KINOH LOKHA ZUMHUAI THAK ZOZEN

By~Leon Guite

(Chiamnuih phuahtawm) 

Ka khua uh khota himahleh inn 300 vel ka pha ua, zoudawn a di’n bel khokip mahmah khat ka suak uhi. Kihulum thei mahmah mai a, nungak-tangval zong tam in programme tuamtuam khawng a kizat chiang bang in nuam diak se hi. Ka khua uh gamlak toh kizom ahihman in gamsate’n nitak chiang in huangvulh gantate, akte bang hong tuah khethei zel uhi. Sihal, Ngia leh a khenchiang in Ngal peuh khosung ah a hong lut hun om thei zelzel hi. Nikum in zong ka innsak pa un Ngalkhaat tuk 5 vel ding khawng aman hi. Awle, nikum August kha in ka khua un MEET thupitak ka nei ua, nuam ka sathei mahmah uhi. Kou inn bel veng tawp lam ah om ahi a, kou inn paam gamla lou ah community hall om in tua ah, meet ka zang uhi. Meet pen August 26 a kipan ding chih ahi a, 25 nitak in nungak-tangval te’n laa leh laam tuamtuam zil in zan sawtpi hak uhi. Kei bel lami ka hihvak louh man in ka va teltei se kei hi. A ziak bel alunglut teng va subuai kha lel ding ka hihman in.

Ka tonsil operation ziak in ka aw pen hong flat mawk ahihman in laa lampang ka khawlsan mai a ngai hi. Ka lupkhit vek nung uh, dak 11 lak vel ding in thawmging khat in a hon phawng a, hoihtak a ka ngaihkhiak aleh ak gawl chiak ngoingoi hin ka thei hi. Gamsate’n ka ak uh hong mat sawm a hong luh uh hidia gingta in kintak in ka thou a ka kiang a puan ka mat khak masak pen la in ka teng a, ka pa phawng zok in innkong lam ka delh pawt hi. Sangak in ka ak uh hong lak sawm ana hi a, ken leng singkhuah khat manzok in tua sangak ka akpi tuilai uh a kam a pet kawm a tai pen mat sawm in ka delh hi. Kholai lam zuan a sangak pen tai ahìhman in a nung ah taw a meikhu pawt zen in ka delh vengveng hi.

Huchihlaitak in, nungak-tangval lazilte tawp hun toh kituak ahihman in lampi ah ka kituak kha ua, a hon mupeuh in lamdangsa in kamka heuhou zen in hon na en uhi. Fullmoon nitak ahihman in kha bang vak pha diak a, mite bang kihoih muh thei mahmah hi. Tangval hon mukhate bang in akhuttal ua hon kawk in nakpitak in ahon nuihsan ek-ek ua, numei ahon mukhate’n bel a mai uh ana huum pah zatzat zel uhi. Ken bel ka sangak delh pen awlmohlua ka hihman in a hon nuihsanna ziak uh dongman sese lou in ka tailiamsan zel a, lamdang satak a ahon etna ziak pen uh theiselou in zansawt nung a kholai dung ah puanten chauh toh ka tai ek ziak hi ding a koih in ka target pen delh in ka tai chenchen hi.

Huchia ka tai chenchen laitak in banghiam theihkhiak guih khat nei hileng kilawm in a nuailam ka ensuk kha zenzen hi. Kare…! Hiai eive maw hon mukha teng in hon nuihsak ek-ek ua, a khente’n amai uh ana huum uh. Maban sawn ngam huaita lou, kik nawn ding lah ngamhuai tuanlou, lakloh tak in ka ding liailuai maimah hi. Kinoh luat le zaw ka chi vungvung phet hi.

Kare…! Zumhuai na mahmah e. Ka koppih chauh in amuh dia ka na sitching pen tua miteng muh dia veiphei lalauh ka na hi maw? Ka nuih lah za, ka zumtha lah suak. Vuaktang a ana tai ngelngol ka na himaimah hi. Aw sengualte aw, bangchi’n na sakmel uh ka en ngamta dia?

Huchia zum kisa tak a ka omlai in ka pa leh mibangzah hiam ahong tungphei uhi. Gen ding a vangtel mai. Ka pa’n puan ahon teng phei a, ka et leh kei puanten pen ana himawk hi. Ka pa kiah, “na puanten ” ka chi man hamham a, aman “lampi ah ka hon muh hi” ahon chih khum zawmah lai hi. Ka pa’n le ka thawm a zak tak a kinoh lua in bangmah ngaihtuah manlou a a night dress toh hong taikhe mawk ana hi hi. Kei a hon muhtak in nuih in ahon nuihsan a, gen ding mel theilou in ka zum luat man in ka pa’ puanten bang ka va suh sawm nilouh hi. (huai hunlai bel 1980′s lai vel ahihman in Zodawn lam ah undalpen teng a om nai vak kei hi.)

Ka pa puanten lah suhsak zou lou ka hihman in ka paisuan ngam nawnkei a, ka om na mun ah ka tu den mai hi. A tawp in ka pa’n ka omna kiang ua inn khat ah a puan uh ava ngen a, huai teeng in ka pata un nui viaivuai kawm in sangak delh ngam nawnlou in kisuanglah kawmtak in ka inn uh ka zuan nawn uhi. Kei bel kha nih sung mawngmawng kholak pawt ngamlou in inn ah ka kikhum den top hi.

Ka inn uh toh kigamla vak lou khat ah ka lawmpate a teng uhi. Ka lawmpa ahih leh mi ommoh mahmah khat ahi a, mun khat ah om maimai theilou leh phe velvul khat ahi hi. Mi engbawl chih khawng a ut lampang tak ahi a, numeite bang in athuaklah thei mahmah uhi.

Zingkal khat apa toh kholai ah ahong kidelh phei ua, amah apa’n anung ah kikou kawm in “kua tapa vaklah na hi a? Ana khawl oh, kon vaw ek-ek di.” chi’n singkhuah tawi in a hon delh tou vonvon hi. A tawp in apa’n aman kha khong a, a et tak in a tapa ana hi a, atheihchet tak in, “eh! Nang nana hi maw? Pai oh inn ah paini.” chi’n kingawng kawi in akiton suk halhal nawn uhi. A khonung a i theihthak leh, ka lawmpa’n apa dailenglai chiangkang a ataw va dawt sak in, apa’n midang di sa a hehlua a singkhuah toh vuak sawm a delh ana hi maimah hi. Inn ah zaw bangmah kiloh lou sam uh hihtuak.

Ka lawmte mah khat tuai mahmah lah kipaa sak mahmah khat om hive aw. A huchih ziak mah a tangval dangte’n engbawl ut se uh. Nitak khat kholai ah kiton kawm a ka pailai tak un suang neu khat in a nunglam ahon dengkha hi. Aman le “oi, lawmlawm mai a hon deng toih uh ka chi, a ki-awi lua uh.” chi kawm in kipaa sak deuh mai in nunglam nga kawm in, “OI…! KUA A HON DENG KON VO DE” a chih leh tangval lian sim henhawn khat in gum deuh a, “KEI KA HI.” ahon chih touh gugu leh, ka lawm tuai unle ngam sam lou hinteh, “Oi… Ka na doh taih mai.” chia dawng in kei a kiang a paipen hon sikphei tuntun mai. “Oi… Kei nu ka zumlua sehsuh.” bang chikha zawzen. A hon sikna pawn le tutan ka ban ah muhtheih in omzou lai hi.

Ka lawmte uh khat in ka khote uh nungak khat hon deih thahah hiveh aw. Lawmte’ kiang ah hon gensak un amah lou in ka om zou mahmah kei chi ngutngut mai. Kou lah engbawl in genpih utlou dandan a ka om uh leh ngailua zaw ahisam dia, hong men phemphom maimah hi.

A hong khasiat luat tak in kou lawm teng le kisuanglah thak in gensak ding ka hihdan uh ka hilh uh leh, a kaplai bang hong nui vevu in trape sweet khat chiat a hon khilai hi. Kou leng kipaklua in hiaibang a hon deihsak a trape sweet bang hon leisak na hih hial leh chi’n nitak mahmah a genpat ding in ka kithukimta uhi. Huchi’n plan ka hon bawl ua, lawmpa Thangpu’n a inn ua pan a va sapkhiak ding. Ken a innsak ua sekkung nuai ah ana ngak ding in huaimun ah lawmpa a dia gensak ding. Lawm dang teng in a kiim ah kibu kawm a a hon na ngak ding uh, ka try sak zoh a leh, lawmpa Muanpu’n ka lawmpa uh(nungak ngaipen, amin zaw genkhe hial dah maini uh) a va sap ding; guk ngal di chih dan ahi. Ka try sak zoh kei lelah zoh mateng a inn uah paisak louh ding chih ahi hi.

Huchi’n hun hong paizel in nitak a hong hita a, khua ahong mialtak in kou leng ka panmun ding chiat uh zuan in ka hong kipan kheta uhi. Ka panmun chiat uah panmun ka khohkhit vek nung un, lawm Thangpu’n ka nungak try ding nu pen uh ahon pawtpihta hi. Bangchi genpat ding ka hi dia aw ? Chih ngaihtuah kawm in ka dak vengvang a, ka chi bang ling in ka nervous simmawk hi. A tawp in bang a pasal ei a di lah hizen lou a gen suk muatmuat maikei dia chi’n ka hangsan deuh na di’n Kom kuva sunu tam deuh in ka hai nuaunuau hi. Ka kuva hai ka khamsim petmah a, zumna neuchik a bei deuh vanglak hi.

Huchi’n lawmnu leng ahong tungpheita a, ka kiang ah “U Lian bang di maw na hon sam zenzen a ?” a hon chi a, huaitak in ken leng, ” i maw huai i neulai pek uh, luidung khawng a kisil di khawng a i kuanlai uh na thei hia? ” ka chipah hi. Aman leng “thei e” ahon chi a, ken leng sunzom zel in huai hunlai pek a pan lawmpa ***** in amah ana ngai a pawl khat apan pawl giat dong tan a le kap kawmkawm a gensak ding a hon ngen ngutngut mai sek ahihdan leh hehpihhuai lua ahihdan ka hilhchian sipsip hi. Huchia nounel tak a neulai apan pantou ka hihman in pawl giat tan ka tun in bel zansawt mahmah nuamta hi. Aman leng, “huchizen ahihleh zaw theikei nang e… Lah a hehpihhuai lawtel zel a maw…” ahon chi hi. Tua tak in ken leng thumu kisa lua in ka lawmpa amah ngai a zan le ihmu theilou, a sungbang phiahden ahihdan leh nguailua a zukham pengnawng mah bang gige ahihdan ka gen leh lawmnu’n bang chi zak khak ahi diam ah nuih petmah in a hong nui mawk hi. Amah ahong nuihtak in ka om na singkung tung uah lawmpa hehpetmah in ahong hangsuk ek-ek a, ka kiang ah, “nangpa maw zukham pengnawng mah bang na hon chih vial nathei di aw, na thuak di aw…” a hon chih khum motmot tamai hi. Singkung ah ka thugente uh thei ut a ana tuang gu ek ana hi phiangsan hi. Lawmpa ahong haang suk ek-ek tak in lawmnu a nuihza deuhdeuh in nak zawsem in a hong nui a, a veih a hon teh zawmah hi.

Lawmnu veih gin’ ngaihlua ahihman in singkung tuangpa le anuih hong zalua in khut beng kawm a ahong nuih ek leh alet ding lenkha nawnlou in a hong kesuk a, leilak ah a hong tusuk duup zawzen hi. Lawmnu le zaktalua in a inn uah a tailut vengveng a, kou a lawmte teng in ka lawmpa uh naa sa a thum huthut pen innlam ah gan zawng in ka zawng phei uhi. Ka lawmpa kinoh luat ziak in nungak nu’n veih teh kha a, kisuanglah lua in ka thiltup uh zouman lou in a hon taisan a, lawmpa a kinoh luat ziak mah in a deihpen a chaan loh hithet hi.

~Beita~

©Siamsinna leh Vakiangbu