NUNLUI LIIMLANG
By ~ Pau Lian
Office kai vaipai hun a paitheilou ka
hihman in sawt simtak nasep zawhkhiak vet dia kilawmlua tamlou sem in
ka office sung ah ka tutlai in ka tanu upapen in hon call a”pa..hong tungdek nailou maw ? Gilkial gawpta, ka naute nong paihak luat ziak a nuak uh eita ve ! ” hon
chih leh ka kiguih tha bang hong suak a..eh ! meh ana huanlou neimah
voi maw…ngaihdam.. Nasep di hong tam loguih a nangbek in hon theisiam in
aw bawi. Mandek petmahta ka hi. Nanaute ana
khem lungdam inla keile nanu tawnlou in inn kong paisuak di tuni
saminsa hon lei na di ka hi aw chi in ka phone ka sakhau ah guangpah in
ka nasep bangteng ka hih poppop a, ka zawh siangtak in office kong a
auto te ah ka tuang a, bazar mun ka tun in bahara pia in saminsa
kizuakna lam ka manoh phei hi.
Khomui kuan ahihtak toh saminsate koi
a limchi a chih ban etphei a ka omlai in ka etna pam zodeuh ah numei aw
ka zakngei hi awmtak khat in, “Ulal, tuni kei a hon laksak ve khatvei
sunsun hon chi hi.” Lawinu dawr ngak tha-iit chiang a saminsa naute khem
lungdamna dia ka leina gige ahih toh kam in bang le hon thei om hialta
adi maw chikawm in nuideksim in hon satun ka enphei hi.Meiphu tung a sa
kitung sou lutlut, a khu a belgong a hon zaampawt ten tua minu meel liah
ahih man in amel ka mu pah theikei a, ka naihphei a, akiang ka tun in
ka theihngei luat, kum tamtak khelah tak a ka na nungdelh nu “Kikim” ana
hi maimah hi.
Lamdang satak in, “eh! Kim, chik a
Lamka hong om uh e ? Chik apan sazuak a om oi ? Nidang in lah kon
mungeikei a” ka chi hi. Kikim in leng sawt thouta eive.. Hilehle hiai a
ka sazuakna zaw ninga kan a phanai kei, nong tuahkhak zenzen ziak a kei a
mahmah hon leisak leteh chi a zum leh zah khuallou a kon sap mai ahi
hon chi hi. Ken leng Kikim kiang ah, zum zenzen lou e.. nekzong
chiatchiat sepna lamlam ah hahpan ding mah ahi. Phathuai kon sazaw, nang
zuak ahih ziak in saman tam leh leng Teng 300 man kon laksak di ka chi
a, Kikim leng kipah meltak in sanou la in hon tehpah a, a teh kawmkawm
in naute a damna uh maw chih khawng in hon houpih a, a tui tamdeuh kon
hap di aw chikawm in a teh zawh in hoihtak a hon tunsa in hon pia a, non
lei zelzel di aw. Vang a phat leh hiaimun a tui zelzel tading ka hi hon
chi a, ken leng hitham heh aw chi in ka pai a, auto mah a tuang a
innlam ka zawtlai in zawlluite khawng sazuak a tu ua, panpih theihna
omsun asa uh va leisak di mah zaw eive chi a ngaihtuah kawmkawm a ka
omlai in inn ka tung khongta hi.
Inn ka tun in nautumpa bang nuak in
ana houpih nuam hetkei a, endih nau sameh hon puak keive ka chih chiang
bang in kuaman duhkei nong pai hakhak toh chi in a lehlam nga peuh in a
kap maimah hi. Ka tanu upapen kiang ah, ” nau, ann thukpah mai aw na
naute gilkial lumlou phet uh hi. Kei kong kisil dia nou ana ne le uteh
aw ” chi in ka va kisil hi. Kakisil zawh in ” ken na nu ka va pi dia,
kuamah kholai ah nana pawtlouh ding uh. Mei apai leh TV ana en unla,
kong tun chiang ua laisim kipat di’n ah “chi in kei leng ka pawtkheta
hi. Dak 6 lak in lawinu toh inn ka tung ua, mei pailouh geet ziak in
naute kisukap in ana mau vengvung uhi. Naute kiang ah laisim di’n ka
sawl a, kou ann ne in ka kihoulim uhi.
Tuni a sum muhdan tangpite ka genlai
uh lawinu’n koi a sa ahi huansiam na vanglak e hon chi hi, gensau leng
lah lawinu’n thil omdan theithou ahih chiang in ah chi in tuni muntuam a
ka lei ahi. Khat veivei koimun a limdeuh chih bang etngai ahi chi a
amun ka khek hi. Lim nasak le chu huai a lei zelzel di himai eivoi chi
in saguh bang ka kheuh matmat hi.
Nitak a hong hih in lupna tung ah
ihmu theilou in ka om mawk a, ka ngaihtuahna bel, huai hunlai khawng in
Kikim te khawng in hichitel in ana nawlkhinlou uh hileh tua hiai a ka
ang a ihmut nuamtak a ihmu di uh hia maw peuh chi in ka ngaihtuah a,
zite ang a ihmu hithit napi, numei dang va ngaihtuah chih bang zumhuai
ka sa sim alah ngaihtuah louh theihlouh leh ahun in hon pokhe mawk ahih
na ah huai nitak in thu tampi ka ngaihtuah kha nilouh mawk hi. Ama
dinmun in kei ding hileng bang ka ngaihtuah diam aw ka chi a, ka
zawllui, ka tanzawhlouh khat mehzuak maimai a a om uh poi ka sa a ; ahi
inlah panpih theihna bangmah ka neikei zel hi. Zawllui tamlou ka na
neihkhakte bang a hinkhua uh ka sut tuah a, deihlouh a i na pampaihte
khawng in hinkhua nuamsatak a ana zangzaw uh ahihdan ka musuah a, ei a
vualzawlna kimkhat tang uh a zezen de o ! chih theih ding khop in
lamdang ka sa hi.
Nitamlou painung in naute bang in anu
buaini a innsung a dia settak nailou uh ahih toh chi in Kikim kiang ah
meh leinawn ding in ka va pai a, huaini in bel Kikim ana maitai hetkei, a
kun dedu a, hon en ngam hetkei mawk hi. Ken bel pawng maingal lua hikei
lengle maingal simthou ka hihna toh ka tusuk a, maitang ka et leh a
mittung khawng a bawk niuniau a, a khutzung lak khawng ah liamna ma a om
ningneng hi. Keileng thuduh chih mahtak in bang chikha oi ? Namai
khawng bawk a bang mawk a, gari accident maw ? ka chi a, Kikim in leng
bang thupi kei, zan in kisildeklai ka kitalpuk a ka kitatliam a hiveh
chikawm in ka salei ding tunsa in hon pia a, kipahthu a gen a, ken leng
en vungvung kawm in piching khatzet tuban kitalpuk nonkoh chi a
chiamnuih in ka paisanta hi.
Nteng hindan tuam chih omlou, angei
tengmah semtou in hunte nite tampi tak a painung in nikhat ofis lampi le
ahih toh chi in mehlei ding mah in bazar ka baang a, himahleh huaini
Kikim ana tukei hi. Bazar nupi dang te kiang a ka kan/dot leh alak ua
khat in, ” Nukim damdawi inn a om hiveh aw” hon chi hi. Ken leng tuanu
kiang ah abang chi a thethup a, ka chih leh tua nupi nu’n a lawmte en
guauguau kawm in, innkuan alah neek zong pipen, thuakgim pen huchih lai a
le apasal khutthak siakna a pang lailai ahi. Kou numeite zaw ka genthei
tel uh – adiak in bazar nupite. Ka kibangkual vek uh hon chi latlat hi.
Ken leng gen ding theituanlou in poina sese e chikawm in tua nupi ka
houpihnu sazuak lei in ka paisanta hi. Kikim bel kum 10 paisa nunglam
teng chiangtak a ka theih ahi a ,apasal neih a leng zum leh zah khuallou
a ka va loppih ahi hi. Ka lawinu ngei toh leng high school a kaikhawm
ahih ban uah Kikim pasal Mangpu te toh leng kei lawinute kilawmta uh
hikha lemluam hi. Nitak a hong hih in ka lawinu kiang ah, Kikim mukha ka
hih dan leh ama sazuakte leizel ka hihdan ka hilh a, ka lawinu’n leng
hon chiamnuih a, eh ! huchi ahi a hinteh maw lim nasak diak hon chi a, ”
nang lim nasak man hizaw veh, kei non ngoh dek a, na lawmte zi ahihziak
hi, ” ka chi hi. Ka lawinu’n leng zawlluite meh huan khawng nekha
naikhang en zaw hon chi a, thudang gen saulou in ka ihmuta uhi.
Khua hong vak a, ngaihtuahna bel mial
in tuamlai mah bang in ka om dedu hi. Ann ne a ka omlai un ka lawinu’n,
” bang chi oi, na hi dedu a ; puaknat luat nei mah bang in na om a ? ”
hon chi a ken leng bang chi kei veng aw. . . . ka ihmu hak a huaiziak hi
ka chi hi. Ann nekkhit in kei leng ofis kuankawm in lawinu dawr tan ka
va kha a, lawinu’n leng huchia lungsim noplouhna khop a veilai nahihleh
nitaklam na tawp ciah vaveh leng eivele hon chi hi. Ken leng gen ding
thei ngellou ka hi dia, huchi hial ngailou e ka chih leh lawinu’n ..
ngai thou e, Kikimte nupa bang nidang a ka lawmhoih tuak uh ahih toh mi
damlou buaisia vaveh a khawkna omlou ahi chi in theisiamtak in veh ding
in hon lemgeelpih hi. Sun hun in ofis sung ah ka ngaihtuah nilouh a,
hiai zawlluite ziak a hichi om chih zenzen, ka lawinu a ding inle thil
kihhuai hihkha khong lou ding ka diam aw ka chi a, ka lung a buai hi. Ka
lawinu’n bel nidang a ka tungthu uh Kikim toh a theih lumlet ahihman a
hon theisiam hamham hiding in ka ging a; ahi in lah a guuktak a papi
nung natawm a zawlluite ka huchi awlmawh amah ka zi a ding in thil
puaknat huai ahi de , o ! ! ka chi a, ka lawinu lungsim bang ka theinuam
petmah hi.
Chihmawh hun a tai ngeina chih paipih
in suun singpi dawn hun in kei sang a upa zawtham ka seppihte Pasiam
kichi kiang ah thil omdan ka hilh a, aman leng hon hehnem a, amah kiang
ah Papi midang in leng hichi bang in a hunlui khawng uh a sut-sut thou
di uam maw? Hiai hunlui suut kichi zulhzauna a diam ? ka chih leh Pasiam
in leng, ” suut zenzen e, mitam zaw nupi, papite hunlui ngai vungvung a
om uh ahi. A tamzaw in a imm mang ua chih manthu ahi. Nang leng na zi
hilhlou in non imm mang hun hong om na ding ahi” hon chi hi. Ken leng
Pasiam kiang ah, imm manglou hial, ka zi in leng hon theihpih ahi ,
hiaithu ka chih leh lamdang asa mahmah a, “Nang na lungsim teng na zi
hilh maw ? ” hon chi a, ken leng he..hilh e. Thuguuk ka zi ka neihsan
kei. Tua ka migennu ka zi a ding in nidang a a classmate te ahi a, a
pasal leng ka lawinu lawmte ahi ka chi hi. Pasiam in leng huchi ahihleh,
” nang a ding in Kikim te nupa le na lawm chihna eivoi maw” hon chi a,
“Kikim zaw kum tampi thuah khamah ing e, a pasal bel a mel khatvei chauh
ka muhpat ahi ” ka chi a, lamdang asa a, a theisiam theikei a gensau
zawdeuh ding in hon ngenta hi.
Hun paisa in sawt kuamtak, kum 5 vel
Kikim toh ka na kingai ua, kikhen chihte om nonlou ding a ka gintak lai
in kei chitlouh ziak mah leng ahi dia, ka kal uh hong sia in, midang
khat hong kigolh mawk hi. Huai tuh ka kingaih uh a kum 4na ahi. August
khabul in pawlsawm zou chi in mundang ah kai dia ka omsan nungzek ahi
hi. Kihou tuahna ding lah tulai dan a mobile kichi om nailou, khopi ah
PCO om mah leh innlam ah a om nailouh man in laithonte kikhak geigei in,
awlmawh tak a ka omlai un keisang a, chinzaw, pilzaw, siamzaw, hoihzaw
leh neizou zaw hong langpang in fuihna chi tuamtuam a fuih in Kikim
lungsim tuh kei apan in ana kai gamla hiaihiai ta hi. Bangmah thu
theilou a om in itna laithonte khakzel mah leng a tamzaw a thuk kikna ka
munawn kei a, Christmas suty innlam pai a it leh ngaihte mudia ngaih
lenna Lamka zuan a kinemtak in ka pai a, himahleh huai ka kinepna
vuaksuak sak in a om hi. Kikhenna mumaltak leng omlou a Kikim in
deihzawk midang ana neihsanta ahihdan lawmte tungtawn in ka za pah a,
gingta theilou ka hihman in amah houpih ding in ka tunni in ka
kuan/hohpah tingteng hi. Lawmte gen bang ngei in thil paidan chiangtak
tuh ka va musuah a, huai ni mah in leng Kikim leh a lawmthak pa meiphu
awi in ana tu ua, mikhual kisakna lianpi lungsim a ngaihtuah kawm in kei
leng a kiang uah ka va tu hi. Huaihun a kou mithum tuteng el sang-ak
lungsim pu ngen ka hi uh ka chi nuam hi. Kikim in hon en ngamkei a, a
lawmpa toh ka va kihou ua, tuapa’n zaw a suanlam ” vasa lenglai a kap
siamsiam a ahi” chih ahi hi. Chimawh kisa in ken leng awl in kihou ni aw
Kim chi in ka paisanta hi.
Sun a ka ngaihtuah na lehnih zaan in
ka ngaihtuah a, ka puak a gik a, ser a tehtheih hileh bang gik huntawk
mahmah ding in ka um hi. Ihmut theihlouhnate’n hon tuamta a, pasal toupi
himahleng khasiatna in ka dim a, ka mit a mittui pawt kei mah leh ka
ngaihtuahna leh ka lungsim a kapkap ta hi. Hichi tel a bawl di’n ka
kilawm a hia ? chi in kei leh kei ka kidong a, khovel a mi hichi tel a
tam na lak a numei in khenlou pi a adang hon neih khum..Hon kopkhum chih
himhim chi in khatvei chiang in ka hehtha a suak a, amah ka mudah a,
mangngilh ka tum zel a himahleh, ka mangngilh sawm na zahzah in ka
lungsim ah hong kilang a, ka thuaksaim theikei hi. Hichi tel a ka
hinkhua a dia mi poimawh, tuipi bang a luangkang ngeilou a vungden a ana
khawl dimdem gige ding ka sak, tua ana luankang mawkte mak ka sa a, ka
lohtheih omsun zaw kei leng mihing khat ka hih leh chi in sapkik ka
tumta hi.
Ka samzel a, kamsiam tawpkhawk in a
lungsim dingdan ngaihtuah vengveng kawm in a hehpihna ka ngen zel a,
himahleh a tel zawk anglai kei a sang a lumzaw, bitzaw leh nuamzaw a hi
kha mawh kei ding, a dawnna bangmah ka mukei, bangziak a hichi bang a
hon ginom louh san ahia ? chih leng ka dongkhe zoukei, a zum a, a khasia
a, ka ngaihluatdan a theih thakthak chiang bang in a mitte ah khitui
hong luangkhe mah leh kei kiang ah hong paikik lem a sa thei nonkei mawk
hi. Kei mimal tak in ka ki-enchian a, chitlouhna genseng louh tampi ka
kimuhman in thu saulua vek ngamlou in Kikim kiang ah lungkham, dah, kah
leh mangbat buainate na tuah hunhun in nang panpih di’n ka om dia, a
haksa zaw hinkhua zang a i kimuh ni in leng theihlouh midang bang in
kilehngatsan kei ni , ka chih ahihman a hiai ka kichiamnate’n tutan ka
sin ka lung hon vutlai ahi, chi a Pasiam ka hilh leh, “Pasiam in leng
pasal khat hingal a hichi bang a hon nawlkhinte na awlmawh teitei thil
kilawm hi a na koih theih mawk mak ka sa, min hon deihkei a, puanse
nutsiat a hon nutsiat leh bang a, a lungkham ni un leng enle nuihsan
samlou di ! ? Tu na hun hilou maw, nang leng awlmawh dah suk, denchiang a
na nupa kal uh leng buai thei hiveh, ” hon chi hi. Ken leng Pasiam
kiang ah, “ka nupa kal uh zaw a buai kei ding. Kikim hon bawldan
chiangtak a thei a, Kikim toh tua a pasal kal a palai a pang, Kikim
pasal a dia lawm muanhuai tua ka lawinu’n hehpihna mit toh hon en a , a
lungsim teng hon piak ziak a hichia kitheituah ngen kiteng kha liimliaam
ka hi uh. Phuba la nuam hileng zaw Kikim tung ah ka khutlum kha leng le
ka kisiamtan zoulai ding. Himahleh phu la dia kingai ka hihlouh ban uah
a hon it zawh kei leh leng itna hichi ahi chih hilh dia amah ka tel
ahi. Damsung a di’n zi leh pasal in kinei kha takei mah le ung, ka itna
hichi ahi chih ka langsak nuamlai, ka zi ka itna kimkhat Kikim tung ah
leng langsak theithou ka hi ” ka chih leh lamdang a sa mahmah mai hi.
Pasiam in leng awlsim tak in, “Lal,
ken leng hichi danthu ngaihtuah lotham ka hi. Nidang a i hinkhua ana
khoihkha lua tekhawng hinkhua haksapi mang/zang a om i muhkhak chiang a
zaw i lungsim nuamlou mah eive. Maigum deuh a i kipaipeel ni bang
omtham. Hunlui ngaihtuah hang a, mite hon bawldan i lungtang tawng a i
ngaihdam theih ngeilouh bang om; hilehle huaite tata ahi haksatak a
hinkhua hon zat chiang ua, huailai khawng in hichi tel in ana nawlkhin
lou hile teh zaw maw ! tukhawng a mehzuak leltak a mi inn teng a vialvak
lou ding hi chin a chih phet a om. Muniam sim lele hehpihhuai sakna
lungtang om teitei ahi. Kei bang in ka zi hichi danthu himhim ka hilh
ngeilouh hang a zawluite muhni a liimlang et bang a hunlui mu dundun
thou ka hi. Mihing kichi hunlui ngaihtuahlou omlou ding ahi. Mi panpih
thei dia khosa hi a, na kichiamna bang ua na panpih theih a na nupa kal
uh a kisiat kai leh bang a khawkna om zenzen lou ahi” hon chi hi.
Sawt kuamtak ka kihou nung un pai a
hong hunta. Pasiam in leng innkiangte damlou vehnop a neihman in hon zui
a, huchi in Pasiam toh ka lawinu dawr lam ka manawh kawmkawm un ka
kihou uhi. Dawr ka tun un ana lun mahmah a, lawinu buai kisa lua ahih na
toh lawm leng ka neih thou toh chi in ka kuansan maita uhi. Damdawi inn
ka tun un Kikim leng ana ihmu a, a kiang ah a tanu kum 8 vual ding
maitai tak in ana tu a, amah toh sawtlou ka kihou nung un ken leng a
minkhawng ka dong a , anu damlouh dante leng ka dong hi. A tanu in bel
mukha kei mahleh apa vuaknate ziak a liam ahihdan hon hilh a, a tung in
gim mahmah himahleh a dan omlota ahihdan hon gen ban ah anu ihmu lai a
hon phawng sawm hi. Damlou ihmu lai phawng chih hial zaw hidah heh chi
in ka nial a, hiai na nu a khanlawh chiah Palal in hon vehna chi in ana
pia in aw ka chi a, ka dingkhia a, Pasiam damlouh vehna ding lam theilou
himah leng huailam manawh in ka pai mawk hi.
Damdawi innsung ah Pasiam zong in ka
va kivialleh a, muzoulou ka hihman in a kongpi lakkhoh ana kingak mai
heh chi in kongkhak kiang a tutna lam zuan a ka pailai in tua Kikim tanu
mizong hi omtak a vialdak ka mu hi. Kei leng a kiang ka tun in, “kua
zong na hia, nau ?” ka chih leh aman leng Eh . . ! Nang hong zong keive.
Na paizawh nung a ka nu hong thou a, va samkik dia hon sawl a, kon
nungdelh leh hon mupah lou ka hi. Ka nu’n hon munuam teitei ahi a chih
ziak ahi hon chi hi. Ken leng bang .. kimuhnop luatna di le om sam a !
chi kawm in zuih ka thuah a, anu lupna lam ka zuanta uhi. Kikim in
kongkhak lam lamentak in ana en a, ka lut phet toh kiton in ana mupah
hi. A mel ah kipahna himhim a omkei chih ka mu a, zumna leh kisuanlahna
ngen a dim hileh kilawm in thou zoulou sasa in tuttouh a sawm a,
thouzoulou ahihman in a tanu in a phongtou a, khut liing nelnel kawm in
chibai hon buuk a, hon enngam kei hi. Sawtlou dai dedu a ka tut zawh un,
a tanu kiang ah damdawi lei di’n a sawl a, a tanu leng feltak in a
kuanpah hi. Huai bang hun in kei leng papi hita, Kikim leng nupi hita
mahleh nervous na a dim mah bang in ka om ua, nidang a ka kingaihma ua
kimuh masak ni sang in leng nervous huai zaw khat in ka om ua, kei
omlouh nalam a tuithawl a tui hon dawn zawh in keilam kunkawm in hon nga
a, asam in a maiteng khuh himahleh huai samte kawm apan in khitui a
hong takkhe keuhkeuh ta hi. Ken leng bang chi e? Kap na maw? Hai na
chia chih toh thuah in gen ding dang leng ka theihbeh tuankei a , ka
kiang a damlou vehte khawng in hon muh ding ka zum man in Kikim kiang ah
milak ah kideek sawm aw. . . Naupang hilou na hi ka chi hi.
Kikim leng a hong pau a, “Ulal, ka
hinkhua ning lopetmahta ka hi. Sisuk mai leng ka chi a lah, ka tate ka
awlmawh zel. Khotheilou leh hai mahmah lai, apa etkolna nuai a a khanlet
zawhlouh dingdan ulah ka muhsa ahi a; kei zaw hamsiat a om ka hi, ka
kichi. Zumna ngen in ka dim. Ka pasal lah hichi, amah ziak a maizumna
gentaklouh, zawnna tampi ka tuah ban ah, enve ! hiaitan hon tun ahi.
Damdawi man ding natawm neilou a mite vehna a kinaamtak chihtel lawmlawm
ka hinkhua haihuai zang ding ka hihlam nana theihpih hia, nidang in?
Huailai khawng a ken ka na theihkei leh leng nang bek in hon kaikhe
teitei kha hi leteh na zi ka hihlouh tawp a le hinkhua nuamzaw deuh zang
di hing a maw ! ! Kei a diklou ka na hih gige dante theisiam panphet ka
hi. Ka hon bawldan ah na lung a kim kei ding chih tan leng ka thei.
Hilehleng, nupi-papi nung tantan a na hon khotuah nate-chinglou taaklou
leh nelhsiah theih dia huathuai ka hihlai a leng hiaitan non awlmawh
nate thupi lua ahi. Ken zaw bangmah a hon din zoulou ding ka hi aw” hon
chi hi.
Ken leng, “Kim, na lakdan dik nailou
ahi. Ken kei tung a non hihdan teng hon thuk hileng, tua hiaimun a na
lupna kiang a na thugen ngaikhia a hong tulou ding ka hi. Nang leng,
nidang a ka thugente ngaikhia hile teh zaw tua hiai khawng a lupna ngak a
lungkham tak a lumlou ding leng himaithei na hi. Nidang a ka heh lung a
ka gengen sekte khawng genkhiallou ka hi. Thilhihte kithuk ding a hih
hilou ka hi. Nang leng a vangsia hilou lai na hi. Na pasal hichi a a om
a, thulak huailou a a om leh bang a hia ka hihlouh chihte na veel ding
deih ka hi. Hamse thuak kisa a hiai lupna tung a sih telzaw nuamphial a
na lup in bangmah hon posuah kei ding. Na pasal leng hih di theilou a
zukham a nang hon vo-ut tuntun leng ahi hetkei ding. Na pasal deihna na
zuihpih noplouh a tamziak a thil paikhial hizaw ding ahi. Mihing hinkhua
kikhek zel, lungsim leng kikhek zel ding ahi. Hiaibang pasal kem dia
Pathian in hon muang a kei a kipan hon lakhia hizaw ahi. Tua na pasal
zukhamhat na chihpa nidang a mihoih, kamsia a zatlam leng ka theih
ngeilouh tua hichi bang a zite vua a kitom gige thei ahihleh, nang a zi
in mohpuakna zoulou lam hiding na hi. Na hong dam dia na pasal deihlam
non zong dia, na pasal kipak leh hong kikhek dia sepna nei le ahi
ngalsam vele. Na kampau kidek teitei inla thuak a ngaihna ah thuak
mualsuah teitei leteh hong kibawlhoih hun hong om dia innkuan nuamtak
leng na hong hithei na kei ding ua ” ka chi hi.
Kikim in leng, “kei diklouhna leng
tam mah e. Tungnun kituhna ziak a ka pasal hinkhua suse dimdem ka hita.
Nidang a nang toh kei a nuamsa zaw hih utna a nang ka na nawlkhin bang
a, tua ka pasal in kei a nopna mulou a hon nawlkhin a, zu leh sa a nopna
zong zaw ahi chih leng ka thei. Hilehleng, hiaibang a thawmngaih taktak
a innkiim, innkiang ka suk patauh nate uh niteng hinkhua a routine bang
a ka zat uh hita. Khek vual leng ahi nawnkei. Amah lah kholai a hun
teng zangbei. Kei lah mehzuak a nek zong. Ka tate uh inn a keplouh
zuunlou a om uh. Sum hau, neih leh lam hau, ka na tel in zaw ka hinkhua a
supoi telmai ” hon chi hi. Sum hau, neih leh lam hauloute kuan tellou
mah ahi. Mihing in a nuamnuam kilunggulh mah ahi. Himahleh, huai a nuam
dia i gintak i teel pen a zatdan i siamkei leh a haksa pen hizaw ahi. Na
hong dam dia innkuan nuamtak non zatsawm di uh aw. . . Ka paihun lawta,
ka na paiphot di aw , chi in ka dingtou a, Pasiam ana man nailou ding
ka sak leh chim chitak in innkong ah ana ngak a, innlam zuan a ka pai
kawmkawm un damlou ka vehte uh thu ka gentou ua, hinkhua khong genkholh
theihlouh ahihdan ka kikumtou ua, himahleh huai hinkhua i genkholh
theihlouh pen a zatdan i siam nak leh a haksa lampi sang a a nuamzaw
lampi hon tawnsaktu ahi chi a kithukim in innlam ka zuanta uhi.
Mi nuamsa leh hausa pen hitaleh a
zawngpen ten in leng hunlui phawklou omlou hiveh aw chi in huai nung
teng ka ngaihtuah sek a, hiai banghiam i tuahte leh i muh a i zakte’n
hunlui hon ngaisaktu ahihdan niteng in ka mu tou deuhdeuh hi. Mikhat i
hinkhua a ding a poimawh mahmah a ana om ngeite toh lampi tuam tawn a i
pai hun in leng a phawkhuaina uh a bei tuankei. Mite simmawh in omta
mahleng ken bel simmawhna tuh hinkhua a ding a a sawhpih maimai ahi ka
chi a, hiai a sawhpih a tam zawhkhop leh hinkhua sunuamtu ahi chi in
hichibang hinkhua a a sawhpih tampi toh ka hinkhua ka paltou a, tutan
dong in ka hinkhua paisa a hon muniamte bang ka panpih khak hun kipahna
in ka dim a, liimlang a ka ki-etchiang a kei hoihlouhna bangbang ka
kimuhkik bang in hunlui ka en a, mi hoihlouh nate muzolou in kei
hoihlouhna ka kimu a, ngaihdam ngetna in amaute kiang ah ka panpih
theihna omsun chi in ka khut ka zaakkhe gige hi chi in Palal in tangthu
hon hilh tuh kon gelhsawn hi.
BEITA BEITA BEITA.
©Siamsinna leh Vakiangbu
Comments
Post a Comment