PALM SUNDAY LEH NAUPANGTE

By ~ Muante Samte Paite

Hiai Palm Sunday kichi tuh, abiik in Naupangte adiinga Pathianni ngaklah huai mahmahte laka khat ahi.

Naupangte kia in alawm uh chihna bel hilou in- Nu-le-Pa te'n leng alawm tham uhi. Himahleh hiaini'in Naupang te'n tan, mun poimoh tak tangkha sek uhi. Lampi zuia Pathian phata kikou kia ahikeia, zingkikhawp abei nunga, sun huna thu-le-la a kidemna/kitaitehna tuam tuamte leng ahi hi. (hiai chindan bel mun-le-mual atuam dungzuiin atuam ding)

Huchi'n zingkal beltakin dakkhentu in dak ahon khen ging lengleng hi. Kithalawp huailua ahihmanin khuamial lai himahleh kithoukhia in- kihah siang, zawh lawm-le-vualte alang lang ah ki tawn kawi in Biakinn lam kizuan hi. Huchi'n Heutute makaihna in lampi zui apaidiing kihita hi. Lampi zuia paichianga kikou na di a thute hi chin "GAM HONGTUNG DIIING PA; DAVID GAM AHAMPHA TUNG NUNGPEN AH HOSANNA, AMALAM APAITE LEH ANUNG LAM A HONZUITE'N- TUNGNUNG PEN AH HOSANNA, EITE HONTAN PA JESU, JERUSALEM A ALUTNA THEIHPIH TUTE IHI UH- HOSANNA chi'n thumvei li vei bang kizil masa hi.

Huchi'n khodung-khovai'a tua thute sam' diingin Paungaihna toh bang toh naupangte banah, a ut-mi khempeuh kipatkhiak ahita! Huchin sak-le-khang, lampi kawi-le-tang, kawchik simsim pawl om mahleh kifang suak hi. Hiaini inbel naupangte thawm' in nidang bang loutakin mipite khanglousak diing hi. Banah mipite leng hiai husa in kithalawpna apiak lamet huai hi. Kikou zelzul akihimai a, nuam mahmah chih di hinte! Ngaihtuah thak chiangin Pathian phata kikou- aw suah tuh akisik huaihet kei ahi. Ut pi pi ahawh theilou bangle ana om ahihna ah, phetlouin hiai bang hun phawklou, khovel pumpi ah, naupang bangzahta om diing hiam chih theihbut louh ahi nalai hi. Huaiziakin Pathian hon teelna tuh athupidan muhsuahin om zel!

Hiaihun ah naupang neu zawdeuhte khongaih huaithei mahmah uhi. Akhente ngialbang atuailuai thei ua, lawmte phazou lou a khasetaka kap dipdip bang le a om tham hi. Lupna tunga dam louh ziaka thoukhe peihlou- utlua hina zenpi kalsuan zoulou, mittui kai nimnem a khasetak a kap hithit bangleng om tham hi. Ka lawmte hohna a kei hoh khalou chia nute' anga tautaute ahehpih huai un khongaih huai thei mahmah hi. Amau le allawmte uh banga -sia-le-pha theihna siangtak toh HOSANNA chi ut sam diing uhia, chia i ngaihtuah chiangin mulsi bang athou thei petmah hi. Khenkhatin lah "Papa ;mama- zingkal honphawng pahin aw kei leng Lampi zuihna a pai ut ka hi" chi'n angen uh hi.

Himahleh khenkhatte bel phawngtu diing omlou, kemtu mumal lou, Nu ei Pa ei chia genna di omlou, lah; lawm-le-vualte banga aw neihteng suaha kikou ut; himahleh "bawi aw phalvak ahita, aksi te zong mangdi hita, aak akhuangta, thouta in" chi a phawngtu diing omlou, hiaibang dinmun tangte'n dipnem ana sak ngeimai!

Naupangte' Jesu'n itt ahihman in akianga paiding anungzuite'n akham lai un zong, Jesu'n NAUPANG NEUTE KA KIANG AH HON PAISAK UNLA; KHAM KEI UN, PATHIAN GAM TUH HICHIBANG MITE AA DING AHI NGAL A; chi'n dawng hi. Naupante aw kham ahihlezong Suangnoute'n aw suah laiding ahi chi'n gen hi.

Huaiziakin naupangte it in i huaisiam diing ahi hi. A lungsim uh lah a siangthou ngal a, lampi dik kawkmuh a ; kaihhuai tuh eite mawhpuak ahi hi.

Sinsakna skul a kia ahun keia, Pathian thu lama kidaam louhial a sinsakna piak diing ahi. Chiildikte alet nungun leng lampial lawm lawm lou uh a; thilhoihlou lak ah zong, neukhah ahih ua kipan ana sinte uh mangin kihem thei diing uhi. Sinsakna pelou a alet nung ua mawhsak sak a hithei taktak vangkha diing hi. Sinsakna lamchituamtuam ah ibawlsak diinga, laikia ah hilou - music, laam, carpentry, lasak leh adang tampi- sinsaktu eite hihtheihna lamlam ah ipiak diing akisam mahmah hi. Huaiban ah diktatna, chihtakna, mahni a mi hihngam nate ihilh diing ahinawn hi. "Mahni a mi" ichih chiangin -mahni a kimuang ngam, mahni khe a ding ngam, alang alanga hoi duangduang lou diing chih na ahi a, mahni ngaihdan kia zui bilbel diing chi bel ihi kei hi. I let a i pichin nung chiang in zong mi kitheithei hi. Zu-le-sa kia a kibual sese te kia mi buai huai ana hilou hi. Mahnikhe a diingngamlou, lawmte hihna lamlam zui, amah kia a thil ahihkhak diing chianga, hithei mamah lou, Hohna-le-vakna mun khawnga hi'n koipeuh peuh hileh, taihsat dia kilawm lou lawmte om na zenpi anuam zaw muh chianga lawmte peuh taisan zialzial chih bangte mi chitak leh ginom te hih diing hilou hi. Hinkhua a thilzuih(life principle) deuh bang le neih diinga ahi a, ahaksa zong ihinna zuau hiloua, ataktak ahihman in pang teitei ding ahi. Hinna tuh tomchik sunga diinga thilpiak ahi. Kipahna bang leng kipiak siam diing ahi. Hinna toh kimawl mai mai kihilou ahihna ah etlawm theipen leh diktatna toh nang leh ken ihinna i zat diing ahi. Banah Jesu Kris sinsakna pan i pial louh diing ahi. Mihih buai thei, lungsimnatna pethei ihivek ua, ipau, nasepna ah, gamtat-khohei midangte adiing khualsiam di ahi.

Naupangte mawkbawl louhding ahi. Akipahna uh thil thupi lou chikchik ahihman in polhdan siam diing ahi a. Naupangte kiang ah thil khat peuhpeuh athupidante gen le'ng i thunun na nuai a om ahih in tuh hon ngaikhe diing hi. Naupang lai a sinsakna mu leh mulou akikhai! Ahi zongin, Mihing bel a ching, ahoihbukim kuamah ana omlou hizel hi. Ichitlouhnate leh sualna te manga ki sek chiat diing ihaih louh thil hoih ahi.

Gumtu diingbei naupangte itt mahmah ding ahi. Anu apa- leh inkuan khosakna ah mi i en kei ding, abiik in naupangte, -hinna ei a bang bang aneisam uhi. Natna i guanbeh kei diinga, ipanpih theina bang a om hiam i en diing.

Naupang lungsim siangthou leh chiimtak nei ahia, i tawsawn zaw diing ahi. Naupang leh naupang kal ah gamgi ikhun louh ding ahi.

Huchin ah sunnung in Naupangte adiing Hunsehtuam kinei hi. Hiai hun ah kidemna kitaitehna tuamtuam -thu-le ah kinei hi.

Lungsim ah bang hiai laa amangmawh zezen hi.

HOSANNA TOUPA HOSANNA.

KOU NAUPANG NEU LEH HATLOUTE

NA KHEBUL LAM AH

HON SINSAK IN;

NA LAMPI ZUIH HON SINSAKIN

EITE KRISTIAN NAUPANG HIHANG;

SIANGTHOUNA A KIVAN DIINGTE

TANGHOU LEH NGA PUA NAUPANG BANGIN

IPUAKTE HAWM DI'N PIA KHIA NI.

Ka mangngilh theihlouh leh mitkha a hong langzel khat kahon gelh diing Palm Sunday nikhat ahia, lampi zui in- "ahongtung diing I pa David gam ahampha, Tungnung pen ah Hosanna" chia, sousang taka, kikou zua zua laiin, mipite / naupangte nung ah, koi a hong kipana, banghun a honna zuipan hiam chih theihlouh, thilmak leh ngeina dan loutak ahong tung hi. Chingkam le chitak takin in SAKOL NOU in honna zui chitchit hi. Api toh leng ahikeia, amah kia ahi, ka muh in tuh lamdang kasa chih kan gendi dan dang omlou. Pathian thilhih theihna mah hi diingin ka koih mai ahi. Huai in Lampi zuihna(procession) bang nuam tuamsak mahmah hi.

Hiainite khawng ka ngaihtuah thak chiangin zanzek himahleh, agam la huai huaia; huailai chih ding hong hita. Ahun in pai peelta in, anikhate hun kivei in hon paitung pih nawn keimah leh-huailai nite lungsim ah ahong thaktheizel hi. Ahunte beisa himahleh lungsim ah bei theilou, lah sapkik theih hituan lou. Hunlui hita!

...........b.......e......i..........t...........a.............

March 22, Friday at 8:02pm 

@Siamsinna leh Vakiangbu