PA AW, KA NU SAMKIK MAI IN
By ~ Giakmawh Sumbawi
Writer’s note : Mulkim huai ka sak mahmah thu khat kon post mawk deh !
Nupa khat om in chin, tanu khat nei uh hi
vaw. Hilele huai numei pen in tangval dang ngaihjawng khat nei in chin,
a pasal khualzin kar a, huai tangvalpa toh ana kipolhkhawm zel uh. A
papi inn a tunkik ciang a, a zi hawlkheta.
A numei pen le huai zoh a, a lawmngaih
tangvalpa toh kiteng uh. Himahleh vangsiat huaitak a, sawt omkhom manlou
a, apasal thakpen hong damlou in chin si ta. Numei chauh a nunglamte
kiah nawkiknon ta.
A tanu uh le milak ah sanggah vangsel
tualniam mite muhsit mahmah leh genthei tak a, ahinkhua hon zangta. A pa
kiang ah, ” Pa aw, ka nu samkik mai ni, kei zaw mite’n sanggah liangvai
chi’a hon simmoh lua uh eive pianna tun leh zua phamlou buang sanggah
siambang ka sin zaw kei di’n simlei ah ka damsung teng ngaihtam sial
luankhi nulna lel hi. Pa aw , hon khongaih inla ka nu i samkik di aw ”
chi’a apa kiah ngen hi.
A Pa’n le diksa thou in chin, a tanu
Beh-le-Phung , U-le-Nau teng kaikhawm a, a zi samkik dia kisata, a zi
mawhna khelhna teng maisak vek, a zi toh nuamtak a khosakhawm dia
ciahpih ta uh. Hilele, sasat , sagawh ngai in chin, a tanu in a nu-le-pa
kiah kei man sagawh di vok ka va zong di’a kong tun hunhun in ip-pi in
kon tuam dia inn kong ah ka koih di. Huai ka zoh in kei singpua in ka
kuan ngal dia, huai vok pen a lu ana satpah un la, kong tun chiah hun
leh vai bangkim ih sufel vek di’ aw chi’a kuanta.
A tanu thupuk dantak a, a zingsang chiah,
a nu-le-pate’n a innkong uh a va et uleh, ip-pi a kituam khat vok hi
dia a tanu koih va mu un chi’n a tanupipa un, et le en nonlou a, a
lu/dek santak singkhuah a satsukpah. Vok ham dantak a, khatvei ham in
chin, huai zawh a, tuisou vuvut belsung ah huan di’a a kisak ua leh, a
tanu uh ana hi in chin, a nu leh pate’n lawmlawm aw.. . . Ka tanu, na
nu-le-pa hon ngaidam in aw..na nu-le-pa ziak a, guallai ah zehzum thuak
di ut nonlou a, na hinna na it nawn takei maw ! Ka ta aw, hon ngaidam in
aw…chi in a nu-le-pate’n hinkhua nuam hetlou in ana zangta uh hi.
Note :Simnuam na sa uh hia le ? Mulkimhuai thou maw le….
©Siamsinna leh Vakiangbu
Comments
Post a Comment