KARE! MAIZEN !
By ~ Sang Quptong
Kiginna nitaklam Dk.7:30 ZST(Zogam Standard Time) ding vel in, Maiteh
tui-al hawp zou,’Koi a pawt di ahi dia o?’ chi kawm in,lupna ah kava
lumkha thepthup hi.Ka lupkawm in,Bangalore Zomi te sak ‘Kiginna zan
muikhua hong zing,dak 8 ging ding kuan…..” chih la kon ngaikawm bang
zaw,kituak mahmah sam ve aw..!
Kisa phot himhim leng chi’n,
ZogamOnline te T-Shirt bawlthak, san sihseh kon silh a, limlang ah kong
ki-en a, ka mel diktak a dawk chiang khop mai. Hoih deuh khak leh chi’n
Ka nau ‘Fair & Lovely’ kong kinuh a,himahleh,fuhlou deuhdeuh hi’n ka
kithei hi.”Mibang a, mit, bil leh kam khawng neisam hi’ng a, pangkhawm
siam deuh le uh zaw” ka chi vungvung hi. Sih leh sih, Dam leh dam chi’n
sungte theihlouh in kong pawtkhe khialkhial ta hi.
Ka nungaknu ka call a, kong hoh di ka
chih leh,”Kuva hon puak in o Usang ?” hon chitamai chu,”Awle Ching,kon
puak di” ka chi pah zat hi. Sum lah tawi khalou ka hihman in, bat theih
dankhat om hiam chi’n ”KIMBOI VARIETY STORE” kichi ah ka va lut tei a,
kava biaksiam ziak in, abat in ka va lathei hamham hi.
Kei leng,Dawr kong a tupawt in,
nungak hong pai te khawng ‘faifuk’ ka na mutkhum hauhau a, akhente zum
in tai zozen ua, akhente lah hope hon pia hile uh kilawm hi. Kei leng,
‘UNITY STORE’ a top-up thun di chi a paiphei dia ka kisak leh Ka malam
ah Nungak khat hong kisawi phei ngiahngiah khat ka galmuh a, ken le mit
phelou zen in ka na en a, ka hoih etluat ziak in ‘Slow Motion’ a hong
pai bang in ka mu hial hi.Ka omna dawr kong ah hong khawl petmah
a,’PARAS’ hong lei thepthup hi.’Paras ne di’n na pammaih tel mai’ ka na
chi numnum sam hi. Kei banglou tak in, amit, amuk, abil te a pangkhwm
siam khopmai uh.Vai ‘Mistry’ siam taktakte’n siamneltak a abawl uh hileh
kilawm phial hi’n ka mu hi. A sam lah chu, amah toh kituak hun chet a
sau, a awm bawk ahih leh fit chet, etlahhuai huntawk, PUCCA himai.
Ka nungak muhnu hoihdan gen siam thu a
genzoh vual di ahi kei. Zogam ah hichi tuk a hoih nungak ka mu kha
naikei. Sapte’n bel, hiainu bangbang a nungak melhoih aneih ziak uh ahi
dia,”God must have spent a little more time on you….” chihla ana phuah
hial uh.Hollywood leh Bollywood hi’n Maniwood te toh teh theih di vual
ahi kei. Reject na d himhim a omkei. EK le neikei leh kilawm hial hi.Ka
nap noupi dimkhat nadawn gaih leh kon ngai di hon chileh chu,’NOUpi Dim 5
le poilou’ chinuam phial di khop a hoihsaman ka na hi phiangsan hi.
Huih hong nung cheuh a, a Perfume gim k’on namkha bang zaw,ka dam huai
zozen hi.
Hiai Zolianu ziak ahi ngei dia,Phamsa
Thanboi Mangte in,”Oho! Nang na-na hi maw…?’ chihla ana oih ngiahngiah,
chin huaila bang ka lungsim ah honglang dundun hi.Houpih ka ut sim a,
amin lah theilou, amel lah mungeilou ka hih cia, buaitak a ka omsung in
hon paikhiat santa hi.Pasal khat kihisam a,chi’n ka nungzuih a ”Ehem !
Ehem !..” ka chih leh,hong kinung hei a, kei le khawl kha chot zozen in
ka om geigui hi. Heh hia, kipak hia chih ka thei kei,hon naihphei a, Hon
kiss dek hia leh chihpeuh ka na ngaihtuah thepthup a ka na guk buai
mahmah hi. Ka na nui seisai a, himahleh amah anui hetkei, ka diip bang a
kisai dutdut zozen a, Cartoon a te bang hileh,ka lungtang lengpawt
phial ta di ahi. Ka king ah hong ding a ”Bang e tua na gen, Bangdia hon
thoh, numei maimai hon sa maw ? Non maingal khial khade aw ? Limlangh
neilou u maw ? Nang bang in melse leng, inn ah ka omdia ka kapkap ke.
Koi Zoo a hong kipan na hia ?” hon chi toihtoih tamai chu ….HEATER
bangmai in ka san pempuam hial a, Vuahthuak bangmai in ka kho-ul in ka
kawtgawp phial hi. Ka thoh ma ka ngai khop mai…!!.
Kei leng dau omlou chi in, Mood off
tak a ka nungaknute innlam ka zot phel daldal leh ka phone hong ging
a,Ringtone dia ka zat,’Every Rose has its thorn..” chihla hong pai
hauhhauh hi. Ken lah ala bang ana sakpih kha thepthup in,Den a ka nungak
muhnu,Rose bang in hoih lele kei adia aling ahi kha dia o chih khawng
ka ban ngaihtuah kha a, ka phone pick-up di lam bang ka mangngilh kha
zozen hi. Ka Phone kon et leh Ka Boss pa ana hi a, ka pick-up toh kiton
in,”Nang mihing koi a pawtpawt e? Nasep di hichi zah lai a kholak vak
gige. Na mel siat leh la bek siamve, Inn ah omle chin lah nek di
zongpah, nitak lah kongkalh a pang gige.Hichi bang a na om gige di leh
innkhuam toh hon henbelh ta di ka hi. Zi bang deih zomah lai di chin a,
kuan le nang hon deih di adiam a. Thadah melsia.!! Nang kon vak sang in,
Australia Vok Chilnei 1 vaak zaw leng meet zaw inteh” chi in kidaam
hetlou in hon genkhum ziahziah hi.
Denlam a ka nungak thoh nu’n hon
kouna teng le deihkhop lua hi’ng a maw..! Maizen!!.Kikhailup a Burma a
pem di hi chih khawng ka ngaihtuah hi. Huchih laitak in, ka mitkha a ka
nungaknu hong kilang a,mi tamtakte’n melsia hon sak lai ua aman hon
kitengpih nuam hi zomah ka chih chiang in ka kipak lawzel hi. Ka
nungaknute inn kongtu’n tak in, mi tamsim KETLI toh lut ka mu a,ka lwmpa
phone a ka dot leh, zuput dek om ahihdan uh hon gen bang zaw….!! Ka BP a
leng khedek zozen abang hi. ”Ka Gingta theikei” chi a ka kikou khiat
leh, ka nu’n hon sam a, Kong halhkhiat tak in KA MANG ANA HI MAIMAH HI.
KARE! MAIZEN ! chi vungvung kawm a kihahsiang in, ann ka ne mengmeng a, College kai di’n ka kuan pah vengveng hi.
—Ka kipak—
©Siamsinna leh Vakiangbu
Comments
Post a Comment