ITNA KHENLAM AH SIHNA

By ~ Chin K Vualnam Paite

KHOVEL a Mihing piangkhe taphot,’ITNA’ neilou om di’n a gintak huai kei hi. Ganhingte nasan in ITNA nei uh ahihleh mihingte ki-itna nak thupi in chia. Akpi haang i chihte khawng bang leng,a noute a itziak uh hi maimah hi. Tuabang mah in, ganhing dangte’n leng itna aneih ziak un hangsanna hon suah khezel uhi.Tutung a i gennop pen ahihleh, Mihing leh Mihing kikal a ki-itna ahi a, Mihing leh a Gou leh gam kikal thute genkhak sawmlou i hi. Mihingpe’n Siamtu Pathian in, akibang om hetlou, mittang leh khutpi mai nasan kibanglou vek(Bio-metric Census na kilak leh nathei chiang zaw d) dia hon bawlte i hihman un, kimanphalua ahihman in, Mihing itna lam gensawm i hi zaw chih simtu deihtoh takte’n thei masa le deihhuai mahmah hi.

Mihingte leh Gam leitang koi a manpha zaw dia ? A dawnna dik tuh, ‘Mihingte manpha zaw ding’ chih ahi mai hi. A chih leh, bangziak a mihingte manpha zaw a,Gam leh leitang humbit dia Sepaih,leitung pumpi a hichi tam lawmlawm ahi d? Khenkhat in, amite leng a itziak uh ahi i chi maithei, himahleh, Gam­ i itna uh thupi zaw hi’n muhtheih hi. Manipur maimai bang leng, I gam uh neuchik Nagaland a, alut ding deihlou a sih tanpha a pangngamte mihingte mah i hi uhi. Hinna hia poimoh? Gam leitang?

I gen utpen hiai ahi kei lai. Mi khenkhat in,’Back to the Bible’ a chih sek dan un, Bible sungthu lam ah ennawn tale hang, Jesu leitung a hong pailai in, banghih di’n hong pai ale? Kuate a it ziak ? Mihingte maw? Ahihkei leh Gam leitang? A dawnna i thei chiat mai ding; theihsa dan in koih phot ta le. Jesu mahmah in leng mihingte ngaih poimoh pen a nei ahihman in, khovel thilsiamte lakkak a manpha pen i hi uh chih a chiang mahmah hi. Pathian in mihing masa Adam a bawl a, huai zoh in, Adam nakguh apan in Evi hon bawlkhe nawn hi. Bang di a EVI a bawl sese ahi diam? Mihingte’n suan leh pakte nei a, leitung luahdim dia hon deih ziak ahi chih misiamte gen apan i theih ahi. Huchi hileh, mihingte chu Pasal amah vuak a om hiam, ahihkeileh numei amah vuak a om adeihlam ahi kei a, mahni vuak in om leng gam i luahdim ngeikei ding uh chih thudik omsa ahi.Tua numei leh pasal Suan leh pak neitheihna ding a poimoh masa ahih leh ‘Kitenna’ ahi. Kitenna i chih chiang in, chi tuamtuam a omzel a, himahleh kitenna chi tuamtuam te koi dikpen ding hiam chihte suisawm ihi zenzen kei. Himahleh, kitenna­ pen amasa a i koih ding uh ahihdan i gen nopna ahi. Kitenna i chih, Itna om masalou in a guitung kei ding hi.

Abul tung in, mihingte’n itna nei uh i chi a, huaiziak in, mimal in itna nei ahih leh, Ta-te’n Azi/Pasal ding uh a zonna uh leh a itna uah,Nu-le-pate’n thu i va nei kha thei di uam? Ta-te’ deihtelna zahtaksak poimoh hilou hiam ? Itna tuamtuam nih a kisuk khak hunhun chu buaina leh sihna tanpha atung ding chih theihsa ahi. Gam leh gam kidou ziak leng Itna nih(amau gam tuak a itna uh) a kisukkhak ziak ahi. Mihingte leng tate it toh nu/pate’n itsak a sawmte uh hong kisuk khak chiang in, Sihna tanpha tun lohthei ana hi ahi. Tuaziak in, itna mawkbawl kei ni in, mimal itna kizahtak tuah chiat theile Pathian thu awilouhna ahi tel dia hia ? Paunak in,’Siik a satlai in sek lechin, na deih dandan in na sekthei ding’ ana chih mahbang in, Tate leng itna lam a i thuneihkhum nuam leh, itna piching a neihma uapen hoihtak a etkai touh i sawm di uh ahi. A letnung ua bel sia leh pha thei ahi ua, a itpen uh sihpih ngam khop a itna neita ahihman un, amau sia leh pha theihna zat siam sak poimoh mahmah zel hi. Pasal neisa(numei te) khawng va kaihkik chih, haivai leh mawl huailua hilou hiam ? Siik a satlai a nasek peihkei leh, ahi hi in omsak mai lechin na thadam zaw kei dia hia ? Christian i kichih ngal leh, kitengsa zaw thagum thatang in kikaikhen kei theileng bang a chi dia? Itna khenlam ah Sihna in hon na vaidawnthei ahihman in. Pathian in leng, sihtanpha a kiteng ahi adeih. Itna zaw pawlam a kipan hilou in, sunglam a kipan ahi zaw. Huaiziak in, Nu-le-pate’n tate mihuasa pipi toh kitensak lunggulh man in, tate itna bohsiatsak nawnkei in, Zahtaksak mahmah leng chidam huai mahmah ding hi.

 –Kakipak–

©Siamsinna leh Vakiangbu