SEEN CIL VANGNGAIH NO

By ~ Mun Muanlian

Ka neutlai in ka veng ua numei kei khanvual khat toh ka kithuah thei pet mah ua aman le hon it a ken le ka it hi. Huai chu lawmta ki itdan a ki it ka hi uh.Amah min ahih leh NGAHNEM ahi a, ken NEM ci in ka sam hi. Huai lai in zaw ka ki it petmah ua schöol zong ka kai na peuh uh ah ka kaikhom uhi. Huai lai in ka khua ua pawl 4 tan a om hi.

Pawl 4 ka sim kum in aman pawl 2 asim pan a, kei class ding aban om non louh ziak in Lamka lam ah ka kai dek a kikhen khiat ding ka ngaihtuah chiang in ka om thei mahmah kei uhi. NEM in le a innkuante kia kei le Lamka lam ah ka kai ding ci-in kiphin a a nute’n ka kaina ah hon kai sak uh hi.

Kingai hi mawk le ung le lawmta kingai nungak tangval kingaihna kou kal ah a om thei mahmah kei hi.

Hun hong paitou zel sam a pawl 9 bang kon sim chiang in tangval dandeuh in kong omta sam a, Christmas vel ka zat chiang un a nuam thei mahmah mai hi.

Kei le pawl 10 ka sim kuan in ka lungsim zong ong piching deuh ahi ta sam dia, NGAIHNEM kiang ah NEM tun zaw pichin lam zong i manohta a nidanglai in bel friendship dan in i kingai a tun zaw nungak-tangval i hih toh kituak in nungak – tangvalte ki itdan in ki it ta ni maw, ka cih zenzen leh hon hehsan mawk hi.

Ken le, ” Nem , na hehna mel ka pian apat in tuni in non mu sak mawk a, na lungsimlou lam hon gen kha ka maw ? “ka ci a, hon dawng tuanlou in ka room chiat uah ka pai ua ken lah ngailawta amah suk heh khak ka kiven ziak in tuni tan in bangmah ka gen kei hi. Tua hi cia hon hehsan cih lunggel in zankhovak in ka kingaihtuah ta mai hi.

Nidanglai in zaw pawl 9 sim tan sung le nikhat toh bang in ka ngaihtuah a huai zan zaw kei a ding in a sawt khopmai.Zingtung in ka room kong ah lai them ana om a, sun chiang in huai school huangsung ah singphung ah hong pai in cih ana hi mawk ta hi.

Amin lah kigelhlou sun in ka vapai leh numei khat lehngatsa in ana ding a, ken Ngaihnem d sa in, ” Nem non ngakna a sawtta hia ‘ “ka cih leh kei lam hong kiheiphei a hon nuihsan gop in, Nem na hi lou ahihman in kei le ka pau dek leh ka dang hong awk zui in pau aaaa…. Ka cih leh hon paikhiaksan hi. Singphung apan in Ngaihnem hong pawt khia a, Umuan zantak dak bang zah tan na lai na sim a, na laisim kon suk buai d ka lauh ziak ahi. Na heh lua hia ci’n hon dong a. Aman hon gen zom zel a kei le ka lunggel thupi pen eive ci in hon taikhiatsan a ken le khaam ding ka cih ciah kipaklua ka hihman in ka khaam man kei a, room ah hon lutsanta hi.

Pawl 10 exam na ding ong naita a, Ngaihnem in non it taktak leh ci in challenge hon bawl a, na degree a kithei mai d hon ci hi.Kei le huai chouna in ka lungtang hon sun kha petmah a laisim hahpan in kong pang ta hi.

Exam zo ta ka hihman in Ngaihnem toh ki-omkhawm thei taktak non kei a, amah lah pawl 9 simtung pan ahih cia saturday kia hisim ta mok hi, ka omkhom theih uh.

Result hong suak ding hita zan zong ka imu ngam nonkei hi. Fail mok ta leng Ngaihnem in hon ngailou ding mite mai ah minsìat ding ka gel ciah huai zan bang imulou zen in ka ngaihtuah hi.

Result hong suak a ka min ka zonzon lehle muzou mahmah lou ka kahtha bang suak mai nguai deuh a ka kiheiphei lei ka sir pa un congratulation hon chi a, ” Sir ka min omloupi, bang ziak eh ” ka cih leh huai a tung lam ah a tuam a kigelhte hon ensak a, ka et leh top10 te lak ah ka min ana tuang a , kei le kintak a Ngaihnem kiang ah ka va gen a, aman le hon kipahpih lua a uMuan bangmah in zong kon loppih zou kei. Ka pi in a damlai a hiai sana khi hon bawlsak non phok gige na ding in na ok in chi in hon ok sak a , inn ka tun in ka pa’n ana thei khinta a,” Bawi, kön kipahpih mahmah ua na lawmte hon zawn inla ann nekkhomna khat ka nei pih ut ” hon chi hi.

Ken le lawmte bang zah hiam toh Ngaihnem ka zawn a an nek kuan in hun ka zat laitak un press te hong hoh ua, dotna bangbang hiam hon neih zoh un ken le, ” Amasa pen a Ngaihnem ziak leh Pasian hehpihna leh nu leh pate deihsakna ziak in hitan tung ka hihdan ka gen a, huai zoh in ka pa’n hun tamlou hon zang a , Shillong a maban sunzom ding ka hihdan thu hon gen a, huai zoh in thumna nei in ann ka ne uhi.

Ngaihnem ka kiang ah hongtu a kapkawm in, ” uMuan na zinnalam ah nungak melhoih pipi laisiam tampipi mihausa pipite toh nong kimu d ua , kei zaw non mangngilhta d maw ? ” hon ci a. Nem kap ken na gen zaw dik mah ven nanglou nungak dang himhim ka mit in mu lou ahi chi’n ka hehnem a, aman le a ann la in ka kam ah hon bah(bak) hi.

Zin hun hong tung phut mok d ahita a, kei le Ngaihnem te inn ah ka va pawt a huai zan in zaw luppih ka sawm hi. Aman le, ” uMuan hiai zaw hon khoih kei thei lechin ahoih d, siangthou tak in lehkha na simna non zoh ciah na ut dandan a khoih theih ahi ” hon chi a, ka kikhelah mahmah mai ua, zan dak 2am tan ka tu a, Nem in, “uMuan gin-om tak in hong pang in aw ” hon chi a ; ken le, ” Nem nang le gim-om tak in non na ngak dia, kong pawt non ciah kon pi d aw” chi in ka kivaikhak ua ; kikhelah mah leng khovel a om i hihphot chia kikhen phot ngai eita ve, chi in innlam ka zuan hi.

Ka va zin chu aw. . . . hostel sung ah keikia a kong om chu , maizen a thuakhak ngei mai… . . .

Pawl 11 ah ka bawl fuh mahmah mai hi. 12 kon sim chu kum a haksa petmah mai. Kha 2  le kikai nailou in Ngaihnem ka phone cia lah switch off hong kichi a, ka innkuante’n laisimna hon suk buai ding a lauh ziak un bangmah thu hon zasak ut kei uhi. Ka lawmte kiang a le thei sak lou ding in thu ana pia ua, bangmah thu theilou in ka buai mahmah mai hi.

Ka lung himoh lua ahihman in ka nu kiang ah, Ngaihnem tanchin ka dong threp a, ka nu’n hon dong kei a , ken le nu na tapa non it taktak leh hon hilh mai in chi in kap kawm in ka dawng a, ” bawi, i tate a deih khat toh khaam utlouh man in bangmah kon gen ngei kei. Na haksa sakluat ding lauhna a hon gen lou ka hi zaw ” hon chi a.Ken le ka nu hial hon kah chiah lamdang salua in , ” Nu aw , ka kingaisia kei ding hehpitak in hon gen ve ” chi a ka nget leh ka nu’n, ” Ngaihnem tuni in moukhakna hun a zangta uh ” hon chi hi.Ken le gingta taktak theilou lah ka nu’n zuau thu hon hilhlam le thei ngeilou ka hihman in thutak hi chi in ka pawm a kingaise deuh mai in ka om hi. NGAIHNEM No.apan hong ki ring chenchen ka lak leh kap kawm in Nem a taktak hi na hia ka thu zak, ka chih pat leh amah le hong kapkhia lualua a, a kikhem zou d sam omlou in tawlkhat ka kap uhi. UMUAN thuak zou non mahmah lou ka hi. Nang lah omlou zawmah. Kei ut thu le hi lou in programme hon bawl uhi. Vondeih zatam hon tawi inla insung manpha hon bawl maita in maw, chi in hon off khumta hi. Kei le kua mah theihpih louh in ka kapkhia a tua zan chu ka mittui leitung a beel om tengteng kidoh lehle dim ding in ka um phial hi.

Lai lah sim ngaihna lungtang om nonlou a hinkhua man ding dan kia ka gelna in kum hong kivei liam hi.

Exam hunta lai himhim lungtang ah om nonlou. Result hong suah taktak chu aw. . . nidang a top latu pa kha 3rd division kia in ka pang zou tahi. Ka pa mai chu mungam vual ka hi ta kei. Himahleh, ka pa’n hon theisiam a kipah a om mahmah mai. Bawi huai nabuai pihpih sang in maban a na zilnate a din buai zaw in hon chi hi.

Kei le ka lunggel khel in panthak ka la a lai lam ka buaipih thak a Pasian thu khong kong lunglutta a nikhat camp ka va lut leh sermon pa’n kei hon kok diak dan in thugen in ka thei mawk ta a, pianthakna taktak khat ka ngah hi. Pasian omlou in zaw mihing geel a tangtung thei sam kei maw. Kei le Pasian thu lam ka na ngaihven louh ziak in neusen lungdeih a chan ka hi.

Writer’s Note : Hih story simtu teng kiang ah kon nget ut ahihleh Pasian phok masak pen in nei a huai ban ah laisim a poimoh dan phok chiat le chih ka deih man a kon phuah tawm ahi. Laimal zatkhelh leh a thugen khak louh tampi om ahi chih ka thei . Huaite tengteng kimaisak chiat ni maw. Simtute tengteng sim nuam ua le. 

Lungdam.

©Siamsinna leh Vakiangbu