ANA HI MAIMAH

By ~Sang Quptong

December 21st hi’n ka thei a, Bangalore a ka innluahna room sung ah keikia in ka om hi. Nitak dak 8:45, IST(Indian Standard Time) hong hih tak in, inn lam(Zogam) a ka tuun-le-zuate, E-mail in, ‘Zingchiang in ZOGAM AIRLINE ah hong pai dek ka hi a, nitaklam dak.1:00, ZST(Zogam Standard Time) in ‘LEENNUAM AIRPORT’, Khominthang­, New Lamka ah hon na dawn un aw” chih teng ka khak hi. Kei le Zogam kum 30 val ka muhlouh nung a mukha di chi a kilawp lua ka hi dia, antang ka neih teng bang ka huanbei kha keuhkeuh hi (kik nawnlou dia kikoih ka hi diam a). Om didan le theilou in ka phaphet kei; Zogam ngailua ka hi diam ah. Ka phone a gam ngaihla omte zalkhuntung a ka zaal kawm in ka ngai a, Zogam melpuak di dan khawng, Internet leh Facebook tungtawn a mi gente apan in ka suangtuah nilouhta hi.

Zinglam dak 9:00 lak hiam hi’n ka thei a, ka inn luahna kong a Taxi khat man/la (hire) in Airport lam ka zuan pah vengveng a, Airport sung ka lut in ‘ZOGAM AIRLINE’ kichi khat ka galmuh pah a, a etlawm khop mai..! A pang (Side) te bang ngial, ZOMI puan gial dandan in agial bilbial hi. Kei leng ‘Security Check’ bangkim ka zoh in lenna sung ah ka lut a, Zomi nungak Duangching mahmah bangzah hiam in, eipau siang sitset in hon na ‘welcome’ uhi.

ZOGAM AIRLINE a tuang chu….anuam khopmai, kineitu sak deuh in ka om a, Talpakte(Meitei) mi 2 hiam hong tuangte bang ka tung et veu-vau zozen hi. Lenna sung a Magazine kumlui mahmah (ZingDaitui,La­mka Chronicel,Tongluang)­ khawng sim di tam mahmah mai a, Zolianu khat in, ‘The Lamka Post’ (Pek 6 vel a sah) le hon pia a, sim nop ka sa thei mahmah hi. Nek di lam ahihleh chu; Singkawlkai, Kawlkai, ­Buhman sangh (huan minsa ngen) cihte ut-ut nektheih ahi mai.

Nitaklam dak 1:00 geih a ging in Lenna apan ka kum hi. Zogam leitang kum 30 nung a ka siik nawn patna ahi a, ka hi huaihuai zozen hi. Hawkdak luat man hilou, Zogam thupi ka sak luat ziak in ka dakdak mai ve ! Apoisekei ! Zohuih khisiang chih di om nawnkei mahleh; ahi di mah in ka koih suk mai (Khantouhna tuamtuam te ziak a huihsiang tawm deuhdeuh hiven) .

Ka Pa leh ka nau in hon na dawn ua, chibai kibuk in pai di’n kong kisata uhi. Ka pa kiang ah, ‘College Road tawn a Auto Service te ah tuang le hilou maw ?’ ka chih leh ‘Auto Service om nawnlou ahi, Taxi Service……’ a chih laitak in, Taxi khat hong tai a, huai in ka tuangta uhi.

Taxi window apan ka dakdak mai a, P.T Sports Complex khawng a thupi khop mai. A pam, sim(South) lampang ah, ‘DUMBEEL STADIUM, Sports Authority of Zogam’ chih ka mu a, ka nau in, ” Hiai Stadium Dumbeel dan a bawl ahi a, huaiziak a ‘DUMBEEL STADIUM’ kichi ahi ” hon chi hi.

College Road tawn a taitou ka hi ua, Ngulthawng Bazar lak a thupi mahmah mai. ‘CITY WORKSHOP’ kichi bang, St.Peter School gei ah, Gari sawpna om a, Akhang ah ZIA (Zogam Intelligence Agency) te Office building Sawng 5 a sang ana ding velvol hi. ZIA office pam lam ah, ‘LENGTONGHOIH FAST FOOD HOTEL’ chih kitaak ka galmuh chiai-chiai hi.

Inn ka tung un ka phone ana om takei a, Taxi a ka tuanna ua tolhkhia hi di’n ka gingta hi. Ka nau in, “Lungkham a ngai kei, khang kidangta ahi, Europe gamte bang a van i sukmang leh kimukik teitei ahi” hon chih zoh in, den a ka Taxi laak uh, Driver pa’n ka Phone hong pe chet petmah hi.

“Tunitak Electric hong vak diam? ” ka chih leh, ka nau in ‘Prepaid System kizangta ahi’ hon chi a, lamdangsakna ngen in ka pumdim hi. Kisilsiang zou in Mehlei ding in ka nau toh ka va pawt ua, Footh Path te a mehzuak muh di a om nawn kei hi. Nehru Marg Junction, Tipaimukh Road Junction, Dorcas Hall Junction, Tedim Road tung ah mipite’n lampi a kaanna ding un, ‘Over Bridge’ om vek hi.

Sazuakna leh Kizuakna innte khawng le Khopi nawl lam ah kisuanta ahihdan ka nau in hon hilh hi. Siik zuakna, Sing zuakna, electric van zuakna chihte a bawngbawng in om tiltel uhi. Suangdoh a kipan Apple khawng a tam mahmah a, Kaihlam Allu bang leng tam mahmah mai hi. Huaite abanban a ka leitouh lai un ‘Lamka khopi etlawm hina maizen e’ ka lungsim in ka chichi mai ta hi. ‘TUIBUK FACTORY’ kichi Khuga Dam lam a om ahihdan ka nau in hon hilh behlap hi.

Nidang a Lamka Public Ground pen ahih leh, ‘KHUPCHING LEH NGAMBAWM PARK’ chi a minvoh in om a, naupang kimawlna tuamtuam leng om in, Singkung liimnuai a tuttut na di leng om zomah a, etlawm mahmah hi. Park dang khat ahih leh Mission Compound lam ah om a, ‘RAJA GOUKHOTHANG MEMORIAL PARK’ chih kiminvoh dan ahi.

Taxi leh Bus Stand leng mun khenkhat ah om a, Traffic Police te hoihtak in duty uhi. Two Wheeler a tuang te, ‘Helmet’ khulou ka mu kei. Police Station gei ah Underground Subway om a, Lanva lei gei ah suakkhia hi. Nidang a New Bazar a Bus Parking pen Two wheeler te park na di’n kizang a, Parking Fee leng om hi. Fly Over bang leng Tuibuang-Mata ah kizan henhawn mai dan ahi.

Meh lei a pawt, khomial tanpha in le inn ka tungkik kei ua, muhnop haulua ka hihman in ka dakdak nalam ah, Gari in hon phukha dek a, a horn hon mekkhum leh ka kiguih a, Ka khanloh leh ka zalmang ANA HI MAIMAH. Keileng kindeuh a thoukhia in ka puante Sazu kimawlpih batlouh di’n bichiing ah ka khaisang a, ka kihahsiang zoh in Airport lam ka zuan pah vengveng ta hi.@

—Kakipak—

©Siamsinna leh Vakiangbu