SENLAI NITE??

By ~ Hauzel Muan

Naupang chik ka hihlai ziak in bang cik kum a cih ka thei bun nawn kei hi. Singtang khua KAHLEI kichi a ka tenlai uh ahi. Khua sung a inn 40 vel khawng hidi’n ka ngaih tuah hi. kho sung ki vaipuak na ah a nuam mahmah pawl ahi ding a, kho sung mi te mahmah le ka ki hutuak mahmah mai uhi.

Unau pianpih dang ka nei kei a, ka pa toh ka nu toh ka kho sa uhi.Ka pa ahihleh mi fel mahmah ahih banah sa mat siam mahmah mai hi. Dam leng dam thei mahmah ahihman in ka kum khat kham khop di uh ka nu toh pangkhom in a khou khe gige uhi. A samat siam ziak mah in leng mite’n ngaina diak ua, hausapu in houh deih sak mahmah mai hi.

Hun hong pai zel in khosung a sahang khat a chang in nitak chiang in hon lut sek in vok, bawng, kel leh huang vual gantate hon tuah sek panta hi. A khekhap etdan in bel sahang piching, lian hun tawk mahmah ding chi in gen vek uhi. Khosung mipi nitak sawt nung a pawt ngam om nonlou in nitak dai baih thei mahmah mai hi. Vaikuan bang le nitumma in innlam hon zotpih pahmah uhi. A chang in houh huai sahang pen khomual khong ah hong ham sek a mullit huai mahmah mai hi.

Hucia khosung mi lungzing tak a om lah a loh didan thei tuan a om kei uhi. Nikhat ka pa’n khosung mipite kiang ah, hici a I om-om pen uh hoihlou ahi. Nikhat tei ei khosung mi hon nuai khong kha ding a hih ban ah niteng hun zak hon nongkaisak thei ahihman in sahang beng a sisan kai a poimoh leh sisan kai zen a pang a that khiak ut ahihdan gen hi. Huchi hial ding in khosing a tangvalte le a ngam omlou uhi. Khenkhat in houh na zi meithai sak ut maw? Na tapa tagah hisak ut maw? Kou zaw ka ut kei uh, kon zui kei ding uh chi uhi. Hucia kuamah a nung thuap ding a omlouh tak in ka pa amah kia kuan thouthou hon sawmta hi. Ka nu ngei in le phallou in khou mah leh khou zoulou in hong kisata hi. A kuankhiak ma in hausa pu kiah hichi bang in kichiamna neihpih masa hi. “Lohching a ka hong kik ngeingei leh na hauhsakna khua khat a hausa hihna non piak ding ahi a, sih leh man, tuah sia ka vatuah zenzen leh ka zi leh ka ta nana etkolh touh ua silh leh teen, nek leh tak a poimoh hun a hausa in mohpuakna nalak ding ahi chi in hausa in le lemsa hi. Ni 3 sung in huai sahang ka vabeng ding a huai sung in khosung mi kuamah gam nakuan khe kei un chi hi. Lohching in lohching kei leng ni 3 in kon kik ding a hucia ni 3 sung a kong kik keileh bang hiam vatuak ahi ta chi in hon koih un chi hi. Ka lohching ngeingei leh khomual a ka thau 3 vei kon gin ding a mipi a dawn ding in non delh ding uh chi in kuankheta hi.

Nikhat ni hong bei ding ahita a, ka nu bang a om thei non kei hi. Kei piching man hileng ka pa nung kazui ngeingei ding hi. Ka nu om maimai theilou in a chang in khosung a nupi khen khat in sun chiang khong in hong kithuahpih sek uhi. A ni nih ni ding hon hi a khosung mipi thu theih ut lah a theihna ding om tuanlou in om veng vung ua. A ni nih ni tan in le khomual a thau ging zak ding om nailou hi. Ka nu lunghimoh di dandan tu khong a ka ngaihtuah chiang in ka hehpih mahmah mai hi. Kei bel naupang chik ka hihlai ziak in lung himoh ding dan le ka thei tuan sese kei hi.

Ni thum ni ding hong hita a ka nu chih phet louh khosung mi kuamah om maimai thei a om nawn kei uhi. Ni hong sang dek pan chih in thau kikap ging kigal zak chiaichiai a aban zak ding om nonlou hi. Khenkhat ging tak dan in bel thau ging pen sahang a kapna hita ding ahi chi in khomual a thau hon ging pahta ding ahi chi uhi. Kua mah le innsung a om maimai thei a ki-om nawn kei hi. Kiging tak leh lamet bang hetlou in ni nem tan pha in le khomual ah thau ging ding zak in om nawn maimah lou hi. Mipi lungkia in gen ding theilou in ka nu bang hehnem in ompih maita uhi. Ni hong tum ding hipetmahta ahihman in mipite mahni innlam chiat ah kipai nawnta uhi. Nitak lam ann nek zoh in mipi kou innlam manoh in hong pai souhsouhta ua, kuamah in thil hoih kilamen nonlou chiat hi. Hucih laitak in khomual ah thau 1 vei hon ging in 2 vei in hon zom non zak in hon om hi. Khosung mipi kipak in kikou zuazua in khomual lam ah dak toh zampi toh delh tou tamai uhi. Ka nu bel chih ding dan le thei zezen lou ahihman in kei hon len in kel kong bul ah hon dinpih a, a amit a kipahna khitui a luang zungzung tamai hi. Sawtlou nung in ka pa khosung mipite’n hon zawng suk zoihzoih in lasak toh hong luum suk veng vung mai uhi. Ka pa bel hong liam in sisan hong kai niaunuai hi. A nung a tangval bang zah hiam in a sahang mat hon pua uhi. Khosung mipi kipak in sa-aih na nei in ni 3 mahmah zu ne in alaam uhi.

Mite dotna a ka pa dong dan in bel, sunma a thau hon ging pen ahihleh a sahang a kapna mah ahi. A khe khap zui a apailai in mun keensim lak ah sahang toh kimaituah phut ahihman in ngim hoih manlou in kap toh thuah ngal a, sahang in le boh zui ngal hi. A sahang bel kapkha a himahleh kapkha hoihlou ahihman in si zoulou hi. Sahang pen toh gamlak ah dakkal kim ding mahmah kibuan ek mai uhi. Sahang pen lian hun tawk ahihman in hat mahmah mai a buan hak mahmah chi hi. Tempawng a keng pen le koi lam tung hiam cih thei bun non lou hi. Sawt sim tak a kibuan zoh nung un a sahang toh mun keen lak ah tuuk suk ek ua huai mun ah ka pa’n vangphat huaitak in a tempawng vamaikha chitciat in huai toh pang in sahang pen satkha ek in sahang tang zou nonlou in thau a le kap non sese lou in sat in satlup thoh mai hi.

Hichi bang a singtang hinkhua zang kha mi bangzah hiamte’n a nop dan agen vek sek uhi. Nop a sakna ziak uh le kibang veklou hi. A diak in kum khat kham khop ding neite leh samat siamte’n nuamsa diak mahmah uhi. Ken le amau bangbang a singtang hinkhua a hun zat kichi ana nei kha lou ka hih man in ka zatkhak theihna omsun chuh hiai ka suangtuahna apat kon gelh dan himai ahi.

©Siamsinna leh Vakiangbu