NA HON IT TAKTAK A LEH; TRUE LOVE WAITS

By ~ McMuan S Ngaihte

I thupi uah I lut ma un hiai I Bible chang tel uh en masa le:

Itna in a douzou a, a migi a: Itna in a haza kei a, a kisathei sam kei: Itna a ki-uangsak kei a, a huhamsam kei. Itna in amah thu lou thu a sa lou kei a, amah angsung a khual sam kei; a hehbaih kei a, hehsa in a omden sam kei; Itna in gilou a kipahpih sam kei a, a dik a kipahpih zaw. Itna in bangkim a thuak teitei a, bangkim a gingta a, bangkim a lamen a, bangkim a thuak khia zel hi.

~~~ 1 Korinth-te 13:4-7

Bible sim theih tung apat I na sim khak gige zaw le hisam veh, hilele a zuih lam in na hat khol kei sek a hiven. Awle, Itna thu hon genpih dek ka hi het kei, himahleh tulai bouruak omdan I et vel chiang in ITNA kichi dau ngaihlua, hou ngaihlua khat houh I hi ta di ua aw, aihkeh “SEX is next to ITNA” chih bang a ngai I hi ta uhia ka chih hun bang a tam mahmah sek. ( a sung thu gen sau ut lai le sum leh pai bang le gen dawk khak a le om kha mai thei ). Gen ta vanglak kuamah mitmei veng lou hial in awle, tulai in ITNA paulam in mahni sa-utna lam suk piching theih a hih nak a leh, neih leh lam, sumleh pai it lou hial a zang in i it leh ngaih ( FAKE) te thuzoh sawm in, khemtheih-khemmoh in pan I lak sawm lai un, tulai hinkhua (tulai standard) toh kituak a ki it mahmah leh ki ngai mahmah Thangboi leh Chingnou ki itna I sim suk/ensuk ding uh a..

Thangboi in, “ Ching, na hon it in na hon ngai taktak hia ?” chi’in a dong hi. Chingnou in le itna mit kilawm tak in a U’Thang a en tou a, “ U’Thang hon itlou, hon ngailou hileng hichi bang in na kiang ah ka om dia hia oi ?” chi’in a dawng kik a. “ Ching, hon it taktak lou na hi di, hon it a hon ngai taktak na hih a leh nang leh ken I mangngilh ngei louh di, I kar ah itna gui zam pen khauh sak semsem thei di thil ka ut lam na hon hihpih ngei ka lamen.” chi’in Thangboi in a dawng kik nawn a. “ U’Thang ei, na ut ka thei, SEX i kar ah itna gui hih khauh tu dia gingta na hih leh na ut bangbang in hon zang in, ka hon it leh ngaih lam nang le na thei, ka singthouna hon laksak in la, hon hihsiatsak in, ka hon nial het kei di. Himahleh huai na hihma in hiai na lungsim ah na ngaihtuah di’n ka deih hi…” chi’in Chingnou in a U’Thang angpom kawm in a gen zom zel a..

“ U’Thang, na hon it a na hon ngaih taktak a leh lungsim gim leh lungkham a ka om na deih ka gingta kei. Nang leh ken I mailam hun ah bang chi bang a hinkhua kizang tou ding hiam chih bangmah I gen thei kei. Khovel ah ka it leh ngaihpen himah le chin le Pathian remgel a hih kei a leh bangchi bang in panla in hahpan tawk lele I kiteng thei tuan kei dia. Huchi bang hun a hong tung tak zenzen a leh utleh utlouh thu hi nawnlou in midang a ka hih mai a ngai ding hi.

U’Thang, en ve, tu’n nang leh ken ka siangthouna hihsia bang hi ta le, ka pasal toh a nitak masa pen in zum leh kisuanglah kawm leh kizephawk ngoihngoih kawm in hun ka pan dia. Lungsim gimtak leh kisuanglah kawm tak in ka mittui a hong pawt dia, huai hun chiang in nang mah ka hon ngaihtuah dia, nang ka it leh ngaihpen toh ka kiteng khak louh poisa in I kar ah vaihawm tu Pathian tung bang ah ka vui dia, huchi mah bang in nang le midang’ pasal na hi tei ta dia, lamet phak le na hinawn kei di. U’Thang, ka gen na theihsiam ka gingta, ngaihtuah lai himhim di le, ka first night a ka pasal tung ah ka kipah kei leh ka hinkhua pumpi kipak thei nawnlou di ahi, hehpihtak in ka dinmun di theisiam kawm in hon ngaihtuahpih sam ve maw!

Chingnou in a gen zom zel a, “ U’Thang ei, tu’n ka siangthouna hihselou bang hi ta le, Pathian remgel louh hi tawk lele, ka first night in chu kei le kisuanglah hetlou in ka pasal maingal tak in ka maituah ngam dia, ka pasal in le siangthou ka hi chih a thei dia, a hon zahtak dia, a hon ngaisang mahmah di chih haih vual ahi kei. Huai hun chiang in hiai khovel ah ka it leh ngaih pen nang mah ka hon ngaihtuah dia, na hon it leh ngaihdan ka theih beh semsem lai di. Na hon it leh ngaih ziak a ka singthouna hon laksak thei hi zenpi a na hon kepbit sak ziak in ka hon ngaisang semsem dia ka hon suang mahmah lai ding hi. Ka kipah di na deih a, ka lungkham di na deih kei chih ka theih ziak liauliau in. Huai tengteng ka pasal kiang ah tangthu ngaihnop huai tak bang mai in i love story ka hilh dia, ka pasal ngei in le a hon ngaisang mahmah ding in ka gingta hi. Pasal gin om leh muanhuai na hi chih a hon theih beh semsem lai di.

U’Thang, nang le na thei, hiai khovel ah nang na hi ka it leh ngaih masak pen. Hiai khovel ah ka damsung teng leh ka sih tanpha in ka it leh ngaih pen na hi den lai di…” chi’in Chingnou in a muttui nul kawm in a lungsim diktak a hilh tiautiau hi.

“Ching, hehpihtak in hon ngaidam in aw, hichi bang lungsim piching ka na ngaihtuah kha ngei kei himhim, na lungsim nat di leh na lung-gim di chiklai peuh in ka deih ngei kei chih na thei. Pathian zar in I dam dia, Pathian in I tung ah vai a hon hawm dia, amah muang kawm in I kar a itna guizam pen phawk gige kawm in thumna toh I pang dia nang toh Pathian dan siangthou ngei a I kiteng ka lamen hi. Huai hun chiang in na siangthouna manpha ka lamen pan di. Pathian rem gel louh I hih tak lehle na pasal (di) kisuanglah hetlou a na maituah ngam na ding in na siangthouna ka hon kepbitsak gige di. Ka hon itna a lian deudeuh…” chi kawm in a it Chingnou mittui a nul sakta hi.

AUTHOR’S NOTE: Hichi bang dinmun tuak kha I lak uah le I om ngei uh ka gingta hi, om le a om tham ding, hichi bang hon tuak tou thei dinmun ah ding, I khangthak te lak uah tup leh ngim a’ ana nei bang le I om tham ding uh. Mihing pangai a piang I hih le zaw I tuailai hun mah in I sa utna le ana hat diak a, kidek zoh bang le thil haksa mahmah ana hi maithei. Itna diktak a na ngaihzawng IT leh NGAI na hihleh Siangthouna kichi I GOU manpha penpen ahia, I zahtak ding uh ahi. Hichi bang thu gen ding chi le gen di a tam mahmah dia hilele a tung ah Chingnou leh Thangboi kihoulimna na sim in na lungsim ah bang a hong dawk a ? Na sim zoh in bang na ngaihtuah a ? ITNA lam ah piangthakna na ngah hia ??

I zoh na ding in I Bible chang pansan uh en thak le ITNA kichi I theihsiam ngei uh ka gingta a, huchi mah bang in TRUE LOVE WAITS chi I hih man in “ A NGAK ZOU TE’N THUPHA NGAH HI”

 

©Siamsinna leh Vakiangbu