OPERATION BLACK PANTHER II : THE GREAT BANK ROBBERY
By ~ Leon Guite
Kiginni khat Lengtonghoih jewellery
Store, Ngalngam Street, Lamka khopi apan ka toih nu’n ahon phone a, “U
koipen a hoih dia?” chi’n zungbuh hoih taktak te a video camera in a hon
la phei dandan hi. Video call zang a kihou ka hi ua, Ken eng ka fon
apan in a limlakte ka na en zel a, tamlua leh hoih theilua ahihman in
tel ding pen theilou in sawt khoptak a vel hi. Hiai hoih ka sa a chih
chiang in adang hoih asak zawk a mu zel a sawt khop tak a tel dingpen
theilou in kei bang a hon dong tuantuan zozen hi.
Lengtonghoih jewellery store ahih leh
innsawng liantak leh sangtak mai, “The Salpha Tower” kichi nidanglai a
zaleenna sual a, gam-le-nam a ding a hinna ana piate’ theih gige na ding
a kibawl pen ground floor ah om ahi a, first floor pen Zogam Reserve
Bank, Lamka branch in aluah hi. Asawngtung lamte ah office tuamtuam,
agency tuamtuam leh . NGO tuamtuamte’n a luah uhi.
Lawmnu toh kalnawn sepnawnni a kiten sawm
ka hi ua, huai ding a zungbuh leh van poimoh tuamtuam lei ding a ka
itpen Vungnou bazaar va kai ana hi hi. Huchia ka kihou laitak un thil
puak ging ngaihtak ka za a, ka bil nat petmah in a hong na hi. Ka itpen
ka houpih sawm hang in ka houpih thei nawnkei hi. Ka mangbang mahmah mai
a, om kinken thei nawnlou in kintak a gari lakhia in ka itpen omna lam
ka delh vengveng hi. Amun ka tun in bomb puak ahih dan ka theipah mai a,
a kiim a gari omte asia atam mahmah hi. Dawr sung ah ka lut dek leh
police te’n hon na khamtang ua, ken leng ka ID ka lak a, huchi’n asung
ah ka lut hi. Ka muh masakpen in ka mit ah khitui nulsenglouh a hon
pawtkhesak a, thangpaihna leh phuba lak utna in ka dim hi. Ka itpen
sawtlou nung a ka ji, ka koppih, anuam ahaksa ka tuahpih ding a ka tel
ka itpen Vungnou suallai ah panpihtu bei in ana lum dildel hi. Amai teng
ah sisan adim a, houpih theihlouh in alum bimbem hi. Ka va kawi a,
ngaih taktak in kap kawm in amin ka sam a, himahleh hon dawng ding akam
khatvei mah leng a ka kei, hon melh ding in amit natawm ahak nawn kei
hi. Ka it petmah a, bangziak a va zui khamai lou ka hia? Chi’n
kimohsakna’n ka dim hi. Police khat in awl a ka liang hong khoih in ana
kihemkhe ding in hon ngen a, huchi’n ka itpen Vungnou luang post mortem
bawl ding in a pawkhe ta uhi. Hiai bang mulkimhuai ah mi 52 si in za
tampi in liamna tuak uhi.
Ken leng damdawi inn tan ah ka va zui a,
amun ah anu-le-pate’ toh ka va kimukhawm ua, gen ding avang tel mai.
Anu’n hong ngawngkawi in a hon kah khum ek-ek hi. Post mortem leh atung a
hihding bangkim ka zoh vek nung un ka it mahmah Vungnou luang ittak leh
khelah tak in ka vui liamta uhi.
A zing in newspaper ah Zogam Reserve Bank
luh a om ahihdan le sum crore tamtak lakmang a om ahihdan a hong
kisuahkhe dom mai hi. Miteng in lamdang a kisa mahmah mai a, bangchidan a
vengtu hoihtak leh khauhtak nuai a venbit a om hiai bank luh khiak a om
ahia chih miteng kihoulimna pipen asuak hi. A case pen police in la in
suizui a, kou ZIA te’n sui ding in ngen mahle ung amau akimuan thou ziak
un ahon pekhe nuam kei uhi.
Hunte hong paizel in mun tuamtuam ah
buaina neuhneuh a hong ompan hiaihiai a, police te thilsui lah maban
sawn tuan lou in asui mong deuhdeuh zomah ua, atawp in ZIA in aguk in
pan ka hon la ta uhi. Ka muhsuah dan un ZRB(Zogam Reserve Bank) a sum
gukhe tute kikhen dalh kha ua, asum pen mikhat in kemkha a, akempa pen
muhsuah zoh louh dia kibumang ahihman in a zong ding a Lamka khopi sung
hong lut nawn uh ahihdan ka theikhia uhi. Huchi’n director Bob in DGP
houpih in a case pen ZIA te pekhe mai ding in a ngen a, huchi’n DGP
phalna toh hiai THE GREAT ROBBERY” case suizui di’n ka hong kipan kheta
uhi.
Director BOB in kei leh ka heute teng a
ofis ah hon samkhawm in ka mission ding uh nounel tak in hilhchetna ahon
nei hi. Ka lawmte, Khualpu, Thangpu, Lily leh Nancy te toh nasep ding
dan hoihtak in ka kikum ua, khopi sung a chet ek ngai ding ahihman in ka
kizil nak mahmah uhi.
Nitak khat ka lupna tung ah lumkawm in ka
kingaihtuah a, ka mitkha in hun mualliamsa a ka it Vungnou toh
nuamsatak leh kituaktak a hun ka zat khawm lainite uh ahong lang dundun
hi. Theihlouh kal in ka na ihmu kha a, “Ulian, koipen ka la zaw dia? Oi !
A hoih theilua, tel ding pen ka theikei.” chia ka bilbul ah hong kigen
“AW” in ahon halhsak guih hi. Ka et le ka it Vungnou in Aw nemtak a nui
hiuhiau kawm in a hon na en a, kawi ding a ka khut zantou kawm a ka
thoh touh leh, a khut pei leplep kawm a hon bye-bye in awl in a mang hi.
Ngailua in ka kap huphup a, ka hehna hong sousang in phuba lak utna in
ka lungtang a hehna a luanglet hi.
Hiai guktakna case suizui ding a ka hong
kisak tak un, innpi lam apan soiselna ka tuakpah uhi. ZIA in gamdang toh
kisai enkai hen la, gamsung thu ah kigolh dah hen chi’n MLA bangzah
hiam innpi ah kitom gawp uhi. Tua hang in Director BOB leh DGP kimu in a
guk in MOU suaikai uhi. Tua MOU ah hichi’n kigelh hi, “A case pen
police te’n a take up ding dan in a gingkhe ding a, himahleh, a guktak
in ZIA in police min zang in hiai guktakna case a suizui ding.”
KUM 2 NUNG IN
Lamka khopi sung ah hiamgamna a hong uang
hiaihiai pan nawnta hi. A vangkim in official leh nautang mi poimoh
taktakte thah in hong om zeuhzeuh uhi. Thah a omte postmortem result
apan et in a that tute mi kibang hiding a muanmoh huaina tampi om hi.
Huchi’n khopi sung leh building thupi taktak sung a CCTV camera record
tuamtuamte enkawm zel in panlakna nasa zawsem a pat in a hong omta hi.
Nikhat NUAMSAM bar ah drugs lord khat in
hunnuam zang chih report a kiza a, ken leng Khualpu tonpih in bar lam
zuan in ka kuankheta uhi. Bar ka tun un zan dak 10 a gingta a, himahleh,
bar sung a omte a ding in nitak kipantung mah a bang hi. Lu-le-taw
phawklou zen in nungak melhoih leh lasiam mahmah Huaisiam zaila awih
sakpih in a laam ziahziah uhi. Bar sawngtung lam ah VIP room ah drugs
lord Pum En om ahihdan hilh a ka om man un, a laamte ngaihsak se lou in
VIP room lam manawh in kal ka suantou uhi. Room kong ah tangval fel mel
mahmah 2(nih) in hon na khaam in ka hih ding uh a hon dong uhi. Ken leng
ka police badge lak in Pum En muding a hoh ka hihdan ka gen ngal hi.
Thauneu ka puakte uh hon laksak zoh un khat penroom sung ah a va lut hi.
Sawtlou nung in a hong pawtkhe nawn pah a,”Boss pa’n tulel in kuamah
kimuhpih a ut kei, na pai mai uh a hoih zaw ding.”chi’n ahon gen hi. Kou
lah paisawm tuanlou in lut teitei ka sawm ua, tuatak in guard tegel in
hon matsawm in akhut uh ahong kuanphei a, ken leng kei mat hon sawmpa
pen akhut zung ah ana kuai in adek ah ka tum suk ek a, kipuk dia kisa
lai a dip ngek ah deihtawk in ka peksak ek hi. Khualpu’n leng a khatpen
ana koih hoih pah a, kongkhak hong in lut toh ka thuah ngal uhi.
Sofa nemtak mai tung ah Pum En ana tu a,
nungak nih in ana laitat uhi. Pum En bel upa naivak lou kum 56 mi ding
vel khawng ahi a, agil alian mahmah kengkung hi. Mukmul leh khabe mul
hawi in ana tu niapnuap a, et mai in leng zu a kham mahmah ta chih a
kithei mai hi. Nikum August kha lak in a zi lamdangtak leh muanmohhuai
tak in ana si a, azi sihna tung ah muanmoh a kai mahmah hi. Nungak mi
mahmah ahia, nitak teng in nungak tuamtuam toh hun a zang khawm den sek
hi. A zi’n a omdan hoih salou in, khouhsawm sek a, himahleh huai in akal
uah kinakna piaksak zaw hi. Nitak teng a azi toh kina gige ahihdan uh a
innvengte khat in agen a, azi sih nitak in leng sawtpi kina ua, a
kivuak ging khawng uh za ahihdan zong a innvengpa’n gen hi. A thawm uh a
hong dai a, a zing in a zi tem a gawl-at sa a sisa in kimukhia hi. Amah
ngoh in om mahleh, evidence ding hoihtak a omlouh man in tutan zalentak
in a omthei hi.
A kim ah a seppihte mi 5 ana tu ua,
nungak melhoih taktakte toh zu dawnkhawm in nuam ana sa mahmah uhi. Pum
En in ahon muhtak in simmoh pau tak in, “Uital zawngkhalpa, bang deih a
ka kiang ah hong na hia ? Nang toh kihou ding in hun ka neikei. Hon na
pawtsan in na hinna na it leh.” ahon chi hi. Ken leng,”Na zi’ tungtang
houlim dia hong pai ka hi.” chi’n ka dawng thuk ngal hi. A zi ka genkhak
tak in a mel a hong tuam guih a, amit ah lauhna mel a kimu thei hi. “Ka
zi kei thah ahi kei, huai nitak in inn ah ka giak kei.” ahon chi somsom
a, ken leng cassette player khat la khia in a innvengpa thugen ka khum
teng ka ngaikhe sak hi. A mel ah lauhna in a pumtuamta a,”Nou bang a
police maimaite mat theih ding ka hikei. Hiai mun hing leh dam in na
pawtsan kei himhim ding uh.” chi’n a heute sam in koute thah ahon sawm
hi. Kou leng Khualpu toh panmun la in a hon naih masasa ka khenpuk pah
teptep ua, nasatak a kibeihna in NUAMSAM bar VIP room sung a pumtuam hi.
Lasa a laamte’n bel ka thawm uh bangmah a theikha vet kei uhi. A heute
teng tuanglai ah ka sialpaih vek khit un Pum En lau in taikhiak a sawm
a, a coat ngawng ah man in ka kaithal ek a, room laitak a table glass a
kibawlpen a bohtam zoih zozen hi. Huchi’n handcuff bulh in Police
station lam ah ka paipihta uhi.
THUGUK PAK-NGUUM DAWK KHIA
Police station ah Mr. Pum En thudotna ka
nei ua, a zi amah thah ahihdan a kipuan khiak ban ah kum 2 paisa a Bank
luhna a sumte a selguk khak ziak a a zitoh kina kha a tua bangteng
tungkha a hihdan a hon gen hi. Kou leng thumu kisa lua in akip-akoi in
ka dong chian thakthak uhi. Himahleh, ginatak in a hon dawng ut kei a,
amau ziak a ka itpen toh khen a om ka hihziak in kideek zoulou in ka
khoih zialzial hi.
A tawp in ka khut gu thuak ngap nawnlou
in ahong kipuang khe khongta hi. The Invincible kichi pawl khat om a,
tuate’n bank luh ding in amah leh midang nih toh a va zawnkhia uhi. A
mizotte uh lak a khat pen ahihleh aman thei ngeilou a, tuapa’ pen in
bank sung paidan leh omdan teng theisuak sipsip hi. A khatpen ahihleh
Lumpu kichi local gunda khat ahi a, sumteng lak khiak zoh chiang a
kihawm vek ding in thukim uhi. A ni ahong tun in amau teng thum leh The
Invincible pawlte apan mi 5 teng kuan ua, bank kong a gari omkhawmte lak
ah bomb supuak uhi. Mipite bomb puah ziak a hamhaihtak leh lauthawng
tak a a taivial hehu lai un amau teng bank sung ah lut in sum koihkhawm
na apan sum bag 5 dim phitphet la khia in taikhia uhi. Himahleh, Ground
floor a jewellery store kongkhak apan apawt dek tak un police te tampi
gari ahong kuante toh kituak kha in kikap tuah ek uhi. Amau teng leng
omkhawm kha nawnlou in muntuam chiat ah taizak ua, asum pen uh mukha
nawnlou hi. Mikhat in a na selmang a, a selmang tupen tutan in kuman
theikhe zoulou uhi.
Ka thuzak ut teng uh ka dot khiak zoh un
court ah dinsak in om a, huchi’n jail ah khum in omta hi. Kou leng
huchia sumpen selmang om a hihleh huai The Invincible pawlte leng asum
uh zong dia hong kipan nawn ngeingei ding ua gingta in pilvangtak in ka
suitou zel uhi.
Bangteng hileh Lumpu matkhiak phot ding
chi’n amat dingdan ka hong ngaihtuahta uhi. A omna mun leh a chetvelna
munte hoihtak in ka enzui ua, hunlem masapen a mat ding in kigingsa in
ka om ta uhi. Nikhat thuguk pesawntute apan in Lumpu in New bazaar ah
hih ding poimoh nei in a pawt dek chih ka za ua, kou leng tuamun lam
zuan in ka kuan kheta uhi. Dalpu electronics phak sawm ahihdan ka
theihman un tua dawr ma ah Lily leh Nancy te theizuak dan in ka omsak
ua, Lumpu a hong pai chiang a amau signal hon pe ding in kou adang teng
in dawr sung ah nuamtak a vaman khe ding chi’n ka panmun ding uh ka hon
hawm fel vek uhi.
Dakkal khat khawng ka ngak nung un santro
car san khat a hong tai vengveng a, Dalpu electronics kong ah ahong
khawl hi. Car sung apan in pasal sam eng ziapzuap punk deuh a kichei
khat a hong pawt khia hi. Cigarette akam a pet kawm in avan dak eu-au a,
a cigarette sumbang leilak a koih in a khedap in atuan mit hi. Huchih
laitak in Lily kiang ah nupi khat in athei zuak leisawm in a va dawp hi.
Lily in leng a zuak ahihlouh dan ana genkhum a, himahleh nupi nu’n na
zuak louh bang ding a hiai zahzah koih na hia? Chi’n a hankhum ek hi. A
thawm uh hong ngaih deuhdeuh in ahong buaizak dek ua, Lumpu in leng
muanmohna chiang nei mah bang in a hong dak gopgop hi. Ka plan dan ua
thil paithei ding a ka gintak louh tak in, kintak in car apan ka pawt
khia a, Lumpu omna lam manoh in ka taiphei hi. Lumpu in kei ama lamzuan a
tai ahon muhtak in amah leng lau in ana taisia hi. Bazaar sungteng ah
ka hong kidelh ek ua, Lumpu taihat mahmah vonvon ahihman in ka delh pha
zou kei hi.
Himahleh khahsual louh himhim sawm in ka
delh zel a, munkhat ah taxi ana khaam lai ka tuak kha hi. Ka delh phei
a, taxi ah alut toh kiton in kei leng a kongkhak khatlam hong in ka lut
tei hi. Amah leng kumthak nawn man tuanlou in taxi pupa’n a taxi in ahon
taipihta hi. A nunglam tutna ah mikhat ana tu a, Lumpu’n a temta puak
lakhia in kei hon dawt sawm in akhut ahon likphei hi. Ken leng akhut
ngawng ah man in ka kisawn tuah ek-ek ua, akhenchiang in ka lai ua tupa
bang ka dawt kha dekdek uhi. Taxi pupa’n ka omdan uh amuh in laulua in a
taxi heklai thakhat in a tawmkhia a, kou anung a tuangteng ahon nusia
hi. A hektu omlou in ka taizel ua, ka ma ua thil om bangteng ka phuphei
ek zel uhi. Huchih laitak in ka ang uah truck langva pua khat ana khawl
a, huai phusuk ding dinmun a ka omtak un ken leng Lumpu’ mai sukrak in
ka lai ua tupa alu ka sawnniam a, huaitoh kiton in ka taxi tuanna un ka
ang ua tata phusuk ek in a hong khawlthei hi. Bangmah chi ka omkei ua,
ka lawmte leng ahong tung ngal ua, Lumpu man in anung leh hen ngal uhi.
Khualpu ka taxi tuanna sung ah hong lut in a hon hankhum ek a, tuban kei
thu a mawk gamtat nawnlou ding in a hon thuhilh hi. Kam khat mah a
dawng se lou in ka laizial pan in ka tep khu vengveng hi. Ka kiang a
tupa’n Khualpu kiang ah, “Police na hihleh hiai ka kiang a tupa (kei)
hek ut ka hi. Lungtanglam buaina nei ka hi a, ahon suklau ziak in ka hek
ut.” ahon chi hi. Khualpu’n ambulance a hong pai a huah ana tuang in
chi’n ka kiang a tupa a pawt khesak a, kou bel Lumpu paipih in a kibukna
inlam ka zotpih masa uhi.
Lumpu omna ka tun un munkhat ah khuam toh
ka henbelh uhi. A sum guk uh a koihna ka dong ua, himahleh theikha lou
leh kemkhalou ahihdan a gen hi. Gingtalou ka hihman un ka soisa zek ua, a
room sungteng ka pheklek vek uhi. Himahleh bangmah muhkhiat ka neikei
uhi. Thangpu’n va naihphei in Lumpu’ kiang ah asum koihna a va dong thak
a, Lumpu’n bel theilou ka hi chi’n apang tinten hi. Huchia ka buai
vengvung laitak un laser in hon salkha in ka thei a, hoihtak a ka etchet
thak leh kou lawmta teng kongkhak apan in thau a ngim in ka na omvek
uhi. Kuate hi uhiam chih thei ut in hoihtak in ka enchian thakthak hi.
A makaipa uh hileh kilawm khat room ah
ahong lut a, anung ah adangte’n kouteng thau a hon ngimsa in ahong lut
uhi. Lumpu’n amaute amuh phet in lau in aling gawp a, “boss, hehpihtak
in bangmah hon lohken, na sum ken kem khalou ka hi.” kap kawm in a
chikhe nulnul hi. A boss pa un a kihennate aphelsak a, kou bel pauhetlou
in a omdan teng uh ka na en uhi. Huchihlai in a boss pa un, “Lumpu
bangziak a hon khem na hia? Ka sum koi ah koih na hia? Hon pia in ka sum
ahi ka deih.” chi’n Lumpu kiang ah agen hi. Lumpu’n bel a sum koihna
theikha lou ahihdan a gen a, a hinna hawisak a a omleh asum uh kempa
kiang ah pi ding ahihdan agen hi. Tuatak in a boss pa un Lumpu taikhe
ding in a sawl hi.
A kihouna ua pan in bank a asum
gukkhiakte uh kingen uh ahihdan ka thei a, ki im zou nawnlou in a boss
pa uh kiang ah bank luh tute a hi uhiam chi’n ka dong hi. Aman leng awl
khachik in “Hi” chih chauh in ahon dawng hi. Tua tak in ka itpen Vungnou
sih laitak ka mitkha a honglang in ka lungtang hong kinoh a, hehna leh
thangpaihna in ka pumdim hi. Huaitak in “nou teng ziak a ka itpen khuai
ka hi, phuba la ding ka hi.” chi’n thakhat a kihemkhe kawm in ka pistol
puak ka dokkhia a, amau a hon kap ngal uhi. Lawmte leng alemna munmun
zuan in panmun ka khoh ua, huchi’n Lumpu room sungteng kikap tuahna
phual asuak ta hi. Kou leng panmun bawl in kongkhak khat lampang pen ah
ka pawt ua, ka kikap tuah zom zel uhi. Bangtan hiam ka kikap tuah nung
un bomb ahon paihkhum ua, ka panna pamlam deuh uah a puak hi. Kou bel a
liam-le-bai ka om samkei uhi. Bomb puak apan ka kiveng lai un amau ana
taikhe man ua, a hu ahong ven tak in kou leng ka ding khia uhi. Amau
lamte mi 2 ka that ua, police te hilh in office lam zuan in ka taikhe
nawn uhi.
THE INVINCIBLE
Office ah thil omdan teng nounel tak in
ka kikum khawm ua, bank a sum gu khe te chetna leh a sulnung te uh
hoihtak a zongkhe ding in Nancy ka sawl a, a man leng kintak in internet
leh CCTV record te pansan in etkhiakna ahon neipah hi. Amah panpihtu
ding in ka department ua computer siam mahmah khat, gamdang intelligence
agency te website hack saktu dia ka zat gige uh Lia Kimboi ka gen ua,
aman leng thumangtak in a va panpih pah hi.
Kou adang teng in thu vantang leh maban
panlak ding dan ka houlim ua, bangtan hiam nung in Kimboi in file khat a
hong pia hi. Tua file ah Zogam Reserve Bank luh tute tanchin kimtak in a
tuang hi. Lemlak omte ka en ua, tua lemlak a dawk khate toh Lumpu hong
kaikhete a kibang uhi.
Amaute The Invincible kichi ua, mi 20 vel
pha uhi. Amaute tagah kepna mun apan a khangkhia ngen ahi uhi.
Kithutuak tak leh ki it tak in khosa khawm uhi. A hinkhua uh genthei lua
ahihman in gentheihna apan a suahtakna ding un thagum zang in mi suam
zel uhi. Amaute’n a kivenbitna ding un galvan zatdan leh kisualdan
tuamtuam te kihah sin mahmah uhi.
Nikhat a omna uh tagah in pen mihausa
mahmah khat in vehna va nei hi. Amau mihausa pa amuh tak un asum teng
laksak ding dan ngaihtuah ua, a omna inn kiang ua pan gamlalou munkhat
ah ana tang uhi. Mihausa pa ahong pai tak in ana man ua, amah leh
atonpih teng that vek in asum teng uh laksak in selmang uhi. Himahleh a
thil hih uh theihkhiak in om ua, police te’n man in suangkulh ah khum
vek uhi.
Kum 10 vel suangkulh ah khum in om ua, a
tawp in suangkulh vengte khat panpihna ziak in Police te galvan bangzah
hiam toh hong taisuah thei uhi. Police te’n leng delhzui in munkhat ah
kikap tuah ua, huai ah amau pawl a mi 2 kaplup khak in om uhi. Tua
nungsang a lawmte uh sihna tung ah phuba la dan a kikoih in bank te luh
a, police te alemna munmun a thah zel a nasep uh ahita hi.
THE INVINCIBLE TE TOH KIMUHNA MASA
Hunte hong paizel in Lamka public ground
ah Mela thupitak khat a hong om hi. Tua mela, naupangte a ding biik a
kibawl ahihman in niteng hun teng in naupang tamthei petmah uhi. Amaute
va pi ding leh innmun a va kha zel ding in solkal in bus tampi zangsak
hi.
Mela ompat nung ni 3 ni in nitaklam
innlam zuan a pai naupang puakna bus khat meltheihlouhte’n pimang uhi.
Tua thu theihphet in police department in panla ngal in migiloute
sulnung suizuina neipah uhi. Gintakna mun teng dap kual in pan nasatak
in la uhi.
Kou leng a poimohna munteng ah pan la in
munteng ka dap kual pah uhi. Huchih laitak in dawr khat apan Lumpu inn a
ka kikap tuah pihte uh khat hong pawtkhia ka mu ua, a paina mun
nungzuih in a car ka nung delh uhi. A tai zel a, khopi nawl khat a
innsawng dia kibawl zoh siang nailouh khat ah alut hi. Kou leng ka delh
lut pah ua, thau toh kigingsa in tua innsung ah ka lut phei pah uhi.
Innsung liantak ahi a, alai ah mun awng
liansimtak khat a om hi. Car 3 kil khat ah ana khawl a, huan, a kil
langkhat lam ah naupangte tuanna bus pen a khawl hi. Kou leng awl in ka
lut phei ua, Khualpu, Thangpu leh kei tua room awng liantak sung ah lut
in bus omna lam ka zuan phei uhi. Pilvangtak a ka pai khiankhian laitak
un light thakhat in ahong vak zot a, ka dak khiak uhleh ka kiim teng uah
hon na umkual in thau in hon na ngim uhi. Kou leng ka thaute uh leilak
ah koihkhia in ka ding ua, a boss pa uh kou kiang lam zuan in ahong
paiphei hi. Ka kiang uh ahong tun tak in, “Mr. Lianpu, na nungak khaam
nu’ phuba la ding a hong kuan na hi hia?” chi’n a hon chou bawl hi. Ken
leng a kiang ah, “Hiai naupangte’n hihkhelh neilou uh ahi. Khahkhe vek
inla, huaizoh kihouna pan ni” ka chi hi.
Aman bel, “Mr. Lianpu, ka thiltup uh ka
lohchin mateng uh hiai naupangte a paikhe thei kei ding uh. Nang leng
phuba lak na ding a ziak na neih mah bang in kou leng ka nei uhi. Nang
na itpen na khuai a, kou leng ka itpente uh ka khuai sam uhi. Huaiziak
in i dinmun kibang ahi.” a hon chi hi. Ka itpen thu a hon genkhak tak in
thangpaihna in ka dim a, hehtak kawm in, “Hiai naupangte khahkhia in,
huai zoh chiang in kei toh i kal thu su fel pan ni.” chi’n ka dawng hi.
A man bel awlchik in ka kiang ah, “ka sum
uh chauh ahi ka deih uh, huai lak theihna ding a na hon panpih uh leh
huaizoh hiai naupangte khahkhiak ahipan ding uh.” ahon chi hi. Huaitak
in a kiang ah, “bang ahia ka hon panpih theih nang uh?” chi’n ka dong
hi. Naupangte amel uh ka en a, naupang neuchikte lauhmel pu kawm a hon
en liakliakte ka muh in ka hehpih mahmah mai a, amaute damtak a
khahkhiak ahihtheihna ding un Boss pa’ thu manphot hoih zaw ding hi.
Ka thudot ahon dawng a, “Mela mun lutna
kongpi suahlam pang ah mikhat in sum bag toh hon na ngak dia, akiang na
tun chiang un hiai suitcase na pe ding ua, aman tua sum ahon pe mai
ding. Himahleh, ka chihdan a na omkei uhleh, bomb na puak pen uh
automatic in a kikam dia, secon 40 sung in apuak zak ding. Naupangte
omna bus ah leng bomb ka kam dia. Amau leng asi vek ding uh.” chi’n
Thangpu pen handcuff bulh in naupangte toh a koihkhawm uhi. Khualpu toh
kei bel bomb koihna bawm toh ka khut uh a kilhbelh ua, huchi’n mela lam
zuan in ka hong paita uhi.
Mela mun ka tun tak un suahlam kongkhak
manoh in ka pai ngal uhi. Gate geitak ah pasal overcoat silh a ding khat
ka mu ua, a gei ah bag lianpi khat om hi. Kou leng huaipa mah hingei
ding a gingta in ka naihphei zel uhi. Amun ka tuntak un amah ahong
kiheiphei a, amel ka muhtak un lamdang ka sa mahmah uhi. Aman leng kou
ahon muh tak in a kiguih zozen hi. “Eh ! Lianpu nou hiaimun ah bang hong
hih e?” chi’n ahon dong hi. Kou bel asum koihla ding a kuan ka hihdan
uh ka gen ua, a bag liantak khat lak ka sawm uhi.
Ka sum lakna dingpa uh bel Police
inspector pa ana hi a, lamdang ka sa mahmah uhi. Aman ka kiang uah,
bangmah genlou in paikhia un, hiaimun ah sum kipetuah ding om chih
report ka zak ziak ua duty a om ka hi uh. Chi’n paikhe ding in a hon
sawl hi. Kou bel ka ut kei ua, na sum hon pia in, tua ka khut ua case
ompen bomb ahi a, sum na hon piak kei leh second 60 sung a puak zak ding
ahi. Huaikia hilou in naupang tamtak gari toh pimang a omte leng asi
vek ding uh. Ka chi uhi.
Huchih laitak in, kilchih apan in police
te hong taikhawm in thau in ahon ngim ua, kipekhe ding in a hon ngen
uhi. Kou bel ka dinmun uh leh naupangte tan ding ka theih man un
inspector pa ka man ua, sum koihna bag lak ka sawm uh leh a hong kihong
hi. Sum tang in newspaper ngen a kithundim a, khem a om ka hihdan uh leh
ka dinmun uh lauhuai ahihdan phawk in inspector pa man in ka taipih
uhi. Ka khut ua bomb ompen remote a kam in a hong om a, kinohtak a
gamtat kei leh mitampi sihtheihna ahihman in mi omlouhna lam zuan in ka
tai uhi. Police te’n ahon delh zui zel ua, minute khat ching dek mahmah
ta ahihman in inspector pa sakhau apan handcuffs tolna chahbi la in bomb
case leh ka khut uh henkhawm na ka phel ua, mi omlouhna mun buukta khat
sung ah ka pailut uhi. Bomb ngaihtak in ahong puak a, kuamah hih khak
bel aneikei vanglak hi. Mipi buai a alang-alang a tai noinoi te kawm kal
ah inspector pa ka taipih ua, dressing room sung khat ah ka lutpih uhi.
Tua mun ah inspector pa’n ka kiang uah, “Nou gel in melmate’ thu mang
a, sum ladia hong kuan na hihman un court martial na maituah uh ngai
ding ahi. Ahihziak in ken bel ka hon theisiam a, na bitna ding uh ka hon
ngaihtuah sak ding.” chi’n phone in mikhat ahoupih hi. A kihou zoh un
ka kiang uah, “na case uh asang mahmah ziak in ka hon panpih ahaksa
mahmah maithei, tu tadih a nou ading a hoihpen bel na thau uh na hon
piak ua, na kibuk mang phot uh ahoih ding.” chi’n ahon gen hi. Ka thau
uh ahon nget tak in ka muanmohna ahong lian mahmah a, himahleh, athugen
gingta hi awmtak in ka om uhi. Ken leng a guk a thautang la khia in ka
pistol tuh inspector pa kiang ah ka peta hi.
Ka thau ka piak tak in, ahon nuihsan ek
a, “Na haiman uh tua nekha ding na hita ve ua, ka thil hih na uah hong
kigolh se kei le uchin zaw bangmah tuak lou ding hive uchin maw. Tua lah
kei ka hinna ding in nougel hinna ka lak lah apoimoh ngal a, mangpha!”
chi’n nui huahua kawm in pistol in a hon ngim a, ahon kap sawm hi.
Himahleh, thautang teng lakhe khin ka hihman in thau pen apuak kei. Ka
hehna sang gawp ahihman in kintak in a khut ngawng ah ka man a, thakhat
in kei lam ah ka kaiphei hi. Ka kaih toh kiton in ahong kunsuk dek lai
deitawk in a khabe ah ka pek ek a, kithalpuk ding a kisa lai, Khualpu’n
sangtak a kitawm in a awm tak ah lei toh a tuanbelh suk hi.
Inspector pa bel ka khoihna uh thuak
zoulou in leilak ah nak nawn selou in a lum biambuam hi. Khualpu’n a
phone la in denlam a a kihoupih pa a phone a, “inspector Khaipu a sita,
ka sum uh nang kiang ah om ahihdan ka thei uh. A la ding in ka hong kuan
pah ding uh.” chi’n akhem hi. Tua tak in mipa’n, “ofis ah ka omlai, den
deuh chiang in i kihou thak ding ka chi hi. Tua zoh in Kimbawi ka
houpih nawn a, den a number ka houpih pen uh kua number hi hiam chih leh
number neipa’ tungtang record omte hoihtak a ana zongkhe ding in ka
hilh hi. Aman leng, “Ulian hong pilvang mahmah un aw, nou gel Khualpu
toh tulel in wanted na hi ua, nou gel matsawm in police in ahon zong lel
hi.” A hon chi hi. Ken leng “Awle, Kim pilvangtak in ka hong gamtang
ding uh. Den a number kon piak pen a kintheilam in hon zongkhia inla,
hon hilh pah in aw.” chi’n phone ka koih hi.
Thilteng gellouh dan tak a hong pai
ahihman in poi ka sa mahmah mai ua, Khualpu toh panlak dingdan ka kikum
ua, himahleh bang hih masak ding ahia chih ka thei kei uh. Director Bob
in lah kou hon mohsa ahihman in ka mission uh ka zohma uh leh ka dikna
uh ka lahkhiak ma uh kik nawn ka sawm kei uhi. Thangpu leh naupangte’
bang dinmun in a ding ding ua chih theih ahi kei, huai in ka lungkhamna a
behlap sawnsawn hi.
Ka phone tawi a hong ging a, ka et leh
Kimbawi ana hi hi. Ken leng ka lak leh aman, “Na number hon piakpen kua
dang a hilou in superintendent pa’ a ahi.” ahon chi hi. Ken leng, “ana
enkai in aw,” chi a ka koih dek laitak in aman Thangpu in houpih ahihdan
leh amah leh naupang teng damtak a om uh ahih dan ahon hilh chi’n ahon
gen hi. Ken leng police station lam manoh in ka hong paidek uh, ofis
nunglam kongkhak ah hon na ngak in.” chi’n ka phone ka koih hi. Khualpu
kiang ah thu omdan teng ka hilh a, Lily leh Nancy sam in melmate’n a sum
uh kemtu omna police station va luh ngeingei ding ua muanmoh ahihman un
kou leng huailam manoh ding in ka kisata uhi.
Thangpu bel naupangte sam kilh zang in a
handcuff ana phel thei a, bomb kikam pen puah ma in a tai pawt thei uhi.
Huchia atai lai un naupang khat in anau mulou ahihdan agen a, aman leng
gari sung va enthak in va pomkhia hi. A kihepkhiak zoh un bomb tuh
ngaihtak in a hong puak zak a, inn a hong kichim suk zoizoi hi.
Thangpu’n leng kintak in Kimbawi phone a, naupangte toh damtak a om uh
ahihdan ana hilh a, kou dinmun ana dong hi. Kou leng Lily leh Nancy
ahong tun tak un Police Station lam zuan in ka hong kipan kheta uhi.
Superintendent pa’ room ah amah leh DGP
pa kou tungtang houlim in a om uhi. SP Thangtual in kei leh Khualpu pen
migiloute toh kizom a hon ngoh in, Inspector Khupta sihna ziak le kou
ziak hi’n gen a, a kinthei lam a hon matkhiak a ut dan a gen hi. DGP in
bel huchidan a gamtang zozen ding a hon gingta lou ahihdan agen a,
huchih laitak in SP pa ka houpih kha geih ua, a sum kep tungtang ka gen
uhleh, DGP theìh ding a utlouh man a awl a kihou thak ding a hon gen ana
hi hi.
DGP pawt khiak nung in SP pa leng a ofis
ah computer ah bangbang hiam en in a om a, amel kinoh mel mahmah ahih
dan Kimbawi in a hon hilh hi. Kou leng a thilhihte hoihtak a ana enkai
ding in ka hilh ua, lampi ah pai lellel ka hihdan uh zong ka hilh hi.
Aman leng “uLian hong pilvang in aw.” ahon chi a, ahon thugen in hon
khoih khak na riau khat nei in ka thei hi. Ka lungtang sung ah tua
Kimbawi thugen pen a hing den a, ka nui khe heuhau kha zozen hi.
Himahleh, tua lampen tu dinmun a gen leh ngaihtuah sau chi hi a ka
theihlouh man in hun awl a ding in ka sit zaw hi.
Kimbawi in leng SP pa gamtatdan teng ana
sui vek a, DGP pa kiang ah SP in sum tamtak SWISS BANK ah transfer bawl
ahihdan hilh hi. Tua sumte pen bank luh lai a kigu khete hi ding a
muanmoh huai ahihdan zong a gen hi. DGP in leng SP pa’ sulnung hoihtak a
sui ding ahihdan a gen hi.
Kou leng Police Station ka tun tak un a
nunglam kongkhak ah ka lut ua, Kimbawi in kongkhak bul ah hon na ngak in
ahon muhtak in mittui galpan likliak kawm in hon na kawi mawk hi. Ka
hamhaih man sim ve. Ken leng awl in ka kawithuk sam a, lawmte’n bang
lamdangsa in leh hon kipahpih kawm tak in ana nui heuhau uhi. Huchi’n
pilvangtak in garrage koihna kiang lam zuan in ka paipheita uhi.
DUHGAWL AWNG AH KIA
SP pa’n a room nusia in emergency exit
lam manoh in pai hi. Tua exit na mun tun nang in room lianpi khat om hi.
Tua room pen mial khipkhep a, thawm a dai mahmah hi. SP leng thawmhau
kisa sim in dakkual leplep a, kuamah amuh louh tak in kongkhak lam manoh
in pai hi. Room laizang lak a tun tak in a parcel lian taktak kikoih
khawmna tung ah mikhat ading om bang in mu a, a dak touh toh kiton in
tua mipa hong kitawm suk in SP pa’ awm tak ah hon tuansuk hi. SP in leng
kintak in a pistol dokkhia in kap sawm a, himahleh, tua mipa’n kintak a
naihphei in a pistol pek khiak sak hi. Utdan teng a a soisak khit in
mipa’n SP kiang ah asum koihna mun dong hi. A tung in theikha lou bang
in pan sawm a, himahleh a awmguh teng puak luapluap zozen a suk sak leh
pek sak a a omtak in ki-im zou nawnlou in a car sung ah sel ahihdan
genkhe khong hi. Huchi’n tua mipa leh alawmte’n SP pa a gari koihna lam
ah paipih uhi.
Kou leng gari koihna mun ka tun uh toh
kiton in amau leng lift apan hong pawtkhe geih uhi. Mi 6 vel ding ahi
ua, ahon muh ding uh utlou in ka na kibu uhi. SP in a gari nunglam hong
in bag 4 dimtek a kiguang sumte lak hi. Amau leng tuate la a paikhe ding
a a kisak laitak un DGP hong pai in SP pa hong han khum motmot hi.
“Nangpa bang ding a aguk a thil hoihlou hih na hia? Na omdan teng
suisuah ahita. Court martial na maituah ding.” chi’n genkhum a, a kiang a
om teng in Police uniform silh vek uh ahihman un tuate kiang ah SP pa’
man ding in thupia hi. Tua mite pen kua dang hilou in The Invincible
pawl a te ana hi uhi. Amau lah lamdangsak chitak in DGP ana en heuhou
ua, kuamah a gamtang a omlouh tak in DGP pa’n leng lamdang sa in enchian
thakthak hi. Banghiam phawk khiak nei hileh kilawm in kilehkik thak hi.
Thil paidan dik nawnlou ahihman in ken leng ka lawmte kiang ah kigingsa
a om ding in ka hilh hi. Bangtan hiam a kik nung in ka gintak mah bang
in DGP in a pistol in tua mi omte ngim in ahon kap phei tamai hi. Amau
leng buk theihna mun ding zong in taizak ua, kou leng a lemna munte ah
ka na kap thuk teita uhi. Huchi’n Police station a garrage pen
kikaptuahna mun ahong suak ta hi. Thau a ginphet in Police te’n leng
thau ginna lam delh ding in patau dak ahon khen uhi. A dinmun uh lauhuai
ahihdan thei in khat in bomb a hon paih ek a, ka omna munchiat uah kibu
in ka bok neinai uhi.
Buai vengvung kal in SP pa ana taikhe
thei in Police hong paite kiang ah, “Bomb tawi uh ahi, nungkik un.”
chi’n thupia hi. Kuamah nungkik a omlouh tak in SP pa’n a power zang in,
thupiak ahi. Nungkik un. Chi’n thagum in Police te’ kinungkik sak hi.
Kou leng ka kikap tuah zel ua, amau lamte
mi 2 ka kaplum theita uhi. Ka kiang naichin ah galte khat awl khah in a
hong paiphei khalkhal hi. Ka kiang hong tun tak in kintak in athau
tawina khut taklam ah ka na man a, a dip ah ka khuk a tattou in alu ah
deihtawk in ka susuk ek hi. Huchi’n galte boss pa’ hon chouna dawng ding
in ka kiselnamun apan ka dingkhia hi. Ka nung ah lawmte ahong ding tei
ua, The Invincible te zou ngei ding in ka pan mun uh ka khohthak uhi.
SP pa’n lah a naupang teng sawlkik ta
ahih chiang in. Kou a sung a omteng toh ka kibei charchar uhi. DGP pa
akhe akap khak ziak un Lily kiang ah room dang ah va ompih mai ding in
ka ngen a, amau a taikhiak laitak un galte’n ahon kap ek-ekh ua, kou
leng theihtawp suah in ka na kap tei uhi.
SP pa ngeileng building pawlam ah va
pawtkhia a, a naupangte kiang ah building sung a mi omteng kuamah hing
hawi omlou a va kaplum vek ding in sawl hi. Himahleh kou omna tan ah bel
kuamah ahong lut ngam sekei uhi. Sawt kuamtak ka kikap tuah nung un
thautang teng hong bei pianta hi. Huchi’n ngam-le-ngam ka hong kichou
tuah panta ua, huchi’n thatang a kibeih pii na ka hon panta uhi. Kou bel
mi 3 ka pha ua, Lily lah DGP pa buaipih ahihman in room dang ah a om
hi. Thangpu lah amel muh ding om nailou ahihman in kou mithum teng, kei,
Nancy leh Khualpu. Kou teng in migilou leh khawksakna bei mi 10val ma
ah ka hong ding threngthrang uhi.
The Invincible chi a kiminloh, mite lauh
mahmah, amin mai azak ua leh leng aliin pih phialte uh ang ah Zogam
tangval leh nungak suanhuai mahmah te ka hong ding khia uh zaw amau sang
in ka simmoh huai zaw tuan kei uhi. Kum 2 sung vingveng hoihtak a
training la te a di’n bangmah mullit ding leh lauh ding ka nei hauh kei
uhi. Amasa lam a ka experiance te uh tha hon guan mahmah mai hi.
Ka ang ua migilou 10 val dingte ka en ua,
amau leng mihing mah hive un chi’n panmun hoihtak a la in ka kiging
hoih mahmah uhi. Amau hon ngamthoh mahmah ua, simmoh tak in hon chou
henghang vial uhi. A thu a gen chih a omkei, angam-le-ngam nana na chu
ka hong kibei ziahziah ta uhi. Mi thum chauh himahle ung nuamtak in a
hon khoih thei tuankei uhi. Khat in hong khoih sawm in ka ang ah hong ki
tawm lenglang a, hon pek ding a kitawm a a khe ahon lik sang laitak in
kun kawm in ka kihei a, ka khe khatlam pen ka nunglam ah heiphei in a
awm lak ah ka tuanphei a, na sa in kihum vengveng a, pang ngap nawn
selou hi. Tam zaw tham ahihman un akhen chiang in kiveng senglou in ahon
su puk kha ek-ekh zel uhi. Ka lawmte leng ana maimai tuan sam kei uhi.
Zohmeng/ngeu bangmai in ana che ziahziah uhi. Keipen a boss pa uhtoh
midang nih in hon bei ua, mithum toh kibeih chu haksa mahmah sam hi.
Nihte’n ka khut leh khe lam hon subuai in akhat pen in huai hun lemtang
ala in ahon tuanpuk ek zel hi.
Huchia ka puk tak in a boss pa un
sikchiang zum khat in hon dawt sawm in ahon ngim gelgol hi. Hon dawt
ding a akhut lik sang laitak in koilam a kipan ahia chih theihman louh
phial in Lily in a boss pa uh ahong flying kick phei ziah mai a, a gel a
baang kidenna ek in tuk pah vilvil hi. Ken leng ka khut hon len tegel
thakhat a kai tuak in khat pen ka tong in a khabe ka tauh sak a puk ding
a akisak laitak in akhatpen kai phei in deihtawk in a khabe mah Lily in
hon pek phei a anih un apuk khawm uhi.
Amau leng pan honla thak in ahong kisa
thak nawn ua, ka hong kibei nek-nekh nawn uhi. Thangpu leng hong tungta
ahihman in tun bel ka zou thoh mahmah ta uhi. Bangkim ah ka thaneh
mahmah ua, atamzaw tham thou zou nawnlou ding in ka khoih puk vek ta
uhi. Tun bel aboss pa uh toh mi 3 chauh a omta uhi. Ka phuba lak ding
leng tu mahmah la ut tinten in ka ma a kilui ka nasep ding pen zohpah ut
in ka hon bei zialzial ta uhi.
Huchihlai tak in ka tunglam ua pan in
thil lomkhat hong lengsuk om hin ka thei ua, ka et uh leh SP pa’n
grenade bomb a dim bag khat hon paihsuk ana hi a, kou leng a kinthei
bang pen in kibukna ding munbit zuan in ka tai khia uhi. Room ka pawtsan
vek zoh un bomb ngaihtak in a hong puak zak a, buiding ngei leng chim
ut hileh kilawm in ahong niam suk zot zozen hi. Bomb khu ahong theng tak
in sum tampi ahong leeng zak luailuai a police te’n ana uh buaipih
manlou zen in a tom souhsouh uhi.
Gangte’ boss pa leng muh ahi nawnkei, a
na taisuah thei ahi ngei ding. Tun taisuah mah leh ka zong khe thouthou
ding hi. DGP pa leng ahon zawnkhia ua, ambulance sung ah akoih uhi. SP
pa’n DGP ambulance sung a om amuh tak in va naih phei in ambulance kong
kikhak khum hi. Ka na en-en a, DGP thah sawm hingei ding a gingta in
Khualpu toh ka va naihphei ua, glass apan in SP pa oxygen buk domsang
lai a kimu thei hi. DGP pa khen suk ngeingei ding a akilat tak in ka
pistol in ngim vengveng kawm in ka kap a, azoi suk nolh in ka mu hi.
Police te’n ka thau kap amuh tak un hon delh in a hon man uhi. Huchih
lai in ambulance kongkhak hong kihong in DGP pa ahong dakkhia a, mat a
ka om uh ahon muh tak in a heute kiang ah bangmah loh lou a hon khahkhe
ding in a ngen hi. Ahon khah tak un Kimbawi hong tai vengveng in kap
kawm in bangmah gense lou in ahong pom ek a, ka ang ah akap ek-ekh hi.
Ken leng awl a koithuk in duat tak in ka pom a, DGP pa ka et leh keilam
nga in a khutpi ahon tungtou a, ambulance in damdawi innlam zuan in a
pawkheta uhi.
MIT SIK IN MIT
Ka liamna neuhneuh omte Kimbawi in
hoihtak leh duat tak in ahon silsiang sak a, ahon tuam hoihsak hi. Ka
lung anuam mahmah mai a, Kimbawi ziak in Vungnou hon omlouhsan nung in
neuchik lungnopna leh thovennna ka hon nei thei deuhta hi. Amit hah
kilawm takte a, gen nei tak a ahon melh phei khak chiang in ka lungsung
nopna’n a dim hi. A kam a itna thu a hon gen louh hang in a omdan leh a
tatdante’n a genlouh teng a sel khuh zou tuan kei hi.
Huchia nuamtak a ka kithuah touh ua, ka
kikep laitak un ka phone a hong ging a, ka pick up a leh, “Nitak dak 9
in Ngalngam leentual ah hong pai in.” chih teng ahon gen a, a phone a
koih hi. Kua hi mahmah ding hiam chi a ka call kik leh public phone
booth apan ahon phone ana hi a, ka call thei nawn kei hi. Kimbawi in
lamdangsa tak in ahon na en a, ahon dot louh hang in amit apan in athei
ut mahmah chih ka thei hi. Ken leng a lungkham ding lau in lawmte’n hon
call maimai uh ahi ka chi khemkhem hi. Ka thugen a gintak ding bel ka um
kei hi.
Ahon houpih tupa’n bang tum a ahon sap
hihiam chih ka theikei, himahleh mi’n hon sam buang hiven sihna ding
hileh leng ka hoh himhim ding chi’n thupukna ka la hi. Ka lawmte bel ka
subuai utkei, keimah mimal buaina liauliau a ka koihman in amau ka
subuai ut se kei hi.
Nitak dak 7 tan Kimbawi inn ah ka om a,
amah toh nek ding bawl khawm in nuamsa tak in ka kithuah uhi. Ann nezou a
pai ka sawm tak in ahon khaam ngamkei a, himahleh, a omdan apan in ka
pai ding aphal naikei chih theih ngoihngoih kawm in a hon en hi. Ken
leng a biang ah awl a tawp in Kim ka na paiphot dia nidang chiang in
sawtpi om di’n ka hong hoh nawn ding aw. Ka chi hi. Thakhat a hon kawi
in ka muk tak ah kideek zou nawnlou in ahon tawp a, ken leng kawi thuk
in ka tawp thuk tei hi. Pailou theilou ka hihman in a hon kawina akhut
awl a lak khiaksak in Ginomtak in ana om in aw, chi’n khelahtak in ka
paisanta hi.
Ka omdante uh lampi ah ka tai kawm in ka
ngaihtuah nilouh a, lamdang ka sa mahmah hi. Hichituk a kin a itna in ka
kal uah vaihawm ding in ka gingta kei, lah vai a hawm ngal a ! Kik thak
a akiang ah ka hong ngailua va chih ka ut petmah hi. Himahleh ka maban a
program ka neihpen tangtunsak ka mohpuak ahihman in kik se lou in
Ngalngam leentual lam manoh in ka bike in ka tai vengveng hi.
Amun ka tun in dak 9 gin nang minute 5 in
asam geih hi. A hun chet in tung ing ei… Chi’n apoimoh khak leh chi a
ka puak ka pistol en hoihthak in a bawm ah ka guang a, leentual sunglam
zuan in ka lutphei pah hi. Leentual sung ka tun in ka ang ah mi 3 ana
ding ua, hoihtak a ka et leh The Invincible te ana hi uhi. Ken leng lau
se lou in ka naihphei a, a kiang uh ka tun tak in a boss pa un, “Nang
ziak a ka sum teng uh mangthang ahihman in na hon piak kik kei leh
hiaimun damtak in na pawtsan theikei ding” ahon chi hi. Ken leng ka
dawng thuk pah a, “Nang sum khat mah a omkei, mipi’ sum a hi, nang na
guk khiak ziak in dan kalh na hi. Buaina a om sese sang in hong kipekhe
zaw mai in.” ka chih khum hi. Boss pa’n, “Na hon piak kei leh nang chauh
hilou in na it mahmah kha in leng ahinna a khuai ding, amah hinna na
humbit ut aleh ka nuai ah hong kun inla, ka sum tengteng uh police
sation ah va la inla, hong pia in.” ahon chi hi. Ka dawn ma in, a kiang a
te khat remote khat pia in huai mek ding in a sawl hi. Tu pan amek tak
in leentual nawl apan meivak khat hong vak in, amau nunglam a amialna
mun khat hon salvak hi. Tua vak in asalhna mun ka et leh ka nu akhut
hensa a kikhai ka mu a, ka lungtang tem a dawt bang in naa ka sa hi. “Ka
nu’n hiai tungtang ah kigolh nang anei kei, khahkhia unla, kei toh
kikum khawm ni.” chi’n boss pa kiang ah ka ngen hi. Himahleh, aman bel a
sum amuh kik ma ka nu khahlou ding ahihdan a gen a, huai ka ut kei leh
ka nu ahinna dia amau teng ka thah vek ngai ding ahihdan ahon genkhum
hi.
Ka it Vungnou hon thahsak ua, tua ka nu
it tak genthei tak a a bawl nawn uh thuak zoulou in amau toh ka hong
kibei fitfit ta hi. Athum un a hon bei khawm ua, mithum toh kibeih
ahaksa mahmah hi. Nih te’n ka khe leh ka khut a bei ua, huaikal in akhat
in ka pumpi a sukkhak theihna munteng ana khoih hi. Kiveng senglou ka
hihman in khat in ka biang ah ahong pek phei ek a, ka nawl ah ka puksuk
duai hi. Ka am ahai sim mahmah mai a, himahleh amau khawltuan lou uh
ahihman in ka thuak ek-ekh tamai hi. Ka lungtang ah hehna kidim ahihman
in ahon khoihnate uh anat lam ka phawk kei. Ka lu apan si hong luangsuk
pen in ka mit hon tawnsuk ahihman in ka muh theihna nengchik ahon subuai
kha zek hi. Kinulsiang in panmun ka lathak a, athum ua khatvei thu a
zoulou ding a ka kitheih man in khat khat a ka khoih thei nang in thang
ka hon kam ta hi. Hon sual ding a ahon naih tak un munlem zong in ka na
kikhin vialvial hi. Tua bang a ka kikhin tak in amau leng ahong kikhen
pian khata ua, huai hunlem a zang in khatkhat in alem penpen ka khoih
thuk theisam ta hi. Khat in hon naihphei kawm in ahon mat sawm a, akhut
man in ka liangtung ah koih in ka na khiahtan sak ek hi.
Khat pen ka koih hoih khit nung bel
pandan ahong nuam tuam mahmah ta hi. Himahleh, ka pang lak temta a ahon
dawt khaksak man un ka bah sim mahmah hi. Ka kiveng mahmah a, munlem
zong in ka kikhin kualkual hi. Huchih laitak in khat pen in hon pek sawm
in akhe ahon liktou hi. Ken leng kintak a lei ah kunsuk in ka khut a
lei sawn kawm in ka khe ka pei phei a, akhe adin na lampen ah ka pek
phei a kipuk suk lai thakhat a thoutou kawm in a awm ah ka tuan suk hi.
Kitawm kawm a tuan ka hi a, huchih laitak in a boss pa uh kei lam zuan a
hong tai ka mu a, alawmpa lei toh tuanbelh in ka tawm tou nawn a, back
horse kick in a khabe tak ah ka pek phei hi. Amah leng kipuk dia kisa in
a awn phei duaiduai hi. Ka pekpuk pa pen alu ah man in a ngawng guh ka
hek tan sak a, khamuangtak in ka tawldam sak ta hi. A boss pa chauh uh
ahong hihtak in ka tha zoh mahmah ta a, tang sak manlou zen in ka khoih
ziahziah tamai hi. A kiang ah, Ka it Vungnou phuba ahi ka lak ding chi’n
hehpihna bei in ka khoih ziahziah ta a, pangzou nawnlou in leilak ah a
lum dildeel hi. Ka hehna kiamlou ahihman in ka pistol dok khia in kap ka
sawm hi. Aman leng hon that mai in chi’n ahon ngen a, ka hehna thunun
zoulou in akhe te gel ka kap sak hi.
Kap lup pah ka ut kei, awl-awl a na thuak
ek kawm a asih ding ka deih hi. A khut tegel ka kap sak nawn a, na sa
in akikou khe loiloi phet hi. Ka thau ging leh amah kikou aw in leentual
sungteng athawn zuazua hi. Ken leng “Na min ka thei kei, theih leng ka
sawm tuan kei, himahleh, na ngongtatna ziak a ka itpen na thah ziak in
phuba ka la ding. Ka itpen kha’ muangtak a atawldam theihna ding in nang
haksa satak in na hinna ka la ding hi. Na hun a beita. Thumthum mahle
chin leng aphatuam nawnkei ding. Mangpha” chi’n atal tak ah ka kap a,
kisat zotzot in huchi’n a hinna akhahta hi.
Kintak in ka nu a henna uh ka va naihphei
a, ahennate uh ka phelsak hi. Ka nu’n mittui luang zoihzoih kawm in
ahon pom a, bangmah gen theilou in ahon kah khum ek-ekh hi. Gimpet mah
ka hi ding a, ka nu ang ah ka mit hak zoulou in mitsing kawm in ka
lumsuk hi. Bangtan mitsing ka hia chih ka theikei. Ka khanloh tak in
lupna tung ah ka nalum a, ka kiang ah tu in Kimbawi in nui hiuhiau kawm
in hon na en hi. Lamdang ka sa mahmah mai a, ka kimvel ka et leh damdawi
innsung a om ka na himaimah hi. Thoh sawm in ka lu ka phawng kang a,
himahleh ka tang theikei, ka chi teng a naa vek hi. Bangziak a hiaimun
ah om mawk ka hia? Chi’n Kimbawi ka dong a, Aman bel tawldam ding a hon
sawl in ka dam deuh chiang a athu omdan hon hilh ding ahih dan kam
nemtak in a hon hilh hi.
Damdawi inn ah kha nih ka om nung in
damtak in ka pawt kheta hi. Ka innkuanpihte leh Kimbawi toh Vungnou haan
ka va veh ua, paak piakna ka nei uhi. Huchi’n Kimbawi toh itna thute
kikum in akum nawn in nu-le-pate’ theihpihna toh dansiangthou a
kikhutsuihna ka nei uhi.
Kimbawi in fel tak in hon enkol a, ama
hong lut nung ka innsung uh kipahna in a dim a, ka khangtou hulhul uhi.
Ama ziak in ka it masa Vungnou ziak a gentheihna ka tuahte awl-awl in ka
mangnglh hiaihiai hi.
Mou hoih in a innsung ah vualzawlna
tam tun hina e chi’n lungkimtak, kipaktak leh kituaktak in ka hun
omlaite uh ka hon zangtou ta uhi.
~Beita~
©Siamsinna leh Vakiangbu
Comments
Post a Comment