AIM IN LIFE ,PICHE MURH:
By ~Muana Guite
Hondampa Jesu pianna Bawng buk ah piang hial lou ka hih ziak adiam
ah, ki hihsak na riau ka nei hi.Nu leh Pa kal ah hoih tak a khangkhia i
hih chia mi te'n hon koih sang din ka na kikoih mawk hi.Mite eng lua in
hinkhua ka na zang khol kei zawmah hi.A haksa himhim ka na thuak vang
mahmah hi.
Nu leh Pa officer hi tuakte' Tapa neihsun chu a duat kei ding un a
ging huai kei himhim hi.Ka lawm leh vual lak ah leng a thunei pen ka hi
gige hi. Kei thunuai a ka koih theih louhte chu polh le ka pawl ut kei
hi. Lamka ah School hoihpen(fee tamna pen) ah Prep apat hon kaisak tei
sam uh hi. Lai lam le Nu leh Pa te sun in ka siam thei mahmah hi.Class 3
khong ka hong hih in Teacher te'n Aim In Life hon dong ua,Doctor ka na
chi tei sam thei zel hi.Hun te hong pai zel in Pawl Sawm chu percentage
sang tak in kon zou khia a. Delhi lam ah maban sunzom din hon sawl khia
uh hi. Delhi ah chu pawl 12 percentage sangtak mah in kon zou nawn ngei
hi.Doctor lunglut ka hih chiang in Coaching ka kai a, ka Nu le Pa’n MBBS
lou le AIEEE ah le entrance test pe himhim din hon sawl uh hi.Huchia
entrance test kon piak leh Engineer pen ah College hoih tak ka mu
a,himahleh ka lunglut na pen MBBS ah ka clear zou kei hi.Coaching la a
kumnawn lam chiah MBBS try thak nawn ka sawm a himahleh Ka Nu leh Pa’n
hun(time) a pammaih chi in Enggineer pen zil din hon sawl ua ,ken chu ka
huphurh gu mahmah hi.Himahleh Nu le Pa thumang na in Enggineer chu kon
zil tei hi.
Engineer kon zil chu lunglut na pen ahih louh toh a haksa petmah mai
hi.A kum khat na chu haksa pipi in kon zou thei hi.A kum nih le chu back
paper neilou in kon zou hamham nawn hi.Himahleh Engineer chu ka lunglut
nai mahmah kei hi.Lehkha bang le lunglut lou deuhdeuh in lehkha sim
bang ka thadah deuhdeuh hi.Huchin ah hunte hong pai zel in 3rd year kon
hih kum in ka lehkha sim hun sung teng lawm te toh Zu dawn na hun in kon
zang ta hi.Sum la hek deuhdeuh,zuau gen siam ngai deuhdeuh ahi mai.Ka
Nu leh Pa’n la chu hon muang mahmah ua ,sum ka nget zahzah chu hon khak
pah zel uh hi.Huchia 3rd year kon clear zoh louh chiang in a guk in
College le kai nawnlou in fee dia hon khak te uh chu Zu man din ka zang
vek ta hi.Zu kia deih khop nawnlou in Khamtheih kon chiam sin ta hi.A na
nuam tel mai , khamtheih chu a chiin chi khop mai. Ka Nu leh Pa chu
hoih deuh in kon khem a,sum chu a tam khop mai.Khamtheih hih lawm chu ka
hau mahmah mai hi.Ka thil hih hoih lou teng kon zongsat luat chiang in
kisel chu hong hak deuh ta a,ka Nu leh Pa’n le ka thu ana za tei ua.Na
lehkha sim chu sunzom nawn dah inla,innlam ah hong paiphot in kon ngai
lua uh chin hon thukhak uh hi.Kei le zuau a sum nget didan thei nawn lou
ka hih chia,thumang tak in innlam ah chu ka pai mai hi.
Innlam kon tung a,Nu leh Pa toh Pathian thu himhim donlou in ka
hinkhua kon zang tou nawn hi.Ka tuailai thahat lai tak ahih toh ka hun
hoih te chu kei mah deih dan in kon zang tou den hi.Innlam ah chu
khamtheih hih lawm di ana tam tel mai.Lawm ka hau mahmah mai hi.Nu leh
Pa te sum gu in khamtheih kon hih taktak chu miteng in hon thei pah mai
uh hi.Ka innsung uh hi nuam ka sa thei kei a,kholai ngaihna in hon zou
zaw ,sum ka deih chiang chauh in inn ka pha a,huchilou in ka Inn uh chu
hotel dia ka zat ahi mai.Ka Nu leh Pa’n sum ana hauh ziak un khotang ah
chu zahlakna ka tuak nai kei hi.Ka lawmte ahih leh khotang in guktak
ziak in a man sek ua,kei pen ka hih leh Ka neihsa uh gu ka hih ziak in
hon man thei kei uh hi.
Hunte hong pai zel in ka Nu leh Pa’n na khamtheih hih na ngawl theih
leh na ut pen Doctor chu Private ah kon zil sak di uh chin ah hon gen
ua,himahleh kei chu ka khamtheih hih nak luat ziak in bangmah zil thei
di ka hi nawn kei hi.Khatvei ka lupna ah ka lup lai in ka kingaihtuah
a,ka lawm le vualte nuamsa tak a om ua,a Nu leh Pa te un muang mahmah
ua,kei bang dia ka Nu leh Pa muang theih dia omlou ka hi hiam?? , chi’n
kong kingaihtuah hi. Ka Nu leh Pa lunggel tan tuangtung zoulou chu ka hi
peuhmah dia,bang chi leh a lungkhamna te uh ka hih bei thei dia chi’n
kong kingaihtuah zel hi. Ahi kei , ka khamtheih hih pen kei mah thu a
tawp theilou ka hih man in nidang a ka na simmoh na mun mahmah Rehab a
chih uh chu kei dia kibawl hoih na mun di omsun ahi ta hi ka chi hi.Ka
Nu leh Pa kiah Rehab ah hon koih mai un,ka kibawlhoih ut chi in ka
kingenta hi.Rehab ah kon lut chu,a haksa khop mai,inn nuam tak a ut
dandan a omlai khong a ngaih huai petmah mai hi.Rehab ah kum 1 khong
kong om khit chiang in kei le ka hampha mahmah a,ka khamtheih hih pen ka
tawpsan thei hi.Huai mai hilou in khalam damna le Rehab ka om sung in
ka ngah hi.
Rehab a ka pawt nung in ka room sung ah kei kia in ka om a,hi chin ah
kong ki ngaihtuah kha hi........ka neu apat Ka Aim in Life ....Doctor
chu zaalmang bang in a mang ta hi.Ka Nu leh Pa lunggelna tan tung
zoulou, Ka Aim in Life pen kei hoihlouh ziak a tangtung sak zoulou ka
hih chiang in ka Aim in Life chu ka khek a ngai ta (Aim in Life,Piche
Murh). Ka Aim in Life din hiai kon thupuk ta hi....“Ka lungtup
tangtung sak zoulou ka hih chiang in,tua kipat in ka Nu leh Pa ka su
khasia nawn kei dia,kam in kipahthu khat vei bek ka gen dia,a thuthu uh
ka mangta di...”chin ah ka Aim in Life chu ka piching nung in ka khek ta
hi. Hiai simlei ah ka nuntakna hi chi lel ding maw,ka lawm le vualte
nuamsa in leng diamdiam uh a,Pathian lam ka naihta ding. Ka hun hoihte
amah a din ana zang kha kei leng le ka hun neih laite Pathian adin ka
zang di.Ka mangbat lai ,belh ding ka neih louh lai a ka belh ding omsun
Pathian ahi.Ka Nu leh Pa te ka tung ah a lungtung na tan uh tung zou kei
mah leng,ken chu ka Nu leh Pa hon itna ka muh in kipahna in ka dim hi.
Ka Nu leh Pa kiah kisikna thu khatvei bek ka gen ding chi in ah thupukna
kon bawl thei hi.Ksikna thu gen di chu a haksa khop mai,hun lemchang ka
zongzong hang in ka mu pah thei kei hi.Kisikna thu gen dia ka ngimngim
sung in khatvei ka Pa’n hon beisan dek petmah hi.Huai tak in thil
kikhel thei ahi ,kikhopna ka neihpih dia huai chiah ka Nu leh Pa mai ah
kisikna thu ka gen di chi in ka thupukta hi.
Khatvei kou sungkuan Kei,Ka Pa leh Ka Nu toh ka om khawm lai un
kikhopna ka neihpih a “He Nu , He Pa.......hon ngaidam un aw.......na
tung uah kipak lua ka hi, kipahthu genna dia hunhoih ka muh lai hi ka
kipak petmah” ka chih leh ka Nu leh Pa’n hon kawi ua a biang uah kipahna
mittui hong luang khia hi.
(After 5 years...........)
Tun ah Pathian om pihna in koppih hoihtak
toh Tapa 1 nei in inn nuam tak ah ka teng theita hi.Khotang vai leh
Saptuam vai ah le ka hih theih khomkhom in ka kihel zel a.Nidang a mi
lak ah ka Nu leh Pa’n ka tapa uh ahi chih di bang ana lit mahmah uh,tun
chu hon suangtei mahmah ta uh hi. Hun mualliam sa te ka ngaih tuah kik
chiang in ka Aim in Life pen ana tangtun hi leng tutan le dam din ka
kiging nawn kei hi. Huan ah, Ka Nu leh Pa’n le khase tak in a hinkhua uh
a zang ding uh hi.Huai ziak in ka Aim in Life ka na Piche Murh hi kei a
din ana hoih mahmah hi.Ei tung ah thil hong tungte a sia a om kei a,
Pathian lam i naih nak leh ei adia a hoih zaw ana hi gige ahi chih ka mu
suah hi.
@Siansinna leh Vakiangbu
Comments
Post a Comment