ITNA MITDEL
By ~ Mun Muanlian
Writer’s Note : Zanlam a pen zaw awl in kon zom thak mai d adang khat kon gelh zual ma ding.
Itna i chihchiang a sut haksapi ahi. I pu
uh Solomon nasan in ana suikhiak zohlouh ahihman in zong ka gen siam
keikha mai thei . Mitdel chih a theilou om ding in kon gingta kei a,
thei chiat vek sa in i koih mai ding uhi.
Nidanglai in ipi – pu Kimboi leh Lalpu
ki-itdan saulou in gen zual ni. Lalpu leh Kimboi pen khuakhat ah na
tengkhom uh a amau tegel ahihleh aneu tung ua pan na kipawl thei khol
kei mah le uh hong pichin chiang un kuata kham zoh vual louh in hong
ki-it ta uhi.
Nikhat khompi mang ding in Kimboi leh
Lalpu hong kuankhom uh a vangsiat huai tak in a Gari tuanna uh tuahsia
in hong kipuk a huai lak ah Lalpu pen bang mah chilou a vangsiat huai
tak in Kimboi pen a tal keh a, a si hah luan sim ahihman in khua phoklou
in kipuk a amit ah sisan lut kha ahihman in amitte geel kisia a mitdel
sa in om hi.Vangsiat huai sawnsawn e, chi diam ah Kimboi pen tanu
neihsun ahihman in apa’n itlua in apa khakham vei in hong beisan zoh mah
hi.Nutate meithai tagah in khosa uh a zan chiang bang in a nu imu thei
mahmah lou a kahtam khong lou kawm in lupnatung ah mittui nul in khua
vak thei zel hi. NGAIH LUNG IN NON GEL NGEI HIAM NA VAWN LEH NA THAI
ZUAPA NGAI IN ZANKHUA SAWT MAIMIT SING THEI KEI VENG. acih cia Kimboi in
za a, anu lungngaihnate phok in amah leh amah kithah bang ut hi.Kimboi
pen tagah himawkta ahihman in Lalpu nu leh pa in deih sak nonlou in khen
thei na ding vaihawm in Lalpu gamdang ah laisim ding in sawl uh a,
Lalpu pen in Kimboi nusia a koimah a pai louh dingdan gen hi.Tua bang a
agen chiang in apa hehlua ahihman in Kimboi tagah bek thamlou amitdel
khat toh na kiten ngeingei uh leh ka innsung nong sik thei kei ding hi,
chi in Lalpu tai gawp hi. Lalpu in bel a mitdel a tagah ma a ka it,
amitdel atagah man a ka itna kiam thei mawk lou ding hi chi in a in uh
pawtsan a Kimboi pi in apate inn toh kigamla deuh ah khosakpih hi.
Anu, apa ong kikhonung sik phing uh a ahi
hang in Lalpute om na thei pha nonlou hi. Lalpute nupa pen ki-it mahmah
uh ahihman in sun chiang in Lalpu in asep theih, bawl thei teng bawl in
nuam asa mahmah mai uhi. Mitdel khat toh kiteng himahleh min a
khosakdan uh a eng thei mahmah uhi . Suan leh khak tampi hong nei uh a,
tun eite bang amau suan leh khakte i hi uhi.
I topic ah i lut non ding uh . Ipi-ipute
hibang ana ki-it uh a, tua eite khat leh khat i kigal bawl mok ziak un i
gam akhang zom mahmah kei. Itna nei thei ding in panla thak chiat le
hoih ka sa ei pumpi kia i itlai teng insung nuam Zogam nuam e bawlkhia
ngei kei ding uhi. Adiak a itna in ei hon taisan hia ? En itna taisan ?
Khaile , guai panla thak ni delhni phalai ding i hi uh. Itna omlou in
zaw pilna zon ahak . Nektawm zong le ahak . Bang teng ahak ahi. Itna
mitdel sak in innsak innkhang ki-it tuah diamdiam a omkhawm dan khat
panla thak le chih deihna a hiai hon kigelh ahi.
Genkhial , genval a omleh kimaisak chiat ni maw . Itna mah masuan ni koimun peuh ah.
©Siamsinna leh Vakiangbu
Comments
Post a Comment