i omsung uh chu, zan
teng a pawt di himai, non ning hetloh di ai" chi zawmah lai. A buaihuai
thei ahi, lehlam tak ah chu kipah huai veve. Ahun leh mun a thil hih di
thei siamlou thei lua, chi'n, lampi ah ka lawmpa a phok pen toh ka tai
huan charchar uh hi. Aman le "tangnel tak a i pawt non theih nang ua, ka
chih hi" chiteng in hon dawng hi.
Ka cham sung teng ua, Sunlam chia a dawr ngakpih, zanlam a, a inn ua
pawt den ka hih chiang un, ka kinel un, aman le ama sang in hon maingal
zawta hi.
Khiaklah huai mah leh, heutu pen ka hih na ah, naupang te kei tellou a
apaikik di'uh hoih ka saklouh ziak in, zing thouphet ka lunglai awng
tengteng luahdim tu, a mel mulou a le om zou dai ka kiginlouhte innlam
manawh in kon dingkhe zalzal hi. A kiang ah, hoih ka sak thu leh ka
deihthu bangkim, zum leh zah le khual zoulou in ka gen a, amah lah zum,
kei lah ka zakta, gendi dang tampi om napi in, ka aw a suak khe di om
nonlou ahih man in, ki entuah in ka nui mai uh hi. A mah hong paukhe
khong in, "chiamnuihna hat lua, kei hon theichiang lechin, na bangdi mah
a hon deihlou di na hi" hon chi zawmah lai bang chu, hope om eive,
chi'n, ka lungsim a nui vengveng mai hi. Pailou theilou ka hih ziak un,
ka vapai di-ua, hun remchang masa pen ah, hong zin kon sawm di'u, chia
pai ka sawm laitak in, ka lungsim ah a contact number nget di a hong
lang a, huai dia le, hang sanna le nei nonlou, lah a number neikei leng
kithuzak theilou di, chih ka ngaihtuah chiah, hithei mahmah lou, chi'n,
ka hang sanna tengteng sawmkhawm a, na contact number ahih theih leh hon
pe ve, ka chih leh, bangmah le genlou in, a number hon gen zauzau hi.
Ken le a diklou ahi dia aw ?chia gingta chiah lou in ka save pah ngal a,
"nang a la"? Remchang e, kon call di chi'n ka dialled ngal leh, ring a
pai vanglak hi. Lungsim guk a nui hiauhiau kawm in kon kikhen phot uh.
Thildang himhim ngaihtuahna om theilou, ka diip bang kisai litlit den
hi. A kallak ah ka fon den a, ka fon louh kal in ka text zel a, ka
paidek ni a, ka a thilgen ka lungsim ah a om den hi. Bang hiam diklouhna
nei a dia aw ! Nuthlawi hia ahih, koppih nei a, a pasal mundang a om?
Ka lungsim a buai thei mahmah mai. Ka dot chiang in lah " na hong zin
chiang in kon hilh mai di" chih teng in hon dawng zel hi.
Hapta khat khong inn a ka om nung in, vazin di vai kon hawmta hi. Ka
lawmte anih ua lah kithruai theilou di. 2wheeler a mi 3 vakipuak dan lah
omlou chi'n ka lawmpa, a phok zawpen, a zatnang tamdeu in teh, ch in,
ka va zawtbawl sim leh, a sungte'n rem ana sakpih louh ziak un, cent%
chiahlou pen toh ka kipawliam ua, amahle phur tak ahi dia. Zinei didan a
hon ngaiden ahih chiah, ka sungte bang fon a houpih a, ka zineihdi thu
hilh sawmden hi. Kei lah ka nuih lah za, hehtha lah suak, zinei dia hoh i
hikei, nungak hel a hoh i hi, ka chih chia le gingta mahmah lou.
Sunlai dak 12 khawng gingta..... Kikkikkik... ( Kawng Kiuh ging ) "hong
lut uau, kuate na hi ua"? Ka lawmpa bangchu keisa le kipak zaw,
"lawhching di i hi maw, i paikik lam chiah kei a nungpen ah ka tuangdia,
amah a lai ah tusak di aw" chih khawng in a guk in hon gen sasaih a,
ken le ka dawng hetkei leh, "utlou na hih leh ken kon khalh dia, na nih
un a nung ah non tuang di'u aw " dai maimai aw" ka chih le zaw
kisuanglah sim chu ahi dia, bang mah le gen lou in tukverh ah a etna
ngei enen mai, ka nungak hel un le nuamsa chiahlou mah ahi daim ah, "St
bangchi e, pau ut kei na chia", (cent%chiahlo a ka chih penkha 'St'chi a
ka sap uh ahi. St chia hon gelh ta di ka hi) bang chimah in dawng
tuanlou hi. Ken le a motor tuanna gim a kisa sim a hi, chin ka na gen
pah hi. Dak 3 ging di hita, inkongkhak hong kihong a, sikul uniform
silh pasal naupang khat, a puanak ngou le, a nitluat ziak a rawng dang
kai zawzen ta, hong lut a, "Nu ka gilkial, singpi hon bawl aw" ka ki en
ua nuih dia lah hilou, gendi lah kithei nonlou in dai dide in ka tu mai
uh hi. "ata taktak ahi kei di, a unaute ta tekhong a ompih maimai uh
hi'n teh," chi'n ka na ngiahtuah maimai lai in, "Nu ka miss nu'n
zingchiang in sikul ah na Nu hiam na Pate uh a remchang zawzaw na hon
hohpih di'u hon chi eive" a dik taktak ta ve, amah ta ngei ahi, bang ka
gen ta dia???
St hong kisum zou nonlou, "hiai nang tapa hia"? "Hi" St paudek lai ka na
paukhalh a, lianta na e, a Nu suun a amel le a hoih mahmah e, ka chih
leh, ka St ngaihdan hi nonlou, "Nungak hon kisa a, nang heldia gam
hiaitan hong kidiang vengveng a, ta neisa nahih leh ama a na gen di
eivele" chi a hong hangkhe miatmiat mai chu, gendi a vangtel mai, bang
ziak a amah sese ana hohpih kha ka dia aw? Midang hohpih di omkei lele
keimah in hoh hizaw leng hiai bang a zumtak a omlou di hi'ng a. Kei kia a
nungak hel ka utlouh ziak a ka zawt lah hingal, tua pat chu hiai bang
dinmun a ka ding non ngeingei leh, kuamah ka hohpih non teuh kei di,
chia ka kingaihtuah lai in, amah lah zumlua, nuam salou, gendi dang thei
nonlou ahih chiah, kei pau khiak masak ngai ahi chi in, hiai khong bang
thil omthei mah ahi. Zumnang le bang mah om mahmah kei. Tulai khovel
dan mawngmawng ahita, chi'n ka lungsim lou lampi ka gen daih leh amah le
neukhah in lungsim nopmel hon neita hi.
"A bultung a kon gen louhna ziak le thildang ziak hilou in, kon muhtung a
pat in ken le kon ngaina a, ka meldeih lamtak na hih ziak a ka gen
pahlouh ahi" hon gen sunzawm zel a, "Kum 5 paita in, ka paneu te lak a
laizil a ka omlai in, melhoih ka sak mahmah khat in hon beisei den a,
kei le amah deih lua ka hih ziak in, ka numei siangthouna le kembit
zoulou in, vuaitam ka na omkhawm nung un, vuaktanglou ka hih lam ka
kithei a, nau ka pai thu a kiang a ka gen leh, aman le kiteng poi a
saklouhdan khawng gen in, zankhat thilthu in ka kigu uh hi."
"Atung in zaw hon duat in, hon itsiam mahmah, hun hong pai zel in, a
mizia diktak hong kilang a, zu leh khamtheih chi tuamtuam kham kawm a
inn hongpai bang hon ching a, ken le, ka Pasal ahih chiah chi'n duat tak
a enkol in, ka siam bangbang in ka thuhilh zel sam hi. Aman huai kia
hun salou in khut khiak/vuak khawng hon ching ahih man in, kei le, huai
thuak zoulou in, ka inn lam uah ka paisan mai hi. Pa nei nonlou himah
leng, bang mah neih le neilouh in gen thei mah le ung le, hiai innsung a
ka om om m sang in kei a di'n le hoih zaw in teh, genthei thuak a
lungsim kipah ka ut zaw, ka chi hi."
St bang chu hiai thu a gen lai teng, a lungsim khoih khasim ahi dia,
mittang kephial in en kilkel mai hi. "khosak hak salua ahih chiah chi'n
sum tamlou, ka Nu'n a meh zuakna a akhawlte apat in singpi dawr neuchik,
kei etkawl din hon bawlsak a, ka Nu sum muh toh pangkhawm in ka khosa
liailiai uh hi."
Nang zaw tangval lai na hih ngei uh kon gingta. Huaiziak in, ngaihzawng
khawng naneih ua, meldeih zawng khawng na muh uh ahih in le, kei
bangbang in, ngaihtuah ching masa lou leh, mi bang chibang mi ahia, a nu
leh pa mi bang chi ahi ua, bang chibang insung a pat a khangkhia ahia,
chih khawng ngaihtuah masa lou in zaw Nupi-Pasal neih mawk kei le-u chin
chih kon deihsak," chin khasia kisa in hong kidik feihfeih hi.
Ken le hehpihlua ka hih manin, gen di pen leng theilou in, amah ka en
maimah hi. Huchih lai in amah hong pau non in, "tu'n zaw ka chanchin
bang kim na thei a, ka dinmun teng le na hon theihpihta a, nang
deihtelna a kinga ahi, hon it a, hon ngai teitei ding in ka hon phut kei
a, hon khen inla, kei apat paikhe ding in leng ka hon chi ngam sam kei.
Hon taisan lechin leng bang mah gen thei ka hikei a, ka dinmun hichimai
ahih ziak in, nang tangval a di'n chu, nungak siangthou leh hoih taktak
tampi a om ngei di' uh. Kei ziak a hiai tan buai tak leh na hun manpha
tak seng a na om ziak in ngaihdam kon ngen hi"
E ,,,,, 'D' ('D' amah ka sapdan ahih ziakin 'D' chi'n kon gelh ta di),
hiai bang a na ki ngaihtuah siat mawk di hi zen zen lo ahi, tulai khovel
ah nungak tamtak, kimihoih sak leh kifelsak tam tak om mah uh e.
Himahleh amaute le nungak kichi mah le uh, atam zawte zaw, amin maimai a
nungak, midangte mitmuh a ki hoih/felsak mai hi un ka thei, amaute
pawlam mitmuh in siangthou mah le uh, a sunglam nit chiteng a nin hi'n
ka thei. Nang bel huai dan hilou in, na hih na bangbang imm nei hetlou
a, genkhe ngam na hia, ken zaw huaite ziak maimai a hon deihlouh phah
tuanlou ka hi, chi'n ka lungsim taktak ka genkhia hi.
"Je (kei hawn sapdan) ka kipak lua, hun haksa tampi ka na tuahsate, hiai
khovel ah, mangngilh sawm mah leng ka damsung in ka mangngilh non kei
di. Huai ziak in, tu'n le, nang lak a ka cheet khelh ahi ka lauh pen, a
biik in numeite zaw, khatvei thil hihkhelh in, sawt daih lua inchin, ama
a ka na hihkhelhte le, tua a thuak dan neukhah in adan om ka sa ta.
'Je' Pasalte mahmah hampha ka hon salua, kei ka Pasal toh ka kikhen
nung uh Kum 5 bang bei di hita, himahleh mite hon muhdan in, zanzek a
kikhen a hon mu uh hi'n ka thei lailai. Ka pasal lui in zaw, Kum 1 le
liam ma in, zidang anei pah a, himahleh, midangte'n bang chimah a, a
demna thu uh le ka thei kei. Huchih lai in, ka kikhen ziak uh le, mi tam
tak in kei ahon mawhsa zawmah uh hi. Huaiziakin, nang ka hon muanmawh
na'n ana ngai ken la, na lungtung lou a, ka kipah nang maimai chi'a hon
gen na hih in zaw, kei a dia thuaksiam haksa law di ahi. 'Je' hehpihtak
in na lungsim taktak hon gen mai ve maw,"
Ka halh khe guih a, dakzah ka et leh nitaklam Dak 5 bang ging di hita,
'D' ka lungsim taktak ahi ka gen, nidang a na tung a thiltungte, tuni
apat in mangngilh inla, na maban hun di, alimchi zawng in, kei ziak
bekin ngaihtuahta inla, itna ziakin ka ngetnate hon pawmsak lechin, chih
ka deihpen ahi. "'Je' ka kipak lua, akai tak toh tuni'n zaw paikik dah
mai unla, zingchiang lam in, paikik di'n vaihawm thak zaw mai ve ua
maw"!! Chi'n kipah mel leh hlim melpu-in hon en kawm hi. St bang a na
ngaih dan? "Nang thuthu himai, hile le i giah di leh sung te le bang mah
kihilh khalou ahih chiah," chi'n inkong ah fon a innlam te hilh ding in
St le pawtkhe ngal hi. Felna e, hiai bang gen louh a hih nachang
khawng na theih, chi a, ka lungsim in ka ngiahtuah lai in, anu mehzuak
le hong tung chet hi.
'D' in " Nu, na gim hia? Hiah ka lawmte, kei mudia hong hawh un chi'n,
eikhawng mudia mi gam hiai tan a hong hawh uh hi a, chi'n ka dawrngak
nalam ale kuan loumai ka hi. Tuni a ka sum muhdi teng, zingchiang in ka
mukik non thou di" chi'n, kei lam en in nui selsal hi. Anu'n le, "Zanlam
sutbol pekdia hong hawhte na hi uh maw ! Na fel lua uh, hihdi poimawh
nei a hong uh maw, ahih keileh, hong hoh maimai"? Hihdi poimawh om le
hituan kei, na ngaih huai ua, nou mudia hong hawh ka hi pen uh, chin kei
le ka nui na nalh hi.
"Nu khua lah a kai taktoh, innlam kik non nang in lah a gamla tham si a,
giak dia ana khou mai kei ve, utlou sim na un chin",,,,,,, " a hoih ve
le, lam kal ah mi-gilou, poisak neilou a tam tak utawh, zingchiang,
khovak chiah awl in apai di-ua himai aka," chi'n anu'n le dawngpah hi.
Inkong hong kihawng a, St hong lut a, "ka gen khinta, na Boss pa'n chu
rem sa chiah lou, zingchiang in a baihlam in nong tung du hon chi", chi
kawm in hong nuilut hauhau hi.
An nekham, bangbang hiam gen a ka tut nung un, midang te'n chance hon
pia uh ahi diam ah, hon lupsan chiat ua, 'D' tawh ka tu leuhlauh uh hi.
Gen di hauselua, genpat di le theilou, chidan in ka om ua, paulou a,
sawtsimtak ka daih nung un, ken, 'D' zingchiang a ka pai uh ngai teitei
di ahih ziak in, tu zan bak hun remchang bangchik chiah i mu non dia,
chih kithei bunlou, innlam pai leng, ni 2/3 khawng, ka om man leh hi
chauh di. Ka sepna lam ka kik hunta di ahih ziak in, gin om takin nana
om dia, na contact number khawng le ka nei thou a, chanchin chu i kihilh
zel mai di, "hitham e 'Je' nang hial in na chih in chu, na thu selthei
di khop in kei, bang ka hi a e"???? E! huchi zawzen lou e ! "Eh! ihmaw
'Je' kiteng bang ana hileng, kei ka tapa lah naupangchik hilai, amah a
bang mah le hihthei nailou, huai kia hilou, ka nu mahmah le, kizen non
silou, hilele , nang na omna maw" huaite zaw awl a gendi'n koih ni, na
gen mah bang in, kei ka omta a, mihing khosakna ah genthei mah lechin,
lungsim a na gentheih hon phal non lou ka hi. Tua na thuaknate le hun ka
sa lawta. Itna ziak in na Nu chu kei nu, na Ta chu kei Ta, chi'n ka
siam bangbang in ka nem sam hi. 'D' zan le asawt ta thou a, lumphot ni
maw! Chi'n mahni laikhunlam ah, sambang zalding in, kon kimangphata uh
hi.
St thou ta ve, na lup baihbaih toh, tu tantan lup, chi'n St ihmut
suaklai pi, inn lam kik baih ka ut ziakin ka vaphawng teitei hi. St hong
thohkhiak kom in, "lumbaih na ing a, ihmu pahlou kei ve. Na thilgen
tengteng uh le ka theivek, na sung te le ka hilh vek di," hilh ngai nai
mahmah kei, maban ah bang hong tung dia? Chih le kitheilou a, midang
khong hon neihsan leh zumhuai maimai, ka chih leh, "ka gen louh di man
in, na kiteng hunhun uh chu, na base dia nonzat di himai" hitham e, St.
Ka lawmhoih ber na hi, kuamah lak a na genkhiak nailouh di ahi, ka chih
leh, hong nuikhe seusau hi.
"'Je' na manta uh hia? Ann neta ni, nunu le a nasep nang kai khadi" chin
chouka lam manoh in ka paiphei uh hi. Ann nekham, Nunu le nasem dia
kuan khedek ahih man in, kichibai himhim di, chi'n, ka chibai kawm in,
na tuibuk man di chi'n sum tamlou ka piak leh, hon sang ut pah lou hi.
Ken le, hiai bek non sansak kei leh, khatvei le hong zin nonlou di, ka
chih leh, hon sansak vanglak hi. 'Je' naupang sikul kai kuan hun, ka
vakha zual di, kong kikpah di" chih toh 'D' in pawtkhiak thuah ngal hi.
Dak 10 lam ging di hita, 'D' ka vapai phot di ua, i thuchiamte ah i
gin-om dia, a nuam a haksa ah le, kitaisan mailou in, Pathian ompihna'n,
chikni chiang hiam in damleh kipak tak a, i kimuh non ka lamen. 'D' hon
khasesim a, bang mah le genlou in, room ah hon lutsan hi. St, Motor
ana start ou, chia St pawt khiak nung, sawtlou in, room a pat in hong
pawt khia a, nuihmai selsal in, "'Je' hon theisiam in la, ka
vangsiatnate, haksa tampi ka thuak na te kal a, hiai bang a hon hehpihtu
di, nang bang nana om chih ka ngaihtuah chiah lamdang sa in, ka khasiat
tha ngen suak a, nang bang a tangval fel leh melhoih in, kei, nuthlawi
maimai na hon hehpih chih ka theih chiang in ka nehnou thei petmah hi.
Om didan a non deih dantak in ka na om dia, nang a dia gin-om den di ka
hi chih ka hon chiam. Kei hon deih nonlou a, midang na deihzawk, na
ngaihzawk a om ahih le le, hon iim mai ken la, hoih tak in hon hilh in
aw." 'D' i gensate ken le, tangtungsak a, thuchiam a gin-om ka mawhpuak
ahi, chih ka thei. Huaiziak in, hon muangmawh leh lungsim gim tak in
ana om het ken aw!! Mangpha kimuhnon mateng, chi'n kimuh kik non
lametna toh kon ki bye bye ta uh hi.
St nang hon hek mai aw, ka chih leh phur deuh tak in, kum khe ngal zat
hi. St in bang teng gen a chih khat le theih ka neikei. Bang ziak a
hichitel a, ana ngai kha mawk ka hi dia aw, ka theih ngei le hilou,
zanzek a kithei pan, tua hichi tuk a ka it a, ka ngaih theih mawk
lamdang na e, 'nuthlawi vangngaih a nna' a chih chih uh kei
tung a le tung dik ahi ta di e. Amah ta khat neisa, kei tangval diktak !
ka nuikhe phut mawk hi, "mood fuh thou maw, bang chik chiah i hawh non
dia? Kiteng meng meng le-uh chin ka chi e, hilele, atapa kha nang
neitel ut di maw, fel bang fel zaw mah lai" dai maimai aw, "kum sawmlou
maw, bang e na ngaihtuah"? Ka dak khiak leh inn tung ka na himai mah uh
hi.
Mite bang in siam in pil kei mah leng, Pathian ompih na te leh a
vualzawlnate ziak a nna neuchik, mundang a sem a om ka hih ziak in, ka
sepna lam zuan a, ka pai a hong hunta hi. Kihtasim mah leng pailou thei
ka hih louh dan, tua ngaihzawng khong kinei, zi leh ta neih hun hong om
di, huai hun chiang a ka khut a thil bang kim kinga tadi, tu'n amah ka
khiak lah ziak in ka sepna sunzawm kei mawk leng, a thuak tu di kei mah
thou, chih khawng ka ngaihtuah a, lin kawm pi pi in mahni inlum nusia
in, ka sepna lam zuan in kong pai nonta hi.
Lamzang takin ka sepna ka hon sunzawm non a.Nna le lungsim ah a lang
thei mahmah kei hi. Ka 'D' lou ngal bang mah lungsim ah om thei mahmah
lou ahihman in, ka seppih te'n le, lamdang sa in, "inn lam na pai leh,
bang va ne, va dawn kha na hia, pau lah na pau ngei non hetkei a, na fon
a le bang om ahi tel a. Hun awl tengteng fon khoih nang a zatbei tel"
hon chi hial uh hi.
A gen uh le dik mah e. Ka 'D' toh nikhat in 100 valval ka ki text ua. A
kal lak ah ka ki fon zel zawmah lai uh hi. Theihlouh kal in kum le bei
di hita 'BER' kha kitung kaita ahihman in, kei le innlam pai non hun di
ngaihtuah in, ui meikang bang mai in ka phe velvul mai ta hi. "Mr Je, Pu
pen in hon poimawh ahi" may i coming sir!! Coming, coming. Sir bang thu
ahia? "Mr. Je, tukum nna i hauhdan uh na thei a, nang lah join di ka
chih hun a hon join lou na hih chiang in, tukum zaw kha khat bak khawl
mulou di na hi, huai le december kha lam ngai di" hoih e, sir.
Huchia ka pai ut hun a paithei lou di ka hih chiah, sms in hilh leng
lah, kam ngei a gen toh kibang lou deuh ahih chiah, paukam mahmah in kon
theisak di, chi'n ka 'D' fon sawm in, ka sakhau apat ka fon kon lakhia
a, ka call ngal leh "out of service" kichi a, kei le beidawng lou in
vuaitampi ka dial nung in le bang mah phatuamlou ahihman in, sms in ka
hilh mai hi, sms inlah paithei thou si a a, bang ziak a call paitheilou a
de aw, call thak himhim di, chi'n ka call thakthak chiang inle ring
paithei tuanlou hi. Sms khat hong lut a, ka et le "poi na e maw 'Je'"
chiteng in hon dawng hi. Kenle net chianglou hi'n teh chi'n, ngaihmuang
tak in ka om mai hi.
Lunglutna tellou kawm in ka niteng nna ah ka kai zel sam hi. Huchih kar
in, December kha bang thak di hita, hiai kar hun sung teng in le, ka ki
text den ua, a aw zan uam chi a ka call sawm chiang in bel, out of
service kichilai lai thou hi. Lamdang sakna'n ka pumdim a, bang ziak
ahithei mahmah dia chi'n ka kingaihtuah den hi. A ziak di mawng mawng
lah ka thei sikei a, amah ka dot chiang in lah, huai thutak ka dotna a
hon dawng kha ngeikei hi. Poikei, ki text theih sung chu a dandan om,
chi'n lungmuang ngellou, lungmuang sawm teitei chidan in ka om hi.
'D' zingchiang in hong pai ka sawm, chi'n kar khat khawng bek inn lam a
om ka ut dan ka hilh a, aman le, "ole poilou" chiteng in hon dawng hi.
Aman le hon ngaih leh hon muh a ut thu genden hi. Huchi'n December ni 24
a akhua ua zin a, ni 24 zan amah tawh zang khawm ding in lem ka hon
gelta uh hi.
December ni 24 zing baihtak a thou in, St toh mah hoh di chi'n, zing
tung apat in ka buai mahmah uhi. Huchi'n zing ann nekham phet om
khomuang lou in, St toh ka hon kipawliam n0n ua. Bang ziak ahi diam ah,
ka lungsim guuk khat hi geuguau a om mawk hi. Genkhiak theihlah hilou,
lah lungsim nop a nuamlou chidan in ka om den a, saulou chik taipan chih
in, ka bike hongsi mawk hi. Ka kuan dek ua le ka check sa, bang mah
chian louhna omlou, chia ngaihpha tak a om ka hi a. A loh didan tuan
theilou, ka start leh a hong hing thei non vanglak hi.
Hiaini bang ziak ahi mahmah a ahia, ka lamzang louh dan tel uh. Motor
seden ahih chiah, nidang a, dakkar 3 khawng ka taina ua, hiai ni,n ka
motor a chiang louh luat ziakin, lamkim ching di khawng ka tai lai un,
khua mial di'n hong kisa hi. Ken le chanchin bang mah hilh kei leng, ana
lung himoh lawdi hia, zingkar a ka kuan khiak dek ua ka theihsak bak,
tanchin bang mah le theisak lou, chi'n msg in, 'D' hong tungbaih sawm
mah le ung, hong tungbaih theilou di ka hi uh, chi'n, ka lamzan
louhdante uh hilh in sms ka khak hi." 'Je' apoikei, khonawl, huai
khawlmun ah ka na dawn na di aw," chi'n hon reply pah hi. 'D' a ngaikei
di, zansawt nunglam a hongtung di ka hi ua, inn ah ana om maimai zaw in
la, kisil nang tuilum khawng ana sung lechin chin ken le ka khak non hi.
"'Je' ka na dawn utlou maw ? Hun hiaitan kimulou a ki omta a, mi le
nangaih chikei ngei" chi'n hon reply non hi, 'D' lungkim lou ahi, chih
ka theih ziak in, awle nang thuthu himai, chin, ka khak non a, "awle"
chiteng in hon dawng hi.
Tunghak di ka kisak sim leh, gintak sang in tung baih di dan in ka om
ua, awl awl a taizel in, 'D' in "ka na dawn di" a chihna mun ka tung un,
dak 6:30 a ging pan a, phalbilai ahih manin, khua le mialta mahmah hi.
Himahleh tung solkha vak philphial nuai ah, gamla lou chik chi chu a
kimu thei hi. 'D' in ana dawnlou ahi dia, aw ! chi a, ka dak kualkual
leh, suangtung a mikhat tu, ka mu a, amel bang mah a kimuhlouh ziak in,
midang le hithei ch'n, eeheeemm, chi'n ka aw ka suah a, himahleh, dak le
dakkhe lou in, a omdan pangngai in om den hi. Ken le lamdang sasim ka
hih man ni, ka naih phei zel a, numei ahi, chih ka thei pah ngal hi.
Himahleh amah a kun ziakin, amel di himhim ka muthei kei a, a kiang a
pai nai in, kua a na hih, chia, a liangkou a ka khoih le hong dak khia
in, "'Je' hong tungta maw"? Nang kia maw 'D', eh,,,, bang ziak a kap e,
kei kipaktak a nang toh kimudi chia, hong kuan kei ve, chi kawm in, a
mittui ka nulsak hi.
'D' paingal mai ni maw, khua le a vawt toh, inn tung mengmeng a ut huai,
chia aban a ka kaih leh, a ding ut kei mawk hi. Lamdang ka sak luat
ziakin, gen di tuan le theilou in, ka om maimah hi. Amah aw lingsim
pepelh kawm a hong paukhia in, "'Je' kon ngailua, painailou in hiai ah i
om zek lai di, na kiang a thil gen ut nei ka hi. St amah in ana pai hen
la, eizaw den chiah khe in i pai mai di, nang rem nas ak le" chi hi.
'D' bang thu poimawh e, gen di naneih, nang midang ana neihsan maw leh?
inn ah genzaw mai ve, ka chih chiang in le a ut hetkei mawk hi. Ahih leh
chi'n St, nang ana paisuk mai inla, kou khe in kong pai mai di'u, mi 3
kipuak le,haksa lua'n teh ka chih leh, St in le thu awi tak in "aw le,
nuam deuh in non om du' aw" chikawm in hon tailiamsan hi.
Bang mah le genlou in, sawtsim ka tu ua, ken le 'D' kianga vatu in, a
liangkou ah ka vakawi hi. 'D' vawt sa lua na hi, sawt om hoihkei,
denching in na khua khawng a hongsik dia, a buaihuai zaw di, ka chih leh
keilam en in, "'Je' ke ka khua sikthei nonlou. Kei bang mah in hon
hihna thei nawnlou" hon chikhia a, kenle chiamnuih gen hi'n teh chi'n ka
nui mai hi, 'D' chiamnuih na hatlua, huai ziak khawng mahmah eivoi ka
hon ngaihna, chikawm ni, kawi in, a khatvei nang chi'n, 'D' muk nel
thiamthiam ah ka tawp hi, eh,,,,,, 'D' bang chidan e, na muk tengteng
khawng le vawt vek eivoi, chia ka et leh a mit hon hak khia hi, mit ah
chiang tak in ka en hi. Huchih laitak in, a mittang mihing mittang om
didan le hilou khop a lamdang in hong om a, ka mitvai hia, chi'n ka mit
bang ka nuai thakthak hi. Himahleh amit omdan kia genlouh, akam khawng
ah sisan hong luang khia a, a mel khawng hong kikheng vek hi.
Mihing mel sepen le hiai kan in melse tuan kei di, chikhop a sia in, kei
lam en in hong nui zawmah lai hi. Bang mah ngaihtuah theilou a sawtlou
ka om nung in, mihing mel pangai hon nei non a, 'D' bang ziak a hiaidan a
na om a? Ch'in ka dong hi.
"'Je' hiai ahi, na kiang a ka gen ut ka chih, hoihtak in ana ngaikhia
aw!! Ch'in a hon gen hi. I kimuhlouh hun sung teng nang ngai in, bang
mah le hih peihlou in, ann le ne zoulou in ka om a, ka taksa hong ke
niam hiaihiai hi. Himahleh ka nu lah hat nonlou ahih manin, leh ka tapa
sikul fee di khawng ka ngaihtuah ngai ahih manin, peihlou pi pi in dawr
ngakna lam ah ka kuankhe zel hi. Ka natna sang mah in le, nang ngai a ka
lunglen na tawh, ka tapa maban hun di ka ngaihtuah na tawh, lung gim
tak in ka om den hi.
Nikhat ka nu ngaihphalou in, damdawi in ah midang sum puk zenin hon
hawhpih a, daktor pa ka ki check sak leh, "khawsikpi na nei a, na
khawsik le na khuak a lut ahi, a kin theilam in damdawi in lianlam delh a
hoih di" chi'n damdawi tamlou hon chawh hi. Damdawi in dang naihnang
sum neilou ka hih man un, ka nu lunggim kisa in, sum pukdi khawng zawng
in mi inn teng ah vial diandian mai hi. Himahleh ka ki etsak nang a
sumsen ngai tamlua ahih man in, anei te'n le, ka ditkik theihlouh d'u
lau in hon pengam kei uh hi. Ken le ka nu lunggim ki sa tak a om ka muh
chiang in haksa ka sa thei mahmah a, a guk in ka mittui a luang luang
mai hi "Nu, adan om touzel hi'n ka kithei, hiai daktor hon damdawi piak
teng ka nek bei chiang in zaw ka damta di", chi'n, ka nu ka nem zel hi.
Hoihlam le manawh tuanlou ka hih man in, sih mai kei a ding in hoih zaw
in teh, ka nu mahmah le ka lunggim sak lua, chi'n zusa thahnalou dawnin
ka kihih lum hi. Ka nu leh ka tapa ahih leh, ka paneu te khua lam ah,
kei sihnung in apem khia ua, tu'n ka inn uh le ka nu'n midang ka leisak
ta" chi'n, a genzawh in, ama a omdan mah in, amel hong kibawl sia in, a
khen chiang bang in, a mittang khawng hong lawtkhia hileh kilawm khop in
hong om nawn hi. A nuih ging, nidang a zak nuam ka sak mahmah pen tu'n
lah hon lau saktu mai ahi ta. Kintak in paikhia inla, nang tawh
omkhawm thei i hih nawn kei, chi'n, hon kibawlsiat khum den hi.
"Je' bang na chi a, 'D' lah koi a om a, koi a koih e"??? Awl in ka mit
kon hakkhiak leh ka kiang ah St in, lungkham mel tak in ana en hi. "'Je'
na hoih maw"? Im ka hoih e, "halhsuah haklua chi'n a si hon kisata a,
'D' la koi a om e?? Chi'n a hon dong a, ken St, 'D' omnawnlou, ka chih
leh thil oimdan theisiam zaw ahidia, bang mah hon dong non tuanlou in,
"khua le vakdi hita, meltheih lah kineilou ahih chiah, zan lam a i
vazintunnate inn ah i vakhawl tawldam maidi" chi'n hon pawsuk hi.
St in, ka omdan hichi'n hon hilh non hi. "Huchia ka hon paisan nung in,
'D' nu leh a tapa muh kilamen kawm a, insung a ka lut leh, meltheih
ngeilouh ngen ana om ua, ken le lamdang sa in, hiai 'D' te inn hilou
maw, a lawmpa ka hi a, chi a ka dot leh, himah e, amau mundang ah apemta
ua, a pem khiak dek un hiai inn ka leita uh, chi'n hon dawng a, ken le
bang mah thu le dong non tuanlou ka hih man in, singpi khawng dawn inla,
amau om kei le-uh le, hiai ah na giak mai di, midang meltheih khawng na
neih lelah poilou, hon chi ua, ken le midang meltheih neilou ka hi
chi'n, an khawng ka na ne hi.
Dak 12 lambang ging ta, nang lah hong pai thei lou na hih chiang in, ka
hon lung himawh a, zing lam dak 1 lak in kon zawng hi. Huachia kon zong
leh, nang le lampi laitak ah, khua le phoklou in nana lum a, lamdang sa
in, ken le ka theih dandan in ka hon buaipih hi. Sawtpi ka hon buaipih
nung, khua vakdek lam in na hong harh thei hi" chi'n hon hilh hi.
Ken le ka thil muh leh ka omdan tengteng uh ka hilh leh, St le lau lah
lau, kei lah hon hehpih, bang mah le gen lou in, a guk in a mittui
nulnul mai hi.
A sih nung Kha 3 sung veng veng ka ki text pih kua hita di ?
A number lah 'D' in azat gige hingal a, tua midang a zang om uh a diam ?
Ahih kei leh, 'D' kha in hon thuk zel a diam ? Ka ngaihtuahna tuni tan
in a buai phah hi. 'D' na tapa hawmthawh mahmah leh na Nu it mahmah
muding in, a kin thei lamin ka zong khe dia, ka neih ziak leh ka hauh
ziak hilou in, ka hihtheih bang kham kham in ka na panpih dia, nang zaw
haksa gentheihna om nawn louhna mun a om na hita. Chikni chiang hiam in,
na tapa hawmthawh mahmah, Na Nu it tak leh kei na duatlai, na lungsim
tengteng luahtu, nang tawh kumkhua mai hilou, tangtawn tangtawn a kikhen
nawnlou ding in ana dawn in aw!!!
~~~~~~~~~~Beita~~~~~~~~~~
©Siamsinna leh Vakiangbu
Comments
Post a Comment