THEIH VANGLAK KAWLGIT SULUUK

By ~ Thanuam Dahpa

Kawlgit imu chiat ding ua ahuuk hun chiang un atal in a pi delh in a bohzel a khatvei kia boh a tawpsan lou in delhzui zel in boh thakthak hi. A mukhalou na om uleh na enle uchin khatvei boh a tawp vengveng lou uh ahi. A Huchih ziak ua ipu ipate’n paunaak ana zang mah uh ahi ding.

Hiai paunaak eimi kia ading a ana gen uh ahikholkei ding.. mihing peuh huam a na kigen paunak ahih I gingta a mitampi lak a kuahiam in a theihpen kia buaipih a a uanglua a hong om chiang a iplah huaisa a Theihvanglak Kawlgiit Suluuk chia na kikou uh ahih ngei gintaak huai hi.

A thu omdan in thu kipahpih huai ahi kei a khengval lua leh a uanglua genna thu ahihdan theihtheih hi. Thil himhim a khengval a ihihchiang in I thilhih pen hoihmah leh aval hong hita ahihman in asiatna in ahoihna teng liahmang a hoihlou ahong hizel hi. A hoihloupi tampi vei hih ahong hoih kiik chih lah omlou a…a hoihlou lampi zuih nilouh a hong hoih chih omlou ahihman in ahoihlou lam ihihtam chiang in hoihlou deuhdeuh a atawpchiang in hoih hetlou hongsuak hi. A hoihlam ihihchiang hoih mahmah a kuapeuh a ding in kipah huai in mite pahtaak kiloh hi. A hihziak in hoih hiven chi a mite ninleh mite subuai dingtan a hoih ahihman a ihih hihchiang in huai I hih hoihpen hoih tamlua in sia a hongsuak a kuaman hon kipahpih zounawnlou in hon muhpih peih nawn kei uhi.

Hiai a khengval a gamtatna eimite I sisan ua belh mah bang in thilpeuh ahun chih omlou hial in I hih nilouh uhi. I kim ikiang ate thil hih hoih a itheih peuh uh tunung saupi ngaihtuahlou hial in ihih souhsouh ua iki eltuah zomah uhi. Hiai theih vanglak I Kawlgiit Suluuk ziak un I gam ah ahoih chihding atam nawn hetkei hi.

I gam a tawldam namun ding a hoihteng minsiatna mun ahong hita a… khosung chiak vengvung lak a bangmah concentration omtheilou lak apan a tawldam ut in imundai ding a hoih khopi kiim a mun nuam I neihteng galmuanlouhna mun isuah vek uhi. Khugadam kiim a mundai tak a tui kivung dildial en a va-om a nuam a I lungsim tawldam in I lung anuam mahmah hi. Ahihziak in I theih vanglak I kawlgiit suluuk nilouh ziak un a khengvala iva gamtat ziak un tu in gaal muanna mun hilou in ki sukzahlaak namun leh I pawlpiten thukhauh taktak honsuahna uh kipatna hongsuak ta hi.

Tuma a thu om vengvung ziak in I gam a mun hoih leh iki recreate namun a vahohding kisiamlouhna kinei mawkta hi. Huaimun a hohte mipin koihdan khat hon neile uh kilawm in vahoh dingleng kisuanlah huaikhop hita hi.

Gen sawmlouh tampi I genkha a eilak mahmah a enle hun sawtlou apan in picture comment theih ahong hita a Theihvanglak Kawlgiit Suluuk in sungnimhuaikhop in picture chituamtuam in comment box teng I luahsuak sak uhi. Chiamnuihna dan a zang in ahun chiang in picture comment bawl le zaw hon sulimtu leh hon suhalhtu a zat theih ding ahihbaan ah informative tak a zang a navaak huai mahmah hizen ding himahleh khenkhat te Kawlgiit Suluk nilouh ziak un muh a muhpeih huailou leh huchidan facility hong om poisak huai khop in ikoih hilhel uhi.

Mahni ki enkailou a mite hih ahoihlouhna mah thei a gengente hive hang picture commment theihdia hon bawl sese uh ngaihtuah khial uh hisak mai ding I diam……!!!

Mi thilhoih bawl suse thei eite I hi a, mi thilhoihlou bawl bawldik theite leng I hituan kei ua a SOISEL siamte eite I hi zel uhi. Eite mahmah…

 

©Siamsinna leh Vakiangbu