CHIAU MINTHANG TUITHA

By ~ Vz Vualnam

Tuitha chiaului chiau minthang aw
Vaimang in li bang hon chin kuan in
Zata gua bang hinna ding hon sa’ng
Gamlei sil bang apaalna ding sa’ng
Tu in li bang ching sial bang lianta chia
Gua bang hinna na hilou lai e
Gamlei paal ding in samlai e

Tuitha chiaului chiau minthang aw
Kumchin a ami tui bang na laak
Li bang chin hehvei lung na sou hiam
Singta siang batphu na zong hiam aw
Batphu la selung na kim na’m maw
Batphu na laak baang tadih ve aw
Sumlu hon sing in seta chia

Tuitha chiaului chiau minthang aw
Na chiau a lia-le-tang lungmawl a
Lam bang khial a sial bang tat na phal
Batphu na zonna hiam aw chi’ng e
Lia-le-tang na siang a lam bang khialte
Nuhsawl bang na liah zaw ding hiam aw
Biing bang na phou zaw ding hiam aw

Tuitha chiaului chiau minthang aw
Zata’ sungneek naak ding hon sa’ng e
Zata’ sungneek naak na hilou a aw
Lungngaihna naak na hong hi aw e
Zata gua bang hinna naak ding hon sa’ng
Zata’ kulsin na hong hi aw e
Khamkha’n hon veiloh ngawn ung e

Tuitha chiaului chiau minthang aw
Malneu a na luanlai ngai ing e
Theisen a i kholhlai ngai ing e
Tui bang na sianlai ngai ing e
Nang zong theisen kholhlai na ngaih samleh
Batphu na zon baang tadih ve aw
Tui bang siang kiik nawn dih ve aw

--------------------------------------------------

Tuitha lui minthang aw, vaite’n a hon chin deklai un tampite’ neekmuhna ding ka hon sa a, gamlei a paal na ding ka sa a, tu in na kiching venvonta a, neekmuhna na hi naikei a, gamlei leng apaal naikei.

Tuitha lui minthang aw, kumteng a mi na laak gige mite’n ahon chin uleh hehlua chin a phuba na laakna hia? Bhuba na laak ah na lungkim na hia? Bhuba na laak tawpta in, mi tampi lah na lata ngal a.

Tuitha lui minthang aw, na chiau a nungak-le-tangval haihuaitak a hong gamtat ding nana phal phuba na laakna hia? Huchi bang a na kiang a hong khialte nana liahkhuh zaw diam? Ahihkaleh na hon phoulaak zaw diam?

Tuitha lui minthang aw, mi tampite’ neekmuhna naak ding ka hon sa a, lungngaihna naak na hong hizaw maimah. Mitampite’ hinna naak ding ka hon sa a, a hankhuuk uh na hong hi maimah. Khakham ka hon veiloh uhi.

Tuitha lui minthang aw, neuchik a na luanlai ka ngai. I neulai a i kithuahlai ka ngai. Siangthoutak a na luanlai ka ngai. Nang leng i neulai a i kithuahlai na ngaih samleh, phuba laak ana tawpta inla, siangthoutak in ana luang nawnta in. 

©Siamninna leh Vakiangbu